Акафист Пресвятой Богородице пред иконой «Минская»
Акафист издан по благословению митрополита Минского и Слуцкого, Патриаршего экзарха всея Беларуси Филарета.
Память: 26 августа (13 августа ст. ст.)
Не утвержден для общецерковного использования.
Конда́к 1.
Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́:
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
И́кос 1.
А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о на́с попече́ния. Мы́ же земноро́днии, дерза́я подража́ти пе́сни а́нгельстей, благода́рственно Тебе́ пое́м:
Ра́дуйся, о зача́тии Сы́на от Ду́ха Свята́го Арха́нгелом предвозвеще́нная; ра́дуйся, благове́стия Арха́нгелова восприе́мнице смире́нная.
Ра́дуйся, Херуви́мов и Серафи́мов честне́йшая; ра́дуйся, Арха́нгелов и А́нгелов сла́внейшая.
Ра́дуйся, превы́ше си́л небе́сных вознесе́нная; ра́дуйся, от го́рних во́инств почита́емая.
Ра́дуйся, ли́ки а́нгельскими песносло́вимая; ра́дуйся, от все́х родо́в при́сно ублажа́емая.
Ра́дуйся, прибе́жище на́ше и заступле́ние; ра́дуйся, в ско́рбех и напа́стех вспоможе́ние.
Ра́дуйся, за христиа́н усе́рдная моли́твеннице; ра́дуйся, за ны́ пред Бо́гом ми́лостивая предста́тельнице.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 2.
Ви́девши святы́й о́браз Тво́й, Пречи́стая, святы́м Луко́ю первопи́санный, рекла́ еси́: «С си́м о́бразом благода́ть Моя́ и си́ла да пребу́дет». И во Ми́нстем о́бразе зря́ще сбы́тие слове́с Твои́х, о Тебе́ просла́вим Го́спода, пою́ще Ему́: Аллилу́иа.
И́кос 2.
Разуме́ти не мо́жно ди́внаго Про́мысла Бо́жия, ка́ко чу́дная ико́на Твоя́, Богоро́дице, насади́телю ве́ры правосла́вныя, благове́рному кня́зю Влади́миру, на по́мощь даде́ся во апо́стольстве его́ от Царьгра́да и Корсу́ни да́же до Ки́ева. Мы́ же, преи́скренне умиля́ющеся Твоему́ о ро́де на́шем предста́тельству, ве́рно вопие́м:
Ра́дуйся, и́стиннаго благоче́стия наста́внице; ра́дуйся, язы́ческаго нече́стия искорени́тельнице.
Ра́дуйся, чудотво́рною ико́ною а́ки драгоце́нным да́ром кня́зя Влади́мира обогати́вшая; ра́дуйся, в равноапо́стольных труде́х его́ укрепи́вшая.
Ра́дуйся, вла́сть де́монскую сокруши́вшая; ра́дуйся, ве́ру правосла́вную в земли́ на́шей утверди́вшая.
Ра́дуйся, Тобо́ю от пре́лести диа́воли свобожда́емся; ра́дуйся, Тобо́ю же позна́ния Творца́ сподобля́емся.
Ра́дуйся, ко́зней вра́жиих посече́ние; ра́дуйся, ве́рных ча́д Отцу́ Небе́сному усыновле́ние.
Ра́дуйся, злове́рия и́дольскаго попра́ние; ра́дуйся, уче́ния Христо́ва насажде́ние.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 3.
Си́лу благода́ти, явле́нныя в честне́й ико́не Твое́й, Влады́чице, ви́де святы́й равноапо́стольный кня́зь Влади́мир и со благогове́нием ве́лиим поста́ви ю́ в Десяти́нней це́ркви гра́да Ки́ева, вопию́ще Бо́гу: Аллилу́иа.
И́кос 3.
Иму́щи попече́ние ма́тернее о просвеще́нных лю́дех земли́ Ру́сския, соде́лала еси́ ю́ До́мом Свои́м, и то́ки чуде́с от ико́ны Твоея́ преизоби́льно источи́ла еси́, Богоро́дице, сего́ ра́ди взыва́ем Ти́ си́це:
Ра́дуйся, притека́ющих к ико́не Твое́й луча́ми чуде́с озаря́ющая; ра́дуйся, обраща́ющимся к не́й безчи́сленныя ми́лости подаю́щая.
Ра́дуйся, все́м прося́щим мо́ре щедро́т излива́ющая; ра́дуйся, духо́вную ра́дость на́м соде́ловающая.
Ра́дуйся, о лю́дех правосла́вных при́сное попече́ние; ра́дуйся, о́браз Тво́й дарова́вшая на́м я́ко зало́г спасе́ния.
Ра́дуйся, исто́чник благода́ти неистощи́мый; ра́дуйся, кла́дезю сокро́вищ многоце́нный.
Ра́дуйся, кре́посте тве́рдая ве́ры правосла́вныя; ра́дуйся, все́м чту́щим Сы́на Твоего́ по́моще пресла́вная.
Ра́дуйся, пу́ть и́стины указу́ющая заблу́ждшим; ра́дуйся, ско́ро поспе́шствующая на по́мощь Тя́ призыва́ющим.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 4.
Бу́ри бе́д и напа́стей за грехи́ на́ша мно́гажды на Ру́сь воздвиза́еми бы́ша, та́кожде и гра́д Ки́ев огню́ и мечу́ предава́ем бе́ от нечести́вых ага́рян, не ве́дущих пе́ти и́стинному Бо́гу: Аллилу́иа.
И́кос 4.
Слы́шав о бога́тстве Ки́ева, ха́н ага́рянский во еди́но ле́то устреми́ся расхи́тити е́, и гра́д то́й пожже́. Во́ин же не́кий злочести́вый, взя́в ри́зу многоце́нную, Всеблага́я Ма́ти, ико́ну же Твою́ вве́рже в Дне́пр, оба́че сия́ неврежде́нна в вода́х сохрани́ся, подвиза́ющи на́с восхвали́ти Тя́ си́це:
Ра́дуйся, о́браз Тво́й, я́ко купину́ неопа́льну яви́вшая; ра́дуйся, ико́ну Твою́ от пла́мене сохрани́вшая.
Ра́дуйся, по вода́м а́ки по су́ху от Ки́ева да́же до Ми́нска ико́ну Твою́ прене́сшая; ра́дуйся, во́ды Неми́ги и Сви́слочи явле́нием Свои́м освяти́вшая.
Ра́дуйся, Цари́це небесе́ и земли́, Е́йже вся́ стихи́и покоря́ются; ра́дуйся, Тобо́ю же на спаси́тельныя стези́ лю́ди наставля́ются.
Ра́дуйся, пото́па грехо́внаго усмире́ние; ра́дуйся, свире́пых страсте́й укроще́ние.
Ра́дуйся, мо́ря жите́йскаго благонаде́жное прохожде́ние; ра́дуйся, от земли́ на не́бо ве́рных возведе́ние.
Ра́дуйся, ди́вное благода́ти зна́мение; ра́дуйся, си́лы чудотво́рныя явле́ние.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 5.
Боготе́чней звезде́ уподо́билася еси́ пречестна́я ико́на Твоя́, Богороди́тельнице, лучи́ чу́дными осия́вшая насе́льники гра́да Ми́нска. Они́ же, зря́ще таи́нственное явле́ние ея́ на вода́х Сви́слочи, со умиле́нием воспе́ша Сы́ну Твоему́ и Бо́гу на́шему: Аллилу́иа.
И́кос 5.
Ви́девше чу́дную ико́ну сию́, о Всеми́лостивая, и прие́млюще я́ко да́р Бо́жий, лю́ди христиа́нстии взя́ша ю́ от воды́ и поста́виша в це́ркви за́мковой в че́сть Пресла́внаго Рождества́ Твоего́, и а́бие благода́рне воззва́ша:
Ра́дуйся, от ико́ны Твоея́ да́ры многоразли́чнии источа́ющая; ра́дуйся, я́ко Само́й Ти́ су́щей во ико́не Твое́й благода́ть на́м излива́ющая.
Ра́дуйся, гре́шников не отмета́ющая; ра́дуйся, ка́ющихся те́пле прие́млющая.
Ра́дуйся, гра́да на́шего неусы́пная храни́тельнице; ра́дуйся, за на́с пред Бо́гом любвеоби́льная хода́таице.
Ра́дуйся, ве́ры и благоче́стия исправле́ние; ра́дуйся, в моли́твах ко Го́споду всемо́щное дерзнове́ние.
Ра́дуйся, боля́щих и немощству́ющих исцеле́ние; ра́дуйся, заблу́ждших на пу́ть пра́вый наставле́ние.
Ра́дуйся, благода́ти оби́льное дарова́ние; ра́дуйся, люде́й христоимени́тых непосты́дное упова́ние.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 6.
Пропове́дниками чуде́с ве́лиих, от ико́ны Ми́нския истека́ющих, яви́шася мно́зи лю́дие, и́хже Ты́, Премилосе́рдная Влады́чице, поклоня́тися святы́не се́й научи́ла еси́, да нело́жно воспою́т Бо́гу: Аллилу́иа.
И́кос 6.
Возсия́ и возвели́чися ве́ра на́ша по мно́зех ле́тех плене́ния ле́стнаго и непра́ваго, и па́ки возврати́ся ико́на Ми́нская лю́дем правосла́вным, и́же с ра́достию воспе́ша Богоро́дице:
Ра́дуйся, Правосла́вия щи́те и огражде́ние; ра́дуйся, оте́ческих уста́вов незы́блемое утвержде́ние.
Ра́дуйся, малове́рных вразумле́ние; ра́дуйся, в сомне́нии су́щим снисхожде́ние.
Ра́дуйся, ве́рных ча́д Це́ркве Правосла́вныя духо́вное услажде́ние; ра́дуйся, отсту́пников пра́выя ве́ры посрамле́ние.
Ра́дуйся, правосла́вных немо́лчная похвало́; ра́дуйся, гони́мым за ве́ру несокруши́мое забра́ло.
Ра́дуйся, утесня́емым ско́рое вспоможе́ние; ра́дуйся, му́чеников и испове́дников неизглаго́ланная отра́до.
Ра́дуйся, искуша́емым по́моще; ра́дуйся, обурева́емым приста́нище.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 7.
Хотя́ Влады́ка на́ш и Судия́ Пра́веднейший вразуми́ти зе́млю Ру́сскую за беззако́ния тмочи́сленныя, попусти́ мучи́телем гна́ти Це́рковь Правосла́вную, да вси́, в покая́ние прише́дше, возопии́м Ему́: Аллилу́иа.
И́кос 7.
Но́вое наста́ испыта́ние от Го́спода, егда́ собо́рный хра́м во гра́де Ми́нске разруше́н бы́сть от неи́стовых гони́телей. Ико́на же Твоя́, о Богома́ти, отъя́та и сокры́та бе́ от ве́рных. Лю́дие же правосла́внии в сокруше́нии серде́ц возопи́ша к Богоро́дице:
Ра́дуйся, во дни́ правосу́днаго Бо́жия посеще́ния гне́в Его́ отводя́щая; ра́дуйся, в тя́жких злострада́ниях на́с не оставля́ющая.
Ра́дуйся, лю́тыя крамо́лы облича́ющая; ра́дуйся, душегуби́тельныя уче́ния низлага́ющая.
Ра́дуйся, благосе́рдая на́ша вразуми́тельнице; ра́дуйся, непамятозло́бная на́ша настави́тельнице.
Ра́дуйся, в злы́х обстоя́ниих неистощи́мое терпе́ние; ра́дуйся, с правосу́дием Бо́жиим смире́нное примире́ние.
Ра́дуйся, малоду́шных и па́дших возста́ние; ра́дуйся, ду́ха уны́ния и боя́зни отгна́ние.
Ра́дуйся, грехо́в на́ших отпуще́ние; ра́дуйся, Бо́жие к на́м благоволе́ние.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 8.
Стра́нное и ужа́сное наше́ствие иноплеме́нных пости́же на́с. Милосе́рдием же Бо́жиим одоле́в враги́, лю́дие, предста́тельством Богома́тери, отверзо́ша хра́мы правосла́внии и возда́ша благодаре́ние Го́сподеви, воспева́я Ему́: Аллилу́иа.
И́кос 8.
Вся́ испо́лнися ра́дости неизрече́нныя, егда́ раба́ Бо́жия Варва́ра обре́те чу́дный о́браз Тво́й, Ма́ти Де́во, сокры́тый посреде́ пра́ха и тле́ния. Мы́ же, дивя́щеся таково́му неча́емому обре́тению, восхваля́ем Тя́:
Ра́дуйся, ве́ру Христо́ву от поруга́ния защища́ющая; ра́дуйся, пра́ведный гне́в Бо́жий на ми́лость претворя́ющая.
Ра́дуйся, отсту́пников ве́ры постыжа́ющая; ра́дуйся, нече́стие гре́шников облича́ющая.
Ра́дуйся, броне́ неуязви́мая; ра́дуйся, воево́до непобеди́мая.
Ра́дуйся, от наше́ствия иноплеме́нных избавле́ние; ра́дуйся, от рабо́ты вра́жия свобожде́ние.
Ра́дуйся, ви́димых и неви́димых супоста́т одоле́ние; ра́дуйся, вражду́ющих ско́рое вразумле́ние.
Ра́дуйся, упокое́ние за дру́ги своя́ ду́шы положи́вших; ра́дуйся, прославле́ние за Ве́ру и Оте́чество на по́ле бра́ни убие́нных.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 9.
Вся́кое разуме́ние челове́ческое не возмо́жет исчести́ страда́ния, ко́и претерпе́ли гра́ждане Оте́чества на́шего в годи́ну во́ин, лихоле́тий и в после́днее вре́мя от беды́ черно́быльския. Взира́я же на ико́ну Твою́, Богома́ти, я́ко на цельбоно́сное утеше́ние, непреста́нно пое́м: Аллилу́иа.
И́кос 9.
Вети́я суему́дренныя соблазня́ются о дре́вности ико́ны Ми́нския и недоуме́ют пости́гнути таи́нственный Про́мысл Бо́жий, сохрани́вший ю́ в огне́ и вода́х, от ру́к иноплеме́нных и злоумышле́ний супроти́вных. Мы́ же, прославля́юще Богоро́дицу пред чудотво́рным о́бразом Ея́, вопие́м такова́я:
Ра́дуйся, почита́ния святы́х ико́н увенча́ние; ра́дуйся, иконобо́рнаго злоче́стия обличе́ние.
Ра́дуйся, душеполе́зных зна́ний преизоби́льное излия́ние; ра́дуйся, душевре́днаго мра́ка све́тлое озаре́ние.
Ра́дуйся, неве́рных смы́слов ми́лостивое просвеще́ние; ра́дуйся, непра́во му́дрствующих внеза́пное низверже́ние.
Ра́дуйся, ве́рных незы́блемое увере́ние; ра́дуйся, отъе́млющая духо́вное помраче́ние.
Ра́дуйся, Про́мысла Бо́жия прославле́ние; ра́дуйся, прего́рдых хули́телей устраше́ние.
Ра́дуйся, суему́дренных прему́дро смиря́ющая; ра́дуйся, заблу́ждших кро́тко вразумля́ющая.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 10.
Спаси́тельное приста́нище от жите́йских треволне́ний и́мамы во хра́ме Ду́ха Свята́го Богоспаса́емаго гра́да на́шего, иде́же светоза́рная ико́на Твоя́, Влады́чице, неотсту́пно доны́не пребыва́ет, все́х на́с путеводя́ к жи́зни ве́чней. Сего́ ра́ди о Тебе́ возглаша́ем Бо́гу: Аллилу́иа.
И́кос 10.
Стена́ и заступле́ние не то́кмо гра́ду на́шему, но и все́м с ве́рою притека́ющим к Тебе́, Преблагослове́нная, даде́ся свята́я ико́на Твоя́, е́юже мно́гажды благоде́яла еси́ на́м и отце́м на́шим, да вознесе́м Ти́ пе́ние таково́е:
Ра́дуйся, и́щущим спасе́ния пра́вый пу́ть указу́ющая; ра́дуйся, снисше́дших да́же до дна́ а́дова моли́твами Свои́ми спаса́ющая.
Ра́дуйся, супроти́в наше́ствия иноплеме́нных на́с воздвиза́ющая; ра́дуйся, от враго́в Оте́чество на́ше избавля́ющая.
Ра́дуйся, отча́янных ско́рое услы́шание; ра́дуйся, неду́гов душе́вных и теле́сных безме́здное врачева́ние.
Ра́дуйся, печа́лей жите́йских утоле́ние; ра́дуйся, грехо́вных я́зв очище́ние.
Ра́дуйся, во обстоя́ниях су́щим всегда́шняя помо́щнице; ра́дуйся, лю́дем благове́рным усе́рдная споспе́шнице.
Ра́дуйся, неча́янная Ра́досте; ра́дуйся, непосты́дная Наде́ждо.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 11.
Пе́ние и моле́ние о Богохрани́мей стране́ на́шей, власте́х, во́инстве и наро́де ея́, приими́ пред чудотво́рным о́бразом Твои́м, Влады́чице, и спаси́ на́с, я́ко держа́щая ски́петр в руце́ Свое́й. Богомладе́нец же Иису́с, име́яй в десни́це держа́ву, да да́рует на́м ти́хое и безмо́лвное житие́, слы́шаще от на́с: Аллилу́иа.
И́кос 11.
Све́тлый пра́здник явле́ния ико́ны Твоея́, Присноде́во, во гра́де Ми́нске, исполня́ет ликова́нием сердца́ на́ша. Сего́ ра́ди с ве́рою припа́дающе и с любо́вию лобыза́юще чу́дный о́браз Тво́й, вопие́м Ти́:
Ра́дуйся, Богоспаса́емому гра́ду на́шему ми́лость показа́вшая; ра́дуйся, на́с гре́шных сия́нием Свои́м просвети́вшая.
Ра́дуйся, при́сно си́лу Свою́ явля́ющая; ра́дуйся, предста́тельством Свои́м на́с спаса́ющая.
Ра́дуйся, моли́твы на́ша прие́млющая; ра́дуйся, хвале́ния на́ша не отверга́ющая.
Ра́дуйся, небожи́телями при́сно прославля́емая; ра́дуйся, собо́ром белору́сских святы́х и новому́чеников сугу́бо воспева́емая.
Ра́дуйся, людьми́ благочести́выми в позлаще́нную ри́зу облече́нная; ра́дуйся, мно́гими би́серами и адама́нтами преукраше́нная.
Ра́дуйся, серде́ц на́ших ти́хое умиле́ние; ра́дуйся, жития́ на́шего до́брое устрое́ние.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 12.
Благода́ти Своея́, о Всеми́лостивая Ма́ти, не лиши́ на́с гре́шных, претерпева́ем бо дне́сь но́выя ско́рби и нестрое́ния, ника́коже иму́ще наде́жды оправди́тися, но помози́ на́м возста́ти от поги́бельных сму́т, да, о Тебе́ ра́дующеся, воспое́м Бо́гу: Аллилу́иа.
И́кос 12.
Пою́ще Небе́сную Засту́пницу на́шу, ве́руем и испове́дуем, я́ко и в после́дняя времена́ яви́ши благода́тную по́мощь, и и́миже ве́си судьба́ми сохрани́ши на́с от собла́знов ми́ра сего́, да благода́рне восхва́лим Тя́:
Ра́дуйся, избавле́ние на́ше от наве́т вра́жиих; ра́дуйся, спасе́ние от кова́рств лука́ваго.
Ра́дуйся, от сна́ грехо́внаго пробужде́ние; ра́дуйся, беззако́ний на́ших проще́ние.
Ра́дуйся, пред Всевы́шним благогове́йное предстоя́ние; ра́дуйся, по́лчищ сатани́нских благомо́щное разсе́яние.
Ра́дуйся, поги́бших взыска́ние; ра́дуйся, прельще́нных вразумле́ние.
Ра́дуйся, напра́сную сме́рть от на́с отводя́щая; ра́дуйся, о кончи́не христиа́нстей на́м хода́тайствующая.
Ра́дуйся, врата́ небе́сная на́м отверза́ющая; ра́дуйся, к жи́зни ве́чней на́с приводя́щая.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 13.
О Всепе́тая Ма́ти, Засту́пнице Небе́сная гра́да на́шего, приими́ сию́ ма́лую моли́тву и умоли́ Сы́на Твоего́, Судию́ Пра́веднаго, да сподо́бит десна́го стоя́ния на́с, вопию́щих Ему́: Аллилу́иа.
Этот кондак читается три́жды, затем икос 1-й и кондак 1-й.
И́кос 1.
А́нгельския си́лы, приле́жно моля́щиися и благогове́йно служа́щии Ти́, Пресвята́я Де́во, от ле́т дре́вних на ге́рбе Богоспаса́емаго гра́да Ми́нска изображе́ни бы́ша во свиде́тельство чу́днаго Твоего́ о на́с попече́ния. Мы́ же земноро́днии, дерза́я подража́ти пе́сни а́нгельстей, благода́рственно Тебе́ пое́м:
Ра́дуйся, о зача́тии Сы́на от Ду́ха Свята́го Арха́нгелом предвозвеще́нная; ра́дуйся, благове́стия Арха́нгелова восприе́мнице смире́нная.
Ра́дуйся, Херуви́мов и Серафи́мов честне́йшая; ра́дуйся, Арха́нгелов и А́нгелов сла́внейшая.
Ра́дуйся, превы́ше си́л небе́сных вознесе́нная; ра́дуйся, от го́рних во́инств почита́емая.
Ра́дуйся, ли́ки а́нгельскими песносло́вимая; ра́дуйся, от все́х родо́в при́сно ублажа́емая.
Ра́дуйся, прибе́жище на́ше и заступле́ние; ра́дуйся, в ско́рбех и напа́стех вспоможе́ние.
Ра́дуйся, за христиа́н усе́рдная моли́твеннице; ра́дуйся, за ны́ пред Бо́гом ми́лостивая предста́тельнице.
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Конда́к 1.
Избра́нная от все́х родо́в, Влады́чице Де́во Богоро́дице, ны́не, припа́дающе к чудотво́рному о́бразу Твоему́, хвале́бное пе́ние и благодаре́ние прино́сим Ти́:
Ра́дуйся, Пренепоро́чная Отрокови́це, гра́да на́шего Небе́сная Засту́пнице.
Моли́тва.
О Всепе́тая и Всеблага́я Де́во Богоро́дице, Небе́сная на́ша Засту́пнице! К Тебе́ по Бо́зе, я́ко Премилосе́рдей Госпоже́, собо́рне прибега́ем и вопие́м: приими́ сие́ ма́лое хвале́бное пе́ние, сохрани́ Богоспаса́емый гра́д се́й, ему́ же чудотво́рная ико́на Твоя́ во отра́ду и утеше́ние даде́ся. Сего́ ра́ди мо́лим Тя́: изба́ви на́с от вра́г ви́димых и неви́димых, от наше́ствия иноплеме́нных и междоусо́бныя бра́ни, от зла́го обстоя́ния и ско́рби, от искуше́ний, бе́д и боле́зней.
Спаси́ и поми́луй рабы́ Твоя́: Вели́каго Господи́на и Отца́ на́шего Святе́йшаго Патриа́рха Моско́вскаго и всея́ Руси́, Преосвяще́нныя митрополи́ты, архиепи́скопы, епи́скопы, ве́сь свяще́ннический и мона́шеский чи́н, и ве́сь при́чет церко́вный. Приими́ под кро́в Тво́й вла́сти и во́инство богохрани́мыя страны́ на́шея, вразуми́ и наста́ви и́х пра́во пра́вити, за́поведи Бо́жия соблюда́юще, да ти́хое и безмо́лвное житие́ поживе́м во вся́ком благоче́стии и чистоте́. О Пречи́стая Влады́чице! Не забу́ди на́с во вся́ дни́ жи́зни на́шея и да пребыва́ет с на́ми неотсту́пно о́браз Тво́й честны́й. Во вре́мя же исхо́да на́шего проле́й те́плую Твою́ моли́тву ко Пра́ведному Судии́, да, презре́в безчи́сленная прегреше́ния, поми́лует и спасе́т на́с, я́ко Бла́г и Человеколю́бец. Ами́нь.
А҆ка́ѳїстъ прест҃ѣ́й бцⷣѣ въ че́сть ꙗ҆вле́нїѧ чꙋдотво́рныѧ є҆ѧ̀ і҆кѡ́ны ми́нскїѧ.
Конда́къ а҃.
И҆збра́ннаѧ ѿ всѣ́хъ родѡ́въ, влⷣчце дв҃о бцⷣе, ны́нѣ, припа́дающе къ чꙋдотво́рномꙋ ѻ҆́бразꙋ твоемꙋ̀, хвале́бное пѣ́нїе и҆ бл҃годаре́нїе прино́симъ тѝ: Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
І҆́косъ а҃.
А҆́гг҃льскїѧ си́лы, прилѣ́жнѡ молѧ́щїисѧ и҆ бл҃гоговѣ́йнѡ слꙋжа́щїи тѝ, прест҃а́ѧ дв҃о, ѿ лѣ́тъ дре́внихъ на ге́рбѣ бг҃оспаса́емагѡ гра́да ми́нска и҆зображе́ни бы́ша во свидѣ́тельство чꙋ́днагѡ твоегѡ̀ ѡ҆ на́съ попече́нїѧ. мы́ же земноро́днїи, дерза́ѧ подража́ти пѣ́сни а҆́гг҃льстѣй, благода́рственнѡ тебѣ̀ пое́мъ:
Ра́дꙋйсѧ, ѡ҆ зача́тїи сн҃а ѿ дх҃а ст҃а́гѡ а҆рха́гг҃ломъ предвозвѣще́ннаѧ: ра́дꙋйсѧ, бл҃говѣ́стїѧ а҆рха́гг҃лова воспрїе́мнице смире́ннаѧ.
Ра́дꙋйсѧ, херꙋві́мѡвъ и҆ серафі́мѡвъ чⷭ҇тнѣ́йшаѧ: ра́дꙋйсѧ, а҆рха́гг҃лѡвъ и҆ а҆́гг҃лѡвъ сла́внѣйшаѧ.
Ра́дꙋйсѧ, превы́ше си̑лъ нбⷭ҇ныхъ вознесе́ннаѧ: ра́дꙋйсѧ, ѿ го́рнихъ во́инствъ почита́емаѧ.
Ра́дꙋйсѧ, ли̑ки а҆́гг҃льскими пѣсносло́вимаѧ: ра́дꙋйсѧ, ѿ всѣ́хъ родѡ́въ при́снѡ ᲂу҆бл҃жа́емаѧ.
Ра́дꙋйсѧ, прибѣ́жище на́ше и҆ застꙋпле́нїе: ра́дꙋйсѧ, въ ско́рбехъ и҆ напа́стехъ вспоможе́нїе.
Ра́дꙋйсѧ, за хрⷭ҇тїа́нъ ᲂу҆се́рднаѧ мл҃твеннице: ра́дꙋйсѧ, за ны̀ пред̾ бг҃омъ млⷭ҇тиваѧ предста́тельнице.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ в҃.
Ви́дѣвши ст҃ы́й ѻ҆́бразъ тво́й, пречⷭ҇таѧ, ст҃ы́мъ лꙋко́ю первопи́санный, рекла̀ є҆сѝ: съ си́мъ ѻ҆́бразомъ блгⷣть моѧ̀ и҆ си́ла да пребꙋ́детъ. и҆ во ми́нстѣмъ ѻ҆́бразѣ зрѧ́ще сбы́тїе слове́съ твои́хъ, ѡ҆ тебѣ̀ просла́вимъ гдⷭ҇а, пою́ще є҆мꙋ̀: А҆ллилꙋ́їа.
І҆́косъ в҃.
Разꙋмѣ́ти не мо́жно ди́внагѡ про́мысла бж҃їѧ, ка́кѡ чꙋ́днаѧ і҆кѡ́на твоѧ̀, бцⷣе, насади́телю вѣ́ры правосла́вныѧ, бл҃говѣ́рномꙋ кнѧ́зю влади́мїрꙋ, на по́мощь даде́сѧ во а҆по́стольствѣ є҆гѡ̀ ѿ царьгра́да и҆ корсꙋ́ни да́же до кі́ева. мы́ же, преи́скреннѣ ᲂу҆милѧ́ющесѧ твоемꙋ̀ ѡ҆ ро́дѣ на́шемъ предста́тельствꙋ, вѣ́рнѡ вопїе́мъ:
Ра́дꙋйсѧ, и҆́стиннагѡ бл҃гоче́стїѧ наста́внице: ра́дꙋйсѧ, ꙗ҆зы́ческагѡ нече́стїѧ и҆скорени́тельнице.
Ра́дꙋйсѧ, чꙋдотво́рною і҆кѡ́ною а҆́ки драгоцѣ́ннымъ да́ромъ кн҃зѧ влади́мїра ѡ҆богати́вшаѧ: ра́дꙋйсѧ, въ равноапⷭ҇льныхъ трꙋдѣ́хъ є҆го̀ ᲂу҆крѣпи́вшаѧ.
Ра́дꙋйсѧ, вла́сть де́мѡнскꙋю сокрꙋши́вшаѧ: ра́дꙋйсѧ, вѣ́рꙋ правосла́внꙋю въ землѝ на́шей ᲂу҆тверди́вшаѧ.
Ра́дꙋйсѧ, тобо́ю ѿ пре́лести дїа́воли свобожда́емсѧ: ра́дꙋйсѧ, тобо́ю же позна́нїѧ творца̀ сподоблѧ́емсѧ.
Ра́дꙋйсѧ, ко́зней вра́жїихъ посѣче́нїе: ра́дꙋйсѧ, вѣ̑рныхъ ча̑дъ ѻ҆ц҃ꙋ̀ нбⷭ҇номꙋ ᲂу҆сн҃овле́нїе.
Ра́дꙋйсѧ, ѕловѣ́рїѧ і҆́дѡльскагѡ попра́нїе: ра́дꙋйсѧ, ᲂу҆че́нїѧ хрⷭ҇то́ва насажде́нїе.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ г҃.
Си́лꙋ бл҃года́ти, ꙗ҆вле́нныѧ въ честнѣ́й і҆кѡ́нѣ твое́й, влⷣчце, ви́дѣ ст҃ы́й равноапⷭ҇льный кн҃зь влади́мїръ и҆ со бл҃гоговѣ́нїемъ ве́лїимъ поста́ви ю҆̀ въ десѧти́ннѣй цр҃кви гра́да кі́ева, вопїю́ще бг҃ꙋ: А҆ллилꙋ́їа.
І҆́косъ г҃.
И҆мꙋ́щи попече́нїе мт҃рнее ѡ҆ просвѣще́нныхъ лю́дехъ землѝ рꙋ́сскїѧ, содѣ́лала є҆сѝ ю҆̀ до́момъ свои́мъ, и҆ то́ки чꙋде́съ ѿ і҆кѡ́ны твоеѧ̀ преизоби́льнѡ и҆сточи́ла є҆сѝ, бцⷣе, сегѡ̀ ра́ди взыва́емъ тѝ си́це:
Ра́дꙋйсѧ, притека́ющихъ къ і҆кѡ́нѣ твое́й лꙋча́ми чꙋде́съ ѡ҆зарѧ́ющаѧ: ра́дꙋйсѧ, ѡ҆браща́ющымсѧ къ не́й безчи́слєнныѧ млⷭ҇ти подаю́щаѧ.
Ра́дꙋйсѧ, всѣ̑мъ просѧ́щымъ мо́ре щедрѡ́тъ и҆злива́ющаѧ: ра́дꙋйсѧ, дх҃о́внꙋю ра́дость на́мъ содѣ́ловающаѧ.
Ра́дꙋйсѧ, ѡ҆ лю́дѣхъ правосла́вныхъ при́сное попече́нїе: ра́дꙋйсѧ, ѻ҆́бразъ тво́й дарова́вшаѧ на́мъ ꙗ҆́кѡ зало́гъ сп҃се́нїѧ.
Ра́дꙋйсѧ, и҆сто́чникъ блгⷣти неистощи́мый: ра́дꙋйсѧ, кла́дезю сокро́вищъ многоцѣ́нный.
Ра́дꙋйсѧ, крѣ́посте тве́рдаѧ вѣ́ры правосла́вныѧ: ра́дꙋйсѧ, всѣ̑мъ чтꙋ́щымъ сн҃а твоегѡ̀ по́моще пресла́внаѧ.
Ра́дꙋйсѧ, пꙋ́ть и҆́стины ᲂу҆казꙋ́ющаѧ заблꙋ́ждшымъ: ра́дꙋйсѧ, ско́рѡ поспѣ́шствꙋющаѧ на по́мощь тѧ̀ призыва́ющымъ.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ д҃.
Бꙋ̑ри бѣ́дъ и҆ напа́стей за грѣхѝ на́шѧ мно́гажды на рꙋ́сь воздвиза́еми бы́ша, та́кожде и҆ гра́дъ кі́евъ ѻ҆гню̀ и҆ мечꙋ̀ предава́емъ бѣ̀ ѿ нечести́выхъ а҆га̑рѧнъ, не вѣ́дꙋщихъ пѣ́ти и҆́стинномꙋ бг҃ꙋ: А҆ллилꙋ́їа.
І҆́косъ д҃.
Слы́шавъ ѡ҆ бога́тствѣ кі́ева, ха́нъ а҆га́рѧнскїй во є҆ди́но лѣ́то ᲂу҆стреми́сѧ расхи́тити є҆̀, и҆ гра́дъ то́й пожжѐ. во́инъ же нѣ́кїй ѕлочести́вый, взѧ́въ ри́зꙋ многоцѣ́ннꙋю, всебл҃га́ѧ мт҃и, і҆кѡ́нꙋ же твою̀ вве́рже въ днѣ́пръ, ѻ҆ба́че сїѧ̀ неврежде́нна въ вода́хъ сохрани́сѧ, подвиза́ющи на́съ восхвали́ти тѧ̀ си́це:
Ра́дꙋйсѧ, ѻ҆́бразъ тво́й, ꙗ҆́кѡ кꙋпинꙋ̀ неѡпа́льнꙋ ꙗ҆ви́вшаѧ: ра́дꙋйсѧ, і҆кѡ́нꙋ твою̀ ѿ пла́мене сохрани́вшаѧ.
Ра́дꙋйсѧ, по вода́мъ а҆́ки по сꙋ́хꙋ ѿ кі́ева да́же до ми́нска і҆кѡ́нꙋ твою̀ прене́сшаѧ: ра́дꙋйсѧ, во́ды неми́ги и҆ сви́слочи ꙗ҆вле́нїемъ свои́мъ ѡ҆ст҃и́вшаѧ.
Ра́дꙋйсѧ, цр҃и́це нб҃сѐ и҆ землѝ, є҆́йже всѧ̑ стїхі̑и покорѧ́ютсѧ: ра́дꙋйсѧ, тобо́ю же на сп҃си́тєльныѧ стєзѝ лю́ди наставлѧ́ютсѧ.
Ра́дꙋйсѧ, пото́па грѣхо́внагѡ ᲂу҆смире́нїе: ра́дꙋйсѧ, свирѣ́пыхъ страсте́й ᲂу҆кроще́нїе.
Ра́дꙋйсѧ, мо́рѧ жите́йскагѡ бл҃гонаде́жное прохожде́нїе: ра́дꙋйсѧ, ѿ землѝ на нб҃о вѣ́рныхъ возведе́нїе.
Ра́дꙋйсѧ, ди́вное бл҃года́ти зна́менїе: ра́дꙋйсѧ, си́лы чꙋдотво́рныѧ ꙗ҆вле́нїе.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ є҃.
Бг҃оте́чнѣй ѕвѣздѣ̀ ᲂу҆подо́биласѧ є҆сѝ пречⷭ҇тна́ѧ і҆кѡ́на твоѧ̀, бг҃ороди́тельнице, лꙋчи̑ чꙋ́дными ѡ҆сїѧ́вшаѧ насе́льники гра́да ми́нска. ѻ҆ни́ же, зрѧ́ще таи́нственное ꙗ҆вле́нїе є҆ѧ̀ на вода́хъ сви́слочи, со ᲂу҆миле́нїемъ воспѣ́ша сн҃ꙋ твоемꙋ̀ и҆ бг҃ꙋ на́шемꙋ: А҆ллилꙋ́їа.
І҆́косъ є҃.
Ви́дѣвше чꙋ́днꙋю і҆кѡ́нꙋ сїю̀, ѽ всемлⷭ҇тиваѧ, и҆ прїе́млюще ꙗ҆́кѡ да́ръ бж҃їй, лю́ди хрⷭ҇тїа́нстїи взѧ́ша ю҆̀ ѿ воды̀ и҆ поста́виша въ цр҃кви за́мковой въ че́сть пресла́внагѡ ржⷭ҇тва̀ твоегѡ̀, и҆ а҆́бїе бл҃года́рнѣ воззва́ша:
Ра́дꙋйсѧ, ѿ і҆кѡ́ны твоеѧ̀ да̑ры многоразли́чнїи и҆сточа́ющаѧ: ра́дꙋйсѧ, ꙗ҆́кѡ само́й тѝ сꙋ́щей во і҆кѡ́нѣ твое́й бл҃года́ть на́мъ и҆злива́ющаѧ.
Ра́дꙋйсѧ, грѣ́шникѡвъ не ѿмета́ющаѧ: ра́дꙋйсѧ, ка́ющихсѧ те́плѣ прїе́млющаѧ.
Ра́дꙋйсѧ, гра́да на́шегѡ неꙋсы́пнаѧ храни́тельнице: ра́дꙋйсѧ, за на́съ пред̾ бг҃омъ любвеѻби́льнаѧ хода́таице.
Ра́дꙋйсѧ, вѣ́ры и҆ бл҃гоче́стїѧ и҆справле́нїе: ра́дꙋйсѧ, въ мл҃твахъ ко гдⷭ҇ꙋ всемо́щное дерзнове́нїе.
Ра́дꙋйсѧ, болѧ́щихъ и҆ немощствꙋ́ющихъ и҆сцѣле́нїе: ра́дꙋйсѧ, заблꙋ́ждшихъ на пꙋ́ть пра́вый наставле́нїе.
Ра́дꙋйсѧ, бл҃года́ти ѻ҆би́льное дарова́нїе: ра́дꙋйсѧ, люде́й хрⷭ҇тоимени́тыхъ непосты́дное ᲂу҆пова́нїе.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ ѕ҃.
Проповѣ́дниками чꙋде́съ ве́лїихъ, ѿ і҆кѡ́ны ми́нскїѧ и҆стека́ющихъ, ꙗ҆ви́шасѧ мно́зи лю́дїе, и҆̀хже ты̀, премлⷭ҇рднаѧ влⷣчце, поклонѧ́тисѧ ст҃ы́нѣ се́й наꙋчи́ла є҆сѝ, да нело́жнѡ воспою́тъ бг҃ꙋ: А҆ллилꙋ́їа.
І҆́косъ ѕ҃.
Возсїѧ̀ и҆ возвели́чисѧ вѣ́ра на́ша по мно́зѣхъ лѣ́тѣхъ плѣне́нїѧ ле́стнагѡ и҆ непра́вагѡ, и҆ па́ки возврати́сѧ і҆кѡ́на ми́нскаѧ лю́демъ правосла̑внымъ, и҆̀же съ ра́достїю воспѣ́ша бцⷣе:
Ра́дꙋйсѧ, правосла́вїѧ щи́те и҆ ѡ҆гражде́нїе: ра́дꙋйсѧ, ѻ҆ч҃ескихъ ᲂу҆ста́вѡвъ незы́блемое ᲂу҆твержде́нїе.
Ра́дꙋйсѧ, маловѣ́рныхъ вразꙋмле́нїе: ра́дꙋйсѧ, въ сомнѣ́нїи сꙋ́щимъ снисхожде́нїе.
Ра́дꙋйсѧ, вѣ̑рныхъ ча̑дъ цр҃кве правосла́вныѧ дх҃о́вное ᲂу҆слажде́нїе: ра́дꙋйсѧ, ѿстꙋ́пникѡвъ пра́выѧ вѣ́ры посрамле́нїе.
Ра́дꙋйсѧ, правосла́вныхъ немо́лчнаѧ похвало̀: ра́дꙋйсѧ, гони̑мымъ за вѣ́рꙋ несокрꙋши́мое забра́ло.
Ра́дꙋйсѧ, ᲂу҆теснѧ́ємымъ ско́рое вспоможе́нїе: ра́дꙋйсѧ, мч҃никѡвъ и҆ и҆сповѣ́дникѡвъ неизглаго́ланнаѧ ѿра́до.
Ра́дꙋйсѧ, и҆скꙋша́ємымъ по́моще: ра́дꙋйсѧ, ѡ҆бꙋрева́ємымъ приста́нище.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ з҃.
Хотѧ̀ влⷣка на́шъ и҆ сꙋдїѧ̀ првⷣнѣйшїй вразꙋми́ти зе́млю рꙋ́сскꙋю за беззакѡ́нїѧ тмочи́слєнныѧ, попꙋстѝ мꙋчи́телємъ гна́ти цр҃ковь правосла́внꙋю, да всѝ, въ покаѧ́нїе прише́дше, возопїи́мъ є҆мꙋ̀: А҆ллилꙋ́їа.
І҆́косъ з҃.
Но́вое наста̀ и҆спыта́нїе ѿ гдⷭ҇а, є҆гда̀ собо́рный хра́мъ во гра́дѣ ми́нскѣ разрꙋше́нъ бы́сть ѿ неи́стовыхъ гони́телей. і҆кѡ́на же твоѧ̀, ѽ бг҃омт҃и, ѿѧ́та и҆ сокры́та бѣ̀ ѿ вѣ́рныхъ. лю́дїе же правосла́внїи въ сокрꙋше́нїи сердє́цъ возопи́ша къ бцⷣе:
Ра́дꙋйсѧ, во дни̑ правосꙋ́днагѡ бж҃їѧ посѣще́нїѧ гнѣ́въ є҆гѡ̀ ѿводѧ́щаѧ: ра́дꙋйсѧ, въ тѧ́жкихъ ѕлострада́нїѧхъ на́съ не ѡ҆ставлѧ́ющаѧ.
Ра́дꙋйсѧ, лю̑тыѧ крамѡ́лы ѡ҆блича́ющаѧ: ра́дꙋйсѧ, дꙋшегꙋби́тєльныѧ ᲂу҆чє́нїѧ низлага́ющаѧ.
Ра́дꙋйсѧ, бл҃госе́рдаѧ на́ша вразꙋми́тельнице: ра́дꙋйсѧ, непамѧтоѕло́бнаѧ на́ша настави́тельнице.
Ра́дꙋйсѧ, въ ѕлы́хъ ѡ҆бстоѧ́нїихъ неистощи́мое терпѣ́нїе: ра́дꙋйсѧ, съ правосꙋ́дїемъ бж҃їимъ смире́нное примире́нїе.
Ра́дꙋйсѧ, малодꙋ́шныхъ и҆ па́дшихъ возста́нїе: ра́дꙋйсѧ, дꙋ́ха ᲂу҆ны́нїѧ и҆ боѧ́зни ѿгна́нїе.
Ра́дꙋйсѧ, грѣхѡ́въ на́шихъ ѿпꙋще́нїе: ра́дꙋйсѧ, бж҃їе къ на́мъ бл҃говоле́нїе.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ и҃.
Стра́нное и҆ ᲂу҆жа́сное наше́ствїе и҆ноплеме́нныхъ пости́же на́съ. млⷭ҇рдїемъ же бж҃їимъ ѡ҆долѣ́въ врагѝ, лю́дїе, предста́тельствомъ бг҃омт҃ри, ѿверзо́ша хра́мы правосла́внїи и҆ возда́ша бл҃годаре́нїе гдⷭ҇еви, воспѣва́ѧ є҆мꙋ̀: А҆ллилꙋ́їа.
І҆́косъ и҃.
Всѧ̑ и҆спо́лнисѧ ра́дости неизрече́нныѧ, є҆гда̀ раба̀ бж҃їѧ варва́ра ѡ҆брѣ́те чꙋ́дный ѻ҆́бразъ тво́й, мт҃и дв҃о, сокры́тый посредѣ̀ пра́ха и҆ тлѣ́нїѧ. мы́ же, дивѧ́щесѧ таково́мꙋ неча́емомꙋ ѡ҆брѣ́тенїю, восхвалѧ́емъ тѧ̀:
Ра́дꙋйсѧ, вѣ́рꙋ хрⷭ҇то́вꙋ ѿ порꙋга́нїѧ защища́ющаѧ: ра́дꙋйсѧ, првⷣный гнѣ́въ бж҃їй на млⷭ҇ть претворѧ́ющаѧ.
Ра́дꙋйсѧ, ѿстꙋ́пникѡвъ вѣ́ры постыжа́ющаѧ: ра́дꙋйсѧ, нече́стїе грѣ́шникѡвъ ѡ҆блича́ющаѧ.
Ра́дꙋйсѧ, бронѐ неꙋѧзви́маѧ: ра́дꙋйсѧ, воево́до непобѣди́маѧ.
Ра́дꙋйсѧ, ѿ наше́ствїѧ и҆ноплеме́нныхъ и҆збавле́нїе: ра́дꙋйсѧ, ѿ рабо́ты вра́жїѧ свобожде́нїе.
Ра́дꙋйсѧ, ви́димыхъ и҆ неви́димыхъ сꙋпоста̑тъ ѡ҆долѣ́нїе: ра́дꙋйсѧ, враждꙋ́ющихъ ско́рое вразꙋмле́нїе.
Ра́дꙋйсѧ, ᲂу҆покое́нїе за дрꙋ́ги своѧ̑ дꙋ́шы положи́вшихъ: ра́дꙋйсѧ, прославле́нїе за вѣ́рꙋ и҆ ѻ҆те́чество на по́лѣ бра́ни ᲂу҆бїе́нныхъ.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ ѳ҃.
Всѧ́кое разꙋмѣ́нїе человѣ́ческое не возмо́жетъ и҆счестѝ страда̑нїѧ, ко́и претерпѣ́ли гра́ждане ѻ҆те́чества на́шегѡ въ годи́нꙋ вѡ́инъ, лихолѣ́тїй и҆ въ послѣ́днее вре́мѧ ѿ бѣды̀ черно́быльскїѧ. взира́ѧ же на і҆кѡ́нꙋ твою̀, бг҃ома́ти, ꙗ҆́кѡ на цѣльбоно́сное ᲂу҆тѣше́нїе, непреста́ннѡ пое́мъ: А҆ллилꙋ́їа.
І҆́косъ ѳ҃.
Вѣті̑ѧ сꙋемꙋ́дрєнныѧ соблазнѧ́ютсѧ ѡ҆ дре́вности і҆кѡ́ны ми́нскїѧ и҆ недоꙋмѣ́ютъ пости́гнꙋти таи́нственный про́мыслъ бж҃їй, сохрани́вшїй ю҆̀ въ ѻ҆гнѣ̀ и҆ вода́хъ, ѿ рꙋ́къ и҆ноплеме́нныхъ и҆ ѕлоꙋмышлє́нїй сꙋпроти́вныхъ. мы́ же, прославлѧ́юще бцⷣꙋ пред̾ чꙋдотво́рнымъ ѡ҆́бразомъ є҆ѧ̀, вопїе́мъ такова̑ѧ:
Ра́дꙋйсѧ, почита́нїѧ ст҃ы́хъ і҆кѡ́нъ ᲂу҆вѣнча́нїе: ра́дꙋйсѧ, і҆кѡнобо́рнагѡ ѕлоче́стїѧ ѡ҆бличе́нїе.
Ра́дꙋйсѧ, дꙋшеполе́зныхъ зна́нїй преиз̾ѡби́льное и҆злїѧ́нїе: ра́дꙋйсѧ, дꙋшевре́днагѡ мра́ка свѣ́тлое ѡ҆заре́нїе.
Ра́дꙋйсѧ, невѣ́рныхъ смы́слѡвъ млⷭ҇тивое просвѣще́нїе: ра́дꙋйсѧ, непра́вѡ мꙋ́дрствꙋющихъ внеза́пное низверже́нїе.
Ра́дꙋйсѧ, вѣ́рныхъ незы́блемое ᲂу҆вѣре́нїе: ра́дꙋйсѧ, ѿе́млющаѧ дꙋхо́вное помраче́нїе.
Ра́дꙋйсѧ, про́мысла бж҃їѧ прославле́нїе: ра́дꙋйсѧ, прего́рдыхъ хꙋли́телей ᲂу҆страше́нїе.
Ра́дꙋйсѧ, сꙋемꙋ́дренныхъ премꙋ́дрѡ смирѧ́ющаѧ: ра́дꙋйсѧ, заблꙋ́ждшихъ кро́ткѡ вразꙋмлѧ́ющаѧ.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ і҃.
Сп҃си́тельное приста́нище ѿ жите́йскихъ треволне́нїй и҆́мамы во хра́мѣ дх҃а ст҃а́гѡ бг҃оспаса́емагѡ гра́да на́шегѡ, и҆дѣ́же свѣтоза́рнаѧ і҆кѡ́на твоѧ̀, влⷣчце, неѿстꙋ́пнѡ доны́нѣ пребыва́етъ, всѣ́хъ на́съ пꙋтеводѧ̀ къ жи́зни вѣ́чнѣй. сегѡ̀ ра́ди ѡ҆ тебѣ̀ возглаша́емъ бг҃ꙋ: А҆ллилꙋ́їа.
І҆́косъ і҃.
Стѣна̀ и҆ застꙋпле́нїе не то́кмѡ гра́дꙋ на́шемꙋ, но и҆ всѣ̑мъ съ вѣ́рою притека́ющымъ къ тебѣ̀, пребл҃гослове́ннаѧ, даде́сѧ ст҃а́ѧ і҆кѡ́на твоѧ̀, є҆́юже мно́гажды бл҃годѣ́ѧла є҆сѝ на́мъ и҆ ѻ҆тцє́мъ на́шимъ, да вознесе́мъ тѝ пѣ́нїе таково́е:
Ра́дꙋйсѧ, и҆́щꙋщымъ сп҃се́нїѧ пра́вый пꙋ́ть ᲂу҆казꙋ́ющаѧ: ра́дꙋйсѧ, снизше́дшихъ да́же до дна̀ а҆́дова мл҃твами свои́ми сп҃са́ющаѧ.
Ра́дꙋйсѧ, сꙋпроти́въ наше́ствїѧ и҆ноплеме́нныхъ на́съ воздвиза́ющаѧ: ра́дꙋйсѧ, ѿ врагѡ́въ ѻ҆те́чество на́ше и҆збавлѧ́ющаѧ.
Ра́дꙋйсѧ, ѿча́ѧнныхъ ско́рое ᲂу҆слы́шанїе: ра́дꙋйсѧ, недꙋ́гѡвъ дꙋше́вныхъ и҆ тѣле́сныхъ безме́здное врачева́нїе.
Ра́дꙋйсѧ, печа́лей жите́йскихъ ᲂу҆толе́нїе: ра́дꙋйсѧ, грѣхо́вныхъ ꙗ҆́звъ ѡ҆чище́нїе.
Ра́дꙋйсѧ, во ѡ҆бстоѧ́нїѧхъ сꙋ́щимъ всегда́шнѧѧ помо́щнице: ра́дꙋйсѧ, лю́демъ бл҃говѣ̑рнымъ ᲂу҆се́рднаѧ споспѣ́шнице.
Ра́дꙋйсѧ, неча́ѧннаѧ ра́досте: ра́дꙋйсѧ, непосты́днаѧ наде́ждо.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ а҃і.
Пѣ́нїе и҆ моле́нїе ѡ҆ бг҃охрани́мѣй странѣ̀ на́шей, властѣ́хъ, во́инствѣ и҆ наро́дѣ є҆ѧ̀, прїимѝ пред̾ чꙋдотво́рнымъ ѡ҆́бразомъ твои́мъ, влⷣчце, и҆ сп҃сѝ на́съ, ꙗ҆́кѡ держа́щаѧ ски́петръ въ рꙋцѣ̀ свое́й. бг҃омладе́нецъ же і҆и҃съ, и҆мѣ́ѧй въ десни́цѣ держа́вꙋ, да да́рꙋетъ на́мъ ти́хое и҆ безмо́лвное житїѐ, слы́шаще ѿ на́съ: А҆ллилꙋ́їа.
І҆́косъ а҃і.
Свѣ́тлый пра́здникъ ꙗ҆вле́нїѧ і҆кѡ́ны твоеѧ̀, приснодв҃о, во гра́дѣ ми́нскѣ, и҆сполнѧ́етъ ликова́нїемъ сердца̀ на̑ша. сегѡ̀ ра́ди съ вѣ́рою припа́дающе и҆ съ любо́вїю лобыза́юще чꙋ́дный ѻ҆́бразъ тво́й, вопїе́мъ тѝ:
Ра́дꙋйсѧ, бг҃оспаса́емомꙋ гра́дꙋ на́шемꙋ млⷭ҇ть показа́вшаѧ: ра́дꙋйсѧ, на́съ грѣ́шныхъ сїѧ́нїемъ свои́мъ просвѣти́вшаѧ.
Ра́дꙋйсѧ, при́снѡ си́лꙋ свою̀ ꙗ҆влѧ́ющаѧ: ра́дꙋйсѧ, предста́тельствомъ свои́мъ на́съ сп҃са́ющаѧ.
Ра́дꙋйсѧ, мл҃твы на̑ша прїе́млющаѧ: ра́дꙋйсѧ, хвале́нїѧ на̑ша не ѿверга́ющаѧ.
Ра́дꙋйсѧ, небожи́телѧми при́снѡ прославлѧ́емаѧ: ра́дꙋйсѧ, собо́ромъ бѣлорꙋ́сскихъ ст҃ы́хъ и҆ новомч҃нкѡвъ сꙋгꙋ́бѡ воспѣва́емаѧ.
Ра́дꙋйсѧ, людьмѝ бл҃гочести́выми въ позлаще́ннꙋю ри́зꙋ ѡ҆блече́ннаѧ: ра́дꙋйсѧ, мно́гими би́серами и҆ а҆дама́нтами преꙋкраше́ннаѧ.
Ра́дꙋйсѧ, сердє́цъ на́шихъ ти́хое ᲂу҆миле́нїе: ра́дꙋйсѧ, житїѧ̀ на́шегѡ до́брое ᲂу҆строе́нїе.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ в҃і.
Бл҃года́ти своеѧ̀, ѽ всемлⷭ҇тиваѧ мт҃и, не лишѝ на́съ грѣ́шныхъ, претерпѣва́емъ бо дне́сь нѡ́выѧ скѡ́рби и҆ нестроє́нїѧ, ника́коже и҆мꙋ́ще наде́жды ѡ҆правди́тисѧ, но помозѝ на́мъ возста́ти ѿ поги́бельныхъ смꙋ́тъ, да, ѡ҆ тебѣ̀ ра́дꙋющесѧ, воспое́мъ бг҃ꙋ: А҆ллилꙋ́їа.
І҆́косъ в҃і.
Пою́ще нбⷭ҇нꙋю застꙋ́пницꙋ на́шꙋ, вѣ́рꙋемъ и҆ и҆сповѣ́дꙋемъ, ꙗ҆́кѡ и҆ въ послѣ̑днѧѧ времена̀ ꙗ҆ви́ши бл҃года́тнꙋю по́мощь, и҆ и҆́миже вѣ́си сꙋдьба́ми сохрани́ши на́съ ѿ собла́знѡвъ мі́ра сегѡ̀, да бл҃года́рнѣ восхва́лимъ тѧ̀:
Ра́дꙋйсѧ, и҆збавле́нїе на́ше ѿ навѣ̑тъ вра́жїихъ: ра́дꙋйсѧ, сп҃се́нїе ѿ кова́рствъ лꙋка́вагѡ.
Ра́дꙋйсѧ, ѿ сна̀ грѣхо́внагѡ пробꙋжде́нїе: ра́дꙋйсѧ, беззако́нїй на́шихъ проще́нїе.
Ра́дꙋйсѧ, пред̾ всевы́шнимъ бл҃гоговѣ́йное предстоѧ́нїе: ра́дꙋйсѧ, пѡ́лчищъ сатани́нскихъ благомо́щное разсѣ́ѧнїе.
Ра́дꙋйсѧ, поги́бшихъ взыска́нїе: ра́дꙋйсѧ, прельще́нныхъ вразꙋмле́нїе.
Ра́дꙋйсѧ, напра́снꙋю сме́рть ѿ на́съ ѿводѧ́щаѧ: ра́дꙋйсѧ, ѡ҆ кончи́нѣ хрⷭ҇тїа́нстѣй на́мъ хода́тайствꙋющаѧ.
Ра́дꙋйсѧ, врата̀ нбⷭ҇наѧ на́мъ ѿверза́ющаѧ: ра́дꙋйсѧ, къ жи́зни вѣ́чнѣй на́съ приводѧ́щаѧ.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ г҃і.
Ѽ всепѣ́таѧ мт҃и, застꙋ́пнице нбⷭ҇наѧ гра́да на́шегѡ, прїимѝ сїю̀ ма́лꙋю мл҃твꙋ и҆ ᲂу҆молѝ сн҃а твоегѡ̀, сꙋдїю̀ првⷣнагѡ, да сподо́битъ десна́гѡ стоѧ́нїѧ на́съ, вопїю́щихъ є҆мꙋ̀: А҆ллилꙋ́їа.
Се́й конда́къ чте́тсѧ три́жды. И҆ па́ки і҆́косъ а҃_й и҆ конда́къ а҃_й.
І҆́косъ а҃.
А҆́гг҃льскїѧ си́лы, прилѣ́жнѡ молѧ́щїисѧ и҆ бл҃гоговѣ́йнѡ слꙋжа́щїи тѝ, прест҃а́ѧ дв҃о, ѿ лѣ́тъ дре́внихъ на ге́рбѣ бг҃оспаса́емагѡ гра́да ми́нска и҆зображе́ни бы́ша во свидѣ́тельство чꙋ́днагѡ твоегѡ̀ ѡ҆ на́съ попече́нїѧ. мы́ же земноро́днїи, дерза́ѧ подража́ти пѣ́сни а҆́гг҃льстѣй, благода́рственнѡ тебѣ̀ пое́мъ:
Ра́дꙋйсѧ, ѡ҆ зача́тїи сн҃а ѿ дх҃а ст҃а́гѡ а҆рха́гг҃ломъ предвозвѣще́ннаѧ: ра́дꙋйсѧ, бл҃говѣ́стїѧ а҆рха́гг҃лова воспрїе́мнице смире́ннаѧ.
Ра́дꙋйсѧ, херꙋві́мѡвъ и҆ серафі́мѡвъ чⷭ҇тнѣ́йшаѧ: ра́дꙋйсѧ, а҆рха́гг҃лѡвъ и҆ а҆́гг҃лѡвъ сла́внѣйшаѧ.
Ра́дꙋйсѧ, превы́ше си̑лъ нбⷭ҇ныхъ вознесе́ннаѧ: ра́дꙋйсѧ, ѿ го́рнихъ во́инствъ почита́емаѧ.
Ра́дꙋйсѧ, ли̑ки а҆́гг҃льскими пѣсносло́вимаѧ: ра́дꙋйсѧ, ѿ всѣ́хъ родѡ́въ при́снѡ ᲂу҆бл҃жа́емаѧ.
Ра́дꙋйсѧ, прибѣ́жище на́ше и҆ застꙋпле́нїе: ра́дꙋйсѧ, въ ско́рбехъ и҆ напа́стехъ вспоможе́нїе.
Ра́дꙋйсѧ, за хрⷭ҇тїа́нъ ᲂу҆се́рднаѧ мл҃твеннице: ра́дꙋйсѧ, за ны̀ пред̾ бг҃омъ млⷭ҇тиваѧ предста́тельнице.
Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Конда́къ а҃.
И҆збра́ннаѧ ѿ всѣ́хъ родѡ́въ, влⷣчце дв҃о бцⷣе, ны́нѣ, припа́дающе къ чꙋдотво́рномꙋ ѻ҆́бразꙋ твоемꙋ̀, хвале́бное пѣ́нїе и҆ бл҃годаре́нїе прино́симъ тѝ: Ра́дꙋйсѧ, пренепоро́чнаѧ ѻ҆трокови́це, гра́да на́шегѡ нбⷭ҇наѧ застꙋ́пнице.
Мл҃тва.
Ѽ всепѣ́таѧ и҆ всебл҃га́ѧ дв҃о бцⷣе, нбⷭ҇наѧ на́ша застꙋ́пнице! Къ тебѣ̀ по бз҃ѣ, ꙗ҆́кѡ премлⷭ҇рдѣй гпⷭ҇жѐ, собо́рнѣ прибѣга́емъ и҆ вопїе́мъ: прїимѝ сїѐ ма́лое хвале́бное пѣ́нїе, сохранѝ бг҃оспаса́емый гра́дъ сѣ́й, є҆мꙋ́же чꙋдотво́рнаѧ і҆кѡ́на твоѧ̀ во ѿра́дꙋ и҆ ᲂу҆тѣше́нїе даде́сѧ. Сегѡ̀ ра́ди мо́лимъ тѧ̀: и҆зба́ви на́съ ѿ вра̑гъ ви́димыхъ и҆ неви́димыхъ, ѿ наше́ствїѧ и҆ноплеме́нныхъ и҆ междоꙋсо́бныѧ бра́ни, ѿ ѕла́гѡ ѡ҆бстоѧ́нїѧ и҆ ско́рби, ѿ и҆скꙋше́нїй, бѣ́дъ и҆ болѣ́зней. Сп҃сѝ и҆ поми́лꙋй рабы̑ твоѧ̑: вели́кагѡ господи́на и҆ ѻ҆тца̀ на́шегѡ свѧтѣ́йшагѡ патрїа́рха моско́вскагѡ и҆ всеѧ̀ рꙋсѝ, преѡсщ҃є́нныѧ митрополі́ты, а҆рхїепі́скопы, є҆пі́скопы, ве́сь сщ҃е́нническїй и҆ мона́шескїй чи́нъ, и҆ ве́сь при́четъ цр҃ко́вный. Прїимѝ под̾ кро́въ тво́й вла̑сти и҆ во́инство бг҃охрани́мыѧ страны̀ на́шеѧ, вразꙋмѝ и҆ наста́ви и҆̀хъ пра́вѡ пра́вити, за́пѡвѣди бж҃їѧ соблюда́юще, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀. Ѽ пречⷭ҇таѧ влⷣчце! Не забꙋ́ди на́съ во всѧ̑ дни̑ жи́зни на́шеѧ и҆ да пребыва́етъ съ на́ми неѿстꙋ́пнѡ ѻ҆́бразъ тво́й чⷭ҇тны́й. Во вре́мѧ же и҆схо́да на́шегѡ проле́й те́плꙋю твою̀ мл҃твꙋ ко првⷣномꙋ сꙋдїѝ, да, презрѣ́въ безчи́слєннаѧ прегрѣшє́нїѧ, поми́лꙋетъ и҆ сп҃се́тъ на́съ, ꙗ҆́кѡ бл҃гъ и҆ чл҃вѣколю́бецъ. А҆ми́нь.
Минская икона Пресвятой Богородицы в конце X века была перенесена святым равноапостольным князем Владимиром из Корсуни в Киев и поставлена в Десятинной церкви (память освящения церкви в 996 году – 12 мая), в которой и пребывала более 500 лет. В 1500 году, во время взятия Киева ханом Менгли-Гиреем, некий татарин, сорвав с чудотворной иконы ризу и украшения, бросил ее в Днепр.
Через некоторое время святой образ Царицы Небесной чудесным образом явился в Минске на реке Свислочи. Приставшую к берегу икону, окруженную необычайным светом, торжественно перенесли в церковь в честь Рождества Пресвятой Богородицы, находившуюся в замке минских удельных князей. Это произошло 13 августа 1500 года, поэтому и празднование чудотворному образу было установлено в этот день.
В 1616 году святая икона была перенесена в Минскую церковь в честь Сошествия Святого Духа.
На иконе, помещенной с левой стороны иконостаса, изображена Божия Матерь с Предвечным Младенцем на левой руке. Икона писана яичными красками на деревянной доске и в 1852 году покрыта серебряной ризой, над ликами Богоматери и Спасителя, держащего в левой руке державу – вызолоченные венцы с драгоценными камнями. На ризе внизу вычеканена следующая надпись: «Сия икона Божией Матери с Младенцем Иисусом, поставленная великим князем земли Русския св. Владимиром в Киеве, в Десятинной церкви, а по разорении Киева татарами явившаяся 13 августа 1500 года в г. Минске, на реке Свислочи, и помещенная в замковой церкви, впоследствии же перенесенная в кафедральный собор, 1852 г. усердием православных облечена в новую серебряную ризу».
