Пѣ́снь а҃.
І҆рмо́съ:
Волно́ю морско́ю скры́вшаго дре́вле гони́телѧ мꙋчи́телѧ, под̾ земле́ю скры́ша сп҃се́нныхъ ѻ҆́троцы: но мы̀ ꙗ҆́кѡ ѻ҆трокови̑цы, гдⷭ҇еви пои́мъ, сла́внѡ бо просла́висѧ.
Сподо́би, гдⷭ҇и, просла́вити по достоѧ́нїю прпⷣбномч҃нкѡвъ солове́цкихъ, венїамі́на и҆ нїки́фора, ті́и бо си́лою хрⷭ҇то́вою воѡрꙋжи́вшесѧ, и҆скꙋше́нїємъ вра̑жїимъ противоста́ша и҆ со́нма мч҃нкѡвъ ᲂу҆краше́нїе пресвѣ́тлое ꙗ҆ви́шасѧ.
Ѿ ко́рене бл҃гочести́вагѡ произше́дъ, ст҃е венїамі́не, вѣ́рѣ хрⷭ҇то́вѣ и҆ любвѝ бжⷭ҇твеннѣй и҆змла́да прилѣжа́лъ є҆сѝ, и҆ болѣ̑зни и҆ трꙋды̀ бл҃годꙋ́шнѡ претерпѣва́ѧ, посредѣ̀ мѧте́жей мно́гихъ до конца̀ сїѧ̑ сохрани́лъ є҆сѝ.
Ѿ ст҃ы́ѧ і҆кѡ́ны вседержи́телѧ гла́съ ᲂу҆слы́шавъ, ѻ҆́тче венїамі́не, мїрска̑ѧ всѧ̑ ѿри́нꙋлъ є҆сѝ и҆ ко ѡ҆то́кꙋ солове́цкомꙋ стѡпы̀ своѧ̑ напра́вилъ є҆сѝ, и҆дѣ́же во ѻ҆би́тели ст҃ѣ́й всели́всѧ, въ послꙋша́нїе бг҃ꙋ всецѣ́лѡ себѐ вда́лъ є҆сѝ.
Бг҃оро́диченъ:
Пꙋ́ть ко сп҃се́нїю ѿкры́ла є҆сѝ на́мъ, бцⷣе, житїѧ̀ непоро́чнагѡ ѻ҆́бразъ чистѣ́йшїй ꙗ҆влѧ́ющи. тѣ́мже на тѧ̀ взира́юще и҆ тебѣ̀ молѧ́щесѧ, и҆з̾ глꙋбины̀ серде́чныѧ взыва́емъ: ꙗ҆́звы грѣхѡ́въ и҆ стрꙋ́пы страсте́й на́шихъ и҆сцѣлѝ слеза́ми покаѧ́нїѧ.
Пѣ́снь г҃.
І҆рмо́съ:
Тебѐ на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши на ло́бнѣмъ ви́сима, ᲂу҆́жасомъ мно́гимъ содрога́шесѧ, нѣ́сть ст҃ъ, ра́звѣ тебѣ̀, гдⷭ҇и, взыва́ющи.
Пѡ́двиги мно́гими подвиза́всѧ, венїамі́не всебл҃же́нне, восходи́лъ є҆сѝ ѿ си́лы въ си́лꙋ, и҆ къ мона́шескомꙋ чи́нꙋ и҆ са́нꙋ сщ҃е́нномꙋ сопричте́нъ бы́въ, слꙋже́нїе твоѐ ᲂу҆се́рднѡ соверша́лъ є҆сѝ под̾ покро́вомъ первонача́льникѡвъ ѻ҆би́тели солове́цкїѧ, къ ни̑мже ᲂу҆миле́нною дꙋше́ю мл҃твы простира́лъ є҆сѝ.
Мно́гихъ ра́ди добродѣ́телей и҆ кро́ткагѡ твоегѡ̀ дꙋ́ха, бг҃обл҃же́нне венїамі́не, нача́льникъ сі́йскїѧ ѻ҆би́тели поста́вленъ бы́лъ є҆сѝ, и҆дѣ́же бжⷭ҇твеннымъ покро́вомъ прест҃ы́ѧ трⷪ҇цы и҆ предста́тельствомъ прпⷣбнагѡ а҆нтѡ́нїа, первонача́льника ѻ҆би́тели сеѧ̀, ᲂу҆крѣплѧ́емь, до́брѣ потрꙋди́лсѧ є҆сѝ, пꙋтеводѧ̀ ста́до хрⷭ҇то́во ко сп҃се́нїю.
Нестрое́нїю во ѻ҆би́тели солове́цтѣй бы́вшꙋ, и҆збра́ша тѧ̀ бра́тїѧ въ наста́вника дꙋхо́внаго себѣ̀, вѣ́дꙋще тѧ̀ бл҃гонра́вїемъ и҆ послꙋша́нїемъ ᲂу҆кра́шена, любо́вїю къ бг҃ꙋ и҆ бли̑жнимъ ѡ҆бдержи́ма и҆ мꙋ́дрость дꙋхо́внꙋю стѧжа́вша, венїамі́не достохва́льне.
Бг҃оро́диченъ:
Ѡ҆брѣ́тши бл҃года́ть ᲂу҆ сн҃а твоегѡ̀ застꙋпа́ти немощны́й ро́дъ человѣ́ческїй, бцⷣе, неꙋсы́пнѡ назира́еши лю́ди хрⷭ҇тїа̑нскїѧ, и҆́нокѡмъ наипа́че покрови́тельствꙋеши, ꙗ҆́кѡ а҆́гг҃льскомꙋ чи́нꙋ подража́телємъ, сама̀ бо вы́шши а҆́гг҃льскагѡ жи́тельство на́мъ ꙗ҆ви́ла є҆сѝ.
Сѣда́ленъ, гла́съ є҃:
Пла́мень ѻ҆́гненный проше́дше, прпⷣбномч҃нцы, вѣ́чнагѡ поко́ѧ сла́дость ѡ҆брѣлѝ є҆стѐ, и҆ по́двигъ во хрⷭ҇тѣ̀ жи́тельства мꙋ́жественнѣ соверши́вше, пра́ведною кро́вїю бл҃же́нство ра́йское сниска́ли є҆стѐ. мо́лимъ ва́съ, ст҃і́и: моли́тесѧ за ны̀ ко гдⷭ҇ꙋ, по́прище житїѧ̀ на́шегѡ на́мъ досто́йнѡ проитѝ, стрѣ́лъ вра́жїихъ и҆збѣ́гнꙋти и҆ вѣ́чныѧ поги́бели и҆зба́витисѧ.
Бг҃оро́диченъ:
Застꙋ́пницꙋ тѧ̀ и҆́мамы пред̾ бг҃омъ, пречⷭ҇таѧ дв҃о, не пре́зри ра̑бъ твои́хъ, на предста́тельство твоѐ надѣ́ющихсѧ, моле́нїе на́ше прїимѝ и҆ по́мощь съ нб҃сѐ низпослѝ, да сп҃се́нїе дꙋ́шъ на́шихъ ѡ҆брѧ́щемъ.
Пѣ́снь д҃.
І҆рмо́съ:
На крⷭ҇тѣ̀ твоѐ бжⷭ҇твенное и҆стоща́нїе прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ си́льныхъ пресѣ́клъ є҆сѝ держа́вꙋ, бл҃же, прїѡбща́ѧсѧ сꙋ́щымъ во а҆́дѣ, ꙗ҆́кѡ всеси́ленъ.
Повелѣ́нїю гдⷭ҇ню повинꙋ́ѧсѧ, крⷭ҇тъ настоѧ́тельства ѻ҆би́тели солове́цкїѧ, тѧ̀ возрасти́вшей, со смире́нїемъ прїѧ́лъ є҆сѝ, венїамі́не достобл҃же́нне. є҆гда̀ же си́ла вра́жїѧ безꙋ́мнѡ на цр҃ковь правосла́внꙋю воста̀ страда̑нїѧ, пред̾ꙋготѡ́ваннаѧ тебѣ̀, безро́потнѣ воспрїѧ́лъ є҆сѝ.
До́брое жи́тельство попра́вше, нѣ́цыи ѿ и҆́нѡкъ солове́цкихъ послꙋша́нїю не поревнова́ша, и҆ самохотѣ́нїемъ мѣ́сто сꙋпоста́тꙋ въ се́рдцѣ свое́мъ да́вше, ско́рбь ве́лїю ѻ҆би́тели солове́цтѣй и҆ бг҃оизбра́нномꙋ венїамі́нꙋ, настоѧ́телю своемꙋ̀, сотвори́ша, дꙋ́шꙋ свою̀ за ѻ҆́вцы своѧ̑ положи́ти хотѧ́щемꙋ.
Дꙋ́хомъ въ гѡ́рнѧѧ простира́ѧсѧ, до́льними скорбьмѝ ѡ҆бремене́нъ быва́ше, венїамі́не прпⷣбне, но мл҃твою и҆ любо́вїю бꙋ́рю мѧте́жа посредѣ̀ непокори́выхъ во ѻ҆би́тели дре́вней ᲂу҆кроща́лъ є҆сѝ, ѻ҆́тче бг҃омꙋ́дре, ста́до раз̾ѡбще́нное и҆́нокѡвъ во є҆ди́но собира́ѧ и҆ бг҃а въ трⷪ҇цѣ нераздѣ́льнагѡ ѡ҆ поми́лованїи ᲂу҆молѧ́ѧ.
Бг҃оро́диченъ:
Мо́лимъ тѧ̀, бцⷣе дв҃о, вра́жїими ѕлодѣ́йствы ѡ҆бꙋрева́емїи: сѣте́й ѕлоꙋхищре́нныхъ свободѝ, мꙋчи́тельства страсте́й на́съ и҆зба́ви, ми́ръ бж҃їй въ дꙋ́шы на́шѧ водворѝ, терпѣ́нїемъ хрⷭ҇то́вымъ снабдѣва́ющи.
Пѣ́снь є҃.
І҆рмо́съ:
Бг҃оѧвле́нїѧ твоегѡ̀, хрⷭ҇тѐ, къ на́мъ млⷭ҇тивнѡ бы́вшагѡ, и҆са́їа свѣ́тъ ви́дѣвъ невече́рнїй, и҆з̾ но́щи ᲂу҆́треневавъ взыва́ше: воскрⷭ҇нꙋтъ ме́ртвїи, и҆ воста́нꙋтъ сꙋ́щїи во гробѣ́хъ, и҆ всѝ земноро́днїи возра́дꙋютсѧ.
Ѻ҆те́чествꙋ земно́мꙋ въ чи́нѣ во́инстѣмъ че́стнѡ послꙋжи́въ, бг҃обл҃же́нне нїки́форе, во́инствꙋ хрⷭ҇то́вꙋ прїѡбщи́тисѧ и҆ є҆ди́номꙋ бг҃ꙋ порабо́тати ѕѣлѡ̀ возжела́лъ є҆сѝ, и҆ во ѻ҆би́тель солове́цкꙋю всели́всѧ, досто́йнѡ въ чи́нѣ и҆́ночестѣмъ и҆ са́нѣ і҆ере́йстѣмъ гдⷭ҇еви послꙋжи́лъ є҆сѝ.
Ѻ҆бѣ́ты и҆́ночєскїѧ ᲂу҆се́рднѡ и҆сполнѧ́ѧ, наста́вника тѝ бг҃омъ да́ннаго венїамі́на любо́вїю почита́лъ є҆сѝ, нїки́форе прехва́льне, тѣ́мже и҆ стезе́ю стрⷭ҇тоте́рпческою вкꙋ́пѣ ше́ствовавъ, мч҃нчества красото́ю съ ни́мъ ᲂу҆краси́лсѧ є҆сѝ.
Тве́рдѡ хрⷭ҇та̀ и҆сповѣ́давше и҆ напа̑сти вра̑жїѧ нивочто́же вмѣни́вше, пострада́ти за того̀ сподо́билисѧ є҆стѐ, венїамі́не и҆ нїки́форе, ᲂу҆ничиже́нїе ѿ беззако́нныхъ, и҆згна́нїе и҆з̾ ѻ҆би́тели, во ю҆до́ль мꙋче́нїй нечести́выми ѡ҆браще́нныѧ, трꙋды̀ подневѡ́льныѧ, поношє́нїѧ и҆ клеветꙋ̀, всѧ̑ претерпѣ́ли є҆стѐ, прпⷣбнїи.
Бг҃оро́диченъ:
Над̾ земле́ю рꙋ́сскою покро́въ держа́вный распросте́рши, не ѡ҆ста́вила є҆сѝ на́съ ѿ ѕлодѣѧ́нїй льсти́вагѡ поги́бнꙋти, застꙋ́пнице всемлⷭ҇тиваѧ. помозѝ на́мъ и҆ ны́нѣ вѣ́рꙋ и҆́стиннꙋю без̾ стра́ха и҆сповѣ́дати и҆ правосла́вїѧ побо́рникѡмъ бы́ти.
Пѣ́снь ѕ҃.
І҆рмо́съ:
Ꙗ҆́тъ бы́сть, но не ᲂу҆держа́нъ въ пе́рсехъ ки́товыхъ і҆ѡ́на: тво́й бо ѻ҆́бразъ носѧ̀, страда́вшагѡ, и҆ погребе́нїю да́вшагѡсѧ, ꙗ҆́кѡ ѿ черто́га ѿ ѕвѣ́рѧ и҆зы́де. приглаша́ше же кꙋстѡді́и: хранѧ́щїи сꙋ́єтнаѧ и҆ лѡ́жнаѧ, млⷭ҇ть сїю̀ ѡ҆ста́вили є҆стѐ.
Є҆гда̀ мра́къ безбо́жїѧ пости́же зе́млю рꙋ́сскꙋю и҆ солове́цкꙋю ѻ҆би́тель въ темни́цꙋ ѡ҆братѝ, тогда̀ многоскѡ́рбнаѧ сердца̀ ва̑ша и҆спо́лнишасѧ болѣ́зней и҆ скорбе́й, ꙗ҆̀же и҆ до конца̀ мꙋ́жественнѣ понеслѝ є҆стѐ, хрⷭ҇тѡ́вы стрⷭ҇тоте́рпцы, про́мыслъ бж҃їй бл҃гі́й во все́мъ разꙋмѣва́юще.
Не́мощь человѣ́ческꙋю вѣ́дꙋще, всѐ ᲂу҆пова́нїе на бг҃а всецѣ́лѡ возложи́ли є҆стѐ, прпⷣбнїи, и҆ со смире́нїемъ и҆ кро́тостїю првⷣное є҆гѡ̀ попꙋще́нїе воспрїи́мше, вѣ́рность влⷣцѣ и҆ зва́нїю вы́шнемꙋ досто́йнѡ сохрани́ли є҆стѐ. не ѡ҆ста́вите ᲂу҆̀бо на́съ, ст҃і́и, па́мѧть ва́шꙋ свѣ́тлѡ почита́ющихъ.
Прпⷣбнымъ ѻ҆тцє́мъ поревнова́вше и҆ и҆сповѣ́дникѡмъ вѣ́ры, за хрⷭ҇та̀ страда̑нїѧ съ ра́достїю прїе́мшымъ, послѣ́довавше, соприча̑стницы соловє́цкимъ новомч҃нкѡмъ ꙗ҆ви́стесѧ и҆ цр҃ковь рꙋ́сскꙋю пѡ́двиги свѣ́тлѡ ᲂу҆краси́сте, бг҃омꙋ́дрїи.
Бг҃оро́диченъ:
Влⷣчце мі́ра, мт҃и всепѣ́таѧ, прїимѝ серде́чнꙋю мл҃твꙋ ра̑бъ твои́хъ, во ᲂу҆миле́нїи тѝ приноси́мꙋю, и҆ не лишѝ на́съ млⷭ҇тивагѡ твоегѡ̀ застꙋпле́нїѧ, но ꙗ҆́кѡ бл҃га́ѧ, сп҃сѝ дꙋ́шы на́шѧ.
Конда́къ, гла́съ з҃.
Бжⷭ҇твенными страда̑нїи, ꙗ҆̀же за хрⷭ҇та̀ претерпѣ́вше, ѻ҆тцы̀ всебл҃же́ннїи, ꙗ҆́кѡ зла́то въ горни́лѣ дꙋ́шы своѧ̑ во ѻ҆гнѝ ѡ҆чи́стили є҆стѐ и҆ во ѻ҆би́тєли гѡ́рнїѧ ко влⷣцѣ своемꙋ̀ ны́нѣ пресели́лисѧ є҆стѐ. сегѡ̀ ра́ди прилѣ́жнѡ чти́мъ и҆ ᲂу҆бл҃жа́емъ ва́съ, прпⷣбномч҃нцы венїамі́не и҆ нїки́форе.
І҆́косъ:
Бл҃года́тїю гдⷭ҇нею на по́двигъ и҆сповѣ́дническїй и҆збра́ннїи, венїамі́не и҆ нїки́форе, преподо́бїемъ и҆ пра́вдою бг҃ꙋ потрꙋди́лисѧ є҆стѐ во ст҃ѣ́й ѻ҆би́тели солове́цтѣй, си́лою же вра́жїею во времена̀ безбѡ́жнаѧ ѿ неѧ̀ ᲂу҆дале́ннїи, въ мл҃твѣ, и҆ терпѣ́нїи, и҆ тве́рдомъ ᲂу҆пова́нїи дни̑ житїѧ̀ своегѡ̀ провожда́ли є҆стѐ. смире́нїю же крⷭ҇тномꙋ прилѣжа́вше, ра́достнѣ сла́вили є҆стѐ гдⷭ҇а, всѧ̑ воскр҃си́вшаго собо́ю, и҆ страда́льческꙋю сме́рть прїе́мше во дни̑ ст҃ы́ѧ па́схи, красото́ю мч҃нческою ᲂу҆краси́лисѧ є҆стѐ во црⷭ҇твїи сп҃са на́шегѡ. сегѡ̀ ра́ди прилѣ́жнѡ чти́мъ и҆ ᲂу҆бл҃жа́емъ ва́съ, прпⷣбномч҃нцы венїамі́не и҆ нїки́форе.
Пѣ́снь з҃.
І҆рмо́съ:
Неизрече́нное чꙋ́до, въ пещѝ и҆зба́вивый прпⷣбныѧ ѻ҆́троки и҆з̾ пла́мене, во гро́бѣ ме́ртвъ бездыха́ненъ полага́етсѧ, во сп҃се́нїе на́съ пою́щихъ: и҆зба́вителю бж҃е, бл҃гослове́нъ є҆сѝ.
Ꙗ҆́кѡ пꙋсты̑нницы, во и҆згна́нїи пребыва́ли є҆стѐ, венїамі́не и҆ нїки́форе, трꙋды̑ и҆ мл҃твами подвиза́ющесѧ де́нь и҆ но́щь и҆ славосло́вїе бг҃ꙋ въ трⷪ҇цѣ є҆диносꙋ́щномꙋ и҆ нераздѣ́льномꙋ возсыла́юще: и҆зба́вителю бж҃е, бл҃гослове́нъ є҆сѝ.
Мѣ́сто по́двигѡвъ послѣ́днихъ въ де́брехъ сѣ́верныхъ и҆збра́ли є҆стѐ, досточꙋ́днїи, и҆дѣ́же мно́гѡ потрꙋди́вшесѧ, житїѐ земно́е мч҃нчески сконча́ли є҆стѐ. ны́нѣ прⷭ҇то́лꙋ всевы́шнѧгѡ предстои́те и҆ побѣдоно́снѡ взыва́ете: и҆зба́вителю бж҃е, бл҃гослове́нъ є҆сѝ.
Земны́ѧ ю҆до́ли го́рєсти во мно́жествѣ позна́вше, бла̑гъ неизрече́нныхъ ны́нѣ наслажда́етесѧ, хрⷭ҇тѡ́ви стрⷭ҇тоте́рпцы, вѣ́ренъ бо гдⷭ҇ь, ѡ҆бѣтова́вый црⷭ҇твїе нбⷭ҇ное лю́бѧщымъ є҆го̀ и҆ вопїю́щымъ: и҆зба́вителю бж҃е, бл҃гослове́нъ є҆сѝ.
Бг҃оро́диченъ:
Завѣ́та вѣ́чнагѡ бг҃оизбра́ннаѧ таи́ннице, и҆ црⷭ҇тва хрⷭ҇то́ва всемлⷭ҇тиваѧ врата́рнице! гдⷭ҇а и҆ влⷣкꙋ вѣкѡ́въ ᲂу҆молѝ ѡ҆ на́съ немощны́хъ, ѡ҆ѕлобле́нїемъ вра́жїимъ мꙋ́чимыхъ, ты́ бо, бл҃госе́рдаѧ мт҃и, помо́щница те́плаѧ и҆ хода́таица живота̀ вѣ́чнагѡ хрⷭ҇тїа́нѡмъ при́снѡ ꙗ҆влѧ́ешисѧ.
Пѣ́снь и҃.
І҆рмо́съ:
Оу҆жасни́сѧ боѧ́йсѧ, нб҃о, и҆ да подви́жатсѧ ѡ҆снова̑нїѧ землѝ: сѐ бо въ мертвецѣ́хъ вмѣнѧ́етсѧ въ вы́шнихъ живы́й, и҆ во гро́бъ ма́лъ страннопрїе́млетсѧ. є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.
Четыредесѧ́тницꙋ ст҃ꙋ́ю по́стнически соверши́вше, па́схꙋ гдⷭ҇ню воспѣва́ли є҆стѐ, дх҃омъ пламенѣ́юще. ѻ҆́гнь же мꙋчи́тельный, человѣ̑ки ѕло́бными разжже́нный, мꙋ́жественнѣ претерпѣ́вше, въ черто́гъ ᲂу҆краше́нный внидо́сте, хрⷭ҇та̀ воскрⷭ҇ша пою́ще и҆ превозносѧ́ще во всѧ̑ вѣ́ки.
Па́мѧть ва́шꙋ пра́зднꙋюще, новомч҃нцы ст҃і́и, ра́дꙋемсѧ и҆ ликовствꙋ́емъ, дне́сь бо па́сха ва́ша соверша́етсѧ ѿ землѝ въ селє́нїѧ нбⷭ҇наѧ восхо́домъ невозбра́ннымъ, вы̀ же, ꙗ҆́кѡ вѣ́рнїи слꙋжи́телїе хрⷭ҇тѡ́ви, наслѣ̑дницы бл҃гослове́ннїи нбⷭ҇нагѡ ѻ҆те́чества ꙗ҆ви́стесѧ, пою́ще и҆ превозносѧ́ще гдⷭ҇а во всѧ̑ вѣ́ки.
Вѣ́рою и҆ тве́рдымъ и҆сповѣ́данїемъ вѣ́чнагѡ бл҃же́нства достиго́сте, прпⷣбнїи венїамі́не и҆ нїки́форе, сме́ртїю бо страда́льческою къ животꙋ̀ безсме́ртномꙋ преста́вилисѧ є҆стѐ и҆ кро́вїю безви́нною багрѧни́цꙋ цр҃кве правосла́вныѧ ᲂу҆краси́ли є҆стѐ, пою́ще и҆ превозносѧ́ще гдⷭ҇а во всѧ̑ вѣ́ки.
Трⷪ҇ченъ:
Трїѵпоста́сный бж҃е, сло́вомъ сотвори́вый всѧ́чєскаѧ и҆ дх҃омъ къ животꙋ̀ призва́вый земна̑ѧ и҆ нбⷭ҇наѧ! ты̀ человѣ́ческое є҆стество̀ въ подо́бїе своѐ созда́лъ є҆сѝ, ѡ҆скверне́нное же грѣхо́мъ кро́вїю хрⷭ҇та̀ твоегѡ̀ па́ки возста́вилъ є҆сѝ, є҆го́же, ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.
Бг҃оро́диченъ:
Послꙋжи́вши та́йнѣ бж҃їей, человѣ́ческомꙋ разꙋмѣ́нїю непостижи́мѣй, сподо́би на́съ бл҃года́ти сн҃а твоегѡ̀, пренепоро́чнаѧ, не́мощь на́шꙋ ᲂу҆крѣпѝ, житїѐ ᲂу҆ны́лое млⷭ҇тїю твое́ю ѡ҆богатѝ и҆ скꙋ́днꙋю мл҃твꙋ на́шꙋ дх҃а ст҃а́гѡ животво́рными дыха̑нїи растворѝ.
Пѣ́снь ѳ҃.
І҆рмо́съ:
Не рыда́й менѐ, мт҃и, зрѧ́щи во гро́бѣ, є҆го́же во чре́вѣ без̾ сѣ́мене зачала̀ є҆сѝ сн҃а: воста́нꙋ бо и҆ просла́влюсѧ, и҆ вознесꙋ̀ со сла́вою непреста́ннѡ ꙗ҆́кѡ бг҃ъ, вѣ́рою и҆ любо́вїю тѧ̀ велича́ющыѧ.
Бл҃года́рною дꙋше́ю сла́вѧще творца̀ и҆ бг҃а, и҆сповѣ́дникѡмъ и҆ стрⷭ҇тоте́рпцємъ хрⷭ҇тѡ́вымъ прїѡбщи́лисѧ є҆стѐ, венїамі́не и҆ нїки́форе. сердцевѣ́децъ же гдⷭ҇ь страда́льческїѧ ра́ди кончи́ны вѣнцы̑ мч҃нческими ᲂу҆красѝ ва́съ. тѣ́мже помина́йте на́съ, вѣ́рою и҆ любо́вїю ва́съ велича́ющихъ.
Ꙗ҆́коже венїамі́нъ, є҆ди́нъ ѿ сынѡ́въ і҆и҃левыхъ, ю҆нѣ́йшїй бѣ̀ въ домꙋ̀ ѻ҆тца̀ своегѡ̀, та́кѡ и҆ ты̀, венїамі́не прпⷣбномч҃нче, послѣ́днїй нача́льникъ въ солове́цтѣй ѻ҆би́тели бы́лъ є҆сѝ. и҆ ꙗ҆́коже венїамі́нъ, сщ҃еннонача́льникъ петрогра́дскїй, ты̀ и҆́менемъ хрⷭ҇то́вымъ ѕлодѣ̑йства вра̑жїѧ препобѣди́лъ є҆сѝ. тѣ́мже помина́й на́съ, вѣ́рою и҆ любо́вїю тѧ̀ велича́ющихъ.
Ча́шꙋ страда́нїй мꙋ́жественнѣ и҆спи́вше, вѣнцы̑ неꙋвѧда́емыми ᲂу҆краси́лисѧ є҆стѐ во црⷭ҇твїи нбⷭ҇нѣмъ, досточти́мїи венїамі́не и҆ нїки́форе. тѣ́мже моли́те ѡ҆ ѻ҆би́тели ва́шей солове́цтѣй, да ми́ръ и҆ любо́вь гдⷭ҇нѧ во вѣ́ки съ не́ю пребыва́етъ, и҆ на́съ помина́йте, вѣ́рою и҆ любо́вїю ва́съ велича́ющихъ.
Бг҃оро́диченъ:
Црⷭ҇тва бж҃їѧ би́серъ драгоцѣ́ненъ да возсїѧ́етъ въ дꙋша́хъ на́шихъ твои́ми мольба́ми, пречⷭ҇таѧ дв҃о, нача́льника жи́зни вѣ́чныѧ мт҃и. помозѝ на́мъ, бл҃га́ѧ, да терпѣ́нїемъ дꙋ́шы стѧжа́вше, воскрⷭ҇нїѧ свѣ́тлꙋю ра́дость невозвра́тнѡ тобо́ю ѡ҆брѧ́щемъ.
Свѣти́ленъ, гла́съ г҃:
Свѣ́томъ хрⷭ҇то́вымъ просвѣща́еми, мра́къ беззако́нїѧ попра́ли є҆стѐ, прпⷣбнїи, и҆ и҆сповѣ́данїемъ трисл҃нечнагѡ свѣ́та тьмꙋ̀ а҆́довꙋ посрами́ли є҆стѐ, мꙋчє́нїѧ же ѿ сынѡ́въ поги́бели прїе́мше, безпеча́льное жи́тельство наслѣ́довали є҆стѐ. тѣ́мже свѣ́тлости ст҃ы́хъ прича̑стницы ꙗ҆ви́вшесѧ, мі́рꙋ просвѣще́нїе и҆спроси́те и҆ дꙋша́мъ на́шымъ ве́лїю млⷭ҇ть.
Сла́ва, и҆ ны́нѣ:
Свѣ́тъ живота̀ вѣ́чнагѡ возсїѧ̀ на́мъ тобо́ю, бл҃года́тнаѧ мр҃і́е, пло́тїю бо родила̀ є҆сѝ жизнода́вца бг҃а, сме́рть попра́вшаго, мі́ръ собо́ю ѡ҆бнови́вшаго и҆ всѣ̑мъ вѣ̑рнымъ воскрⷭ҇нїе да́рꙋющаго.