Канон святому преподобному Аристоклию (Амвросиеву), Московскому чудотворцу

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.

Бг҃обл҃же́нне ѻ҆́тче а҆рїсто́клїе, и҆змла́да скѡ́рбнаѧ ѡ҆бстоѧ̑нїѧ претерпѣва́ѧ, хрⷭ҇та̀ всѣ́мъ се́рдцемъ возлюби́лъ є҆сѝ, є҆го́же съ ли̑ки а҆́гг҃льскихъ си́лъ на нб҃сѣ́хъ непреста́ннѡ ны́нѣ славосло́виши.

Тѧ́жкꙋю болѣ́знь во ѻ҆́трочествѣ претерпѣ́въ, мл҃твами ма́тере твоеѧ̀ ѿ ст҃и́телѧ нїкола́а и҆сцѣле́нїе полꙋчи́лъ є҆сѝ, тѣ́мже чꙋдотво́рцꙋ вели́комꙋ подража́ѧ, пра́вило вѣ́ры и҆ ѻ҆́бразъ бл҃гоче́стїѧ лю́демъ ꙗ҆ви́лъ є҆сѝ.

Пло́ть распѧ́въ со страстьмѝ и҆ похотьмѝ, въ вертогра́дъ ст҃ы́ѧ горы̀ а҆ѳѡ́нскїѧ всели́лсѧ є҆сѝ и҆ всего̀ себѐ во́ли ста́рцєвъ ѻ҆би́тели покори́лъ є҆сѝ. тѣ́мже гдⷭ҇ь твоѐ се́рдце чи́сто содѣ́ла и҆ дꙋ́хъ пра́въ ѡ҆бновѝ во ᲂу҆тро́бѣ твое́й.

Бг҃оро́диченъ: Чꙋде́съ твои́хъ бжⷭ҇твенныхъ мно́жество бл҃гохвали́ти предначина́ѧ, тѧ̀, дв҃о, со ᲂу҆миле́нїемъ молю̀: бл҃года́ть твою̀ пода́ждь мѝ недосто́йномꙋ.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть ст҃ъ па́че тебѣ̀, є҆ди́не чл҃вѣколю́бче.

Въ по́двизѣхъ мона́шескагѡ житїѧ̀ преꙋспѣва́ѧ, всѧ̑ кѡ́зни де́мѡнскїѧ си́лою вѣ́ры и҆ ᲂу҆пова́нїемъ на хрⷭ҇та̀ превозмо́глъ є҆сѝ, и҆́мже и҆ вѣ́чною сла́вою ᲂу҆вѣнча́нъ бы́лъ є҆сѝ.

Послꙋша́нїѧ ѻ҆тцє́мъ бг҃омꙋ̑дрымъ до́брый рачи́тель бы́въ, и҆́го хрⷭ҇то́во бл҃го́е на ра́мо под̾ѧ́лъ є҆сѝ и҆ во бра́ни съ дꙋха́ми ѕло́бы поднбⷭ҇ными ꙗ҆́кѡ сто́лпъ непоколеби́мъ ꙗ҆ви́лсѧ є҆сѝ.

Гора̀ ст҃а́ѧ а҆ѳѡ́нскаѧ торжествꙋ́етъ, землѧ̀ же моско́вскаѧ проповѣ́дꙋетъ вели̑кїѧ по́двиги твоѧ̑, и҆́миже всѧ̑ ѕлоко́знєннаѧ и҆скꙋшє́нїѧ, ꙗ҆́кѡ до́блїй во́инъ хрⷭ҇то́въ, препобѣди́лъ є҆сѝ.

Бг҃оро́диченъ: Неизрече́ннѡ зачала̀ є҆сѝ, бг҃оневѣ́сто пречⷭ҇таѧ, гдⷭ҇а и҆ сп҃са, ѿ лю́тыхъ ѕѡ́лъ и҆збавлѧ́ющаго съ вѣ́рою призыва́ющихъ тѧ̀.

Сѣда́ленъ, гла́съ д҃:

И҆́мже ѻ҆́бразомъ жела́етъ є҆ле́нь на и҆сто́чники водны̑ѧ, си́це возжада̀ дꙋша̀ твоѧ̀, прпⷣбне ѻ҆́тче а҆рїсто́клїе, къ бг҃ꙋ жизнода́вцꙋ, сегѡ̀ ра́ди всѧ̑ кра̑снаѧ мі́ра земна́гѡ презрѣ́въ, на бл҃гослове́ннѣй горѣ̀ а҆ѳѡ́нской и҆ въ землѝ рꙋ́сской ᲂу҆се́рднѣ потрꙋди́лсѧ є҆сѝ, и҆ та́кѡ житїе́мъ твои́мъ пра́веднымъ гдⷭ҇а бг҃а просла́вилъ є҆сѝ.

Бг҃оро́диченъ: Влⷣчцꙋ тѧ̀ мі́ра вѣ́мы, дв҃о всепѣ́таѧ, ꙗ҆́кѡ родила̀ є҆сѝ на́мъ всѣ́хъ творца̀ и҆ сп҃си́телѧ мі́ра, и҆́же и҆ просла́ви тѧ̀, пречⷭ҇тꙋю мт҃рь свою̀, подаѧ̀ на́мъ тобо́ю бл҃года́ть и҆ ве́лїю млⷭ҇ть.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ̀ тѝ: си́лѣ твое́й сла́ва, чл҃вѣколю́бче.

Всего̀ себѐ всебл҃го́й во́ли бж҃їей покори́въ и҆ всѧ̑ повелѣ̑нїѧ ѻ҆тцє́въ дꙋхо́вныхъ и҆спо́лнивъ, въ зе́млю рꙋ́сскꙋю возврати́лсѧ є҆сѝ и҆ многоско́рбный трꙋ́дъ па́стырства под̾ѧ́лъ є҆сѝ.

Лю́дїе, мно́гими болѣ́зньми дꙋше́вными и҆ тѣле́сными ѡ҆держи́мїи, ѻ҆́тче ст҃ы́й, притека́хꙋ къ тебѣ̀, просѧ́ще ско́рыѧ по́мощи, и҆ и҆сцѣлѧ́хꙋсѧ.

Си́лою бл҃года́ти, да́нною тебѣ̀ свы́ше, болѣ́знꙋющихъ и҆з̾ нездра́вїѧ во здра́вїе приводи́лъ є҆сѝ, и҆̀же и҆ сла́влѧхꙋ многомлⷭ҇тиваго бг҃а.

Бг҃оро́диченъ: Не и҆́мамы, рабѝ твоѝ, и҆на́гѡ предста́тельства и҆ покро́ва ра́звѣ тебє̀, влⷣчце. тѣ́мже, чⷭ҇таѧ, ѿ се́рдца вопїе́мъ: всѧ́кїѧ бѣды̀ свободѝ всѣ́хъ вѣ́рныхъ, къ тебѣ̀ прибѣга́ющихъ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѻ҆каѧ́ннаго: но ѡ҆братѝ мѧ̀, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Мнѡ́ги скѡ́рби претерпѣ́лъ є҆сѝ, є҆гда̀ сꙋпоста́тъ дїа́волъ наꙋстѝ люде́й ѡ҆глаго́лати тѧ̀, ѻ҆́тче прпⷣбне, ѻ҆ба́че смире́нїемъ всѧ̑ вра̑жїѧ кѡ́зни препобѣди́лъ є҆сѝ и҆ вѣне́цъ побѣ́дный ѿ гдⷭ҇а прїѧ́лъ є҆сѝ.

Є҆гда̀ ѡ҆бличи́сѧ непра́вда, воздви́гнꙋтаѧ на тѧ̀, ѻ҆́тче ст҃ы́й, па́ки посла́хꙋ тѧ̀ ста́рцы а҆ѳѡ́нстїи во гра́дъ москвꙋ̀, и҆дѣ́же па́че пре́жднѧгѡ въ добродѣ́телехъ подвиза́лсѧ є҆сѝ.

Недꙋ́гꙋющїи притека́хꙋ къ тебѣ̀, ѻ҆́тче првⷣне, и҆ никто́же то́щъ ѿхожда́ше, чꙋдесє́мъ, тобо́ю сотворє́ннымъ, дивѧ́щесѧ и҆ бг҃а, ди́внаго во ст҃ы́хъ свои́хъ, сла́вѧще.

Бг҃оро́диченъ: Нѣ́сть, и҆́же къ твоемꙋ̀ притечѐ покро́вꙋ и҆ не ᲂу҆лꙋчѝ, ѻ҆трокови́цѣ, мно́гихъ твои́хъ щедро́тъ. тѣ́мже и҆ а҆́зъ молю́сѧ, не лишѝ мѧ̀ твоегѡ̀ застꙋпле́нїѧ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ, къ тебє̀ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.

Хрⷭ҇то́вою любо́вїю ᲂу҆ѧзви́всѧ, ѻ҆́тче прпⷣбне, ѡ҆ста́вилъ є҆сѝ всѧ̑, ꙗ҆̀же въ мі́рѣ се́мъ, и҆ горѣ̀ ᲂу҆́мъ впери́въ, то́чїю ѡ҆ нбⷭ҇нѣмъ помышлѧ́лъ є҆сѝ.

Мнѡ́гїѧ трꙋды̀ во гра́дѣ москвѣ̀ под̾ѧ́лъ є҆сѝ, подво́рїе ст҃ы́ѧ горы̀ а҆ѳѡ́нскїѧ ᲂу҆строѧ́ѧ, да мл҃твою послꙋ́житъ бра́тїѧ лю́демъ стра́ждꙋщымъ и҆ въ нꙋ́ждахъ сꙋ́щымъ.

Возлю́бленное ча́до пречⷭ҇тыѧ бцⷣы бы́лъ є҆сѝ, ѻ҆́тче, при́снѡ молѧ́сѧ пред̾ ст҃о́ю і҆кѡ́ною скоропослꙋ́шницею и҆ хра́мъ въ че́сть є҆ѧ̀ воздви́глъ є҆сѝ, да при́снѡ сла́витсѧ и҆́мѧ бг҃оѻтрокови́цы мр҃і́и.

Бг҃оро́диченъ: Ра́дꙋйсѧ, кꙋпино̀ неѡпали́маѧ, ю҆́же мѡѷсе́й ви́дѣ на сїна́и, и҆ лѣ́ствице высо́каѧ, ю҆́же і҆а́кѡвъ ви́дѣ, пребл҃гослове́ннаѧ бцⷣе приснодв҃о.

Конда́къ, гла́съ и҃:

Ꙗ҆́кѡ ѕвѣзда̀ на тве́рди небе́снѣй возсїѧ́лъ є҆сѝ, и҆ пꙋ́ть многотрꙋ́днагѡ мона́шескагѡ житїѧ̀ проше́дъ, по́двигами добродѣ́телей вѣне́цъ нетлѣ́нный стѧжа́лъ є҆сѝ, тѣ́мже и҆ хрⷭ҇то́съ бг҃ъ да́ромъ чꙋде́съ ѡ҆богатѝ тѧ̀. помина́й на́съ, чтꙋ́щихъ ст҃ꙋ́ю па́мѧть твою̀, прпⷣбне ѻ҆́тче а҆рїсто́клїе, горы̀ а҆ѳѡ́нскїѧ похвало̀ и҆ землѝ рꙋ́сскїѧ ᲂу҆краше́нїе.

І҆́косъ:

Въ стра́сѣ бж҃їемъ содѣ́ловаѧ пꙋ́ть сп҃се́нїѧ, прпⷣбне, ᲂу҆тверди́лсѧ є҆сѝ сло́вомъ а҆пⷭ҇льскимъ, ꙗ҆́кѡ любы̀ мі́ра сегѡ̀ вражда̀ бг҃ꙋ є҆́сть, и҆ и҆́же восхо́щетъ дрꙋ́гъ бы́ти мі́рꙋ, вра́гъ бж҃їй быва́етъ. тѣ́мже всѧ̑ бла̑га земна̑ѧ во ᲂу҆ме́ты вмѣни́въ, рꙋ́кꙋ свою̀ на ра́ло возложи́лъ є҆сѝ и҆ ѿню́дъ вспѧ́ть не зрѣ́лъ є҆сѝ, но прѧ́мѡ стѡпы̀ твоѧ̑ по словесѝ гдⷭ҇ню направлѧ́ѧ, ми́ръ и҆ поко́й въ дꙋшѝ твое́й ѡ҆брѣ́лъ є҆сѝ. сегѡ̀ ра́ди и҆ бг҃ъ тѧ̀ просла́ви ꙗ҆́кѡ вѣ́рнаго раба̀ своего̀, и҆ ᲂу҆вѣнча̀ ꙗ҆́кѡ добропобѣ́днаго во́ина цр҃ѧ̀ нбⷭ҇нагѡ.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Въ годи́нꙋ тѧ́жкихъ гоне́нїй въ землѝ на́шей ꙗ҆́кѡ свѣща̀ горѧ́щаѧ просїѧ́лъ є҆сѝ, мра́къ невѣ́рїѧ прогонѧ́ѧ, немощны̑ѧ ᲂу҆крѣплѧ́ѧ, малодꙋ̑шныѧ ᲂу҆твержда́ѧ и҆ ᲂу҆ныва́ющыѧ къ бг҃ꙋ подвига́ѧ.

Тве́рдѡ вѣ́рꙋ хрⷭ҇то́вꙋ и҆сповѣ́дꙋѧ, бꙋ́рю ѿ бг҃опроти̑вникъ воздвиза́емꙋю, ᲂу҆тиша́лъ є҆сѝ: и҆ всѣ́хъ притека́ющихъ къ тебѣ̀, во ᲂу҆пова́нїи на бг҃а промысли́телѧ ᲂу҆твержда́лъ є҆сѝ.

До́брый па́стырь ꙗ҆ви́лсѧ є҆сѝ, ѻ҆́тче пребл҃же́нне, дꙋ́шꙋ свою̀ за ѻ҆́вцы полага́ѧ, и҆ до послѣ́днѧгѡ воздыха́нїѧ ста́до, є҆́же собра́лъ є҆сѝ, ѡ҆кормлѧ́лъ є҆сѝ и҆ ѿ сѣте́й вра́жїихъ ѡ҆гражда́лъ є҆сѝ.

Бг҃оро́диченъ: Сн҃а ѻ҆́ч҃а є҆диноро́днаго, безма́тернѧ пе́рвѣе и҆ и҆з̾ тебє̀ рожде́нна, ᲂу҆вѣ́дѣвше без̾ѻ́тча, бж҃їю мт҃рь и҆сповѣ́дꙋемъ тѧ̀, безстра́стнѡ ро́ждшꙋю и҆ дв҃ꙋ пребы́вшꙋ па́че сло́ва, мр҃і́е бг҃оневѣ́сто.

Пѣ́снь и҃.

І҆рмо́съ: Седмери́цею пе́щь, халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Со а҆́гг҃лы всели́сѧ дꙋша̀ твоѧ̀, ѻ҆́тче ст҃ы́й, и҆дѣ́же нѣ́сть печа́ль, болѣ́знь и҆ воздыха́нїе. тѣ́мже мо́лимъ тѧ̀: предста́тельствꙋй пред̾ прⷭ҇то́ломъ бг҃а жива́гѡ ѡ҆ на́съ, любо́вїю чтꙋ́щихъ па́мѧть твою̀.

И҆спо́лнивъ зако́нъ хрⷭ҇то́въ, вѣ́рꙋ соблю́лъ є҆сѝ, тече́нїе земно́е сконча́лъ є҆сѝ, црⷭ҇твїе нбⷭ҇ное наслѣ́довалъ є҆сѝ. не забꙋ́ди и҆ на́съ, ᲂу҆бо́гихъ ча̑дъ твои́хъ, ѻ҆́тче прпⷣбне, но моли́сѧ всемлⷭ҇тивомꙋ бг҃ꙋ, да сп҃се́тъ дꙋ́шы на́шѧ.

Во́ли своеѧ̀ до конца̀ совле́ксѧ, прпⷣбне ѻ҆́тче, бг҃ови покори́лсѧ є҆сѝ и҆ крⷭ҇тъ земна́гѡ житїѧ̀ въ терпѣ́нїи проне́слъ є҆сѝ. тѣ́мже просла́ви тѧ̀ хрⷭ҇то́съ, премꙋ́дрѣ сп҃са́ѧй ро́дъ человѣ́ческїй.

Бг҃оро́диченъ: Чꙋде́съ па́че всѣ́хъ, всенепоро́чнаѧ, въ тебѣ̀ новосодѣ́ѧвшеесѧ чꙋ́до показа́сѧ ꙗ҆́вственнѡ: бг҃а бо родила̀ є҆сѝ тѣле́снѣ, земны̑мъ за млⷭ҇рдїе соедини́вшасѧ въ несли́тнѣмъ соедине́нїи, бг҃оневѣ́сто.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Въ преставле́нїи твое́мъ, ѻ҆́тче ст҃ы́й, возра́довашасѧ нбⷭ҇ныѧ си̑лы, срѣта́юще дꙋ́шꙋ твою̀, и҆ гдⷭ҇ь введѐ тѧ̀ въ ра̑йскїѧ ѻ҆би́тєли, ꙗ҆́кѡ вѣ́рнаго раба̀ своего̀.

Но́вое чꙋ́до ꙗ҆вѝ на́мъ гдⷭ҇ь мл҃твами твои́ми, прпⷣбне, дарова́въ ѡ҆брѣстѝ цѣльбонѡ́сныѧ мо́щи твоѧ̑, во ᲂу҆тѣше́нїе всѣ́хъ, чтꙋ́щихъ ст҃ꙋ́ю па́мѧть твою̀ и҆ бл҃годарѧ́щихъ бг҃а, ди́внаго во ст҃ы́хъ свои́хъ.

Ра́ка ст҃ы́хъ моще́й твои́хъ, ѻ҆́тче досточꙋ́дне, и҆сточа́етъ млⷭ҇ти всѣ̑мъ, съ вѣ́рою къ тебѣ̀ притека́ющымъ, и҆̀же и҆ воспѣва́ютъ ве́лїе твоѐ дерзнове́нїе пред̾ влⷣкою хрⷭ҇то́мъ ѡ҆ сп҃се́нїи дꙋ́шъ погиба́ющихъ.

Бг҃оро́диченъ: Нб҃о небе́съ вы́шшее ꙗ҆ви́ласѧ є҆сѝ бжⷭ҇твенною твое́ю сла́вою, бг҃оневѣ́сто влⷣчце, въ тѧ̀ бо бг҃ъ на́шъ всели́сѧ и҆ ꙗ҆ви́сѧ на́мъ.

Свѣти́ленъ:

На ст҃ѣ́й горѣ̀ а҆ѳѡ́нской ᲂу҆се́рднѡ подвиза́ѧсѧ, бра́тїю ѻ҆би́тели, ꙗ҆́кѡ наста́вникъ и҆зрѧ́дный, ко сп҃се́нїю приводи́лъ є҆сѝ: въ землѝ же рꙋ́сской своѐ бг҃оꙋго́дное житїѐ сконча́лъ є҆сѝ. ны́нѣ съ высоты̀ нбⷭ҇ныѧ посыла́еши по́мощь чтꙋ́щымъ твою̀ ст҃ꙋ́ю па́мѧть, ѻ҆́тче ст҃ы́й а҆рїсто́клїе.

Сла́ва, и҆ ны́нѣ: Тѧ̀ застꙋ́пницꙋ всѝ и҆́мамы грѣ́шнїи, ѽ прест҃а́ѧ дв҃о! бл҃гоꙋвѣ́тлива на́мъ содѣ́лай сн҃а твоего̀ мт҃рними твои́ми мольба́ми.