Канон в неделю сыропустную

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Грѧдѝ дꙋшѐ моѧ̀ стра́стнаѧ, пла́чи твоѧ̑ дѣѧ̑нїѧ дне́сь, помина́ющи пе́рвое ѡ҆бнаже́нїе во є҆де́мѣ, и҆́мже и҆згна́на є҆сѝ ѿ сла́дости, и҆ непреста́нныѧ ра́дости.

Ѿ мно́гагѡ бл҃гоꙋтро́бїѧ и҆ щедро́тъ, созда́телю тва́ри, и҆ тво́рче всѣ́хъ, ѿ пе́рсти ѡ҆живи́въ мѧ̀ пре́жде, заповѣ́далъ є҆сѝ пѣ́ти тѧ̀ со а҆́гг҃лы твои́ми.

Ра́ди бога́тства бл҃гости, ты̀ сади́ши созда́телю и҆ гдⷭ҇и, ра́йскꙋю сла́дость во є҆де́мѣ, повелѣва́ѧ мѝ наслажда́тисѧ кра́сныхъ и҆ сла́дкихъ, и҆ немимотекꙋ́щихъ плодѡ́въ.

Сла́ва: Оу҆вы̀ мнѣ̀ дꙋшѐ моѧ̀ ѻ҆каѧ́ннаѧ, сꙋ́щихъ во є҆де́мѣ наслажда́тисѧ прїѧ́ла є҆сѝ вла́сть ѿ бг҃а, не ꙗ҆́сти же вѣ́дѣнїѧ плода̀ повелѣ́на была̀ є҆сѝ: вскꙋ́ю престꙋпи́ла є҆сѝ зако́нъ бж҃їй;

Бг҃оро́диченъ: Бг҃ороди́тельнице дв҃о, ꙗ҆́кѡ а҆да́мова дщѝ по ро́дꙋ, по бл҃года́ти же хрⷭ҇тꙋ̀ бг҃ꙋ роди́тельница, менѐ и҆згна́ннаго ѿ є҆де́ма, ны́нѣ воззовѝ.

Пѣ́снь г҃.

І҆рмо́съ: Нѣ́сть ст҃ъ ꙗ҆́коже ты̀ гдⷭ҇и бж҃е мо́й, вознесы́й ро́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Ѕмі́й льсти́вый нѣ́когда че́сти мое́й позави́дѣвъ, пошепта̀ ле́стїю є҆́ѵѣ во ᲂу҆́ши, ѿ неѧ́же а҆́зъ прельсти́всѧ и҆згна́нъ бы́хъ, ᲂу҆вы̀ мнѣ̀, ѿ ли́ка жи́зни.

Рꙋ́кꙋ просте́ръ де́рзостнѡ, вкꙋси́хъ дре́ва разꙋ́мнагѡ, є҆го́же повелѣ̀ мнѣ̀ бг҃ъ ника́коже причасти́тисѧ, и҆ бж҃е́ственныѧ сла́вы ѿве́рженъ бы́хъ го́рцѣ.

Сла́ва: Оу҆вы̀ мнѣ̀ стра́стнаѧ моѧ̀ дꙋшѐ, ка́кѡ не позна́ла є҆сѝ пре́лести; ка́кѡ не ѡ҆щꙋти́ла є҆сѝ льще́нїѧ, и҆ за́висти вра́жїѧ; но помрачи́ласѧ є҆сѝ ᲂу҆мо́мъ, и҆ престꙋпи́ла є҆сѝ за́повѣдь созда́телѧ твоегѡ̀.

Бг҃оро́диченъ: Оу҆пова́нїе и҆ покро́въ мо́й чⷭ҇таѧ, ѡ҆бнаже́нїе дре́вле покры́вшаѧ, є҆ди́на, па́дшагѡ а҆да́ма, ржⷭ҇тво́мъ твои́мъ чⷭ҇таѧ, въ нетлѣ́нїе па́ки ѡ҆блецы́ мѧ.

Сѣда́ленъ, гла́съ д҃.

И҆згна́нъ бы́сть а҆да́мъ ѿ ра́йскїѧ сла́дости, снѣ́дїю го́рькою въ невоздержа́нїи за́повѣди не сохранѝ влⷣчни, и҆ ѡ҆сꙋди́сѧ дѣ́лати зе́млю, ѿ неѧ́же взѧ́тъ бы́сть са́мъ: по́томъ же мно́гимъ ꙗ҆́сти хлѣ́бъ сво́й. тѣ́мже мы̀ возлю́бимъ воздержа́нїе, да не внѣ̀ раѧ̀ возрыда́имъ, ꙗ҆́коже ѻ҆́нъ, но въ него̀ вни́демъ.

Сла́ва: Ны́нѣ вре́мѧ добродѣ́телей ꙗ҆ви́сѧ, и҆ при две́рехъ сꙋдїѧ̀, не скорби́мъ: но прїиди́те постѧ́щесѧ принесе́мъ сле́зы, ᲂу҆миле́нїе и҆ млⷭ҇тыню, зовꙋ́ще: согрѣши́хомъ па́че песка̀ морска́гѡ: но ѡ҆сла́би всѣ̑мъ всѣ́хъ свободи́телю, да воспрїи́мемъ нетлѣ́нный вѣне́цъ.

И҆ ны́нѣ: Не ᲂу҆молчи́мъ никогда̀ бцⷣе, си̑лы твоѧ̑ глаго́лати недосто́йнїи: а҆́ще бо ты̀ не бы̀ предстоѧ́ла молѧ́щи, кто́ бы на́съ и҆зба́вилъ ѿ толи́кихъ бѣ́дъ, кто́ же бы сохрани́лъ до ны́нѣ свобо́дны; не ѿстꙋ́пимъ влⷣчце, ѿ тебѐ: твоѧ̑ бо рабы̑ сп҃са́еши при́снѡ ѿ всѧ́кихъ лю́тыхъ.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста, ѡ҆ гдⷭ҇ѣ пра́зднꙋющи.

Че́сти сподо́бихсѧ а҆́зъ стра́стный, ѿ тебѐ влⷣки во є҆де́мѣ: ᲂу҆вы̀ мнѣ̀, ка́кѡ прельсти́всѧ, и҆ дїа́воломъ позави́дѣвсѧ ѿве́рженъ бы́хъ ѿ лица̀ твоегѡ̀;

Менѐ рыда́йте а҆́гг҃льстїи чи́нове, раѧ̀ добрѡ́ты, и҆ садѡ́въ та́мошнее бл҃голѣ́пїе, прельсти́вшагосѧ ѕлополꙋ́чнѡ, и҆ бг҃а ѿве́ргшагосѧ.

Лꙋ́же бл҃же́нный, са́дове бг҃осажде́ннїи, раѧ̀ красото̀, ны́нѣ ѡ҆ мнѣ̀ сле́зы пролива́йте, ѿ листѡ́въ, ꙗ҆́коже ѿ ѻ҆́чїю, ѡ҆бнаже́ннѣмъ и҆ стра́ннѣмъ сла́вы бж҃їѧ.

Сла́ва: Не ктомꙋ̀ ви́жꙋ тебѐ, ни наслажда́юсѧ пресла́дкїѧ твоеѧ̀ и҆ бж҃е́ственныѧ свѣ́тлости, всечестны́й раю̀: на́гъ бо поверго́хсѧ въ зе́млю, прогнѣ́ваѧ сотво́ршаго.

Бг҃оро́диченъ: Ст҃а́ѧ влⷣчце, ѿве́рзшаѧ раѧ̀ врата̀ всѣ̑мъ вѣ̑рнымъ, ꙗ҆̀же а҆да́мъ заключѝ престꙋпле́нїемъ и҆ногда̀, врата̀ млⷭ҇ти мнѣ̀ ѿве́рзи.

Пѣ́снь є҃.

І҆рмо́съ: Бж҃їимъ свѣ́томъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Позави́дѣвъ дре́вле мнѣ̀ вра́гъ, въ раѝ бл҃гополꙋ́чна житїѧ̀ человѣконенави́стникъ, въ видѣ́нїи ѕмі́ѧ мнѣ̀ запѧ́тъ, и҆ сла́вы присносꙋ́щныѧ стра́нна мѧ̀ показа̀.

Рыда́ю и҆ пла́чꙋ дꙋше́ю, и҆ ѻ҆чесє́мъ и҆щꙋ̀ мно́жєства сле́зъ прилага́ти, є҆гда̀ воззрю̀ и҆ позна́ю мою̀ наготꙋ̀, ю҆́же и҆мѣ́хъ ѿ престꙋпле́нїѧ.

Сла́ва: Ѿ землѝ со́зданъ бы́хъ рꙋко́ю бж҃їею, па́ки же возврати́тисѧ въ зе́млю а҆́зъ стра́стный слы́шахъ: кто̀ менѐ не воспла́четъ, ѿринове́ннагѡ ѿ бг҃а, и҆ є҆де́момъ а҆́дъ и҆змѣни́вшагѡ;

Бг҃оро́диченъ: Черто́гъ сла́вы тѧ̀ та́йный всѝ возвѣща́емъ вѣ́рнїи, бг҃ороди́тельнице всенепоро́чнаѧ. тѣ́мже молю́ тѧ чⷭ҇таѧ: и҆спа́дшаго мѧ̀ черто́га ра́йска, сво́йственна сотворѝ.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ вопїю́ ти: возведѝ ѿ тлѝ живо́тъ мо́й, многомлⷭ҇тиве.

Ѻ҆де́ждею мѧ̀ ѡ҆бле́клъ є҆сѝ бг҃отка́нною сп҃се, во є҆де́мѣ, ꙗ҆́кѡ бл҃гоꙋтро́бенъ: а҆́зъ же твою̀ престꙋпи́хъ за́повѣдь, вѣ́ровавъ льсти́вомꙋ, и҆ на́гъ ви́дѣхсѧ ѻ҆каѧ́нный.

Дꙋшѐ всестра́стнаѧ моѧ̀, ᲂу҆дали́ласѧ є҆сѝ ѿ бг҃а, невнима́нїемъ твои́мъ ра́йскагѡ лиши́ласѧ є҆сѝ наслажде́нїѧ, ѿ а҆́гг҃лъ разлꙋчи́ласѧ є҆сѝ, во тлю̀ ввела́сѧ є҆сѝ: ѽ паде́нїѧ!

Сла́ва: Поми́лꙋй, ᲂу҆ще́дри вседержи́телю бж҃е, твоє́ю рꙋкꙋ̀ творе́нїе, не пре́зри менѐ, молю́сѧ, бл҃же, ѿлꙋчи́вшаго себѐ самаго̀ ѿ ли́ка а҆́гг҃лъ твои́хъ.

Бг҃оро́диченъ: Мр҃і́е бг҃озва́ннаѧ, госпожѐ всѧ́ческихъ, ꙗ҆́кѡ ро́ждшаѧ гдⷭ҇а цр҃ѧ̀ всѣ́хъ и҆ и҆зба́вителѧ, плѣне́на мѧ̀ сꙋ́ща ѿ ра́йскїѧ сла́вы, воззовѝ.

Конда́къ, гла́съ ѕ҃:

Премꙋ́дрости наста́вниче, смы́сла пода́телю, немꙋ́дрыхъ наказа́телю, и҆ ни́щихъ защи́тителю, ᲂу҆твердѝ, вразꙋмѝ се́рдце моѐ влⷣко: ты̀ да́ждь мѝ сло́во, ѻ҆́ч҃ее сло́во, се́ бо ᲂу҆стнѣ̀ моѝ не возбраню̀, во є҆́же зва́ти тебѣ̀: млⷭ҇тиве, поми́лꙋй мѧ̀ па́дшаго.

І҆́косъ:

Сѣ́де а҆да́мъ тогда̀ и҆ пла́касѧ, прѧ́мѡ сла́дости раѧ̀, рꙋка́ма бїѧ̀ лицѐ, и҆ глаго́лаше: млⷭ҇тиве, поми́лꙋй мѧ̀ па́дшаго.

Ви́дѣвъ а҆да́мъ а҆́гг҃ла и҆зри́нꙋвша, и҆ затвори́вша бж҃е́ственнагѡ са́да две́рь, воздохнꙋ́въ вельмѝ, и҆ глаго́ла: млⷭ҇тиве, поми́лꙋй мѧ̀ па́дшаго.

Споболѝ раю̀ стѧжа́телю ѡ҆бнища́вшемꙋ, и҆ шꙋ́момъ твои́хъ ли́ствїй ᲂу҆молѝ содѣ́телѧ, да не затвори́тъ тѧ̀: млⷭ҇тиве, поми́лꙋй мѧ̀ па́дшаго.

Раю̀ вседобродѣ́тельный, всест҃ы́й, всебога́тый, а҆да́ма ра́ди насажде́нный, и҆ ра́ди є҆́ѵы заключе́нный, ᲂу҆молѝ бг҃а ѡ҆ па́дшемъ: млⷭ҇тиве, поми́лꙋй мѧ̀ па́дшаго.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халде́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ бж҃е ѻ҆тє́цъ на́шихъ.

Влⷣчествꙋѧй всѣ́ми вѣ́ки гдⷭ҇и, созда́вый мѧ̀ во́лею твое́ю, зави́дѣна мѧ̀ льсти́вымъ ѕмі́емъ и҆ногда̀, и҆ тебѐ прогнѣ́вавшаго сп҃се, не пре́зри бж҃е, но воззови́ мѧ.

Стꙋ́дными ѡ҆дѣ́ѧнъ ѻ҆де́ждами, ᲂу҆вы̀ мнѣ̀, вмѣ́стѡ ѡ҆дѣѧ́нїѧ свѣтоза́рнагѡ, пла́чꙋ моеѧ̀ поги́бели, сп҃се, и҆ вѣ́рою вопїю́ ти бл҃гі́й: не пре́зри бж҃е, но воззовѝ мѧ̀.

Сла́ва: Оу҆ѧзвѝ ѕмі́й вселꙋка́вый всю̀ мою̀ дꙋ́шꙋ лꙋка́внѡ, ра́йскїѧ же сла́дости и҆згна́на сотворѝ: но ѽ бл҃госе́рде сп҃се, не пре́зри ꙗ҆́кѡ бг҃ъ, но воззови́ мѧ.

Бг҃оро́диченъ: Моле́бное моѐ моле́нїе всенепоро́чнаѧ прїимѝ млⷭ҇тїю твое́ю, и҆ проще́нїе прегрѣше́нїй да́ждь мѝ чⷭ҇таѧ, рыда́ньми вопїю́щемꙋ прилѣ́жнѡ: не пре́зри бл҃га́ѧ, но воззови́ мѧ.

Пѣ́снь и҃.

І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ то́кмѡ є҆́же хотѣ́ти, тѧ̀ превозно́симъ во всѧ̑ вѣ́ки.

Дармѝ многоѡбра́зными дре́вле, поче́лъ є҆сѝ рꙋкꙋ̀ твоє́ю дѣ́ло, є҆ди́не чл҃вѣколю́бче: ѕмі́й же лю́тый свиста́нїемъ прельстѝ, ᲂу҆вы̀ мнѣ̀, настоѧ́щихъ бла̑гъ ѡ҆бнажи́въ.

Вскꙋ́ю совѣ́та го́рькагѡ послꙋ́шала є҆сѝ, и҆ бж҃е́ственнагѡ повелѣ́нїѧ была̀ є҆сѝ преслꙋ́шна; ᲂу҆вы̀ мнѣ̀ смире́ннаѧ дꙋшѐ, бг҃а ѡ҆скорби́вшаѧ: є҆го́же при́снѡ сла́вити ᲂу҆чине́на є҆сѝ со а҆́гг҃лы!

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а: Гадѡ́мъ и҆ ѕвѣрє́мъ влⷣчица бы́вши, га́дꙋ дꙋшетлѣ́нномꙋ ка́кѡ собесѣ́довала є҆сѝ, совѣ́тника прїи́мши ꙗ҆́кѡ пра́ваго, льсти́ваго; ѽ твоегѡ̀ прельще́нїѧ, дꙋшѐ моѧ̀ всестра́стнаѧ!

Бг҃оро́диченъ: Свѣтоно́сное селе́нїе тѧ̀ бж҃їѧ воплоще́нїѧ, воспѣва́емъ мр҃і́е бг҃обл҃года́тнаѧ: тѣ́мже мѧ̀ лю́тѣ ѡ҆мраче́нна страстьмѝ, просвѣтѝ свѣ́томъ млⷭ҇ти, наде́жде ненаде́жныхъ.

Хва́лимъ, бл҃гослови́мъ, покланѧ́емсѧ гдⷭ҇ви, пою́ще и҆ превозносѧ́ще во всѧ̑ вѣ́ки.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти на него́же не смѣ́ютъ чи́ни а҆́гг҃льстїи взира́ти: тобо́ю же всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.

Сла́докъ вкꙋ́съ пло́дъ ра́зꙋма во є҆де́мѣ ꙗ҆ви́ ми сѧ насы́щшемꙋсѧ снѣ́ди, въ же́лчь же бы́сть коне́цъ є҆гѡ̀. ᲂу҆вы̀ мнѣ̀ дꙋшѐ стра́стнаѧ, ка́кѡ невоздержа́нїе тѧ̀ ра́йскагѡ ꙗ҆де́нїѧ стра́нна сотворѝ;

Бж҃е всѣ́хъ, млⷭ҇ти гдⷭ҇и, на моѐ смире́нїе бл҃гоꙋтро́бнѣ при́зри, и҆ не дале́че посли́ мѧ бж҃е́ственнагѡ є҆де́ма, ꙗ҆́кѡ да зрѧ̀ добрѡ́ты, ѿѻнꙋ́дꙋже и҆спадо́хъ, потщꙋ́сѧ па́ки рыда́ньми воспрїѧ́ти ꙗ҆̀же погꙋби́хъ.

Рыда́ю, стеню̀ и҆ пла́чꙋ, херꙋві́мы съ пла́меннымъ ѻ҆рꙋ́жїемъ зрѧ̀, є҆де́ма вхо́дъ стрещѝ повелѣ̑нныѧ, всѣ̑мъ престꙋ́пникѡмъ, ᲂу҆вы̀! непристꙋ́пный, а҆́ще не ты̀ невозбра́ненъ сп҃се то́й сотвори́ши мѝ.

Сла́ва: Дерза́ю мно́жествꙋ млⷭ҇ти твоеѧ̀ хрⷭ҇тѐ сп҃се, и҆ бж҃е́ственныхъ ре́бръ твои́хъ кро́ви, є҆́юже ѡ҆свѧти́лъ є҆сѝ є҆стество̀ человѣ́ческое, ѿве́рзлъ же є҆сѝ врата̀ тебѣ̀ слꙋжа́щымъ ра̑йскаѧ бл҃же, пре́жде заключє́наѧ а҆да́мꙋ.

Бг҃оро́диченъ: Жи́зни две́ре непроходи́маѧ, ᲂу҆́мнаѧ, дв҃о бцⷣе безневѣ́стнаѧ, ра̑йскаѧ врата̀ заключє́наѧ мѝ пре́жде ѿве́рзи твои́ми мл҃твами, ꙗ҆́кѡ да сла́влю тѧ̀ по бз҃ѣ мою̀ помо́щницꙋ, и҆ держа́вное прибѣ́жище.

Є҆ѯапостїла́рїй.

Сла́ва: За́повѣдь твою̀, гдⷭ҇и, преслꙋ́шавъ ѻ҆каѧ́нный, и҆ ѡ҆бнаже́нъ твоеѧ̀ сла́вы, стꙋда̀ и҆спо́лнихсѧ, ᲂу҆вы̀ мнѣ̀! и҆ сла́дости и҆зринове́нъ є҆́смь ра́йскїѧ бл҃гоꙋтро́бне. млⷭ҇тиве, поми́лꙋй лиши́вшасѧ првⷣнѡ бл҃гости твоеѧ̀.

И҆ ны́нѣ: И҆згна́на бы́вша гдⷭ҇и раѧ̀ пе́рвѣе снѣ́дїю дре́ва, вве́лъ є҆сѝ па́ки крⷭ҇то́мъ и҆ стрⷭ҇тїю твое́ю сп҃се и҆ бж҃е мо́й, и҆́мже на́съ ᲂу҆твердѝ по́стъ соверши́ти чистолѣ́пнѡ, и҆ бж҃е́ственномꙋ воста́нїю поклони́тисѧ, па́сцѣ сп҃си́тельнѣй, тѧ̀ ро́ждшїѧ мл҃твами.