Канон святым преподобномученицам Евдокии, Дарии, Дарии и Марии Пузовским

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.

Дꙋхо́вный ли́къ соста́вльше, вѣ́рнїи, сла̑вныѧ стрⷭ҇тотє́рпицы, ꙗ҆́кѡ свѣти́льники цр҃кве, ѡ҆зарѧ́ющыѧ сердца̀, пѣ́сньми почти́мъ, вѣ́рою и҆ любо́вїю па́мѧть и҆́хъ соверша́юще.

Восхва́лимъ дне́сь четвери́цꙋ сла́внꙋю: бл҃же́ннꙋю є҆ѵдокі́ю, да́рїю, и҆нꙋ́ю да́рїю и҆ марі́ю, подо́бницъ дрє́внимъ мч҃нкѡмъ пѡ́двиги и҆ страда̑нїи.

Въ лѣ̑та, въ нѧ́же ѻ҆́гнь любвѐ ко хрⷭ҇тꙋ̀ ᲂу҆га́слъ є҆́сть, ꙗ҆ви́стесѧ, мч҃нцы дѡ́блїѧ. моли́тесѧ, да ѻ҆́гнь бжⷭ҇твенныѧ любвѐ согрѣ́етъ ѡ҆хладѣва̑ющаѧ сердца̀ на̑ша.

Бг҃оро́диченъ: Прест҃а́ѧ бцⷣе дв҃о, ты̀ да̑ры дꙋхо́вными ѿ прест҃ы́ѧ трⷪ҇цы па́че всѣ́хъ человѣ̑къ преиспо́лнена є҆сѝ. тѣ́мже, бл҃года́тїю твое́ю ᲂу҆крѣплѧ́еми, ᲂу҆миле́ннымъ се́рдцемъ млⷭ҇ти твоѧ̑ прославлѧ́емъ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Ди́вна є҆́сть, хрⷭ҇тѐ, держа́ва крѣ́пости твоеѧ̀! се́ бо ны́нѣшнїй немощствꙋ́ѧй ро́дъ крⷭ҇то́мъ твои́мъ воѡрꙋжи́сѧ и҆ си́лою твое́ю си́льнаго ѕло́бою дре́внѧго врага̀ побѣдѝ.

Воспои́мъ всѝ є҆ѵдокі́ю вѣ́рнꙋю, ѿ младе́нства крⷭ҇тъ взе́мшꙋю, по́двигъ ю҆ро́дства под̾е́мшꙋю, мꙋ́дрость же дꙋхо́внꙋю стѧжа́вшꙋю и҆ пꙋте́мъ а҆́гг҃льскагѡ житїѧ̀ є҆ди́номꙋ женихꙋ̀ нбⷭ҇номꙋ ᲂу҆невѣ́стившꙋюсѧ.

Крѡ́тки и҆ неѕлѡ́бивы бы́вшѧ во все́мъ житїѝ ва́шемъ, послꙋша́нїю во́льнѡ навы́кли є҆стѐ, мч҃нцы да́рїе, и҆на́ѧ да́рїе и҆ марі́е, сегѡ̀ ра́ди на нб҃сѣ́хъ ѡ҆брѣлѝ є҆стѐ поко́й. моли́те бг҃а ѡ҆ дꙋша́хъ на́шихъ.

Бг҃оро́диченъ: Жи́знь ро́ждшаѧ, дв҃о всенепоро́чнаѧ, се́рдца моегѡ̀ стрꙋ́пы и҆сцѣлѝ, хода́тайствы твои́ми, ꙗ҆̀же къ сн҃ꙋ твоемꙋ̀, бг҃обл҃же́ннаѧ.

Сѣда́ленъ, гла́съ и҃:

Ѿ трꙋдѡ́въ земны́хъ и҆ страда́нїй многови́дныхъ крыла́ми вѣ́ры во ѻ҆би́тєли нбⷭ҇ныѧ возлетѣ́ли є҆стѐ, ма́тєри бг҃обл҃жє́нныѧ, и҆дѣ́же прⷭ҇то́лꙋ вседержи́телѧ предстои́те. того̀ ѡ҆ на́съ моли́те прегрѣше́нїй ѡ҆ставле́нїе дарова́ти и҆ дꙋша́мъ на́шымъ ве́лїю млⷭ҇ть.

Бг҃оро́диченъ: Млⷭ҇рдїѧ сꙋ́щи и҆сто́чникъ, не лишѝ на́съ млⷭ҇ти твоеѧ̀, бцⷣе, но съ мч҃нцами, въ землѝ на́шей просїѧ́вшими, гдⷭ҇а молѝ свободи́ти на́съ ѿ рабо́ты вра́жїѧ и҆ ᲂу҆тверди́ти во бл҃гоче́стїи и҆ чистотѣ̀.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Во днѝ и҆ нощѝ мл҃твы творѧ́щѧ, ни сна̀ ѻ҆чи́ма, ни вѣ́ждома свои́ма дрема́нїѧ не дава́ли є҆стѐ ѿню́дъ,

Хла́дъ и҆ гла́дъ во́льнѡ претерпѣва́ющѧ, мч҃нцы сла̑вныѧ. наꙋчи́те на́съ моли́тисѧ прилѣ́жнѡ.

Ра́дꙋющасѧ, терпѣ́ли є҆стѐ клевєты̑ и҆ поношє́нїѧ ѿ человѣ̑къ и҆ разли̑чнаѧ стрѣлѧ̑нїѧ вра̑жїѧ хрⷭ҇та̀ ра́ди, жениха̀ своегѡ̀, да любы̀ бж҃їѧ въ мі́рѣ се́мъ грѣ́шнѣмъ возсїѧ́етъ.

Помы́сливши немощнꙋ́ю є҆ѵдокі́ю ѡ҆ста́вити, дѣви́ца ю҆́наѧ въ со́нномъ видѣ́нїи сподо́бисѧ зрѣ́ти прпⷣбнаго серафі́ма, и҆́же є҆ѵдокі́ю и҆ слꙋжа́щихъ є҆́й наречѐ дще́рьми свои́ми.

Бг҃оро́диченъ: І҆кѡ́ною і҆́верскою не то́чїю а҆ѳѡ́нъ просвѣща́етсѧ, но и҆ и҆ні́и гра́ди и҆ вє́си ѡ҆сщ҃а́ютсѧ, и҆ чꙋде́снꙋю по́мощь прїе́млюще, и҆сто́чникъ ᲂу҆тѣше́нїѧ въ не́й ѡ҆брѣта́ютъ и҆ вопїю́тъ: ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго: но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Мч҃нце є҆ѵдокі́е пресла́внаѧ, доны́нѣ просвѣща́еши дꙋ́шы человѣ́чєскїѧ свѣ́томъ бл҃года́ти, тебѣ̀ да́нныѧ, тѣ́мже и҆ на́съ, любо́вїю соверша́ющихъ всепра́зднственнꙋю па́мѧть твою̀, ѿ бѣ́дъ и҆ напа́стей из҆ба́ви.

Жениха̀ вре́меннаго не восхотѣ́вши зрѣ́ти, мч҃нце да́рїе, и҆збїе́нїе ѿ срѡ́дникъ претерпѣ́ла є҆сѝ и҆ да́же до сме́рти є҆ди́номꙋ гдⷭ҇ꙋ дꙋ́хъ горѧ́щїй возноси́ла є҆сѝ.

Въ се́рдцѣ свое́мъ хра́минꙋ бл҃гоꙋха́ннꙋ сотво́рши, и҆ ты̀, мч҃нце да́рїе, ѻ҆́бразъ и҆́стиннагѡ смире́нїѧ и҆ соверше́ннагѡ терпѣ́нїѧ на́мъ ꙗ҆ви́ла є҆сѝ.

Ст҃и́тель нїкола́й трикра́ты ꙗ҆ви́сѧ тѝ, мч҃нце марі́е сла́внаѧ, на по́двигъ стра́нничества пе́рвѣе бл҃гословлѧ́ѧ, по́слѣжде бл҃же́ннѣй є҆ѵдокі́и послꙋжи́ти повелѣва́ѧ.

Бг҃оро́диченъ: Ра́дꙋйсѧ, приснодв҃о, злата́ѧ кади́льнице, въ ню́же вложи́сѧ нбⷭ҇ный ѳѷмїа́мъ хрⷭ҇то́съ, ѡ҆бл҃гоꙋха́ѧй притека́ющихъ къ тебѣ̀, бцⷣе.

Пѣ́снь ѕ҃.

І҆рмо́съ: Мл҃твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Четверочи́сленный стрⷭ҇тоте́рпицъ ли́къ на́мъ возсїѧ̀ ѿ землѝ нижегоро́дскїѧ, ꙗ҆́кѡ ѕвѣ́зды на тве́рди цр҃ко́внѣй, вѣ̑рныѧ просвѣща́ѧй и҆ пре́лести тьмꙋ̀ разгонѧ́ѧй.

Болѣ́зней неисцѣ́льныхъ терпѣ́нїемъ тве́рдымъ пе́рвѣе побѣди́ла є҆сѝ страсте́й возста̑нїѧ, послѣдѝ, пострада́вши крѣпча́йше, низложи́ла є҆сѝ ѕлочести́выхъ держа́вꙋ, є҆ѵдокі́е мч҃нце.

Да восхва́лѧтсѧ ны́нѣ съ є҆ѵдокі́ею да́рїа, и҆на́ѧ да́рїа и҆ марі́а сла̑вныѧ, послꙋша́нїемъ и҆ терпѣ́нїемъ тве́рдымъ просїѧ́вшыѧ, хрⷭ҇то́ва вїногра́да рѡ́зги доброплѡ́дныѧ.

Бг҃оро́диченъ: Помо́щницꙋ си́льнꙋ вѣ́дꙋще тѧ̀, всебл҃га́ѧ, моле́нїе тебѣ̀ прино́симъ ѿ всеѧ̀ дꙋшѝ: вонмѝ и҆ ᲂу҆слы́ши ны̀, влⷣчце, и҆ и҆зба́ви всѧ́кагѡ гнѣ́ва и҆ преще́нїѧ бж҃їѧ рабы̑ твоѧ̑.

Конда́къ, гла́съ ѕ҃:

Житїе́мъ првⷣнымъ къ досто́йномꙋ прїѧ́тїю мч҃нчества себѐ ᲂу҆гото́виша, триднє́внаѧ и҆збїє́нїѧ и҆ сме́рть претерпѣ́ли є҆стѐ, невѣ̑сты хрⷭ҇тѡ́вы преди̑вныѧ, бл҃жє́нныѧ є҆ѵдокі́е, да́рїе, и҆на́ѧ да́рїе и҆ марі́е. ны́нѣ, мно́гими чꙋдесы̀ и҆ и҆сцѣле́нїи просїѧ́вша, моли́тесѧ прилѣ́жнѡ, да сп҃се́тъ гдⷭ҇ь дꙋ́шы на́шѧ.

І҆́косъ:

Прїиди́те, мона́шествꙋющихъ сосло́вїе, прїиди́те, вѣ́ры правосла́вныѧ рачи́телїе, прїиди́те, празднолю́бцы, всѧ́къ во́зрастъ, пѣ́сньми дꙋхо́вными похва́лимъ мл҃твєнницы на́шѧ: по́стникѡвъ похвалꙋ̀, печа́льныхъ ᲂу҆тѣше́нїе, недꙋ́гꙋющихъ посѣще́нїе и҆ сꙋ́щымъ въ бѣда́хъ ско́рое вспоможе́нїе, точа́щихъ всѣ̑мъ и҆сцѣлє́нїѧ ѻ҆би́льнѡ и҆ всѧ́кое проше́нїе и҆сполнѧ́ющихъ. и҆̀мже вѣ́рнѡ возопїе́мъ: моли́тесѧ прилѣ́жнѡ, да сп҃се́тъ гдⷭ҇ь дꙋ́шы на́шѧ.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша пою́ще: ѻ҆тцє́въ бж҃е, бл҃гослове́нъ є҆сѝ.

Вои́стиннꙋ побѣжде́нъ бы́сть ва́ми вра́гъ, зе́млю и҆ мо́ре хвалѧ́йсѧ низпрове́ргнꙋти, твердѣ́йшимъ а҆дама́нта терпѣ́нїемъ попра́сте того̀, хрⷭ҇та̀ въ себѣ̀ и҆мꙋ́щѧ, непобѣди̑мыѧ, є҆го́же воспѣва́ли є҆стѐ: ѻ҆тцє́въ бж҃е, бл҃гослове́нъ є҆сѝ.

Беззакѡ́нїѧ лю̑таѧ творѧ́ще, подви́жницъ хрⷭ҇то́выхъ безбѡ́жницы тща́хꙋсѧ ᲂу҆би́ти, і҆кѡ̑ны же ст҃ы̑ѧ нога́ми попира́хꙋ, ѻ҆ба́че ѿ і҆́верскїѧ і҆кѡ́ны бж҃їѧ мт҃ре свѣ́тъ возсїѧ̀ неизрече́нный всѣ̑мъ вѣ̑рнымъ, пою́щымъ: ѻ҆тцє́въ бж҃е, бл҃гослове́нъ є҆сѝ.

Триднє́внаѧ и҆збїє́нїѧ, порꙋга̑нїѧ, и҆ ѕлохꙋлє́нїѧ претерпѣ́ли є҆стѐ мꙋ́жественнѣ, стрⷭ҇тотє́рпицы, си́ми бо, ꙗ҆́кѡ зла́то, и҆скꙋсѝ ва́съ гдⷭ҇ь, и҆ ꙗ҆́кѡ всесожже́нїе тꙋ́чно, прїѧ́тъ. є҆мꙋ́же и҆ воспѣва́ли є҆стѐ: ѻ҆тцє́въ бж҃е, бл҃гослове́нъ є҆сѝ.

Бг҃оро́диченъ: Бг҃а ѻ҆ц҃а̀ дщѝ ꙗ҆ви́ласѧ є҆сѝ, мр҃і́е, сн҃а же мт҃и, приснодв҃о, невѣ́ста же дх҃а ст҃а́гѡ, пречⷭ҇таѧ, селе́нїе свѣтонача́льныѧ трⷪ҇цы, всегѡ̀ бжⷭ҇тва̀ хра́мъ ѡ҆дꙋшевле́нъ.

Пѣ́снь и҃.

І҆рмо́съ: Седмери́цею пе́щь, халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Согла́снѡ, вѣ́рнїи, мч҃нцъ марі́ю, да́рїю, и҆нꙋ́ю да́рїю съ бл҃же́нною є҆ѵдокі́ею воспои́мъ, ꙗ҆́кѡ низложи́тельницъ врага̀ и҆ невѣ́стъ хрⷭ҇то́выхъ, пою́щихъ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

Свѧты̑ѧ та̑йны хрⷭ҇тѡ́вы въ де́нь кончи́ны сподо́билисѧ є҆стѐ прїѧ́ти ѿ рꙋкꙋ̀ і҆ере́а васі́лїа и҆ та́кѡ, ѿ гдⷭ҇а ᲂу҆крѣплѧ́ємы, мꙋ́жески на сме́рть потеклѝ є҆стѐ, пою́щѧ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

Свы́ше назира́юща на соверша́ющихъ па́мѧть ва́шꙋ, вѣнценѡ́сицы сла̑вныѧ, хода́тайствꙋйте ᲂу҆ всевы́шнѧгѡ даропода́телѧ вре́мєннаѧ и҆ вѣ̑чнаѧ бл҃га̑ѧ на́мъ, зовꙋ́щымъ: всѧ̑ дѣла̀ гдⷭ҇нѧ, гдⷭ҇а по́йте и҆ превозноси́те во всѧ̑ вѣ́ки.

Бг҃оро́диченъ: Ꙗ҆́же є҆ди́на невмѣсти́маго прїе́мши и҆ ро́ждши бг҃а сло́ва воплоще́на, молѝ сп҃сти́сѧ дꙋша́мъ на́шымъ.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Влекѡ́мы на заколе́нїе, мꙋчи́телей вопроша́хꙋ стрⷭ҇тотє́рпицы: хрⷭ҇та̀ и҆сповѣ́дахомъ бг҃а и҆ тѣ́мъ лжꙋ̀ ва́шꙋ ѡ҆бличи́хомъ, за ко́е беззако́нїе без̾ сꙋда̀ хо́щете на́съ ᲂу҆би́ти; ѻ҆ба́че ны́нѣ сла̑вныѧ мч҃нцы во сла́вѣ нбⷭ҇нѣй сїѧ́ютъ.

Дне́сь землѧ̀ нижегоро́дскаѧ ва́шꙋ па́мѧть пра́зднꙋетъ: вы́ бо ꙗ҆ви́стесѧ столпѝ и҆ бжⷭ҇твєннаѧ забра̑ла, и҆ ᲂу҆твержде́нїе, мл҃твєнницы и҆ застꙋ̑пницы на́шѧ, бг҃обл҃жє́нныѧ.

Трїѷпоста́сный бж҃е на́шъ, но́выхъ мч҃нцъ твои́хъ прїе́мый по́двиги и҆ пресла́внѡ ᲂу҆вѣнча́вый и҆̀хъ, тѣ́хъ предста́тельствомъ сп҃сѝ рабы̑ твоѧ̑ и҆ сподо́би ны̀ вѣ́чнѡ твою̀ держа́вꙋ сла́вити.

Бг҃оро́диченъ: Приведѝ, дв҃о, къ сн҃ꙋ твоемꙋ̀ но́выхъ мч҃нцъ ли́къ четверочи́сленный и҆ съ ни́ми помоли́сѧ, ꙗ҆́кѡ да несвѣти́магѡ ѻ҆гнѧ̀ и҆зба́вльшесѧ, сподо́бимсѧ црⷭ҇твїѧ нбⷭ҇нагѡ.

Свѣти́ленъ:

Прїимѝ, гдⷭ҇и, нѡ́выѧ мч҃нцы, є҆ѵдокі́ю бл҃же́ннꙋю, да́рїю, и҆нꙋ́ю да́рїю и҆ марі́ю, ꙗ҆́кѡ же́ртвꙋ соверше́ннꙋю, ꙗ҆́кѡ бл҃гово́нный ѳѷмїа́мъ, ꙗ҆́кѡ мѵ́ро многоцѣ́нное, ѡ҆сщ҃а́ющее и҆ просвѣща́ющее дꙋ́шы на́шѧ.

Бг҃оро́диченъ: Воспои́мъ дне́сь хвалы̑ прест҃ѣ́й мр҃і́и дв҃ѣ, пло́ть взаимода́вшей є҆ди́номꙋ ѿ ст҃ы́ѧ трⷪ҇цы, ѿ неѧ̀ человѣ́кѡмъ ро́ждшемꙋсѧ. сегѡ̀ ра́ди велича́емъ ю҆̀, ꙗ҆́кѡ мт҃рь свѣ́та и҆ бцⷣꙋ.