Канон в неделю о блудном сыне

Пѣ́снь а҃.

І҆рмо́съ: Мѡѷсе́йскꙋю пѣ́снь воспрїи́мши, возопі́й, дꙋшѐ: помо́щникъ и҆ покрови́тель бы́сть мнѣ̀ во сп҃се́нїе, се́й мо́й бг҃ъ, и҆ просла́влю є҆го̀.

І҆и҃се бж҃е, ка́ющасѧ прїимѝ ны́нѣ и҆ менѐ, ꙗ҆́кѡ блꙋ́днаго сы́на, всѐ житїѐ въ лѣ́ности жи́вша, и҆ тебѐ прогнѣ́вавша.

Є҆́же мѝ да́лъ є҆сѝ пре́жде, ѕлѣ̀ расточи́хъ бж҃е́ственное бога́тство, ᲂу҆дали́хсѧ ѿ тебѐ, блꙋ́днѡ жи́въ: бл҃гоꙋтро́бне ѻ҆́ч҃е, прїимѝ ᲂу҆́бѡ и҆ менѐ ѡ҆браща́ющасѧ.

Сла́ва: Ѡ҆б̾ѧ̑тїѧ ны́нѣ ѻ҆те́чєскаѧ просте́ръ, прїимѝ гдⷭ҇и и҆ менѐ, ꙗ҆́коже блꙋ́днаго, всеще́дре, ꙗ҆́кѡ да бл҃года́рнѡ просла́влю тѧ̀.

Бг҃оро́диченъ: На мнѣ̀ бж҃е, всю̀ показа́въ бл҃госты́ню, пре́зри мои́хъ мно́жество согрѣше́нїй, ꙗ҆́кѡ бл҃годѣ́тель, бж҃е́ственными мт҃ре твоеѧ̀ мольба́ми.

Пѣ́снь г҃:

І҆рмо́съ: Непло́дствовашїй мо́й ᲂу҆́мъ, плодоно́сенъ бж҃е покажи́ ми, дѣ́лателю до́брыхъ, насади́телю бл҃ги́хъ, бл҃гоꙋтро́бїемъ твои́мъ.

Ве́сь внѣ̀ бы́въ себѐ, ᲂу҆мовре́днѡ прилѣпи́хсѧ страсте́й ѡ҆брѣта́телємъ: но прїими́ мѧ хрⷭ҇тѐ, ꙗ҆́коже блꙋ́днаго.

Блꙋ́днагѡ гла́сꙋ поревнова́въ, вопїю̀: согрѣши́хъ, ѻ҆́ч҃е, ꙗ҆́коже ѻ҆́наго ᲂу҆́бѡ, и҆ менѐ ѡ҆б̾имѝ ны́нѣ, и҆ не ѿри́ни менѐ.

Сла́ва: Ѡ҆б̾ѧ̑тїѧ твоѧ̑ просте́ръ хрⷭ҇тѐ, млⷭ҇тивнѡ прїими́ мѧ, ѿ страны̀ да́льныѧ грѣха̀ и҆ страсте́й ѡ҆браща́ющасѧ.

Бг҃оро́диченъ: До́браѧ въ жена́хъ, ѡ҆богатѝ и҆ менѐ до́брыхъ ви́ды, грѣхѝ мно́гими ѡ҆бнища́вшаго чⷭ҇таѧ, ꙗ҆́кѡ да сла́влю тѧ̀.

Сѣда́ленъ.

Ѡ҆б̾ѧ̑тїѧ ѻ҆́ч҃а ѿве́рсти мѝ потщи́сѧ, блꙋ́днѡ и҆жди́хъ моѐ житїѐ, на бога́тство неиждива́емое взира́ѧй щедро́тъ твои́хъ сп҃се, ны́нѣ ѡ҆бнища́вшее моѐ се́рдце не пре́зри. тебѣ́ бо гдⷭ҇и, во ᲂу҆миле́нїи зовꙋ̀: согрѣши́хъ, ѻ҆́ч҃е, на нб҃о и҆ пред̾ тобо́ю.

Сла́ва, и҆ ны́нѣ: Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй, всѣ́хъ свободѝ, на тѧ̀ надє́жды ѻ҆трокови́це и҆мꙋ́щихъ, и҆ дꙋ́шы на́шѧ сп҃сѝ бж҃е́ственными мл҃твами твои́ми.

Пѣ́снь д҃.

І҆рмо́съ: Є҆́же ѿ дв҃ы твоѐ ржⷭ҇тво̀ прⷪ҇ро́къ предзрѧ̀, возпроповѣ́даше вопїѧ̀: слꙋ́хъ тво́й ᲂу҆слы́шахъ и҆ ᲂу҆боѧ́хсѧ: ꙗ҆́кѡ ѿ ю҆́га, и҆ и҆з̾ горы̀ ст҃ы́ѧ, прїѡсѣне́нныѧ прише́лъ є҆сѝ хрⷭ҇тѐ.

Бога́тство благи́хъ, є҆́же да́лъ мѝ є҆сѝ нбⷭ҇ный ѻ҆́ч҃е, расточи́хъ ѕлѣ̀, стра̑ннымъ гра́жданѡмъ порабоще́нъ. тѣ́мже вопїю́ ти: согрѣши́хъ тѝ, прїими́ мѧ ꙗ҆́кѡ блꙋ́днаго дре́вле, просте́ръ ѡ҆б̾ѧ̑тїѧ мнѣ̀ твоѧ̑.

Всѧ́кой ѕло́бѣ порабо́тихсѧ, прини́кнꙋвъ ѻ҆каѧ́ннѡ страсте́й дѣ́лателємъ, и҆ себѐ внѣ̀ бы́хъ несмотре́нїемъ, ᲂу҆ще́дри мѧ̀ сп҃се, пренбⷭ҇ный ѻ҆́ч҃е, прибѣга́юща ко мнѡ́гимъ твои̑мъ щедро́тамъ.

Сла́ва: Всѧ́кагѡ стꙋда̀ и҆спо́лнихсѧ, не смѣ́ѧ воззрѣ́ти на высотꙋ̀ нбⷭ҇нꙋю: и҆́бо безслове́снѡ прини́кнꙋвъ грѣхꙋ̀, ны́нѣ же ѡ҆бра́щьсѧ вопїю̀ ᲂу҆миле́нїемъ: согрѣши́хъ тѝ, прїими́ мѧ всецр҃ю̀.

Бг҃оро́диченъ: Человѣ́кѡмъ по́моще, ᲂу҆пова́нїе тве́рдое всѣ́мъ хрⷭ҇тїа́нѡмъ, прибѣ́жище чⷭ҇таѧ сп҃са́ємымъ: сп҃си́ мѧ дв҃о, мт҃рними твои́ми мольба́ми, и҆ бꙋ́дꙋщїѧ жи́зни сподо́би.

Пѣ́снь є҃.

І҆рмо́съ: Но́щи преше́дшей, прибли́жисѧ де́нь и҆ свѣ́тъ мі́рꙋ возсїѧ̀: сегѡ̀ ра́ди хва́лѧтъ тѧ̀ а҆́гг҃льстїи чи́ни, и҆ славосло́вѧтъ тѧ̀ всѧ̑ всѧ́чєскаѧ.

Порабо́тихсѧ гра́жданѡмъ стра̑ннымъ, и҆ въ странꙋ̀ тлетво́рнꙋю ѿидо́хъ, и҆ и҆спо́лнихсѧ стꙋда̀: ны́нѣ же ѡ҆браща́ѧсѧ зовꙋ́ ти ще́дре, согрѣши́хъ.

Ѻ҆ч҃єскаѧ твоѧ̑ бл҃гоꙋтрѡ́бїѧ ны́нѣ ѿве́рзи мѝ, ѿ ѕлы́хъ ѡ҆брати́вшꙋсѧ, нбⷭ҇ный ѻ҆́ч҃е, и҆ не ѿри́ни менѐ, и҆мѣ́ѧй премно́гꙋю млⷭ҇ть.

Сла́ва: Не смѣ́ю воззрѣ́ти горѣ̀ на высотꙋ̀, без̾ числа̀ хрⷭ҇тѐ прогнѣ́вавъ тѧ̀: но вѣ́дый твоѧ̑ щедрѡ́ты ми́лѡстивныѧ, взыва́ю: согрѣши́хъ тѝ, ѡ҆чи́сти, и҆ сп҃си́ мѧ.

Бг҃оро́диченъ: Всест҃а́ѧ дв҃о бл҃года́тнаѧ, ѡ҆чище́нїе всѣ̑мъ ро́ждшаѧ, мои́хъ согрѣше́нїй тѧ́жкое бре́мѧ твои́ми мл҃твами ѡ҆блегчѝ.

Пѣ́снь ѕ҃.

І҆рмо́съ: Во глꙋбинѣ̀ грѣхо́внѣй содержи́мь є҆́смь сп҃се, и҆ въ пꙋчи́нѣ жите́йстѣй ѡ҆бꙋрева́емь: но ꙗ҆́коже і҆ѡ́нꙋ ѿ ѕвѣ́рѧ, и҆ менѐ ѿ страсте́й возведѝ, и҆ сп҃си́ мѧ.

Глꙋбина̀ согрѣше́нїй содержи́тъ мѧ̀ при́снѡ, и҆ треволне́нїе грѣхѡ́въ погрꙋжа́етъ мѧ̀: ѡ҆корми́ мѧ ко приста́нищꙋ жи́зни, хрⷭ҇тѐ бж҃е, и҆ сп҃си́ мѧ цр҃ю̀ сла́вы.

Бога́тство ѻ҆ч҃еское расточи́хъ лю́тѣ, и҆ ѡ҆бнища́въ стꙋда̀ и҆спо́лнихсѧ, порабоще́нъ непло́дными помышле́ньми. тѣ́мже тѝ вопїю̀: чл҃вѣколю́бче ᲂу҆ще́дри, и҆ сп҃си́ мѧ.

Сла́ва: Гла́домъ и҆ста́ѧвша всѧ́кихъ бла̑гъ, и҆ ᲂу҆страни́вшасѧ ѿ тебѐ всебл҃гі́й, ᲂу҆ще́дри ѡ҆браща́ющасѧ мѧ̀ ны́нѣ: и҆ сп҃сѝ хрⷭ҇тѐ, пою́ща твоѐ чл҃вѣколю́бїе.

Бг҃оро́диченъ: Сп҃са и҆ влⷣкꙋ ро́ждшаѧ хрⷭ҇та̀, сп҃се́нїѧ мѧ̀ ѻ҆трокови́це сподо́би, ѡ҆бнища́вша ѿ всѧ́кихъ бла̑гъ, дв҃о чⷭ҇таѧ, да пою̀ твоѧ̑ вели̑чїѧ.

Конда́къ.

Ѻ҆ч҃ескїѧ сла́вы твоеѧ̀ ᲂу҆дали́хсѧ безꙋ́мнѡ, въ ѕлы́хъ расточи́въ є҆́же мѝ пре́далъ є҆сѝ бога́тство. тѣ́мже тѝ блꙋ́днагѡ гла́съ приношꙋ̀: согрѣши́хъ пред̾ тобо́ю ѻ҆́ч҃е ще́дрый, прїими́ мѧ ка́ющасѧ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.

І҆́косъ:

Сп҃сꙋ на́шемꙋ на всѧ́къ де́нь ᲂу҆ча́щꙋ свои́мъ гла́сомъ, писа́нїѧ ᲂу҆слы́шимъ ѡ҆ блꙋ́дномъ, и҆ цѣломꙋ́дренномъ па́ки. и҆ сегѡ̀ вѣ́рою подража́емъ до́брое покаѧ́нїе, вѣ́дꙋщемꙋ та̑йнаѧ всѣ́хъ, смире́нїемъ се́рдца воззове́мъ согрѣши́хомъ тѝ ѻ҆́ч҃е ще́дрый, и҆ никогда́же досто́йни є҆смы̀ нарещи́сѧ ча̑да, ꙗ҆́коже пре́жде. но ꙗ҆́кѡ є҆стество́мъ сы́й чл҃вѣколюби́въ, ты̀ прїимѝ, и҆ сотвори́ мѧ ꙗ҆́кѡ є҆ди́наго ѿ нає́мникъ твои́хъ.

Пѣ́снь з҃.

І҆рмо́съ: Херꙋві́мы подража́юще ѻ҆́троцы въ пещѝ ликовствова́хꙋ вопїю́ще: бл҃гослове́нъ є҆сѝ бж҃е, ꙗ҆́кѡ и҆́стиною и҆ сꙋдо́мъ наве́лъ є҆сѝ сїѧ̑ всѧ̑ грѣ̑хъ ра́ди на́шихъ, препѣ́тый, и҆ препросла́вленный во всѧ̑ вѣ́ки.

Сла́достемъ тѣлє́снымъ приклони́хсѧ всеѻкаѧ́ннѡ, и҆ порабо́тихсѧ весьма̀ стра̑стнымъ и҆з̾ѡбрѣ́тенїємъ, и҆ стра́ненъ бы́хъ ѿ тебѐ чл҃вѣколю́бче. ны́нѣ же зовꙋ̀ блꙋ́днагѡ гла́сомъ: согрѣши́хъ хрⷭ҇тѐ, не пре́зри менѐ, ꙗ҆́кѡ є҆ди́нъ млⷭ҇тивъ.

Взыва́ю, согрѣши́хъ, ника́коже воззрѣ́ти дерза́ѧ на высотꙋ̀ нбⷭ҇нꙋю всецр҃ю̀, ꙗ҆́кѡ въ безꙋ́мїи є҆ди́нъ тѧ̀ прогнѣ́вахъ, ѿве́ргсѧ твои́хъ повелѣ́нїй: тѣ́мже ꙗ҆́кѡ є҆ди́нъ бл҃гі́й, не ѿве́ржи менѐ ѿ твоегѡ̀ лица̀.

Сла́ва: А҆пⷭ҇лъ, гдⷭ҇и, и҆ прⷪ҇рѡ́къ, и҆ прпⷣбныхъ, и҆ чⷭ҇тны́хъ мꙋ́чєникъ, и҆ првⷣныхъ мольба́ми прости́ ми всѧ̑, ꙗ҆̀же согрѣши́хъ, прогнѣ́вавъ хрⷭ҇тѐ бла́гость твою̀: ꙗ҆́кѡ да пѣсносло́влю тѧ̀ во всѧ̑ вѣ́ки.

Бг҃оро́диченъ: Херꙋві̑мъ ꙗ҆́вльшисѧ, и҆ серафі̑мъ бцⷣе, и҆ всѣ́хъ свѣтлѣ́йшаѧ нбⷭ҇ныхъ во́инствъ, съ си́ми ᲂу҆молѝ, є҆го́же воплоти́ла є҆сѝ бж҃е́ственное сло́во всенепоро́чнаѧ, безнача́льнагѡ ѻ҆ц҃а̀, ꙗ҆́кѡ да бла̑гъ вѣ́чнꙋющихъ всѝ сподо́бимсѧ.

Пѣ́снь и҃.

І҆рмо́съ: Въ кꙋпинѣ̀ мѡѷсе́ю дв҃ы чꙋ́до, на сїна́йстѣй горѣ̀, проѡбрази́вшаго и҆ногда̀, по́йте, бл҃гослови́те и҆ превозноси́те во всѧ̑ вѣ́ки.

Сше́дый на зе́млю сп҃стѝ мі́ръ, во́льною нището́ю за млⷭ҇рдїе мно́гое, ѡ҆бнища́вшаго мѧ̀ ны́нѣ ѿ всѧ́кагѡ бл҃годѣѧ́нїѧ, ꙗ҆́кѡ млⷭ҇тивый, сп҃сѝ.

Ѿ твои́хъ за́повѣдей ᲂу҆дали́всѧ, порабо́тихсѧ всеѻкаѧ́ннѡ лестцꙋ̀: ѡ҆браща́ющагосѧ же ны́нѣ, ꙗ҆́кѡ блꙋ́днаго дре́вле припа́дающа тебѣ̀, прїимѝ пренбⷭ҇ный ѻ҆́ч҃е.

Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а: Тлетво́рными помышле́ньми ѡ҆б̾е́мсѧ ѡ҆мрачи́хсѧ, и҆ ѿ тебѐ ᲂу҆дали́хсѧ, ве́сь внѣ̀ себѐ бы́въ ще́дре. тѣ́мже въ покаѧ́нїи припа́дающа тебѣ̀ сп҃сѝ.

Бг҃оро́диченъ: Бг҃ороди́тельнице чⷭ҇таѧ, низве́рженныхъ и҆справле́нїе є҆ди́на, и҆спра́ви и҆ менѐ всѧ́кими грѣха́ми сокрꙋше́ннаго всего̀ и҆ смире́ннаго.

Пѣ́снь ѳ҃.

І҆рмо́съ: Ѿ земноро́дныхъ кто̀ слы́ша таково́е; и҆лѝ кто̀ ви́дѣ когда̀, ꙗ҆́кѡ дв҃а ѡ҆брѣ́тесѧ во чре́вѣ и҆мꙋ́щаѧ, и҆ безболѣ́зненнѡ младе́нца поро́ждшаѧ; таково́е твоѐ чꙋ́до, и҆ тѧ̀ чⷭ҇таѧ бцⷣе велича́емъ.

Ви́ждь хрⷭ҇тѐ печа́ль се́рдца, ви́ждь моѐ ѡ҆браще́нїе, ви́ждь сле́зы сп҃се, и҆ не пре́зри менѐ: но ѡ҆б̾имѝ па́ки бл҃гоꙋтро́бїѧ ра́ди, мно́жествꙋ сп҃са́емыхъ пречⷭ҇таѧ, ꙗ҆́кѡ да пою̀ бл҃года́рнѡ млⷭ҇ти твоѧ̑.

Ꙗ҆́кѡ разбо́йникъ вопїю̀: помѧни́ мѧ, ꙗ҆́кѡ мыта́рь ᲂу҆мили́всѧ, бїю̀ въ пє́рси, и҆ зовꙋ̀ ны́нѣ: ѡ҆чи́сти, ꙗ҆́коже блꙋ́днаго прїими́ мѧ всеще́дрый, ѿ всѣ́хъ ѕѡ́лъ мои́хъ всецр҃ю̀: ꙗ҆́кѡ да пою̀ твоѐ кра́йнее снизхожде́нїе.

Воздохнѝ ны́нѣ дꙋшѐ моѧ̀ всеѻкаѧ́ннаѧ, и҆ возопі́й хрⷭ҇тꙋ̀: менѐ ра́ди во́лею ѡ҆бнища́вый гдⷭ҇и, ѡ҆бнища́вшаго мѧ̀ ѿ всѧ́кагѡ бл҃годѣѧ́нїѧ, до́брыхъ бога́тствомъ ꙗ҆́кѡ бл҃гі́й и҆ многомлⷭ҇тивый є҆ди́нъ ѡ҆богати́ мѧ.

Сла́ва: Є҆́же и҆ногда̀ содѣ́лалъ є҆сѝ весе́лїе блꙋ́днагѡ, бл҃же, ѡ҆браще́нїемъ во́льнымъ: сїѐ ны́нѣ сотворѝ и҆ на мнѣ̀ ѻ҆каѧ́нномъ, простира́ѧ мѝ честна̑ѧ твоѧ̑ ѡ҆б̾ѧ̑тїѧ: да спа́ссѧ пѣсносло́влю кра́йнее твоѐ снизхожде́нїе.

Бг҃оро́диченъ: Свѣ́тлыми мл҃твами твои́ми дв҃о, мы́слєннаѧ моѧ̑ ѻ҆чеса̀ ѡ҆мрачє́ннаѧ ѕло́бою, просвѣтѝ, молю́сѧ, и҆ къ пꙋтє́мъ покаѧ́нїѧ введи́ мѧ: ꙗ҆́кѡ да до́лжнѡ тѧ̀ пѣсносло́влю, па́че сло́ва сло́во воплоти́вшꙋю.

Є҆ѯапостїла́рїй.

Бога́тство, є҆́же мѝ да́лъ є҆сѝ, бл҃года́ти, ѻ҆каѧ́нный ѿше́дъ, непотре́бнѡ ѕлѣ̀ и҆жди́хъ, сп҃се, блꙋ́днѡ пожи́въ, де́монѡмъ льсти́внѡ расточи́хъ. тѣ́мже мѧ̀ ѡ҆браща́ющасѧ, ꙗ҆́коже блꙋ́днаго прїимѝ, ѻ҆́ч҃е ще́дрый, и҆ сп҃сѝ.

Расточи́хъ бога́тство твоѐ и҆жди́въ, гдⷭ҇и, и҆ лꙋка́вымъ де́монѡмъ повинꙋ́хсѧ ѻ҆каѧ́нный: но сп҃се всебл҃гоꙋтро́бне, блꙋ́днаго ᲂу҆ще́дри, и҆ ѡ҆скве́рншасѧ ѡ҆чи́сти, пе́рвꙋю ѿдаѧ́й мнѣ̀ ѻ҆де́ждꙋ твоегѡ̀ црⷭ҇твїѧ.

Бг҃оро́диченъ: Ст҃а́ѧ мт҃и дв҃о, ве́лїе проповѣ́данїе а҆пⷭ҇лѡвъ, мч҃нкѡвъ, и҆ прⷪ҇ро́кѡвъ, и҆ преподо́бныхъ, твоего̀ сн҃а и҆ гдⷭ҇а ᲂу҆ми́лостиви на́мъ рабѡ́мъ твои̑мъ бг҃ороди́тельнице, є҆гда̀ сѧ́детъ сꙋди́ти по достоѧ́нїю коего́ждо.