Канон святому священномученику Косме Саратовскому

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тло торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.

Космы̀ па́мѧть восхвали́ти, і҆ерє́йства красотꙋ̀ и҆ и҆сповѣ́данїѧ ᲂу҆краше́нїе ра́зꙋмъ да́ждь мѝ, хрⷭ҇тѐ, да тебѣ̀ послꙋжи́вша и҆ за тѧ̀ пострада́вшаго просла́влю.

Ѡ҆́бразъ па́стырства неꙋко́рна и҆́мамы тѧ̀ ѻ҆́тче космо̀, въ дѣ́ланїи бо се́мъ и҆зрѧ́денъ показа́лсѧ є҆сѝ, ѻ҆́вцы ста́да твоегѡ̀ собира́ѧ и҆ ᲂу҆ча̀, за ни́хъ же и҆ живо́тъ сво́й положи́ти не ѿре́клсѧ є҆сѝ.

Сла́вы го́рнїѧ прича́стника содѣ́ла тѧ̀ гдⷭ҇ь, космо̀ мч҃нче, здѣ̀ до́брѣ подвиза́всѧ за сло́во є҆гѡ̀, та́мѡ на нб҃сѣ́хъ вѣнце́мъ свѣ́тлымъ вѣнча́ешисѧ.

Бг҃оро́диченъ: Мч҃нкъ ли́цы тѧ̀ ѡ҆снова́нїе бы́ти вмѣнѧ́ютъ, дв҃о, по́двигꙋ си́хъ. Оу҆ крⷭ҇та̀ тѝ стоѧ́щей, ѡ҆рꙋ́жїе про́йде твою̀ непоро́чнꙋю дꙋ́шꙋ, ю҆́же бжⷭ҇твеннаѧ любы̀ ѿ ржⷭ҇тва̀ распалѝ.

Пѣ́снь г҃.

І҆рмо́съ: Твоѧ̑ пѣсносло́вцы бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дх҃о́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.

Оу҆тверди́лъ є҆сѝ дꙋ́шꙋ твою̀ на ка́мени вѣростоѧ́тельномъ, ѿ млады́хъ ногте́й въ пра́вой вѣ́рѣ стоѧ́ти наꙋче́нъ бы́въ, ѿ неѧ́же и҆ въ ста́рости масти́тѣй не подви́глсѧ є҆сѝ, космо̀ премꙋ́дрѣ.

Пасы́й и҆ трꙋжда́ѧйсѧ ꙗ҆́кѡ патрїа́рси ѿ ю҆́ности твоеѧ̀, космо̀ пресвѵ́тере, пастѝ наро́ды жезло́мъ сщ҃е́нства призыва́ешисѧ промышле́нїемъ бжⷭ҇твеннымъ, ꙗ҆́коже дре́вле кꙋпиноглаше́нїемъ мѡѷсе́й.

Ѻ҆те́чества нбⷭ҇нагѡ жела́ѧ, ѻ҆те́чествꙋ земно́мꙋ спострада́ти не ѿве́рглсѧ є҆сѝ, ѻ҆́тче космо̀, но бѣ́дствїй сегѡ̀ ча́шꙋ кꙋ́пнѡ пїѧ́ше вѣ́рꙋ и҆ любо́вь свою̀ не ѡ҆ста́вльшымъ ѻ҆тцє́мъ.

Бг҃оро́диченъ: Ю҆́нице чⷭ҇таѧ, мт҃и нескве́рнаѧ, скве́рнꙋ дꙋ́шъ на́шихъ ѡ҆мы́й, ѿимѝ, ꙗ҆́кѡ всѝ согрѣша́емъ мно́гѡ ѿ не́мѡщи и҆ произволе́нїѧ, но ты̀, ꙗ҆́кѡ бл҃га́ѧ, премѣне́нїѧ бꙋ́ди хода́таица.

Сѣда́ленъ, гла́съ ѕ҃:

И҆́же а҆враа́ма на сѣ́чꙋ царе́мъ ᲂу҆крѣплѧ́ше, и҆́же наѵи́нови со́лнцемъ послꙋ́шавый, бж҃е, мѡѷсе́овы рꙋ́цѣ воздѣѧ́ннїи на сокрꙋше́нїе а҆мали́ка ᲂу҆крѣпи́вый, возвы́си и҆ рꙋ́цѣ твоѝ, въ трꙋдѣ́хъ и҆ моле́нїихъ состарѣ́вшїи, на сокрꙋше́нїе а҆мали́ковыхъ внꙋ́кѡвъ непра́вѡ ходѧ́щихъ, и҆ рꙋ́цѣ твоѝ въ селе́нїихъ го́рнихъ не и҆́мꙋтъ ѡ҆сла́бнꙋти.

Бг҃оро́диченъ: Є҆́ѵа прама́терь преще́нїѧ пло́дъ принесѐ на́мъ, є҆го́же вкꙋше́нїемъ сме́рти и҆ сра́ма позна́нїе ѡ҆брѣто́хомъ, дв҃а же ны́нѣ сп҃се́нїѧ пло́дъ и҆зрастѝ, живота̀ и҆ сла́вы вкꙋше́нїе произволѧ́ющымъ плодоприне́сши. Ѡ҆ се́мъ торжествꙋ́юще, ка́кѡ тѧ̀ мт҃рь не нарече́мъ всѣ̑мъ живꙋ́щимъ, но́выѧ жи́зни нача́льнꙋю человѣ́комъ.

Пѣ́снь д҃.

І҆рмо́съ: Сѣдѧ́й въ сла́вѣ, на прⷭ҇то́лѣ бж҃ества̀, во ѻ҆́блацѣ ле́гцѣ, прїи́де і҆и҃съ пребж҃е́ственный, нетлѣ́нною дла́нїю, и҆ сп҃сѐ зовꙋ́щыѧ: сла́ва хрⷭ҇тѐ, си́лѣ твое́й.

Распѧ́таго за ны̀ вы́нꙋ въ се́рдцы твое́мъ носѧ̀ па́мѧтованїемъ непреста́ннымъ, ѻ҆́тче космо̀, страда́нїѧ пꙋте́мъ восте́клъ є҆сѝ во ст҃а̑ѧ нерꙋкотворе́ннаѧ, и҆дѣ́же пре́жде вни́де хрⷭ҇то́съ, вѣ̑чныѧ кро́вы на́мъ ᲂу҆строѧ́ѧй.

Є҆стества̀ не́мощь, нижѐ лѣ́тъ преꙋтрꙋжде́нїе къ тѣле́сномꙋ ᲂу҆покое́нїю совѣ́тники не и҆збра́лъ є҆сѝ, космо̀ терпѣли́ве, ѻ҆ба́че дх҃а бо́дростїю пло́ти дебельство̀ ѿгонѧ́ѧ, на дѣ́ланїе своѐ до ве́чера жи́зни поспѣша́ше.

Ꙗ҆ви́сѧ мꙋ́жъ крѣ́покъ ты̀, ѻ҆́тче, землѝ сара́товстѣй бл҃гослове́нное прозѧбе́нїе, пра́вєднымъ въ вѣ́рѣ стоѧ́нїемъ сто́лпъ крѣ́пости є҆ѧ̀ созида́ѧ, да не подви́житсѧ ѿ ѡ҆снова́нїѧ и҆́стиннагѡ живота̀.

Бг҃оро́диченъ: И҆са́їа сла́вы твоеѧ̀ грѧдꙋ́щїѧ, дв҃о, предзрѣ́нїемъ ᲂу҆жасе́сѧ, зна́менїе спребыва́нїѧ бжⷭ҇твеннагѡ лю́демъ сїю̀ полага́етъ, ꙗ҆́кѡ николи́же си́це бы́сть въ человѣ́цѣхъ, є҆́же се́й дв҃ы ражда́ющїѧ чревоноше́нїѧ пло́дъ несказꙋ́ема бг҃а ꙗ҆вѝ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Маккаве́и сщ҃е́ннѣйшїи кро́тость и҆ стра́хъ длѧ є҆ди́нагѡ бг҃а сохра́ньше, на гꙋ́бѧщыѧ і҆и҃лѧ до́бле воѡрꙋжи́шасѧ, и҆́хже ѻ҆́бразомъ и҆ ты̀, ѻ҆́тче, стꙋ̑дныѧ разврати́тєли ненаказꙋ́ємы зрѣ́ти не восхотѣ́въ, вѣ̑рныѧ на противꙋста́нїе си́мъ сподвига́ше.

Оу҆́зъ ᲂу҆тѣсне́нїе темни́чныхъ ᲂу҆́зами бл҃говѣ́стїѧ свѧ́зана не сотвори́тъ несвобо́дна, но́ситъ бо въ се́рдцы и҆ во ᲂу҆стѣ́хъ мі́рꙋ всемꙋ̀ неѡб̾име́нное сло́во.

Че́сти нетлѣ́нныѧ і҆ере́йства ст҃а́гѡ чре́во бг҃омъ и҆мꙋ́щымъ не ᲂу҆стꙋпѝ, а҆́ще и҆ сꙋемꙋ́дрїю своемꙋ̀ ѻ҆́бщника тѧ̀ сотвори́ти жела́хꙋ, безꙋ́мнїи, ѻ҆ба́че растли́ти не возмого́ша твердѣ́йшаго и҆сповѣ́дника.

Бг҃оро́диченъ: Є҆лїсаве́тино сла́дкое проглаго́ланїе сбы́стсѧ, и҆́мже бл҃гословлѧ́ше тѧ̀, гдⷭ҇а мт҃рь и҆́стиннꙋю, и҆ ны́нѣ сѐ всѝ ро́ди чл҃вѣ́честїи бл҃жи́мъ тѧ̀, ꙗ҆́кѡ херꙋві̑мъ сла́внѣйшꙋю.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Нѣ́сть премѣне́нїѧ въ вѣ́цѣ грѧдꙋ́щемъ дꙋша́мъ бг҃олю́бцєвъ, ка́мене вѣ́ры, хрⷭ҇та̀, не подви́жꙋтсѧ, є҆го́же пред̾ человѣ́ки и҆сповѣ́даша на землѝ, того̀ ѡ҆брѣта́ютъ пред̾ а҆́гг҃лы нбⷭ҇ное и҆сповѣ́данїе, въ ню́дꙋже дости́гнꙋти поспѣши́лъ є҆сѝ, ѻ҆́тче, ѿ вѣ́ка сегѡ̀ премѣ́ннагѡ.

И҆скꙋша́еми, ꙗ҆́кѡ зла́то въ горни́лѣ, сребро̀ чⷭ҇тое принесо́стесѧ, ст҃і́и, въ сокрѡ́вищницы нбⷭ҇ныѧ, съ ни́миже и҆ до́брый косма̀ ны́нѣ тала́нтъ причтѐ, и҆́же въ дꙋшѝ свое́й и҆сповѣ́данїемъ прїꙋмно́жи.

Космо̀, ѻ҆́тче сщ҃е́ннѣйше, ты̀ побѣ̑дныѧ мч҃нкъ ли́ки свое́ю побѣ́дою дости́глъ є҆сѝ, є҆́же є҆́сть вѣ́ра твоѧ̀, є҆́юже ᲂу҆твержда́шесѧ, помозѝ на́мъ, грѣхо́мъ побѣжда́ємымъ, да не всꙋ́е на ны̀ и҆́мѧ хрⷭ҇то́во нарица́етсѧ.

Бг҃оро́диченъ: А҆́гг҃лѡмъ пѣ̑нїи тѧ̀ велича́ющымъ человѣ́цы сподража́ти тща́тсѧ, а҆́ще и҆ грѣ́шни є҆смы̀, немощно́е на́ше славосло́вїе ѿ серде́цъ возноси́мое не пре́зри.

Конда́къ, гла́съ в҃:

Ѻ҆́тче, ѻ҆тцє́въ ᲂу҆краше́нїе, вои́стиннꙋ житїѐ твоѐ ᲂу҆краси́сѧ, космо̀, и҆́стинной вѣ́рѣ послѣ́дованїемъ, и҆ да́же до сме́рти и҆сповѣ́данїемъ є҆ѧ̀.

І҆́косъ: Тѧ̀, ѻ҆́тче, мл҃твенника землѝ на́шеѧ позна́хомъ, є҆ѧ́же и҆ порожде́нїе бы́лъ є҆сѝ, тобо́ю ны́нѣ ᲂу҆краша́етсѧ и҆ ѡ҆ тебѣ̀ ра́дꙋетсѧ, ꙗ҆́кѡ дꙋшѝ твоеѧ̀ красотꙋ̀ гдⷭ҇ь на свѣ́щницѣ цр҃ко́вномъ ᲂу҆твердѝ, да свѣ́тъ и҆сповѣ́данїѧ твоегѡ̀ на ны̀, ча̑да твоѧ̑, возсїѧ́етъ, и҆ мра́къ ᲂу҆ны́нїѧ дале́че ѿжене́тъ ѿ серде́цъ бл҃гоче́стнѡ почита́ющихъ по́двиги и҆ дѣла̀ твоѧ̑, и҆́хже ра́ди съ любо́вїю вопїе́мъ тѝ: ра́дꙋйсѧ, ѻ҆́тче космо̀, і҆ере́е и҆ мч҃нче хва́льный!

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.

Цвѣ́ты добродѣ́телей носѧ́ще, ѿсе́лѣ го́рнихъ садѡ́въ ᲂу҆ха́нїе пред восхи́тилъ є҆сѝ, въ си́хъ же ны́нѣ ꙗ҆́кѡ крі́нъ бл҃гоꙋха́нный, прⷭ҇нѡ ра́достїю цвѣте́ши неизглаго́ланною.

Є҆ди́ною человѣ́цы ᲂу҆мира́ютъ, а҆́ще дꙋ́шꙋ без̾ поро́ка соблюдꙋ́тъ, посемꙋ̀ тѣ́ло ᲂу҆бива́ющихъ не боѧ́тисѧ сло́во бж҃їе гл҃етъ, и҆ семꙋ̀ косма̀ мч҃нкъ бы́сть послꙋ́шатель вѣ́рнѣйшїй.

Врагѝ человѣ́кꙋ дома́шнїѧ є҆гѡ̀ ѕло́ба мі́ра сегѡ̀ содѣва́етъ, си́це и҆ тебѣ̀, ѻ҆́тче, го́рькое напое́нїе ѿ рꙋкꙋ̀ бли́жнихъ и҆ зна́емыхъ твои́хъ прїѧ́ти гдⷭ҇ь попꙋстѝ, є҆́же ты̀ и҆спи́лъ є҆сѝ терпѣливодꙋ́шне.

Бг҃оро́диченъ: Оу҆́трѡ мі́рови возсїѧ̀ но́вое въ ржⷭ҇твѣ̀ твое́мъ, пребл҃га́ѧ, ѻ҆́чи слѣпы̑мъ просвѣща́ющее, и҆ ра́дости серде́чныѧ и҆сполнѧ́ющее, ꙗ҆́кѡ взы́де сл҃нце пра́вды хрⷭ҇то́съ бг҃ъ, и҆ не за́йдетъ во вѣ́къ, нижѐ помрачи́тисѧ и҆́мать.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ, ржⷭ҇тво̀ бг҃оро́дичо сп҃сло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Кла́сы спѣ̑лыѧ рꙋ́цѣ твоѝ пожина́ша, є҆гда̀ зе́млю, ѿ неѧ́же ꙗ҆́кѡ всѧ́къ человѣ́къ и҆зы́де, воздѣ́ловаше, и҆ сѐ ꙗ҆́кѡ кла́съ златы́й дꙋша̀ твоѧ̀ восхище́на бы́сть въ жи́тницꙋ хрⷭ҇то́вꙋ, и҆ ꙗ҆́кѡ хлѣ́бное приноше́нїе на а҆лта́рь возложи́сѧ.

Ра́дость печа̑ли наслѣ́дꙋетъ въ пꙋте́хъ непоро́чныхъ, и҆ весе́лїѧ де́нь но́щи ѡ҆бстоѧ́нїй и҆ тѧ́готъ, та́же и҆ скѡ́рби и҆ ра̑ны полꙋ́нощи житїѧ̀ твоегѡ̀, ѻ҆́тче космо̀, дне́мъ несконча́емымъ преидо́ша въ ѡ҆би́телехъ свѣ́та.

А҆́ще и҆ подвиго́шасѧ а҆́дѡвы врата̀ на цр҃ковь хрⷭ҇то́вꙋ, мнѧ́ще вотщѐ въ землѝ на́шей потреби́ти ю҆̀, не поколеба́шесѧ до́блїй косма̀ і҆ере́й ѿ ка́мене вѣ́ры, и҆ ᲂу҆твердѝ ны вопи́ти: ѻ҆тцє́въ и҆ на́шъ бж҃е, бл҃гослове́нъ є҆сѝ.

Бг҃оро́диченъ: Ше́дше, наро́ди, горѣ̀ ст҃ѣ́й бж҃їей поклони́мсѧ, ѿ неѧ́же сп҃се́нїе на́мъ нерꙋкосѣ́чнѡ и҆зы́де и҆ мі́ръ собо́ю и҆спо́лни, хрⷭ҇то́съ бг҃ъ, ѻ҆тцє́въ и҆ на́шъ бж҃е, бл҃гослове́нъ є҆сѝ.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ всебл҃же́ннаѧ, бцⷣе чⷭ҇таѧ приснодв҃о.

Є҆ѵⷢ҇льски на землѝ пожи́ти сподо́би тѧ̀ хрⷭ҇то́съ гдⷭ҇ь, ѻ҆́тче космо̀ мꙋ́дре, лѣ́ствицею за́повѣдей є҆гѡ̀ на нб҃о восхо́дъ сотвори́ти, нището́ю дꙋхо́вною ѡ҆снова́нїе положи́въ, ра́достїю въ поноше́нїихъ наверши́лъ є҆сѝ бл҃же́нства.

Но́вагѡ стрⷭ҇тоте́рпца ѿ со́нма ве́лїѧ ст҃ы́хъ срѡ́дникъ на́шихъ прославлѧ́емъ тѧ̀, ѻ҆́тче, ѡ҆брѣто́хъ бо гдⷭ҇ь тѧ̀ вѣ́рна во всѣ́хъ дѣ́лѣхъ твои́хъ, ꙗ҆́же въ домꙋ̀ є҆гѡ̀ ꙗ҆́кѡ до́брый слꙋга̀ творѧ́ше, живо́тъ сво́й ѡ҆ ча́дѣхъ цр҃ко́вныхъ полага́юще.

И҆зба́ви мл҃твами твои́ми, ѻ҆́тче космо̀, ча̑да твоѧ̑ ѿ всѧ́кїѧ лю́тости противобо́рца и҆ црⷭ҇твїѧ бж҃їѧ ны̀ доведѝ, молѧ́щыѧсѧ тебѣ̀ те́плѣ, да возмо́жемъ ловле́нїѧ лꙋка́вагѡ и҆збѣ́гнꙋти и҆ коне́чнагѡ ѡ҆сꙋжде́нїѧ предста́тельствомъ твои́мъ.

Бг҃оро́диченъ: Є҆́же содѣ́ѧхомъ ѕла̑ѧ, не помѧнѝ на́мъ, бл҃га́ѧ сꙋ́щи, є҆гда̀ дꙋша̀ на́ша разлꙋча́тисѧ бꙋ́детъ настоѧ́щагѡ сегѡ̀ житїѧ̀, не возгнꙋша́тисѧ мо́лимъ тѧ̀ на́шегѡ недосто́инства, а҆́ще и҆ мно́гѡ согрѣша́емъ всѝ, бꙋ́ди на́мъ, мт҃и, застꙋ́пница.

Свѣти́ленъ:

Свѣ́тлости житїѧ̀ твоегѡ̀ поꙋчи́тисѧ дꙋша́ми и҆ ᲂу҆мы̑ подвиза́ющесѧ, просвѣще́нїѧ ѻ҆чесе́мъ на́шымъ сердє́чнымъ взыскꙋ́емъ и҆ коллꙋ́рїемъ мл҃твъ твои́хъ и҆сцѣле́нїѧ.

Бг҃оро́диченъ: Свѣ́тлꙋю цр҃е́вꙋ пала́тꙋ и҆ черто́гъ прⷭ҇носꙋ́щнагѡ свѣ́та тѧ̀ вѣ́мы, дв҃о пресвѣ́тлаѧ, и҆ ѿкꙋ́дꙋ серафі́мскїѧ ѻ҆́чи ѡ҆брѧ́щемъ, во є҆́же воззрѣ́ти къ тебѣ̀.