Канон святому праведному Евдокиму Каппадокиянину

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀ фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть: препросла́вленный гдⷭ҇ь, сла́внѡ бо просла́висѧ.

Высоко̀ житїѐ и҆мѣ́ѧ, и҆ восхожде́нїи бжⷭ҇твенными ве́сь свѣ́телъ бы́въ, просвѣще́нїе мѝ и҆спросѝ, восхвалѧ́ющемꙋ честны́ѧ твоѧ̑ по́двиги: и҆́миже до́брѣ пожи́въ, полꙋчи́лъ є҆сѝ, є҆ѵдокі́ме, и҆́хже надѣ́ѧлсѧ є҆сѝ.

Мѷровѡ́ннаѧ любѧ̀ ᲂу҆чє́нїѧ, и҆ во чте́нїи свѧще́нныхъ писа́нїй ᲂу҆пражнѧ́ѧсѧ, сласте́й ᲂу҆клони́лсѧ є҆сѝ, всебл҃же́нне, смра́дныхъ и҆ безче́стныхъ, и҆ ѡ҆благово́нилсѧ є҆сѝ, бжⷭ҇твенными дарова̑нїи ᲂу҆краша́емь.

Дрема́нїе ѻ҆́чїю ѿ дꙋшѝ, блаже́нне, ѿгна́лъ є҆сѝ, бдѧ̀ и҆ бг҃ꙋ приединѧ́ѧсѧ, всено́щными стоѧ̑нїи, непрекло́ненъ нꙋ́ждами є҆стества̀: тѣ́мже ко дню̀ невече́рнемꙋ дости́глъ є҆сѝ.

Бг҃оро́диченъ: Ꙗ҆́кѡ черто́гъ ѡ҆дꙋшевле́нъ бж҃їй, и҆ кади́льницꙋ мы́сленнагѡ и҆ свѣтоно́снагѡ ᲂу҆́глѧ, при́снѡ благода́тнꙋю ᲂу҆блажа́емъ бцⷣꙋ, зовꙋ́ще: ра́дꙋйсѧ, хода́таице спаси́тельнагѡ воскресе́нїѧ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть свѧ́тъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Глаго́лѡмъ животѡ́чнымъ внима́ѧ, и҆спи́лъ є҆сѝ во́дꙋ спасе́нїѧ, возгнꙋша́всѧ го́рькагѡ грѣха̀, и҆ поѧ̀ глаго́лалъ є҆сѝ бг҃ꙋ, є҆ѵдокі́ме: ꙗ҆́кѡ нѣ́сть свѧ́тъ па́че тебє̀, гдⷭ҇и.

Ми́лованїе стѧжа́лъ є҆сѝ хрⷭ҇топодража́тельное, разда́лъ є҆сѝ бога́тство тре́бꙋющымъ, небе́сное же бога́тство хода́тайствꙋющее тебѣ̀ полꙋчи́лъ є҆сѝ, вопїѧ̀, є҆ѵдокі́ме: ꙗ҆́кѡ нѣ́сть свѧ́тъ па́че тебє̀, гдⷭ҇и.

Присво́ивсѧ зижди́телю любо́вїю бжⷭ҇твенною, прїѧ́лъ є҆сѝ нбⷭ҇ное наслѣ́дїе, и҆ дре́ва живо́тнагѡ прича́стникъ є҆сѝ, ѻ҆бще́нїемъ ѡ҆божа́емь, и҆ поѧ̀, сла́вне, глаго́лалъ є҆сѝ: ꙗ҆́кѡ нѣ́сть свѧ́тъ па́че тебє̀, гдⷭ҇и.

Бг҃оро́диченъ: Сꙋ́щи а҆́гг҃лъ честнѣ́йши, зижди́телѧ а҆́гг҃лѡвъ во ᲂу҆тро́бѣ носи́ла є҆сѝ, и҆ родила̀ є҆сѝ неизрече́ннѡ. є҆мꙋ́же всѝ пое́мъ: ты̀ є҆сѝ бг҃ъ на́шъ, и҆ нѣ́сть свѧ́тъ па́че тебє̀, гдⷭ҇и.

Сѣда́ленъ, гла́съ д҃:

Благоволи́въ благи́ми дѣѧ́нїи и҆скꙋси́лсѧ є҆сѝ ꙗ҆́кѡ зла́то въ пещѝ, напа́стьми, є҆ѵдокі́ме сла́вне. тѣ́мже и҆ по сме́рти и҆сточа́еши бога́тнѡ чꙋдеса̀ ꙗ҆́кѡ во́ды, и҆ недꙋ́ги ᲂу҆ставлѧ́еши, ѡ҆ на́съ при́снѡ молѧ́сѧ, ꙗ҆́кѡ да согрѣше́нїй проще́нїе прїи́мемъ.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Оу҆чє́нїѧ ѻ҆те́чєскаѧ хранѧ̀ невреди́мѡ правосла́внымъ мꙋдрова́нїемъ, ты̀ ѿ младе́нства и҆мѣ́лъ є҆сѝ житїѐ нескве́рное, и҆ ми́лостивенъ нра́въ, досточꙋ́дне.

Ни молва̀ мїрска́ѧ, ни вла́сти держа́нїе, ни сла́ва вре́меннаѧ, твоегѡ̀ къ бг҃ꙋ жела́нїѧ превратѝ, є҆ѵдокі́ме: но благоволи́лъ є҆сѝ вои́стиннꙋ бжⷭ҇твеннымъ дѣѧ́нїемъ.

Возвыша́емь бжⷭ҇твенными поꙋче́нїи всегда̀, врага̀ смири́лъ є҆сѝ, и҆сцѣле́нїй дѣ́йство прїѧ́лъ є҆сѝ, є҆ѵдокі́ме, сꙋдо́мъ првⷣнымъ всѧ̑ ᲂу҆правлѧ́ющагѡ.

И҆ска́пающи сла́дость ра́ка моще́й твои́хъ бога́тыхъ и҆сцѣле́нїй, стра̑сти ѿгонѧ́етъ, є҆ѵдокі́ме, вѣ́рою чтꙋ́щихъ тѧ̀, и҆ попалѧ́етъ бѣсѡ́въ всѧ̑ полкѝ.

Бг҃оро́диченъ: Всепѣ́таѧ, во́инствы го́рними пѣва́емаго, бг҃а родила̀ є҆сѝ, чл҃вѣ́ка вои́стиннꙋ бы́вша: є҆го́же ѡ҆ рабѣ́хъ твои́хъ молѧ́щи не преста́й, приснодв҃о.

Пѣ́снь є҃.

І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й: къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо ра́звѣ тебє̀ бг҃а не зна́ю.

Заре́ю чи́стѡ ст҃ы́ѧ трⷪ҇цы просвѣще́нъ, зако́номъ же сеѧ̀ ѡ҆гражде́нъ, но́щь житїѧ̀ непреткнове́ннѡ преминꙋ́лъ є҆сѝ, видѣ́нїи бжⷭ҇твенными ѡ҆крилѧ́емь, блаже́нне, и҆ въ бжⷭ҇твеннꙋю жи́знь всели́лсѧ є҆сѝ.

Ны́нѣ на тебѣ̀ чꙋ́до ве́лїе зри́тсѧ, и҆ ᲂу҆́жаса и҆спо́лнено, ка́кѡ по погребе́нїи вои́стиннꙋ мно́гѡ лѣ́тъ соблюде́сѧ, нерꙋши́мо, бл҃же́нне, твоѐ тѣ́ло во гро́бѣ лежа́щее, сꙋдьба́ми, и҆́миже вѣ́сть са́мъ прославлѧ́ѧй тѧ̀.

Бла́гоже твоемꙋ̀ къ бг҃ꙋ дерзнове́нїю, бла́гоже жела́нїю, є҆́же въ се́рдцы къ немꙋ̀ и҆мѣ́лъ є҆сѝ, бла́гѡ пожи́въ тезоиме́ннѡ, просїѧ́лъ є҆сѝ пресла́внѡ бжⷭ҇твенными свѣтлостьмѝ, и҆ ᲂу҆ѧсни́лъ є҆сѝ вѣ́рныхъ совокꙋплє́нїѧ.

Бг҃оро́диченъ: Ѡ҆ на́съ и҆зъ тебє̀ воплоще́ннаго, дв҃о мт҃и, всегда̀ молѝ, благоче́стнѡ тѧ̀ блажа́щихъ, и҆зба́витисѧ бѣ́дъ, и҆ дꙋшетлѣ́нныхъ страсте́й и҆ печа́лей, и҆ вѣ́чнꙋющагѡ пла́мене мꙋче́нїѧ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Течє́нїѧ сла̑дкаѧ и҆ска́пахꙋ, блаже́нне, по́тове твоѝ и҆ ра́дѡванїѧ, и҆сцѣле́нїй сїѧ́нїе, во хвалꙋ̀ хрⷭ҇та̀ бг҃а на́шегѡ.

Во дво́рѣхъ бж҃їихъ процвѣ́лъ є҆сѝ, вїногра́дъ многопло́денъ прозѧбы́й, и҆ добродѣ́телей гро́здїе, дѣ́лателю дꙋша́мъ ѻ҆би́льнѡ пода́въ.

Црⷭ҇тва бж҃їѧ возжелѣ́лъ є҆сѝ, и҆ надъ страстьмѝ ца́рствовавъ, є҆ѵдокі́ме, по благоволе́нїю лꙋ́чшемꙋ, ра́дость пра́ведныхъ полꙋчи́лъ є҆сѝ.

Бг҃оро́диченъ: И҆збра́нна бг҃ꙋ бы́вши, ꙗ҆́кѡ кра́сное село̀ и҆ простра́нное, семꙋ̀, дв҃о, была̀ є҆сѝ, и҆ черто́гъ и҆ свѣ́щникъ и҆ трапе́за.

Конда́къ, гла́съ в҃:

Вы́шнихъ жела́ѧ, съ вы́шними совокꙋплѧ́ѧсѧ, и҆ колесни́цꙋ ѻ҆́гненнꙋю, бжⷭ҇твенными восхожде́ньми добродѣ́телей, соверши́лъ є҆сѝ дꙋ́шꙋ, преблаже́нне є҆ѵдокі́ме: на землѝ пожи́въ ꙗ҆́кѡ безпло́тенъ, зижди́телю всѣ́хъ благоꙋгоди́лъ є҆сѝ.

І҆́косъ:

Житїѐ сꙋгꙋ́бо показа́лъ є҆сѝ пра́вою, бл҃же́нне, вѣ́рою, во ѻ҆бое́мъ бг҃ꙋ бл҃гоꙋгоди́въ, є҆ѵдокі́ме. тѣ́мже ѡ҆брѣ́лъ є҆сѝ нбⷭ҇нагѡ црⷭ҇твїѧ наслѣ́дїе, и҆ со ст҃ы́ми ны́нѣ живы́й, влⷣцѣ всѣ́хъ предстои́ши, твое́ же тѣ́ло скве́рны соблю́лъ є҆сѝ кромѣ̀, и҆ нерꙋши́мое любо́вїю чтꙋ́щымъ тѧ̀ ѡ҆ста́вилъ є҆сѝ. чи́стѡ бо пожи́въ, сла́вне, зижди́телю, всѣ́хъ благоꙋгоди́лъ є҆сѝ.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Крѣ́постїю вжили́всѧ живода́вца, пло́ти ᲂу҆держа́лъ є҆сѝ жела̑нїѧ, пребога́те, и҆ ᲂу҆́мъ впери́лъ є҆сѝ къ нбⷭ҇нымъ, поѧ̀ крѣ́пкѡ: сы́й бл҃гослове́нъ бг҃ъ и҆ препросла́вленъ.

Са́мъ сѧ̀ неблагоро́денъ сотво́рь, благоро́дны нра́вы стѧжа́въ ᲂу҆ма̀ цѣ́лостїю, поꙋче́нїемъ же ᲂу҆пражнѧ́ѧсѧ бг҃одохнове́нныхъ писа́нїй, всѐ твоѐ жела́нїе на бг҃а всеви́дца, бл҃же́нне, возложи́лъ є҆сѝ.

Вы́шнѧгѡ црⷭ҇тва, вы́шнѧгѡ же гра́да, бж҃їѧ раѧ̀, пра́ведныхъ наслажде́нїѧ, пи́щи нетлѣ́нныѧ, и҆ бога́тства некра́домагѡ, свѣ́та невече́рнѧгѡ сподо́билсѧ є҆сѝ, бл҃же́нне є҆ѵдокі́ме.

Бг҃оро́диченъ: Є҆го́же родила̀ є҆сѝ, влⷣчце, при́снѡ молѝ, ѿ рабо́ты и҆зба́вити мѧ̀ страсте́й и҆ ѡ҆сꙋжде́нїѧ, и҆ стꙋжа́ющагѡ мѝ лю́тагѡ ѿча́ѧнїѧ, и҆ ѿ ѡ҆скорблѧ́ющихъ мѧ̀, чⷭ҇таѧ, ѡ҆держа́нїѧ, бг҃ора́дованнаѧ.

Пѣ́снь и҃.

І҆рмо́съ: Въ пещѝ ѻ҆́трочестѣй проѡбрази́лъ є҆сѝ и҆ногда̀ твою̀ мт҃рь, гдⷭ҇и, ѻ҆́бразъ же сїѧ̀ и҆зъ ѻ҆гнѧ̀ и҆з̾има́ше, неѡпа́льнѡ входѧ́щыѧ: ю҆́же пое́мъ ꙗ҆́вльшꙋюсѧ тобо́ю концє́мъ дне́сь, и҆ превозно́симъ во всѧ̑ вѣ́ки.

Ѻ҆́гнь помышлѧ́ѧ стра́шный, предъ прⷭ҇то́ломъ хрⷭ҇то́вымъ, хотѧ́щъ и҆зы́ти, ᲂу҆миле́нїемъ се́рдца те́плы и҆злива́еши ка̑пли сле́зъ, погаша́ющыѧ тебѣ̀ страсте́й пе́щь, є҆ѵдокі́ме бг҃омꙋ́дре.

Всѐ приложи́лъ є҆сѝ къ бг҃ꙋ мꙋ́дре, дꙋше́вное ѻ҆́ко, и҆ томꙋ̀ прилѣпи́лсѧ є҆сѝ, вопїѧ̀ ѱало́мски: хрⷭ҇тѐ мо́й, ка́ла мѧ̀ и҆зба́ви, и҆ смертоно́сныхъ страсте́й во вѣ́ки.

Терпѣ́нїемъ пожда́тель, и҆ се́рдцемъ смире́нъ ты̀ бы́лъ є҆сѝ, ми́лостивъ тре́бꙋющымъ, и҆ ѻ҆бы́чай приносѧ̀ бла́гъ, и҆ нра́вы добродѣ́тельны, всече́стне, въ ни́хже до́брѣ пожи́въ, чꙋде́съ то́чиши благода́ть.

Ра́зꙋмъ и҆мѣ́ѧ бжⷭ҇твенъ, и҆спо́лнитель влⷣчнихъ ꙗ҆ви́лсѧ є҆сѝ слове́съ, десны́ѧ любѧ̀ стєзѝ, лѣ́выхъ ꙗ҆́вѣ ᲂу҆клонѧ́ѧсѧ ꙗ҆́кѡ бл҃гоꙋ́менъ и҆ мꙋ́дръ. тѣ́мже тѧ̀ почита́емъ бг҃омꙋ́дре во вѣ́ки.

Бг҃оро́диченъ: А҆да́мовъ содѣ́тель ѿ крове́й твои́хъ чⷭ҇тыхъ зи́ждетсѧ, и҆ млеко́мъ пита́етсѧ, пита́ѧй всѧ́кое дыха́нїе, дв҃о бцⷣе. тѣ́мже ꙗ҆́кѡ бж҃їю тѧ̀ сла́вимъ мт҃рь.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Ви́дѣти жела́ѧ сла́вꙋ бг҃а на́шегѡ, добродѣ́тельми бг҃оразꙋ́мїѧ тебѐ ᲂу҆добри́лъ є҆сѝ: и҆ свѣщено́сецъ во свѣ́тлый черто́гъ вше́лъ є҆сѝ, со а҆́гг҃лы живы́й, и҆ ꙗ҆снѣ́е наслажда́ешисѧ бг҃овидѣ́нїѧ.

Ꙗ҆́кѡ ᲂу҆́тро, ꙗ҆́кѡ со́лнце возсїѧ̀ па́мѧть твоѧ̀, сꙋ́щаѧ во мра́цѣ сердца̀ просвѣща́ющи: ты́ бо и҆ свѣ́та и҆ днѐ вои́стиннꙋ сы́нъ ꙗ҆ви́лсѧ є҆сѝ, бг҃омꙋ́дре є҆ѵдокі́ме. сегѡ̀ ра́ди тѧ̀ почита́емъ.

Мꙋ́дростїю ᲂу҆краша́емь, и҆ ра́зꙋмомъ просвѣще́нъ, смире́нїемъ се́рдца ᲂу҆добре́нъ, высото́ю житїѧ̀ сїѧ́ѧ, къ мы́слєннымъ преше́лъ є҆сѝ дворѡ́мъ: и҆дѣ́же на́съ помѧнѝ почита́ющихъ тѧ̀, є҆ѵдокі́ме.

Де́нь пра́зднественный и҆ по́льзы хода́тайственный честны́й тво́й соверша́емъ, ѿ землѝ преставле́нїѧ: ты́ бо гдⷭ҇ень ᲂу҆го́дникъ, и҆ тогѡ̀ за́повѣдей дѣ́латель ꙗ҆ви́лсѧ є҆сѝ непосты́денъ, досточꙋ́дне є҆ѵдокі́ме.

Бг҃оро́диченъ: Свѣ́та прїѧ́телище ᲂу҆тро́ба твоѧ̀ бы́сть, просвѣ́щшагѡ мі́ръ, бг҃ора́дованнаѧ: тѣ́мже молю́ тѧ ѻ҆каѧ́нный, свѣ́тлы зари̑ мѝ пода́ждь, мольба́ми, бг҃оневѣ́сто, є҆ѵдокі́ма бг҃омꙋ́драгѡ.

Свѣти́ленъ.

Ꙗ҆́коже со́лнце блиста́ѧ, зари̑ и҆спꙋща́еши чꙋде́съ, просвѣща́ѧ всѣ́хъ сердца̀, твою̀ сла́внꙋю па́мѧть творѧ́щихъ вѣ́рнѡ, треблаже́нне, и҆ спаса́еши, є҆ѵдокі́ме.