Акафист Пресвятой Богородице пред иконой «Отрадо» или «Утешение» («Ватопедская»)
Утвержден Священным Синодом 26.12.2019 (журнал № 163).
Память: 03 февраля (21 января ст. ст.)
Утвержден для общецерковного использования.
Конда́к 1.
Возбра́нных Си́л Небе́сных ра́дость и хвале́ние, всего́ же ро́да челове́ча исправле́ние, ублажа́ем Тя́, Пречи́стая Де́во Ма́ти, Ты́ же, на́ше упова́ние еди́ное, низпосли́ душа́м отра́ду благода́тную, да пое́м Тебе́, о́браз ди́вный Тво́й чту́ще:
Ра́дуйся, Бо́жия Ма́ти, све́тлая на́ша Отра́до.
И́кос 1.
А́нгелов ли́цы дивя́тся, о́браз афо́нский Тво́й зря́ще, на не́мже, Пречи́стая Де́во и Ма́ти, от у́ст нетле́нных руко́ю десно́ю десни́цу Младе́нца отво́диши кро́тко. Что́ сие́ е́сть зна́мение о́браза? Мы́ же рече́м, пою́ще такова́я:
Ра́дуйся, Де́во, Всевы́шняго Ма́ти; ра́дуйся, ди́вный раю́ благода́ти.
Ра́дуйся, на́ша Отра́до Небе́сная; ра́дуйся, лю́дем Наде́ждо изве́стная.
Ра́дуйся, о́браз бо Тво́й спасе́ние возвеща́ет все́й земли́; ра́дуйся, взо́р бо Тво́й утеше́ние пребыва́ющим во тли́.
Ра́дуйся, све́те Небе́сный, мглу́ на́ших дни́й озаря́яй; ра́дуйся, цве́те нетле́нный, тле́н на́ших де́л оживля́яй.
Ра́дуйся, Ты́ бо моли́твы к Сы́ну за ми́р твори́ши; ра́дуйся, я́ко в те́плой моли́тве, а́ки свети́льник, гори́ши.
Ра́дуйся, ра́достно Ти́ восклица́ем; ра́дуйся, пе́сненно Тя́ воспева́ем.
Ра́дуйся, Бо́жия Ма́ти, све́тлая на́ша Отра́до.
Конда́к 2.
Недоуме́ет у́м до́льний та́йны Твоея́ разуме́ти, Пречи́стая Богоблаже́нная Де́во, Ты́ бо, в ло́но чи́стое де́йствием Ду́ха прии́мши безсе́менно О́тчее Сло́во, Бо́га челове́ком сочета́еши и пе́снь повелева́еши все́м пе́ти: Аллилу́иа.
И́кос 2.
Го́ру Афо́нскую, Де́во, Сы́ном Ти́ да́нную в жре́бий, покро́вом Свои́м осеня́ющи свы́ше, храни́ши ди́вно от бе́д и напа́стей. Благода́тных ико́н Твои́х чудесы́ оби́тели афо́нския сла́вятся и гла́сы преподо́бными Тя́ хва́лят:
Ра́дуйся, Де́во, отра́до в печа́лех; ра́дуйся, Скоропослу́шнице в ско́рбех.
Ра́дуйся, су́щим в пути́ Одиги́трие; ра́дуйся, хра́мов свяще́нных Врата́рнице.
Ра́дуйся, до́брая Предвозве́стнице уныва́ющим в беде́; ра́дуйся, ве́рное утеше́ние притека́ющим к Тебе́.
Ра́дуйся, бе́дным бога́тство, елеоно́сная Же́но; ра́дуйся, чту́щим ака́фист благоволя́щая та́йно.
Ра́дуйся, в ке́ллии ста́рцу ре́кшая «ра́дуйся» чу́дно; ра́дуйся, живоприе́мная Ма́ти.
Ра́дуйся, Тя́ бо досто́йно е́сть пе́ти; ра́дуйся, Тя́ бо по до́лгу вси́ ублажа́ем.
Ра́дуйся, Бо́жия Ма́ти, све́тлая на́ша Отра́до.
Конда́к 3.
Е́вину го́рдую пре́лесть Де́вы смире́нное «бу́ди» в оча́х Милосе́рдаго всю́ упраздня́ет: се́ Сы́н Бо́жий Сы́н Де́вы быва́ет и Бо́г непристу́пный живе́т с челове́ки, те́мже благода́рственное пе́ние немо́лчными усты́ возсыла́ем: Аллилу́иа.
И́кос 3.
Ликостоя́ще над мо́рем, све́том моли́твы сия́ют пред Бо́гом святы́ни Афо́на, и я́ве Бо́жия Ма́тере сла́ва Афо́на святы́я главы́ осеня́ет, к пе́нию на вся́кий ча́с призыва́ющи пусты́нники, Ю́ воспева́ющия:
Ра́дуйся, сла́во пусты́нь вожделе́нных; ра́дуйся, чу́до высо́т поднебе́сных.
Ра́дуйся, го́р и холмо́в осене́ние; ра́дуйся, ска́л и стремни́н освяще́ние.
Ра́дуйся, Е́юже открыва́ется пу́ть в Небе́сныя страны́; ра́дуйся, Е́юже отверза́ется ра́й нетле́нныя весны́.
Ра́дуйся, кри́не в юдо́ли, благоуха́нная ра́досте; ра́дуйся, цве́те кра́сный, приснотеку́щая сла́досте.
Ра́дуйся, све́та восто́че, до́лы земли́ озари́вый; ра́дуйся, жи́зни пото́че, во́ду живу́ю яви́вый.
Ра́дуйся, гла́се немо́лчных моле́ний; ра́дуйся, щи́те свяще́нных селе́ний.
Ра́дуйся, Бо́жия Ма́ти, све́тлая на́ша Отра́до.
Конда́к 4.
О челове́честем ро́де, е́же спасти́ ны, о Де́во, в моли́твах пред Сы́ном Сладча́йшим стои́ши; о Ма́ти, лю́дем блага́я Отра́до, Ты́ зри́ши бе́здну грехо́в на́ших лю́тых, мы́ же, в ро́ве истле́ния пове́рженнии, не сме́ем возвести́ очеса́ и воспе́ти: Аллилу́иа.
И́кос 4.
Ватопе́дская оби́тель сла́вится о́бразом чу́дным, ему́же е́сть дре́внее и́мя Отра́да. О не́м преда́ние ста́рец блаже́нных храни́т благода́тную ди́вную по́весть, во сла́ву Богоро́дицы Засту́пницы, да слы́шаще сию́, пое́м Пречи́стей:
Ра́дуйся, ми́ра блага́я Отра́до; ра́дуйся, ве́рным стено́ и огра́до.
Ра́дуйся, чу́до чуде́с несказа́нное; ра́дуйся, Не́бо небе́с осия́нное.
Ра́дуйся, безмо́лвие лю́бящим кра́ю жела́ний; ра́дуйся, безмяте́жия и́щущим раю́ жела́нный.
Ра́дуйся, я́ко Тобо́ю вся́ка душа́ ожива́ет; ра́дуйся, я́ко Тобо́ю ме́ртвенный у́м воскреса́ет.
Ра́дуйся, ве́ры горни́ло, и́мже неве́рие та́ет; ра́дуйся, та́йная си́ло, я́же от тли́ возставля́ет.
Ра́дуйся, сла́во отше́льников тре́звенных; ра́дуйся, кре́посте и́ноков бо́дренных.
Ра́дуйся, Бо́жия Ма́ти, све́тлая на́ша Отра́до.
Конда́к 5.
Ро́ждшая жи́знь всему́ ми́ру, я́вльшая ми́лости бе́здну, о Де́во Пречи́стая, о́ком ясне́йшим зри́ши на́ших печа́лей пучи́ну, слы́шиши гла́сы земны́х воздыха́ний, ско́ро на по́мощь к на́м притека́еши, и учи́ши на́с пе́ти Всеблаго́му: Аллилу́иа.
И́кос 5.
А́лчуще зла́та и кро́ве, де́рзко разбо́йницы с мо́ря оби́тель святу́ю в нощи́ облага́ют, да зело́ зау́тра, врато́м отворе́нным, уби́вше мона́хов, расхи́тят святы́ни. Ты́ же, неусы́пная Засту́пнице, уде́л Сво́й защища́еши, да сла́вит Тя́:
Ра́дуйся, Ватопе́да отра́до; ра́дуйся, вра́жиим ко́знем прегра́до.
Ра́дуйся, за́мыслов злы́х обличе́ние; ра́дуйся, лю́тых враго́в отраже́ние.
Ра́дуйся, я́ко не усыпа́еши, Сво́й спаса́ющи уде́л; ра́дуйся, я́ко отвраща́еши ту́чи смертоно́сных стре́л.
Ра́дуйся, кре́посте чту́щих свя́тость ико́н Твои́х чу́дных; ра́дуйся, сто́лпе пою́щих сла́ву чуде́с Твои́х мно́гих.
Ра́дуйся, кро́тких побе́до и пораже́ние го́рдых; ра́дуйся, пра́вых защи́то и посрамле́ние лжи́вых.
Ра́дуйся, Ты́ бо еси́ заблу́ждших корми́ло; ра́дуйся, Ты́ бо еси́ моли́твы кади́ло.
Ра́дуйся, Бо́жия Ма́ти, све́тлая на́ша Отра́до.
Конда́к 6.
Де́вственный взо́р Тво́й, блага́я Ма́ти, пото́ки любве́ и щедро́т излива́ет: Ты́ на́с храни́ши в исхо́дех и вхо́дех, спаса́еши ве́рных на су́ши и в мо́ри, а́ще то́кмо и́скра покая́ния возника́ет в се́рдце, е́же воспева́ти: Аллилу́иа.
И́кос 6.
О́бщия моли́твы в ча́с у́тра и́ноцы соверши́вше, отыдо́ша в ке́ллии до Литурги́и, оба́че игу́мен оби́тели, в хра́ме еди́н моля́ся, от ико́ны Твоея́ Отра́ды гла́с слы́ша: «Вра́т не отверза́йте дне́сь». Тре́петом же объя́т сы́й, си́це ста́рец восклица́ше:
Ра́дуйся, Де́во, я́ко еси́ стра́жа святы́ни; ра́дуйся, я́ко до́м Тво́й спаса́еши ны́не.
Ра́дуйся, щи́те зау́тра и но́щию; ра́дуйся, гро́зная си́лою мно́гою.
Ра́дуйся, я́ко милосе́рдием Твои́м щади́ши гре́шныя; ра́дуйся, я́ко поража́еши востаю́щия на ны́ си́льныя.
Ра́дуйся, ве́нче наде́жды, знаменова́ние ми́ра; ра́дуйся, же́зле побе́ды, обетова́ние сла́вы.
Ра́дуйся, чи́стый сапфи́ре, подо́бный виде́нию не́ба; ра́дуйся, све́тлый престо́ле и колесни́це Царе́ва.
Ра́дуйся, я́ко гла́с Тво́й сла́док уши́ма; ра́дуйся, я́ко о́браз Тво́й красе́н очи́ма.
Ра́дуйся, Бо́жия Ма́ти, све́тлая на́ша Отра́до.
Конда́к 7.
Сы́н Челове́ческий бли́з е́сть, Су́д Его́ Стра́шный при две́рех, — веща́ет на́м гла́с богоно́сных Писа́ний, оба́че неради́м о кончи́не, лени́вии су́ще, и гро́зным глаго́лом не вне́млем, вси́ бо в суете́ пови́ннии во́лею, оба́че с ве́рою и любо́вию к Тебе́, Богома́ти, прибега́юще, вопие́м Бо́гу: Аллилу́иа.
И́кос 7.
Тре́петно ста́рец игу́мен к о́бразу взо́р сво́й возво́дит и ви́дит: се́ ли́цы пред ни́м ожива́ют, и Де́ве гро́зный Младе́нец руко́ю уста́ загражда́ет, глаго́ля: О Ма́ти, не провещава́й, да нака́жутся. Ста́рец же, ужаса́яся, пое́т Пречи́стей та́ко:
Ра́дуйся, Де́во, Влады́чице ми́ра; ра́дуйся, Не́ба Цари́це блага́я.
Ра́дуйся, я́ко Бо́жий гне́в утоля́еши; ра́дуйся, я́ко гро́зный су́д отвраща́еши.
Ра́дуйся, Ма́ти всемилосе́рдая, избавле́ние от бе́д; ра́дуйся, по́моще благода́тная, упова́ние душа́м.
Ра́дуйся, Ты́ бо печа́ли на́ша отго́ниши ско́ро; ра́дуйся, Ты́ бо боле́зни гре́шных врачу́еши ди́вно.
Ра́дуйся, я́коже у́тро, све́т пролива́ющая ти́хий; ра́дуйся, я́коже со́лнце, согрева́ющая хла́дныя ду́ши.
Ра́дуйся, чу́дная Отрокови́це; ра́дуйся, ди́вная Богоневе́сто.
Ра́дуйся, Бо́жия Ма́ти, све́тлая на́ша Отра́до.
Конда́к 8.
Единомы́сленно, Де́во, взо́ры к Тебе́ обраща́ем, Ты́ бо в де́нь воздая́ния на́с не оставля́еши; простри́ у́бо на́м ще́друю Свою́ ру́ку, грехми́ бо падо́хом до а́дския бе́здны, и кто́ на́с изба́вит от гряду́щих му́к, кто́ же на́с утверди́т, во е́же пе́ти: Аллилу́иа.
И́кос 8.
Ма́ти отво́дит десни́цу сла́дкаго Сы́на и, ма́ло лице́ отклоня́ющи, ста́рцу глаго́лет: «На сте́ны бра́тия вся́ да выхо́дит и лю́тых разбо́йников да отража́ет!» Ста́рец же всю́ бра́тию глаша́ет и, ви́девше вси́ чу́до, воспева́ют:
Ра́дуйся, Ма́ти блага́я Христо́ва; ра́дуйся, ти́хой пусты́ни Покро́ве.
Ра́дуйся, а́ще и не ве́мы, ки́ими Тя́ хвале́бными возвели́чим словесы́; ра́дуйся, а́ще и не ве́мы, ки́я благода́тныя принесе́м Ти́ похвалы́.
Ра́дуйся, я́ко Све́т преве́чный но́сиши неопали́мо; ра́дуйся, я́ко О́гнь ипоста́сный держи́ши непостижи́мо.
Ра́дуйся, Тя́ бо и́мамы необори́мую сте́ну; ра́дуйся, Тя́ бо вси́ ве́мы ми́лости ве́лию бе́здну.
ра́дуйся, Херуви́мов честне́йшая; ра́дуйся, Серафи́мов сла́внейшая.
Ра́дуйся, Бо́жия Ма́ти, све́тлая на́ша Отра́до.
Конда́к 9.
И́ов, страда́лец пред Бо́гом, му́дренно на́с поуча́ет, глаго́ля: се́, благоче́стие — му́дрость и бла́го все́м уходя́щим от ми́ра и сла́достный по́двиг моли́твы подъе́мшим, и́мже помога́ет Богоро́дица и в моли́твах укрепля́ет, во е́же зва́ти: Аллилу́иа.
И́кос 9.
Ра́достно в хра́ме се́м зря́ще спи́сок с ико́ны Отра́ды афо́нских оби́телей да́р драгоце́нный, в моли́тве мы́сленно соедини́мся с хвале́бными ли́ки афо́нских отце́в, и́же от го́рных высо́т, превы́ше о́блак су́щих, Пречи́стую на́с пе́ти призыва́ют:
Ра́дуйся, стра́н и наро́дов святы́не; ра́дуйся, все́х христиа́н благосты́не.
Ра́дуйся, О́гнь во утро́бу прии́мшая; ра́дуйся, Сло́во по пло́ти яви́вшая.
Ра́дуйся, о́блаче све́та ле́гкий, в ми́р прине́сший Христа́; ра́дуйся, ле́ствице, веду́щая от земли́ в Небеса́.
Ра́дуйся, ста́мно ма́нны а́лчущим сла́дкия пи́щи; ра́дуйся, ча́ше злата́я жа́ждущим но́ваго пи́ва.
Ра́дуйся, ти́хая А́нгелов сла́во; ра́дуйся, лю́дем блага́я отра́до.
Ра́дуйся, вы́шнее Не́бо, све́т озаря́ющее ве́рным; ра́дуйся, ту́чная ни́во, все́м веселя́щая ду́ши.
Ра́дуйся, Бо́жия Ма́ти, све́тлая на́ша Отра́до.
Конда́к 10.
У́м к Небеси́ устреми́вше, чу́вства возне́сше над тле́ном, о, ко́ль вожделе́нно спасти́ся от ми́ра, иму́ще еди́но ду́ха стремле́ние к го́рним, еди́ну се́рдца наде́жду на Бо́га. Помога́й на́м, Де́во Богоро́дице, и в пу́ть веди́ на́с пра́вый, е́же пе́ти: Аллилу́иа.
И́кос 10.
О́браз честны́й провожда́я в пу́ть от Афо́на на се́вер в покро́в благода́тный оби́тели но́выя, в зало́г Небе́сныя по́мощи гра́ду, честны́й схимона́х святого́рец веща́ет: Се́ благослове́ние Влады́чицы! Моли́теся, и ве́руйте, и по́йте:
Ра́дуйся, я́ко еси́ на́м покро́в благода́тный; ра́дуйся, я́ко еси́ на́м зало́г упова́ний.
Ра́дуйся, су́щим в беда́х утеше́ние; ра́дуйся, су́щим в греха́х умиле́ние.
Ра́дуйся, я́ко в ча́с гне́ва Бо́жия укрепля́еши сердца́; ра́дуйся, я́ко в де́нь испыта́ния умудря́еши умы́.
Ра́дуйся, я́ко злы́х наве́тов ту́чи от на́с отвраща́еши; ра́дуйся, я́ко в го́ды бе́дствий от поги́бели на́с изыма́еши.
Ра́дуйся, я́ко во дни́ бу́рь безбо́жных Ты́ еси́ на́м еди́ная при́стань; ра́дуйся, я́ко мудрова́ний ло́жных на́с избавля́еши при́сно.
Ра́дуйся, в жи́зни на́м ти́хая ра́досте; ра́дуйся, в ве́чности ра́йская сла́во.
Ра́дуйся, Бо́жия Ма́ти, све́тлая на́ша Отра́до.
Конда́к 11.
Те́мныя си́лы в ми́ре си́лою и сла́вою владе́ют и све́та Христо́ва позна́ти не мо́гут, но ве́рным то́кмо моли́тва е́сть си́ла, и́м сле́зы — зало́г и побе́ды, и сла́вы. О Де́во Ма́ти, да́ждь на́м ту́чу сле́зную и бо́дрственный на́м ве́тр возве́й, пою́щим: Аллилу́иа.
И́кос 11.
Ра́дость на ли́цах сия́ет, гла́с вопие́т от Афо́на: Влады́чица ше́ствует к ва́м, исходи́те, срета́йте Де́ву Небе́с со свеща́ми, срета́йте же па́че Сию́ со слеза́ми ра́дости, любве́ и умиле́ния и пра́зднуйте, и све́тлым гла́сом по́йте:
Ра́дуйся, Киво́те освяще́нный; ра́дуйся, Престо́ле вознесе́нный.
Ра́дуйся, го́рних чино́в воспева́ние; ра́дуйся, а́довых си́л трепета́ние.
Ра́дуйся, я́ко еси́ весе́лие челове́ческим сердца́м; ра́дуйся, я́ко еси́ спасе́ние соврати́вшимся душа́м.
Ра́дуйся, я́ко гла́с Тво́й пресла́дкий ве́чную ра́дость веща́ет; ра́дуйся, я́ко взо́р Тво́й прети́хий на́м тишину́ обеща́ет.
Ра́дуйся, я́ко Сы́на и Бо́га Ты́ умоля́еши о лю́дех; ра́дуйся, я́ко ра́йских черто́гов Ты́ на́м отверза́еши две́ри.
Ра́дуйся, хра́мино Ду́ха Свята́го; ра́дуйся, ски́ние Бо́га Жива́го.
Ра́дуйся, Бо́жия Ма́ти, све́тлая на́ша Отра́до.
Конда́к 12.
А́нгельски дне́сь воспева́ем пе́снь благода́тней Мари́и: Сия́ бо е́сть сла́дость, и ра́й, и блаже́нство, отра́да в ча́с испыта́ний и гне́ва, наде́жда блаже́нств безконе́чных по сме́рти. Ра́дуйся у́бо, Засту́пнице усе́рдная, и ра́дость подава́й на́м пе́ти Бо́гу: Аллилу́иа.
И́кос 12.
Да защити́т Богома́ти о́бразом ди́вным Отра́ды моли́твы опло́т — монасты́рь се́й и хра́мы, да во ве́к не уга́снет лампа́да пред ли́ком спаси́тельным Де́вы, со́нми же мона́хов гла́сом ра́дости с миря́ны немо́лчно взыва́ют:
Ра́дуйся, хра́ме, светле́йший Сио́на; ра́дуйся, све́те и сла́во Афо́на.
Ра́дуйся, и́ноков мы́сль непреста́нная; ра́дуйся, де́вственных пе́снь неумо́лчная.
Ра́дуйся, я́ко ро́су утеше́ния посыла́еши во дни́; ра́дуйся, я́ко сле́зы умиле́ния исторга́еши в нощи́.
Ра́дуйся, ди́вное и́мя, чудотворя́щее вта́йне; ра́дуйся, Бо́жие ми́ро, в ми́р излия́нное ще́дро.
Ра́дуйся, я́ко Тобо́ю лие́тся на́м све́т безконе́чный; ра́дуйся, я́ко с Тобо́ю ве́чно Младе́нец предве́чный.
Ра́дуйся, све́тлосте лю́дем, Тя́ чту́щим; ра́дуйся, ра́досте на́м, Тя́ пою́щим.
Ра́дуйся, Бо́жия Ма́ти, све́тлая на́ша Отра́до.
Конда́к 13.
О всепречи́стая Де́во, све́тлая на́ша Отра́до, сладча́йшаго Сы́на нетле́нная Ма́ти! От вся́ких бе́д и скорбе́й огражда́й на́с и бу́дущия му́ки изми́ на́с, Блага́я, ра́дости же ве́чныя сподо́би на́с у го́рняго Престо́ла воспева́ти: Аллилу́иа.
Этот конда́к читается трижды, затем и́кос 1-й, и конда́к 1-й.
И́кос 1.
А́нгелов ли́цы дивя́тся, о́браз афо́нский Тво́й зря́ще, на не́мже, Пречи́стая Де́во и Ма́ти, от у́ст нетле́нных руко́ю десно́ю десни́цу Младе́нца отво́диши кро́тко. Что́ сие́ е́сть зна́мение о́браза? Мы́ же рече́м, пою́ще такова́я:
Ра́дуйся, Де́во, Всевы́шняго Ма́ти; ра́дуйся, ди́вный раю́ благода́ти.
Ра́дуйся, на́ша Отра́до Небе́сная; ра́дуйся, лю́дем Наде́ждо изве́стная.
Ра́дуйся, о́браз бо Тво́й спасе́ние возвеща́ет все́й земли́; ра́дуйся, взо́р бо Тво́й утеше́ние пребыва́ющим во тли́.
Ра́дуйся, све́те Небе́сный, мглу́ на́ших дни́й озаря́яй; ра́дуйся, цве́те нетле́нный, тле́н на́ших де́л оживля́яй.
Ра́дуйся, Ты́ бо моли́твы к Сы́ну за ми́р твори́ши; ра́дуйся, я́ко в те́плой моли́тве, а́ки свети́льник, гори́ши.
Ра́дуйся, ра́достно Ти́ восклица́ем; ра́дуйся, пе́сненно Тя́ воспева́ем.
Ра́дуйся, Бо́жия Ма́ти, све́тлая на́ша Отра́до.
Конда́к 1.
Возбра́нных Си́л Небе́сных ра́дость и хвале́ние, всего́ же ро́да челове́ча исправле́ние, ублажа́ем Тя́, Пречи́стая Де́во Ма́ти, Ты́ же, на́ше упова́ние еди́ное, низпосли́ душа́м отра́ду благода́тную, да пое́м Тебе́, о́браз ди́вный Тво́й чту́ще:
Ра́дуйся, Бо́жия Ма́ти, све́тлая на́ша Отра́до.
Моли́тва.
О Пресвята́я Влады́чице Госпоже́ Де́во Богоро́дице, Неве́сто нетле́нная, Ма́ти благослове́нная, све́тлая на́ша Отра́до, вожделе́нное Утеше́ние!
Приими́ ны́не дерзнове́нное и неотсту́пное моле́ние сие́, от гре́шных усте́н и недосто́йных ду́ш Тебе́ приноси́мое пред святы́м и светоза́рным Твои́м о́бразом.
Пощади́ ны, ми́лостивая и милосе́рдая и щедролюби́вая на́ша Засту́пнице, и не преда́ждь на́с суду́ и гне́ву Сы́на Твоего́ и Спа́са на́шего, Го́спода Иису́са Христа́, Ему́же без числа́ согреши́хом и пови́нни есмы́ осужде́нию и пра́ведному Его́ изрече́нию, е́же наказа́тися по грехо́м на́шим, превозше́дшим вся́кую ме́ру Его́ долготерпе́ния.
Прини́кни с высо́т Твои́х го́рних, иде́же А́нгели тре́петно сла́вят Тя́, и воззри́ на на́шу до́льнюю нищету́: ка́ко обнища́хом ве́рою, ка́ко бе́дствуем наде́ждею и оскуде́хом любо́вию, ка́ко умо́м омрачи́хомся, се́рдцем же и чу́вствы ожесточи́хомся. Уврачу́й на́с моли́твою Твое́ю, Де́во Целе́бнице. Возста́ви ны́, па́дшия ду́хом, укрепи́ разсла́бленныя умо́м, возбуди́ уны́лыя и отча́янныя, исцели́ боля́щия душе́ю и те́лом.
При́зри на гра́д се́й [или́: оби́тель сию́, или́: ве́сь сию́] и пощади́ его́ [или́: ю́], Бо́жий отводя́щи Твои́м предста́тельством гне́в. Укроти́ го́рдостная стремле́ния люде́й и богоотсту́пная и́х шата́ния. Возве́й ти́хое дыха́ние благода́ти Твоея́ на смяте́нныя ду́ши и сокруше́нная сердца́.
Сохрани́ супру́жеству чистоту́, матери́нству че́сть, де́вству благослове́ние. Низпосли́ под кро́в жили́щ на́ших освяща́ющий лу́ч боже́ственнаго све́та, да облича́тся дея́ния неподо́бная и устыдя́тся ре́чи ху́льныя, и укротя́тся мы́сли зло́бныя.
О миролюби́вая, бла́гостнейшая и тиша́йшая Де́во Ма́ти, о паде́ниих на́ших скорбя́щая, о спасе́нии на́шем воздыха́ющая! Утоли́ церко́вныя бу́ри, умири́ раско́лы, собери́ расточе́нныя, обрати́ отпа́дшия и все́х приведи́ в едине́ние Святы́я Це́ркве, да единоду́шно и единому́дренно сла́вится на земли́, я́коже и на Небеси́, еди́ное святе́йшее и спаси́тельное и́мя Единосу́щныя Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ ѿра́да [ᲂу҆тѣше́нїе].
Конда́къ а҃.
Возбра́нныхъ си́лъ нбⷭ҇ныхъ ра́дость и҆ хвале́нїе, всегѡ́ же ро́да человѣ́ча и҆справле́нїе, ᲂу҆бл҃жа́емъ тѧ̀, пречⷭ҇таѧ дв҃о мт҃и, ты́ же, на́ше ᲂу҆пова́нїе є҆ди́ное, низпослѝ дꙋша́мъ ѿра́дꙋ бл҃года́тнꙋю, да пое́мъ тебѣ̀, ѻ҆́бразъ ди́вный тво́й чтꙋ́ще:
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
І҆́косъ а҃.
А҆́гг҃лѡвъ ли́цы дивѧ́тсѧ, ѻ҆́бразъ а҆ѳѡ́нскїй тво́й зрѧ́ще, на не́мже, пречⷭ҇таѧ дв҃о и҆ мт҃и, ѿ ᲂу҆́стъ нетлѣ́нныхъ рꙋко́ю десно́ю десни́цꙋ млⷣнца ѿво́диши кро́ткѡ. Что̀ сїѐ є҆́сть зна́менїе ѻ҆́браза; Мы́ же рече́мъ, пою́ще такова̑ѧ:
Ра́дꙋйсѧ, дв҃о, всевы́шнѧгѡ мт҃и: ра́дꙋйсѧ, ди́вный раю̀ бл҃года́ти.
Ра́дꙋйсѧ, на́ша ѿра́до нбⷭ҇наѧ: ра́дꙋйсѧ, лю́демъ наде́ждо и҆звѣ́стнаѧ.
Ра́дꙋйсѧ, ѻ҆́бразъ бо тво́й сп҃се́нїе возвѣща́етъ все́й землѝ: ра́дꙋйсѧ, взо́ръ бо тво́й ᲂу҆тѣше́нїе пребыва́ющымъ во тлѝ.
Ра́дꙋйсѧ, свѣ́те нбⷭ҇ный, мглꙋ̀ на́шихъ дні́й ѡ҆зарѧ́ѧй: ра́дꙋйсѧ, цвѣ́те нетлѣ́нный, тлѣ́нъ на́шихъ дѣ́лъ ѡ҆живлѧ́ѧй.
Ра́дꙋйсѧ, ты́ бо мл҃твы къ сн҃ꙋ за мі́ръ твори́ши: ра́дꙋйсѧ, ꙗ҆́кѡ въ те́плой мл҃твѣ, а҆́ки свѣти́льникъ, гори́ши.
Ра́дꙋйсѧ, ра́достнѡ тѝ восклица́емъ: ра́дꙋйсѧ, пѣ́сненнѡ тѧ̀ воспѣва́емъ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ в҃.
Недоꙋмѣ́етъ ᲂу҆́мъ до́льнїй та́йны твоеѧ̀ разꙋмѣ́ти, пречⷭ҇таѧ бг҃обл҃же́ннаѧ дв҃о, ты́ бо въ ло́но чⷭ҇тое дѣ́йствїемъ дх҃а прїи́мши безсѣ́меннѡ ѻ҆́ч҃ее сло́во, бг҃а человѣ́кѡмъ сочета́еши и҆ пѣ́снь повелѣва́еши всѣ̑мъ пѣ́ти: А҆ллилꙋ́їа.
І҆́косъ в҃.
Го́рꙋ а҆ѳѡ́нскꙋю, дв҃о, сн҃омъ тѝ да́ннꙋю въ жре́бїй, покро́вомъ свои́мъ ѡ҆сѣнѧ́ющи свы́ше, храни́ши ди́внѡ ѿ бѣ́дъ и҆ напа́стей. Бл҃года́тныхъ і҆кѡ́нъ твои́хъ чꙋдесы̀ ѻ҆би́тєли а҆ѳѡ̑нскїѧ сла́вѧтсѧ и҆ гла̑сы прпⷣбными тѧ̀ хва́лѧтъ:
Ра́дꙋйсѧ, дв҃о, ѿра́до въ печа́лехъ: ра́дꙋйсѧ, скоропослꙋ́шнице въ ско́рбехъ.
Ра́дꙋйсѧ, сꙋ́щымъ въ пꙋтѝ ѻ҆диги́трїе: ра́дꙋйсѧ, хра́мѡвъ сщ҃е́нныхъ врата́рнице.
Ра́дꙋйсѧ, до́браѧ предвозвѣ́стнице ᲂу҆ныва́ющымъ въ бѣдѣ̀: ра́дꙋйсѧ, вѣ́рное ᲂу҆тѣше́нїе притека́ющымъ къ тебѣ̀.
Ра́дꙋйсѧ, бѣ̑днымъ бога́тство, є҆леоно́снаѧ же́но: ра́дꙋйсѧ, чтꙋ́щымъ а҆ка́ѳїстъ бл҃говолѧ́щаѧ та́йнѡ.
Ра́дꙋйсѧ, въ ке́ллїи ста́рцꙋ ре́кшаѧ: ра́дꙋйсѧ, чꙋ́днѡ: ра́дꙋйсѧ, живопрїе́мнаѧ мт҃и.
Ра́дꙋйсѧ, тѧ́ бо досто́йно є҆́сть пѣ́ти: ра́дꙋйсѧ, тѧ́ бо по до́лгꙋ всѝ ᲂу҆бл҃жа́емъ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ г҃.
Є҆́ѵинꙋ го́рдꙋю пре́лесть дв҃ы смире́нное: бꙋ́ди, въ ѻ҆ча́хъ млⷭ҇рдагѡ всю̀ ᲂу҆празднѧ́етъ: сѐ сн҃ъ бж҃їй сн҃ъ дв҃ы быва́етъ и҆ бг҃ъ непристꙋ́пный живе́тъ съ человѣ̑ки, тѣ́мже бл҃года́рственное пѣ́нїе немо́лчными ᲂу҆сты̀ возсыла́емъ: А҆ллилꙋ́їа.
І҆́косъ г҃.
Ликостоѧ́ще над̾ мо́ремъ, свѣ́томъ мл҃твы сїѧ́ютъ пред̾ бг҃омъ ст҃ы̑ни а҆ѳѡ́на, и҆ ꙗ҆́вѣ бж҃їѧ мт҃ре сла́ва а҆ѳѡ́на ст҃ы̑ѧ главы̑ ѡ҆сѣнѧ́етъ, къ пѣ́нїю на всѧ́кїй ча́съ призыва́ющи пꙋсты́нники, ю҆̀ воспѣва́ющыѧ:
Ра́дꙋйсѧ, сла́во пꙋсты́нь вожделѣ́нныхъ: ра́дꙋйсѧ, чꙋ́до высо́тъ поднебе́сныхъ.
Ра́дꙋйсѧ, го́ръ и҆ холмѡ́въ ѡ҆сѣне́нїе: ра́дꙋйсѧ, ска́лъ и҆ стремни́нъ ѡ҆сщ҃е́нїе.
Ра́дꙋйсѧ, є҆́юже ѿкрыва́етсѧ пꙋ́ть въ нбⷭ҇ныѧ страны̑: ра́дꙋйсѧ, є҆́юже ѿверза́етсѧ ра́й нетлѣ́нныѧ весны̀.
Ра́дꙋйсѧ, крі́не въ ю҆до́ли, бл҃гоꙋха́ннаѧ ра́досте: ра́дꙋйсѧ, цвѣ́те кра́сный, приснотекꙋ́щаѧ сла́досте.
Ра́дꙋйсѧ, свѣ́та восто́че, до́лы землѝ ѡ҆зари́вый: ра́дꙋйсѧ, жи́зни пото́че, во́дꙋ живꙋ́ю ꙗ҆ви́вый.
Ра́дꙋйсѧ, гла́се немо́лчныхъ моле́нїй: ра́дꙋйсѧ, щи́те сщ҃е́нныхъ селе́нїй.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ д҃.
Ѡ҆ человѣ́честѣмъ ро́дѣ, є҆́же сп҃сти́ ны, ѽ дв҃о, въ мл҃твахъ пред̾ сн҃омъ сладча́йшимъ стои́ши: ѽ мт҃и, лю́демъ бл҃га́ѧ ѿра́до, ты̀ зри́ши бе́зднꙋ грѣхѡ́въ на́шихъ лю́тыхъ, мы́ же въ ро́вѣ и҆стлѣ́нїѧ пове́рженнїи, не смѣ́емъ возвѣстѝ ѻ҆чеса̀ и҆ воспѣ́ти: А҆ллилꙋ́їа.
І҆́косъ д҃.
Ватопе́дскаѧ ѻ҆би́тель сла́витсѧ ѻ҆́бразомъ чꙋ́днымъ, є҆мꙋ́же є҆́сть дре́внее и҆́мѧ ѿра́да. Ѡ҆ не́мъ преда́нїе ста́рецъ бл҃же́нныхъ храни́тъ бл҃года́тнꙋю ди́внꙋю по́вѣсть, во сла́вꙋ бцⷣы застꙋ́пницы, да слы́шаще сїю̀, пое́мъ пречⷭ҇тѣй:
Ра́дꙋйсѧ, мі́ра бл҃га́ѧ ѿра́до: ра́дꙋйсѧ, вѣ̑рнымъ стѣно̀ и҆ ѡ҆гра́до.
Ра́дꙋйсѧ, чꙋ́до чꙋде́съ несказа́нное: ра́дꙋйсѧ, нб҃о нб҃съ ѡ҆сїѧ́нное.
Ра́дꙋйсѧ, безмо́лвїе лю́бѧщымъ кра́ю жела́нїй: ра́дꙋйсѧ, безмѧте́жїѧ и҆́щꙋщымъ раю̀ жела́нный.
Ра́дꙋйсѧ, ꙗ҆́кѡ тобо́ю всѧ́ка дꙋша̀ ѡ҆жива́етъ: ра́дꙋйсѧ, ꙗ҆́кѡ тобо́ю ме́ртвенный ᲂу҆́мъ воскреса́етъ.
Ра́дꙋйсѧ, вѣ́ры горни́ло, и҆́мже невѣ́рїе та́етъ: ра́дꙋйсѧ, та́йнаѧ си́ло, ꙗ҆́же ѿ тлѝ возставлѧ́етъ.
Ра́дꙋйсѧ, сла́во ѿше́льникѡвъ тре́звенныхъ: ра́дꙋйсѧ, крѣ́посте и҆́нокѡвъ бо́дренныхъ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ є҃.
Ро́ждшаѧ жи́знь всемꙋ̀ мі́рꙋ, ꙗ҆́вльшаѧ млⷭ҇ти бе́зднꙋ, ѽ дв҃о пречⷭ҇таѧ, ѻ҆́комъ ꙗ҆снѣ́йшимъ зри́ши на́шихъ печа́лей пꙋчи́нꙋ, слы́шиши гла́сы земны́хъ воздыха́нїй, ско́рѡ на по́мощь къ на́мъ притека́еши, и҆ ᲂу҆чи́ши на́съ пѣ́ти всебл҃го́мꙋ: А҆ллилꙋ́їа.
І҆́косъ є҃.
А҆́лчꙋще зла́та и҆ кро́ве, де́рзкѡ разбѡ́йницы съ мо́рѧ ѻ҆би́тель ст҃ꙋ́ю въ нощѝ ѡ҆блага́ютъ, да ѕѣлѡ̀ заꙋ́тра, вратѡ́мъ ѿворє́ннымъ, ᲂу҆би́вше мона́хѡвъ, расхи́тѧтъ ст҃ы̑ни. Ты́ же, неꙋсы́пнаѧ застꙋ́пнице, ᲂу҆дѣ́лъ сво́й защища́еши, да сла́витъ тѧ̀:
Ра́дꙋйсѧ, ватопе́да ѿра́до: ра́дꙋйсѧ, вра̑жїимъ ко́знемъ прегра́до.
Ра́дꙋйсѧ, за́мыслѡвъ ѕлы́хъ ѡ҆бличе́нїе: ра́дꙋйсѧ, лю́тыхъ врагѡ́въ ѿраже́нїе.
Ра́дꙋйсѧ, ꙗ҆́кѡ не ᲂу҆сыпа́еши, сво́й сп҃са́ющи ᲂу҆дѣ́лъ: ра́дꙋйсѧ, ꙗ҆́кѡ ѿвраща́еши тꙋ́чы смертоно́сныхъ стрѣ́лъ.
Ра́дꙋйсѧ, крѣ́посте чтꙋ́щихъ ст҃ость і҆кѡ́нъ твои́хъ чꙋ́дныхъ: ра́дꙋйсѧ, сто́лпе пою́щихъ сла́вꙋ чꙋде́съ твои́хъ мно́гихъ.
Ра́дꙋйсѧ, кро́ткихъ побѣ́до и҆ пораже́нїе го́рдыхъ: ра́дꙋйсѧ, пра́выхъ защи́то и҆ посрамле́нїе лжи́выхъ.
Ра́дꙋйсѧ, ты́ бо є҆сѝ заблꙋ́ждшихъ корми́ло: ра́дꙋйсѧ, ты́ бо є҆сѝ мл҃твы кади́ло.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ ѕ҃.
Двⷭ҇твенный взо́ръ тво́й, бл҃га́ѧ мт҃и, пото́ки любвѐ и҆ щедро́тъ и҆злива́етъ: ты̀ на́съ храни́ши въ и҆схо́дѣхъ и҆ вхо́дѣхъ, сп҃са́еши вѣ́рныхъ на сꙋ́ши и҆ въ мо́ри, а҆́ще то́кмѡ и҆́скра покаѧ́нїѧ возника́етъ въ се́рдцѣ, є҆́же воспѣва́ти: А҆ллилꙋ́їа.
І҆́косъ ѕ҃.
Ѻ҆́бщїѧ мл҃твы въ ча́съ ᲂу҆́тра и҆́ноцы соверши́вше, ѿидо́ша въ кє́ллїи до лїтꙋргі́и, ѻ҆ба́че и҆гꙋ́менъ ѻ҆би́тели, въ хра́мѣ є҆ди́нъ молѧ́сѧ, ѿ і҆кѡ́ны твоеѧ̀ ѿра́ды гла́съ слы́ша: вра́тъ не ѿверза́йте дне́сь. Тре́петомъ же ѡ҆б̾ѧ́тъ сы́й, си́це ста́рецъ восклица́ше:
Ра́дꙋйсѧ, дв҃о, ꙗ҆́кѡ є҆сѝ стра́жа ст҃ы́ни: ра́дꙋйсѧ, ꙗ҆́кѡ до́мъ тво́й сп҃са́еши ны́нѣ.
Ра́дꙋйсѧ, щи́те заꙋ́тра и҆ но́щїю: ра́дꙋйсѧ, гро́знаѧ си́лою мно́гою.
Ра́дꙋйсѧ, ꙗ҆́кѡ млⷭ҇рдїемъ твои́мъ щади́ши грѣ̑шныѧ: ра́дꙋйсѧ, ꙗ҆́кѡ поража́еши востаю́щыѧ на ны̀ си̑льныѧ.
Ра́дꙋйсѧ, вѣ́нче наде́жды, знаменова́нїе ми́ра: ра́дꙋйсѧ, же́зле побѣ́ды, ѡ҆бѣтова́нїе сла́вы.
Ра́дꙋйсѧ, чи́стый сапфѵ́ре, подо́бный видѣ́нїю не́ба: ра́дꙋйсѧ, свѣ́тлый прⷭ҇то́ле и҆ колесни́це цр҃е́ва.
Ра́дꙋйсѧ, ꙗ҆́кѡ гла́съ тво́й сла́докъ ᲂу҆ши́ма: ра́дꙋйсѧ, ꙗ҆́кѡ ѻ҆́бразъ тво́й красе́нъ ѻ҆чи́ма.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ з҃.
Сн҃ъ чл҃вѣ́ческїй бли́зъ є҆́сть, сꙋ́дъ є҆гѡ̀ стра́шный при две́рехъ, вѣща́етъ на́мъ гла́съ бг҃оно́сныхъ писа́нїй, ѻ҆ба́че неради́мъ ѡ҆ кончи́нѣ, лѣни́вїи сꙋ́ще, и҆ грѡ́знымъ глаго́лѡмъ не вне́млемъ, вси́ бо въ сꙋетѣ̀ пови́ннїи во́лею, ѻ҆ба́че съ вѣ́рою и҆ любо́вїю къ тебѣ̀, бг҃омт҃и, прибѣга́юще, вопїе́мъ бг҃ꙋ: А҆ллилꙋ́їа.
І҆́косъ з҃.
Тре́петнѡ ста́рецъ и҆гꙋ́менъ къ ѻ҆́бразꙋ взо́ръ сво́й возво́дитъ и҆ ви́дитъ: сѐ ли́цы пред̾ ни́мъ ѡ҆жива́ютъ, и҆ дв҃ѣ гро́зный млⷣнцъ рꙋко́ю ᲂу҆ста̀ загражда́етъ, глаго́лѧ: ѽ мт҃и, не провѣщава́й, да нака́жꙋтсѧ. Ста́рецъ же ᲂу҆жаса́ѧсѧ, пое́тъ пречⷭ҇тѣй та́кѡ:
Ра́дꙋйсѧ, дв҃о, влⷣчце мі́ра: ра́дꙋйсѧ, нб҃а цр҃и́це бл҃га́ѧ.
Ра́дꙋйсѧ, ꙗ҆́кѡ бж҃їй гнѣ́въ ᲂу҆толѧ́еши: ра́дꙋйсѧ, ꙗ҆́кѡ гро́зный сꙋ́дъ ѿвраща́еши.
Ра́дꙋйсѧ, мт҃и всемлⷭ҇рдаѧ, и҆збавле́нїе ѿ бѣ́дъ: ра́дꙋйсѧ, по́моще бл҃года́тнаѧ, ᲂу҆пова́нїе дꙋша́мъ.
Ра́дꙋйсѧ, ты́ бо печа̑ли на́шѧ ѿго́ниши ско́рѡ: ра́дꙋйсѧ, ты́ бо болѣ̑зни грѣ́шныхъ врачꙋ́еши ди́внѡ.
Ра́дꙋйсѧ, ꙗ҆́коже ᲂу҆́тро, свѣ́тъ пролива́ющаѧ ти́хїй: ра́дꙋйсѧ, ꙗ҆́коже со́лнце, согрѣва́ющаѧ хла̑дныѧ дꙋ́шы.
Ра́дꙋйсѧ, чꙋ́днаѧ ѻ҆трокови́це: ра́дꙋйсѧ, ди́внаѧ бг҃оневѣ́сто.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ и҃.
Є҆диномы́сленнѡ, дв҃о, взо́ры къ тебѣ̀ ѡ҆браща́емъ, ты́ бо въ де́нь воздаѧ́нїѧ на́съ не ѡ҆ставлѧ́еши: прострѝ ᲂу҆̀бо на́мъ ще́дрꙋю свою̀ рꙋ́кꙋ, грѣхмѝ бо падо́хомъ до а҆́дскїѧ бе́здны, и҆ кто̀ на́съ и҆зба́витъ ѿ грѧдꙋ́щихъ мꙋ́къ, кто́ же на́съ ᲂу҆тверди́тъ, во є҆́же пѣ́ти: А҆ллилꙋ́їа.
І҆́косъ и҃.
Мт҃и ѿво́дитъ десни́цꙋ сла́дкагѡ сн҃а, и҆ ма́лѡ лицѐ ѿклонѧ́ющи, ста́рцꙋ глаго́летъ: на стѣ́ны бра́тїѧ всѧ̀ да выхо́дитъ и҆ лю́тыхъ разбо́йникѡвъ да ѿража́етъ! Ста́рецъ же всю̀ бра́тїю глаша́етъ, и҆ ви́дѣвше всѝ чꙋ́до, воспѣва́ютъ:
Ра́дꙋйсѧ, мт҃и бл҃га́ѧ хрⷭ҇то́ва: ра́дꙋйсѧ, ти́хой пꙋсты́ни покро́ве.
Ра́дꙋйсѧ, а҆́ще и҆ не вѣ́мы, кі́ими тѧ̀ хвале́бными возвели́чимъ словесы̀: ра́дꙋйсѧ, а҆́ще и҆ не вѣ́мы, кі̑ѧ бл҃года̑тныѧ принесе́мъ тѝ
похвалы̑.
Ра́дꙋйсѧ, ꙗ҆́кѡ свѣ́тъ превѣ́чный но́сиши неѡпали́мѡ: ра́дꙋйсѧ, ꙗ҆́кѡ ѻ҆́гнь ѵ҆поста́сный держи́ши непостижи́мѡ.
Ра́дꙋйсѧ, тѧ́ бо и҆́мамы неѡбори́мꙋю стѣ́нꙋ: ра́дꙋйсѧ, тѧ́ бо всѝ вѣ́мы млⷭ҇ти ве́лїю бе́зднꙋ.
Ра́дꙋйсѧ, херꙋві́мѡвъ чтⷭ҇нѣ́йшаѧ: ра́дꙋйсѧ, серафі́мѡвъ сла́внѣйшаѧ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ ѳ҃.
І҆́ѡвъ, страда́лецъ пред̾ бг҃омъ, мꙋ́дреннѡ на́съ поꙋча́етъ, глаго́лѧ: сѐ, бл҃гоче́стїе мꙋ́дрость и҆ бл҃го всѣ̑мъ ᲂу҆ходѧ́щымъ ѿ мі́ра и҆ сла́достный по́двигъ мл҃твы под̾е́мшымъ, и҆̀мже помога́етъ бцⷣа и҆ въ мл҃твахъ ᲂу҆крѣплѧ́етъ, во є҆́же зва́ти: А҆ллилꙋ́їа.
І҆́косъ ѳ҃.
Ра́достнѡ въ хра́мѣ се́мъ зрѧ́ще спи́сокъ съ і҆кѡ́ны ѿра́ды а҆ѳѡ́нскихъ ѻ҆би́телей да́ръ драгоцѣ́нный, въ мл҃твѣ мы́сленнѡ соедини́мсѧ съ хвале́бными ли̑ки а҆ѳѡ́нскихъ ѻ҆тцє́въ, и҆̀же ѿ го́рныхъ высо́тъ, превы́ше ѻ҆́блакъ сꙋ́щихъ, пречⷭ҇тꙋю на́съ пѣ́ти призыва́ютъ:
Ра́дꙋйсѧ, стра́нъ и҆ наро́дѡвъ ст҃ы́не: ра́дꙋйсѧ, всѣ́хъ хрⷭ҇тїа́нъ бл҃госты́не.
Ра́дꙋйсѧ, ѻ҆́гнь во ᲂу҆тро́бꙋ прїи́мшаѧ: ра́дꙋйсѧ, сло́во по пло́ти ꙗ҆ви́вшаѧ.
Ра́дꙋйсѧ, ѻ҆́блаче свѣ́та ле́гкїй, въ мі́ръ прине́сшїй хрⷭ҇та̀: ра́дꙋйсѧ, лѣ́ствице, ведꙋ́щаѧ ѿ землѝ въ нб҃са̀.
Ра́дꙋйсѧ, ста́мно ма́нны а҆́лчꙋщымъ сла́дкїѧ пи́щи: ра́дꙋйсѧ, ча́ше злата́ѧ жа́ждꙋщымъ но́вагѡ пи́ва.
Ра́дꙋйсѧ, ти́хаѧ а҆́гг҃лѡвъ сла́во: ра́дꙋйсѧ, лю́демъ бл҃га́ѧ ѿра́до.
Ра́дꙋйсѧ, вы́шнее нб҃о, свѣ́тъ ѡ҆зарѧ́ющее вѣ̑рнымъ: ра́дꙋйсѧ, тꙋ́чнаѧ ни́во, всѣ̑мъ веселѧ́щаѧ дꙋ́шы.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ і҃.
Оу҆́мъ къ нб҃сѝ ᲂу҆стреми́вше, чꙋ̑вства возне́сше над̾ тлѣ́номъ, ѽ ко́ль вожделѣ́ннѡ сп҃сти́сѧ ѿ мі́ра, и҆мꙋ́ще є҆ди́но дꙋ́ха стремле́нїе къ гѡ́рнимъ, є҆ди́нꙋ се́рдца наде́ждꙋ на бг҃а. Помога́й на́мъ, дв҃о бцⷣе, и҆ въ пꙋ́ть ведѝ на́съ пра́вый, є҆́же пѣ́ти: А҆ллилꙋ́їа.
І҆́косъ і҃.
Ѻ҆́бразъ чтⷭ҇ны́й провожда́ѧ въ пꙋ́ть ѿ а҆ѳѡ́на на сѣ́веръ въ покро́въ бл҃года́тный ѻ҆би́тели но́выѧ, въ зало́гъ нбⷭ҇ныѧ по́мощи гра́дꙋ, чтⷭ҇ны́й схимона́хъ ст҃ого́рецъ вѣща́етъ: сѐ бл҃гослове́нїе влⷣчцы! Моли́тесѧ, и҆ вѣ́рꙋйте, и҆ по́йте:
Ра́дꙋйсѧ, ꙗ҆́кѡ є҆сѝ на́мъ покро́въ бл҃года́тный: ра́дꙋйсѧ, ꙗ҆́кѡ є҆сѝ на́мъ зало́гъ ᲂу҆пова́нїй.
Ра́дꙋйсѧ, сꙋ́щымъ въ бѣда́хъ ᲂу҆тѣше́нїе: ра́дꙋйсѧ, сꙋ́щымъ въ грѣха́хъ ᲂу҆миле́нїе.
Ра́дꙋйсѧ, ꙗ҆́кѡ въ ча́съ гнѣ́ва бж҃їѧ ᲂу҆крѣплѧ́еши сердца̀: ра́дꙋйсѧ, ꙗ҆́кѡ въ де́нь и҆спыта́нїѧ ᲂу҆мꙋдрѧ́еши ᲂу҆мы̀.
Ра́дꙋйсѧ, ꙗ҆́кѡ ѕлы́хъ навѣ́тѡвъ тꙋ́чы ѿ на́съ ѿвраща́еши: ра́дꙋйсѧ, ꙗ҆́кѡ въ го́ды бѣ́дствїй ѿ поги́бели на́съ и҆з̾има́еши.
Ра́дꙋйсѧ, ꙗ҆́кѡ во дни̑ бꙋ́рь безбо́жныхъ ты̀ є҆сѝ на́мъ є҆ди́наѧ при́стань: ра́дꙋйсѧ, ꙗ҆́кѡ мꙋдрова́нїй ло́жныхъ на́съ и҆збавлѧ́еши при́снѡ.
Ра́дꙋйсѧ, въ жи́зни на́мъ ти́хаѧ ра́досте: ра́дꙋйсѧ, въ вѣ́чности ра́йскаѧ сла́во.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ а҃і.
Тє́мныѧ си̑лы въ мі́рѣ си́лою и҆ сла́вою владѣ́ютъ и҆ свѣ́та хрⷭ҇то́ва позна́ти не мо́гꙋтъ, но вѣ̑рнымъ то́кмѡ мл҃тва є҆́сть си́ла, и҆̀мъ сле́зы зало́гъ и҆ побѣ́ды, и҆ сла́вы. Ѽ дв҃о мт҃и, да́ждь на́мъ тꙋ́чꙋ сле́знꙋю и҆ бо́дрственный на́мъ вѣ́тръ возвѣ́й, пою́щымъ: А҆ллилꙋ́їа.
І҆́косъ а҃і.
Ра́дость на ли́цахъ сїѧ́етъ, гла́съ вопїе́тъ ѿ а҆ѳѡ́на: влⷣчца ше́ствꙋетъ къ ва́мъ, и҆сходи́те, срѣта́йте дв҃ꙋ нб҃съ со свѣща́ми, срѣта́йте же па́че сїю̀ со слеза́ми ра́дости, любвѐ и҆ ᲂу҆миле́нїѧ и҆ пра́зднꙋйте, и҆ свѣ́тлымъ гла́сомъ по́йте:
Ра́дꙋйсѧ, кївѡ́те ѡ҆сщ҃е́нный: ра́дꙋйсѧ, прⷭ҇то́ле вознесе́нный.
Ра́дꙋйсѧ, го́рнихъ чинѡ́въ воспѣва́нїе: ра́дꙋйсѧ, а҆́довыхъ си́лъ трепета́нїе.
Ра́дꙋйсѧ, ꙗ҆́кѡ є҆сѝ весе́лїе человѣ́чєскимъ сердца́мъ: ра́дꙋйсѧ, ꙗ҆́кѡ є҆сѝ сп҃се́нїе соврати́вшымсѧ дꙋша́мъ.
Ра́дꙋйсѧ, ꙗ҆́кѡ гла́съ тво́й пресла́дкїй вѣ́чнꙋю ра́дость вѣща́етъ: ра́дꙋйсѧ, ꙗ҆́кѡ взо́ръ тво́й прети́хїй на́мъ тишинꙋ̀ ѡ҆бѣща́етъ.
Ра́дꙋйсѧ, ꙗ҆́кѡ сн҃а и҆ бг҃а ты̀ ᲂу҆молѧ́еши ѡ҆ лю́дехъ: ра́дꙋйсѧ, ꙗ҆́кѡ ра́йскихъ черто́гѡвъ ты̀ на́мъ ѿверза́еши двє́ри.
Ра́дꙋйсѧ, хра́мино дх҃а ст҃а́гѡ: ра́дꙋйсѧ, ски́нїе бг҃а жива́гѡ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ в҃і.
А҆́гг҃льски дне́сь воспѣва́емъ пѣ́снь бл҃года́тнѣй мр҃і́и: сїѧ́ бо є҆́сть сла́дость, и҆ ра́й, и҆ бл҃же́нство, ѿра́да въ ча́съ и҆спыта́нїй и҆ гнѣ́ва, наде́жда бл҃же́нствъ безконе́чныхъ по сме́рти. Ра́дꙋйсѧ ᲂу҆̀бо, застꙋ́пнице ᲂу҆се́рднаѧ, и҆ ра́дость подава́й на́мъ пѣ́ти бг҃ꙋ: А҆ллилꙋ́їа.
І҆́косъ в҃і.
Да защити́тъ бг҃омт҃и ѻ҆́бразомъ ди́внымъ ѿра́ды мл҃твы ѡ҆пло́тъ, монасты́рь се́й и҆ хра́мы, да во вѣ́къ не ᲂу҆га́снетъ лампа́да пред̾ ли́комъ сп҃си́тельнымъ дв҃ы, со́нми же мона́хѡвъ гла́сомъ ра́дости съ мїрⷤны немо́лчнѡ взыва́ютъ:
Ра́дꙋйсѧ, хра́ме, свѣтлѣ́йшїй сїѡ́на: ра́дꙋйсѧ, свѣ́те и҆ сла́во а҆ѳѡ́на.
Ра́дꙋйсѧ, и҆́нокѡвъ мы́сль непреста́ннаѧ: ра́дꙋйсѧ, дѣ́вственныхъ пѣ́снь неꙋмо́лчнаѧ.
Ра́дꙋйсѧ, ꙗ҆́кѡ ро́сꙋ ᲂу҆тѣше́нїѧ посыла́еши во дни̑: ра́дꙋйсѧ, ꙗ҆́кѡ сле́зы ᲂу҆миле́нїѧ и҆сторга́еши въ нощѝ.
Ра́дꙋйсѧ, ди́вное и҆́мѧ, чꙋдотворѧ́щее вта́йнѣ: ра́дꙋйсѧ, бж҃їе мѵ́ро, въ мі́ръ и҆злїѧ́нное ще́дрѡ.
Ра́дꙋйсѧ, ꙗ҆́кѡ тобо́ю лїе́тсѧ на́мъ свѣ́тъ безконе́чный: ра́дꙋйсѧ, ꙗ҆́кѡ съ тобо́ю вѣ́чнѡ млⷣнцъ предвѣ́чный.
Ра́дꙋйсѧ, свѣ́тлосте лю́демъ, тѧ̀ чтꙋ́щымъ: ра́дꙋйсѧ, ра́досте на́мъ, тѧ̀ пою́щымъ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ г҃і.
Ѽ всепречⷭ҇таѧ дв҃о, свѣ́тлаѧ на́ша ѿра́до, сладча́йшагѡ сн҃а нетлѣ́ннаѧ мт҃и! Ѿ всѧ́кихъ бѣ́дъ и҆ скорбе́й ѡ҆гражда́й на́съ и҆ бꙋ́дꙋщїѧ мꙋ́ки и҆змѝ на́съ, бл҃га́ѧ, ра́дости же вѣ́чныѧ сподо́би на́съ ᲂу҆ го́рнѧгѡ прⷭ҇то́ла воспѣва́ти: А҆ллилꙋ́їа.
Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.
І҆́косъ а҃.
А҆́гг҃лѡвъ ли́цы дивѧ́тсѧ, ѻ҆́бразъ а҆ѳѡ́нскїй тво́й зрѧ́ще, на не́мже, пречⷭ҇таѧ дв҃о и҆ мт҃и, ѿ ᲂу҆́стъ нетлѣ́нныхъ рꙋко́ю десно́ю десни́цꙋ млⷣнца ѿво́диши кро́ткѡ. Что̀ сїѐ є҆́сть зна́менїе ѻ҆́браза; Мы́ же рече́мъ, пою́ще такова̑ѧ:
Ра́дꙋйсѧ, дв҃о, всевы́шнѧгѡ мт҃и: ра́дꙋйсѧ, ди́вный раю̀ бл҃года́ти.
Ра́дꙋйсѧ, на́ша ѿра́до нбⷭ҇наѧ: ра́дꙋйсѧ, лю́демъ наде́ждо и҆звѣ́стнаѧ.
Ра́дꙋйсѧ, ѻ҆́бразъ бо тво́й сп҃се́нїе возвѣща́етъ все́й землѝ: ра́дꙋйсѧ, взо́ръ бо тво́й ᲂу҆тѣше́нїе пребыва́ющымъ во тлѝ.
Ра́дꙋйсѧ, свѣ́те нбⷭ҇ный, мглꙋ̀ на́шихъ дні́й ѡ҆зарѧ́ѧй: ра́дꙋйсѧ, цвѣ́те нетлѣ́нный, тлѣ́нъ на́шихъ дѣ́лъ ѡ҆живлѧ́ѧй.
Ра́дꙋйсѧ, ты́ бо мл҃твы къ сн҃ꙋ за мі́ръ твори́ши: ра́дꙋйсѧ, ꙗ҆́кѡ въ те́плой мл҃твѣ, а҆́ки свѣти́льникъ, гори́ши.
Ра́дꙋйсѧ, ра́достнѡ тѝ восклица́емъ: ра́дꙋйсѧ, пѣ́сненнѡ тѧ̀ воспѣва́емъ.
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Конда́къ а҃.
Возбра́нныхъ си́лъ нбⷭ҇ныхъ ра́дость и҆ хвале́нїе, всегѡ́ же ро́да человѣ́ча и҆справле́нїе, ᲂу҆бл҃жа́емъ тѧ̀, пречⷭ҇таѧ дв҃о мт҃и, ты́ же, на́ше ᲂу҆пова́нїе є҆ди́ное, низпослѝ дꙋша́мъ ѿра́дꙋ бл҃года́тнꙋю, да пое́мъ тебѣ̀, ѻ҆́бразъ ди́вный тво́й чтꙋ́ще:
Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.
Мл҃тва.
Ѽ прест҃а́ѧ влⷣчце гпⷭ҇жѐ дв҃о бцⷣе, невѣ́сто нетлѣ́ннаѧ, мт҃и бл҃гослове́ннаѧ, свѣ́тлаѧ на́ша ѿра́до, вожделѣ́нное ᲂу҆тѣше́нїе!
Прїимѝ ны́нѣ дерзнове́нное и҆ неѿстꙋ́пное моле́нїе сїѐ, ѿ грѣ́шныхъ ᲂу҆сте́нъ и҆ недосто́йныхъ дꙋ́шъ тебѣ̀ приноси́мое пред̾ ст҃ы́мъ и҆ свѣтоза́рнымъ твои́мъ ѻ҆́бразомъ.
Пощади́ ны, млⷭ҇тиваѧ и҆ млⷭ҇рдаѧ и҆ щедролюби́ваѧ на́ша застꙋ́пнице, и҆ не преда́ждь на́съ сꙋдꙋ̀ и҆ гнѣ́вꙋ сн҃а твоегѡ̀ и҆ сп҃са на́шегѡ, гдⷭ҇а і҆и҃са хрⷭ҇та̀, є҆мꙋ́же без̾ числа̀ согрѣши́хомъ и҆ пови́нни є҆смы̀ ѡ҆сꙋжде́нїю и҆ пра́ведномꙋ є҆гѡ̀ и҆зрече́нїю, є҆́же наказа́тисѧ по грѣхѡ́мъ на́шымъ, превозше́дшымъ всѧ́кꙋю мѣ́рꙋ є҆гѡ̀ долготерпѣ́нїѧ.
Прини́кни съ высо́тъ твои́хъ го́рнихъ, и҆дѣ́же а҆́гг҃ли тре́петнѡ сла́вѧтъ тѧ̀, и҆ воззрѝ на на́шꙋ до́льнюю нищетꙋ̀: ка́кѡ ѡ҆бнища́хомъ вѣ́рою, ка́кѡ бѣ́дствꙋемъ наде́ждею и҆ ѡ҆скꙋдѣ́хомъ любо́вїю, ка́кѡ ᲂу҆мо́мъ ѡ҆мрачи́хомсѧ, се́рдцемъ же и҆ чꙋ́вствы ѡ҆жесточи́хомсѧ. Оу҆врачꙋ́й на́съ мл҃твою твое́ю, дв҃о цѣле́бнице. Возста́ви ны̀, па́дшыѧ дꙋ́хомъ, ᲂу҆крѣпѝ разсла́блєнныѧ ᲂу҆мо́мъ, возбꙋдѝ ᲂу҆ны̑лыѧ и҆ ѿча̑ѧнныѧ, и҆сцѣлѝ болѧ́щыѧ дꙋше́ю и҆ тѣ́ломъ.
При́зри на гра́дъ се́й [и҆лѝ: ѻ҆би́тель сїю̀, и҆лѝ: ве́сь сїю̀] и҆ пощадѝ є҆го̀ [и҆лѝ: ю҆̀], бж҃їй ѿводѧ́щи твои́мъ предста́тельствомъ гнѣ́въ. Оу҆кротѝ го́рдѡстнаѧ стремлє́нїѧ люде́й и҆ бг҃оѿстꙋ̑пнаѧ и҆̀хъ шата̑нїѧ. Возвѣ́й ти́хое дыха́нїе бл҃года́ти твоеѧ̀ на смѧтє́нныѧ дꙋ́шы и҆ сокрꙋшє́ннаѧ сердца̀.
Сохранѝ сꙋпрꙋ́жествꙋ чистотꙋ̀, матери́нствꙋ че́сть, дѣ́вствꙋ бл҃гослове́нїе. Низпослѝ под̾ кро́въ жили́щъ на́шихъ ѡ҆сщ҃а́ющїй лꙋ́чь бжⷭ҇твеннагѡ свѣ́та, да ѡ҆блича́тсѧ дѣѧ́нїѧ неподѡ́бнаѧ и҆ ᲂу҆стыдѧ́тсѧ рѣ̑чи хꙋ̑льныѧ, и҆ ᲂу҆кротѧ́тсѧ мы̑сли ѕлѡ́бныѧ.
Ѽ миролюби́ваѧ, бл҃гостнѣйшаѧ и҆ тиша́йшаѧ дв҃о мт҃и, ѡ҆ паде́нїихъ на́шихъ скорбѧ́щаѧ, ѡ҆ сп҃се́нїи на́шемъ воздыха́ющаѧ! Оу҆толѝ цр҃кѡ́вныѧ бꙋ̑ри, ᲂу҆мирѝ раско́лы, соберѝ расточє́нныѧ, ѡ҆братѝ ѿпа́дшыѧ и҆ всѣ́хъ приведѝ въ є҆дине́нїе ст҃ы́ѧ цр҃кве, да є҆динодꙋ́шнѡ и҆ є҆диномꙋ́дреннѡ сла́витсѧ на землѝ, ꙗ҆́коже и҆ на нб҃сѝ, є҆ди́ное ст҃ѣ́йшее и҆ сп҃си́тельное и҆́мѧ є҆диносꙋ́щныѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.
Ватопедская икона Божией Матери находится в древнем Ватопедском монастыре на Афоне, в храме Благовещения. Название Ватопедской она получила от того, что близ этого монастыря упал в море с корабля юный царевич Аркадий и чудным заступлением Божией Матери был перенесен на берег целым и невредимым. Здесь нашли его стоящим под кустом, недалеко от обители. От этого события и произошло название "ватопед" ("куст отрока"). Святой царь Феодосий Великий в благодарность за чудное избавление сына украсил и щедро одарил Ватопедский монастырь.
На Ватопедской иконе Богоматерь изображена с лицом, обращенным к правому плечу, в память того, что она в 807 году, 21 января, обратила Свое лицо к игумену монастыря, стоявшему на молитве близ святой иконы, и предупредила его о намерении разбойников ограбить обитель. Изначально икона не была написана на доске. Когда-то образ Богородицы «Отрада и Утешение» был частью стенной росписи. Позднее изображение сняли со стены вместе со штукатуркой и заключили в киот. Уже много лет икона покрыта серебряной ризой с богатой чеканкой. Открыты только лики Богоматери и Младенца. Без оклада икону мало кто видел.
Шайка разбойников, решивших ограбить Ватопедский монастырь, высадившись в темноте на берег, укрылась в окрестностях монастыря, намереваясь дождаться открытия ворот обители.
В то время, когда разбойники ждали открытия ворот, закончилась утреня и братия стала расходиться по кельям для временного отдыха. В церкви остался один настоятель монастыря. Вдруг от стоящей вблизи иконы Божией Матери он услышал женский голос, предупреждающий об опасности, грозившей монастырю. Игумен устремил свой взор на икону и увидел, что лики Богородицы и Богомладенца изменились. Ватопедская икона Божьей матери была подобна «Одигитрии», на которой Богомладенец всегда изображается с благословляющей рукой.
И вот игумен видит, как Иисус поднял Свою руку, заграждая уста Богородицы, со словами: «Нет, Мать Моя, не говори им этого: пусть они накажутся за грехи свои». Но Богородица, уклоняясь от Его руки, двукратно произнесла те же слова: «Не отверзайте сегодня врат обители, а поднимитесь на стены монастырские и разгоните разбойников».
Поражённый игумен тотчас собрал братию. Все были изумлены изменением очертания иконы Божьей матери. После благодарственной молитвы перед святым образом воодушевлённые иноки поднялись на монастырские стены и успешно отразили нападение разбойников.
С тех пор Ватопедская икона стала называться «Отрада» или «Утешение», так на этой иконе лик Божией Матери ясно выражает сострадательную любовь, взор Её дышит милосердием и кротостью, а на устах покоится тихая улыбка утешения. Лик же Богомладенца строг.
В память этого чудесного события перед чудотворной иконой горит неугасимая лампада.
