Канон святому преподобному Феодору Освященному, игумену

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Пѣснопѣ̑нїи хотѧ́щемꙋ твоѐ пѣ́ти ны́нѣ торжество̀, бжⷭ҇твенныхъ дарѡ́въ, ꙗ҆́кѡ сы́й тезоимени́тъ, да́ръ пода́ждь мѝ свѣтоно́сенъ, ѿ сокро́вищъ почерпа́ѧ неиздае́мыхъ благода́ть бжⷭ҇твеннꙋю, всеприснопа́мѧтне.

Поꙋча́ѧсѧ зако́нꙋ прилѣ́жнѡ, ѻ҆́ч҃е, чи́стомꙋ, ве́сь чи́стъ и҆ пречи́стъ бы́лъ є҆сѝ: всечⷭ҇томꙋ же сло́вꙋ совокꙋплѧ́ѧсѧ, чистоты̀ свѣ́телъ сосꙋ́дъ показа́лсѧ є҆сѝ, и҆ ѡ҆свѧще́нъ, всеблаже́нне.

Бг҃оро́диченъ: Оу҆мертви́въ себѐ мі́рꙋ, жи́знь, ѻ҆́ч҃е, равноа́гг҃льнꙋ на землѝ благоче́стнѡ проходѧ̀, возсїѧ́вшемꙋ ѿ ложе́снъ дв҃и́ческихъ послѣ́довалъ є҆сѝ, крⷭ҇тъ тво́й на ра́мо взе́мъ, бг҃омꙋ́дре преблаже́нне.

Пѣ́снь г҃.

І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ се́рдце.

Ꙗ҆́кѡ да́ръ люби́мь влⷣцѣ, преподо́бне, твою̀ дꙋ́шꙋ, ѳео́дѡре, спаса́емꙋ, и҆ воздержа́нїемъ ѿ страсте́й и҆змѣне́ннꙋ прине́слъ є҆сѝ.

Бг҃ꙋ ѡ҆свѧще́нъ, превозше́лъ є҆сѝ, всемꙋ́дре, зри́мыхъ чꙋ́вство, чи́стымъ же ᲂу҆мо́мъ бесѣ́довалъ є҆сѝ ᲂу҆мꙋ̀ превы́спреннемꙋ, преблаже́нне.

Бг҃оро́диченъ: Оу҆дали́лсѧ є҆сѝ въ пꙋсты́ни бѣ́гаѧ, сла́вне, и҆́же ѿ дв҃ы просїѧ́вшаго бг҃а сло́ва ты̀ прїи́мъ, ѡ҆ не́мже и҆ спа́слсѧ є҆сѝ, досточꙋ́дне.

Конда́къ, гла́съ в҃.

Въ домꙋ̀ бж҃їи ꙗ҆́кѡ фі́нїѯъ процвѣ́лъ є҆сѝ, плоды̀ же добродѣ́телей гдⷭ҇еви прине́слъ поще́нїемъ и҆зрѧ́днымъ, ѻ҆́ч҃е преподо́бне: тѣ́мже и҆ ᲂу҆блажа́ешисѧ, ꙗ҆́кѡ безпло́тныхъ равностоѧ́теленъ.

Сѣда́ленъ, гла́съ г҃.

Бжⷭ҇твенною си́лою ѡ҆дѣ́ѧнъ, ѡ҆бнажи́лъ є҆сѝ полкѝ сꙋпроти́вныхъ си́лъ, бг҃оно́се, и҆ добродѣ́телей просїѧ́въ свѣ́тлостїю, и҆сцѣле́нїй зарѝ ѡ҆блиста́лъ є҆сѝ, ѻ҆́ч҃е преподо́бне: хрⷭ҇та̀ бг҃а молѝ, дарова́ти на́мъ ве́лїю ми́лость.

Бг҃оро́диченъ: Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.

Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и на крⷭ҇тѣ̀ зрѧ́щи повѣ́шена, и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃.

І҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всегѡ̀ мѧ̀ человѣ́ка. тѣ́мъ зовꙋ̀ тѝ: сла́ва си́лѣ твое́й, гдⷭ҇и.

Кꙋпносе́льникъ пахѡ́мїю бжⷭ҇твенномꙋ бы́въ, нра̑вы подража́лъ є҆сѝ, ѻ҆́ч҃е бг҃омꙋ́дре ѳео́дѡре, тогѡ̀ воздержа́нїю, и҆ правосла́внѣй вѣ́рѣ подо́бѧсѧ.

Пѣва́емаго црⷭ҇тва, и҆ бжⷭ҇твеннагѡ сїѧ́нїѧ, досто́йнѡ полꙋчи́лъ є҆сѝ, ꙗ҆́кѡ бы́въ хꙋдо́гъ, ѻ҆́ч҃е, чистото́ю, къ прича́стїю неизрече́нныѧ красоты̀.

Се́ла є҆ѳїо́пскаѧ, дє́мѡнскаѧ сѡ́нмища, твоегѡ̀ ᲂу҆жасо́шасѧ терпѣ́нїѧ и҆ смире́нїѧ, и҆ непреста́ннагѡ во бдѣ́нїихъ твоегѡ̀ стоѧ́нїѧ, досточꙋ́дне.

Бг҃оро́диченъ: Во и҆зстꙋпле́нїи главы̑ си́льныхъ ссѣко́шасѧ, стра́хомъ ржⷭ҇тва̀ твоегѡ̀, бг҃ороди́тельнице всенепоро́чнаѧ: собо́ръ же прпⷣбныхъ ᲂу҆диви́сѧ, досто́йнѡ бжⷭ҇твенною благода́тїю.

Пѣ́снь є҃.

І҆рмо́съ: Хода́тай бг҃ꙋ и҆ человѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Оу҆чє́нїѧ те́плѣ честна̑ѧ и҆мѣ́въ, разори́лъ є҆сѝ всѣ́хъ є҆ресе́й прелє́стнаѧ прїѧ̑тїѧ, мꙋ́дре, трⷪ҇ческою вѣ́рою ѡ҆гражда́ѧ ста́до твоѐ.

Ꙗ҆́кѡ свѣ́тъ вои́стиннꙋ на землѝ бы́лъ є҆сѝ, ѳео́дѡре, житїѐ непоро́чно пожи́въ, всеприснопа́мѧтне, по́стникѡвъ ᲂу҆краше́нїе, мона́шествꙋющихъ похвала̀.

Бг҃оро́диченъ: Тече́нїемъ по́стническихъ сле́зъ напаѧ́ѧ се́рдце твоѐ, плодоно́сно показа́лъ є҆сѝ возсїѧ́вшемꙋ влⷣцѣ хрⷭ҇тꙋ̀ ѿ дв҃ы ст҃ы́ѧ, ѳео́дѡре пребога́те.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Свѣ́тлое и҆ бг҃оꙋго́дное житїѐ твоѐ, тебѣ̀ нбⷭ҇нꙋю, ѻ҆́ч҃е, свѣ́тлость ст҃ы́хъ показа̀, въ се́лѣхъ нбⷭ҇ныхъ, ѳео́дѡре.

Побѣди́тель, ѡ҆долѣва́ѧ, ѳео́дѡре, лꙋка̑вствїѧ дꙋхѡ́въ, бы́лъ є҆сѝ, ᲂу҆тѣ́шителѧ дх҃а помо́щника стѧжа́въ, бг҃опрїѧ́тне.

Бг҃оро́диченъ: Ѻ҆́блакъ ле́гкїй є҆сѝ, чⷭ҇таѧ, на не́мже сѣдѧ̀ прїи́де во є҆гѵ́петъ вседержи́тель гдⷭ҇ь, и҆ свѣти́льники преподѡ́бныѧ содѣ́ла.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дꙋхо́внꙋю, сы́й бл҃гослове́нъ и҆ препросла́вленъ.

Разꙋ́мнѡ возжела́лъ є҆сѝ ꙗ҆́коже бг҃ови́децъ, бжⷭ҇твеннꙋю свѣ́тлость ви́дѣти, ѳео́дѡре: тѣ́мже ви̑димаѧ всѧ̑ ѡ҆ста́вилъ є҆сѝ, во мра́къ же вше́дъ зрѣ́ти сподо́билсѧ є҆сѝ непостижи́маго.

Ꙗ҆́да ты̀ ѕмїи́на дꙋшетлѣ́ннагѡ, преблаже́нне ѳео́дѡре ника́коже прїи́мъ, сегѡ̀ па́мѧть, ѻ҆́ч҃е, погꙋби́лъ є҆сѝ, па́мѧть непреста́ннѡ бж҃їю въ се́рдцы, блаже́нне, стѧжа́въ.

Бг҃оро́диченъ: Ст҃ы́хъ ст҃а́го, во ст҃ы́хъ почива́ющаго, свѧ́тѡ породила̀ є҆сѝ, дв҃о всенепоро́чнаѧ, за милосе́рдїе мно́гое чл҃вѣ́ка бы́вша и҆зъ тебє̀ воплоще́нна, пре́жде безпло́тнагѡ.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: благослови́те, всѧ̑ дѣла̀ гдⷭ҇нѧ, гдⷭ҇а.

Ты̀ свѣтови́денъ, свѣ́тꙋ пресвѣ́тломꙋ бесѣ́довавъ, ꙗ҆ви́лсѧ є҆сѝ, преблаже́нне ѳео́дѡре, є҆дине́нїемъ же лꙋ́чшимъ, па́че є҆стества̀ ѡ҆божа́емь, зовы́й ны́нѣ: благослови́те, всѧ̑ дѣла̀ гдⷭ҇нѧ, гдⷭ҇а.

Мꙋ́ченикъ бы́въ тве́рдъ ко грѣхꙋ̀, да́же до кро́ве проти́вльсѧ, бг҃омꙋ́дре ѳео́дѡре, вѣнце́мъ страда́нїѧ твою̀ главꙋ̀ ᲂу҆краси́лъ є҆сѝ, зовы́й ны́нѣ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Ꙗ҆ви́сѧ на́мъ и҆зъ тебє̀, бг҃ороди́тельнице, пра́вды свѣ́тлое сл҃нце, просвѣща́ѧ всѧ́чєскаѧ заре́ю бжⷭ҇тва̀, вопло́щсѧ вы́шнїй. є҆го́же ны́нѣ воспѣва́емъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Ны́нѣ не въ гада́нїихъ, тебѣ̀ хрⷭ҇то́съ ви́димь є҆́сть, къ лицꙋ̀ же па́че ви́дитсѧ лице́мъ, и҆́стиннымъ ꙗ҆вле́нїемъ, и҆́же сѣно́внымъ разрѣ́шшымсѧ зерца́лѡмъ, дарѡ́въ тезоимени́те, сп҃са и҆ бг҃а на́шегѡ.

Жела́нїе бжⷭ҇твенное твоѐ и҆спо́лнисѧ, ѳео́дѡре, ꙗ҆́кѡ дости́гъ кончи́нꙋ, є҆́же поще́нїемъ и҆здале́ча зрѧ́ше со ᲂу҆миле́нїемъ, є҆го́же и҆ полꙋчи́въ, жела̑нїѧ ᲂу҆ста́вилъ є҆сѝ, по́стникѡвъ похвало̀, мона́шествꙋющихъ благолѣ́пїе.

Бг҃оро́диченъ: Недꙋ́говавъ растлѣ́тисѧ преслꙋша́нїемъ, пе́рвый а҆да́мъ тобо́ю, бг҃ома́ти, ѡ҆бнови́сѧ: ты̀ бо воплоще́нна сло́ва ро́ждши безъ и҆стлѣ́нїѧ неизрече́ннѡ, тлю̀ и҆скорени́вши, нетлѣ́нїе процвѣла̀ є҆сѝ.