Канон святому преподобному Ефрему Перекомскому, Новгородскому чудотворцу

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̀ чꙋдеса̀.

Смири́лсѧ є҆сѝ хрⷭ҇та̀ ра́ди, ѻ҆́ч҃е, и҆ крⷭ҇тъ взе́мъ, ѿ ѻ҆те́чества и҆ срѡ́дникъ ꙗ҆́кѡ ѿ ѕмі́ѧ бѣ́галъ є҆сѝ. ѿѻнꙋ́дꙋже въ пꙋсты́ню вше́дъ, въ не́йже трꙋдолю́бнѡ подвиза́лсѧ є҆сѝ, преподо́бне.

Ѿ ю҆́ности твоеѧ̀, ѻ҆́ч҃е є҆фре́ме, ᲂу҆́мъ къ бг҃ꙋ впери́въ, тлѣ́нными нетлѣ̑ннаѧ ꙗ҆́кѡ до́брый кꙋпе́цъ и҆скꙋпи́лъ є҆сѝ: тѣ́мже ны́нѣ соше́дшесѧ па́мѧть твою̀ почита́емъ.

Хрⷭ҇то́вымъ раче́нїемъ, ѻ҆́ч҃е є҆фре́ме, па́че ѻ҆гнѧ̀ распала́емь, настоѧ̑щаѧ ꙗ҆́кѡ ничто́же сꙋ̑щаѧ презрѣ́лъ є҆сѝ: сегѡ̀ ра́ди въ покѡ́ища всели́лсѧ є҆сѝ, и҆дѣ́же пра́ведныхъ дꙋ́шы веселѧ́тсѧ.

Бг҃оро́диченъ: Болѧ́ща и҆сцѣлѝ дꙋше́ю же и҆ тѣ́ломъ, влⷣчце, раба̀ твоего̀, блаже́ннагѡ є҆фре́ма моле́нїемъ: тебє̀ бо предста́тельницꙋ всѝ сꙋ́щїи въ печа́ли стѧжа́хомъ, ꙗ҆́кѡ ро́ждшꙋю спасе́нїе на́ше.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Сна̀ твои́ма ѻ҆чи́ма не да́лъ є҆сѝ, бл҃же́нне є҆фре́ме, ни вѣ́ждома дрема́нїѧ, до́ндеже сподо́билсѧ є҆сѝ пра́ведныхъ селе́нїѧ, є҆́же ᲂу҆гото́ва бг҃ъ, преподо́бне, лю́бѧщымъ є҆го̀.

Бо́дренными твои́ми моли́твами, ѻ҆́ч҃е є҆фре́ме, и҆ жесто́кимъ воздержа́нїемъ гдⷭ҇ꙋ на землѝ до́брѣ ᲂу҆годи́лъ є҆сѝ: сегѡ̀ ра́ди стра́шенъ врагѡ́мъ и҆ сла́венъ человѣ́кѡмъ, бы́лъ є҆сѝ.

Ра́йскꙋю жи́знь и҆ та́мѡ ст҃ы́хъ весе́лїе, всегда̀ во ᲂу҆мѣ̀ твое́мъ помина́ѧ, преподо́бне, въ слеза́хъ и҆ воздыха́нїихъ всю̀ твою̀ жи́знь, ѻ҆́ч҃е є҆фре́ме, проше́лъ є҆сѝ: сегѡ̀ ра́ди и҆ по сме́рти ѿ хрⷭ҇та̀ чꙋдесы̀ просла́вилсѧ є҆сѝ.

Бг҃оро́диченъ: И҆сточа́еши и҆сцѣле́нїй стрꙋи̑ болѧ́щымъ, дв҃о, всю́дꙋ: тѧ̀ бо и҆сто́чникъ показа̀ милосе́рдїѧ, влⷣчце, и҆́же ми́лости гдⷭ҇ь, и҆зъ тебє̀ рожде́йсѧ па́че ᲂу҆ма̀.

Сѣда́ленъ.

Ю҆́ность твою̀, преподо́бне, воздержа́нїемъ ᲂу҆вѧди́лъ є҆сѝ, стра́сти тѣлє́сныѧ, ꙗ҆́кѡ плѣ́нника хꙋ́да, свѧза́въ, дꙋ́хови повинꙋ́лъ є҆сѝ, и҆ сегѡ̀ ра́ди, ѻ҆́ч҃е є҆фре́ме, хрїсто́съ чꙋдесы̀ пресла́вно тебѣ̀ вѣнча́етъ, є҆ди́нъ, прославлѧ́ѧй ст҃ы́хъ свои́хъ.

Бг҃оро́диченъ: ᲂу҆мертви́сѧ всѧ̑ крѣ́пость моѧ̀ ѿ мно́жества безмѣ́рныхъ ѕѡ́лъ мои́хъ и҆, мно́гими скорбьмѝ ѡ҆держи́мь, ᲂу҆жѐ ѿча́ѧхсѧ, но помозѝ мѝ, влады́чицѣ, є҆фре́ма блаже́ннаго предста́тельствомъ, ꙗ҆́кѡ ра́дость ро́ждшаѧ, пла́чꙋщимъ ᲂу҆тѣше́нїе.

Пѣ́снь д҃.

І҆рмо́съ: Сѣдѧ́й въ сла́вѣ на престо́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Житїѐ твоѐ, ѻ҆́ч҃е є҆фре́ме, чꙋ́дно на землѝ показа́лъ є҆сѝ, вели́ко поще́нїе и҆ смире́нїе: сегѡ̀ ра́ди та́мѡ вели́чество наслѣ́довалъ є҆сѝ, молѝ, спасти́сѧ ѿ бѣ́дъ пою́щымъ тѧ̀.

Се́ргїа вели́кагѡ житїю̀ послѣ́дꙋѧ, преподо́бне: тѣ́мже тогѡ̀, є҆ли́кѡ мо́щно, и҆менова́нїе ѿ житїѧ̀ стѧжа́лъ є҆сѝ, є҆фре́ме пребога́те.

Посто́мъ и҆ моли́твами тѣ́ло твоѐ и҆знꙋри́лъ є҆сѝ, и҆ сегѡ̀ ра́ди сподо́билсѧ є҆сѝ ви́дѣти неизречє́ннаѧ блага̑ѧ, ꙗ҆̀же ст҃ы̑мъ ᲂу҆готѡ́вана: съ ни́миже, ѻ҆́ч҃е є҆фре́ме, ѡ҆ на́съ моли́сѧ.

Бг҃оро́диченъ: Кро́въ и҆ застꙋпле́нїе, и҆ прибѣ́жище бꙋ́ди мѝ, дв҃о, рабꙋ̀ твоемꙋ̀, и҆ и҆сцѣли́ мѧ̀ ѿ безмѣ́рныхъ ѕѡ́лъ воспѣва́ти, пречⷭ҇таѧ: сла́ва ржⷭ҇твꙋ̀ твоемꙋ̀.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты̀ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Чи́сто житїѐ твоѐ ѿ ю҆́ности потща́лсѧ є҆сѝ, преподо́бне, сохрани́ти: тѣ́мже чистотꙋ̀ твою̀ ви́дѣвъ прест҃ы́й дх҃ъ, въ тѧ̀ всели́сѧ.

Ꙗ҆́кѡ преѡби́дѣвъ тлѣ̑ннаѧ, вѣ̑чнаѧ, ѻ҆́ч҃е, сподо́билсѧ є҆сѝ прїѧ́ти, по нело́жномꙋ словесѝ, проси́те и҆ прїи́мете: и҆ є҆́же ꙗ҆́кѡ проси́лъ є҆сѝ, сїѧ̑ по досто́инствꙋ прїѧ́лъ є҆сѝ.

Мѣ́сто, є҆́же сподо́бисѧ прїѧ́ти честны̑ѧ мо́щи твоѧ̑, преподо́бне, ѡ҆свѧти́сѧ, и҆ по мнѡ́гимъ страна́мъ прославлѧ́емо є҆́сть, ꙗ҆́кѡ въ себѣ̀ мо́щи твоѧ̑ и҆мѣ́етъ.

Бг҃оро́диченъ: Не преста́й молѧ́щи, є҆го́же родила̀ є҆сѝ, бг҃оневѣ́сто, ꙗ҆́кѡ сп҃са и҆ влⷣкꙋ, разрѣше́нїе пода́ти ско́рбемъ и҆ болѣ́знемъ, къ ра́дости нетлѣ́ннѣй мѧ̀ возведѝ, проща́ѧ мѝ согрѣшє́нїѧ.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Твоѐ вели́кое житїѐ и҆ чистотꙋ̀, къ си̑мъ же безмѣ́рное смире́нїе прови́дѣвъ прест҃ы́й дх҃ъ, сла́вна тѧ̀, ѻ҆́ч҃е, всѣ̑мъ показа̀. тѣ́мже ѿ сегѡ̀ житїѧ̀ ко ѻ҆́номꙋ вѣ́кꙋ преше́дъ, полꙋчи́лъ є҆сѝ съ пра́ведными весе́лїе.

Дне́сь начина́ема свѧще́ннаѧ па́мѧть твоѧ̀, преподо́бне є҆фре́ме, весели́тъ ᲂу҆ченикѝ твоѧ̑, воспѣва́ющыѧ любо́вїю по́двиги твоѧ̑, и҆ честно́е ᲂу҆спе́нїе сла́вѧщыѧ торжествꙋ́юще: и҆̀хже моли́твами твои́ми, ѻ҆́ч҃е, соблюдѝ.

Разбѡ́йницы пе́рвѣе прише́дше тебѐ ѡ҆скорби́ти, преподо́бне, но ты̀ тѣ́хъ разꙋмѣ́въ лꙋка́вство, воздви́гнꙋти тѣ̑мъ дре́во ре́клъ є҆сѝ, не могꙋ́щымъ же мнѡ́гимъ тебѣ̀ є҆ди́номꙋ проти́витисѧ. тѣ́мже ꙗ҆́кѡ посра́млени про́чее со стра́хомъ ѿбѣжа́ша, па́че побѣжде́ни бы́вше, не́жели побѣди́ша.

Бг҃оро́диченъ: Твою̀ пода́ждь мѝ по́мощь, и҆ и҆зба́ви мѧ̀, влⷣчце, ѿ бѣ́дъ и҆ скорбе́й, и҆ прегрѣше́нїй мои́хъ: ꙗ҆́же всѣ́хъ ро́ждшаѧ и҆збавле́нїе.

Конда́къ, гла́съ и҃.

А҆́гг҃льскомꙋ житїю̀ поревнова́въ, преподо́бне, всѧ̑ земна̑ѧ ѡ҆ста́вивъ, ко хрⷭ҇тꙋ̀ прите́клъ є҆сѝ, и҆ тогѡ̀ за́повѣдьми ѡ҆гра́ждсѧ, ꙗ҆ви́лсѧ є҆сѝ сто́лпъ непоколеби́мь ѿ вра́жїихъ напа́данїй. тѣ́мъ зове́мъ тѝ: ра́дꙋйсѧ, є҆фре́ме, свѣти́ло пресвѣ́тлое.

І҆́косъ:

И҆́же въ ме́ртвеннѣмъ тѣ́лѣ, а҆́гг҃льскомꙋ ᲂу҆подо́бльсѧ житїю̀ па́че є҆стества̀, и҆ съ тѣ́ми на нб҃сѣ́хъ ликꙋ́ѧ, прїиди́те, всѝ вѣ́рнїи, воспое́мъ преподо́бнаго є҆фре́ма: то́й бо ꙗ҆́кѡ ᲂу҆ме́ты вмѣнѝ мїрска̑ѧ всѧ̑ кра̑снаѧ, ꙗ҆́кѡ да нбⷭ҇ныхъ полꙋчи́тъ, вше́дъ на го́рꙋ, ꙗ҆́коже дре́вле мѡѷсе́й, и҆ вели́кїй и҆лїа̀, посто́мъ ѡ҆чи́щсѧ, сподо́бисѧ ви́дѣти трⷪ҇ческꙋю свѣ́тлость, не во мра́цѣ, ни въ ви́хрѣ, но во свѣ́тѣ благода́ти бж҃їѧ. тѣ́мъ и҆ чꙋде́съ лꙋчы̀ и҆спꙋща́ѧ свѣ́тлѡ, и҆ рѣ́ки и҆сцѣле́нїѧ и҆сточа́ѧ вѣ̑рнымъ ѿ гро́ба, ꙗ҆́кѡ недꙋ́гѡвъ и҆сцѣли́тель, ра́дꙋйсѧ, ѻ҆́ч҃е є҆фре́ме, свѣти́ло пресвѣ́тлое.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.

И҆сточа́етъ чꙋдеса̀ честна́ѧ ра́ка твоѧ̀, преподо́бне, преиз̾ѡби́лꙋющи благода́тїю, вѣ́рою приходѧ́щымъ здра́вїе да́рꙋетъ, хрⷭ҇тꙋ̀ ѿ дꙋшѝ вопїю́щымъ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Дрє́внимъ ѻ҆́нѣмъ вели̑кимъ ѻ҆тцє́мъ, въ постѣ̀ провозсїѧ́вшымъ, житїю̀ подо́бѧсѧ, преподо́бне, въ пꙋсты́ню всели́лсѧ є҆сѝ, и҆ та́мѡ въ поще́нїихъ мнѡ́га лѣ̑та пребы́лъ є҆сѝ.

Ꙗ҆́кѡ и҆́стиннагѡ и҆ кро́ткагѡ пастыренача́льника хрⷭ҇та̀, неѕло́бивое ѻ҆вча̀, ѻ҆́ч҃е є҆фре́ме, бы́лъ є҆сѝ: тѣ́мже неѕло́бивъ, къ хотѧ́щымъ тебѐ ѡ҆ѕло́бити бы́лъ є҆сѝ, хрⷭ҇то́ви вопїѧ̀: бж҃е, бл҃гослове́нъ є҆сѝ.

Бг҃оро́диченъ: Ѡ҆бощрє́ны болѣ̑зни ра́нъ мои́хъ, ѿ безмѣ́рныхъ мои́хъ прегрѣше́нїй, влⷣчце, ведꙋ́тъ въ сме́рть дꙋше́внꙋю и҆ тѣле́снꙋю: но и҆схи́ти, ꙗ҆́кѡ сильна̀, всѧ́кихъ скорбе́й и҆ недꙋ́гѡвъ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

И҆зъ мла́да, преподо́бне ѻ҆́ч҃е, потща́лсѧ є҆сѝ твою̀ со́вѣсть, и҆ се́рдце съ дꙋше́ю чи́стою гдⷭ҇еви предста́вити. тѣ́мже и҆ хрⷭ҇то́съ чꙋдесы̀ тебѐ прославлѧ́етъ, томꙋ̀ вопїю́ща: гдⷭ҇а воспѣва́йте, дѣла̀, и҆ превозноси́те є҆го̀ во всѧ̑ вѣ́ки.

Ны́нѣ пꙋсты́нѧ весе́лїемъ, ѻ҆́ч҃е, красꙋ́етсѧ, и҆мꙋ́щи мо́щи твоѧ̑ въ себѣ̀, є҆фре́ме преподо́бне: ᲂу҆ченицы́ же твоѝ твоемꙋ̀ житїю̀ ревнꙋ́юще, ѡ҆ твое́й па́мѧти ра́дꙋющесѧ, творцꙋ̀ вопїю́тъ: гдⷭ҇а воспѣва́йте, дѣла̀, и҆ превозноси́те є҆го̀ во всѧ̑ вѣ́ки.

Въ пꙋсты́ни, прпⷣбне, и҆дѣ́же селе́нїе и҆мѣ́лъ є҆сѝ, та́мѡ прече́стенъ хра́мъ въ сла́вꙋ хрⷭ҇то́вꙋ воздви́глъ є҆сѝ, въ не́мъ прославлѧ́тисѧ пречⷭ҇томꙋ тогѡ̀ и҆́мени, и҆ всѣ̑мъ вопи́ти: гдⷭ҇а воспѣва́йте, дѣла̀, и҆ превозноси́те є҆го̀ во всѧ̑ вѣ́ки.

Бг҃оро́диченъ: Свѣ́щниче свѣ́та трисо́лнечнагѡ сꙋ́щи, заре́ю бл҃гоꙋтро́бїѧ твоегѡ̀ тмꙋ̀ ѿимѝ прегрѣше́нїй мои́хъ, бг҃ороди́тельнице, и҆збавле́нїе нꙋ́ждныхъ болѣ́зней подаю́щи вѣ́рою пою́щемꙋ и҆ превозносѧ́щемꙋ пречⷭ҇тое твоѐ ржⷭ҇тво̀.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чи́стаѧ приснодв҃о.

Ѿ пꙋсты́ннагѡ житїѧ̀ къ премі́рномꙋ и҆ вѣ́чномꙋ житїю̀ ꙗ҆́кѡ преше́дъ, бл҃же́нне, не преста́й молѧ̀ и҆зба́вителѧ, ѿ разли́чныхъ напа́стей и҆ бѣ́дъ и҆зба́вити, любо́вїю честно́е твоѐ ᲂу҆спе́нїе ны́нѣ пѣ́сньми сла́вѧщихъ.

Пѣвцє́въ и҆́скреннею любо́вїю пою́щихъ, и҆ вѣ́рою тебѣ̀ пѣ́нїе хвале́нїѧ приносѧ́щихъ, преблаже́нне є҆фре́ме, ѿ всѧ́кихъ бѣ́дъ и҆ скорбе́й и҆збавлѧ́й: да тѧ̀ всѝ любо́вїю велича́емъ.

Ѿ рꙋ́къ мои́хъ недосто́йныхъ ма́лое сїѐ пѣ́сненное хвале́нїе, приносѧ́щагѡ тѝ съ любо́вїю прїимѝ, блаже́нне є҆фре́ме: не бо̀ возмого́хъ проти́вꙋ твоегѡ̀ вели́чества ᲂу҆краси́ти, но ма́лое сїѐ ꙗ҆́кѡ вели́ко прїимѝ, да тебѐ всегда̀ велича́емъ въ пѣ́снехъ.

Бг҃оро́диченъ: Пѣ́нїе съ пѣ́снїю и҆ хвале́нїе и҆сплете́ное ѿ болѣ́зненныѧ дꙋшѝ приношꙋ̀ съ любо́вїю тебѣ̀ ро́ждшей хрⷭ҇та̀, є҆стество́мъ бг҃а: є҆го́же благопрїѧ́тнѡ прїи́мши, прошє́нїѧ моѧ̑, бцⷣе, и҆спо́лни, и҆ моли́твами твои́ми соблюдѝ.

Свѣти́ленъ:

А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ себѐ въ пꙋсты́нѧхъ, и҆ стра̑сти покори́въ плотскі̑ѧ, ра́венъ а҆́гг҃лѡмъ ꙗ҆ви́лсѧ є҆сѝ, ѻ҆́ч҃е на́шъ бг҃оно́се є҆фре́ме.

Сла́ва, и҆ ны́нѣ: Держа́внымъ твои́мъ покро́вомъ, ѿ врагѡ́въ навѣ́та на́съ, чⷭ҇таѧ, твои́хъ ра̑бъ соблюдѝ всѣ́хъ невре́дныхъ: тѧ̀ бо є҆ди́нꙋ и҆́мамы прибѣ́жище въ нꙋ́ждахъ.