Канон святителю Григорию Акрагантийскому

Пѣ́снь а҃.

І҆рмо́съ: Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.

Зарѧ́ми дх҃а просвѣща́емь при́снѡ, свѧще́нне григо́рїе, и҆ свѣтоза́рна ѕвѣзда̀ бы́въ, всего́ мѧ ѡ҆зарѝ моли́твами твои́ми, ꙗ҆́кѡ да воспою́ тѧ.

И҆́же предвѣ́децъ всѣ́хъ, ѡ҆благода́тствивъ ᲂу҆́мъ тво́й бг҃ода́нными сїѧ́ньми, ѿ пеле́нъ тѧ̀ ѡ҆свѧща́етъ, бжⷭ҇твенными добродѣ́тельми сїѧ́ти хотѧ́ща, ѻ҆́тче, и҆ чꙋдесы̀.

Дрема́нїе ѿ вѣ́ждей ᲂу҆ны́нїѧ ѿве́ргъ, свѣти́льникъ бо́дрый ты̀ ꙗ҆ви́лсѧ є҆сѝ, бг҃оно́се, показа́въ вещмѝ зва́нїе твоѐ, григо́рїе и҆́стинствꙋющее.

Бг҃оро́диченъ: Бцⷣꙋ тѧ̀ госпо́дственнѡ и҆ и҆́стиннѡ и҆сповѣ́дꙋю: родила́ бо є҆сѝ гдⷭ҇а несказа́ннѡ, во двꙋ̀ сꙋщества́хъ и҆ хотѣ́нїихъ, пречⷭ҇таѧ дв҃о, разꙋмѣва́ема.

Пѣ́снь г҃.

І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.

Сегѡ̀ ра́ди тво́й прїе́мъ, ѻ҆́тче, трꙋ́дъ зижди́тель, ста́рцꙋ приведе́ тѧ въ пꙋсты́ню, ᲂу҆ча́щꙋ тѧ̀, григо́рїе, всѧ́кагѡ писа́нїѧ сказа́нїю.

Всю̀ провожда́ѧ седми́цꙋ безпи́щенъ, ѻ҆́тче, пита́лсѧ є҆сѝ снѣ́дїю нбⷭ҇ною, твои́хъ сле́зъ дожде́мъ напаѧ́емь, и҆ бжⷭ҇твеннѡ наслажда́емь.

Ѿ бг҃а тебѣ̀, і҆ера́рше, простра́нство се́рдца даде́сѧ: и҆сточи́лъ бо є҆сѝ бога́тнѡ ᲂу҆че́нїй чистѣ́йшыѧ вѡ́ды, сердца̀ вѣ́рныхъ напаѧ́ющыѧ.

Бг҃оро́диченъ: Глаго́лы проповѣ́дникѡвъ бг҃оглаго́ливыхъ и҆спо́лнишасѧ: се́ бо родѝ дв҃а мла́до ѻ҆троча̀, а҆да́ма дре́внѣйшее и҆ сопресто́льное роди́телю.

Конда́къ, гла́съ д҃.

Свѣтолꙋ́чными сїѧ̑нїи цр҃ковь ст҃а́гѡ дх҃а свѣтово́дитъ свѣ́тлое соверша́ющыѧ твоѐ ᲂу҆спе́нїе, прпⷣбне ѻ҆́тче всеблаже́нне григо́рїе.

Сѣда́ленъ, гла́съ и҃:

Ѿ пеле́нъ гдⷭ҇ꙋ возложе́нъ, ꙗ҆́кѡ дре́вле пресла́вный самꙋи́лъ, та́кожде зовꙋ́щагѡ тѧ̀ сп҃са послꙋ́шалъ є҆сѝ, и҆ дꙋ́шꙋ ѡ҆чи́стивъ до́брыхъ подаѧ́ньми, свѧще́нства благода́ть досто́йнѡ взѧ́лъ є҆сѝ. тѣ́мже на ѕла́цѣ бжⷭ҇твеннагѡ зна́нїѧ па́ствовавъ па́ствꙋ, врачева́нїй и҆зблиста́лъ є҆сѝ дѣ̑йства, григо́рїе: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Сла́ва, и҆ ны́нѣ: Дв҃де, пред̾идѝ въ хра́мъ бж҃їй, и҆ ра́дꙋѧсѧ прїимѝ цр҃и́цꙋ на́шꙋ, и҆ то́й возопі́й: вни́ди, гпⷭ҇жѐ, въ хра́мъ цр҃е́въ, вни́ди: є҆ѧ́же сла́ва покрове́ннѡ разꙋмѣ́етсѧ, и҆зъ неѧ́же хо́щетъ и҆сточи́тисѧ на́мъ всѣ̑мъ свѣ́тъ, хрⷭ҇то́съ.

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы проше́лъ є҆сѝ вопло́щсѧ. сла́ва снизхожде́нїю твоемꙋ̀, хрⷭ҇тѐ, сла́ва си́лѣ твое́й.

Землѧ̀ ꙗ҆́кѡ добра̀, процвѣ́лъ є҆сѝ стори́чествꙋющїй, ѻ҆́тче, кла́съ, и҆ серпо́мъ твои́хъ ᲂу҆че́нїй пожа́лъ є҆сѝ є҆реті́ческое ѕлочести́вое мнѣ́нїе, собо́ра побо́рникъ ꙗ҆ви́всѧ, прпⷣбне григо́рїе.

Нбⷭ҇ный тѧ̀ сꙋ́дъ а҆рхїере́а, бж҃їй ᲂу҆го́дниче, показꙋ́етъ до́брѣ пꙋтево́дствити па́ствꙋ, ю҆́же стѧжа̀ кро́вїю хрⷭ҇то́съ, провѣ́дый твоеѧ̀ дꙋшѝ, ѻ҆́тче, свѣ́тлость.

Хра́мъ бж҃їй бы́лъ є҆сѝ ѡ҆чище́нъ страсте́й скве́рны, и҆ въ хра́мѣ свѧще́ннѣмъ предстоѧ̀, дх҃а прише́ствїе прїѧ́лъ є҆сѝ ꙗ҆́вѣ, ви́домъ чⷭ҇тыѧ голꙋби́цы, хрⷭ҇тꙋ́ тѧ просла́вльшꙋ.

Бг҃оро́диченъ: Ро́дъ человѣ́ческїй спасе́сѧ, па́че ᲂу҆ма̀ твои́мъ рождество́мъ: и҆ сꙋ́щїи во тмѣ̀ тлѣ́нїѧ, пречⷭ҇таѧ влⷣчце, ви́дѣша свѣ́тъ возсїѧ́вшїй и҆зъ чре́ва твоегѡ̀, вино́внагѡ на́шегѡ, ѻ҆трокови́це, воззда́нїѧ.

Пѣ́снь є҃.

І҆рмо́съ: Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.

Глаго́ломъ твои́мъ ѡ҆чища́еши смра̑дныѧ не́мѡщи прокаже́ннагѡ и҆ногда̀, прише́дшагѡ къ тебѣ̀ вѣ́рою: ѿ бг҃а бо прїѧ́лъ є҆сѝ благода́ть чꙋде́съ, мꙋ́дре, ꙗ҆́коже є҆лїссе́й бжⷭ҇твенный, бг҃омꙋ́дре григо́рїе.

Ѿве́рзлъ є҆сѝ моли́твою твое́ю гꙋгни́вагѡ ᲂу҆ста̀ и҆ ᲂу҆́ши, григо́рїе, врачева́нїй, всеблаже́нне, дѣ́йствомъ ѡ҆богати́лсѧ є҆сѝ, и҆ и҆зры́гнꙋлъ є҆сѝ бг҃осло́вїѧ глꙋбинꙋ̀, морѧ̀ безбо́жныхъ и҆зсꙋша́ющꙋ.

Земна́гѡ пристра́стїѧ ѡ҆чи́щсѧ, ѻ҆́тче, ꙗ҆́кѡ пе́тръ первоизбра́нный а҆пⷭ҇лѡвъ, сѣ́нїю твое́ю цѣлє́нїѧ соверша́еши, содержи̑мыѧ лю́тыми недꙋ́гѡвъ нападе́ньми бжⷭ҇твеннѡ врачꙋ́ѧ.

Бг҃оро́диченъ: Нѣ́дръ ѻ҆ч҃ескихъ не и҆стощи́въ, во є҆́же воплоща́тисѧ, всенепоро́чнаѧ, въ твои́хъ нѣ́дрѣхъ ви́дитсѧ держи́мь, ꙗ҆́кѡ млⷣнецъ: є҆го́же ми́лостива сотворѝ, благоче́стнѡ тѧ̀ чтꙋ́щымъ, дв҃о бг҃оневѣ́сто.

Пѣ́снь ѕ҃.

І҆рмо́съ: Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви, ꙗ҆́кѡ человѣколю́бецъ, и҆ ᲂу҆пра́ви живо́тъ мо́й, молю́сѧ.

Оу҆крѣплѧ́етсѧ ѻ҆трокови́ца, тѣ́ломъ разсла́бленнаѧ въ лѣ́тѣхъ мно́жайшихъ, моли́твою твое́ю, прпⷣбне, вѣ́рнѡ прише́дши къ тебѣ̀, и҆ вино́внаго всѣ́хъ велича́етъ хрⷭ҇та̀.

Стопа́мъ послѣ́дꙋѧ влⷣчнимъ, житїе́мъ непоро́чнымъ, сла́вне, непра́веднѣ ѡ҆скорблѧ́емь и҆ ѡ҆клевета́емь, не и҆зничто́женъ пребы́лъ є҆сѝ.

Ѕло́бою соживꙋ́щїи, тѧ̀ неѕло́биваго а҆́гнца, ꙗ҆́кѡ свирѣ́пїи ѕвѣ́рїе восхи́тивше, въ темни́цꙋ ѡ҆сꙋди́ша, храни́ма, ѻ҆́тче, бжⷭ҇твенною благода́тїю.

Бг҃оро́диченъ: Оу҆́мъ разꙋмѣ́ти недоꙋмѣ́етъ вели́кое твоегѡ̀ рождества̀ та́инство: бг҃а бо родила̀ є҆сѝ, чл҃вѣ́ка бы́вша, приснодв҃о, неѡбмы́сленнаго.

Конда́къ, гла́съ и҃.

Ꙗ҆́кѡ добродѣ́телємъ ᲂу҆ч҃телѧ и҆ свѧти́телємъ ᲂу҆краше́нїе цр҃ковь пою́щи тѧ̀, сла́витъ, григо́рїе, моли́твами твои́ми пода́ждь чтꙋ́щимъ тѧ̀ любо́вїю добродѣ́телємъ и҆справле́нїе и҆ собла́знъ и҆збавле́нїе, ꙗ҆́кѡ непобѣди́мъ.

Пѣ́снь з҃.

І҆рмо́съ: А҆́гг҃ломъ ѻ҆́троки и҆зъ ѻ҆гнѧ̀ спасы́й, и҆ гремѧ́щꙋю пе́щь преложи́вый на ро́сꙋ, бл҃гослове́нъ є҆сѝ, бж҃е ѻ҆тє́цъ на́шихъ.

Чꙋдодѣ́йствꙋетъ зижди́тель, сꙋди́мꙋ тебѣ̀, блаже́нне, блꙋдни́ца бо жени́що стремле́нїемъ взѧта̀ де́мѡнскимъ, всѣ̑мъ показа́ тѧ чи́ста, григо́рїе.

Свѣтопода́тельнїи бжⷭ҇твеннїи ᲂу҆ч҃ницы̀ сп҃совы, тебѣ̀ предста́вше, прпⷣбне, привѧ́зана дре́вꙋ разрѣша́ютъ, ра́достнѡ лобза́юще.

Терпѣ́нїю твоемꙋ̀, ѻ҆́тче, влⷣка вне́млѧ, чꙋдодѣ́йствы бо́льшими тѧ̀ свѧще́ннѡ ᲂу҆краша́етъ, недꙋ́гѡвъ мра́къ ѿгонѧ́ща.

Бг҃оро́диченъ: Матеролѣ́пнѡ всѣ́хъ родила̀ є҆сѝ зижди́телѧ, и҆ рꙋка́ми понесла̀ є҆сѝ, ꙗ҆́кѡ херꙋві́мскїй прⷭ҇то́лъ, содержа́щаго всѧ̑, неискꙋсобра́чнаѧ.

Пѣ́снь и҃.

І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Ѿрѣша́етсѧ ра́ны де́мѡнскїѧ стра́шныѧ моли́твою твое́ю, блаже́нне, ꙗ҆́же лꙋка́вствомъ пребеззако́нныхъ мꙋже́й ѡ҆клевета́вшаѧ тебѐ пра́веднаго ѻ҆трокови́ца: и҆ посредѣ̀ собо́ра тѧ̀ прославлѧ́етъ подвигополо́жникъ бг҃ъ, во всѧ̑ вѣ́ки.

Те́мнагѡ ѡ҆мраче́нїѧ и҆сполнѧ́ютсѧ лꙋка́вствомъ на тѧ̀ поꙋчи́вшїисѧ, ѻ҆́тче, и҆ сїѧ́етъ твоѐ свѣтоза́рное житїѐ, предъ ѻ҆тцы̀, григо́рїе, въ и҆́хже прише́ствїи, ᲂу҆́глїе держа̀ рꙋко́ю, чꙋдодѣ́йствовалъ є҆сѝ.

Ꙗ҆́кѡ ѕвѣзда̀ свѣтлѣ́йшаѧ, ꙗ҆ви́лсѧ є҆сѝ и҆́стиннѡ на высотѣ̀, ѻ҆́тче, церко́внѣй, ѡ҆зарѧ́еши ны̀ добродѣ́тельми всегда̀, и҆ чꙋде́съ лꙋча́ми, пою́щыѧ твою̀ свѣтоно́снꙋю па́мѧть, ст҃и́телю бг҃омꙋ́дре григо́рїе.

Бг҃оро́диченъ: Пресла́вное ржⷭ҇тво̀ твоѐ, помышлє́нїѧ на̑ша ᲂу҆жаса́етъ, є҆ди́на бл҃гослове́ннаѧ: бг҃ъ бо и҆зъ тебє̀ пло́ть прїѧ́тъ, є҆́же бѣ̀ пребы́въ, бцⷣе, невра́щенъ є҆стество́мъ: є҆го́же превозно́симъ во вѣ́ки.

Пѣ́снь ѳ҃.

І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Сѐ, свѣ́тлое торжество̀, сѐ па́мѧть свѧще́ннаѧ, сѐ бл҃года́ть всѣ̑мъ соше́дшымсѧ вѣ̑рнымъ, ѻ҆би́льнѡ врачєва́нїѧ точа́щи, пристꙋ́пимъ: то́читъ бо на́мъ григо́рїева ра́ка просвѣще́нїе присноте́чное и҆ безсме́ртїе.

Ꙗ҆́кѡ рѣка̀ и҆спо́лнилсѧ є҆сѝ во́дъ хрⷭ҇то́выхъ, ꙗ҆́кѡ ма́слина є҆ле́й то́чиши жи́зни, ꙗ҆́кѡ фі́нїѯъ возвы́силсѧ є҆сѝ, григо́рїе, ꙗ҆́кѡ лоза̀, гро́здїе на́мъ добродѣ́телей твои́хъ но́сиши, ѿ ни́хже напаѧ́емсѧ вїно́мъ нетлѣ́нїѧ.

Да сра́дꙋетсѧ дне́сь на́мъ въ па́мѧти твое́й свѧще́нныхъ собо́ръ, и҆ прпⷣбныхъ мно́жество, и҆ всѣ́хъ а҆́гг҃лъ чи́нове: съ ни́миже предстоѧ̀ творцꙋ̀, ѡ҆зарѧ́емь, ѻ҆́тче, помѧнѝ любо́вїю тѧ̀ пѣсносло́вѧщыѧ.

Ѡ҆свѧще́нъ бы́лъ є҆сѝ, ѻ҆́тче, сосꙋ́дъ хрⷭ҇то́въ, цр҃кве сто́лпъ, и҆ приста́нище вѣ́рныхъ, и҆ ме́чь, пре́лєсти и҆зсѣка́ющїй, и҆сто́чникъ и҆сцѣле́нїй, и҆ глꙋбина̀ бжⷭ҇твенныхъ разꙋмѣ́нїй, и҆ свѣща̀ неꙋгаса́ющаѧ, и҆ па́стырь па́стырей.

Бг҃оро́диченъ: Свѣ́тъ ро́ждшаѧ безлѣ́тный возсїѧ́вшїй и҆зъ ѻ҆ц҃а̀, просвѣтѝ мою̀, ѻ҆трокови́це, дꙋ́шꙋ и҆ ᲂу҆́мъ, дале́че ѿ менє̀ ѿгонѧ́щи тмꙋ̀, дв҃о, страсте́й: да тѧ̀ ᲂу҆блажа́ю приснобл҃же́ннꙋю, вѣ́рныхъ наде́ждꙋ.

Свѣти́ленъ.

По́стнически житїѐ твоѐ ᲂу҆краси́въ, мꙋ́дре ѻ҆́тче, и҆ честны́ѧ, григо́рїе, хрⷭ҇то́вы цр҃кве і҆ера́рхъ ꙗ҆ви́лсѧ є҆сѝ, бл҃же́нне: правосла́вныхъ просвѣща́ѧ зарѧ́ми ᲂу҆че́нїй твои́хъ, и҆ неизглаго́ланными чꙋдесы̀. тѣ́мже твоѐ пресвѧто́е ᲂу҆спе́нїе соверша́ющымъ и҆спросѝ моли́твами твои́ми дꙋше́вное спасе́нїе.

Сла́ва, и҆ ны́нѣ: Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇ꙋ.