Канон святому апостолу и евангелисту Матфею

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Бога́тнѡ пода́ждь мѝ все́льшꙋюсѧ въ тѧ̀ бл҃года́ть, матѳе́е всесла́вне, и҆ слꙋго̀ хрⷭ҇то́въ: да вопїю̀ свѣ́тлѡ проповѣ́даѧ, и҆ воспою̀ ра́дꙋѧсѧ твоѧ̑ чꙋдеса̀.

Весьма̀ ѡ҆ста́вилъ є҆сѝ земны́хъ смꙋще́нїе: сло́ва бо, ꙗ҆́кѡ ᲂу҆слы́шавъ вопло́щшагѡсѧ гла́съ, и҆ бл҃года́ти ꙗ҆ви́лсѧ є҆сѝ строи́тель, и҆ проповѣ́датель бг҃опрїѧ́тенъ, бг҃облаже́нне.

Самови́децъ бы́въ и҆ слꙋга̀ возсїѧ́вшагѡ сло́ва, а҆пⷭ҇ле, превѣ́чнагѡ ѻ҆ц҃а̀, и҆ проте́клъ є҆сѝ, тогѡ̀ прише́ствїе бл҃говѣствꙋ́ѧ всѣ̑мъ ꙗ҆зы́кѡмъ.

Бг҃оро́диченъ: Сме́рти потребле́нїе и҆ тлѝ разрꙋше́нїе, жи́зни же ꙗ҆вле́нїе, благовѣсти́лъ є҆сѝ, мꙋ́дре: дв҃а бо во ᲂу҆тро́бѣ заче́нши непости́жнаго, и҆ мі́ръ ѡ҆бновѝ.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ, сла́вы сподо́би.

Твоѧ̑ а҆пⷭ҇лы, сло́ве бж҃їй, свѣти́льники показа́лъ є҆сѝ жи́зни, мра́къ ѿгонѧ́ющыѧ безбо́жїѧ, влⷣко, и҆ бжⷭ҇твенною твое́ю сла́вою мі́ръ ве́сь просвѣща́ющыѧ.

Твои́мъ воѡрꙋжи́въ всеѻрꙋ́жїемъ матѳе́а хра́брѣйшаго, сп҃се, мꙋчи́телей крѣпча́йша сего̀ содѣ́ѧлъ є҆сѝ, влⷣко, и҆ потреби́телѧ показа́лъ є҆сѝ і҆́дѡльскїѧ ле́сти, чл҃вѣколю́бче.

Ѧ҆зы́ка твоегѡ̀ ѻ҆́гненнагѡ вѣща́нїе де́мѡнскаѧ пожжѐ ка̑пища, матѳе́е бг҃одохнове́нне, паракли́товъ ѻ҆рга́не, чрезъ є҆гѡ́же хрⷭ҇то́съ проповѣ́даетсѧ, всѣ́хъ жи́знь ѵ҆поста́снаѧ.

Бг҃оро́диченъ: Трꙋба̀ бг҃осло́внаѧ, вѣща́ющаѧ крѣ́пкѡ, просвѣтѝ лю́ди, матѳе́а бг҃омꙋ́драгѡ, трⷪ҇цы сїѧ́нїе, па́че ᲂу҆ма́ же воплоще́нїе сло́ва, и҆зъ тебє̀, пречⷭ҇таѧ.

Сѣда́ленъ, гла́съ и҃.

Во всѧ̑ концы̀ протечѐ мꙋ́дрыхъ твои́хъ глагѡ́лъ ꙗ҆́кѡ вои́стиннꙋ вѣща́нїе, всехва́льне гдⷭ҇ень а҆пⷭ҇ле, бг҃овидѣ́нїе всѣ̑мъ ꙗ҆́снѡ проповѣ́далъ є҆сѝ, и҆ ꙗ҆зы́кѡвъ неразꙋ́мїе, въ ра́зꙋмъ приве́лъ є҆сѝ. тѣ́мже і҆́дѡльское ѡ҆мраче́нїе ѿгна́въ, свѣ́тъ зна́нїѧ во тмѣ̀ сꙋ́щымъ возсїѧ́лъ є҆сѝ, матѳе́е всехва́льне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Сла́ва: Ꙗ҆́кѡ свѣти́льника свѣ́та и҆ ᲂу҆ч҃ника̀, ꙗ҆́кѡ самови́дца сло́ва бжⷭ҇твеннагѡ, всѝ хва́лимъ тѧ̀, гдⷭ҇ень а҆пⷭ҇ле: и҆́бо благода̑тныѧ твоѧ̑ мрє́жи простира́ѧ, словє́сныѧ ры̑бы ᲂу҆ловлѧ́еши повелѣ́нїемъ. тѣ́мже и҆ ꙗ҆зы́цы ᲂу҆ловлѧ́хꙋсѧ си́лою дх҃а, наставлѧ́еми вѣ́рою, неботаи́нниче всехва́льне: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

И҆ ны́нѣ: Ꙗ҆́кѡ всенепоро́чнаѧ невѣ́сто творца̀, ꙗ҆́кѡ неискꙋсомꙋ́жнаѧ мт҃и и҆зба́вителѧ, прїѧ́телище ꙗ҆́кѡ сꙋ́щи ᲂу҆тѣ́шителѧ, препѣ́таѧ, беззако́нїю мѧ̀ сꙋ́ща скве́рное ѻ҆би́телище, и҆ де́мѡнѡмъ и҆гра́лище въ ра́зꙋмѣ бы́вша, потщи́сѧ ѿ тѣ́хъ ѕлодѣ́йства мѧ̀ и҆зба́вити: и҆ свѣ́тлое жили́ще добродѣ́телей совершѝ, свѣтоно́снаѧ, нетлѣ́ннаѧ: ѿженѝ ѻ҆́блакъ страсте́й, и҆ вы́шнѧгѡ прича́стїѧ сподо́би, и҆ свѣ́та невече́рнѧгѡ, моли́твами твои́ми.

Пѣ́снь д҃.

І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Ѵ҆поста́сномꙋ твоемꙋ̀ сло́вꙋ, бж҃е, наꙋче́нъ, мїрскꙋ́ю мꙋ́дрость разрꙋшѝ бг҃ови́децъ ᲂу҆ч҃ни́къ, велегла́снѡ зовѧ̀ тебѣ̀: сла́ва си́лѣ твое́й, гдⷭ҇и.

Оу҆блаже́нномꙋ ѿ хрⷭ҇та̀, ко́е благохвале́нїе принесе́мъ тебѣ̀, бг҃оглаго́ливе; не мо́жетъ бо человѣ́къ цвѣтѧ́щїѧ на тебѣ̀ благода́ти сло́вомъ и҆зрещѝ, досточꙋ́дне.

Нескве́рный тво́й и҆ чи́стый ᲂу҆́мъ ви́дѣвъ высоча́йшїй, ꙗ҆́коже свѣщꙋ̀ на свѣ́щникъ высо́кїй, сꙋ́щымъ во тмѣ̀ свѣтѧ́щꙋю, всѣ̑мъ, бг҃оѧвле́нне, предложѝ.

Бг҃оро́диченъ: Оу҆мерщвле́нное є҆стество̀ человѣ́ческое, бл҃гослове́ннаѧ, возвы́сила є҆сѝ, ꙗ҆́кѡ высоча́йшагѡ ро́ждшаѧ крѣ́пость, па́че є҆стества̀, всепѣ́таѧ ѻ҆трокови́це, ꙗ҆́коже матѳе́й наꙋчѝ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Благода́ть прїе́мъ всест҃а́гѡ дх҃а, бжⷭ҇твенное ѻ҆би́телище показа́лсѧ є҆сѝ: бжⷭ҇твеннѡ наꙋчи́въ бг҃озна́нїѧ свѣ́тꙋ, ввѣ́ренъ бы́лъ догма́ты хрⷭ҇тѡ́вы письмє́ны и҆зложи́ти, ꙗ҆́кѡ самови́децъ бг҃оизбра́нный.

Ѧ҆зы́къ тво́й тро́сть паракли́та бы́сть, ско́рое и҆збавле́нїе даю́щагѡ позна́вшымъ влⷣчество є҆гѡ̀, и҆ мꙋ́дрыхъ вды́шꙋщагѡ дꙋша́мъ ра́зꙋмъ нбⷭ҇ный, ѽ матѳе́е всече́стне.

Сїѧ́юща чꙋдєсы̀ и҆ и҆сцѣле́нїй благода́тьми, тѧ̀ хрⷭ҇то́съ посла̀ мі́рꙋ, де́мѡнскꙋю попира́юща крѣ́пость, и҆ дꙋ́шы просвѣща́юща вѣ́рныхъ, всѣ́хъ пою́щихъ тѧ̀, ми́ра проповѣ́дника.

Бг҃оро́диченъ: Дв҃а родила̀ є҆сѝ сн҃а превѣ́чнаго, въ є҆стество̀ ѡ҆бле́кшасѧ человѣ́ческое, ꙗ҆́коже наꙋча́ѧ бг҃оглаго́ливый речѐ, и҆ спа́сшаго сїѐ ѿ тлѝ коне́чною благосты́нею, и҆ дв҃а пребыла̀ є҆сѝ.

Пѣ́снь ѕ҃.

І҆рмо́съ: Прїидо́хъ во глꙋбины̀ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.

Є҆ѵⷢ҇лі́стъ ѿ мы́тарства, ꙗ҆́кѡ послѣ́дова тебѣ̀, претвори́сѧ бг҃оглаго́ливый, всеси́льною твое́ю, вседѣ́телю, крѣ́постїю, матѳе́й всеизрѧ́днѣйшїй.

Оу҆правлѧ́етсѧ твоегѡ̀ благовѣ́стїѧ дꙋшепита́тельными словєсы̀ ꙗ҆зы́кѡвъ мно́жество, возвыша́емо къ добродѣ́телей высо́комꙋ верхꙋ̀, ѽ матѳе́е всеблаже́нне.

Матѳе́а ᲂу҆ловлѧ́ютсѧ бг҃оплете́нными ᲂу҆ч҃ника̀ мре́жами собо́ры вѣ́рꙋющихъ всегда̀, къ твоемꙋ̀ позна́нїю, бл҃годѣ́телю, наставлѧ́еми.

Бг҃оро́диченъ: Дв҃ꙋ ро́ждшꙋю восписꙋ́ѧ, благовѣствꙋ́етъ тѧ̀ всѧ́чєскаѧ сотво́ршаго, безъ сѣ́мене и҆ тлѝ, всенепоро́чнаѧ, матѳе́й всеизѧ́щнѣйшїй.

Конда́къ, гла́съ д҃.

Мыта́рства и҆́го ѿве́ргъ, пра́вды и҆́гꙋ припрѧ́глсѧ є҆сѝ, и҆ ꙗ҆ви́лсѧ є҆сѝ кꙋпе́цъ всеизрѧ́днѣйшїй, бога́тство прине́съ, ю҆́же съ высоты̀ премꙋ́дрость. ѿѻнꙋ́дꙋже проповѣ́далъ є҆сѝ и҆́стины сло́во, и҆ ᲂу҆ны́лыхъ воздви́глъ є҆сѝ дꙋ́шы, написа́въ ча́съ сꙋ́дный.

І҆́косъ:

Вра́жїе мꙋчи́тельство нꙋ́дитъ мѧ̀ несы́тнѡ, и҆ дꙋшѝ моеѧ̀ всѐ сѣ́мѧ восхища́етъ, матѳе́е, дрꙋ́же хрⷭ҇то́въ, но са́мъ сѣ́мѧ моли́твъ твои́хъ да́въ, ᲂу҆плодѝ къ твоемꙋ̀ слꙋже́нїю и҆ покажи́ мѧ пѣснопѣ́вца твоего̀ малѣ́йшаго, и҆ сказа́телѧ мно́гихъ твои́хъ и҆ вели́кихъ и҆справле́нїй: и҆ ко хрⷭ҇то́вѣ любвѝ, ка́кѡ, всѧ̑ а҆́бїе ѡ҆ста́вивъ, послѣ́довалъ є҆сѝ те́плѣ зва́вшемꙋ, пе́рвый бы́въ благовѣ́стникъ въ мі́рѣ, написа́въ ча́съ сꙋ́дный.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Бы́лъ є҆сѝ пе́рвагѡ ѡ҆сїѧ́нїѧ бжⷭ҇твенное и҆з̾ѡбраже́нїе, ꙗ҆́кѡ ᲂу҆чени́къ тогѡ̀ свѣтлостьмѝ распалѧ́емь, є҆мꙋ́же поѧ̀ глаго́лалъ є҆сѝ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Ꙗ҆́кѡ слꙋга̀ сло́ва, всеблаже́нне, въ бжⷭ҇твєнныѧ ѻ҆би́тєли, и҆дѣ́же хрⷭ҇то́съ ѡ҆бита́етъ, ты̀ всели́лсѧ є҆сѝ, ꙗ҆́коже тебѣ̀ ѻ҆бѣща̀ пребжⷭ҇твенный ѻ҆тцє́въ гдⷭ҇ь и҆ бг҃ъ є҆ди́нъ всѣ́хъ.

Недꙋ́зи, матѳе́е, ѿго́нѧтсѧ и҆ ѿбѣга́етъ мно́жество де́мѡнѡвъ, сꙋ́щими въ тебѣ̀ дарова́ньми бжⷭ҇твеннагѡ дх҃а, въ ни́хже пѣ́лъ є҆сѝ: препѣ́тый ѻ҆тцє́въ, гдⷭ҇ь и҆ бг҃ъ, бл҃гослове́нъ є҆сѝ.

Бг҃оро́диченъ: Всепѣ́тꙋю дв҃ꙋ написа́лъ є҆сѝ бжⷭ҇твенными твои́ми словєсы̀, творца̀ всѣ́хъ ро́ждшꙋю, а҆пⷭ҇ле, є҆мꙋ́же всѝ пое́мъ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Пѣ́снь и҃.

І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Манове́ньми, ꙗ҆̀же въ тебѣ̀, неѡсла́бными, матѳе́й свѧще́ннѣйшїй ѡ҆божа́емь, положе́нїемъ же бы́въ, є҆стество́мъ є҆́же бы́лъ є҆сѝ, вселе́ннꙋю, влⷣко, привлечѐ, пѣ́ти тебѣ̀: гдⷭ҇а по́йте дѣла̀ и҆ превозноси́те во всѧ̑ вѣ́ки.

Ꙗ҆́коже мо́лнїю вселе́ннѣй, сло́во бг҃осло́ва посла̀, мра́къ ᲂу҆́бѡ ѿгонѧ́ща, ꙗ҆зы́ки же просвѣща́юща бг҃осло́вїѧ догма̑ты. тѣ́мже и҆ поѧ́ше: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Сло́вомъ чи́стымъ и҆ ᲂу҆мо́мъ бг҃ъ съ тобо́ю бесѣ́довалъ є҆́сть: ти́нꙋ бо ꙗ҆́кѡ и҆зсѣ́клъ є҆сѝ, томꙋ̀ прибли́жилсѧ є҆сѝ и҆ примѣси́лсѧ є҆сѝ, сла́вне. тѣ́мже и҆ пое́ши: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Бг҃оро́диченъ: На благодѣѧ́нїе человѣ́кѡвъ сло́во воплоти́тисѧ и҆зво́ли: две́рь бо дѣ́вства про́йде гдⷭ҇ь, и҆ бцⷣꙋ показа̀. тѣ́мже зове́мъ: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ. ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Добро́ты ᲂу҆́мныѧ прїѧ́лъ є҆сѝ дїади́мꙋ бжⷭ҇твеннꙋю а҆пⷭ҇ле, и҆ црⷭ҇твїѧ же благолѣ́пнѣйшимъ вѣнце́мъ ᲂу҆краси́лсѧ є҆сѝ, десни́цею вседержи́телевою, и҆ свѣ́тишисѧ, мꙋ́дре, со а҆́гг҃лы престо́лꙋ предстоѧ̀ влⷣки хрⷭ҇та̀, всеблаже́нне.

Дре́ва жи́зни досто́йнѡ полꙋчи́лъ є҆сѝ, проповѣ́дникъ жива́гѡ бг҃а, благовѣствова́въ жи́знь мі́рꙋ бжⷭ҇твенное посѣще́нїе: са́домъ бо зна́нїѧ не растли́лъ є҆сѝ ᲂу҆́мъ, пребы́въ незы́бленъ и҆ неколе́бленъ цр҃кве степе́нь, всебл҃же́нне.

Невѣ́стꙋ хрⷭ҇то́вꙋ бжⷭ҇твеннѡ ᲂу҆краси́лъ є҆сѝ є҆ѵⷢ҇лїемъ твои́мъ, ꙗ҆́кѡ дїади́мою, цр҃ковь, бг҃облаже́нне, и҆ ны́нѣ бжⷭ҇твеннꙋю твою̀ па́мѧть торжествꙋ́етъ свѣ́тлѡ, ю҆́же и҆зба́вити всѧ́кагѡ ѡ҆бстоѧ́нїѧ и҆ бѣ́дъ лю́тыхъ, молѝ матѳе́е а҆пⷭ҇ле.

Бг҃оро́диченъ: Нѣ́дръ не ѿстꙋпи́въ безнача́льнагѡ роди́телѧ сло́во безнача́льное, ꙗ҆́коже благовѣствꙋ́етъ матѳе́й, пишѧ̀, бг҃ъ воплоти́сѧ и҆зъ тебє̀, чⷭ҇таѧ всепѣ́таѧ, въ человѣ́чь ѻ҆́бразъ всеѻбра́знѡ ве́сь ѡ҆дѣ́ѧвсѧ, и҆ тогѡ̀ прїе́мъ свѡ́йства.

Свѣти́ленъ.

Сказа̀ на́мъ бжⷭ҇твєннаѧ чꙋдодѣѧ̑нїѧ, сла́вный хрⷭ҇то́ва є҆ѵⷢ҇лїа списа́тель, матѳе́й бг҃опрїѧ́тный: є҆го́же, любо́вїю чтꙋ́ще, благосочета́ннѡ воспои́мъ.

Сла́ва: Мыта́рства и҆́го ѿве́ргъ разꙋ́мнѡ, хрⷭ҇тꙋ̀ послѣ́довалъ є҆сѝ, ѽ матѳе́е бг҃омꙋ́дре! слѣдѡ́мъ же тогѡ̀ чꙋ́днѡ послѣ́дꙋѧ, въ прича́стїи бы́лъ є҆сѝ тогѡ̀ црⷭ҇твїѧ, и҆ сла́вы ѻ҆́бщникъ, и҆ таи́нникъ неизрече́нныхъ.

И҆ ны́нѣ: Всест҃ы́ѧ рꙋ́ки твоѧ̑, бцⷣе дв҃о, и҆́миже зижди́телѧ носи́ла є҆сѝ, поднесѝ въ моли́твꙋ ѡ҆ на́съ къ немꙋ̀, ꙗ҆́кѡ да и҆зба́витъ ны̀ всѧ́кихъ и҆скꙋше́нїй дїа́вольскихъ, и҆ полꙋчи́ти бꙋ́дꙋщихъ ѻ҆́ныхъ бла̑гъ сподо́битъ, всепѣ́таѧ.