Разꙋ́мно да бꙋ́детъ, ка́кѡ подоба́етъ ѻ҆со́бь пѣ́ти ѱалти́рь.
А҆́ще і҆ере́й, глаго́летъ: Бл҃гослове́нъ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
А҆́ще ли нѝ, глаго́ли ᲂу҆миле́ннѡ: Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ, а҆ми́нь.
Сла́ва тебѣ̀, бж҃е на́шъ, сла́ва тебѣ̀.
Цр҃ю̀ нбⷭ҇ный, ᲂу҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ, и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны и҆ сп҃сѝ, бл҃же, дꙋ́шы на́шѧ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ, три́жды.
Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоего̀ ра́ди.
Гдⷭ҇и поми́лꙋй, три́жды. Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ, да прїи́детъ црⷭ҇твїе твоѐ, да бꙋ́детъ во́лѧ твоѧ̀, ꙗ҆́кѡ на нб҃сѝ, и҆ на землѝ. Хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Тропарѝ сїѧ̑, гла́съ ѕ҃.
Поми́лꙋй на́съ гдⷭ҇и, поми́лꙋй на́съ: всѧ́кагѡ бо ѿвѣ́та недоꙋмѣ́юще, сїю́ ти мл҃твꙋ ꙗ҆́кѡ влⷣцѣ грѣ́шнїи прино́симъ: поми́лꙋй на́съ.
Сла́ва:
Чⷭ҇тно́е прⷪ҇ро́ка твоегѡ̀ гдⷭ҇и, торжество̀, не́бо цр҃ковь показа̀, съ человѣ́ки ликꙋ́ютъ а҆́гг҃ли. Тогѡ̀ мл҃твами хрⷭ҇тѐ бж҃е, въ ми́рѣ ᲂу҆пра́ви живо́тъ на́шъ, да пое́мъ тѝ: а҆ллилꙋ́їа.
И҆ ны́нѣ:
Мнѡ́гаѧ мно́жєства мои́хъ бцⷣе, прегрѣше́нїй, къ тебѣ̀ прибѣго́хъ чⷭ҇таѧ, сп҃се́нїѧ тре́бꙋѧ: посѣтѝ немощствꙋ́ющꙋю мою̀ дꙋ́шꙋ, и҆ молѝ сн҃а твоего̀ и҆ бг҃а на́шего, да́ти мѝ ѡ҆ставле́нїе, ꙗ҆̀же содѣ́ѧхъ лю́тыхъ, є҆ди́на бл҃гослове́ннаѧ.
Гдⷭ҇и поми́лꙋй, м҃.
И҆ поклони́сѧ є҆ли́кѡ тѝ мо́щно.
Мл҃тва ст҃ѣ́й живонача́льнѣй трⷪ҇цѣ.
Всест҃а́ѧ трⷪ҇це, бж҃е и҆ содѣ́телю всегѡ̀ мі́ра, поспѣшѝ и҆ напра́ви се́рдце моѐ, нача́ти съ ра́зꙋмомъ, и҆ конча́ти дѣ́лы бл҃ги́ми бг҃одꙋхновє́нныѧ сїѧ̑ кни̑ги, ꙗ҆̀же ст҃ы́й дх҃ъ ᲂу҆сты̀ дв҃дѡвы ѿры́гнꙋ, и҆̀хже ны́нѣ хощꙋ̀ глаго́лати а҆́зъ недосто́йный: разꙋмѣ́ѧ же своѐ невѣ́жество, припа́даѧ молю́сѧ тѝ, и҆ є҆́же ѿ тебѐ по́мощи просѧ̀: гдⷭ҇и, ᲂу҆пра́ви ᲂу҆́мъ мо́й, и҆ ᲂу҆твердѝ се́рдце моѐ, не ѡ҆ глаго́ланїи ᲂу҆сте́нъ стꙋжа́ти сѝ, но ѡ҆ ра́зꙋмѣ глаго́лемыхъ весели́тисѧ, и҆ пригото́витисѧ на творе́нїе до́брыхъ дѣ́лъ, ꙗ҆̀же ᲂу҆чꙋ́сѧ, и҆ глаго́лю: да до́брыми дѣ́лы просвѣще́нъ, на сꙋди́щи десны́ѧ тѝ страны̀ прича́стникъ бꙋ́дꙋ, со всѣ́ми и҆збра́нными твои́ми. И҆ ны́нѣ влⷣко, бл҃гословѝ, да воздохнꙋ́въ ѿ се́рдца, и҆ ѧ҆зы́комъ воспою̀, глаго́лѧ си́це:
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀ цр҃е́ви и҆ бг҃ꙋ на́шемꙋ.
Та́же посто́й ма́лѡ, до́ндеже ᲂу҆тиша́тсѧ всѧ̑ чꙋ́вства: тогда̀ сотворѝ нача́ло не вско́рѣ, без̾ лѣ́ности, со ᲂу҆миле́нїемъ и҆ сокрꙋше́ннымъ се́рдцемъ. Рцы̀ сїѐ: Бл҃же́нъ мꙋ́жъ: ти́хѡ и҆ разꙋ́мнѡ, со внима́нїемъ, а҆ не борзѧ́сѧ, ꙗ҆́коже и҆ ᲂу҆мо́мъ разꙋмѣва́ти глаго́лємаѧ.