Акафист Пресвятой Богородице пред иконой «Отрадо» или «Утешение» («Ватопедская») иной
Память: 03 февраля (21 января ст. ст.)
Не утвержден для общецерковного использования.
Конда́к 1.
Взбра́нной Воево́де Победи́тельная, я́ко изба́вльшеся от злы́х, благода́рственная воспису́ем Ти́ раби́,Твои́, Богоро́дице, но я́ко иму́щая держа́ву непобеди́мую от вся́ких на́с бе́д и скорбе́й свободи́, да зове́м Ти́:
Ра́дуйся, Ра́досте на́ша, отра́ду и утеше́ние ве́рным да́рующая.
И́кос 1.
А́нгел мно́жество и вся́ небе́сныя во́инства сла́вят Тебе́, Ма́терь все́х Богоро́дицу, я́ко источа́еши ра́дости и утеше́ния сердца́м челове́ков в ско́рби обрета́ющихся. Те́м же и мы́ печа́льми обремене́ннии, наде́жду спасе́ния в Тебе́ улучи́вши, умиле́нно взыва́ем:
Ра́дуйся, ма́тернее к на́м гре́шным благоволе́ние; ра́дуйся, прибега́ющих к Тебе́ кре́пкое заступле́ние.
Ра́дуйся, Боже́ственныя бла́гости Пода́тельнице; ра́дуйся, христиа́нскаго ро́да Заступле́ние.
Ра́дуйся, я́ко Тебе́ вся́ коле́на земна́я Ма́терию Бо́жиею испове́дуют; ра́дуйся, я́ко Твои́ми моли́твами ско́рби на́ша утиша́ются.
Ра́дуйся, Твои́м хода́тайством проше́ния блага́я на́ша исполня́ются; ра́дуйся, благода́ть и ми́лость ико́нами Твои́ми на́м явля́ющая.
Ра́дуйся, ми́р от пото́па грехо́внаго спаса́ющая; ра́дуйся, я́ко моля́щиеся Тебе́ от вся́каго зла́ сохраня́ются.
Ра́дуйся, я́ко Твои́ честны́я ико́ны чудеса́ми прославля́ются.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 2.
Ви́дя чуде́с мно́жество от честны́х ико́н Твои́х излива́ющихся, я́ко Ты́ еси́ моля́щихся Блага́я Помо́щнице, оби́димых Засту́пнице, ненаде́ющихся Наде́ждо, ско́рбных Отра́да и Утеше́ние, боля́щих исцеле́ние, тружда́ющихся по́моще, благода́рственно вопие́м о Тебе́ Бо́гу: Аллилу́иа.
И́кос 2.
Ра́зум пода́ждь на́м, Всеусе́рдная Предста́тельнице на́ша, в находя́щих на на́с лю́тых ско́рбех к Тебе́ прибега́ти, утеше́ния и́щущи. Ты́ же я́ко Блага́я, не оста́ви на́с во вся́кой тре́буемой на́м по́мощи, да такову́ю получи́вше взыва́ем Тебе́ ра́достно:
Ра́дуйся, обурева́емых ти́хое приста́нище; ра́дуйся, сомнева́ющихся изве́стное утвержде́ние.
Ра́дуйся, ско́рая Помо́щнице в ско́рбех и напа́стех; ра́дуйся, те́плая Засту́пнице во вся́ких обстоя́ниях.
Ра́дуйся, печа́ли на́ша Твои́м утеше́нием умоля́ющая; ра́дуйся, скорбя́ми грехи́ на́ша очища́ющая.
Ра́дуйся, в страда́ниях на́ших утеше́ние на́м подава́ющая; ра́дуйся, от внеза́пныя сме́рти без покая́ния моля́щихся Тебе́ избавля́ющая.
Ра́дуйся, от вра́г ви́димых и неви́димых на́с охраня́ющая; ра́дуйся, от нападе́ния злы́х челове́к спаса́ющая.
Ра́дуйся, во вся́ких ну́ждах прибега́ющим к Тебе́ помога́ющая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 3.
Си́лою свы́ше укрепи́ на́с, Блага́я Влады́чице, к Твоему́ заступле́нию с ве́рою притека́ющих и Твоего́ посеще́ния и промышле́ния сподо́би, мра́к уны́ния и скорбе́й облега́ющих на́с отгоня́я, да спаса́еми Тобо́ю вопие́м Бо́гу: Аллилу́иа.
И́кос 3
Иму́щи бога́тство милосе́рдия неизрече́нное, все́м прося́щим ру́ку по́мощи простира́еши, неду́ги врачу́я, ско́рби утоля́я, стра́сти угаша́я. Не пре́зри на́с, Блага́я Влады́чице, в печа́лех и ско́рбех на́ших к Тебе́ притека́ющих и вопию́щих:
Ра́дуйся, Еди́ная все́х Ма́ти, милосе́рдие на́м явля́ющая; ра́дуйся, ми́лости Свое́й сокро́вищницу все́м открыва́ющая.
Ра́дуйся, роди́телей скорбя́щих о ча́дех свои́х заблу́дших печа́ль утоля́ющая; ра́дуйся, вдо́вствующих подкрепля́ющая.
Ра́дуйся, сиро́тствующих до́бре устроя́ющая; ра́дуйся, все́х скорбя́щих утеше́ние.
Ра́дуйся, отчаява́ющихся еди́на Наде́ждо; ра́дуйся, изнемога́ющих от уны́ния Засту́пнице и подкрепле́ние.
Ра́дуйся, боля́щих те́лом и душе́ю благонаде́жное посеще́ние; ра́дуйся, разли́чными неду́гами одержи́мых прему́дре уврачева́ние.
Ра́дуйся, я́ко Тобо́ю по ме́ре ве́ры подае́тся соверше́нное исцеле́ние немощству́ющим.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 4.
Бу́ря мно́гих бе́д и напа́стей содержи́т на́с и волне́ния и́х в ми́ре терпи́м. Ты́ же, я́ко Ми́лостивая Ма́ти Спа́са на́шего Го́спода, воздви́гни ру́це к Сы́ну Твоему́, да при́зрит на лю́тыя серде́ц на́ших и исхи́тит на́с из пучи́ны отча́яния, вопию́щих Ему́: Аллилу́иа.
И́кос 4.
Слы́шащи, Пресвята́я Де́во и Ма́ти, я́ко явля́ла и явля́еши мно́гую ми́лость к ро́ду христиа́нскому, не оставля́й на́с во дни́ ско́рби и напа́сти и избавле́ние от си́х да́руй, мо́лим Тя́: храни́ и заступи́ все́х на́с от вся́кия беды́ и печа́ли, да в ми́ре воспева́ем Ти́ си́це:
Ра́дуйся, Засту́пнице на́ша, Твои́м всемо́щным заступле́нием от вся́кия ну́жды на́с избавля́ющая; ра́дуйся, усе́рдное моле́ние ко Го́споду о на́с принося́щая.
Ра́дуйся, Свои́м предста́тельством пра́ведный гне́в Бо́жий утоля́ющая; ра́дуйся, на ми́лость Его́ к на́м приклоня́ющая.
Ра́дуйся, Твое́ю по́мощию упова́ющих на Тя́ не оставля́ющая; ра́дуйся, до́бре подвиза́ющихся укрепля́ющая.
Ра́дуйся, на благо́е и душе́ поле́зное на́с наставля́ющая; ра́дуйся, души́ обремене́нныя забо́тами жите́йскими к попече́нию духо́вному направля́ющая.
Ра́дуйся, все́х ве́рных благо́е мздовоздая́ние; ра́дуйся, в забве́нии до́лга и че́сти живу́щих правосу́дное наказа́ние.
Ра́дуйся, в плене́нии, во у́зах су́щих подкрепле́ние и возвраще́ние.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 5.
Богосве́тлые чи́ны а́нгельския сла́вят Тебе́, я́ко Ма́терь все́х и Богоро́дицу. Мы́ же Тебе́, Засту́пнице на́шей, поклоня́ющеся, умиле́нное благоволе́ние прино́сим и упова́ющи на Твою́ ми́лость смире́нно мо́лим Тя́: ми́лостива пребу́ди к на́м, Влады́чице, и изба́ви на́с от бе́д и скорбе́й, да всегда́ прославля́ем Твое́ милосе́рдие зову́ще Бо́гу: Аллилу́иа.
И́кос 5.
Ви́деша си́лы небе́сныя, я́ко Твое́ю моли́твою гне́в Бо́жий утоля́ется, прославля́ют и велича́ют Твое́ милосе́рдие. Мы́ же гре́шнии на земли́ зря́ще Тебе́, изображе́нную Пречи́стую Богома́терь, умиле́нно взыва́ем:
Ра́дуйся, Ма́терь ро́да христиа́нскаго, милосе́рдие на́м явля́ющая; ра́дуйся, у Престо́ла Сы́на Твоего́ непреста́нно о христиа́нах моля́щаяся.
Ра́дуйся, любо́вию Свое́ю грехи́ на́ши покрыва́ющая; ра́дуйся, Твое́ю ми́лостию на́с заступа́ющая.
Ра́дуйся, исто́чник отра́ды и утеше́ния все́м источа́ющая; ра́дуйся, от междоусо́бия и ра́спри на́с охраня́ющая.
Ра́дуйся, вражду́ и не́нависть ми́ром и любо́вию утоля́ющая; ра́дуйся, ско́рбь и смуще́ние серде́ц на́ших умиля́ющая.
Ра́дуйся, гневли́востию одержи́мых вразумля́ющая; ра́дуйся, в ми́ре со все́ми живу́щих Отра́да и Утеше́ние.
Ра́дуйся, су́етная пре́лести ми́ра сего́ презира́ти на́с науча́ющая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 6.
Пропове́дуют ми́лости и чудеса́ Твоя́, Богома́ти, вси́ лю́ди правосла́внии, и́бо честны́м Свои́м покро́вом охраня́еши ве́сь ро́д христиа́нский. Те́м же вопие́м Ти́: изба́ви Твои́ми моли́твами все́х на́с от бе́д и напа́стей, да воспои́м вси́ Бо́гу: Аллилу́иа.
И́кос 6.
Возсия́ благода́ть светоза́рная от пречу́дных ико́н Твои́х, Богома́ти, пред ни́ми мы́ припа́дающе мо́лим Тя́: отгони́ о́блак наше́дших на на́с искуше́ний, да вопие́м Ти́:
Ра́дуйся, честны́я ико́ны Твоя́ чудеса́ми прославля́ющая; ра́дуйся, моля́щимся пред си́ми ико́нами с ве́рою проше́ния исполня́ющая.
Ра́дуйся, в беда́х су́щих заступа́ющая; ра́дуйся, упова́ющим на Тя́ спасе́ние подаю́щая.
Ра́дуйся, Предста́тельнице пред Бо́гом, за все́х на́с моля́щаяся; ра́дуйся, Засту́пнице ро́да христиа́нскаго, от Бо́га на́м дарова́нная.
Ра́дуйся, я́ко Ты́ еси́ хра́мов на́ших пе́рвейшее украше́ние; ра́дуйся, домо́в христиа́нских благослове́ние.
Ра́дуйся, правосла́вных люде́й Покро́в и Заступле́ние; ра́дуйся, всего́ ми́ра очище́ние.
Ра́дуйся, вся́ благополе́зная прося́щим у Тебе́ да́рующая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 7.
Хотя́щи яви́ти милосе́рдия Своего́ бе́здну повеле́ла, Пречи́стая, игу́мену оби́тели Ватопе́дския на Афо́не вра́т оби́тели и́х не отверза́ти, да избе́гнут Твои́м хода́тайством по суду́ Бо́жию предстоя́щаго нападе́ния вра́жескаго и та́ко изба́вльшеся ми́лостию Твое́ю бе́ды и напа́сти вси́ и́ноцы воспе́ша Бо́гу: Аллилу́иа.
И́кос 7.
Ди́вное чу́до яви́ла, Богома́ти, и́ноком спасе́ние, от святы́я ико́ны Своея́ изрекла́ еси́, но и зра́к ли́ка Твоего́ Пречи́стаго Сы́на су́щии на ико́не измени́ла еси́. Сего́ ра́ди ви́девше чу́до сие́ ве́лие и пресла́вное вси́ лю́ди возопи́ша Ти́:
Ра́дуйся, святы́я ико́ны Своя́ на земли́ во спасе́ние все́м яви́ти благоизво́лившая; ра́дуйся, ико́нами Свои́ми милосе́рдое на́м заступле́ние явля́ющая.
Ра́дуйся, чрез святы́я изображе́ния Твоя́ чудеса́ и ны́не источа́ющая; ра́дуйся, и́ми на́ша ско́рби и печа́ли утоля́ющая.
Ра́дуйся, я́ко на ико́ну Твою́ взира́юще Тебе́ Са́мой поклоня́емся; ра́дуйся, Твои́м ми́лостивым заступле́нием мы́ гре́шнии спаса́емся.
Ра́дуйся, Твои́ми святы́ми ико́нами гра́д на́ш освяти́вшая; ра́дуйся, те́ми сердца́ ве́рующих возвесели́вшая.
Ра́дуйся, гра́ды и ве́си Росси́йския Свои́ми чудотво́рными ико́нами от разоре́ния спаса́вшая; ра́дуйся, страну́ на́шу от порабоще́ния избавля́вшая.
Ра́дуйся, утеше́нием и ра́достию моля́щихся пред Твое́ю честно́ю ико́ною возвеселя́ющая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 8.
Стра́нники и прише́льцы на земли́ вси́ есмы́, по глаго́лу Апо́столову: беды́ от враго́в, ско́рби от бли́зких, печа́ли от лжебра́тии и сро́дник терпя́ще, в лише́ниях мно́гих. Ты́ же, Влады́чице, я́ко Ми́лостивая Уте́шительнице, наста́ви на́с к ти́хому приста́нищу и моли́ Сы́на Твоего́ утеше́ние и ра́дости на́м дарова́ти, да всегда́ вопие́м Ему́: Аллилу́иа.
И́кос 8.
Все́ житие́ на́ше на земли́ боле́зненно и печа́ли быва́ет прича́стно: сла́ва не стои́т, бога́тство ми́мо тече́т, дру́зи и и́скреннии сме́ртию отъе́млются, немоществу́ет те́ло, изнемога́ет и ду́х на́ш. К Тебе́ у́бо прибега́ем, о Богома́ти, пред Пречи́стою ико́ною Твое́ю припа́дающе, испо́лни ра́дости и утеше́ния ско́рбное се́рдце на́ше, да вопие́м Ти́:
Ра́дуйся, все́х к Тебе́ прибега́ющих ми́лостию Свое́ю покрыва́ющая; ра́дуйся, Ми́лостивая, и на́с ми́лующая.
Ра́дуйся, Домострои́тельнице, жи́знь на́шу до́бре устроя́ющая; ра́дуйся, отра́дою и утеше́нием печа́ли на́ши утоля́ющая.
Ра́дуйся, с Сы́ном Твои́м и Бо́гом ве́чно ца́рствующая; ра́дуйся, Ему́ о на́с моле́ния всегда́ принося́щая.
Ра́дуйся, жесто́кость се́рдца на́шего умягча́ющая; ра́дуйся, отча́явшихся наде́ждою возвеселя́ющая.
Ра́дуйся, Твои́м заступле́нием вражду́ющия на на́с отводя́щая; ра́дуйся, от ко́зней ду́ха зло́бы на́с спаса́ющая.
Ра́дуйся, ве́рующим проти́ву диа́вола си́лу и му́жество подаю́щая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 9.
Вся́кое естество́ а́нгельское ви́де Тя́, Богома́ти, у Престо́ла Сы́на Твоего́, предстоя́щую и за вся́ христиа́ны моля́щуюся, восхваля́ет Тя́, я́ко си́льным Свои́м предста́тельством гре́шных заступа́еши, прибега́ющих к Тебе́ от бе́д избавля́еши, печа́ли на́ша, отра́дою утоля́еши и мо́лишися о все́х ве́рою зову́щих: Аллилу́иа.
И́кос 9.
Вити́йство челове́ческое не возмо́жет по достоя́нию восхвали́ти Тя́, Пресвята́я Богоро́дице, и воспе́ти неисче́тныя чудеса́ Твоя́, и́ми же на́с просвеща́еши. Мы́ же Твои́ благодея́ния ве́дающе, душе́ю ра́дующеся Тебе́ глаго́лем:
Ра́дуйся, от напа́стей Твои́м предста́тельством на́с защища́ющая; ра́дуйся, от вся́ких бе́д Свои́м хода́тайством на́с изъима́ющая.
Ра́дуйся, от належа́щаго пра́веднаго преще́ния Бо́жия Твои́м умоле́нием на́с освобожда́ющая; ра́дуйся, от наше́ствия вра́жия на́с спаса́ющая.
Ра́дуйся, от дома́шния вражды́ и бра́ни единокро́вных ми́ром огражда́ющая; ра́дуйся, от смертоно́сныя я́звы прибега́ющих к Тебе́ с несумне́нную ве́рою исцеля́ющая.
Ра́дуйся, правосу́дие Бо́жие умилостивля́ющая; ра́дуйся, страны́ на́шея правосла́вныя Защи́тнице.
Ра́дуйся, все́х ве́рующих Блага́я Засту́пнице; ра́дуйся, все́х тружда́ющихся по́мощь и укрепле́ние.
Ра́дуйся, те́плая за все́х на́с Предста́тельнице.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 10.
Спасти́ хотя́ ро́д челове́ческий от ве́чныя му́ки и пре́лести вра́жия Человеколю́бец Госпо́дь Тебе́, Ма́терь Свою́, дарова́ земны́м во отра́ду и утеше́ние, да бу́деши оби́димым Засту́пнице, отчаява́ющимся Наде́ждо, скорбя́щим ра́дование, печа́льным утеше́ние и все́х в ну́ждах и напа́стех к Тебе́ прибега́ющих спаса́еши, вопию́щих ве́рно: Аллилу́иа.
И́кос 10.
Стена́ еси́ и заступле́ние все́м с ве́рою и любо́вию притека́ющим к Тебе́, Пречи́стая Влады́чице, те́м же мо́лим Тя́: заступи́ и покры́й, и огради́ все́х си́рых и безпомо́щных на́с от искуше́ний, озлобле́ний и бе́д с любо́вию взыва́ющим:
Ра́дуйся, Ма́ти Бо́жия, любо́вию матери́нскою на́с возлюби́вшая; ра́дуйся, я́ко Твоя́ ма́терняя моли́тва мно́го мо́жет, Влады́ку умилостивля́ющая.
Ра́дуйся, Милосе́рдная, две́ри милосе́рдия Бо́жия на́м отверза́ющая; ра́дуйся, к дело́м милосе́рдия на́с возбужда́ющая.
Ра́дуйся, Святы́я За́поведи исполня́ти на́с науча́ющая; ра́дуйся, люби́ти своего́ бли́жняго на́с наставля́ющая.
Ра́дуйся, гре́шники к покая́нию призыва́ющая; ра́дуйся, находя́щий на на́с о́блак печа́лей и скорбе́й разсеява́ющая.
Ра́дуйся, пла́мень страсте́й на́ших угаша́ющая; ра́дуйся, мра́к искуше́ний изгоня́ющая.
Ра́дуйся, Твои́м к Бо́гу проше́нием вся́ поле́зная на́м подаю́щая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 11.
Пе́ние всеумиле́нное прино́сим Ти́ раби́ Твои́, Богоро́дице, я́ко всеси́льней Засту́пнице ро́да христиа́нскаго: к Тебе́ бо в напа́стех и ско́рбех прибега́ем и пред Тобо́ю в беда́х на́ших сле́зы пролива́ем, пою́ще Бо́гу: Аллилу́иа.
И́кос 11.
Светоза́рне сия́ют ико́ны Твои́ святы́я, проявле́нныя на освяще́ние на́ше и утеше́ние. Мы́ же с любо́вию чту́ще и́х с ве́рою припа́даем пред ни́ми и вопие́м Ти́:
Ра́дуйся, Ма́ти Бо́га И́стиннаго, благочести́выя души́ просвеща́ющая; ра́дуйся, Уте́шительнице на́ша, обремене́нныя се́рдца умиря́ющая.
Ра́дуйся, все́м, Тебя́ призыва́ющим, ру́ку по́мощи простира́ющая; ра́дуйся, Тебе́ Ма́терию Бо́жией имену́ющим и почита́ющим на́м непреста́нно помога́ющая.
Ра́дуйся, упова́ющим на Тя́ и в ве́ре живу́щим непосты́дный коне́ц живота́ подаю́щая; ра́дуйся, во внеза́пных беда́х на на́с находя́щих подкрепля́ющая.
Ра́дуйся, от наси́лия и от внеза́пныя сме́рти охраня́ющая; ра́дуйся, от та́тей огражда́ющая.
Ра́дуйся, в сердца́х на́ших за́висть и небратолю́бие искореня́ющая; ра́дуйся, от наве́тов, клеветы́ и поноше́ний защища́ющая.
Ра́дуйся, отступа́ющых от ве́ры и це́ркви вразумля́ющая и на пу́ть пра́вый возвраща́ющая.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 12.
Благода́ть Боже́ственную испроси́ на́м у Сы́на Твоего́, Пречи́стая Богороди́тельнице, и простри́ ру́ку по́мощи, покры́й на́с кро́вом крилу́ Твое́ю, изба́ви от облежа́щия беды́ и напа́стей, отгони́ от на́с вся́каго врага́ и супоста́та, умири́ на́шу жи́знь, Влады́чице, и в печа́лех бе́дствующим помози́, да спаса́еми Тобо́ю воспева́ем Бо́гу: Аллилу́иа.
И́кос 12.
Пою́ще Твои́ ми́лости и чудеса́, Богороди́тельнице, хва́лим Тя́ вси́, я́ко тве́рдую Предста́тельницу на́шу, ве́руем и наде́емся, я́ко испро́сиши, Блага́я, вре́менная и ве́чная все́м воспева́ющим Тя́ си́це:
Ра́дуйся, непосты́дное на́ше Упова́ние в животе́ и по представле́нии на́шем; ра́дуйся, упова́ющим на Тя́ в ми́ре коне́ц живота́ подаю́щая.
Ра́дуйся, все́х и́скренне ве́рующих благословля́ющая; ра́дуйся, малове́рных и суеве́рных вразумля́ющая.
Ра́дуйся, непочита́ющих ико́н Твои́х святы́х наказу́ющая; ра́дуйся, поклоня́ющимся ико́нам Твои́м и Тя́ на по́мощь призыва́ющим помога́ющая.
Ра́дуйся, го́рдостию ума́ одержи́мых и от святы́я Це́ркви отходя́щих смиря́ющая; ра́дуйся, бла́гами ми́ра сего́ прельща́ющыхся и попече́ние сугу́бое о ни́х иму́щих све́том бла́га и́стиннаго озаря́ющая.
Ра́дуйся, в ю́ности до́брому и чи́стому житию́ Наста́внице; ра́дуйся, в ста́рости от серде́чнаго окамене́ния охрани́тельнице.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 13.
О, Всепе́тая и Всеми́лостивая Ма́ти, Пречи́стая Госпоже́ Богоро́дице! Услы́ши гла́с моля́щихся рабо́в Твои́х и прие́мши сие́ ма́лое моле́ние на́ше изба́ви на́с от вся́ких бе́д, скорбе́й и напа́стей: пода́ждь на́м в жи́зни ру́ку по́мощи, враги́ на́ша разжени́, неду́ги на́ша исцели́, вся́кую зло́бу и вражду́ отжени́ от на́с, в печа́лех жите́йских отра́ду и утеше́ние да́руй и бу́дущия изми́ му́ки о Тебе́ вопию́щих: Аллилу́иа, аллилу́иа, аллилу́иа.
Этот конда́к читается трижды, затем и́кос 1-й и конда́к 1-й.
И́кос 1.
А́нгел мно́жество и вся́ небе́сныя во́инства сла́вят Тебе́, Ма́терь все́х Богоро́дицу, я́ко источа́еши ра́дости и утеше́ния сердца́м челове́ков в ско́рби обрета́ющихся. Те́м же и мы́ печа́льми обремене́ннии, наде́жду спасе́ния в Тебе́ улучи́вши, умиле́нно взыва́ем:
Ра́дуйся, ма́тернее к на́м гре́шным благоволе́ние; ра́дуйся, прибега́ющих к Тебе́ кре́пкое заступле́ние.
Ра́дуйся, Боже́ственныя бла́гости Пода́тельнице; ра́дуйся, христиа́нскаго ро́да Заступле́ние.
Ра́дуйся, я́ко Тебе́ вся́ коле́на земна́я Ма́терию Бо́жиею испове́дуют; ра́дуйся, я́ко Твои́ми моли́твами ско́рби на́ша утиша́ются.
Ра́дуйся, Твои́м хода́тайством проше́ния блага́я на́ша исполня́ются; ра́дуйся, благода́ть и ми́лость ико́нами Твои́ми на́м явля́ющая.
Ра́дуйся, ми́р от пото́па грехо́внаго спаса́ющая; ра́дуйся, я́ко моля́щиеся Тебе́ от вся́каго зла́ сохраня́ются.
Ра́дуйся, я́ко Твои́ честны́я ико́ны чудеса́ми прославля́ются.
Ра́дуйся, Ра́досте на́ша, отра́ду и утеше́ние ве́рным да́рующая.
Конда́к 1.
Взбра́нной Воево́де Победи́тельная, я́ко изба́вльшеся от злы́х, благода́рственная воспису́ем Ти́ раби́,Твои́, Богоро́дице, но я́ко иму́щая держа́ву непобеди́мую от вся́ких на́с бе́д и скорбе́й свободи́, да зове́м Ти́:
Ра́дуйся, Ра́досте на́ша, отра́ду и утеше́ние ве́рным да́рующая.
Моли́тва.
Наде́жда все́м конце́м земли́, Пречи́стая Де́во Богоро́дице, Утеше́ние и Отра́до на́ше! Не гнуша́йся на́с гре́шных, на Твою́ бо ми́лость упова́ем. Угаси́ пла́мень грехо́вный и покая́нием ороси́ изсо́хшия сердца́ на́ша. Очи́сти у́м на́ш от грехо́вных помышле́ний. Приими́ моле́ния от души́ и се́рдца с воздыха́нием Тебе́ приноси́мыя. Бу́ди Хода́таице о на́с к Сы́ну Твоему́ и Бо́гу и отврати́ гне́в Его́ от на́с Ма́терними моли́твами. Укрепи́ в на́с ве́ру правосла́вную, вложи́ в на́с ду́х стра́ха Бо́жия, ду́х смире́ния, терпе́ния и любви́. Душе́вныя и теле́сныя я́звы исцели́, утиши́ бу́рю злы́х нападе́ний вра́жеских. Отыми́ бре́мя грехо́в на́ших и не оста́ви на́с до конца́ поги́бнути. Пода́ждь на́м ми́лость Твою́ и свято́е благослове́ние Свое́ все́м зде́ предстоя́щим и моля́щимся и всегда́ пребыва́яй с на́ми, подава́я приходя́щим к Тебе́ отра́ду и утеше́ние, по́мощь и заступле́ние, да сла́вим и велича́ем Тя́ вси́ до после́дняго на́шего воздыха́ния. Ами́нь.
Тропа́рь, гла́с 4.К Богоро́дице приле́жно ны́не притеце́м, гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны́ милосе́рдовавши, потщи́ся, погиба́ем от мно́жества прегреше́ний. Не отврати́ Твоея́ рабы́ тщи́, Тя́ бо и еди́ну наде́жду и́мамы.
А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ ѿра́да и҆лѝ ᲂу҆тѣше́нїе.
Конда́къ а҃.
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю ѿ всѧ́кихъ на́съ бѣ́дъ и҆ скорбе́й свободѝ, да зове́мъ тѝ: ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
І҆́косъ а҃.
А҆́гг҃лъ мно́жество и҆ всѧ̑ нбⷭ҇ныѧ вѡ́инства сла́вѧтъ тебѐ, мт҃рь всѣ́хъ бцⷣꙋ, ꙗ҆́кѡ и҆сточа́еши ра́дѡсти и҆ ᲂу҆тѣшє́нїѧ сердца́мъ человѣ́кѡвъ въ ско́рби ѡ҆брѣта́ющихсѧ. Тѣ́мъ же и҆ мы̀ печа́льми ѡ҆бремене́ннїи, наде́ждꙋ спасе́нїѧ въ тебѣ̀ ᲂу҆лꙋчи́вше, ᲂу҆миле́ннѡ взыва́емъ:
Ра́дꙋйсѧ, мт҃рнее къ на́мъ грѣ̑шнымъ бл҃говоле́нїе: ра́дꙋйсѧ, прибѣга́ющихъ къ тебѣ̀ крѣ́пкое застꙋпле́нїе.
Ра́дꙋйсѧ, бжⷭ҇твенныѧ бл҃гости пода́тельнице: ра́дꙋйсѧ, хрⷭ҇тїа́нскагѡ ро́да застꙋ́пнице.
Ра́дꙋйсѧ, ꙗ҆́кѡ тебѐ всѧ̑ колѣ̑на земна̑ѧ мт҃рїю бж҃їею и҆сповѣ́дꙋютъ: ра́дꙋйсѧ, ꙗ҆́кѡ твои́ми моли́твами скѡ́рби на́шѧ ᲂу҆тиша́ютсѧ.
Ра́дꙋйсѧ, твои́мъ хода́тайствомъ прошє́нїѧ бл҃га̑ѧ на̑ша и҆сполнѧ́ютсѧ: ра́дꙋйсѧ, бл҃года́ть и҆ ми́лость і҆кѡ́нами твои́ми на́мъ ꙗ҆влѧ́ющаѧ.
Ра́дꙋйсѧ, мі́ръ ѿ пото́па грѣхо́внагѡ сп҃са́ющаѧ: ра́дꙋйсѧ, ꙗ҆́кѡ молѧ́щїисѧ тебѣ̀ ѿ всѧ́кагѡ ѕла̀ сохранѧ́ютсѧ.
Ра́дꙋйсѧ, ꙗ҆́кѡ твоѧ̑ чтⷭ҇ны̑ѧ і҆кѡ́ны чꙋдеса́ми прославлѧ́ютсѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ в҃.
Ви́дѧ чꙋде́съ мно́жество ѿ чтⷭ҇ны́хъ і҆кѡ́нъ твои́хъ и҆злива́ющеесѧ и҆ разꙋмѣ́юще, ꙗ҆́кѡ ты̀ є҆сѝ молѧ́щихсѧ бл҃га́ѧ помо́щница, ѡ҆би́димыхъ застꙋ́пница, ненадѣ́ющихсѧ наде́жда, ско́рбныхъ ѿра́да и҆ ᲂу҆тѣше́нїе, болѧ́щихъ и҆сцѣле́нїе, трꙋжда́ющихсѧ по́мощь, бл҃года́рственнѡ вопїе́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ в҃.
Ра́зꙋмъ пода́ждь на́мъ, всеꙋсе́рднаѧ предста́тельнице на́ша, въ находѧ́щихъ на на́съ лю́тыхъ ско́рбѣхъ къ тебѣ̀ прибѣга́ти, ᲂу҆тѣше́нїѧ и҆́щꙋщи. Ты́ же, ꙗ҆́кѡ бл҃га́ѧ, не ѡ҆ста́ви на́съ во всѧ́кой тре́бꙋемой на́мъ по́мощи, да таковꙋ́ю полꙋчи́вше, взыва́емъ тебѣ̀ ра́достнѡ:
Ра́дꙋйсѧ, ѡ҆бꙋрева́емыхъ ти́хое приста́нище: ра́дꙋйсѧ, сꙋмнѧ́щихсѧ и҆звѣ́стное ᲂу҆твержде́нїе.
Ра́дꙋйсѧ, ско́раѧ помо́щнице въ ско́рбѣхъ и҆ напа́стѣхъ: ра́дꙋйсѧ, те́плаѧ застꙋ́пнице во всѧ́кихъ ѡ҆бстоѧ́нїихъ.
Ра́дꙋйсѧ, печа̑ли на́шѧ твои́мъ ᲂу҆тѣше́нїемъ ᲂу҆малѧ́ющаѧ: ра́дꙋйсѧ, скорбѧ́ми грѣхѝ на́шѧ ѡ҆чища́ющаѧ.
Ра́дꙋйсѧ, въ страда́нїѧхъ на́шихъ ᲂу҆тѣше́нїе на́мъ подаю́щаѧ: ра́дꙋйсѧ, ѿ внеза́пныѧ сме́рти без̾ покаѧ́нїѧ молѧ́щихсѧ тебѣ̀ и҆збавлѧ́ющаѧ.
Ра́дꙋйсѧ, ѿ вра̑гъ ви́димыхъ и҆ неви́димыхъ на́съ ѡ҆хранѧ́ющаѧ: ра́дꙋйсѧ, ѿ нападе́нїѧ ѕлы́хъ человѣ̑къ спаса́ющаѧ.
Ра́дꙋйсѧ, во всѧ́кихъ нꙋ́ждахъ прибѣга́ющымъ къ тебѣ̀ помога́ющаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ г҃.
Си́лою свы́ше ᲂу҆крѣпѝ на́съ, бл҃га́ѧ влⷣчце, къ твоемꙋ̀ застꙋпле́нїю съ вѣ́рою притека́ющихъ и҆ твоегѡ̀ посѣще́нїѧ и҆ промышле́нїѧ сподо́би, мра́къ ᲂу҆ны́нїѧ и҆ скорбе́й ѡ҆блежа́щихъ на́съ ѿгонѧ́ѧ, да сп҃са́еми тобо́ю вопїе́мъ бг҃ꙋ: А҆ллилꙋ́їа.
І҆́косъ г҃.
И҆мꙋ́щи бога́тство милосе́рдїѧ неизрече́нное, всѣ̑мъ просѧ́щымъ рꙋ́кꙋ по́мощи простира́еши, недꙋ́ги врачꙋ́ѧ, скѡ́рби ᲂу҆толѧ́ѧ, стра̑сти ᲂу҆гаша́ѧ. Не пре́зри на́съ, бл҃га́ѧ влⷣчце, въ печа́лѣхъ и҆ ско́рбѣхъ на́шихъ къ тебѣ̀ притека́ющихъ и҆ вопїю́щихъ:
Ра́дꙋйсѧ, є҆ди́наѧ всѣ́хъ мт҃и, милосе́рдїе на́мъ ꙗ҆влѧ́ющаѧ: ра́дꙋйсѧ, ми́лости своеѧ̀ сокро́вищницꙋ всѣ̑мъ ѿкрыва́ющаѧ.
Ра́дꙋйсѧ, роди́телей скорбѧ́щихъ ѡ҆ ча́дѣхъ свои́хъ заблꙋ́ждшихъ печа́ль ᲂу҆толѧ́ющаѧ: ра́дꙋйсѧ, вдо́вствꙋющихъ подкрѣплѧ́ющаѧ.
Ра́дꙋйсѧ, сиро́тствꙋющихъ до́брѣ ᲂу҆строѧ́ющаѧ: ра́дꙋйсѧ, всѣ́хъ скорбѧ́щихъ ᲂу҆тѣше́нїе.
Ра́дꙋйсѧ, ѿчаѧва́ющихсѧ є҆ди́на наде́ждо: ра́дꙋйсѧ, и҆знемога́ющихъ ѿ ᲂу҆ны́нїѧ застꙋ́пнице и҆ подкрѣпле́нїе.
Ра́дꙋйсѧ, болѧ́щихъ тѣ́ломъ и҆ дꙋше́ю бл҃гонаде́жное посѣще́нїе: ра́дꙋйсѧ, разли́чными недꙋ́ги ѡ҆держи́мыхъ премꙋ́дрое ᲂу҆врачева́нїе.
Ра́дꙋйсѧ, ꙗ҆́кѡ тобо́ю по мѣ́рѣ вѣ́ры подае́тсѧ соверше́нное и҆сцѣле́нїе немощствꙋ́ющымъ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ д҃.
Бꙋ́рѧ мно́гихъ бѣ́дъ и҆ напа́стей содержи́тъ на́съ и҆ волнє́нїѧ и҆́хъ въ мі́рѣ те́рпимъ: ты́ же, ꙗ҆́кѡ ми́лостиваѧ мт҃и сп҃са на́шегѡ гдⷭ҇а, воздви́гни рꙋ́цѣ къ сн҃ꙋ твоемꙋ̀, да при́зритъ на лю̑тыѧ скѡ́рби серде́цъ на́шихъ и҆ и҆схи́титъ на́съ и҆з̾ пꙋчи́ны ѿча́ѧнїѧ, вопїю́щихъ є҆мꙋ̀: А҆ллилꙋ́їа.
І҆́косъ д҃.
Слы́шащи, прест҃а́ѧ дв҃о и҆ мт҃и, ꙗ҆́кѡ ꙗ҆влѧ́ла и҆ ꙗ҆влѧ́еши мно́гꙋю ми́лость ро́дꙋ хрⷭ҇тїа́нскомꙋ, не ѡ҆ставлѧ́й на́съ во дни̑ ско́рби и҆ напа́сти, и҆ и҆збавле́нїе ѿ си́хъ да́рꙋй, мо́лимъ тѧ̀: сохранѝ и҆ застꙋпѝ всѣ́хъ на́съ ѿ всѧ́кїѧ бѣды̀ и҆ печа́ли, да въ ми́рѣ воспѣва́емъ тѝ си́це:
Ра́дꙋйсѧ, застꙋ́пнице на́ша, твои́мъ всемо́щнымъ застꙋпле́нїемъ ѿ всѧ́кїѧ нꙋ́жды на́съ и҆збавлѧ́ющаѧ: ра́дꙋйсѧ, ᲂу҆се́рдное моле́нїе ко гдⷭ҇ꙋ ѡ҆ на́съ приносѧ́щаѧ.
Ра́дꙋйсѧ, свои́мъ предста́тельствомъ пра́ведный гнѣ́въ бж҃їй ᲂу҆толѧ́ющаѧ: ра́дꙋйсѧ, на ми́лость є҆го̀ къ на́мъ приклонѧ́ющаѧ. Ра́дꙋйсѧ, твое́ю по́мощїю ᲂу҆пова́ющихъ на тѧ̀ не ѡ҆ставлѧ́ющаѧ: ра́дꙋйсѧ, до́брѣ подвиза́ющихсѧ ᲂу҆крѣплѧ́ющаѧ.
Ра́дꙋйсѧ, на бл҃го́е и҆ дꙋшеполе́зное на́съ наставлѧ́ющаѧ: ра́дꙋйсѧ, дꙋ́ши ѡ҆бременє́нныѧ забо́тами жите́йскими къ попече́нїю дх҃о́вномꙋ направлѧ́ющаѧ.
Ра́дꙋйсѧ, всѣ́хъ вѣ́рныхъ бл҃го́е мздовоздаѧ́нїе: ра́дꙋйсѧ, въ нерадѣ́нїи ѡ҆ дꙋшѐ свое́й живꙋ́щихъ на пꙋ́ть сп҃се́нїѧ наставлѧ́ющаѧ.
Ра́дꙋйсѧ, въ плѣне́нїи и҆ во ᲂу҆́захъ сꙋ́щихъ подкрѣпле́нїе и҆ возвраще́нїе.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ є҃.
Бг҃освѣ̑тлыѧ чинѝ а҆́гг҃льстїи сла́вѧтъ тебѐ, ꙗ҆́кѡ мт҃рь всѣ́хъ и҆ бцⷣꙋ. Мы́ же тебѣ̀, застꙋ́пницѣ на́шей, покланѧ́ющесѧ, ᲂу҆миле́нное бл҃гоговѣ́нїе прино́симъ и҆ ᲂу҆пова́ющи на твою̀ ми́лость, смире́ннѡ мо́лимъ тѧ̀: ми́лостива пребꙋ́ди къ на́мъ, влⷣчце, и҆ и҆зба́ви на́съ ѿ бѣ́дъ и҆ скорбе́й, да всегда̀ прославлѧ́емъ твоѐ милосе́рдїе зовꙋ́ще бг҃ꙋ: А҆ллилꙋ́їа.
І҆́косъ є҃.
Ви́дѣша си̑лы нбⷭ҇ныѧ, ꙗ҆́кѡ твое́ю моли́твою гнѣ́въ бж҃їй ᲂу҆толѧ́етсѧ, прославлѧ́ютъ и҆ велича́ютъ твоѐ милосе́рдїе. Мы́ же, грѣ́шнїи, на землѝ зрѧ́ще тебѐ, на і҆кѡ́нѣ и҆зѡбраже́ннꙋю пречⷭ҇тꙋю бг҃омт҃рь, ᲂу҆миле́ннѡ взыва́емъ:
Ра́дꙋйсѧ, мт҃и ро́да хрⷭ҇тїа́нскагѡ, милосе́рдїе на́мъ ꙗ҆влѧ́ющаѧ: ра́дꙋйсѧ, ᲂу҆ прⷭ҇то́ла сн҃а твоегѡ̀ непреста́ннѡ за ны̀ молѧ́щаѧсѧ.
Ра́дꙋйсѧ, любо́вїю свое́ю грѣхѝ на́шѧ покрыва́ющаѧ: ра́дꙋйсѧ, твое́ю ми́лостїю на́съ застꙋпа́ющаѧ.
Ра́дꙋйсѧ, и҆сто́чникъ ѿра́ды и҆ ᲂу҆тѣше́нїѧ всѣ̑мъ и҆сточа́ющаѧ: ра́дꙋйсѧ, ѿ междоꙋсо́бїѧ и҆ ра́спри на́съ ѡ҆хранѧ́ющаѧ.
Ра́дꙋйсѧ, враждꙋ̀ и҆ не́нависть ми́ромъ и҆ любо́вїю ᲂу҆толѧ́ющаѧ: ра́дꙋйсѧ, ско́рбь и҆ смꙋще́нїе серде́цъ на́шихъ ᲂу҆милѧ́ющаѧ. Ра́дꙋйсѧ, гнѣвли́востїю ѡ҆держи́мыхъ вразꙋмлѧ́ющаѧ: ра́дꙋйсѧ, въ ми́рѣ со всѣ́ми живꙋ́щихъ ѿра́да и҆ ᲂу҆тѣше́нїе.
Ра́дꙋйсѧ, сꙋ́єтнаѧ пре́лєсти мі́ра сегѡ̀ презира́ти на́съ наꙋча́ющаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ ѕ҃.
Проповѣ́дꙋютъ ми́лѡсти и҆ чꙋдеса̀ твоѧ̑, бг҃омт҃и, всѝ концы̀ вселе́нныѧ, и҆́бо чтⷭ҇ны́мъ свои́мъ покро́вомъ сохранѧ́еши ве́сь ро́дъ хрⷭ҇тїа́нскїй. Тѣ́мже вопїе́мъ тѝ: и҆зба́ви твои́ми моли́твами всѣ́хъ на́съ ѿ бѣ́дъ и҆ напа́стей, да воспои́мъ всѝ бг҃ꙋ: А҆ллилꙋ́їа.
І҆́косъ ѕ҃.
Возсїѧ̀ блгⷣть свѣтоза́рнаѧ ѿ пречꙋ́дныхъ і҆кѡ́нъ твои́хъ, бг҃омт҃и, пред̾ ни́миже припа́дающе, мо́лимъ тѧ̀: ѿгонѝ ѻ҆́блакъ наше́дшихъ на на́съ и҆скꙋше́нїй, да вопїе́мъ тѝ:
Ра́дꙋйсѧ, чтⷭ҇ны̑ѧ і҆кѡ́ны твоѧ̑ чꙋдеса́ми прославлѧ́ющаѧ: ра́дꙋйсѧ, молѧ́щымсѧ пред̾ си́ми і҆кѡ́нами съ вѣ́рою прошє́нїѧ и҆сполнѧ́ющаѧ.
Ра́дꙋйсѧ, въ бѣда́хъ сꙋ́щихъ застꙋпа́ющаѧ: ра́дꙋйсѧ, ᲂу҆пова́ющымъ на тѧ̀ спасе́нїе подаю́щаѧ.
Ра́дꙋйсѧ, предста́тельница пред̾ бг҃омъ, за всѣ́хъ на́съ молѧ́щаѧсѧ: ра́дꙋйсѧ, застꙋ́пнице ро́да хрⷭ҇тїа́нскагѡ, ѿ бг҃а на́мъ дарова́ннаѧ.
Ра́дꙋйсѧ, храмѡ́въ на́шихъ пе́рвѣйшее ᲂу҆краше́нїе: ра́дꙋйсѧ, домѡ́въ хрⷭ҇тїа́нскихъ бл҃гослове́нїе.
Ра́дꙋйсѧ, правосла́вныхъ люде́й покро́ве и҆ застꙋпле́нїе: ра́дꙋйсѧ, всегѡ̀ мі́ра ѡ҆чище́нїе. Ра́дꙋйсѧ, всѧ̑ бл҃гополє́знаѧ просѧ́щымъ ᲂу҆ тебѐ подаю́щаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ з҃.
Хотѧ́щи ꙗ҆ви́ти милосе́рдїѧ своегѡ̀ бе́зднꙋ, повелѣ́ла, пречⷭ҇таѧ, и҆гꙋ́менꙋ ѻ҆би́тели ватопе́дскїѧ вра́тъ ѡ҆би́тели и҆́хъ не ѿверза́ти, да и҆збѣ́гнꙋтъ твои́мъ хода́тайствомъ по сꙋдꙋ̀ бж҃їю предстоѧ́вшагѡ нападе́нїѧ вра́жескагѡ, и҆, та́кѡ и҆зба́вльшесѧ ми́лостїю твое́ю бѣды̀ и҆ напа́сти, всѝ и҆́ноцы воспѣ́ша бг҃ꙋ: А҆ллилꙋ́їа.
І҆́косъ з҃.
Ди́вное чꙋ́до ꙗ҆ви́ла є҆сѝ, бг҃омт҃и, ꙗ҆́кѡ не то́кмѡ и҆́нокѡмъ спасе́нїе, ѿ ст҃ы́ѧ і҆кѡ́ны своеѧ̀ и҆зрекла̀ є҆сѝ, но и҆ зра́къ ли́ка твоегѡ̀ пречⷭ҇тагѡ, сꙋ́щїй на і҆кѡ́нѣ, и҆змѣни́ла є҆сѝ. Сегѡ̀ ра́ди, ви́дѣвше чꙋ́до сїѐ ве́лїе и҆ пресла́вное, всѝ лю́дїе возопи́ша тѝ:
Ра́дꙋйсѧ, ст҃ы̑ѧ і҆кѡ́ны твоѧ̑ на землѝ во спасе́нїе всѣ̑мъ ꙗ҆ви́ти бл҃гоизво́лившаѧ: ра́дꙋйсѧ, і҆кѡ́нами свои́ми милосе́рдое на́мъ застꙋпле́нїе ꙗ҆влѧ́ющаѧ.
Ра́дꙋйсѧ, чрез̾ ст҃ы̑ѧ и҆зѡбраже́нїѧ твоѧ̑ чꙋдеса̀ и҆ ны́нѣ и҆сточа́ющаѧ: ра́дꙋйсѧ, и҆́ми на́шѧ скѡ́рби и҆ печа̑ли ᲂу҆толѧ́ющаѧ.
Ра́дꙋйсѧ, ꙗ҆́кѡ на і҆кѡ́нꙋ твою̀ взира́юще тебѣ̀ самѣ́й покланѧ́емсѧ: ра́дꙋйсѧ, ꙗ҆́кѡ твои́мъ ми́лостивымъ застꙋпле́нїемъ мы̀, грѣ́шнїи, сп҃са́емсѧ.
Ра́дꙋйсѧ, твои́ми ст҃ы́ми і҆кѡ́нами гра́дъ на́шъ ѡ҆ст҃и́вшаѧ: ра́дꙋйсѧ, тѣ́ми сердца̀ вѣ́рꙋющихъ возвесели́вшаѧ.
Ра́дꙋйсѧ, гра́ды и҆ вє́си рѡссі̑йскїѧ свои́ми чꙋдотво́рными і҆кѡ́нами ѿ разоре́нїѧ спа́сшаѧ: ра́дꙋйсѧ, странꙋ̀ на́шꙋ ѿ порабоще́нїѧ и҆збавлѧ́вшаѧ.
Ра́дꙋйсѧ, ᲂу҆тѣше́нїемъ и҆ ра́достїю молѧ́щихсѧ пред̾ твое́ю чⷭ҇тно́ю і҆кѡ́ною возвеселѧ́ющаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ и҃.
Стра́нники и҆ прише́льцы є҆смы̀ на землѝ, по глаго́лꙋ а҆пⷭ҇толовꙋ: бѣ́ды ѿ врагѡ́въ, скѡ́рби ѿ бли́жнихъ, печа̑ли ѿ лжебра́тїи и҆ срѡ́дникъ терпѧ́ще, въ лише́нїѧхъ мно́гихъ. Ты́ же, влⷣчце, ꙗ҆́кѡ ми́лостиваѧ ᲂу҆тѣ́шительнице, наста́ви на́съ къ ти́хомꙋ приста́нищꙋ и҆ молѝ сн҃а твоего̀ ᲂу҆тѣше́нїе и҆ ра́дость на́мъ дарова́ти, да всегда̀ вопїе́мъ є҆мꙋ̀: А҆ллилꙋ́їа.
І҆́косъ и҃.
Всѐ житїѐ на́ше на землѝ болѣ́зненнѡ и҆ печа́ли быва́етъ прича́стно: сла́ва не стои́тъ, бога́тство ми́мѡ тече́тъ, дрꙋ́зи и҆ и҆́скреннїи сме́ртїю ѿе́млютсѧ, немоществꙋ́етъ тѣ́ло, и҆знемога́етъ и҆ дꙋ́хъ на́шъ. Къ тебѣ̀ ᲂу҆̀бо прибѣга́емъ, ѡ҆ бг҃омт҃и, пред̾ пречⷭ҇тою і҆кѡ́ною твое́ю припа́дающе, и҆спо́лни ра́дости и҆ ᲂу҆тѣше́нїѧ скѡ́рбнаѧ сердца̀ на̑ша, да вопїе́мъ тѝ:
Ра́дꙋйсѧ, всѣ́хъ къ тебѣ̀ прибѣга́ющихъ ми́лостїю свое́ю покрыва́ющаѧ: ра́дꙋйсѧ, ми́лостиваѧ, на́съ ми́лꙋющаѧ.
Ра́дꙋйсѧ, домострои́тельнице, житїѐ на́ше до́брѣ ᲂу҆строѧ́ющаѧ: ра́дꙋйсѧ, ѿра́дою и҆ ᲂу҆тѣше́нїемъ печа̑ли на́шѧ ᲂу҆толѧ́ющаѧ.
Ра́дꙋйсѧ, съ сн҃омъ твои́мъ и҆ бг҃омъ вѣ́чнѡ ца́рствꙋющаѧ: ра́дꙋйсѧ, є҆мꙋ̀ ѡ҆ на́съ молє́нїѧ всегда̀ приносѧ́щаѧ.
Ра́дꙋйсѧ, жесто́кость се́рдца на́шегѡ ᲂу҆мѧгча́ющаѧ: ра́дꙋйсѧ, ѿча́ѧвшихсѧ наде́ждою возвеселѧ́ющаѧ. Ра́дꙋйсѧ, твои́мъ застꙋпле́нїемъ враждꙋ́ющыѧ на на́съ ѿводѧ́щаѧ: ра́дꙋйсѧ, ѿ ко́зней дꙋ́ха ѕло́бы на́съ спаса́ющаѧ.
Ра́дꙋйсѧ, вѣ́рꙋющымъ про́тивꙋ дїа́вола си́лꙋ и҆ мꙋ́жество подаю́щаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ ѳ҃.
Всѧ́кое є҆стество̀ а҆́гг҃льское ви́дѧще тѧ̀, ѽ бг҃омт҃и, ᲂу҆ прⷭ҇то́ла сн҃а твоегѡ̀ предстоѧ́щꙋю и҆ за всѧ̑ хрⷭ҇тїа́ны молѧ́щꙋюсѧ, восхвалѧ́етъ тѧ̀, ꙗ҆́кѡ си́льнымъ свои́мъ предста́тельствомъ грѣ́шныхъ застꙋпа́еши, прибѣга́ющихъ къ тебѣ̀ ѿ бѣ́дъ и҆збавлѧ́еши, печа̑ли на́шѧ ѿра́дою ᲂу҆толѧ́еши, и҆ мо́лишисѧ ѡ҆ всѣ́хъ съ вѣ́рою зовꙋ́щихъ: А҆ллилꙋ́їа.
І҆́косъ ѳ҃.
Вѣті́йство человѣ́ческое не возмо́жетъ по достоѧ́нїю восхвали́ти тѧ̀, прест҃а́ѧ бцⷣе, и҆ воспѣ́ти неисчє́тныѧ чꙋдеса̀ твоѧ̑, и҆́миже на́съ просвѣща́еши. Мы́ же твоѧ̑ бл҃годѣѧ̑нїѧ вѣ́дꙋще, дꙋше́ю ра́дꙋющесѧ тебѣ̀ глаго́лемъ:
Ра́дꙋйсѧ, ѿ напа́стей твои́мъ предста́тельствомъ на́съ защища́ющаѧ: ра́дꙋйсѧ, ѿ всѧ́кихъ бѣ́дъ свои́мъ хода́тайствомъ на́съ и҆з̾има́ющаѧ.
Ра́дꙋйсѧ, ѿ належа́щагѡ пра́веднагѡ преще́нїѧ бж҃їѧ твои́мъ застꙋпле́нїемъ на́съ свобожда́ющаѧ: ра́дꙋйсѧ, ѿ наше́ствїѧ вра́жїѧ на́съ спаса́ющаѧ.
Ра́дꙋйсѧ, ѿ дома́шнїѧ вражды̀ и҆ бра́ни є҆динокро́вныхъ ми́ромъ ѡ҆гражда́ющаѧ: ра́дꙋйсѧ, ѿ смертоно́сныѧ ꙗ҆́звы прибѣга́ющихъ къ тебѣ̀ съ несꙋмнѣ́ннꙋю вѣ́рою и҆сцѣлѧ́ющаѧ.
Ра́дꙋйсѧ, правосꙋ́дїе бж҃їе ᲂу҆милостивлѧ́ющаѧ: ра́дꙋйсѧ, страны̀ на́шеѧ правосла́вныѧ защи́тнице.
Ра́дꙋйсѧ, всѣ́хъ хрⷭ҇тїа́нъ бл҃га́ѧ застꙋ́пнице: ра́дꙋйсѧ, всѣ́хъ трꙋжда́ющихсѧ по́мощь и҆ ᲂу҆крѣпле́нїе.
Ра́дꙋйсѧ, те́плаѧ за всѣ́хъ на́съ предста́тельнице.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ і҃.
Сп҃стѝ хотѧ̀ ро́дъ человѣ́ческїй ѿ вѣ́чныѧ мꙋ́ки и҆ пре́лести вра́жїѧ, человѣколю́бецъ гдⷭ҇ь тебѐ, мт҃рь свою̀, дарова̀ земны̑мъ во ѿра́дꙋ и҆ ᲂу҆тѣше́нїе, да бꙋ́деши ѡ҆би̑димымъ застꙋ́пница, ѿчаѧва́ющымсѧ наде́жда, скорбѧ́щымъ ра́дованїе, печа̑льнымъ ᲂу҆тѣше́нїе, и҆ всѣ́хъ въ нꙋ́ждахъ и҆ напа́стѣхъ къ тебѣ̀ прибѣга́ющихъ да сп҃се́ши, вопїю́щихъ вѣ́рнѡ: А҆ллилꙋ́їа.
І҆́косъ і҃.
Стѣна̀ є҆сѝ и҆ застꙋпле́нїе всѣ̑мъ съ вѣ́рою и҆ любо́вїю притека́ющымъ къ тебѣ̀, пречⷭ҇таѧ влⷣчце, тѣ́мже мо́лимъ тѧ̀: застꙋпѝ, покры́й, и҆ ѡ҆градѝ всѣ́хъ си́рыхъ и҆ безпо́мощныхъ на́съ ѿ и҆скꙋше́нїй, ѡ҆ѕлобле́нїй и҆ бѣ́дъ, съ любо́вїю взыва́ющихъ:
Ра́дꙋйсѧ, мт҃и бж҃їѧ, любо́вїю мт҃рнею на́съ возлюби́вшаѧ: ра́дꙋйсѧ, ꙗ҆́кѡ твоѧ̀ моли́тва мно́гѡ мо́жетъ, влⷣкꙋ ᲂу҆милостивлѧ́ющаѧ.
Ра́дꙋйсѧ, милосе́рднаѧ, двє́ри милосе́рдїѧ бж҃їѧ на́мъ ѿверза́ющаѧ: ра́дꙋйсѧ, къ дѣлѡ́мъ милосе́рдїѧ на́съ возбꙋжда́ющаѧ.
Ра́дꙋйсѧ, ст҃ы̑ѧ за́пѡвѣди и҆сполнѧ́ти на́съ наꙋча́ющаѧ: ра́дꙋйсѧ, люби́ти своего̀ бли́жнѧго на́съ наставлѧ́ющаѧ.
Ра́дꙋйсѧ, грѣ́шники къ покаѧ́нїю призыва́ющаѧ: ра́дꙋйсѧ, находѧ́щїй на на́съ ѻ҆́блакъ печа́лей и҆ ско́рбей развѣва́ющаѧ.
Ра́дꙋйсѧ, пла́мень страсте́й на́шихъ ᲂу҆гаша́ющаѧ: ра́дꙋйсѧ, мра́къ и҆скꙋше́нїй и҆згонѧ́ющаѧ.
Ра́дꙋйсѧ, твои́мъ къ бг҃ꙋ проше́нїемъ всѧ̑ полє́знаѧ на́мъ подаю́щаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ а҃і.
Пѣ́нїе всеꙋмиле́нное прино́симъ тѝ рабѝ твоѝ, бцⷣе, ꙗ҆́кѡ всеси́льнѣй застꙋ́пницѣ ро́да хрⷭ҇тїа́нскагѡ: къ тебѣ́ бо въ напа́стѣхъ и҆ ско́рбѣхъ прибѣга́емъ и҆ пред̾ тобо́ю въ бѣда́хъ на́шихъ сле́зы пролива́емъ, пою́ще бг҃ꙋ: А҆ллилꙋ́їа.
І҆́косъ а҃і.
Свѣтоза́рнѡ сїѧ́ютъ і҆кѡ́ны твоѝ ст҃ы̑ѧ, проѧвлє́нныѧ на ѡ҆сщ҃е́нїе на́ше и҆ ᲂу҆тѣше́нїе. Мы́ же, съ любо́вїю чтꙋ́ще и҆̀хъ, съ вѣ́рою припа́даемъ пред̾ ни́ми и҆ вопїе́мъ тѝ:
Ра́дꙋйсѧ, мт҃и бг҃а и҆́стиннагѡ, бл҃гочєсти́выѧ дꙋ́ши просвѣща́ющаѧ: ра́дꙋйсѧ, ᲂу҆тѣ́шительнице на́ша, ѡ҆бременє́нныѧ сердца̀ ᲂу҆мирѧ́ющаѧ.
Ра́дꙋйсѧ, всѣ̑мъ призыва́ющымъ тѧ̀ рꙋ́кꙋ по́мощи простира́ющаѧ: ра́дꙋйсѧ, мт҃рїю бж҃їей тѧ̀ и҆менꙋ́ющымъ и҆ почита́ющымъ непреста́ннѡ помога́ющаѧ.
Ра́дꙋйсѧ, ᲂу҆пова́ющымъ на тѧ̀ и҆ въ вѣ́рѣ живꙋ́щымъ непосты́дный коне́цъ живота̀ подаю́щаѧ: ра́дꙋйсѧ, во внеза́пныхъ бѣда́хъ, на на́съ находѧ́щихъ, подкрѣплѧ́ющаѧ.
Ра́дꙋйсѧ, ѿ наси́лїѧ и҆ ѿ внеза́пныѧ сме́рти ѡ҆хранѧ́ющаѧ: ра́дꙋйсѧ, ѿ та́тей ѡ҆гражда́ющаѧ.
Ра́дꙋйсѧ, въ сердца́хъ на́шихъ за́висть и҆ небратолю́бїе и҆скоренѧ́ющаѧ: ра́дꙋйсѧ, ѿ навѣ́тѡвъ, клеветы̀ и҆ поноше́нїй защища́ющаѧ.
Ра́дꙋйсѧ, ѿстꙋпа́ющыхъ ѿ вѣ́ры и҆ цр҃кви вразꙋмлѧ́ющаѧ и҆ на пꙋ́ть пра́вый возвраща́ющаѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ в҃і.
Блгⷣть бжⷭ҇твеннꙋю и҆спросѝ на́мъ ᲂу҆ сн҃а твоегѡ̀, пречⷭ҇таѧ бг҃ороди́тельнице, и҆ прострѝ рꙋ́кꙋ по́мощи, покры́й на́съ кро́вомъ крилꙋ̀ твое́ю, и҆зба́ви ѿ ѡ҆блежа́щїѧ бѣды̀ и҆ напа́стей, ѿгонѝ ѿ на́съ всѧ́кагѡ врага̀ и҆ сꙋпоста́та, ᲂу҆мирѝ на́шꙋ жи́знь, влⷣчце, и҆ въ печа́лѣхъ бѣ́дствꙋющымъ помозѝ, да, спаса́еми тобо́ю, воспѣва́емъ бг҃ꙋ: А҆ллилꙋ́їа.
І҆́косъ в҃і.
Пою́ще твоѧ̑ ми́лѡсти и҆ чꙋдеса̀, бг҃ороди́тельнице, хва́лимъ тѧ̀ всѝ, ꙗ҆́кѡ тве́рдꙋю предста́тельницꙋ на́шꙋ, вѣ́рꙋемъ и҆ надѣ́емсѧ, ꙗ҆́кѡ и҆спро́сиши бл҃га̑ѧ вре́мєннаѧ и҆ вѣ̑чнаѧ всѣ̑мъ воспѣва́ющымъ тѧ̀ си́це:
Ра́дꙋйсѧ, непосты́дное на́ше ᲂу҆пова́нїе въ животѣ̀ и҆ по преставле́нїи на́шемъ: ра́дꙋйсѧ, ᲂу҆пова́ющымъ на тѧ̀ ми́ренъ коне́цъ живота̀ подаю́щаѧ.
Ра́дꙋйсѧ, всѣ́хъ вѣ́рныхъ бл҃гословлѧ́ющаѧ: ра́дꙋйсѧ, маловѣ́рныхъ и҆ сꙋевѣ́рныхъ вразꙋмлѧ́ющаѧ.
Ра́дꙋйсѧ, непочита́ющихъ і҆кѡ́нъ твои́хъ ст҃ы́хъ наказꙋ́ющаѧ: ра́дꙋйсѧ, покланѧ́ющымсѧ і҆кѡ́намъ твои̑мъ и҆ тѧ̀ на по́мощь призыва́ющымъ помога́ющаѧ.
Ра́дꙋйсѧ, го́рдостїю ᲂу҆ма̀ ѡ҆держи́мыхъ и҆ ѿ ст҃ы́ѧ цр҃кви ѿходѧ́щихъ смирѧ́ющаѧ: ра́дꙋйсѧ, бл҃гами мі́ра сегѡ̀ прельща́ющыхсѧ, и҆ попече́нїе сꙋгꙋ́бое ѡ҆ ни́хъ и҆мꙋ́щихъ свѣ́томъ бл҃га и҆́стиннагѡ ѡ҆зарѧ́ющаѧ.
Ра́дꙋйсѧ, въ ю҆́ности до́бромꙋ и҆ чи́стомꙋ житїю̀ наста́внице: ра́дꙋйсѧ, въ ста́рости ѿ серде́чнагѡ ѡ҆камене́нїѧ ѡ҆храни́тельнице.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ г҃і.
Ѽ, всепѣ́таѧ и҆ всеми́лостиваѧ мт҃и, пречⷭ҇таѧ гпⷭ҇жѐ бцⷣе! ᲂу҆слы́ши гла́съ молѧ́щихсѧ рабѡ́въ твои́хъ, и҆, прїе́мши сїѐ ма́лое моле́нїе на́ше, и҆зба́ви на́съ ѿ всѧ́кихъ бѣ́дъ, скорбе́й и҆ напа́стей, пода́ждь на́мъ рꙋ́кꙋ по́мощи, врагѝ на́шѧ разженѝ, недꙋ́ги на́шѧ и҆сцѣлѝ, всѧ́кꙋю ѕло́бꙋ и҆ враждꙋ̀ ѿженѝ ѿ на́съ, въ печа́лѣхъ жите́йскихъ ѿра́дꙋ и҆ ᲂу҆тѣше́нїе да́рꙋй, и҆ бꙋ́дꙋщїѧ и҆змѝ мꙋ́ки ѡ҆ тебѣ̀ вопїю́щихъ: А҆ллилꙋ́їа.
Се́й конда́къ чте́тсѧ три́жды. И҆ па́ки чте́тсѧ а҃-й і҆́косъ и҆ конда́къ а҃-й.
І҆́косъ а҃.
А҆́гг҃лъ мно́жество и҆ всѧ̑ нбⷭ҇ныѧ вѡ́инства сла́вѧтъ тебѐ, мт҃рь всѣ́хъ бцⷣꙋ, ꙗ҆́кѡ и҆сточа́еши ра́дѡсти и҆ ᲂу҆тѣшє́нїѧ сердца́мъ человѣ́кѡвъ въ ско́рби ѡ҆брѣта́ющихсѧ. Тѣ́мъ же и҆ мы̀ печа́льми ѡ҆бремене́ннїи, наде́ждꙋ спасе́нїѧ въ тебѣ̀ ᲂу҆лꙋчи́вше, ᲂу҆миле́ннѡ взыва́емъ:
Ра́дꙋйсѧ, мт҃рнее къ на́мъ грѣ̑шнымъ бл҃говоле́нїе: ра́дꙋйсѧ, прибѣга́ющихъ къ тебѣ̀ крѣ́пкое застꙋпле́нїе.
Ра́дꙋйсѧ, бжⷭ҇твенныѧ бл҃гости пода́тельнице: ра́дꙋйсѧ, хрⷭ҇тїа́нскагѡ ро́да застꙋ́пнице.
Ра́дꙋйсѧ, ꙗ҆́кѡ тебѐ всѧ̑ колѣ̑на земна̑ѧ мт҃рїю бж҃їею и҆сповѣ́дꙋютъ: ра́дꙋйсѧ, ꙗ҆́кѡ твои́ми моли́твами скѡ́рби на́шѧ ᲂу҆тиша́ютсѧ.
Ра́дꙋйсѧ, твои́мъ хода́тайствомъ прошє́нїѧ бл҃га̑ѧ на̑ша и҆сполнѧ́ютсѧ: ра́дꙋйсѧ, бл҃года́ть и҆ ми́лость і҆кѡ́нами твои́ми на́мъ ꙗ҆влѧ́ющаѧ.
Ра́дꙋйсѧ, мі́ръ ѿ пото́па грѣхо́внагѡ сп҃са́ющаѧ: ра́дꙋйсѧ, ꙗ҆́кѡ молѧ́щїисѧ тебѣ̀ ѿ всѧ́кагѡ ѕла̀ сохранѧ́ютсѧ.
Ра́дꙋйсѧ, ꙗ҆́кѡ твоѧ̑ чтⷭ҇ны̑ѧ і҆кѡ́ны чꙋдеса́ми прославлѧ́ютсѧ.
Ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Конда́къ а҃.
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе, но ꙗ҆́кѡ и҆мꙋ́щаѧ держа́вꙋ непобѣди́мꙋю ѿ всѧ́кихъ на́съ бѣ́дъ и҆ скорбе́й свободѝ, да зове́мъ тѝ: ра́дꙋйсѧ, ра́досте на́ша, ѿра́дꙋ и҆ ᲂу҆тѣше́нїе вѣ̑рнымъ да́рꙋющаѧ.
Моли́тва:
Наде́жда всѣ̑мъ концє́мъ землѝ, пречⷭ҇таѧ дв҃о бцⷣе, ᲂу҆тѣше́нїе и҆ ѿра́до на́ша! не гнꙋша́йсѧ на́съ грѣ́шныхъ, на твою́ бо ми́лость ᲂу҆пова́емъ. Оу҆гасѝ пла́мень грѣхо́вный, и҆ покаѧ́нїемъ ѡ҆росѝ и҆зсо́хшыѧ сердца̀ на̑ша. ѡ҆чи́сти ᲂу҆́мъ на́шъ ѿ грѣхо́вныхъ помышле́нїй. прїимѝ молє́нїѧ ѿ дꙋшѝ и҆ се́рдца съ воздыха́нїемъ тебѣ̀ приноси̑мыѧ. бꙋ́ди хода́таицею ѡ҆ на́съ къ сн҃ꙋ твоемꙋ̀ и҆ бг҃ꙋ, и҆ ѿвратѝ гнѣ́въ є҆гѡ̀ ѿ на́съ мт҃рними моли́твами. ᲂу҆крѣпѝ въ на́съ вѣ́рꙋ правосла́внꙋю, вложѝ въ на́съ дꙋ́хъ стра́ха бж҃їѧ, дꙋ́хъ смире́нїѧ, терпѣ́нїѧ и҆ любвѐ. дꙋшє́вныѧ и҆ тѣлє́сныѧ ꙗ҆́звы и҆сцѣлѝ, ᲂу҆ти́ши бꙋ́рю ѕлы́хъ нападе́нїй вра́жїихъ. ѿимѝ бре́мѧ грѣхѡ́въ на́шихъ, и҆ не ѡ҆ста́ви на́съ до конца̀ поги́бнꙋти. пода́ждь на́мъ ми́лость твою̀, и҆ ст҃о́е бл҃гослове́нїе своѐ, и҆ всегда̀ пребыва́й съ на́ми, подава́ѧ приходѧ́щымъ къ тебѣ̀ ѿра́дꙋ и҆ ᲂу҆тѣше́нїе, по́мощь и҆ застꙋпле́нїе, да сла́вимъ и҆ велича́емъ тѧ̀ всѝ до послѣ́днѧгѡ на́шегѡ воздыха́нїѧ. А҆ми́нь.
Моли́тва в҃.
Ѽ прест҃а́ѧ дв҃о, мт҃и гдⷭ҇а, цр҃и́це нб҃сѐ и҆ землѝ. Вонмѝ многоболѣ́зненномꙋ воздыха́нїю дꙋшѝ на́шеѧ, при́зри съ высоты̀ ст҃ы́ѧ твоеѧ̀ на на́съ, съ вѣ́рою и҆ любо́вїю поклонѧ́ющихсѧ пречⷭ҇томꙋ ѻ҆́бразꙋ твоемꙋ̀. Се́ бо грѣхмѝ погрꙋжа́емїи и҆ скорбьмѝ ѡ҆бꙋрева́емїи, взира́ѧ на тво́й ѻ҆́бразъ, ꙗ҆́кѡ живѣ́й тѝ сꙋ́щей съ на́ми, прино́симъ смирє́ннаѧ молє́нїѧ на̑ша. Не и҆́мамы бо ни и҆ны́ѧ по́мощи, ни и҆на́гѡ предста́тельства, ни ᲂу҆тѣше́нїѧ, то́кмо тебѣ̀, ѽ мт҃и всѣ́хъ скорбѧ́щихъ и҆ ѡ҆бремене́нныхъ. Помозѝ на́мъ немѡщны́мъ, ᲂу҆толѝ ско́рбь на́шꙋ, наста́ви на пꙋ́ть пра́вый на́съ заблꙋжда́ющихъ, ᲂу҆врачꙋ́й и҆ сп҃сѝ безнаде́жныхъ, да́рꙋй на́мъ про́чее вре́мѧ живота̀ на́шегѡ въ ми́рѣ и҆ тишинѣ̀ проводи́ти, пода́ждь хрⷭ҇тїа́нскꙋю кончи́нꙋ, и҆ на стра́шномъ сꙋдѣ̀ сн҃а твоегѡ̀ ꙗ҆ви́сѧ на́мъ млⷭ҇рдаѧ застꙋ́пница, да всегда̀ пое́мъ, велича́емъ и҆ сла́вимъ тѧ̀, ꙗ҆́кѡ бл҃гꙋ́ю застꙋ́пницꙋ ро́да хрⷭ҇тїа́нскагѡ, со всѣ́ми ᲂу҆годи́вшими бг҃ꙋ. А҆ми́нь.
Ватопедская икона Божией Матери находится в древнем Ватопедском монастыре на Афоне, в храме Благовещения. Название Ватопедской она получила от того, что близ этого монастыря упал в море с корабля юный царевич Аркадий и чудным заступлением Божией Матери был перенесен на берег целым и невредимым. Здесь нашли его стоящим под кустом, недалеко от обители. От этого события и произошло название "ватопед" ("куст отрока"). Святой царь Феодосий Великий в благодарность за чудное избавление сына украсил и щедро одарил Ватопедский монастырь.
На Ватопедской иконе Богоматерь изображена с лицом, обращенным к правому плечу, в память того, что она в 807 году, 21 января, обратила Свое лицо к игумену монастыря, стоявшему на молитве близ святой иконы, и предупредила его о намерении разбойников ограбить обитель. Изначально икона не была написана на доске. Когда-то образ Богородицы «Отрада и Утешение» был частью стенной росписи. Позднее изображение сняли со стены вместе со штукатуркой и заключили в киот. Уже много лет икона покрыта серебряной ризой с богатой чеканкой. Открыты только лики Богоматери и Младенца. Без оклада икону мало кто видел.
Шайка разбойников, решивших ограбить Ватопедский монастырь, высадившись в темноте на берег, укрылась в окрестностях монастыря, намереваясь дождаться открытия ворот обители.
В то время, когда разбойники ждали открытия ворот, закончилась утреня и братия стала расходиться по кельям для временного отдыха. В церкви остался один настоятель монастыря. Вдруг от стоящей вблизи иконы Божией Матери он услышал женский голос, предупреждающий об опасности, грозившей монастырю. Игумен устремил свой взор на икону и увидел, что лики Богородицы и Богомладенца изменились. Ватопедская икона Божьей матери была подобна «Одигитрии», на которой Богомладенец всегда изображается с благословляющей рукой.
И вот игумен видит, как Иисус поднял Свою руку, заграждая уста Богородицы, со словами: «Нет, Мать Моя, не говори им этого: пусть они накажутся за грехи свои». Но Богородица, уклоняясь от Его руки, двукратно произнесла те же слова: «Не отверзайте сегодня врат обители, а поднимитесь на стены монастырские и разгоните разбойников».
Поражённый игумен тотчас собрал братию. Все были изумлены изменением очертания иконы Божьей матери. После благодарственной молитвы перед святым образом воодушевлённые иноки поднялись на монастырские стены и успешно отразили нападение разбойников.
С тех пор Ватопедская икона стала называться «Отрада» или «Утешение», так на этой иконе лик Божией Матери ясно выражает сострадательную любовь, взор Её дышит милосердием и кротостью, а на устах покоится тихая улыбка утешения. Лик же Богомладенца строг.
В память этого чудесного события перед чудотворной иконой горит неугасимая лампада.
