Канон святым мученикам Флору и Лавру Иллирийским

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Свѣтоза́рными блиста̑нїи дх҃а просвѣща́еми, мра̑чныѧ ѻ҆́блаки дꙋшѝ моеѧ̀ разори́те: ꙗ҆́кѡ да воспою̀ ра́дꙋѧсѧ свѣтоно́снꙋю ст҃і́и, и҆ честнꙋ́ю ва́шꙋ па́мѧть, мꙋ́чєницы хрⷭ҇то́вы предо́блїи.

На ка́мени непоро́чныѧ вѣ́ры созда́вше, добродѣ́тельми бжⷭ҇твенными са́ми себѐ, блаже́ннїи, предо́бръ показа́стесѧ и҆ красе́нъ хра́мъ, въ него́же ѻ҆ц҃ъ всели́сѧ и҆ сн҃ъ и҆ дх҃ъ ст҃ы́й.

И҆зъ ко́рене посѣка́юще пре́лести те́рнїе, великоимени́тїи, посѣка́тельнымъ сло́вомъ бжⷭ҇твенныѧ вѣ́ры сердца̀ ѡ҆бнови́ша ѡ҆лѧденѣ̑вшаѧ ле́стїю, и҆ плодонѡ́сна показа́ша, вѣ́рꙋ процвѣта́юща непоро́чнꙋю.

Бг҃оро́диченъ: Ѿ дв҃и́ческїѧ ᲂу҆тро́бы прозѧбла̀ є҆сѝ ко́ренѧ ненапое́ннаго, сади́телѧ всѣ̑мъ, чл҃вѣ́ка бы́вша и҆ стрⷭ҇ти претерпѣ́вша. є҆гѡ́же жела́юще бжⷭ҇твеннїи, вѣ́рнѡ пострада́ша мꙋ́чєницы, пречⷭ҇таѧ дв҃о всепѣ́таѧ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Зако́нъ бжⷭ҇твенный и҆сполнѧ́юще, прехва́льнїи мꙋ́чєницы, ни́щымъ бога́тнѡ хлѣ́бъ пода́сте, и҆ ко благоче́стїю наста́висте бжⷭ҇твенномꙋ, спасе́нїѧ хода́таи си̑мъ бы́вше.

Дво́ица свѣтоно́сныхъ страда́лєцъ, возсїѧ́вши чꙋде́сными зарѧ́ми, тмꙋ̀ ѿгна̀ пре́лести многобо́жныѧ, и҆ прельщє́нныѧ къ сїѧ́нїю бжⷭ҇твенныѧ вѣ́ры всѧ̑ наста́висте.

Младе́нствꙋющїй наро́дъ, благочести́вїи мꙋ́чєницы, бж҃е́ственными ᲂу҆чє́нїи къ стезѝ бжⷭ҇твеннагѡ ра́зꙋма наста́висте, и҆ трє́бища дє́мѡнскаѧ моли́твою, блаже́ннїи, низложи́сте.

Бг҃оро́диченъ: Неискꙋсобра́чнаѧ дв҃о, є҆ѧ́же ра́ди на́мъ возсїѧ̀ сло́во, є҆́же вы́ше всѧ́кагѡ нача́ла разꙋмѣва́емо, спаса́й ста́до твоѐ, и҆ всѧ́къ гра́дъ и҆ странꙋ̀, ѿ всѧ́кагѡ ѡ҆бстоѧ́нїѧ, бг҃ора́дованнаѧ.

Сѣда́ленъ, гла́съ и҃.

Зо́дчїи показа́стесѧ дꙋхо́внїи, назда́сте вѣ́рою благочести́выхъ дꙋ́шы, бжⷭ҇твенною благода́тїю на ка́мени вѣ́ры, и҆ себѐ са́ми соверши́вше хра́мъ свѧще́нъ честны́ѧ трⷪ҇цы, тве́рдѡ пострада́сте. тѣ́мъ и҆ и҆сцѣлє́нїѧ и҆сточа́ете вѣ́рою къ ва́мъ притека́ющымъ, и҆ стра̑сти ѿгонѧ́ете, страстоно́сцы самобра́тнїи. моли́те хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть ва́шꙋ.

Сла́ва, и҆ ны́нѣ: Ꙗ҆́же бг҃а заче́нши безъ сѣ́мене, и҆ воплоще́нна ро́ждши безъ тлѝ, но́вымъ ѡ҆дѣѧ́нїемъ ѡ҆блекла́сѧ є҆сѝ нетлѣ́нїѧ дꙋ́ха: ꙗ҆́кѡ жи́зни бо мт҃и и҆ всѣ́хъ цр҃и́ца къ жи́зни преста́виласѧ є҆сѝ, дв҃о, невеще́ственнѣй. тѣ́мже по достоѧ́нїю вои́стиннꙋ показа́ласѧ є҆сѝ ѻ҆́блакъ, и҆сточа́ющь жи́зни на́шеѧ во́ды бг҃ома́ти всенепоро́чнаѧ. молѝ сн҃а твоего̀ и҆ бг҃а, согрѣше́нїй ѡ҆ставле́нїе пода́ти пра́зднꙋющымъ любо́вїю ст҃о́е твоѐ ᲂу҆спе́нїе.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Ю҆́ношски со враго́мъ спле́тшесѧ, до́блїи, сего̀ низложи́сте крⷭ҇тнымъ ѻ҆рꙋ́жїемъ тве́рдѡ, и҆ сокрꙋшє́нныѧ грѣхо́мъ сотвори́ша хра́мы гдⷭ҇еви жи́вы, благоче́стнѡ пою́щыѧ: си́лѣ твое́й сла́ва, чл҃вѣколю́бче.

Ѿ хрⷭ҇та̀ ка́мене ᲂу҆сѣ́ченагѡ, ꙗ҆́коже пи́шетъ, ѿ горы̀ дв҃ы бг҃оѻтрокови́цы, ᲂу҆крѣ́пльшесѧ всесла́внїи ст҃і́и, і҆́дѡлѡмъ сокрꙋше́нїе содѣ́ласте, и҆ взѧ́ти бы́сте къ горѣ̀ ꙗ҆вле́ннѣй мꙋче́нїѧ, и҆ а҆́гг҃лѡмъ ꙗ҆́вѣ ᲂу҆подо́бистесѧ.

Є҆ди́нꙋ зарю̀ трисо́лнечнагѡ бж҃ества̀, безбѡ́жнымъ ра́дꙋющесѧ возвѣстѝ дво́ица честна́ѧ мꙋ́чєникъ, флѡ́ръ же и҆ ла́ѵръ, и҆ мꙋче́нїѧ ча́шꙋ и҆спи́ша ᲂу҆се́рднѡ, хрⷭ҇тꙋ̀ пою́ще, сла́ва си́лѣ твое́й, чл҃вѣколю́бче.

Зако́нꙋ бж҃їю покло́ньшесѧ, преклони́ша беззакѡ́нныѧ, сего̀ є҆ди́наго честѝ ѿверзе́нїемъ ѻ҆че́съ, разꙋ̑мнаѧ и҆́хъ зрѣ̑нїѧ просвѣ́щше, мꙋ́чєницы бжⷭ҇твеннїи, свѣти̑льника два̀, и҆̀же концы̀ всѧ̑ просвѣти́вше.

Бг҃оро́диченъ: Ꙗ҆́кѡ чⷭ҇тꙋю ѿ родѡ́въ и҆збра̀, бцⷣе, тѧ̀ приснодв҃ꙋ, зижди́тель всѣ́хъ и҆ бг҃ъ, и҆ твою̀ ᲂу҆тро́бꙋ пала́тꙋ содѣ́ла нескве́рнꙋ, є҆ди́ный цр҃ь вѣкѡ́въ, и҆ и҆зъ тебє̀ человѣ́кѡмъ ꙗ҆ви́сѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.

Раздѣле́нїѧ не под̾ѧ́тъ бжⷭ҇твеннаѧ дво́ица мꙋ́чєникъ самобра́тнаѧ: нераздѣ́льнѣй бо ст҃ѣ́й трⷪ҇цѣ вѣ́ровавше є҆ди́ною наде́ждою, раздѣле́нїемъ пре́лести безмѣ́стныѧ содержи̑мыѧ совокꙋпѝ бл҃года́тїю.

И҆́стины ве́рвїю, ѻ҆ско́рдомъ же бжⷭ҇твеннагѡ ра́зꙋма, ѡ҆каменє́нныѧ мы̑сли благоче́стнѡ страда́льцы и҆стеса́вше, хра́мы трⷪ҇цѣ пресла́вны бжⷭ҇твенною вѣ́рою содѣ́ласте, си́лою дх҃а.

Кореносѣка́тели ѕло́бы всѧ́кїѧ ꙗ҆ви́стесѧ, мч҃ницы сла́внїи, сади́тели же всѧ́кагѡ благоче́стїѧ, и҆ словесы̀ и҆ вещьмѝ: и҆зра́стшїй цвѣ́тъ і҆ессе́евъ ѿ ко́рене бжⷭ҇твеннагѡ, въ непроходи́мыхъ сердца́хъ насади́сте.

Бг҃оро́диченъ: Пре́жде всѣ́хъ вѣ̑къ, дв҃о, сокрове́нное вели́кое та́инство, є҆́же не ᲂу҆вѣ́дѣно бы́сть родѡ́мъ пє́рвымъ, всенепоро́чнаѧ, тобо́ю ꙗ҆ви́сѧ сло́во ѻ҆́ч҃ее превѣ́чное, вопло́щсѧ и҆ бы́въ чл҃вѣ́къ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Терпѣ́нїемъ неꙋкло́ннымъ беззакѡ́нныѧ побѣжда́юще, по зако́нꙋ страда́льцы хрⷭ҇тꙋ̀ достохва́льный коне́цъ принесо́сте, не покры́вшесѧ нече́стїѧ сꙋ́етствомъ.

Ѻ҆рꙋ́жїѧ си́льнагѡ ꙗ҆влѧ́еми дх҃а побѣди́сте врагѝ безплѡ́тныѧ блаже́ннїи, и҆ стрⷭ҇ть блаже́ннꙋю въ ре́бра прободе́ннагѡ благоче́стнѡ воѡбрази́сте.

Ꙗ҆́коже два̀ предѡбра̀ сѡсца̀, сла́внїи, ꙗ҆ви́стесѧ цр҃кви хрⷭ҇то́вѣ, не млеко̀ пролива́юще, но да́ръ незави́стенъ и҆ спаси́теленъ и҆сцѣле́нїй и҆сточа́юще.

Бг҃оро́диченъ: Недꙋ́говавшꙋю дꙋ́шꙋ мою̀ грѣхо́мъ и҆сцѣлѝ, ꙗ҆́же врача̀ дꙋ́шъ и҆ тѣле́съ ро́ждшаѧ, пречⷭ҇таѧ, є҆го́же бжⷭ҇твеннїи мꙋ́чєницы и҆сповѣ́дающе, вра́чеве страсте́й ꙗ҆ви́стесѧ.

Конда́къ, гла́съ и҃.

Ꙗ҆́кѡ благоче́стїѧ мꙋ́ченики, и҆ страда́льцы хрⷭ҇то́вы бг҃омꙋ́дрены, вселе́ннаѧ, пресла́внѡ почита́етъ флѡ́ра и҆ ла́ѵра дне́сь: ꙗ҆́кѡ да ᲂу҆лꙋчи́мъ благода́ть и҆ ми́лость моли́твами и҆́хъ, и҆ и҆зба́вимсѧ бѣ́дъ и҆ напа́стей, гнѣ́ва же и҆ ско́рби въ де́нь сꙋ́дный.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Древѧны̑ѧ ᲂу҆́бѡ и҆ ка́мєнныѧ бо́ги безбо́жныхъ разори́ша, столпы̀ бг҃оразꙋ̑мныѧ, флѡ́ръ и҆ ла́ѵръ великоимени́тїи, пою́щымъ себѐ возста́виша: бл҃гослове́нъ бг҃ъ ѻ҆тє́цъ на́шихъ.

Сꙋ́ще и҆спо́лнени ѻ҆гнѧ̀ бжⷭ҇твеннагѡ, мч҃ницы, дх҃а, въ пе́щь воврещѝ прпⷣбныѧ мꙋ́жи непра́веднѡ хотѧ́щыѧ, тꙋ́чами бжⷭ҇твенныхъ моли́твъ ва́шихъ соблюдо́сте неврежде́ны, сла́внїи.

Болѧ́щымъ и҆сцѣле́нїе, ѡ҆би̑димымъ и҆збавле́нїе, бѣ́дствꙋющымъ всѣ̑мъ спасе́нїе при́снѡ подаю́тъ, флѡ́ръ и҆ ла́ѵръ, вопїю́ще мч҃ницы: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Ꙗ҆́кѡ ши́покъ ᲂу҆до́лїѧ тѧ̀ въ житїѝ, ѻ҆трокови́це, хрⷭ҇то́съ и҆збра̀, и҆ въ тѧ̀ всели́всѧ, пло́тїю про́йде, благово́нствꙋѧ на́съ бг҃оразꙋ́мїѧ дохновє́нїи, всенепоро́чнаѧ, бцⷣꙋ при́снѡ и҆сповѣ́дающихъ тѧ̀.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Глаго́ломъ живы́мъ пита́юще дꙋ́шы, всеприснопа́мѧтнїи, гла́домъ та́ющымъ спаси́тельное бра́шно, ᲂу҆бѡ́гимъ промышле́нїе, и҆ си̑рымъ ꙗ҆ви́стесѧ, всѣ̑мъ дово́льствꙋюще, и҆ хрⷭ҇тꙋ̀ пою́ще: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Ѡ҆свѧще́нно и҆мꙋ́ще житїѐ и҆ кончи́нꙋ, вре́мѧ до́лго мꙋ́дрїи скрыва́еми, ѿ землѝ и҆зда́стесѧ, па́че зарѝ со́лнечныѧ на́мъ, возсїѧ́вше лꙋчѝ пресла́вныхъ чꙋде́съ, вѣ́рою пою́щымъ: ѻ҆́троцы блгⷭ҇ви́те, свѧще́нницы воспо́йте, лю́дїе превозноси́те во всѧ̑ вѣ́ки.

Два̀ свѣти́льника ꙗ҆ви́стесѧ мы́сленнѣй тве́рди, цр҃ковь сщ҃е́ннѡ ᲂу҆краша́юще, и҆ всю̀ просвѣща́ете свѣ́тлѡ тва́рь при́снѡ чꙋдотворє́нїи страстоте́рпцы, вопїю́ще: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Бг҃оро́диченъ: Ст҃ѣ́йши є҆сѝ а҆́гг҃лъ, ро́ждши, дв҃о прест҃а́ѧ, ст҃ы́хъ ст҃а́го, за милосе́рдїе бы́вша несмѣ́снѡ чл҃вѣ́ка, ꙗ҆́коже є҆смы̀, спастѝ вопїю́щыѧ є҆мꙋ̀ непреста́ннѡ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Сѐ ᲂу҆́бѡ, вопїѧ́ше дре́вле дв҃дъ, что̀ добро̀ и҆ красно̀ и҆ спаси́тельно, но є҆́же ꙗ҆́вѣ бжⷭ҇твєннымъ бра́тїѧмъ вкꙋ́пѣ жи́ти въ дꙋ́сѣ, подви́гшымсѧ ꙗ҆́снѡ, и҆ побѣ́дꙋ взе́мшымъ на дїа́вола: и҆̀хже по достоѧ́нїю ᲂу҆блажа́емъ.

Красны̀ ꙗ҆ви́стесѧ ѻ҆́чи честны́ѧ цр҃кве благода́тїю: и҆ ѻ҆́чи дре́вле ѡ҆слѣплє́ныѧ тмо́ю лю́тою, и҆ пре́жде сме́рти ст҃і́и, и҆ по кончи́нѣ свѧще́ннѣй, ѿверзо́сте въ сла́вꙋ всѣ́хъ бл҃годѣ́телю, ла́ѵре и҆ флѡ́ре достохва́льнїи.

Зна́меньми ꙗ҆вле́нными и҆ стра́шными хрⷭ҇то́съ гро́бъ ва́шъ ст҃і́и, и҆ ра́кꙋ, дре́вле ꙗ҆́коже проречѐ, ꙗ҆влѧ́етъ, и҆дѣ́же терпѣли̑ваѧ тѣлеса̀ лежа́хꙋ свѧще́ннѡ, лꙋчѝ и҆сцѣле́нїй и҆спꙋща́юще бога́тнѡ, и҆ благово́нїе достохва́льное.

Бжⷭ҇твеннаѧ и҆ свѣтоно́снаѧ вои́стиннꙋ дво́ица, ла́ѵре и҆ флѡ́ре, добропобѣ́днїи мꙋ́чєницы, на нб҃сѣ́хъ всегда̀ трⷪ҇цѣ вседѣ́тельнѣй предстоѧ́ще, и҆збавле́нїе грѣхѡ́въ лю́тыхъ и҆спроси́те, вѣ́рою ва́шꙋ бжⷭ҇твеннꙋю па́мѧть на землѝ торжествꙋ́ющымъ.

Бг҃оро́диченъ: Стра́шно твоѐ ржⷭ҇тво̀, мт҃и чⷭ҇таѧ, нбⷭ҇ныѧ бо є҆гѡ́же трепе́щꙋтъ чи́ни, сло́ва бж҃їѧ, чл҃вѣ́ка бы́вша на землѝ, па́че є҆стества̀ родила̀ є҆сѝ, пребы́вши дв҃ою, ꙗ҆́коже пре́жде. тѣ́мже тѧ̀ бцⷣꙋ, и҆ ѧ҆зы́комъ и҆ се́рдцемъ и҆сповѣ́дающе, велича́емъ.