Канон святителю Феофану Никейскому, Константинопольскому

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Моегѡ̀ ра́зꙋма твои́ми моли́твами мра́къ ѿженѝ, і҆ера́рше хрⷭ҇то́въ: ꙗ҆́кѡ да воспою̀ сла́вне, твою̀ свѧще́ннꙋю и҆ свѣтоза́рнꙋю па́мѧть пѣ́сньми.

Ꙗ҆́кѡ рѣка̀ ᲂу҆стреми́лсѧ є҆сѝ ѿ сїѡ́на, і҆ера́рше сла́вне, и҆ напои́лъ є҆сѝ ѕѣлѡ̀ бжⷭ҇твенными стрꙋѧ́ми вѣ́рныхъ собо́ры, бг҃ꙋ побѣ́днꙋю пѣ́снь, пои́мъ, вопїѧ́ше.

Бжⷭ҇твенными сїѧ̑нїи твою̀ дꙋ́шꙋ ѡ҆зари́въ, ѳеофа́не, сла̑сти страсте́й воздержа́нїѧ попали́лъ є҆сѝ ѻ҆гне́мъ, пѣснопоѧ̀ и҆́стиннѡ: воспои́мъ пѣ́снь хрⷭ҇тꙋ̀.

Бг҃оро́диченъ: Свѣтлѣ́йшими лꙋча́ми твоегѡ̀ сн҃а, бцⷣе, просвѣтѝ ѡ҆мраче́ннꙋю мою̀ дꙋ́шꙋ, и҆ страсте́й смꙋще́нїе твои́мъ, чⷭ҇таѧ, ᲂу҆кротѝ хода́тайствомъ.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Сы́й и҆спо́лненъ, мꙋ́дре, бжⷭ҇твеннагѡ дх҃а ꙗ҆ви́лсѧ є҆сѝ. пита́ѧ бога́тнѡ благоче́стїѧ сла́достїю сло́вомъ живи́тельнымъ, сердца̀ зрѧ́щихъ къ тебѣ̀.

Повелѣ̑нїи бжⷭ҇твеннагѡ сїѧ́нїѧ и҆зблиста́ѧ, всеблаже́нне, ѿгна́лъ є҆сѝ всю̀ є҆реті́ческꙋю мглꙋ̀, жизнода́вцꙋ хрⷭ҇тꙋ̀ воспѣва́ѧ: свѧ́тъ є҆сѝ, гдⷭ҇и.

На го́рꙋ бжⷭ҇твенныхъ добродѣ́телей возше́дъ, і҆ера́рше, и҆ во мра́къ вше́дъ сочта́лсѧ є҆сѝ съ бг҃омъ, и҆ ра́зꙋма скрижа́ль прїѧ́лъ є҆сѝ, зако́нъ бл҃года́ти.

Бг҃оро́диченъ: Сѐ лѣ́ствица і҆а́кѡвлѧ, ю҆́же ви́дѣ и҆ногда̀ ᲂу҆твержде́нꙋ, на не́йже ᲂу҆твержда́шесѧ бг҃ъ, свѣтоно́снаѧ чⷭ҇таѧ ꙗ҆ви́сѧ дѣ́вствꙋющи бцⷣа.

Сѣда́ленъ, гла́съ д҃.

Ꙗ҆ви́лсѧ є҆сѝ, прпⷣбне, цр҃кви ꙗ҆́коже дрꙋго́е со́лнце, ѡ҆зарѧ́ѧ сїю̀ мо́лнїѧми бжⷭ҇твенныхъ слове́съ твои́хъ, ꙗ҆́кѡ ᲂу҆чени́къ гдⷭ҇ень, ѳеофа́не.

Бг҃оро́диченъ: Пречⷭ҇тыѧ рꙋ́ки твоѧ̑ дв҃о мт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь хрⷭ҇тѐ, ми́лѡсти твоѧ̑.

Крⷭ҇тобг҃оро́диченъ: На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃рнею растерза́ема, жа́лостнѡ взыва́ше: ᲂу҆вы̀ мнѣ̀, ка́кѡ за́йде, свѣ́те мо́й безлѣ́тный;

Пѣ́снь д҃.

І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Поще́нїемъ, всемꙋ́дре ѻ҆́тче ѳеофа́не, себѐ ѡ҆чи́стивъ, ве́сь свѣ́та и҆спо́лненъ бы́лъ є҆сѝ, ве́сь бг҃а вмѣсти́теленъ, ве́сь дх҃а ст҃а́гѡ соприча́стенъ.

Гла́домъ та́емь, въ лю̑таѧ влага́емь заточє́нїѧ, стражда̀, всеблаже́нне, мꙋ́ченически терпѣ́лъ є҆сѝ, ѿ со́вѣсти чи́сты въ гдⷭ҇ѣ веселѧ́сѧ.

Ѡ҆блиста́въ, сла́вне, и҆справлє́нїи ѡ҆бощре́нъ ꙗ҆ви́лсѧ є҆сѝ, ꙗ҆́кѡ хрⷭ҇то́въ ме́чь, ссѣца́ющь є҆реті́чєскаѧ ᲂу҆хищрє́нїѧ, бжⷭ҇твеннымъ дх҃омъ ᲂу҆крѣплѧ́емь.

Бг҃оро́диченъ: Свѣти́льникъ всесвѣ́тлый ты̀ ꙗ҆ви́ласѧ є҆сѝ, бжⷭ҇твеннаѧ трапе́за, бж҃їе селе́нїе, кївѡ́тъ и҆ же́злъ, процвѣ́тши цвѣ́тъ въ мі́рѣ хрⷭ҇та̀, мт҃и дв҃о.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Свѣтода́тельными твои́ми блиста̑нїи, ѻ҆́тче свѧще́ннѣйше, мра́чнꙋю тмꙋ̀ потреби́лъ є҆сѝ є҆реті́чествꙋющихъ, бг҃озна́нїѧ свѣ́томъ ѡ҆зарѧ́ѧ, и҆ просвѣща́ѧ мі́ра концы̀.

Ѕлочести́выхъ защи̑тницы, тебѐ досточꙋ́дна сꙋ́щаго лю́тыми ра́нами ᲂу҆ѧзви́ша, є҆го́же а҆́гг҃льстїи чи́ни ѡ҆б̾има́хꙋ ꙗ҆́кѡ хрⷭ҇то́ва і҆ера́рха и҆ бжⷭ҇твеннаго мч҃ника.

Бы́лъ є҆сѝ ѻ҆́тче, свѣтови́дный заблꙋ́ждшымъ пꙋтево́ждь, пла́вающымъ ко́рмчїй, коле́блємымъ приложе́ньми лю́тыхъ тве́рдость, и҆ стѣна̀ недви́жима.

Бг҃оро́диченъ: Добро́та і҆а́кѡвлѧ, ю҆́же бг҃ъ возлюбѝ, и҆ всели́тисѧ и҆збра̀: земны́хъ сла́ва, и҆ прибѣ́жище согрѣша́ющихъ, бцⷣе, ты̀ ꙗ҆ви́ласѧ є҆сѝ.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многоми́лостиве.

Сы́й ꙗ҆́кѡ со́лнце, бг҃оза̑рныѧ лꙋчы̀, преблаже́нне, и҆спꙋсти́лъ є҆сѝ, похвалѧ́ѧ мꙋ́ченичєскїѧ стра̑сти, вѧза̑нїѧ и҆ ра̑ны, и҆ ди̑вныѧ по́двиги, і҆ера́рше хрⷭ҇то́въ.

Пречⷭ҇тꙋю влⷣчцꙋ похвалѧ́ѧ чи́стѣ, ѧ҆зы́комъ твои́мъ, бг҃омꙋ́дре, воспѣ́лъ є҆сѝ словеса̀ свѣтоза̑рнаѧ, вѣ́рныхъ собо́ры, и҆ мꙋ́дрыхъ сердца̀ ᲂу҆маща̑ющаѧ.

Писа́нїемъ твоегѡ̀ всечестна́гѡ и҆ чи́стагѡ, мꙋ́дре, лица̀, безбо́жныхъ писа̑нїѧ и҆змазꙋ́еши, и҆ тѣ́хъ бг҃омє́рзскаѧ и҆ безбѡ́жнаѧ повелѣ̑нїѧ, возвѣща́ѧ чествова́ти і҆кѡ́нꙋ хрⷭ҇то́вꙋ.

Бг҃оро́диченъ: Всѧ̑ хотѣ́нїемъ соста́вивый бг҃ъ и҆ содержа́й, пречⷭ҇таѧ, ѡ҆писа́нїемъ тѣлесѐ на твои́хъ ѡ҆б̾ѧ́тїихъ но́ситсѧ, бжⷭ҇твеннымъ сꙋщество́мъ неѡпи́санный.

Конда́къ, гла́съ в҃. Возгремѣ́въ хрⷭ҇то́во бжⷭ҇твенное воплоще́нїе, безплѡ́тныѧ врагѝ до конца̀ ѡ҆бличи́лъ є҆сѝ, чꙋ́дне ѳеофа́не. сегѡ̀ ра́ди всѝ вѣ́рнѡ и҆ благоче́стнѡ вопїе́мъ тѝ: молѝ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Ѻ҆́троцы въ вавѷлѡ́нѣ, пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

И҆справлѧ́ѧ ты̀ и҆́стины сло́во, ра́нъ и҆скꙋшє́нїѧ претерпѣ́лъ є҆сѝ, и҆ во и҆згна́нїе вложе́нъ, і҆ера́рше ѳеофа́не, пѣ́лъ є҆сѝ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Твои́хъ догма́тѡвъ стрꙋи̑, нечести́выхъ потопи́ша морѧ̀, мꙋ́дре, не вопїю́щихъ хрⷭ҇тꙋ̀ бг҃ꙋ на́шемꙋ: бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ.

Рѣ́ки твои́хъ слове́съ медото́чныхъ, ѳеофа́не, человѣ́кѡвъ дꙋ́шы весе́лїѧ бжⷭ҇твеннагѡ и҆спо́лниша, пѣсносло́вѧщихъ пѣ́сньми бг҃а препросла́вленнаго.

Бг҃оро́диченъ: На тебѣ̀ вели́кое содѣ́ѧсѧ, дв҃о ма́ти, та́инство, сн҃ъ бж҃їй и҆зъ чре́ва твоегѡ̀ вопло́щсѧ ны́нѣ ꙗ҆ви́сѧ, є҆мꙋ́же веселѧ́щесѧ пое́мъ: ѻ҆тцє́въ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: За зако́ны ѻ҆ч҃єскїѧ бл҃же́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.

Зако́нъ ѻ҆те́ческїй всебл҃же́нне, и҆́стиннѡ носѧ̀, пребеззако́ннѣйшагѡ црⷭ҇твꙋющагѡ поплева́лъ є҆сѝ повелѣ́нїе несмы́сленное, погꙋблѧ́юща, ѻ҆́тче, гдⷭ҇не воѡбраже́нїе благоче́стнѡ лобза́ющихъ, є҆́же прїе́мь, въ мі́рѣ ꙗ҆ви́сѧ ѿ дв҃ы ѻ҆трокови́цы: є҆го́же превозно́симъ во вѣ́ки.

Оу҆́мъ бжⷭ҇твенъ, дх҃а прест҃а́гѡ гꙋ́сль всесли́чнаѧ, славі́й добропѣ́снивый, вѣ́рныхъ ве́рхъ, правосла́вїѧ сто́лпъ и҆ ᲂу҆твержде́нїе, мꙋ́дре, цр҃кве тве́рдь, мона́хѡвъ хвала̀, ѳеофа́не, ѻ҆тцє́въ сла́ва и҆ крѣ́пость ꙗ҆ви́лсѧ є҆сѝ, воспѣва́ѧ хрⷭ҇та̀ во вѣ́ки.

Мѷрополо́жница дх҃а прест҃а́гѡ, ѻ҆́тче, ты̀ показа́лсѧ є҆сѝ, и҆злива́нїемъ мѷродохнове́нныхъ твои́хъ и҆ мꙋ́дрыхъ ᲂу҆че́нїй потреблѧ́ѧ пре́лести ѕлосмра́днѣйшꙋю тлю̀, и҆ благово́нствꙋеши нра́вомъ твои́мъ честнꙋ́ю цр҃ковь, зовѧ̀ непреста́ннѡ: пѣ́сньми тѧ̀ превозно́симъ хрⷭ҇тѐ, во вѣ́ки.

Бг҃оро́диченъ: Бж҃їѧ гора̀ тꙋ́чнѣйшаѧ, ю҆́же пра́ѻтецъ дв҃дъ предписа̀ дре́вле пѣснопоѧ̀ прⷪ҇ро́чески, ты̀ ꙗ҆ви́ласѧ є҆сѝ дв҃о: ѿ неѧ́же ѿсѣче́сѧ ка́мень краеꙋго́льный хрⷭ҇то́съ, и҆ сокрꙋшѝ крѣ́пость всю̀ і҆́дѡльскꙋю. тогѡ̀ непреста́ннѡ пое́мъ, и҆ превозно́симъ во вѣ́ки.

Пѣ́снь ѳ҃.

І҆рмо́съ: Безсѣ́меннагѡ зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: бж҃їе бо рожде́нїе ѡ҆бновлѧ́етъ є҆стєства̀. тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю мт҃рь правосла́внѡ велича́емъ.

Побо́рствꙋюща тѧ̀ по хрⷭ҇то́вѣ цр҃кви, человѣкоꙋбі́йца зрѣ́ти не могі́й, и҆скꙋшє́нїѧ тебѣ̀ простира́етъ: ѻ҆ба́че непрекло́ненъ пребы́лъ є҆сѝ, мꙋжемꙋ́дреннѡ къ царє́мъ нечести̑вымъ противлѧ́ѧсѧ до́блественнѡ, ᲂу҆вѣща́ѧ ты̑ѧ покланѧ́тисѧ ѻ҆́бразꙋ хрⷭ҇то́вꙋ, ѳеофа́не.

Оу҆кра́шенъ несказа́нною, бг҃омꙋ́дре, добро́тою трⷪ҇цы, и҆ ᲂу҆пещре́нъ сїѧ̑нїи, свѣ́тиши, и҆ ра́достнѡ, пребога́те, ѡ҆бстои́ши прⷭ҇то́лъ и҆́стиннѡ зижди́телѧ и҆ бг҃а, и҆дѣ́же пра́зднꙋющихъ гла́съ, ѻ҆́тче бг҃оно́се ѳеофа́не.

Твои́хъ подвигѡ́въ досто́йнѡ прїѧ́лъ є҆сѝ чє́сти, и҆ вѣнцено́сецъ ны́нѣ на нб҃сѣ́хъ со а҆́гг҃лы свесели́шисѧ, и҆дѣ́же прⷪ҇ро́кѡвъ собо́ръ и҆ а҆пⷭ҇лѡвъ, и҆ мꙋ́ченикѡвъ и҆́стиннѡ вѡ́инства мнѡ́гаѧ, и҆дѣ́же патрїа́рхѡвъ ли́ки: помина́й на́съ ѻ҆́тче ѳеофа́не.

Бг҃оро́диченъ: Побо́рствꙋющи лю́демъ вѣ̑рнымъ во бранѣ́хъ на ва́рвары, да́ждь побѣди́тєльнаѧ, дв҃о бг҃ороди́тельнице, бл҃гослове́ннаѧ и҆ препросла́вленнаѧ, мт҃и неискꙋсобра́чнаѧ чⷭ҇таѧ, покрыва́ющи ѿ всѧ́кагѡ вре́да вра́жїѧ: да твоего̀ сн҃а пою́ще, тѧ̀ велича́емъ.

Свѣти́ленъ.

Ꙗ҆́кѡ бжⷭ҇твенный свѣ́тъ, ѳеофа́не, цр҃кви ꙗ҆ви́лсѧ є҆сѝ, пѣ́сней твои́хъ сїѧ́нїемъ сїю̀ ѡ҆зари́въ, и҆ свѣ́томъ лица̀ твоегѡ̀, на не́мже хрⷭ҇то́вы ꙗ҆́звы носи́въ ᲂу҆добрѧ́емь: къ немꙋ́же не преста́й молѧ́сѧ ѡ҆ ста́дѣ твое́мъ, ѻ҆́тче.

Бг҃оро́диченъ: Дре́вле дарова́ннꙋю мнѣ̀ ри́зꙋ кꙋпѣ́лїю креще́нїѧ, ѡ҆скверни́хъ стра́стными блꙋды̀, и҆ ᲂу҆жаса́юсѧ ѻ҆каѧ́нный, ча́съ помышлѧ́ѧ бжⷭ҇твеннагѡ и҆́стиннѡ стра́шнагѡ сꙋда̀: дв҃о всенепоро́чнаѧ, предста́ни тогда̀, и҆ и҆зба́ви мѧ̀ стра́шнагѡ преще́нїѧ.