Пѣ́снь а҃.
І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѡбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Прпⷣбнагѡ се́ргїа, и҆гꙋ́мена землѝ рꙋ́сскїѧ, свѣ́тлостьми добродѣ́телей возсїѧ́вшаго, роди́телїе сподо́бистесѧ бы́ти, кѷрі́лле и҆ мр҃і́е приснобл҃же́ннїи.
Ре́вностнѡ хранѧ́ще за́повѣдь а҆пⷭ҇ла, страннолю́бїѧ не забыва́ти, любо́вїю къ бли̑жнимъ распала́еми, вои́стиннꙋ ᲂу҆досто́истесѧ, бл҃же́ннїи, а҆́гг҃ла бж҃їѧ страннопрїѧ́ти.
Ѻ҆́бразꙋ ва́шего благочести́ваго сꙋпрꙋ́жескагѡ житїѧ̀ мнѡ́гїѧ лю́ди ᲂу҆диви́шасѧ, прпⷣбнїи. сегѡ̀ бо ра́ди бг҃ъ ва́съ просла́ви и҆ дарова̀ пло́дъ бл҃госла́вный, є҆гѡ́же варѳоломе́а, сы́на ра́дости, нареко́сте.
Бг҃оро́диченъ:
Сла́вимъ тѧ̀, бг҃оневѣ́сто, ро́ждшꙋю хрⷭ҇та̀, бг҃а на́шего, є҆гѡ́же молѝ поми́ловати и҆ сп҃стѝ дꙋ́шы на́шѧ.
Пѣ́снь г҃.
І҆рмо́съ:
Оу҆твержде́й въ нача́лѣ нб҃са̀ ра́зꙋмомъ и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ, па́че тебѣ̀, є҆ди́не чл҃вѣколю́бче.
Лю́дїе чꙋдѧ́хꙋсѧ, є҆гда̀ ᲂу҆слы́шаша трикра́тное возглаше́нїе младе́нца во чре́вѣ твое́мъ, мр҃і́е приснопа́мѧтнаѧ. что̀ ᲂу҆́бѡ ѻ҆троча̀ сїѐ бꙋ́детъ; — недоꙋмѣва́юще дрꙋ́гъ дрꙋ́га вопроша́хꙋ.
А҆́ще роди́тсѧ младе́нецъ мꙋ́жеска по́ла, да́рꙋемъ є҆гѡ̀ це́ркви, да послꙋ́житъ бл҃годѣ́телю всѣ́хъ бо́гꙋ, — си́це реклѝ є҆стѐ, боголюби́вїи сꙋпрꙋ́зи, и҆спо́лненнїи вѣ́ры сла́вныѧ и҆ любвѐ бл҃гі̑ѧ.
Вели́кїѧ ми́лости сподо́бистесѧ ѿ бо́га добронра́внымъ житїе́мъ ва́шимъ, бл҃же́ннїи, тѣ́мже и҆ на́мъ и҆спроси́те бг҃опрїѧ́тными ва́шими моли́твами ѡ҆ставле́нїе грѣхѡ́въ, ми́лости бж҃їѧ и҆ ца́рства небе́снаго.
Бг҃оро́диченъ:
Лю́таго мїроде́ржца сѣте́й и҆зба́ви на́съ, ѡ҆ бг҃ома́ти, нѣ́сть бо тє́плыѧ застꙋ̑пницы, ра́звѣ тебѣ̀, влⷣчце.
Сѣда́ленъ, гла́съ в҃:
Прїиди́те, вѣ́рнїи, ра́достными пѣ́сньми просла́вимъ прпⷣбныхъ кѷрі́лла и҆ мр҃і́ю, и҆, съ любо́вїю лобыза́юще честны̑ѧ мо́щи и҆́хъ, си́це возопїи́мъ: ра́дꙋйтесѧ, бл҃же́ннїи, въ бг҃олю́бїи пожи́вшїи, милосе́рдїе къ бли̑жнимъ и҆мѣ́вшїи, ѻ҆́бразъ честна́го сꙋпрꙋ́жества и҆ попече́нїѧ ѡ҆ ча́дѣхъ ѧви́вшїи, смире́нїе стѧжа́вшїи и҆ въ по́стничествѣ пребывшии. ны́нѣ же, предстоѧ́ще ст҃ѣ́й тро́ице, моли́твами ва́шими, ст҃і́и, ѻ҆те́чество на́ше ѿ сопроти́вныхъ защити́те, болѣ̑зни и҆сцѣли́те и҆ всѧ́кихъ и҆скꙋше́нїй и҆зба́вите вѣ́рою чтꙋ́щихъ па́мѧть ва́шꙋ.
Бг҃оро́диченъ:
Не и҆́мамы и҆ны́ѧ по́мощи и҆ наде́жды, ра́звѣ тебѣ̀, пречⷭ҇таѧ ма́ти бж҃їѧ, ты̀ бо бо́га пло́тїю родила̀ є҆сѝ па́че сло́ва и҆ ра́зꙋма. є҆гѡ̀ же молѝ, безневѣ́стнаѧ, съ преподо́бными кѷрі́лломъ и҆ марі́ею пода́ти на́мъ ми́ръ и҆ ве́лїю ми́лость.
Пѣ́снь д҃.
І҆рмо́съ:
Ты̀ моѧ̀ крѣ́пость, го́споди, ты̀ моѧ̀ и҆ си́ла, ты̀ мо́й бо́гъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ̀ тѝ: си́ле твое́й сла́ва, чл҃вѣколю́бче.
Ꙗ҆́кѡ ст҃ы́й предте́ча взыгра́сѧ ра́дощами во чре́вѣ ма́тери своеѧ̀, та́кѡ и҆ сн҃ъ тво́й, мр҃і́е прпⷣбнаѧ, взыгра́сѧ во ᲂу҆тро́бѣ молѧ́щейсѧ тѝ гдⷭ҇ꙋ въ це́ркви.
Ты̀ же ᲂу҆разꙋмѣ́вши зна́менїе сїѐ, стра́хомъ и҆ тре́петомъ ѡ҆б̾ѧ́та бы́вши, взыва́ла є҆сѝ: си́ле твое́й сла́ва, чл҃вѣколю́бче.
Ю҆до́ли плаче́внѣй прича́стницы бы́вше, ѻ҆ба́че по́двигъ сꙋпрꙋ́жества пресла́вне соверши́вше и҆ во и҆́ночествѣ до́брѣ пожи́вше, прпⷣбнїи, ны́нѣ наслажда́етесѧ нбⷭ҇ныѧ трапе́зы. моли́тесѧ ко гдⷭ҇ꙋ, да ᲂу҆мꙋдри́тъ правосла́вныѧ сꙋпрꙋ́ги во бл҃гоче́стїи пребыва́ти, и҆́ночествꙋющымъ же ре́вностнѡ ѡ҆бѣ́ты соблюда́ти.
Ра́дости и҆сполнѧ́ютсѧ дне́сь рѡссі́йстїи собо́ри, и҆мꙋ́ще ва́съ, бл҃же́ннїи, тє́плыѧ моли́твенники и҆ ᲂу҆сє́рдныѧ застꙋ́пники своемꙋ̀ земно́мꙋ ѻ҆те́чествꙋ.
Бг҃оро́диченъ:
Ѽ всепѣ́таѧ ма́ти, ми́ра сп҃се́нїе! не ѡ҆ста́ви вѣ́рою тѧ̀ призыва́ющихъ, ты̀ бо є҆сѝ застꙋ́пница ᲂу҆се́рднаѧ ро́да хрⷭ҇тїа́нскагѡ.
Пѣ́снь є҃.
І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀, ѻ҆каѧ́ннаго, но ѡ҆братѝ мѧ̀ и҆ къ свѣ́тꙋ за́повѣдей твои́хъ пꙋтѝ моѧ̀ напра́ви, молю́сѧ.
Дне́сь па́мѧть ва́ша, бл҃же́ннїи, созыва́етъ лю́ди на дꙋхо́внꙋю трапе́зꙋ. тѣ́мже сподо́бите и҆ на́съ досто́йно сїѧ̑ вкꙋси́ти, и҆ пи́щи ра́йскїѧ во ѻ҆би́телехъ ѻ҆ц҃а̀ небе́снаго вкꙋ́пѣ съ ва́ми наслажда́тисѧ.
И҆мꙋ́ще житїѐ бл҃гоче́стїемъ сїѧ́ющее, достосла́внїи, роди́телїе, вои́стину дре́во благослове́нное ꙗ҆ви́стесѧ, пло́дъ бо́гꙋ ᲂу҆го́дный и҆зрасти́вше.
Теплотꙋ̀ ва́шеѧ любвѐ къ бо́гꙋ, пра́вєднаѧ чето̀, и҆ ре́вность ко и҆́ноческомꙋ житїю̀ ѿ ю҆́ности воспрїѧ́тъ се́ргїй достохва́льный: вы̀ бо ꙗ҆ви́стесѧ пе́рвїи ᲂу҆чи́телїе сы́на ва́шего добродѣ́тельномꙋ житїю̀.
Бг҃оро́диченъ:
Є҆ди́нꙋ чⷭ҇тꙋю, є҆ди́нꙋ бл҃гослове́ннꙋю, вѣ́рнїи, ᲂу҆блажи́мъ, къ сн҃ꙋ бо своемꙋ̀ ми́лостивно рꙋ́цѣ простира́етъ, да ѡ҆брати́мсѧ къ свѣ́тꙋ за́повѣдей є҆гѡ̀ и҆ то́й пꙋтѝ на́ша и҆спра́витъ.
Пѣ́снь ѕ҃.
І҆рмо́съ:
Ѡ҆чи́сти мѧ̀, сп҃се, мно́га бо беззакѡ́нїѧ моѧ̀, и҆ и҆з̾ глꙋбины̀ ѕѡ́лъ возведѝ, молю́сѧ, къ тебѣ̀ бо возопи́хъ, и҆ ᲂу҆слы́ши мѧ̀, бо́же сп҃сє́нїѧ моегѡ̀.
Лѣ́тнѧѧ ва́ша па́мѧть весели́тъ сосло́вїе и҆́нокѡвъ, прпⷣбнїи кѷрі́лле и҆ мр҃і́е.
Вои́стинꙋ блаже́ни є҆стѐ, ꙗ҆́кѡ и҆мена̀ ва́ша прославлѧ́ютсѧ съ сынѡ́мъ ва́шимъ, се́ргїемъ прпⷣбнымъ, є҆гѡ̀ же велича́ютъ и҆гꙋ́мена землѝ рꙋ́сскїѧ.
И҆́стинꙋ въ житїѝ взыскꙋ́юще, прпⷣбнїи, ѡ҆ тѣле́сныхъ небрего́сте и҆ земна̑ѧ преѡби́дѣсте, тѣ́мже, ми́ра ѿре́кшесѧ, во ѻ҆би́тель Хотько́вскую всели́стесѧ, и҆дѣ́же въ по́двизѣ и҆́ночества къ нбⷭ҇нымъ востеко́сте.
Сохрани́те ѿ ѕѡ́лъ ва́шими те́плыми къ бо́гꙋ моли́твами, прпⷣбнїи, всѣ́хъ, жи́тельствꙋющихъ во ѻ҆би́тели хотьковстей, є҆́й же вы̀ нача́льницы и҆ покрови́телїе.
Бг҃оро́диченъ:
Є҆гѡ̀ же родила̀ є҆сѝ, сы́на твоегѡ̀ и҆ бо́га, моли́ти не преста́й, бг҃оневѣ́сто, да и҆зба́витъ ѻ҆би́тель твою̀ ѿ всѧ́кагѡ ѕла̀ и҆ сп҃се́тъ дꙋшѝ на́ша.
Конда́къ, гла́съ д҃:
Дне́сь, вѣ́рнїи, соше́дшесѧ, восхва́лимъ дво́ицꙋ бл҃же́ннꙋю бл҃говѣ́рнагѡ кѷрі́лла и҆ мр҃і́ю добронравную, ты̑ѧ бо мо́лѧтсѧ вкꙋ́пѣ съ возлю́бленнымъ сынѡ́мъ свои́мъ, прпⷣбнымъ се́ргїемъ, ко є҆ди́номꙋ во ст҃ѣ́й тро́ице бо́гꙋ, ѻ҆те́чество на́ше въ правовѣ́рїи ᲂу҆тверди́ти, до́мы ми́ромъ ѡ҆гради́ти, ю҆́ныѧ ѿ напа́стей и҆ собла́знѡвъ и҆зба́вити, ста́рость ᲂу҆крѣпи́ти и҆ спастѝ дꙋшѝ на́ша.
Пѣ́снь з҃.
І҆рмо́съ:
Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ, ра́дованною ного́ю, ꙗ҆́кѡ во цвѣ́тницѣ, ликꙋ́юще, поѧ́хꙋ: бл҃гослове́нъ є҆сѝ, бо́же ѻ҆тє́цъ на́шихъ.
Ра́ка моще́й ва́шихъ дне́сь чꙋдеса̀ и҆сточа́етъ вѣ́рою притека́ющымъ къ ва́мъ, бл҃же́ннїи, и҆́же и҆ воспѣва́ютъ: бл҃гослове́нъ є҆сѝ, бо́же ѻ҆тє́цъ на́шихъ.
Гра́дъ москва̀ и҆ ѻ҆крє́стныѧ гра́ды и҆ ве́си прославлѧ́ютъ ва́съ своѧ̑ и҆зба́вители и҆ цѣли́тели ѿ смертоно́сныѧ ꙗ҆́звы. сегѡ̀ ра́ди дне́сь, ꙗ҆́кѡ же пре́жде, спаса́йте почита́ющихъ ва́съ, прпⷣбнїи, да благода́рственно воспѣва́ютъ: бл҃гослове́нъ є҆сѝ, бо́же ѻ҆тє́цъ на́шихъ.
И҆змла́да тѧ́жкою болѣ́знїю ѡ҆держи́ма, дѣви́ца нѣ́каѧ внеза́пное и҆сцѣле́нїе прїѧ́тъ ва́шими и҆ сы́на ва́шего къ бо́гꙋ моли́твами. съ не́ю же и҆ мы̀ благода́рственно взыва́емъ: бл҃гослове́нъ є҆сѝ, бо́же ѻ҆тє́цъ на́шихъ.
Бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, безсѣ́меннѡ ро́ждшꙋю бо́га пло́тїю прославлѧ́емъ тѧ̀, ѡ҆ бг҃ома́ти, и҆ таково́мꙋ бж҃їю смотре́нїю ᲂу҆ди́вльшесѧ, взыва́емъ: бл҃гослове́нъ є҆сѝ, бо́же ѻ҆тє́цъ на́шихъ.
Пѣ́снь и҃.
І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасе́ны, сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Воспои́мъ, вѣ́рнїи, всечестнꙋ́ю дво́ицꙋ, кѷрі́лла и҆ мр҃і́ю бг҃обл҃же́нныхъ, ѿ ни́хъ бо возсїѧ̀ на́мъ се́ргїй досточꙋ́дный, ᲂу҆краше́нїе це́ркве правосла́вныѧ и҆ мона́шествꙋющихъ ᲂу҆твержде́нїе.
Є҆диномꙋ́дренни и҆ є҆динодꙋ́шни добродѣ́тельми бы́сте, цѣломꙋ́дреннїи сꙋпрꙋ́зи. Помози́те и҆ на́мъ въ чистотѣ̀ и҆ свѧ́тости житїѐ провожда́ти, ва́съ бо тє́плыѧ хода́таи къ бо́гꙋ стѧжа́хомъ.
Любо́вь хрⷭ҇то́вꙋ, ꙗ҆̀же є҆́сть тве́рдое ѡ҆снова́нїе сꙋпрꙋжескїѧ жи́зни, со тща́нїемъ, бл҃же́ннїи, храни́ли є҆стѐ. сегѡ̀ ра́ди мо́лимъ ва́съ: помози́те сꙋпрꙋ́гѡмъ правосла̑внымъ въ любвѝ се́й пребыва́ти и҆ домѡ́мъ и҆́хъ бл҃гослове́нїе бж҃їе стѧжа́ти.
Бг҃оро́диченъ:
И҆зба́ви на́съ ѿ бѣ́дъ и҆ мно́гихъ собла́знѡвъ, всенепоро́чнаѧ, тебѣ̀ бо всѝ стѧжа́хомъ прибѣ́жище и҆ ᲂу҆твержде́нїе и҆ сп҃се́нїе дꙋ́шъ на́шихъ.
Пѣ́снь ѳ҃.
І҆рмо́съ:
Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бо́гъ ꙗ҆ви́сѧ человѣ́кѡмъ пло́тски и҆ чре́во твоѐ бы́сть простра́ннѣйшее нб҃съ. тѣ́мъ тѧ̀, богоро́дицꙋ, а҆́гг҃лѡвъ и҆ человѣ́къ чинонача̑лїѧ велича́ютъ.
Ка́кѡ ᲂу҆блажи́мъ вы̀, предо́браѧ дво́ице! ка́кѡ просла́вимъ благо́е є҆динодꙋ́шїе! а҆́ще и҆ земні́и бы́сте, но нбⷭ҇ныхъ достиго́сте, бл҃же́ннїи, и҆дѣ́же ст҃ѣ́й тро́ице предстоитѐ и҆ моли́те спасти́сѧ любо́вїю ва́съ почита́ющимъ.
А҆́гг҃льски на землѝ пожи́вше, а҆́гг҃ла земна́го и҆ человѣ́ка небе́снаго, преподо́бнаго се́ргїа, мі́рꙋ ꙗ҆ви́сте, ст҃і́и, ны́нѣ же со а҆́гг҃лы вкꙋ́пѣ водворѧ́етесѧ и҆ съ ни́ми трист҃ꙋ́ю пѣ́снь въ вы́шнихъ бг҃ови воспѣва́ете.
Гдⷭ҇ь ѻ҆би́тель хотько́вскꙋю ва́ми просла́ви, прпⷣбнїи и҆́ноцы, є҆́ю же це́рковь рꙋ́сскаѧ ᲂу҆краша́етсѧ и҆ ва́мъ си́це вопїе́тъ: ра́дꙋйтесѧ, всехва́льнїи, ѻ҆те́чества на́шего при́снїи моли́твенницы.
Бг҃оро́диченъ:
Ѡ҆ всепѣ́таѧ ма́ти! всѐ ᲂу҆пова́нїе на тѧ̀ возлага́емъ, сохранѝ на́съ под̾ кро́вомъ твои́мъ.
Свѣти́ленъ:
Ра́дꙋетсѧ дне́сь свѣ́тлѡ це́рковь рꙋ́сскаѧ, почита́ющи па́мѧть ва́шꙋ пречестнꙋ́ю, кѷрі́лле блаже́нный и҆ мр҃і́е достохва́льнаѧ. ва́ми бо ѻ҆́бразъ вѣ́ры и҆ благоче́стїѧ показа́сѧ и҆ свѣти́льникъ ѻ҆те́чествꙋ на́шемꙋ, се́ргїй преподо́бный, ꙗ҆ви́сѧ.
Бг҃оро́диченъ:
Ꙗ҆̀же свѣ́тъ бжⷭ҇твенный неизрече́нно ро́ждшаѧ, на́съ, ѡ҆мраче́нныхъ прило́гами лꙋка́вагѡ и҆ въ лѣ́ности живꙋ́щихъ просвѣтѝ, всенепоро́чнаѧ, и҆ къ добродѣ́телемъ наста́ви.