Канон святителю Сильвестру I, папе Римскому

Пѣ́снь а҃.

І҆рмо́съ: Посѣ́ченый несѣко́маго пресѣчѐ, и҆ ви́дѣ со́лнце зе́млю, ю҆́же не ви́дѣ, лю́таго врага̀ вода̀ потопѝ, и҆ непроходи́мое про́йде і҆и҃ль. Пѣ́снь же воспѣва́шесѧ: гдⷭ҇еви пои́мъ, сла́внѡ бо просла́висѧ.

Сн҃оположи́всѧ бл҃года́тїю, сїльве́стре, бг҃ꙋ ѻ҆ц҃ꙋ̀, чи́сто житїѐ ѡ҆блобыза́въ, и҆ бжⷭ҇твенными блиста̑нїи дꙋше́ю свѣтови́дѣнъ бы́въ, преше́лъ є҆сѝ къ свѣ́тꙋ, зовы́й, невече́рнемꙋ: гдⷭ҇ꙋ воспои́мъ, сла́внѡ бо просла́висѧ.

Велемꙋ́дреннѡ стра̑сти ᲂу҆держа́лъ є҆сѝ, и҆ пло́ть по́стнымъ житїе́мъ повинꙋ́лъ є҆сѝ дꙋ́хꙋ, мꙋ́дре, и҆ бжⷭ҇твенное жили́ще трⷪ҇цы бы́въ свѣ́тло, лꙋка́вствїѧ дꙋ́хи, гдⷭ҇ꙋ поѧ̀, смири́лъ є҆сѝ, сла́внѡ бо просла́висѧ.

Зако́нꙋ бжⷭ҇твенномꙋ бжⷭ҇твеннѣ повинꙋ́ѧсѧ, и҆ бг҃одꙋхнове́ннагѡ писа́нїѧ ра́зꙋмомъ ᲂу҆кра́шенъ, є҆́ллинскїѧ мꙋдрецы̀ и҆́стиннѣ наказа́лъ є҆сѝ, хрⷭ҇та̀ и҆сповѣ́дати со ѻ҆ц҃е́мъ и҆ дх҃омъ, вопїю́щыѧ: гдⷭ҇ꙋ воспои́мъ, сла́внѡ бо просла́висѧ.

Во ѵ҆поста́си є҆ди́нѣй познава́ема, вопло́щшагосѧ хрⷭ҇та̀, блаже́нне, проповѣ́далъ є҆сѝ во двꙋ́хъ во́лѧхъ и҆ дѣ́йствїихъ, сїльве́стре, разꙋмѣва́ема, и҆ вѣ́рою томꙋ̀ ѡ҆божи́вша зовꙋ́щыѧ: гдⷭ҇ꙋ воспои́мъ, сла́внѡ бо просла́висѧ.

Бг҃оро́диченъ: Да ни̑жнїѧ съ вы́шними совокꙋпи́тъ, є҆ди́ный всѣ́хъ бг҃ъ, во чре́во неискꙋсобра́чныѧ вни́де, и҆ въ подо́бїи пло́тстѣмъ ꙗ҆ви́сѧ, вражды̀ средогра́дїе разо́рь, ми́ръ введѐ, и҆ жи́знь подадѐ, и҆ бжⷭ҇твенное и҆збавле́нїе.

Пѣ́снь г҃.

І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Оу҆ма̀ чистотꙋ̀ стѧжа́въ, ст҃и́тель бы́лъ є҆сѝ, пома́занїе ст҃о́е воспрїе́мъ. Тѣ́мъ тѧ̀, бг҃оно́се ѻ҆́тче, восхвалѧ́емъ.

На крестѣ̀ просте́ршаго дла̑ни пло́тїю бг҃а сло́ва ᲂу҆ѧсни́лъ є҆сѝ слове́сными твои́ми показа́ньми, и҆ і҆ꙋде́йское сꙋровство̀ погꙋби́лъ є҆сѝ, всебл҃же́нне.

Въ чꙋдесѣ́хъ вели́къ бы́въ, ѿгонѧ́еши дꙋ́хи, и҆ ѡ҆чища́еши недꙋ́ги вѣ́рою просѧ́щымъ, сїльве́стре бг҃омꙋ́дре.

Бг҃оро́диченъ: Дв҃а чⷭ҇таѧ по ржⷭ҇твѣ̀ всест҃а́ѧ пребыла̀ є҆сѝ, бг҃а бо сло́ва родила̀ є҆сѝ, на́мъ ᲂу҆подо́бльшасѧ, кромѣ̀ грѣха̀.

И҆́нъ. конда́къ, гла́съ д҃.

Ꙗ҆́кѡ ѕвѣздꙋ̀ тѧ̀ вселе́ннѣй, ст҃ѣ, ꙗ҆вѝ и҆́же сла́вы гдⷭ҇ь, добродѣ́тєли предложи́въ па́че денни́цы, блаже́нне. свѣ́тъ бо є҆сѝ на́мъ, ѻ҆́тче сїльве́стре.

Сѣда́ленъ, гла́съ и҃.

Рѣка̀ бл҃гоче́стїѧ ꙗ҆ви́всѧ, ᲂу҆че́нїй твои́хъ стрꙋѧ́ми всю̀ зе́млю напои́лъ є҆сѝ, сїльве́стре, ꙗ҆́кѡ ст҃и́тель бж҃е́ственный, и҆ чꙋде́съ тꙋ́чами страсте́й скве́рнꙋ ѡ҆мы́лъ є҆сѝ, и҆ пи́щный пото́къ досто́йнѡ наслѣ́довалъ є҆сѝ. Тѣ́мже соше́дшесѧ бл҃гоче́стнѡ тѧ̀ чти́мъ пѣ́сньми дне́сь, и҆ вѣ́рнѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть твою̀.

Сла́ва, и҆ ны́нѣ: Неви́димый бж҃е, непостижи́мый сло́ве, роди́лсѧ є҆сѝ ѿ ѻ҆ц҃а̀ па́че є҆стества̀ и҆ сло́ва: па́ки же въ послѣ̑днѧѧ ѿ дв҃ы, не и҆змѣни́въ є҆́же бѣ̀, грѧде́ши и҆ во стрꙋѧ́хъ і҆ѻрда́нскихъ ны́нѣ крⷭ҇ти́тисѧ пло́тїю, бл҃говоли́вый сп҃стѝ, ꙗ҆́кѡ бг҃ъ, ро́дъ человѣ́ческїй.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Свѧти́тель бг҃опрїѧ́тенъ, помазꙋ́ѧ сщ҃е́нники бжⷭ҇твеннымъ дх҃омъ, показа́лсѧ є҆сѝ, ѻ҆́тче сїльве́стре, и҆ лю́ди просвѣща́ѧй, свѧще́ннѣйше.

Содѣ́йствомъ дх҃а недꙋ́ги ѿгонѧ́ѧ, стра̑сти неисцѣ̑льныѧ и҆сцѣли́лъ є҆сѝ, пребога́те, ѡ҆браща́ѧ ѿ ле́сти заблꙋждє́нныѧ.

Є҆ресе́й, сїльве́стре, ле́сть ѿгна́лъ є҆сѝ, па́ствꙋ ᲂу҆па́слъ є҆сѝ на вода́хъ бл҃гоче́стїѧ, на ѕла́цѣ бжⷭ҇твеннагѡ позна́нїѧ.

И҆злїѧ́сѧ во ᲂу҆стна́хъ твои́хъ бл҃года́ть бжⷭ҇твеннагѡ дх҃а: сегѡ̀ ра́ди тѧ̀ свѧще́нника лю́демъ свои̑мъ бг҃ъ, всебл҃же́нне ѻ҆́тче, пома́за.

Бг҃оро́диченъ: И҆сцѣлѝ, ѻ҆трокови́це, ꙗ҆́звы се́рдца моегѡ̀, и҆ наведѝ дꙋшѝ моеѧ̀ движє́нїѧ къ бж҃їимъ, дв҃о, хотѣ́нїємъ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Плете́ньми твои́хъ слове́съ, ве́сь разрѣши́лъ є҆сѝ сꙋ́етенъ соꙋ́зъ, и҆ къ бж҃е́ственнѣй вѣ́рѣ, ле́стїю свѧ̑занныѧ свѧза́лъ є҆сѝ, ѿверза́ѧ, ѻ҆́тче, си́хъ ᲂу҆́мъ прочита́нїемъ писа́нїй, ст҃и́телю бл҃же́нне.

Се́рдце твоѐ, ѻ҆́тче, непоро́чно бы́сть во ѡ҆правда́нїихъ ѻ҆́бщагѡ влⷣки, є҆гѡ́же вожделѣ́въ, пло́ть ᲂу҆держа́лъ є҆сѝ, и҆ чꙋде́съ бл҃года́тїю ѡ҆бога́щсѧ, недꙋ́ги и҆сцѣлѧ́ти и҆ дꙋшє́вныѧ лю̑тыѧ ꙗ҆́звы.

Бѣсѧ̑щаѧсѧ сердца̀ недꙋ́гомъ дꙋшегꙋ́бнымъ, лю̑тыѧ є҆́рєси го́рькагѡ ма́нента, ско́рыми лѣчба́ми слове́съ твои́хъ, бг҃оно́се, ᲂу҆ста́вилъ є҆сѝ, ꙗ҆́кѡ вра́чь, бл҃года́тїю бж҃е́ственною честны́мъ ѿгна́лъ є҆сѝ дх҃омъ.

Бг҃оро́диченъ: Ра́дꙋйсѧ, є҆ди́на ро́ждшаѧ преси́льнаго, пло́тїю ѡ҆бнища́вшаго: ра́дꙋйсѧ, па́дшагѡ мі́ра и҆справле́нїе, всенепоро́чнаѧ: ра́дꙋйсѧ, печа́ли разрѣше́нїе: ра́дꙋйсѧ, вѣ́рныхъ спасе́нїе: ра́дꙋйсѧ, престо́ле бж҃їй превысо́кїй.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Неисхо́дна и҆ въ темни́цѣ вѣ́чнѣ затворе́нна содѣ́лалъ є҆сѝ моли́твами твои́ми лꙋка́ваго, погꙋблѧ́ющаго за́вистїю приходѧ́щыѧ, бл҃же́нне, ѕмі́ѧ, и҆ ꙗ҆́кѡ двє́ри же, и҆ ꙗ҆́кѡ верєѝ, крⷭ҇та̀ зна́менїе положи́въ.

Глагѡ́лъ твои́хъ медото́чныхъ вѣща́нїе, во всѧ́чєскаѧ и҆зы́де, всебл҃же́нне, и҆ ᲂу҆че́нїй въ концы̀ всеѧ̀ вселе́нныѧ сїѧ́нїе ѡ҆блиста̀, чꙋде́съ же свѣ́тлость, и҆ дѣ́лъ бжⷭ҇твенное показа́нїе.

И҆сцѣлє́нїѧ и҆ дарова̑нїѧ бжⷭ҇твєннаѧ тꙋ́чами и҆сточа́ѧ бога́тнѡ вседѣ́телѧ, ст҃и́телю всебл҃же́нне, и҆ всест҃а́гѡ всегда̀ дх҃а вѣ́рою тебѣ̀ чи́стою пристꙋпа́ющыѧ цѣли́ти бл҃года́тїю.

Бг҃оро́диченъ: Разꙋмѣ́вше бг҃оглаго́ливїи прⷪ҇ро́цы та́инства твоегѡ̀, дв҃о, глꙋбинꙋ̀, прⷪ҇ро́чески провозвѣсти́ша сїѐ, наставлѧ́еми бж҃е́ственнымъ дх҃омъ: и҆ ны́нѣ мы̀, прера́достнѡ сбытїѧ̑ зрѧ́ще вѣ́рꙋемъ.

Конда́къ, гла́съ д҃.

Во сщ҃е́нницѣхъ сщ҃е́нникъ ꙗ҆ви́лсѧ є҆сѝ, цр҃ѧ̀ и҆ бг҃а, бг҃оно́се, по́стникѡмъ собесѣ́дникъ бы́въ: ѿѻнꙋ́дꙋже сра́дꙋешисѧ ны́нѣ ликѡ́мъ а҆́гг҃льскимъ, ѻ҆́тче, веселѧ́сѧ въ нбⷭ҇ныхъ, сїльве́стре, сла́вне па́стырю, спаса́й любо́вїю соверша́ющыѧ па́мѧть твою̀.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.

Пра́ведникъ, ꙗ҆́коже фі́нїѯъ, въ домꙋ̀ гдⷭ҇ни, ѻ҆́тче, процвѣ́лъ є҆сѝ плоды̀ пра́вды, и҆́миже чтꙋ́щїи тѧ̀ пита́ютсѧ, пою́ще: ѻ҆тцє́въ на́шихъ бж҃е, бл҃гослове́нъ є҆сѝ.

Крѣ́пкими твои́хъ слове́съ ꙗ҆вле́ньми ѡ҆бличи́лъ є҆сѝ сꙋемꙋ́дренники, недꙋ́гꙋющыѧ невѣ́рїемъ, и҆ ра́дꙋѧсѧ пое́ши, пресла́вне сїльве́стре: ѻ҆ц҃є́въ на́шихъ бж҃е, бл҃гослове́нъ є҆сѝ.

Пребыва́етъ сла́ва во вѣ́ки твоѧ̀, ѻ҆́тче, и҆ па́мѧть со всѣ́ми првⷣными, съ ни́ми же на́съ, вѣ́рою пою́щихъ, помина́й: ѻ҆ц҃є́въ на́шихъ бж҃е, бл҃гослове́нъ є҆сѝ.

Сла́вный свѧти́тель, дх҃о́вною заре́ю просвѣща́емь, тьмꙋ̀ ѕло́бы разорѝ, и҆ всѧ̑ пою́щыѧ просвѣтѝ: ѻ҆ц҃є́въ на́шихъ бж҃е, бл҃гослове́нъ є҆сѝ.

Бг҃оро́диченъ: Пречꙋ́днаѧ ѻ҆трокови́це, сꙋ́щаго пре́жде всѣ́хъ вѣкѡ́въ родила̀ є҆сѝ, на́мъ ᲂу҆подо́бльшагосѧ, за кра́йнее бл҃гоꙋтро́бїе, да спасе́тъ пою́щыѧ: ѻ҆ц҃є́въ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои́мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Є҆ди́но є҆стество̀, ѻ҆́тче, є҆ди́нагѡ бжⷭ҇тва̀ бг҃осло́вивъ, въ тре́хъ ли́цѣхъ разꙋмѣва́емаго пѣ́лъ є҆сѝ непреста́ннѡ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

И҆́стины, ѻ҆́тче, и҆́стиненъ ᲂу҆чи́тель наре́клсѧ є҆сѝ. тѣ́мже лжеиме́нныѧ лє́сти ѡ҆бличи́лъ є҆сѝ ле́сть, поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Верхо́вникъ ꙗ҆ви́лсѧ є҆сѝ свѧще́ннагѡ собо́ра, сщ҃еннотаи́нниче, и҆ верхо́внагѡ ᲂу҆ченикѡ́въ ᲂу҆краси́лъ є҆сѝ престо́лъ, вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Добродѣ́тельми бжⷭ҇твенными, ѻ҆́тче, се́рдце твоѐ ᲂу҆добри́лъ є҆сѝ, ве́сь ᲂу҆краси́всѧ, и҆ съ вы́шними чи́нми, вопїѧ̀, совокꙋпи́лсѧ є҆сѝ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Глаго́лѡмъ твои̑мъ бжⷭ҇твєннымъ послѣ́дꙋюще ро́ди человѣ́честїи, ᲂу҆блажа́емъ тѧ̀ приснобл҃же́ннꙋю, и҆ воспѣва́емъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Свѧще́нствовавъ ᲂу҆се́рднѡ самаго̀ себѐ, всеблаже́нне, сласте́й ᲂу҆мерщвле́нїемъ, и҆ бы́лъ є҆сѝ на́съ ра́ди ᲂу҆мертви́вшемꙋсѧ же́ртва бл҃гопрїѧ́тна.

Ꙗ҆́кѡ бжⷭ҇твенный верхо́вникъ сщ҃е́нныхъ ѻ҆тцє́въ, сщ҃е́нное ᲂу҆че́нїе ᲂу҆тверди́въ, є҆ретїкѡ́въ загради́лъ є҆сѝ безбѡ́жнаѧ ᲂу҆ста̀.

Совокꙋпи́лсѧ є҆сѝ съ ли̑ки безпло́тныхъ, безплѡ́тныѧ врагѝ съ тѣ́ломъ свѣ́тлѡ, ст҃и́телю, побори́въ.

Па́мѧть твоѧ̀ мі́рꙋ, ѻ҆́тче ст҃и́телю, ꙗ҆́кѡ свѣтоза́рное возсїѧ̀ сл҃нце, свѣтоводѧ́щи вѣ́рою восхвалѧ́ющыѧ тѧ̀.

Бг҃оро́диченъ: Бл҃голюби́ваѧ дв҃о, ѡ҆ѕло́бленнꙋю грѣхмѝ дꙋ́шꙋ мою̀ ᲂу҆блажѝ, бл҃га́го ро́ждшаѧ бг҃а и҆ гдⷭ҇а.