Каноны святому преподобному Никите Столпнику, Переяславскому

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.

Свѣ́томъ благода́ти ѡ҆зарѧ́емь, прпⷣбне, вѣ́рою па́мѧть твою̀ торжествꙋ́ющыѧ свѣтови́днꙋю, тьмы̀ грѣхо́вныѧ моли́твами твои́ми и҆зба́ви, нїки́то пресла́вне.

Къ бг҃ꙋ вводѧ́щь несовра́тнѡ ше́ствовалъ є҆сѝ пꙋ́ть, ко гра́дꙋ нбⷭ҇номꙋ, нїки́то, дости́глъ є҆сѝ: и҆́бо ст҃ы́й наста́ви тѧ̀ дх҃ъ, почива́ѧй въ се́рдцы твое́мъ.

Возносѧ́щее смире́нїе, нїки́то, и҆мѣ́лъ є҆сѝ: тѣ́мъ мо́лимсѧ тебѣ̀: ᲂу҆ще́дри, прпⷣбне, смире́нїе на́ше, и҆ болѣ̑зни всѧ̑ ѡ҆блегчѝ серде́цъ на́шихъ.

Бг҃оро́диченъ: Ра́дости на́мъ хода́таица, ꙗ҆́кѡ прїе́мши и҆сполне́нїе всегѡ̀ бжⷭ҇тва̀, ꙗ҆ви́ласѧ є҆сѝ, всенепоро́чнаѧ: тѣ́мъ всѝ тебѣ̀ ра́дꙋйсѧ,– а҆́гг҃лово согла́снѡ зове́мъ, бг҃ора́дованнаѧ.

И҆́нъ, гла́съ и҃.

І҆рмо́съ: Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.

Пѣ́нїе прїимѝ ѿ ᲂу҆сте́нъ недосто́йныхъ, чл҃вѣколю́бче гдⷭ҇и, и҆ пода́ждь мѝ ѿверзе́нїе ᲂу҆стѡ́мъ, и҆ гла́съ ᲂу҆миле́нїѧ, да возмогꙋ̀ воспѣ́ти ᲂу҆го́дника твоегѡ̀ нїки́тꙋ преди́внаго.

Не́навистїю возненави́дѣвъ сꙋетꙋ̀ мі́ра, всѧ̑ содѣ̑ѧннаѧ съ пла́чемъ и҆сповѣ́далъ є҆сѝ дꙋхо́вномꙋ твоемꙋ̀ наста́вникꙋ, и҆ запреще́нїе любе́знѡ ѿ дꙋшѝ воспрїѧ́лъ є҆сѝ.

Є҆ли́кѡ и҆мѣ́ѧ дрꙋгѡ́въ любле́нїѧ, и҆ подрꙋ́жїѧ совокꙋпле́нїѧ, и҆ домо́вное пребыва́нїе, во́лею всѣ́хъ ѿтщети́всѧ, хрⷭ҇та̀ є҆ди́наго приѡбрѣ́лъ є҆сѝ.

Бг҃оро́диченъ: Мольбꙋ̀ приноша́ю ѿ ᲂу҆сте́нъ недосто́йныхъ, сїю̀ прїимѝ, влⷣчце, ꙗ҆́кѡ вдо́выѧ ѻ҆́ныѧ двѣ̀ ца̑тѣ, недѣ́йственна бо є҆́сть. тѣ́мже со ᲂу҆миле́нїемъ вопїю̀ тѝ: ѽ пребога́таѧ, сла́ва ржⷭ҇твꙋ̀ твоемꙋ̀, пречⷭ҇таѧ!

Пѣ́снь г҃.

І҆рмо́съ: Не мꙋ́дростїю и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.

Пре́жднее весе́лїе и҆змѣни́лъ є҆сѝ, бꙋ́дꙋщихъ ра́ди благи́хъ же́стостїю, добродѣ́тельнѡ пожи́въ, бл҃же́нне, на и҆сто́чницѣ въ гора́хъ, ꙗ҆́кѡ вели́кїй и҆лїа̀ пребыва́ѧ.

Пꙋ́ть пра́вый є҆гѡ́же возжелѣ́въ, поще́нїѧ ра́ди ᲂу҆дивле́нїемъ бра́шенъ тебѣ̀ показа̀ бг҃ъ, є҆го́же ѡ҆брѣ́лъ є҆сѝ безме́зднѡ, ꙗ҆́коже приста́нище, мꙋ́дре.

Коле́блемыхъ разли́чными страстьмѝ, ко твоемꙋ̀ столпꙋ̀, нїки́то, приходѧ́щихъ, честны́мъ твои́мъ хода́тайствомъ всѣ́хъ на́съ посѣтѝ, молѧ̀ чл҃вѣколю́бца.

Бг҃оро́диченъ: Тѧ̀ мꙋ́дрость бж҃їѧ всечⷭ҇тны́й ѻ҆рга́нъ ѡ҆брѣ́тши, ѿ твои́хъ чⷭ҇тыхъ крове́й воплоща́етсѧ, и҆ по ржⷭ҇твѣ̀ нетлѣ́ннꙋ показа̀.

И҆́нъ.

І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.

Матѳе́й мы́тницꙋ ѡ҆ста́вль, є҆ѵⷢ҇лі́стъ показа́сѧ: ты̀ же, прпⷣбне, сꙋетꙋ̀ мі́ра ѿве́ргъ, въ мона́шєскаѧ ѡ҆дѣ́ѧвсѧ, хрⷭ҇тꙋ̀ ᲂу҆годи́лъ є҆сѝ, и҆ чꙋдотво́рецъ показа́лсѧ є҆сѝ.

Лꙋка́вое со́нмище ѡ҆ста́вль, хрⷭ҇то́въ ꙗ҆ре́мъ на сѧ̀ возложи́лъ є҆сѝ, трꙋды̑ же и҆ пѡ́двиги твои́ми всѣ́хъ ᲂу҆дивлѧ́ѧ, и҆ ко спасе́нїю наставлѧ́ѧ.

Блꙋ́днагѡ гла́сомъ вопїѧ̀, и҆ со воздыха́нїемъ въ пє́рси бїѧ̀, бг҃ꙋ прибли́жилсѧ є҆сѝ, и҆ ра́дости вѣ́чныѧ сподо́билсѧ є҆сѝ и҆ непреста́ннагѡ, нїки́то, весе́лїѧ.

Бг҃оро́диченъ: Напа́стьми мно́гими ѡ҆держи́мъ, съ болѣ́зньми и҆ пла́чемъ вопїю̀ тѝ: и҆зба́ви, бцⷣе, ѿ ѡ҆держа́щихъ мѧ̀ скорбе́й и҆ вѣ́чнагѡ мꙋче́нїѧ, и҆ црⷭ҇твїѧ сн҃а твоегѡ̀ сподо́би мѧ̀.

І҆́косъ:

А҆́ще и҆ человѣ́къ, ѻ҆́ч҃е, по є҆стествꙋ̀, но па́че є҆стества̀ человѣ́ческагѡ стѧжа́лъ є҆сѝ, всѧ̑ бо въ ми́ре сла̑дкаѧ и҆ кра̑снаѧ преѡби́дѣвъ, послѣ́довалъ є҆сѝ хрїстꙋ̀, тѣ́мже и҆ ѿ всѣ́хъ слы́шиши: ра́дꙋйсѧ, ꙗ҆́кѡ пречи́стою наставлѧ́емь, пꙋсты́ню дости́глъ є҆сѝ; ра́дꙋйсѧ, ꙗ҆́кѡ въ не́й прече́стенъ хра́мъ бж҃їей ма́тери воздви́глъ є҆сѝ; ра́дꙋйсѧ, ꙗ҆́кѡ та́мо въ не́мъ бг҃ъ тобо́ю прославлѧ́етсѧ; ра́дꙋйсѧ, ꙗ҆́кѡ вше́лъ є҆сѝ на сто́лпъ, преподо́бне; ра́дꙋйсѧ, ꙗ҆́кѡ пло́ть порабо́тилъ є҆сѝ дх҃ꙋ; ра́дꙋйсѧ, ꙗ҆́кѡ твоемꙋ̀ житїю̀ а҆́гг҃ли ᲂу҆диви́шасѧ; ра́дꙋйсѧ, ꙗ҆́кѡ тобо́ю человѣ́цы по́льзовашасѧ; ра́дꙋйсѧ, ꙗ҆́кѡ чꙋдесы̀ ᲂу҆диви́вый всѧ̑; ра́дꙋйсѧ, ꙗ҆́кѡ на нб҃сѣ́хъ предстоѧ̀ тро́ице, ѡ҆ на́съ мо́лишисѧ; ра́дꙋйсѧ, и҆сто́чниче чꙋдесє́мъ неисчерпа́емый; ра́дꙋйсѧ, нїки́то преподо́бне, моли́твенниче ѡ҆ дꙋша́хъ на́шихъ.

Сѣда́ленъ, гла́съ є҃:

Тѣ́ломъ возше́дъ на сто́лпъ, ᲂу҆́мъ же возвы́сивъ на премі̑рнаѧ, трꙋды̀ ко трꙋдѡ́мъ прилага́еши, жела́ѧ дости́гнꙋти ᲂу҆гото́ванныхъ тебѣ̀ бл҃гъ на нб҃сѣ́хъ: и҆́хже полꙋчи́въ, помина́й на́съ, почита́ющихъ сщ҃е́ннꙋю па́мѧть твою̀.

И҆́нъ, гла́съ д҃:

Ꙗ҆́кѡ всесвѣ́тлаѧ ѕвѣзда̀ возсїѧ́въ свѣтоза́рными добродѣ́тельми, бг҃оно́се, всю̀ дꙋ́шꙋ просвѣти́лъ є҆сѝ дх҃омъ. тѣ́мъ преше́лъ є҆сѝ къ невече́рнемꙋ свѣ́тꙋ, разрѣша́ѧ страсте́й на́шихъ тє́мныѧ ѻ҆́блаки, па́мѧть твою̀ при́снѡ творѧ́щихъ се́рдца пра́востїю.

Бг҃оро́диченъ: Нечи́стыхъ пѡ́мыслъ мои́хъ мно́жество, и҆ безмѣ́стныхъ мы́слей ѡ҆бꙋрева́нїѧ, кто̀ и҆зрещѝ мо́жетъ, всенепоро́чнаѧ; настоѧ̑нїѧ же безпло́тныхъ вра̑гъ мои́хъ кто̀ и҆сповѣ́сть, и҆ си́хъ ѕло́бꙋ; но твое́ю мольбо́ю, бл҃га́ѧ, си́хъ мнѣ̀ всѣ́хъ и҆збавле́нїе да́рꙋй.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Столпꙋ̀, бг҃оно́се, согражда́емꙋ непоколе́блемою дꙋше́ю са́мъ сѧ̀ пре́далъ є҆сѝ, бꙋ́дꙋщꙋю жи́знь предзрѧ̀, є҆ѧ́же ᲂу҆лꙋчи́ти жела́ѧ, ꙗ҆́кѡ хра́бръ во́инъ.

Ла́ѵры честны́ѧ дости́глъ є҆сѝ, мꙋ́дре, возвы́сивсѧ смире́нїемъ, верхѝ де́мѡнскїѧ смири́лъ є҆сѝ и҆ въ не́й до́блествовалъ є҆сѝ, сла́ва мона́хѡвъ и҆ ᲂу҆твержде́нїе.

Моли́твами и҆ посто́мъ воѡрꙋжи́всѧ, и҆ стра́хомъ себѐ ᲂу҆мертви́въ гдⷭ҇нимъ, блаже́нне, ѿстꙋ́пника и҆зсѣка́еши неви́димаго ѕмі́ѧ, ѻ҆́ч҃е, побѣ́дникъ бы́лъ є҆сѝ.

Ве́сь бжⷭ҇твеннымъ дх҃омъ разже́нъ бы́въ, ѻ҆́ч҃е, трꙋды̀ под̾ѧ́лъ є҆сѝ на мнѡ́га лѣ̑та, въ хлѣви́нѣ ᲂу҆́зцѣ терпѧ̀, взыска́ѧ гдⷭ҇а, благода́тїю тѧ̀ бжⷭ҇твенною ᲂу҆крѣплѧ́ющаго.

Бг҃оро́диченъ: На прⷭ҇то́лѣ высо́цѣ стра́шнѡ сѣдѧ́й, на мт҃рнюю рꙋкꙋ̀ млⷣнецъ бы́въ сѣди́тъ, низпа́дшїй ѻ҆́бразъ возводѧ̀ и҆ ѡ҆боже́нїе сꙋ́щымъ подава́ѧ.

И҆́нъ.

І҆рмо́съ: Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.

При́снѡ и҆мѣ́лъ є҆сѝ къ бг҃ꙋ моли́твенника, дꙋхо́внаго твоего̀ наста́вника, ꙗ҆́коже втора́го мѡѷсе́а, и҆зве́дшаго и҆зъ є҆гѵ́пта дре́внѧго і҆и҃лѧ, наꙋча́юща тѧ̀ воспѣва́ти: сла́ва си́лѣ твое́й, гдⷭ҇и.

Не довлѣ̀ тебѣ̀, прпⷣбне, многотрꙋ́дное пребыва́нїе, желѣ̑за тѧ̑жкаѧ на сѧ̀ возлага́еши, и҆ трꙋды̀ къ трꙋдѡ́мъ прилага́еши, вопїѧ̀ хрⷭ҇тꙋ̀: сла́ва си́лѣ твое́й, гдⷭ҇и.

Шє́ствїѧ нб҃сѝ ꙗ҆влѧ́ѧ, сто́лпъ водрꙋзи́лъ є҆сѝ, и҆ ѿ сегѡ̀ стезю̀ въ моли́твенный хра́мъ и҆скопа́лъ є҆сѝ, и҆дѣ́же прилѣ́жнѡ вопїѧ̀ хрⷭ҇тꙋ̀: сла́ва си́лѣ твое́й, гдⷭ҇и.

Бг҃оро́диченъ: Возста́ви мѧ̀ ни́зꙋ лежа́щаго моли́твами твои́ми, пречⷭ҇таѧ, и҆ на покаѧ́нїѧ стєзѝ наста́ви, да возбнꙋ́въ ѿ глꙋбины̀ неча́ѧнїѧ, ᲂу҆зрю̀ свѣ́тъ бг҃оразꙋ́мїѧ, и҆ воспою̀ застꙋпле́нїе твоѐ, препѣ́таѧ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты̀ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Ходи́лъ є҆сѝ, прпⷣбне, по ᲂу҆́зкомꙋ пꙋтѝ, бжⷭ҇твенными восхождє́нїи се́рдца распространѧ́ѧсѧ, и҆ прича́стїемъ ѡ҆божа́ѧсѧ, всемꙋ́дре. тѣ́мъ бы́лъ є҆сѝ мона́хѡмъ свѣ́тлость.

Ѻ҆́ко ѡ҆чи́стившꙋ ᲂу҆́мное, прпⷣбне, бл҃года́ть даде́сѧ тебѣ̀ а҆́ки прⷪ҇ро́кꙋ, є҆́же прє́днѧѧ предзрѣ́ти, и҆ предглаго́лати ꙗ҆́кѡ сꙋ̑щаѧ, да̑льнѧѧ и҆ безвѣ̑стнаѧ.

Болѣ́знь ѡ҆блегчѝ мѝ грѣхѡ́въ и҆ скорбе́й, и҆ преста́ви се́рдца моегѡ̀ болѣ̑зни, и҆ согрѣше́нїй разрѣше́нїе да́рꙋй, благодѣ́телѧ бг҃а и҆мѣ́ѧ, послꙋ́шающаго честны́хъ твои́хъ моли́твъ.

Бг҃оро́диченъ: Оу҆ма̀ моегѡ̀ и҆сцѣлѝ превраще́нїе, пречⷭ҇таѧ, ᲂу҆врачꙋ́й стра̑сти дꙋшѝ моеѧ̀, и҆ лѣ́ностнꙋю тмꙋ̀ ѿженѝ, ꙗ҆́кѡ да хвала́ми тѧ̀ при́снѡ ᲂу҆блажа́емъ, всенепоро́чнаѧ.

И҆́нъ.

І҆рмо́съ: Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжѝ ны̀, гдⷭ҇и, ра́звѣ тебє̀, и҆но́гѡ не вѣ́мы, и҆́мѧ твоѐ и҆менꙋ́емъ.

Пѣ̑нїѧ соверша́ѧ и҆сходѧ̀ въ нощѝ ѿ столпа̀, два̀ и҆сто́чника и҆скопа́лъ є҆сѝ, ѿ ни́хже и҆ до ны́нѣ съ вѣ́рою почерпа́юще, прїе́млютъ благода́ть и҆сцѣле́нїй.

Сопе́рникъ прелꙋка́вый, а҆́ки ѕмі́й превели́къ, посредѣ̀ ке́ллїи твоеѧ̀ и҆зы́де, ᲂу҆страша́ѧ тѧ̀: ты̀ же сего̀, бл҃же́нне, попра́лъ є҆сѝ, и҆ безъ вѣ́сти моли́твою до конца̀ сотвори́лъ є҆сѝ.

Недꙋ́гъ ѡ҆слабле́нїѧ ᲂу҆дѡ́въ и҆мѣ́ѧ благочести́вый мїхаи́лъ, кнѧже́нїе тогда̀ содержа́й во гра́дѣ черни́говѣ, моли́твами твои́ми и҆сцѣле́нїе полꙋчѝ.

Бг҃оро́диченъ: Хрⷭ҇та̀ і҆и҃са ро́ждшаѧ пречⷭ҇таѧ, сего̀ молѝ при́снѡ, и҆зба́вити ѿ бѣ́дъ рабы̑ твоѧ̑, вѣ́рою и҆́мѧ твоѐ призыва́ющыѧ: ра́звѣ бо тебє̀, влⷣчце, и҆но́гѡ застꙋпле́нїѧ не и҆́мамы.

Пѣ́снь ѕ҃.

І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Оу҆мертви́лъ є҆сѝ стра̑сти тѣлє́сныѧ, ꙗ҆́кѡ дре́во ви́дѣсѧ высокове́рхо, плоды̀ чꙋде́съ приносѧ̀, нїки́то бг҃облаже́нне.

И҆́же безчи́слєннымъ болѣ́знемъ прибли́жихсѧ, тѣ́ломъ не́мощенъ пребы́въ, прпⷣбне. тѣ́мъ зовꙋ̀ тѝ вѣ́рою: болѣ̑зни ᲂу҆ста́ви се́рдца моегѡ̀.

Ѿ дꙋше́вныхъ не́мощей, ѻ҆́ч҃е, коле́блемыхъ, вѣ́рою тѧ̀ призыва́ющихъ ны́нѣ посѣтѝ, моли́твами твои́ми, ꙗ҆̀же къ бг҃ꙋ, ꙗ҆́кѡ да благоче́стнѡ тѧ̀ сла́вимъ.

Бг҃оро́диченъ: Є҆ди́на помо́щнице, помозѝ мѝ погиба́ющꙋ, и҆ рꙋ́кꙋ мѝ прострѝ, и҆ ко приста́нищꙋ наведѝ покаѧ́нїѧ, дв҃о бг҃ора́дованнаѧ.

И҆́нъ.

І҆рмо́съ: Ꙗ҆́кѡ во́ды морскі̑ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже, ꙗ҆́кѡ і҆ѡ́на, та́кѡ вопїю̀ тѝ: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.

Преди́вно бы́сть чꙋ́до, є҆щѐ бо держа́вномꙋ мїхаи́лꙋ ни ѻ҆би́тели дости́гшꙋ, ни столпа̀ ви́дѣвшꙋ, то́кмѡ же́злъ тво́й въ рꙋ́цѣ прїи́мъ, и҆ ѡ҆ се́мъ ᲂу҆крѣпи́всѧ, и҆сцѣле́нїе полꙋчѝ, и҆ прїи́де во ѻ҆би́тель твою̀ здра́въ.

Ра́достнѡ благочести́вый мїхаи́лъ кнѧ́зь, прїе́млѧ ѿ тебє̀ благослове́нїе, са́мъ тебѣ̀ и҆сповѣ́да, ка́кѡ велїа́ръ во ѻ҆́бразѣ чернца̀, двакра́ты поносѝ тебѐ, сказꙋ́ѧ тебѐ ѿ житїѧ̀ сегѡ̀ ѿше́дша.

Держа́вный мїхаи́лъ кнѧ́зь доше́дъ мѣ́ста, и҆дѣ́же и҆сцѣле́нїе полꙋчѝ, повелѣ̀ водрꙋзи́ти честны́й крⷭ҇тъ въ сла́вꙋ бг҃ꙋ, и҆ въ па́мѧть чꙋдесѝ преди́внагѡ ѻ҆тца̀.

Бг҃оро́диченъ: Всѐ вре́мѧ живота̀ моегѡ̀ во страсте́хъ и҆зжи́хъ, и҆ ны́нѣ молє́нїѧ приноша́ю тѝ, пречⷭ҇таѧ: разрѣше́нїе, пода́ждь мѝ, всепѣ́таѧ, и҆ вѣ́чнагѡ мѧ̀ и҆зба́ви ѡ҆сꙋжде́нїѧ: ты̀ бо мі́рꙋ бл҃га́ѧ помо́щница.

Конда́къ, гла́съ и҃.

Хрⷭ҇та̀ ра́ди ѿ твои́хъ рабѡ́въ нꙋ́жднꙋю сме́рть претерпѣ́лъ є҆сѝ: и҆ вѣне́цъ нетлѣ́нїѧ ѿ негѡ̀ воспрїѧ́лъ є҆сѝ: приходѧ́щымъ же съ вѣ́рою ѿ чⷭ҇тна́гѡ твоегѡ̀ гро́ба подае́ши цѣльбы̑, ѽ нїки́то прпⷣбне, моли́твенниче ѡ҆ дꙋша́хъ на́шихъ.

І҆́косъ:

Земны́й а҆́гг҃лъ, небе́сный человѣ́къ бы́лъ є҆сѝ, прпⷣбне, посто́мъ и҆ бдѣ́нїемъ дꙋ́шꙋ просвѣти́въ, а҆лка́нїемъ и҆ жа́ждею, и҆ на землѝ лега́нїемъ бг҃ꙋ ᲂу҆годи́лъ є҆сѝ, и҆ всѧ́кꙋ добродѣ́тель мона́шескагѡ житїѧ̀ и҆спра́вилъ є҆сѝ: къ си́мъ же и҆ нꙋ́жднꙋю сме́рть ѿ твои́хъ рабѡ́въ воспрїи́мъ, возше́лъ є҆сѝ къ жела́емомꙋ хрⷭ҇тꙋ̀ ра́дꙋѧсѧ, ѽ нїки́то прпⷣбне, моли́твенниче ѡ҆ дꙋша́хъ на́шихъ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

Се́рдце твоѐ трⷪ҇ческое жили́ще содѣ́лавъ, трѝ кресты̀ и҆ тѧ̑жкаѧ желѣ̑за, нїки́то, на себѣ̀ поне́съ, ѿ ни́хже бж҃е́ственною бл҃года́тїю цѣльбы̑ и҆стека́ютъ, на просвѣще́нїе и҆ ѡ҆чище́нїе вѣ́рнѡ притека́ющымъ тѝ.

Дꙋша̀ твоѧ̀ свѣтозаре́нїемъ бжⷭ҇твеннагѡ дх҃а сїѧ́ющи при́снѡ, дꙋ́шы ви́дѧще притека́ющихъ тѝ вѣ́рою свѣ́тлѡ, бл҃же́нне, прⷪ҇ро́ческими проречє́нїи: тѣ́мъ тѧ̀ ᲂу҆блажа́емъ.

Недꙋ́гѡвъ трꙋжда́ющихъ, блаже́нне, дꙋ́шы и҆ тѣлеса̀, твои́ми свѧты́ми моли́твами вско́рѣ и҆змѣнѝ, и҆ пѣ́ти сотворѝ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Бг҃оро́диченъ: Непремѣ́ннаго ро́ждши, є҆ди́на бг҃ора́дованнаѧ, десни́цею є҆гѡ̀, чⷭ҇таѧ, премѣни́ти мѝ ᲂу҆́мъ на лꙋ́чшее молю̀ тѝ сѧ̀, лю́тѣ превраща́емый жите́йскими ᲂу҆праждне́нїи.

И҆́нъ.

І҆рмо́съ: Ѿ і҆ꙋде́и доше́дше ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.

Не ржа̀ покры̀ тѧ̑жкаѧ ѻ҆́на желѣ̑за, но трꙋды̀ твоѧ̑ и҆ по́ты си́хъ просвѣти́ша, и҆ ꙗ҆́кѡ зла́то блеща́хꙋсѧ: любвѐ же ра́ди гдⷭ҇ни, не чꙋ́лъ є҆сѝ си́хъ на тѣлесѝ твое́мъ, ᲂу҆се́рднѡ вопїѧ̀: ѻ҆тє́цъ на́шихъ бж҃е, бл҃гослове́нъ є҆сѝ.

Мꙋ́тнїи ᲂу҆мо́мъ ᲂу҆бі̑йцы, зрѧ́ще блиста́нїе ѻ҆́но на тѣлесѝ твое́мъ, мнѧ́ще мно́жество зла́та носѧ́щꙋ тѝ, ѡ҆ ᲂу҆бі́йствѣ твое́мъ ᲂу҆мы́слиша. ты̀ же ѿ си́хъ, прпⷣбне, нꙋ́жднꙋю сме́рть воспрїѧ́лъ є҆сѝ, вопїѧ̀ хрⷭ҇тꙋ̀, ѻ҆тє́цъ на́шихъ бж҃е, благослове́нъ є҆сѝ.

Ѡ҆брѣто́ша во вре́мѧ ᲂу҆́треннѧгѡ клепа́нїѧ честно́е тѣ́ло твоѐ те́пло лежа́що, дꙋ́шꙋ же ѿше́дшꙋ ко гдⷭ҇ꙋ. ѻ҆би́тєли же и҆спо́лньшисѧ благово́нїѧ, всѝ возопи́ша со слеза́ми: ѻ҆тє́цъ на́шихъ бж҃е, благослове́нъ є҆сѝ.

Бг҃оро́диченъ: Цр҃ковь ѡ҆свѧще́на бг҃ꙋ бы́вши, марі́е бг҃ороди́тельнице, сего̀ молѝ, ꙗ҆́кѡ чл҃вѣколю́бца, чⷭ҇таѧ, ᲂу҆ще́дрити лю́ди согрѣши́вшыѧ, и҆ спастѝ ѿ бѣ́дъ лю́тыхъ, и҆ страсте́й треволне́нїѧ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Стоѧ̀ на столпѣ̀ вы́спрь, ꙗ҆́кѡ на свѣ́щницѣ свѣща̀, прпⷣбне, свѣтѧ́щи, всѣ̑мъ ра́зꙋмы вѣ̑рнымъ просвѣща́ѧ, пока́зовалъ є҆сѝ до́брѣ, словесы̀ и҆ дѣѧ́нїи стезю̀ живота̀, и҆ возводи́лъ є҆сѝ сїѧ̑ бжⷭ҇твеннымъ смы́сломъ къ высотѣ̀ безстра́стїѧ.

Оу҆́мъ безстра́стїемъ ѡ҆чи́щъ, бесѣ́довалъ є҆сѝ ко гдⷭ҇ꙋ вседержи́телю: ѿ негѡ́же неизречє́ннаѧ, прпⷣбне, навыка́ѧ, прⷪ҇ро́чески предглаго́лалъ є҆сѝ, просвѣща́ѧ дꙋ́шы, ꙗ҆́кѡ вели́кїй, преблаже́нне, прⷪ҇ро́къ: тѣ́мъ тѧ̀ согла́снѡ вѣ́рою воспѣва́емъ.

Наидо́ша мѝ ра̑ны тѧ̑жкїѧ, и҆ недꙋ́зи ча́стѡ трꙋжда́ютъ: тѣ́хъ мѧ̀ и҆змѣнѝ, ѻ҆́ч҃е, молю̀ тѝ сѧ̀, ꙗ҆́кѡ ѿ бг҃а прїи́мъ, нїки́то, бл҃года́ть, и҆сцѣлѧ́ти стра̑сти, и҆ болѣ̑зни ѡ҆блегча́ти.

Трⷪ҇ченъ: Со всѣ́ми го́рними вѡ́инствы, ѻ҆ц҃а̀ и҆ сн҃а и҆ ст҃а́го дх҃а, трⷪ҇цꙋ нераздѣ́льнꙋ, несозда́нно бжⷭ҇тво̀ пѣсносло́вѧще, ст҃ъ, ст҃ъ, ст҃ъ, возопїе́мъ ра́достнѡ, є҆ди́на вла́сть, нача́ло и҆ црⷭ҇тво.

Бг҃оро́диченъ: И҆́же всѣ́ми непристꙋ́пенъ сы́й зижди́тель, го́рними, ѻ҆трокови́це, чи́нми всели́всѧ въ ложесна̀ твоѧ̀, неѡпа́льнꙋ соблюдѐ тѧ̀, и҆ по ржⷭ҇твѣ̀ нетлѣ́ннꙋ. є҆мꙋ́же ны́нѣ при́снѡ пое́мъ: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки.

И҆́нъ.

І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Неразꙋ́мнїи ѻ҆нѝ ᲂу҆бі́йцы жела́емагѡ зла́та не полꙋчи́ша, честны̑ѧ же вери̑ги въ рѣкꙋ̀ во́лгꙋ вверго́ша; пресвѣ̑тлымъ лꙋча́мъ надъ ни́ми въ нощѝ ꙗ҆́вльшымсѧ, ꙗ҆́кѡ и҆ ве́сь гра́дъ ꙗ҆росла́вль ѡ҆сїѧ́вшымъ.

Кресты̀ трѝ, и҆ вери̑ги тѧ́жки, верхꙋ̀ воды̀ пла́вающе ѡ҆брѣто́шасѧ, и҆ си́хъ бг҃олюби́вїи взе́мше, во гра́дъ ꙗ҆росла́вль внесо́ша: и҆ мно́зи разли́чными недꙋ́ги ѡ҆держи́мїи и҆сцѣле́нїе ѿ си́хъ полꙋчи́ша.

Ты̀ са́мъ, прпⷣбне, ѡ҆брѣ́тшемꙋ ꙗ҆ви́всѧ, трѝ кресты̀, ре́клъ є҆сѝ, и҆ тѧ̑жкаѧ желѣ̑за, по́честь трꙋдѡ́въ мои́хъ, ско́рѡ положе́ни да бꙋ́дꙋтъ на гро́бѣ мое́мъ: ѻ҆́нъ же стра́хомъ и҆ ра́достїю ѡ҆держи́мъ бѣ̀, по словесѝ твоемꙋ̀ та́кѡ сотворѝ.

Бг҃оро́диченъ: Твоѧ̑ ми́лѡсти на мнѣ̀ ᲂу҆диви́вши, чⷭ҇таѧ, ᲂу҆ѧ́звеннꙋю дꙋ́шꙋ мою̀ и҆сцѣлѝ, и҆ бꙋ́дꙋщагѡ мꙋче́нїѧ и҆зба́ви, и҆ црⷭ҇твїѧ сн҃а твоегѡ̀ сподо́би мѧ̀.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чи́стаѧ приснодв҃о.

Воздвиза́ѧ рꙋ́ки твоѧ̀ къ бг҃ꙋ моли́лсѧ є҆сѝ, крѣпѧ̀ ᲂу҆́мъ тво́й, ᲂу҆держа́ти ѿ страсте́й, а҆́ки а҆́гг҃лъ въ тѣлесѝ, ѻ҆́ч҃е, ты̀ бы́лъ є҆сѝ. тѣ́мъ со а҆́гг҃лы всегда̀ на нб҃сѣ́хъ живе́ши, сла́вномꙋ прⷭ҇то́лꙋ предстоѧ̀ свѣ́та невече́рнѧгѡ и҆сполнѧ́емь.

Ꙗ҆́кѡ на небесѝ въ хлѣви́нѣ ᲂу҆́зцѣ пожи́лъ є҆сѝ, прпⷣбне: тѣ́мъ тѝ ᲂу҆мири́шасѧ ди́внїи ѕвѣ́рїе, покори́вшемꙋ стра̑сти тѣлє́сныѧ и҆ ѕлостремлє́нїѧ, нїки́то преподо́бнѣ. сегѡ̀ ра́ди вѣ́рою тѧ̀ почита́емъ.

Твоѧ̑ чєстны́ѧ и҆ свѧты́ѧ мо́щы во гро́бѣ лежа́ще, погрꙋжа́ютъ недꙋ́ги, и҆ попалѧ́ютъ толпы̑ де́мѡнскїѧ всегда̀, преподо́бне нїки́то, бжⷭ҇твенною благода́тїю, и҆ и҆сточа́ютъ всѣ̑мъ и҆сцѣлє́нїѧ, вѣ́рнѡ тѧ̀ блажа́щымъ.

Оу҆жѐ къ бг҃ꙋ приближа́ѧсѧ ꙗ҆́снѣ и҆ чи́стѣ, помѧнѝ вѣ́рою тѧ̀, нїки́то, помина́ющихъ, грѣхѡ́въ ѡ҆ставле́нїе на́мъ и҆спросѝ, и҆ недꙋ́гѡвъ всѣ́хъ и҆збавле́нїе, и҆ бж҃їѧ црⷭ҇тва селе́нїе.

Бг҃оро́диченъ: Свѣ́томъ мѧ̀ ѡ҆зарѝ твои́мъ, непоро́чнаѧ, ро́ждшаѧ свѣ́тъ непристꙋ́пный: разженѝ ѻ҆́блакъ страсте́й дꙋшѝ моеѧ̀ и҆ ѿ тьмы̀ и҆змѝ, молю̀ тѝ сѧ̀, и҆ бжⷭ҇твеннагѡ спасе́нїѧ сподо́би, чⷭ҇таѧ, є҆ди́на приснодв҃а.

И҆́нъ.

І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Молѝ за ны̀, ѻ҆́ч҃е прпⷣбне,– держа́вный вопїѧ́ше,– и҆ и҆спросѝ мі́рꙋ ми́ръ, на́мъ же здра́вїе, и҆ на врагѝ ѡ҆долѣ́нїе: тебє̀ бо моли́твенника те́пла ко влⷣцѣ предлага́емъ.

Ра́кꙋ твою̀ лобыза́юще лю́дїе благочести́вїи, ᲂу҆ми́льнѡ глаго́лютъ: и҆спросѝ ᲂу҆ хрⷭ҇та̀, прпⷣбне, на́мъ же и҆ ча́дѡмъ на́шымъ здра́вїе и҆ спасе́нїе и҆ ве́лїю ми́лость.

Кꙋ́пнѡ за ѻ҆те́чество и҆ ст҃и́телей, и҆ за всѧ̑ правосла̑вныѧ моли́сѧ, прпⷣбне: да всѝ па́мѧть твою̀ свѣ́тлѡ пра́зднꙋюще въ пѣ́снехъ хрⷭ҇та̀ велича́емъ.

Бг҃оро́диченъ: Льва̀ рыка́ющаго на мѧ̀ ᲂу҆ти́ши, пречⷭ҇таѧ, менє̀ же цѣльбы̀ бжⷭ҇твенныѧ сподо́би: да ᲂу҆зрю̀ свѣ́тъ бг҃оразꙋ́мїѧ, и҆ ра́достнѡ воспою̀ ржⷭ҇тво̀ твоѐ, бцⷣе.

Свѣти́ленъ.

Всѧ̑ житїѧ̑ ѡ҆ста́вль, хрⷭ҇та̀ приѡбрѣ́лъ є҆сѝ, трꙋдополо́жнѡ пожи́въ, и҆ сме́рть нꙋ́жднꙋю воспрїѧ́тъ. тѣ́мъ па́мѧть твою̀, нїки́то, почита́емъ.

Сла́ва, и҆ ны́нѣ: Бг҃а на́мъ, пречⷭ҇таѧ, родила̀ є҆сѝ, и҆ всѝ прароди́тельныѧ клѧ́твы и҆зба́вльшесѧ, воспѣва́емъ тѧ̀, препѣ́таѧ.