Канон молебный святой великомученице Варваре Илиопольской

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Во́дꙋ нече́стїѧ тимѣ́ннꙋ ѡ҆ста́вивши, къ водѣ̀ чисти́тельной притекла̀ є҆сѝ варва́ро: и҆ на́ша ѡ҆чи́сти сердца̀, чи́стѡ пѣ́ти твоѧ̀ страда́нїѧ.

Водо́ю кр҃ще́нїѧ ѡ҆чи́стившисѧ великомꙋ́ченице, чⷭ҇томꙋ женихꙋ̀ хрⷭ҇тꙋ̀ прилѣпи́ласѧ є҆сѝ: є҆мꙋ́же и҆ на́съ чи́стѡ присво́й, моли́твами твои́ми.

Сла́ва: Въ водѣ̀ пото́пльшемꙋ ѕмі́ѧ лꙋка́ваго подо́бѧщисѧ, кро́вїю твое́ю страда́льческою, вра́жїю погрꙋзи́ла є҆сѝ си́лꙋ, стрⷭ҇тоно́сице: ѿ негѡ́же и҆ на́мъ и҆зба́витисѧ сп҃са ᲂу҆молѝ.

И҆ ны́нѣ: Во́дꙋ сле́зъ ѡ҆чища́ющꙋю пречⷭ҇таѧ пода́ждь мѝ, и҆ ѡ҆чи́стивши мѧ̀ ѿ ка́ла беззако́нїй, чи́ста предста́ви бг҃ороди́тельнице, сн҃ꙋ твоемꙋ̀ и҆ бг҃ꙋ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ це́ркве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не человѣколю́бче.

Нбⷭ҇нагѡ крꙋ́га смотрѧ́ющи ᲂу҆краше́нїе, мꙋ́драѧ дв҃о варва́ро, верхотво́рца позна́ла є҆сѝ: є҆го́же и҆ возлю́бльши, томꙋ̀ слꙋжи́ти и҆зво́лила є҆сѝ: и҆ на́съ въ любвѝ є҆гѡ̀ ᲂу҆твердѝ, мо́лимсѧ.

Нбⷭ҇нагѡ творца̀ въ трⷪ҇цѣ пресвѣ́тлое и҆зѻбразꙋ́ющи є҆стество̀, трѝ ѻ҆́кна въ ба́нѣ ѻ҆те́честѣй и҆зѻбрази́ти повелѣ́ла є҆сѝ, трⷪ҇ческомꙋ покланѧ́тисѧ ᲂу҆ча́щи бж҃ествꙋ̀: є҆мꙋ́же и҆ на́съ вѣ́чнѡ покланѧ́тисѧ сподо́би.

Сла́ва: Нбⷭ҇нагѡ черто́га жела́ющи, нбⷭ҇номꙋ женихꙋ̀ чⷭ҇тотꙋ̀ двⷭ҇тва твоегѡ̀ соблюла̀ є҆сѝ, вре́меннаго презрѣ́вши и҆ менѐ въ чистотѣ̀ томꙋ̀ слꙋжи́ти мч҃нце ᲂу҆крѣпѝ.

И҆ ны́нѣ: Нбⷭ҇нагѡ творца̀ бцⷣе всепѣ́таѧ поро́ждши, нб҃съ простра́ннейша ꙗ҆ви́ласѧ є҆сѝ: менѐ ѿ простра́ннагѡ пꙋтѝ поги́бельна ᲂу҆кло́нши, на нбⷭ҇ный пꙋ́ть наста́ви, молю́сѧ.

Сѣда́ленъ, гла́съ г҃.

Въ страда́нїи твое́мъ всѧ̑ ᲂу҆диви́ла є҆сѝ, ꙗ҆́кѡ претерпѣ́вши мꙋчи́телей ра́ны, вѧза̑нїѧ, мꙋ́ки и҆ темни́цы, варва́ро прехва́льнаѧ. тѣ́мже и҆ вѣне́цъ съ нб҃сѐ тебѣ̀ дадѐ хрⷭ҇то́съ, къ немꙋ́же, возжелѣ́вши ᲂу҆се́рднѡ, притекла̀ є҆сѝ: то́й бл҃года́ть подадѐ тебѣ̀, мꙋ́ченице, врачева̑нїѧ и҆сточа́ти человѣ́кѡмъ.

Сла́ва, и҆ ны́нѣ, бг҃оро́диченъ: Бжⷭ҇твеннаѧ ски́нїѧ была̀ є҆сѝ, сло́ва, є҆ди́на пречⷭ҇таѧ мт҃и дв҃о, чⷭ҇тото́ю а҆́гг҃лы превозше́дшаѧ; па́че всѣ́хъ менѐ, пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю млⷭ҇ть.

Пѣ́снь д҃.

І҆рмо́съ: Оу҆слы́шахъ гдⷭ҇и смотре́нїѧ твоегѡ̀ та́инство, разꙋмѣ́хъ дѣла̀ твоѧ̀, и҆ просла́вихъ твоѐ бж҃ество̀.

Оу҆слы́шавши варва́ро, нб҃са̀ повѣ́дающа сла́вꙋ бж҃їю, на землѝ бг҃а сла́вити возжела́ла є҆сѝ: є҆гѡ́же сла́вы и҆ на́съ сподо́би.

Оу҆слы́шавъ ѻ҆те́цъ тво́й тебѐ, вы́шнѧго ѻ҆ц҃а̀ и҆сповѣ́дꙋющꙋ, гонѧ́ше на ᲂу҆бїе́нїе: но не возмо́же ѿто́ргнꙋти ѿ и҆́стиннагѡ бг҃а.

Сла́ва: Оу҆слы́шавши преще́нїѧ ѻ҆те́ческаѧ, и҆ мꙋ̑ки ѿ негѡ̀ терпѧ́щи варва́ро, непоколеби́ма пребыла̀ є҆сѝ: и҆ менѐ непоколеби́ма въ добродѣ́телехъ ᲂу҆пра́ви.

И҆ ны́нѣ: Оу҆слы́ши пречⷭ҇таѧ влⷣчце моле́нїе моѐ, и҆ и҆зба́ви мѧ̀ ѿ ѕѡ́лъ, и҆ гла́съ бл҃гослове́нныхъ призыва́ющїй въ црⷭ҇тво, слы́шати ᲂу҆досто́й.

Пѣ́снь є҃.

І҆рмо́съ: Просвѣтѝ на́съ повелѣ́нїи твои́ми гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, человѣколю́бче.

Просвѣти́вши свѣщꙋ̀ свою̀ мч҃нце вѣ́рою, свѣща́ми ѡ҆пали́ти тѣ́ло твоѐ предала̀ є҆сѝ, въ черто́гъ нбⷭ҇ный свѣ́тлѡ вни́ти жела́ющи.

Просвѣща́хꙋсѧ вѣ́рою, невѣ́рїемъ ѡ҆мраче́ннїи лю́дїе, ви́дѧще тѧ̀, жжє́нїѧ, бїє́нїѧ, рѣ̑занїѧ терпѧ́щꙋю до́блественнѣ мч҃нце.

Сла́ва: Просвѣти́ мѧ ѽ варва́ро, ѡ҆мраче́ннаго мгло́ю грѣхо́вною, и҆ свѣ́томъ невече́рнимъ ѡ҆сїѧва́тисѧ, свѣ́тлаѧ дв҃о, молю́сѧ, сотворѝ.

И҆ ны́нѣ: Просвѣти́ла є҆сѝ потемне́нное є҆стество̀ бцⷣе, свѣ́тъ и҆́стинный ро́ждши. тѣ́мже и҆ менѐ свѣ́томъ просвѣти́вши, ѿ мра́чныхъ вра̑гъ свободѝ.

Пѣ́снь ѕ҃.

І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̀, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ: и҆ молю́сѧ ꙗ҆́кѡ і҆ѡ́на: ѿ тлѝ бж҃е возведи́ мѧ.

Мл҃твꙋ твою̀ страда́льческꙋю ᲂу҆слы́шавъ хрⷭ҇то́съ варва́ро, въ темни́цѣ затворе́ннꙋю посѣтѝ, и҆сцѣле́нїе ѿ ра́нъ подадѐ, и҆ на по́двигъ ᲂу҆крѣпѝ: ты́ же моѧ̀ ра̑ны грѣхѡ́вныѧ ᲂу҆врачꙋ́й мꙋ́ченице, молю́сѧ.

Мл҃твою тѝ и҆ страда́льческимъ тве́рдымъ терпѣ́нїемъ, и҆ чꙋ́днымъ и҆сцѣле́нїемъ, і҆ꙋлїані́ю ѿ ѕлоче́стїѧ привлекла̀ є҆сѝ, страда́ти съ тобо́ю за хрⷭ҇та̀: привлецы̀ и҆ менѐ къ го́рнемꙋ мꙋдрова́нїю, страстоно́сице.

Сла́ва: Моли́твꙋ всѧ́къ приносѧ́й съ вѣ́рою тебѣ̀ мч҃нце, и҆ къ моща́мъ твои́мъ ст҃ы́мъ притека́ѧй, дꙋше́вныхъ страсте́й и҆ тѣле́сныхъ и҆сцѣле́нїе ско́рѡ прїе́млетъ: є҆́же и҆ на́мъ бога́тнѡ подава́й, мо́лимсѧ.

И҆ ны́нѣ: Моли́твꙋ на́шꙋ прїимѝ пречⷭ҇таѧ, и҆ мл҃твою тѝ всемо́щною, и҆зба́вити на́съ ѿ вра̑гъ ви́димыхъ и҆ неви́димыхъ, ѿ грѣхѡ́въ же и҆ всѧ́кїѧ мꙋ́ки, молѝ є҆го́же родила̀ є҆сѝ чл҃вѣколю́бца бг҃а.

Конда́къ, гла́съ д҃.

Въ трⷪ҇цѣ бл҃гоче́стнѡ пѣва́емомꙋ, послѣ́довавши бг҃ꙋ, страстоте́рпице, і҆́дѡльскаѧ притꙋпи́ла є҆сѝ чти̑лища: посредѣ́ же по́двига страда́льчествꙋющи, варва́ро, мꙋчи́телей преще́нїѧ не ᲂу҆страши́ласѧ є҆сѝ, мꙋжемꙋ́дреннаѧ, велегла́снѡ пою́щи при́сно: трⷪ҇цꙋ чтꙋ̀, є҆ди́но бж҃ество̀.

І҆́косъ:

Оу҆невѣ́стившꙋюсѧ хрⷭ҇тꙋ̀ мꙋче́нїемъ варва́рꙋ, соше́дшесѧ, почти́мъ досто́йно: ꙗ҆́кѡ да, тоѧ̀ моли́твами па́гꙋбы дꙋшетлѣ̑нныѧ и҆зба́вльшесѧ и҆ гꙋби́тельства, трꙋ́са и҆ паде́жа, житїѐ въ ми́ре препрово́димъ, сподо́бившесѧ со всѣ́ми ст҃ы́ми, ѿ вѣ́ка бг҃ꙋ бл҃гоꙋгоди́вшими, ходи́ти во свѣ́те и҆ пѣ́ти съ ни́ми: ᲂу҆диви́лъ є҆сѝ, сп҃се, твоѧ̑ ми́лости всѣ̑мъ человѣ́кѡмъ, вѣ́рою и҆сповѣ́дающымъ: трⷪ҇цꙋ чти́мъ, є҆ди́но бж҃ество̀.

Пѣ́снь з҃.

І҆рмо́съ: Дѣ́ти є҆вре́йстїи въ пещѝ, попра́ша пла́мень дерзнове́ннѡ, и҆ на ро́сꙋ ѻ҆́гнь прело́жше вопїѧ́хꙋ: блгⷭ҇ве́нъ є҆сѝ гдⷭ҇и бж҃е во вѣ́ки.

Дѣ́ти є҆врє́йскїѧ а҆́гг҃лъ ѿ ѻ҆гнѧ̀ неѡпа́льны сохрани́вый, и҆ тебѐ варва́ро на́гꙋ води́мꙋ ѿ стꙋда̀ защитѝ, ѻ҆де́ждою свы́ше ѡ҆бле́къ пою́щꙋю: бл҃гослове́нъ є҆сѝ гдⷭ҇и бж҃е во вѣ́ки.

Дѣ́тское и҆гра́лище вмѣнѧ́ющи мꙋ̑ки, не пощади́ла є҆сѝ тѣ́ла твоегѡ̀, є҆́же бы́ти є҆мꙋ̀ за хрⷭ҇та̀ стрꙋ́жемꙋ, и҆ ѻ҆́стрѡ стира́емꙋ великомч҃нце, пою́щи: бл҃гослове́нъ є҆сѝ гдⷭ҇и бж҃е во вѣ́ки.

Сла́ва: Дѣте́й є҆вре́йскихъ и҆ а҆́зъ подража́ѧ варва́ро, хвалю̀ хрⷭ҇та̀ да́вшагѡ тебѣ̀ крѣ́пость: ты́ же мѧ̀ на по́двигъ добродѣ́телей ᲂу҆крѣ́пльши, ѻ҆де́ждою нбⷭ҇ною ѡ҆блещи́сѧ сподо́би во вѣ́ки.

И҆ ны́нѣ: Дѣторо́дїю твоемꙋ̀, дв҃ою и҆ по ржⷭ҇твѣ̀ пребы́вшꙋ, дивлю́сѧ бцⷣе: ᲂу҆дивѝ ᲂу҆̀бо и҆ на мнѣ̀ млⷭ҇ть сн҃а твоегѡ̀, да поми́лованъ тобо́ю, пою̀: бл҃гослове́нъ бг҃ъ ᲂу҆благослови́вый тѧ̀ мт҃рь свою̀ во вѣ́ки.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене, бл҃года́тїю твое́ю бы́вше, за́повѣдемъ твои́мъ ѕѣлѡ̀ прилѣжа́ще ѻ҆́троцы, вопїѧ́хꙋ: бл҃гослови́те всѧ̀ дѣла̀ гдⷭ҇нѧ гдⷭ҇а.

Побѣди́телїе непобѣди́мыѧ твоеѧ̀ вѣ́ры, мꙋчи́телє тща́шесѧ бы́ти, сосца̀ твоѧ̑ неща́днѡ ѿрѣ́зовахꙋ: ты́ же тве́рдѡ терпѧ́щи, млеко́мъ ᲂу҆че́нїѧ ѡ҆ бз҃ѣ напои́ла є҆сѝ предстоѧ́щыѧ и҆ бл҃гословѧ́щыѧ хрⷭ҇та̀ во вѣ́ки.

Побѣди́ла є҆сѝ мꙋ́жествомъ твои́мъ мꙋ́ченице варва́ро, всѧ̀ мꙋчи́тєльскаѧ ᲂу҆хищрє́нїѧ. молѝ ᲂу҆̀бо влⷣкꙋ хрⷭ҇та̀, мо́лимъ тѧ̀, всѣ́мъ вѣ̑рнымъ на врагѝ побѣ́дꙋ да́ти, пою́щымъ: бл҃гослови́те всѧ̀ дѣла̀ гдⷭ҇а, и҆ превозноси́те є҆го̀ во вѣ́ки.

Сла́ва: Побѣди́тельница сꙋро́вагѡ ѻ҆тца̀ твоегѡ̀ ꙗ҆ви́ласѧ є҆сѝ мꙋ́ченице: ѻ҆́нъ бо нбⷭ҇нымъ ѻ҆гне́мъ во а҆́дскїй ѻ҆́гнь низведе́сѧ, ты́ же на нб҃о возшла̀ є҆сѝ: є҆́же и҆ мнѣ̀ и҆схода́тайствꙋй, ѿ ѻ҆гнѧ̀ и҆збавлѧ́ющи мѧ̀ во вѣ́ки.

И҆ ны́нѣ: Побѣдѝ пречⷭ҇таѧ врагѡ́въ ви́димыхъ и҆ неви́димыхъ, низложи́ти на́съ тща́щихсѧ, и҆ страсте́й мѧ̀ всѧ́кихъ и҆зба́ви, да пою̀ торже́ственнѣ: бл҃гослови́те всѧ̀ дѣла̀ гдⷭ҇а и҆ превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю дв҃о чи́стаѧ, съ безпло́тными ли́ки тѧ̀ велича́юще.

Вои́стиннꙋ бг҃а и҆сповѣ́дающи мч҃нце, черто́гъ нбⷭ҇ный наслѣ́дила є҆сѝ: є҆гѡ́же и҆ на́съ сподо́би, да съ тобо́ю хрⷭ҇та̀ вѣ́чнѡ велича́емъ.

Вои́стиннꙋ на тебѣ̀ варва́ро и҆спо́лнисѧ хрⷭ҇то́во прорече́нїе: преда́стъ ѻ҆те́цъ ча́до на сме́рть, є҆́юже ты̀ вѣ́чный живо́тъ ѡ҆брѣла̀ є҆сѝ.

Сла́ва: Вои́стиннꙋ никто́же притека́ѧй къ тебѣ̀ страстоно́сице, то́щъ бл҃года́ти твоеѧ̀ ѿхо́дитъ, є҆ѧ́же и҆ менѐ и҆спо́лни, молю́сѧ.

И҆ ны́нѣ: Вои́стиннꙋ и҆́стиннаго бг҃а пло́тїю бцⷣе родила̀ є҆сѝ, є҆го́же млⷭ҇тива на́мъ въ де́нь сꙋда̀ содѣ́лай, да безконе́чнѡ съ ни́мъ тѧ̀ велича́емъ.

Свѣти́ленъ:

Ꙗ҆́кѡ шипо́къ краснѣ́йшїй и҆з̾ терно́внагѡ и҆зрасла̀ є҆сѝ ко́рене дв҃о варва́ро, твое́ю за хрⷭ҇та̀ и҆злїѧ́нною ѡ҆багри́вшисѧ кро́вїю. и҆ ны́нѣ бж҃е́ственнꙋю твою̀ па́мѧть соверша́ющыѧ любо́вїю, спаса́й ѿ бѣ́дъ.

Сла́ва, и҆ ны́нѣ: Вои́стиннꙋ тѧ̀ и҆сповѣ́дꙋемъ влⷣчце, тобо́ю спаса́емїи: и҆́бо бг҃а неизрече́ннѡ родила̀ є҆сѝ разори́вшаго крⷭ҇то́мъ сме́рть, и҆ къ себѣ̀ привле́кшаго првⷣныхъ собо́ры, съ ни́миже восхвалѧ́емъ тѧ̀ дв҃о.