Канон святому мученику Лукиллиану Византийскому и иже с ним

Пе́снь 1.

Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Сло́ва тя́ Бо́жия уго́дника, му́чеников же сла́ву, воспева́ю, Лукиллиа́не, те́мже мне́ моли́твами твои́ми пода́ждь очище́ние злы́х и исцеле́ние.

Все́ю мы́слию же и душе́ю ве́сь прилепи́лся еси́ любви́ Христо́ве и и́дольския пре́лести, и не́мощи, му́дре, пренебре́гл еси́.

Па́че всея́ сла́вы земны́я томи́тельнаго безсла́вия жела́я, нестаре́емую сла́ву, богоблаже́нне, небе́сную насле́дил еси́.

Богоро́дичен: Ле́ствица, ю́же ви́де Иа́ков, Ты́ еси́, Богоро́дице: Тобо́ю бо су́щим на земли́ Сло́во соедини́ся и на высоту́ челове́ческое существо́ привлече́.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Иу́да предаде́ Изба́вителя Христа́ дре́вле богоуби́йцам, ты́ же ны́не беззако́нным иуде́ем пре́дан бы́л еси́.

Словесы́ тя́ льсте́ц прельсти́ти ласка́тельными покуша́яся, яви́ся твои́ми словесы́, я́коже ка́мением, страда́льче, бие́мь.

Свети́льник пресве́тел стра́ждущим с тобо́ю бы́л еси́, све́тло наставля́я на боже́ственныя стези́ та́мошняго наслажде́ния.

Богоро́дичен: Ми́лостиву бы́ти ми́ молю́ся, Твои́ми, Влады́чице, дерзнове́ньми, из Тебе́ рожде́нному, в де́нь Суда́.

Седа́лен, гла́с 1..

Огню́ приближа́яся, ника́коже опали́лся еси́, о Лукиллиа́не, страда́льче доблему́дренне, ро́су бо стяжа́л еси́ Бо́жию устужа́ющую. Те́мже соверши́л еси́ е́же па́че естества́ по́двиги, ра́дуяся со младе́нцы святы́ми, с ни́миже на́с помина́й.

Богоро́дичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим.

Крестобогоро́дичен: Зря́щи Тя́, Христе́, Всенепоро́чная Ма́ти ме́ртва на Кресте́ просте́рта, вопия́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние?

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Блиста́еши словесы́ твои́ми и просвеща́еши ми́р страда́нии твои́ми, мучи́телей же сопротивле́ние, я́ко мглу́, отгоня́еши, непостоя́нную.

Но́вый яви́лся еси́ ве́рою Авраа́м, и́же дре́вле оправда́ся о Христе́: позна́нием бо Зижди́теля твоего́ отве́ргл еси́ все́ су́етство.

Всегуби́теля тя́ ле́сти и боле́зненных страсте́й исцели́теля, ве́рнии, стяжа́вше, му́чениче сла́вне, насыща́емся всегда́ исцеле́ний.

Богоро́дичен: Па́че ума́ та́инство рождества́ Твоего́, Присноде́во: во утро́бе бо заче́нши Бо́га, неизрече́нным сло́вом породила́ еси́.

Пе́снь 5.

Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Еди́не врачу́ ду́ш и теле́с, Христе́, му́чеников мольба́ми страсте́й мои́х боле́зни исцели́.

Цве́т свяще́нен де́ланием Ду́ха показа́лся еси́, му́чениче сла́вне, благопло́дия во страда́ниих предлага́я.

Глаго́лы живо́тныя в се́рдцы име́я, му́дре, мучи́тельская преще́ния твои́м сопротивле́нием умертви́л еси́, сла́вне.

Богоро́дичен: Сте́ну необори́му, и приста́нище, и утверже́ние, и наде́жду, Богома́ти Чи́стая, и боже́ственное ору́жие иму́ще Тя́, спаса́емся.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Возвы́сив твое́ мы́сленно боже́ственное души́ жела́ние, ко огню́ томи́тельному де́рзостне устреми́лся еси́ и росо́ю Ду́ха с детьми́ прохлади́лся еси́, страда́льче всеблаже́нне.

Укрепи́вшися му́ченица му́драя Па́вла наказа́нии твои́ми, му́жествовавши терпели́вно на льсти́ваго и вене́ц прия́т пра́вды от руки́ Страстополо́жника Христа́.

Зря́ твое́ непрекло́нное, я́ко го́ру Сио́н неподви́жиму, не терпя́ше вра́г, но ве́сь посрами́ся и, к земли́ попира́емь, от тебе́, богому́драя, в по́двизе стира́ется.

Богоро́дичен: Зачала́ еси́ вои́стинну Боже́ственное Сло́во во утро́бе Твое́й и Сего́ па́че естества́ родила́ еси́, Пречи́стая, Его́же моли́твами Твои́ми ми́лостива сотвори́, от бе́д вся́ изба́вити рабы́ Твоя́.

Пе́снь 7.

Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

С Па́влом вопия́л еси́, му́чениче: не разлучи́т мя́ от любве́ Христо́вы ни беда́, ни ско́рбь, ни ра́ны, ни ме́чь. Те́мже и взыва́л еси́: оте́ц на́ших Бо́же, благослове́н еси́.

На ка́мени утверди́л еси́ испове́дания боже́ственнаго но́ги твоя́, непоколеби́мь яви́вся молво́ю бе́д. Те́мже взыва́л еси́: оте́ц на́ших Бо́же, благослове́н еси́.

Богоро́дичен: Изба́вихомся, Де́во, вси́ от страсте́й, и бе́д, и обстоя́ний, и неду́г многообра́зных мольба́ми Твои́ми, Пречи́стая Богома́ти, взыва́ющии: оте́ц на́ших Бо́же, благослове́н еси́.

Пе́снь 8.

Ирмо́с: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.

При боже́ственных я́ко вои́стинну исхо́дищах насажде́н бы́в ве́рою Госпо́днею, дре́во яви́лся еси́, преблаже́нне, живоно́сное.

Украси́вшеся страда́льцы добро́тою честна́го Христо́ва испове́дания, вене́ц с небесе́ прия́ша досто́йно.

Богоро́дичен: Прекло́ншагося боле́зньми и па́дшася, возста́ви мя́, Богома́ти, я́ко да Тя́ сла́влю во вся́ ве́ки.

Пе́снь 9.

Ирмо́с: Велича́ем Тя́, Всенепоро́чную Ма́терь Христа́ Бо́га на́шего, Юже осени́ Ду́х Святы́й.

Слове́снаго рая́ цве́ты, ви́дяще Христо́вы благово́нныя му́ченики дне́сь, хвала́ми велича́ем.

Светоно́сцы я́вльшеся и́стинно Це́ркве Христа́ Бо́га, му́ченицы сия́ют испове́дания све́том.

Страсте́й боле́зни моли́твами страстоте́рпец исцели́вый, и моя́ ны́не исцели́ боле́зни, Человеколю́бче.

Богоро́дичен: Тебе́, сте́ну, и покро́в, и небу́рное приста́нище, Всенепоро́чная, ве́рнии, стяжа́хом, Е́юже и спаса́емся.