Канон святому священномученику Памфилу Кесарийскому
Припев: Священному́чениче Памфи́ле, моли́ Бо́га о на́с.
Память: 01 марта (16 февраля ст. ст.)
Глас 4.
Пе́снь 1.
Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Си́лою Всесвята́го Ду́ха дванадесяточи́сленный собра́вся по́лк, кре́пко злочести́вых безбо́жное и лука́вое ополче́ние я́ко победоно́сец победи́.
Посрами́ся, страстоте́рпцем му́чеником вра́г прирази́вся, сво́й бо ту́л льсти́вый испраздни́в горча́йше, низложи́ти не возмо́же до́блейших кре́пости.
Гне́в е́ллинскаго шата́ния попра́сте Боже́ственным ра́зумом му́ченицы Христо́вы и му́дростию укра́шени, е́йже проти́витися не возмого́ша благоче́стию проти́вницы.
Богоро́дичен: О́блак, пра́вды Со́лнце на́м возсия́вшую, О́тча Сы́на Единоро́днаго, Богоро́дице Всепе́тая, всеблагоче́стно сла́вяще, вы́ну Тя́ блажи́м.
Пе́снь 3.
Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Просия́л еси́ благоче́стно де́лом, и сло́вом, и честны́м пома́занием, му́чениче Христо́в Памфи́ле, свяще́нства, богому́дре.
Я́коже цевни́ца всеблаголе́пна, испове́данием устро́ена, пою́щи веща́ния, Христо́вы му́ченицы со́брани бы́сте.
Теку́ще к ра́зуму небе́снаго и честна́го зва́ния, я́ко победи́телие вене́ц от Влады́ки прия́сте.
Богоро́дичен: Всели́ся в ны́ в вы́шних Живы́й, Пречи́стая, вы́ше естества́, пло́ть бо из Тебе́ прие́м, облече́ся.
Седа́лен, гла́с 4.
Дванадеся́тный ли́к боже́ственных му́ченик, вои́стинну проти́ву мучи́телей враго́в ополчи́вся тве́рдо, си́х ору́жии ве́ры победи́ и, венце́м от Бо́га оде́явся, а́нгельским же лико́м причте́ся. С ни́миже мо́лит всегда́ изба́витися от напа́стей же, и скорбе́й, и ве́чных му́к того́ блажа́щим.
Сла́ва, и ны́не, богоро́дичен: Удиви́ся Ио́сиф, е́же па́че естества́ зря́ и внима́ше мы́слию, и́же на руно́ до́ждь, в безсе́менном зача́тии Твое́м, Богоро́дице, купину́, огне́м неопали́мую, же́зл Ааро́нов прозя́бший, и, свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по Рождестве́ па́ки Де́ва пребыва́ет.
Крестобогоро́дичен: Де́ва и А́гница, ви́девши на Кресте́, без се́мене из Нея́ А́гнца ро́ждшагося и копие́м прободе́на, печа́ли уя́звена стрела́ми, вопия́ше боле́зненно, восклица́ющи: что́ но́вое та́инство? Ка́ко умира́еши, И́же живота́ еди́н Госпо́дь? Те́мже воскресни́, па́дшаго воздвиза́я пра́отца.
Пе́снь 4.
Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Укра́шено Боже́ственными апо́стол и проро́к дарова́ньми, ликостоя́ние яви́ся му́ченик Твои́х, си́х равночи́сленно, Влады́ко, я́вльшееся промышле́нием Твои́м.
От разли́чных собра́вшеся жи́тельств, я́ко вма́ле всеце́л о́браз Це́ркве спаса́ти сподо́бистеся, согла́сно зову́ще: сла́ва си́ле Твое́й, Го́споди.
Направля́емь дла́нию Влады́ки, и́же Того́ ра́ди во́льную сме́рть подъя́т собо́р прехва́льный му́чеников, взыва́юще: сла́ва си́ле Твое́й, Го́споди.
Богоро́дичен: Богоглаго́ланьми оглаша́еми, Богоро́дице, и́же о Тебе́, и ви́дяще си́х сбы́тия, — ра́дуйся, — Тебе́ вопие́м, — Де́во Всенепоро́чная, изба́вленнии Рождество́м Твои́м.
Пе́снь 5.
Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Не терпя́ су́щим на земли́ послужи́ти, о Памфи́ле, боже́ственное житие́, е́же от младе́нства име́яше, страда́нием уясни́л еси́.
Боже́ственною седи́ною и му́дростию укра́шен, ко гра́ду свято́му устреми́вся Уа́л, я́ко му́ченик венча́ся.
У́м име́я Христо́в, я́ко Па́влу тезоимени́т прехва́льне, му́ченическим венце́м, зако́нно пострада́в, украси́лся еси́.
Богоро́дичен: Испра́вила еси́, Богоро́дице Чи́стая, Е́вино поползнове́ние, ро́ждши Бо́га Сло́ва, низве́рженных паде́ние испра́вльшаго.
Пе́снь 6.
Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Наде́ждами ве́чныя жи́зни утвержда́еми, теле́с раздробле́ния, ра́дующеся, терпя́ху до́блии, боже́ственных проро́к Твои́х, Спа́се, купноиме́ннии.
Сме́ртию жи́знь лу́чшую купи́ша, Самуи́л и Илия́, Дании́л и боже́ственный Иереми́я, и к си́м Иса́ия великоимени́тый.
Свети́льники све́тлы Бо́гу ны́не Еги́пет возсиява́ет, и́же дре́вле глубо́кою тмо́ю покрыва́емый неве́дения, богоразу́мия све́том обогати́вся.
Богоро́дичен: Го́ру Тя́ Дании́л зря́ше, Всенепоро́чная, из нея́же отсече́ся Ка́мень, сокруши́вый вся́кий пре́лести о́браз и испо́лнив богоразу́мия вся́ концы́.
Конда́к, гла́с 4.
Муче́нием стра́шным предлежа́щим Госпо́дни страда́льцы до́блии в небоя́зненном ра́дующеся мудрова́нии, си́м собесе́доваша, о пло́ти неради́вше, те́мже насле́дствоваша ве́чнующую сла́ву, о на́с моля́щеся при́сно, восхваля́ющих и́х по́двиги.
Пе́снь 7.
Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Све́тлым лице́м и ума́ чистото́ю, му́чениче, предзря́ бу́дущую ра́дость, му́ки преоби́дел еси́, стру́жемь неми́лостивно, всеблаже́нне Порфи́рие.
Ю́ноши три́ в пещи́ спасы́й Бо́г, Се́й, страстоте́рпче блаже́нне, тя́, Его́ ра́ди во огни́ жего́ма, я́ве прие́млет, благово́нну же́ртву, Порфи́рие.
Кре́постию души́ твоея́ укра́шен и телесе́, всю́ мучи́теля, Селевки́е, кре́пость низложи́л еси́, всехва́льне, — благослове́н еси́, Бо́же мо́й, — зовы́й, — и Го́споди.
Богоро́дичен: Я́ко Богоро́дица, Красне́йшаго всея́ тва́ри родила́ еси́, Бо́жие бо была́ еси́ и́стинно оби́телище всесвято́е: благослове́на Ты́ в жена́х, Всенепоро́чная Влады́чице.
Пе́снь 8.
Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.
Зако́ном ты́ повину́яся Христо́вым, отве́ргл еси́ вся́, всему́дре Селевки́е, я́ко во́ин же бы́л еси́ и благоче́стия учи́тель, о сирота́х и вдова́х попече́ние име́я и взыва́я: благослови́те, вся́ дела́ Госпо́дня, Го́спода.
Заре́ю сия́я мы́сленною, ста́рче сла́вный и му́чениче Феоду́ле, и ра́б и́скренний бы́л еси́ Влады́це, подо́бяся, Его́же Кре́ст жела́я, ра́дуяся, претерпе́л еси́, — благослови́те, — поя́, — вся́ дела́ Госпо́дня, Го́спода.
Хра́м яви́вся, Иулиа́не, Боже́ственнаго Ду́ха, нра́вов бла́гостию украси́лся еси́, испо́лнь у́бо благогове́ния и све́тлости, испо́лнь же ве́ры яви́вся, сожига́емь ве́сь, — благослови́те, — вопия́, — вся́ дела́ Госпо́дня, Го́спода.
Богоро́дичен: Безма́терне Сло́во, из Отца́ Сы́й, пе́рвее, безо́тчее же бы́сть из Тебе́, второ́е, Всечи́стая, вопло́щься пе́рвее Безпло́тный, за милосе́рдие восхоте́в спасти́ пою́щия: благослови́те, вся́ дела́ Госпо́дня, Го́спода.
Пе́снь 9.
Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Еди́ну небе́сную име́ти жи́знь жела́юще, страстоте́рпцы, привре́менную и тле́нную велему́дренно преоби́десте и ны́не сла́дости лу́чшия и блаже́нныя наслажда́етеся.
Вну́трь ны́не Боже́ственнаго рая́ лику́ете усе́рдно, озаре́ний Исто́чнику предстоя́ще, му́ченицы сла́внии, от Него́же почерпа́юще, заря́ми просвеща́етеся.
Все́х ве́рою творя́щих пресве́тлую твою́ па́мять, дванадеся́тный ли́че, ны́не помина́я ко Влады́це Христу́, с тобо́ю, жили́ща сподо́битися помоли́ся.
Богоро́дичен: Я́ко Ма́ти Еди́наго Влады́ки, все́х тва́рей превы́шши была́ еси́, Де́во Мари́е. Те́мже, ве́рнии, Тя́ вси́, Всенепоро́чная, ны́не ра́дующеся и веселя́щеся, велича́ем.
Пѣ́снь а҃.
І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Си́лою всест҃а́гѡ дх҃а дванадесѧточи́сленный собра́всѧ по́лкъ, крѣ́пкѡ ѕлочести́выхъ безбо́жное и҆ лꙋка́вое ѡ҆полче́нїе, ꙗ҆́кѡ побѣдоно́сецъ, побѣдѝ.
Посрами́сѧ, страстоте́рпцємъ мч҃никѡмъ вра́гъ прирази́всѧ: сво́й бо тꙋ́лъ льсти́вый и҆спраздни́въ горча́йше, низложи́ти не возмо́же до́блѣйшихъ крѣ́пости.
Гнѣ́въ є҆́ллинскагѡ шата́нїѧ попра́сте бжⷭ҇твеннымъ ра́зꙋмомъ, мч҃ницы хрⷭ҇тѡ́вы, и҆ мꙋ́дростїю ᲂу҆кра́шени, є҆́йже проти́витисѧ не возмого́ша благоче́стїю проти̑вницы.
Бг҃оро́диченъ: Ѻ҆́блакъ пра́вды сл҃нце на́мъ возсїѧ́вшꙋю, ѻ҆́ч҃а сн҃а є҆диноро́днаго, бцⷣе всепѣ́таѧ, всеблагоче́стнѡ сла́вѧще, вы́нꙋ тѧ̀ блажи́мъ.
Пѣ́снь г҃.
І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Просїѧ́лъ є҆сѝ благоче́стнѡ дѣ́ломъ и҆ сло́вомъ, и҆ честны́мъ пома́занїемъ, мч҃ниче хрⷭ҇то́въ памфі́ле, свѧще́нства, бг҃омꙋ́дре.
Ꙗ҆́коже цѣвни́ца всеблаголѣ́пна, и҆сповѣ́данїемъ ᲂу҆стро́ена, пою́щи вѣща̑нїѧ, хрⷭ҇тѡ́вы мч҃ницы со́брани бы́сте.
Текꙋ́ще къ ра́зꙋмꙋ нбⷭ҇нагѡ и҆ честна́гѡ зва́нїѧ, ꙗ҆́кѡ побѣди́телїе вѣне́цъ ѿ влⷣки прїѧ́сте.
Бг҃оро́диченъ: Всели́сѧ въ ны̀ въ вы́шнихъ живы́й, пречⷭ҇таѧ, вы́ше є҆стества̀: пло́ть бо и҆зъ тебє̀ прїе́мъ ѡ҆блече́сѧ.
Сѣда́ленъ, гла́съ д҃.
Дванадесѧ́тный ли́къ бжⷭ҇твенныхъ мч҃никъ, вои́стиннꙋ проти́вꙋ мꙋчи́телей врагѡ́въ ѡ҆полчи́всѧ тве́рдѡ, си́хъ ѻ҆рꙋ́жїи вѣ́ры побѣдѝ: и҆ вѣнце́мъ ѿ бг҃а ѡ҆дѣ́ѧвсѧ, а҆́гг҃льскимъ же ликѡ́мъ причте́сѧ. съ ни́миже мо́литъ всегда̀, и҆зба́витисѧ ѿ напа́стей же и҆ скорбе́й, и҆ вѣ́чныхъ мꙋ́къ, того̀ блажа́щымъ.
Сла́ва, и҆ ны́нѣ, бг҃оро́диченъ: Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй. и҆ свидѣ́тельствꙋѧ ѡ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ.
Крⷭ҇тобг҃оро́диченъ: Дв҃а и҆ а҆́гница ви́дѣвши на крⷭ҇тѣ̀ безъ сѣ́мене и҆зъ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскреснѝ, па́дшаго воздвиза́ѧ пра́ѻтца.
Пѣ́снь д҃.
І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Оу҆кра́шено бжⷭ҇твенными а҆пⷭ҇тѡлъ и҆ прⷪ҇рѡ́къ дарова́ньми, ликостоѧ́нїе ꙗ҆ви́сѧ мч҃никъ твои́хъ, си́хъ равночи́сленнѡ, влⷣко, ꙗ҆́вльшеесѧ промышле́нїемъ твои́мъ.
Ѿ разли́чныхъ собра́вшесѧ жи́тельствъ, ꙗ҆́кѡ вма́лѣ всецѣ́лъ ѻ҆́бразъ цр҃кве, спаса́ти сподо́бистесѧ, согла́снѡ зовꙋ́ще: сла́ва си́лѣ твое́й, гдⷭ҇и.
Направлѧ́емь дла́нїю влⷣки, и҆́же тогѡ̀ ра́ди во́льнꙋю сме́рть под̾ѧ́тъ, собо́ръ прехва́льный мч҃никѡвъ, взыва́юще: сла́ва си́лѣ твое́й, гдⷭ҇и.
Бг҃оро́диченъ: Бг҃оглаго́ланьми ѡ҆глаша́еми, бцⷣе, и҆̀же ѡ҆ тебѣ̀, и҆ ви́дѧще си́хъ сбы̑тїѧ, ра́дꙋйсѧ, тебѣ̀ вопїе́мъ, дв҃о всенепоро́чнаѧ, и҆зба́вленнїи ржⷭ҇тво́мъ твои́мъ.
Пѣ́снь є҃.
І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Не терпѧ̀ сꙋ́щымъ на землѝ послꙋжи́ти, ѽ памфі́ле, бжⷭ҇твенное житїѐ є҆́же ѿ младе́нства и҆мѣ́ѧше, страда́нїемъ ᲂу҆ѧсни́лъ є҆сѝ.
Бжⷭ҇твенною сѣди́ною, и҆ мꙋ́дростїю ᲂу҆кра́шенъ, ко гра́дꙋ ст҃о́мꙋ ᲂу҆стреми́всѧ ᲂу҆а́лъ, ꙗ҆́кѡ мч҃никъ вѣнча́сѧ.
Оу҆́мъ и҆мѣ́ѧ хрⷭ҇то́въ, ꙗ҆́кѡ па́ѵлꙋ тезоимени́тъ, прехва́льне, мч҃ническимъ вѣнце́мъ, зако́ннѡ пострада́въ, ᲂу҆краси́лсѧ є҆сѝ.
Бг҃оро́диченъ: И҆спра́вила є҆сѝ, бцⷣе чⷭ҇таѧ, є҆́ѵино поползнове́нїе, ро́ждши бг҃а сло́ва, низве́рженныхъ паде́нїе и҆спра́вльшаго.
Пѣ́снь ѕ҃.
І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Наде́ждами вѣ́чныѧ жи́зни ᲂу҆твержда́еми, тѣле́съ раздроблє́нїѧ, ра́дꙋющесѧ, терпѧ́хꙋ до́блїи, бжⷭ҇твенныхъ прорѡ́къ твои́хъ, сп҃се, кꙋпноиме́ннїи.
Сме́ртїю жи́знь лꙋ́чшꙋю кꙋпи́ша, самꙋи́лъ и҆ и҆лїа̀, данїи́лъ и҆ бжⷭ҇твенный і҆еремі́а, и҆ къ си̑мъ и҆са́їа великоимени́тый.
Свѣти́льники свѣ̑тлы бг҃ꙋ ны́нѣ є҆гѵ́петъ возсїѧва́етъ, и҆́же дре́вле глꙋбо́кою тмо́ю покрыва́емый невѣ́дѣнїѧ, бг҃оразꙋ́мїѧ свѣ́томъ ѡ҆богати́всѧ.
Бг҃оро́диченъ: Го́рꙋ тѧ̀ данїи́лъ зрѧ́ше, всенепоро́чнаѧ, и҆зъ неѧ́же ѿсѣче́сѧ ка́мень, сокрꙋши́вый всѧ́кїй пре́лести ѻ҆́бразъ, и҆ и҆спо́лнивъ бг҃оразꙋ́мїѧ всѧ̑ концы̀.
Конда́къ, гла́съ д҃.
Мꙋче́нїємъ стра̑шнымъ предлежа́щымъ, гдⷭ҇ни страда́льцы до́блїи въ небоѧ́зненномъ ра́дꙋющесѧ мꙋдрова́нїи, си̑мъ собесѣ́доваша, ѡ҆ пло́ти неради́вше: тѣ́мже наслѣ́дствоваша вѣ́чнꙋющꙋю сла́вꙋ, ѡ҆ на́съ молѧ́щесѧ при́снѡ, восхвалѧ́ющихъ и҆́хъ по́двиги.
Пѣ́снь з҃.
І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Свѣ́тлымъ лице́мъ, и҆ ᲂу҆ма̀ чистото́ю, мч҃ниче, предзрѧ̀ бꙋ́дꙋщꙋю ра́дость, мꙋ̑ки преѡби́дѣлъ є҆сѝ, стрꙋ́жемь неми́лостивнѡ, всеблаже́нне порфѵ́рїе.
Ю҆́ношы трѝ въ пещѝ спасы́й бг҃ъ, се́й, страстоте́рпче блаже́нне, тѧ̀, є҆гѡ̀ ра́ди во ѻ҆гнѝ жего́ма, ꙗ҆́вѣ прїе́млетъ благово́ннꙋ же́ртвꙋ, порфѵ́рїе.
Крѣ́постїю дꙋшѝ твоеѧ̀ ᲂу҆кра́шенъ и҆ тѣлесѐ, всю̀ мꙋчи́телѧ, селеѵкі́е, крѣ́пость низложи́лъ є҆сѝ, всехва́льне, бл҃гослове́нъ є҆сѝ, бж҃е мо́й, зовы́й, и҆ гдⷭ҇и.
Бг҃оро́диченъ: Ꙗ҆́кѡ бцⷣа краснѣ́йшаго всеѧ̀ тва́ри родила̀ є҆сѝ, бж҃їе бо была̀ є҆сѝ и҆́стиннѡ ѻ҆би́телище всест҃о́е: бл҃гослове́на ты̀ въ жена́хъ, всенепоро́чнаѧ влⷣчце.
Пѣ́снь и҃.
І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Зако́нѡмъ ты̀ повинꙋ́ѧсѧ хрⷭ҇тѡ́вымъ, ѿве́рглъ є҆сѝ всѧ̑, всемꙋ́дре селеѵкі́е, ꙗ҆́кѡ во́инъ же бы́лъ є҆сѝ, и҆ благоче́стїѧ ᲂу҆чи́тель, ѡ҆ сирота́хъ и҆ вдова́хъ попече́нїе и҆мѣ́ѧ, и҆ взыва́ѧ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Заре́ю сїѧ́ѧ мы́сленною, ста́рче сла́вный и҆ мч҃ниче ѳеодꙋ́ле, и҆ ра́бъ и҆́скреннїй бы́лъ є҆сѝ, влⷣцѣ подо́бѧсѧ, є҆гѡ́же крⷭ҇тъ жела́ѧ, ра́дꙋѧсѧ, претерпѣ́лъ є҆сѝ: благослови́те, поѧ̀, всѧ̑ дѣла̀ гдⷭ҇нѧ, гдⷭ҇а.
Хра́мъ ꙗ҆ви́всѧ, і҆ꙋлїа́не, бжⷭ҇твеннагѡ дх҃а, нра́вѡвъ бла́гостїю ᲂу҆краси́лсѧ є҆сѝ: и҆спо́лнь ᲂу҆́бѡ благоговѣ́нїѧ и҆ свѣ́тлости, и҆спо́лнь же вѣ́ры ꙗ҆ви́всѧ сожига́емь ве́сь, благослови́те, вопїѧ̀, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ: Безмт҃рне сло́во и҆зъ ѻ҆ц҃а̀ сы́й пе́рвѣе, без̾ѻ́тчее же бы́сть и҆зъ тебє̀ второ́е, всечⷭ҇таѧ, вопло́щсѧ пе́рвѣе безпло́тный, за милосе́рдїе восхотѣ́въ спастѝ пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃.
І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Є҆ди́нꙋ нбⷭ҇нꙋю и҆мѣ́ти жи́знь жела́юще, страстоте́рпцы, привре́меннꙋю и҆ тлѣ́ннꙋю велемꙋ́дреннѡ преѡби́дѣсте, и҆ ны́нѣ сла́дости лꙋ́чшїѧ и҆ блаже́нныѧ наслажда́етесѧ.
Внꙋ́трь ны́нѣ бжⷭ҇твеннагѡ раѧ̀ ликꙋ́ете ᲂу҆се́рднѡ, ѡ҆заре́нїй и҆сто́чникꙋ предстоѧ́ще, мч҃ницы сла́внїи: ѿ негѡ́же почерпа́юще, зарѧ́ми просвѣща́етесѧ.
Всѣ́хъ вѣ́рою творѧ́щихъ пресвѣ́тлꙋю твою̀ па́мѧть, дванадесѧ́тный ли́че, ны́нѣ помина́ѧ ко влⷣцѣ хрⷭ҇тꙋ̀, съ тобо́ю жили́ща сподо́битисѧ помоли́сѧ.
Бг҃оро́диченъ: Ꙗ҆́кѡ мт҃и є҆ди́нагѡ влⷣки, всѣ́хъ тва́рей превы́шши была̀ є҆сѝ, дв҃о марі́е. тѣ́мже вѣ́рнїи тѧ̀ всѝ, всенепоро́чнаѧ, ны́нѣ ра́дꙋющесѧ и҆ веселѧ́щесѧ велича́емъ.
Жития священномучеников Памфила, пресвитера, Валента, диакона, мучеников Павла, Порфирия, Селевкия, Феодула, Иулиана, Самуила, Илии, Даниила, Иеремии и Исаии
Святые 12 мучеников – Памфил пресвитер, Валент (Уалент) диакон, Павел, Порфирий, Селевкий, Феодул, Иулиан, Самуил, Илия, Даниил, Иеремия, Исаия пострадали во время гонения на христиан, воздвигнутого императором Диоклитианом в 308–309 годах в Кесарии Палестинской. Святой мученик Памфил, уроженец города Берита (Бейрут), получил образование в Александрии, после чего был поставлен пресвитером в Кесарии. Он много потрудился над сличением и исправлением текстов Нового Завета, поврежденных переписчиками. Исправленные копии святой Памфил переписывал и рассылал желающим их иметь. Таким образом им были обращены ко Христу многие язычники. Его трудами и заботами в Кесарии была собрана обширная библиотека духовных книг, служившая христианскому просвещению. Блаженный Иероним (IV – начало V в.) очень чтил святого Памфила и считал себя счастливым, ибо обрел и хранил у себя некоторые его рукописи. Святому Памфилу в благовестии веры Христовой деятельно помогали святой Валент, диакон Елийской церкви, человек преклонного возраста, прекрасно знавший Священное Писание, и святой Павел, горевший верой и любовью ко Христу Спасителю. Все трое были заключены на 2 года в темницу правителем Кесарии Палестинской Урбаном. В правление его преемника Фирмилиана в Египте были осуждены и отправлены в Киликию (Малая Азия) на золотоносные рудники 130 христиан. Их провожали до места изгнания пять юношей-братьев. На обратном пути в Египет они были задержаны в Кесарии и брошены в темницу за исповедание Христа. Юношей привели на суд к Фирмилиану вместе с заключенными ранее святыми Памфилом, Валентом и Павлом. Назвавшись именами ветхозаветных пророков – Илии, Иеремии, Исаии, Самуила и Даниила, на вопрос об их отечестве юноши отвечали, что они граждане Иерусалима, разумея под этим небесный Иерусалим. Фирмилиан ничего не знал о городе с таким названием, так как на месте Иерусалима, разрушенного императором Титом в 70 году, был построен императором Адрианом (117–138) город, именуемый в то время Елий-Адриан. Фирмилиан долго мучил юношей, пытаясь узнать месторасположение неведомого города и склонить юношей к вероотступничеству; ничего не добившись, правитель предал их усечению мечом вместе с Памфилом, Валентом и Павлом.
Прежде этого пришлось пострадать слуге пресвитера Памфила 18-летнему юноше Порфирию, кроткому и смиренному. Услышав о вынесенном смертном приговоре мученикам, он просил разрешения у правителя похоронить тела приговоренных после их казни, за что был умерщвлен и предан сожжению на костре.
Свидетель этого мученичества, благочестивый христианин Селевкий, бывший воин, приветствуя подвиг страдальцев, подошел к Памфилу перед казнью и рассказал ему о мученической кончине святого Порфирия. Он тут же был схвачен воинами и по повелению Фирмилиана усечен мечом вместе с приговоренными.
Один из слуг правителя, Феодул, человек преклонного возраста и тайный христианин, приветствуя мучеников, ведомых на казнь, поцеловал их и просил помолиться за него. Он был приведен воинами на допрос к Фирмилиану и по приказу последнего распят на кресте.
Юноша Иулиан, родом каппадокиец, подходя к Кесарии, увидел тела святых, брошенные без погребения на съедение зверям. Подойдя к ним, Иулиан преклонил колена и облобызал тела страдальцев. Стоявшие в стороне воины схватили его, повели к правителю, который осудил святого Иулиана на сожжение. Тела всех 12-ти мучеников пребывали без погребения в течение 4-х дней. Ни звери, ни птицы не коснулись их. Смущенные этим обстоятельством, язычники позволили христианам взять тела мучеников и похоронить их.
См. также:
- Страдание святых двенадцати мучеников Памфила пресвитера и прочих с ним свт. Димитрий Ростовский
- Память святых мучеников Памфила пресвитера, Валента диакона, Павла, Порфирия, Селевка, Феодула, Иулиана и пяти египтян: Илии, Иеремии, Исаии, Самуила и Даниила иером. Макарий Симонопетрский