Канон святому преподобномученику Дометию Персиянину

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Къ бг҃ꙋ ѿше́дъ мч҃ническою сїѧ́ѧ бл҃года́тїю, пою́щымъ тѧ̀ вѣ́рнѡ свѣтоно́снꙋю вдохнѝ зарю̀, молѧ̀ хрⷭ҇та̀, бг҃облаже́нне.

Расто́ргъ мрє́жи пре́лести, и҆́стиннѡ хрⷭ҇тꙋ̀ прите́клъ є҆сѝ, мы́слїю чи́стою пє́рсскаѧ слꙋжє́нїѧ ѡ҆ста́вль, и҆ волше́бнагѡ и҆збѣ́гъ безбо́жїѧ.

Хи́трѣ ᲂу҆смотри́лъ є҆сѝ, ꙗ҆́кѡ не бг҃ъ, ꙗ҆́кѡ созда́нное со́лнце: но ни є҆ди́наго ѿ ви́димыхъ надъ неви́димаго бг҃а, наста́вленъ бы́лъ є҆сѝ, по́мысломъ мꙋ́дрымъ ѡ҆б̾е́мсѧ.

Бг҃оро́диченъ: Тѧ̀, всест҃а́ѧ дв҃о, сн҃а бж҃їѧ ро́ждшꙋю, бы́вшаго по на́мъ ра́ди на́съ, проповѣ́дꙋемъ чⷭ҇тꙋю бг҃ома́терь вѣ́рнїи, и҆ ᲂу҆блажа́емъ.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

И҆звѣ́стною вѣ́рою ᲂу҆тве́рждсѧ, ꙗ҆́коже непрекло́ненъ сто́лпъ, непрело́женъ ꙗ҆ви́лсѧ є҆сѝ, ни словесы̀ волше́бными, ни ра́зꙋмомъ пе́рсскагѡ баѧ́нїѧ прельще́нъ.

Ꙗ҆́да дꙋшегꙋ́бнагѡ бѣжа́лъ є҆сѝ, є҆́же тва́ри слꙋжи́ти, и҆ со́лнце почита́ти: сꙋ́щаго же вои́стиннꙋ бг҃а, ꙗ҆́кѡ всѣ́хъ зижди́телѧ благоче́стїѧ любо́вїю взыска́лъ є҆сѝ.

Вода́мъ бжⷭ҇твєннымъ прича́щсѧ пакибытїѧ̀, дꙋ́шꙋ ѡ҆зари́лъ є҆сѝ, и҆ бы́лъ є҆сѝ вои́стиннꙋ сы́нъ бл҃года́ти бж҃їѧ, наслѣ́дникъ бжⷭ҇твенныхъ наслажде́нїй.

Бг҃оро́диченъ: Премꙋ́дрость хра́мъ себѣ̀ созда̀ бжⷭ҇твенъ, па́че ᲂу҆ма́ же и҆ сло́ва, все́льшисѧ въ чⷭ҇тꙋю ᲂу҆тро́бꙋ твою̀, ю҆́же че́стнѣ ѡ҆чи́щши дх҃омъ, всенепоро́чнаѧ.

Сѣда́ленъ, гла́съ и҃.

Пе́рсское слꙋже́нїе ѡ҆ста́вль, ко влⷣцѣ прише́лъ є҆сѝ, ба́нею креще́нїѧ, сла́вне, просвѣ́щсѧ мы́слїю, и҆ мона́шествовавъ прпⷣбнѡ, посто́мъ ᲂу҆мертви́лъ є҆сѝ плотскі̑ѧ стра̑сти, бг҃омꙋ́дре дометі́е: тѣ́мже пострада́въ и҆ пре́лесть побѣди́въ, сꙋгꙋ́бъ вѣне́цъ побѣ́ды воспрїѧ́лъ є҆сѝ. сегѡ̀ ра́ди вопїе́мъ тебѣ̀: молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ: Сокрове́ннꙋю мо́лнїю подъ пло́тїю сꙋщества̀ твоегѡ̀, хрⷭ҇тѐ, и҆ бжⷭ҇твеннагѡ благолѣ́пїѧ, на ст҃ѣ́й показа́лъ є҆сѝ горѣ̀, бл҃годѣ́телю, просїѧ́въ сꙋ́щымъ съ тобо́ю ᲂу҆ченикѡ́мъ: и҆ разꙋмѣ́вше нестерпи́мꙋ сꙋ́щꙋ сла́вꙋ твою̀, свѧ́тъ є҆сѝ, возопи́ша, ꙗ҆́кѡ непристꙋ́пенъ сы́й, ви́дѣнъ бы́лъ є҆сѝ пло́тїю мі́рови, є҆ди́не чл҃вѣколю́бче.

Пѣ́снь д҃.

І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Позна́лъ є҆сѝ, сла́вне, є҆стество́мъ невѣ́домаго, слове́снѡ взыска́лъ є҆сѝ, и҆ ѡ҆брѣ́тъ сего̀ возжела́въ, поклони́лсѧ є҆сѝ ра́дꙋѧсѧ тогѡ̀ вели́чествїю.

Ли́кꙋ цѣломꙋ́дромꙋ те́плѣ прите́клъ є҆сѝ, мона́шествꙋющихъ ст҃ы́хъ и҆ добродѣ́телей ре́вностїю распала́емь, по́жилъ є҆сѝ чи́стѣ въ постѣ́хъ и҆ моли́твахъ.

Оу҆до́бь разрѣшѝ соꙋ́зы є҆стества̀ бг҃омꙋ́дренное твоѐ жела́нїе, ѻ҆́тче, и҆ страсте́й ᲂу҆гасѝ пе́щь, росода́тельнымъ просвѣще́нїемъ ст҃а́гѡ дх҃а.

Бг҃оро́диченъ: Крѣ́пость моѧ̀ є҆́сть бг҃ъ и҆ гдⷭ҇ь, бцⷣе дв҃о, вопло́щшеесѧ сло́во пребжⷭ҇твенно и҆зъ нетлѣ́ннагѡ твоегѡ̀ чре́ва, и҆ живо́тъ на́мъ дарова̀.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Ра́зꙋмомъ бжⷭ҇твеннымъ сїѧ́ѧ, блаже́нне, ви́димыхъ всѣ́хъ проразсꙋди́лъ є҆сѝ, неви́димыхъ присносꙋ́ществїе, сїѧ́нїемъ чистоты̀ просвѣща́емь.

Бжⷭ҇твенныѧ вкꙋси́въ добродѣ́тели, безмо́лвїѧ и҆ ѿше́льствїѧ, ᲂу҆тверди́лъ є҆сѝ мы́сль немꙋ́тнꙋ, ᲂу҆строе́нїе хранѧ̀, ѻ҆́тче дометі́е.

Ꙗ҆́кѡ вои́стиннꙋ ве́лїе и҆ чꙋ́дно є҆́же къ лꙋ́чшемꙋ преложе́нїе твоѐ, и҆ всемꙋ́дрый ра́зꙋмъ: вы́шнѧгѡ бо рꙋкѝ и҆змѣ́на, и҆ бл҃года́ти бжⷭ҇твенныѧ дѣ́ло бы́сть.

Бг҃оро́диченъ: Дв҃а пребыла̀ є҆сѝ безъ вре́да, и҆ ма́тєрскаѧ показꙋ́еши, всенепоро́чнаѧ влⷣчце: дѣ́вствꙋ бо ржⷭ҇тво̀ счета́ла є҆сѝ, и҆ но́сиши ѻ҆бои́хъ свѡ́йства.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Тве́рдѡ наноси́мое врага̀ и҆ сꙋпоста́та и҆скꙋше́нїе претерпѣ́лъ є҆сѝ, и҆ разли́чнѡ, преблаже́нне, и҆скꙋше́нъ бы́въ, за́вистїю бори́мь, побѣди́тель ꙗ҆ви́лсѧ є҆сѝ, достосла́вне.

Житїѐ твоѐ бжⷭ҇твенное, жи́знь бг҃ови́дна и҆ свѣтоно́сна бы́сть: мі́ра бо кра̑снаѧ ѡ҆ста́вль, бжⷭ҇твенное бл҃голѣ́пїе ᲂу҆плоди́лъ є҆сѝ, бг҃омꙋ́дре, и҆ красотꙋ̀.

Зна́мєнїѧ и҆ чꙋдеса̀ сподо́билсѧ є҆сѝ соверша́ти па́че є҆стества̀, сла́вне, си́лою бж҃е́ственною воѡрꙋ́жсѧ, и҆мы́й свы́ше споспѣшествꙋ́ющꙋю тебѣ̀ бл҃года́ть, достосла́вне.

Бг҃оро́диченъ: Свѣ́та жили́ще, и҆ черто́гъ бг҃олѣ́пенъ па́че ᲂу҆ма̀ воплоще́нїѧ всѣ́хъ, дв҃о, содѣ́телѧ: ты́ бо є҆ди́на ꙗ҆ви́ласѧ є҆сѝ достоблаже́нное томꙋ̀ поко́ище.

Конда́къ, гла́съ ѕ҃:

Ꙗ҆́кѡ преѡби́дѣвъ тлѣ̑ннаѧ и҆ до́лꙋ влекꙋ́щаѧ мꙋдрова̑нїѧ прпⷣбномꙋ́чениче дометі́е, вели́къ наста́вникъ мона́хѡмъ показа́лсѧ є҆сѝ, не ᲂу҆страши́всѧ ꙗ҆́рости царѧ̀, не хотѧ́ща чти́ти хрⷭ҇та̀ и҆́стиннаго бг҃а. сегѡ̀ ра́ди и҆ сконча́лсѧ є҆сѝ, воспѣва́ѧ пѣ́снь: бг҃ъ є҆́сть со мно́ю, и҆ никто́же на мѧ̀.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

На тебѣ̀, ѻ҆́тче, пресвѣ́тлаѧ дх҃а благода́ть почѝ, и҆ дѣ̑йствїѧ пресла̑вна показа̀ тебѣ̀ вопїю́щемꙋ, и҆ пою́щемꙋ вѣ́рнѡ: бл҃гослове́нъ є҆сѝ, бж҃е ѻ҆тє́цъ на́шихъ.

Тве́рдымъ ᲂу҆мо́мъ проше́лъ є҆сѝ стезю̀ поще́нїѧ, и҆ при кончи́нѣ подвигѡ́въ, мꙋ́ченикъ и҆́стиненъ бы́лъ є҆сѝ, зовы́й хрⷭ҇тꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Ꙗ҆́кѡ ро́ждшесѧ моли́твами твои́ми дѣ́ти, тебѣ̀ ѻ҆тцꙋ̀ сподвиза́шасѧ, и҆ въ пеще́рѣ терпѧ́ще страда́ша съ тобо́ю, согла́снѡ зовꙋ́ще хрⷭ҇тꙋ̀: благослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Спасе́нїѧ приста́нище тѧ̀ стѧжа́вше, ѿ бꙋ́ри спаса́емсѧ, и҆ наде́ждꙋ ю҆́же къ тебѣ̀, ꙗ҆́кѡ ѡ҆снова́нїе дꙋ́шъ держа́ще, зове́мъ хрⷭ҇тꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃.

І҆рмо́съ: И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Снѣда́емь любо́вїю, ѻ҆́тче, зижди́телѧ, зда́нїй ѿри́нꙋлъ є҆сѝ всѧ́кое пристра́стїе, дх҃омъ бж҃їимъ ꙗ҆́вѣ направлѧ́емь: є҆го́же превозно́симъ во всѧ̑ вѣ́ки.

Земна̑ѧ попечє́нїѧ ѿтрѧ́съ, нбⷭ҇ными наде́ждами, ѻ҆́тче, ѡ҆богати́лсѧ є҆сѝ, и҆ є҆́же ѡ҆ хрⷭ҇тѣ̀ блаже́нствомъ. є҆гѡ́же ны́нѣ наслажда́ешисѧ во всѧ̑ вѣ́ки.

Свѣтолꙋ̑чныѧ зари̑, ѻ҆́тче, прїе́мъ, ст҃а́гѡ и҆ бжⷭ҇твеннагѡ, премꙋ́дре, дх҃а, ѻ҆чи́ма ꙗ҆́вѣ сего̀, блаже́нне, ви́дѣлъ є҆сѝ, бжⷭ҇твенныхъ та̑инъ стра́шнѡ наꙋча́юща тѧ̀.

Бг҃оро́диченъ: Бг҃овѣща́ннаѧ цѣвни́ца твоегѡ̀ пра́ѻтца, ковче́гъ тѧ̀ свѧ́тъ проѡбразѝ, носѧ́щъ бг҃а въ пло́ть ѡ҆бле́кшасѧ, є҆го́же превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Свѣ́томъ невеще́ственнымъ ѡ҆зарѧ́емь, свѣтови́дѣнъ досто́йнѡ, бг҃оно́се, бы́лъ є҆сѝ, житїѐ непоро́чно стѧжа́въ, ѻ҆́тче, и҆ всесвѧ́то, ны́нѣ же предстои́ши моли́твенникъ влⷣцѣ и҆ бг҃ꙋ ѡ҆ ста́дѣ твое́мъ.

Твоѝ по́двизи воздержа́нїѧ мч҃ническими пѡ́двиги по достоѧ́нїю вѣнча́шасѧ: и҆ сꙋгꙋ́бо страда́нїе показа́лъ є҆сѝ благомꙋ́жествомъ, и҆̀хже прїѧ́лъ є҆сѝ и҆ вѣ́чныхъ бла̑гъ ѡ҆брѣ́лъ є҆сѝ наслажде́нїе.

Оу҆крѣ́пльсѧ си́лою бжⷭ҇твенною и҆ благода́тїю, ꙗ҆́вльсѧ всѣ̑мъ благоче́стїѧ ᲂу҆чи́тель, показа́лсѧ є҆сѝ чꙋдесы̀ ᲂу҆краша́емь, всѧ̑ ᲂу҆твержда́ѧ, всѧ̑ и҆сцѣлѧ́ѧ приходѧ́щыѧ къ тебѣ̀ вѣ́рнѡ, бг҃облаже́нне.

Бг҃оро́диченъ: Въ тебѣ̀ содѣ́ѧсѧ вы́ше человѣ́ка, па́че є҆стества̀, дв҃о бцⷣе, та́инство: бж҃їѧ бо была̀ є҆сѝ роди́тельница, носѧ́щи на ѡ҆б̾ѧ́тїихъ и҆ пита́ющи, нбⷭ҇ными во́инствы пѣсносло́вимаго.