Пѣ́снь а҃.
І҆рмо́съ:
Волно́ю морско́ю скры́вшаго дре́вле гони́телѧ мꙋчи́телѧ под̾ земле́ю скры́ша сп҃се́нныхъ ѻ҆́троцы: но мы̀, ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ.
Вѣнцено́сче нїко́лае, вкꙋ́пѣ съ мч҃нческими ли̑ки, цари́цею, ча́ды и҆ слꙋга́ми, предстоѧ́ще ᲂу҆ прⷭ҇то́ла хрⷭ҇то́ва, просвѣще́нїе на́мъ да́рꙋйте, ѡ҆зарѧ́ющее дꙋ́шъ на́шихъ ѡ҆мраче́нїе и҆ нечꙋ́вствїе, ꙗ҆́кѡ да восхва́лимъ ра́достнѡ ва́шꙋ бл҃же́ннꙋю па́мѧть.
Ны́нѣ прорече́нїе саро́вскагѡ ста́рца, ꙗ҆́кѡ просла́вльшаго мѧ̀ просла́витъ бг҃ъ, и҆спо́лнисѧ, просла́ви бо цр҃ковь рꙋ́сскаѧ ца́рственнаго стрⷭ҇тоте́рпца. тѣ́мже вкꙋ́пѣ съ прпⷣбнымъ мо́литсѧ, во є҆́же стѧжа́ти на́мъ бл҃года́ть ст҃а́гѡ дх҃а.
Се́рдце царе́во въ рꙋцѣ̀ бж҃їей, глаго́летъ гдⷭ҇ь. ты́ же, и҆́стинный пома́занниче и҆ слꙋго̀ гдⷭ҇ень, бл҃гоговѣ́йнѣ ре́клъ є҆сѝ: не то́кмѡ жи́знь моѧ̀, но и҆ пꙋтїѐ страны̀ рѡссі́йскїѧ въ рꙋцѣ̀ гдⷭ҇ней сꙋ́ть.
Бг҃оро́диченъ:
Ты̀ є҆сѝ крѣ́пость на́ша, ты̀ є҆сѝ похвала̀ и҆ ра́дованїе, предста́тельница непобѣди́маѧ и҆ покро́въ держа́вный страны̀ рѡссі́йскїѧ, прест҃а́ѧ бцⷣе, съ ца́рственными стрⷭ҇тотє́рпцы и҆ новомч҃нки молѝ сп҃стѝ рабы̑ твоѧ̑.
Пѣ́снь г҃.
І҆рмо́съ:
Тебѐ, на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши на ло́бнѣмъ ви́сима, ᲂу҆́жасомъ мно́гимъ содрога́шесѧ, нѣ́сть ст҃ъ, ра́звѣ тебє̀, гдⷭ҇и, взыва́ющи.
Порꙋга́нїе и҆ разоре́нїе землѝ своеѧ̀ ѿ безбо́жныхъ ви́дѧ, бл҃гочести́вый царю̀, пла́касѧ и҆з̾ глꙋбины̀ серде́чныѧ, ꙗ҆́кѡ прⷪ҇ро́къ і҆еремі́а, го́рцѣ стенѧ̀ и҆ молѧ́сѧ за лю́ди согрѣши́вшыѧ: млⷭ҇тиве гдⷭ҇и, не ѡ҆ста́ви и҆́хъ, ѡ҆ста́вльшихъ мѧ̀.
На землѝ а҆лка́лъ и҆ жа́ждалъ є҆сѝ пра́вды бж҃їѧ, за ню́же дꙋ́шꙋ кро́тцѣ положи́лъ є҆сѝ, првⷣне нїко́лае, ѻ҆ба́че въ го́рнемъ црⷭ҇твїи насы́тилсѧ є҆сѝ, и҆дѣ́же пребыва́еши во вѣ́ки.
Врачева̑нїѧ и҆ чꙋдеса̀ то́чите, ст҃і́и стрⷭ҇тоте́рпцы, лю́демъ, вѣ́рою къ ва́мъ притека́ющымъ, тѣ́мже печа́ль на́шꙋ на ра́дость преложи́те мл҃твами ва́шими.
Бг҃оро́диченъ:
Прибѣ́жище, вы́шшїй покро́въ тѧ̀ и҆́мамы, бл҃гослове́ннаѧ мт҃и бж҃їѧ, твое́ю по́мощїю сохранѝ и҆ застꙋпѝ на́съ, всепѣ́таѧ.
Сѣда́ленъ, гла́съ д҃:
Є҆гда̀ мно́зи ѿ срѡ́дникъ на́шихъ ѿстꙋпи́ша ѿ бг҃а, ѿврати́шасѧ бж҃їихъ за́повѣдей и҆ воста́ша на гдⷭ҇а и҆ пома́занника є҆гѡ̀, тогда̀ гнѣ́въ бж҃їй на зе́млю рꙋ́сскꙋю прїи́де, и҆зсѧ́че любы̀ мно́гихъ, пролїѧ́сѧ кро́вь бра́тїй на́шихъ, расточи́шасѧ лю́дїе рѡссі́йстїи по всемꙋ̀ лицꙋ̀ землѝ, хра́ми на́ши порꙋга́нїю преда́шасѧ, гла̑ди, нашє́ствїѧ и҆ноплемє́нникъ постиго́ша ны̀, и҆ бы́хомъ въ посмѣѧ́нїе ꙗ҆зы́кѡвъ. мы̀ же разꙋмѣ́юще сїѐ, съ сокрꙋше́нїемъ се́рдца въ покаѧ́нїи зове́мъ: простѝ и҆ поми́лꙋй на́съ, гдⷭ҇и, по вели́цѣй млⷭ҇ти твое́й, ѡ҆чи́сти беззакѡ́нїѧ на̑ша и҆ пода́ждь стра́ждꙋщей странѣ̀ рѡссі́йстѣй, предста́тельствомъ ца́рственныхъ стрⷭ҇тоте́рпєцъ, проще́нїе грѣхѡ́въ, ми́ръ и҆ ве́лїю млⷭ҇ть.
Бг҃оро́диченъ:
Оу҆молѝ, млⷭ҇рдаѧ мт҃и свѣ́та, сн҃а твоего̀ и҆ бг҃а на́шего, ѡ҆ є҆́же возста́вити держа́вꙋ на́шꙋ правосла́внꙋю, сохрани́ти ю҆̀ въ ми́рѣ и҆ бл҃годе́нствїи, и҆зба́вити ны̀ ѿ междоꙋсо́бныѧ бра́ни, ᲂу҆крѣпи́ти ст҃ꙋ́ю цр҃ковь и҆ ѡ҆гради́ти ю҆̀ ѿ невѣ́рїѧ, раско́ла и҆ є҆ресе́й.
Пѣ́снь д҃.
І҆рмо́съ:
На крⷭ҇тѣ̀ твоѐ бжⷭ҇твенное и҆стоща́нїе, прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.
Нището́ю дꙋхо́вною ѡ҆богати́лсѧ є҆сѝ, ст҃е нїко́лае, и҆ сотворѝ тѧ̀ гдⷭ҇ь досто́йна не то́кмѡ земна́гѡ, но и҆ нбⷭ҇нагѡ црⷭ҇твїѧ.
Ско́рбїю ѡ҆бдержи́мь бы́сть, вѣнцено́сче нїко́лае, зрѧ̀ ѡ҆слѣпле́нїе наро́да твоегѡ̀, ѿре́кшагѡсѧ ѿ цр҃ѧ̀ нбⷭ҇нагѡ, та́кожде и҆ земна́гѡ.
Мꙋ́жественнѣ возложи́въ ᲂу҆пова́нїе на бг҃а въ многострада́льнѣмъ земнѣ́мъ слꙋже́нїи твое́мъ, ꙗ҆́коже і҆́ѡвъ и҆ногда̀, стори́цею воздаѧ́нїе прїѧ́лъ є҆сѝ на нб҃сѣ́хъ, и҆дѣ́же ны́нѣ наслажда́ешисѧ, ца́рственный мч҃нче.
Бг҃оро́диченъ:
Млⷭ҇рдїѧ двє́ри, бл҃гослове́ннаѧ бцⷣе, ѿве́рзи на́мъ, да и҆зба́вимсѧ ѿ бѣ́дъ и҆ ѡ҆ѕлобле́нїѧ на́шегѡ, во є҆́же пѣ́ти тебѣ̀ непреста́ннѡ: ты̀ є҆сѝ сп҃се́нїе ро́да хрⷭ҇тїа́нскагѡ.
Пѣ́снь є҃.
І҆рмо́съ:
Бг҃оѧвле́нїѧ твоегѡ̀, хрⷭ҇тѐ, къ на́мъ млⷭ҇тивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: воскрⷭ҇нꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.
Миротво́рецъ ꙗ҆ви́лсѧ є҆сѝ, царю̀ нїко́лае ст҃ы́й, несѧ̀ ми́ръ мі́рꙋ, сп҃са́ѧ и҆ защища́ѧ ты́сѧщы во ѻ҆те́чествѣ твое́мъ и҆ въ и҆ны́хъ страна́хъ, сегѡ̀ ра́ди сы́нъ бж҃їй, по сло́вꙋ гдⷭ҇ню, наре́клсѧ є҆сѝ.
И҆згна́нїе, поноше́нїе, гоне́нїе и҆ всѧ́къ глаго́лъ ло́жный, на вы̀ рече́нный, претерпѣ́сте, ст҃і́и ца́рственнїи мч҃нцы. ра́дꙋйтесѧ ᲂу҆̀бо и҆ весели́тесѧ, ꙗ҆́кѡ мздꙋ̀ ва́шꙋ на нб҃сѝ прїѧ́сте.
Слꙋжи́телїе беззако́нїѧ та́йнагѡ, вѣне́цъ терно́вный спле́тше, возложи́ша на тѧ̀, ца́рственнаѧ главо̀, ѻ҆ба́че де́рзѡстнаѧ дѣла̀ и҆́хъ погибо́ша ꙗ҆́вѣ.
Бг҃оро́диченъ:
Въ ти́нꙋ грѣхѡ́въ впа́ли є҆смы̀, и҆ лю́тѣ потопѝ ны̀ бꙋ́рѧ прегрѣше́нїй. но ꙗ҆́кѡ ро́ждшаѧ сп҃са, влⷣчце, при́зри на ны̀, рабы̑ твоѧ̑, и҆ и҆зба́ви ѿ страсте́й дꙋшетлѣ́нныхъ.
Пѣ́снь ѕ҃.
І҆рмо́съ:
Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѻ҆́бразъ носѧ̀, страда́вшагѡ и҆ погребе́нїю да́вшагѡсѧ, ꙗ҆́кѡ ѿ черто́га, ѿ ѕвѣ́рѧ и҆зы́де. приглаша́ше же кꙋстѡді́и: хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ.
Всѣ̑мъ правосла̑внымъ застꙋ́пникъ бы́лъ є҆сѝ, бг҃оизбра́нный нїко́лае, наро́дѡмъ словє́нскимъ защи́тꙋ бл҃гꙋ́ю ꙗ҆влѧ́ѧй, и҆ ꙗ҆́кѡ бра́тъ бра́тꙋ помога́ѧй.
Ѽ сы́не вѣ́рный ст҃ы́ѧ цр҃кве! ты̀ ревни́тель прославле́нїѧ ст҃ы́хъ ꙗ҆ви́лсѧ є҆сѝ, хра́мѡвъ созида́тель, ст҃ы́хъ ѻ҆би́телей бл҃гоꙋкраси́тель, ст҃ы́ѧ землѝ и҆ горы̀ а҆ѳѡ́нскїѧ бл҃готвори́тель, просвѣще́нїѧ правосла́внагѡ попечи́тель, и҆ мона́шества покрови́тель.
Въ житїѝ ва́шемъ и҆ въ дѣ́лѣхъ любвѐ ѻ҆́бразъ хрⷭ҇тїа́нѡмъ бы́сте, бг҃овѣнча́ннїи ца́рїе нїко́лае и҆ а҆леѯа́ндро, полага́сте бо во главꙋ̀ ᲂу҆́гла ка́мень, хрⷭ҇та̀ бг҃а на́шего.
Бг҃оро́диченъ:
Къ тебѣ̀ прибѣга́емъ, цр҃и́цѣ держа́внѣй, вѣ́рныхъ покро́ве, на тѧ̀ наде́ждꙋ возлага́емъ сп҃се́нїѧ на́шегѡ, прест҃а́ѧ влⷣчце бцⷣе, не пре́зри на́съ.
Конда́къ, гла́съ и҃:
И҆збра́ннїи цр҃е́мъ ца́рствꙋющихъ и҆ гдⷭ҇емъ госпо́дствꙋющихъ ѿ ро́да царе́й рѡссі́йскихъ, бл҃говѣ́рнїи мч҃нцы, мꙋ̑ки дꙋшє́вныѧ и҆ сме́рть тѣле́снꙋю за хрⷭ҇та̀ прїи́мшїи и҆ вѣнцы̑ нбⷭ҇ными ᲂу҆вѣнча́вшїисѧ, къ ва́мъ, ꙗ҆́кѡ покрови́телємъ на́шымъ млⷭ҇тивымъ, съ любо́вїю бл҃года́рнѣ вопїе́мъ: ра́дꙋйтесѧ, ца́рственнїи стрⷭ҇тоте́рпцы, за рꙋ́сь ст҃ꙋ́ю пред̾ бг҃омъ ᲂу҆се́рднїи мл҃твєнницы.
І҆́косъ: Сла́вою и҆ бога́тствомъ бл҃гоче́стїѧ сїѧ́ющїи, багрѧни́цею многоцѣ́нною и҆ вѣнце́мъ ᲂу҆краше́ннїи, млⷭ҇тїю и҆ пра́вдою въ житїѝ просїѧ́вшїи, вѣ́рꙋ, наде́ждꙋ и҆ любо́вь къ бг҃ꙋ до конца̀ ꙗ҆ви́ли є҆стѐ. къ ва́мъ, ꙗ҆́кѡ покрови́телємъ на́шымъ млⷭ҇тивымъ, съ любо́вїю бл҃года́рнѣ вопїе́мъ: ра́дꙋйтесѧ, ца́рственнїи стрⷭ҇тоте́рпцы, за рꙋ́сь ст҃ꙋ́ю пред̾ бг҃омъ ᲂу҆се́рднїи мл҃твєнницы.
Пѣ́снь з҃.
І҆рмо́съ:
Неизрече́нное чꙋ́до! въ пещѝ и҆зба́вивый прпⷣбныѧ ѻ҆́троки и҆з̾ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.
Ꙗ҆́кѡ при́сныхъ ва́шихъ, недꙋ́жныхъ во́инѡвъ чадолю́бнѣ посѣща́сте, ца́рственнїи мч҃нцы, и҆ съ любо́вїю и҆̀хъ ᲂу҆тѣша́сте, мѣста̀ же и҆́хъ ᲂу҆покое́нїѧ слеза́ми ва́шими ѡ҆роша́сте.
Вы̀ є҆стѐ ѻ҆́бразъ сꙋпрꙋ́жества добродѣ́тельнагѡ и҆ дѣте́й воспита́нїѧ бл҃гочести́вагѡ, ст҃і́и ца́рїе нїко́лае и҆ а҆леѯа́ндро. до́мъ ва́шъ ꙗ҆́кѡ цвѣтни́къ дꙋхо́вный содѣ́лавше, на нб҃сѣ́хъ ны́нѣ вкꙋ́пѣ со ча́ды ликꙋ́ете.
На высотѣ̀ сла́вы человѣ́ческїѧ пребыва́ѧ, ѡ҆ нбⷭ҇ныхъ при́снѡ помышлѧ́лъ є҆сѝ, царю̀ нїко́лае, а҆́може ᲂу҆стреми́сѧ дꙋша̀ твоѧ̀ ст҃а́ѧ.
Бг҃оро́диченъ:
Всест҃а́ѧ влⷣчце, ѡ҆живѝ ᲂу҆́мъ на́шъ, ᲂу҆мерщвле́нный страстьмѝ мно́гими, и҆ ᲂу҆крѣпѝ ны̀ бг҃оꙋгѡ́днаѧ твори́ти, да велича́емъ тѧ̀, ꙗ҆́кѡ застꙋ́пницꙋ ро́да хрⷭ҇тїа́нскагѡ.
Пѣ́снь и҃.
І҆рмо́съ:
Оу҆жасни́сѧ боѧ́йсѧ, нб҃о, и҆ да подви́жатсѧ ѡ҆снова̑нїѧ землѝ: сѐ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ: є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.
Є҆гда̀ ᲂу҆гѡ́дницы бж҃їи предреко́ша ва́мъ пꙋ́ть мч҃нческїй, ꙗ҆́коже па́ѵлꙋ прⷪ҇ро́къ а҆га́въ, вы̀, ца́рственнїи стрⷭ҇тоте́рпцы, не ᲂу҆клони́стесѧ ни ѡ҆деснꙋ́ю, ни ѡ҆шꙋ́юю, но мꙋ́жественнѣ проидо́сте є҆го̀, взира́юще на соверши́телѧ вѣ́ры і҆и҃са хрⷭ҇та̀.
Во страда́нїихъ ва́шихъ, стрⷭ҇тоте́рпцы ст҃і́и, не ѿверго́стесѧ пꙋтѝ, и҆́стины и҆ живота̀, хрⷭ҇та̀ бг҃а на́шегѡ, не ᲂу҆страши́стесѧ бг҃обо́рцєвъ, но въ терпѣ́нїи
ше́ствовасте црⷭ҇кимъ пꙋте́мъ въ жи́знь вѣ́чнꙋю.
Оу҆вы̀ на́мъ, ѻ҆те́чєскїѧ завѣ́ты попра́вшымъ, ѿ ѻ҆бѣ́та вѣ́рности ца́рскомꙋ ро́дꙋ, цр҃ковїю ст҃о́ю бл҃гослове́нномꙋ, ѿстꙋ́пльшымъ и҆ та́кѡ ѿ пꙋтѝ бж҃їѧ ѿлꙋчи́вшымсѧ. простѝ на́съ, гдⷭ҇и, за всѧ̑ сїѧ̑ содѣ̑ѧннаѧ, и҆ поми́лꙋй мл҃твами ст҃ы́хъ стрⷭ҇тоте́рпєцъ.
Бг҃оро́диченъ:
Застꙋ́пницꙋ на́шꙋ тѧ̀ вѣ́мы, бцⷣе, непреста́ннѡ бо ѡ҆ на́съ мо́лишисѧ, во є҆́же пока́ѧтисѧ и҆ и҆спра́витисѧ на́мъ, ᲂу҆пова́нїе и҆ прибѣ́жище дꙋ́шъ на́шихъ.
Пѣ́снь ѳ҃.
І҆рмо́съ:
Не рыда́й менѐ, мт҃и, зрѧ́щи во гро́бѣ, є҆го́же во чре́вѣ без̾ сѣ́мене зачала̀ є҆сѝ сн҃а: воста́нꙋ бо, и҆ просла́влюсѧ, и҆ вознесꙋ̀ со сла́вою непреста́ннѡ, ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.
Да воскрⷭ҇нетъ рꙋ́сь ст҃а́ѧ мл҃твами ца́рственныхъ стрⷭ҇тоте́рпєцъ и҆ новомч҃нкъ твои́хъ, гдⷭ҇и, и҆ да расточа́тсѧ всѝ вразѝ є҆ѧ̀ вско́рѣ, и҆ ѿ лица̀ є҆ѧ̀ да бѣжа́тъ всѝ ненави́дѧщїи ю҆̀ ѿ ны́нѣ и҆ до вѣ́ка.
Всѐ ᲂу҆пова́нїе на гдⷭ҇а возложѝ держа́вный ца́рь на́шъ. та́кожде и҆ мы̀ со ᲂу҆пова́нїемъ гдⷭ҇ꙋ помо́лимсѧ, да ᲂу҆крѣпи́тъ ѻ҆́нъ мл҃твами бцⷣы и҆ ца́рственнаго стрⷭ҇тоте́рпца странꙋ̀ на́шꙋ въ правосла́вїи, и҆ сп҃се́тъ дꙋ́шы на́шѧ.
Ꙗ҆́кѡ досто́йное пѣ́нїе прїими́те, ст҃і́и стрⷭ҇тоте́рпцы, ма́лое моле́нїе сїѐ, и҆ ꙗ҆́коже хрⷭ҇то́съ прїѧ́тъ вдови́цы двѣ̀ лє́птѣ, не возгнꙋша́йтесѧ на́съ, ѻ҆каѧ́нныхъ, страстьмѝ ѡ҆бꙋрева́емыхъ, ᲂу҆бо́гихъ чти́телей и҆ слꙋжи́телей ва́шихъ.
Бг҃оро́диченъ:
Держа́внымъ твои́мъ покро́вомъ, чⷭ҇таѧ, рабы̑ твоѧ̑ сохранѝ всѧ̑ невреди̑мы: тѧ̀ бо є҆ди́нꙋ и҆́мамы прибѣ́жище въ нꙋ́ждахъ, ᲂу҆тѣше́нїе въ ско́рбехъ и҆ побѣ́дꙋ во бране́хъ на́шихъ.
Свѣти́ленъ:
Невече́рнемꙋ свѣ́тꙋ предстоѧ́ще, стрⷭ҇тоте́рпцы ст҃і́и ца́рственнїи, съ мч҃нческими ли̑ки, во и҆спыта́нїихъ не ѡ҆ставлѧ́йте ны̀ мл҃твами ва́шими.
Сла́ва, и҆ ны́нѣ:
Ро́ждшаѧ свѣ́тъ незаходи́мый, просвѣща́ющїй сѣдѧ́щихъ во тьмѣ̀ невѣ́дѣнїѧ и҆ пре́лести, ѡ҆зарѝ и҆ на́съ, грѣ́шныхъ, свѣ́томъ сн҃а твоегѡ̀.