Пѣ́снь а҃.
І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою и҆ сп҃сшемꙋ і҆и҃лѧ, ꙗ҆́кѡ просла́висѧ.
Чистотꙋ̀ помышле́нїй да́ждь мѝ, сп҃се мо́й, є҆́же воспѣ́ти чистото́ю а҆́гг҃лѡмъ подо́бнагѡ, првⷣнагѡ і҆ѡа́нна пресвѵ́тера, ꙗ҆́кѡ а҆́гг҃ла гдⷭ҇а вседержи́телѧ.
Є҆́же люби́ти хрⷭ҇та̀ и҆ є҆мꙋ̀ слꙋжи́ти, і҆ѡа́нне ст҃ѣ, дѣ́ломъ и҆ сло́вомъ и҆спо́лнилъ є҆сѝ, во сщ҃е́нствѣ вѣ̑рнымъ ѻ҆́бразъ бы́въ сло́вомъ и҆ житїе́мъ.
І҆ѡа́ннꙋ крⷭ҇ти́телю подража́ѧ, покаѧ́нїѧ проповѣ́дниче, ѻ҆́тче і҆ѡа́нне првⷣнѣ, ѻ҆́бразъ воздержа́нїѧ, цѣломꙋ́дрїѧ и҆ дѣ́вственника чистотꙋ̀ ꙗ҆ви́лъ є҆сѝ.
Бг҃оро́диченъ:
Ѡ҆бл҃годатѝ на́съ, мт҃и бж҃їѧ, є҆́же къ бг҃оꙋгожде́нїю житїѐ на́ше ᲂу҆пра́вити, да твое́ю по́мощїю и҆ мл҃твами пра́веднаго і҆ѡа́нна живо́тъ вѣ́чный наслѣ́дꙋемъ.
Пѣ́снь г҃.
І҆рмо́съ:
Ка́мень, є҆го́же небрего́ша зи́ждꙋщїи, се́й бы́сть во главꙋ̀ ᲂу҆́гла: то́й є҆́сть ка́мень, на не́мже ᲂу҆твердѝ цр҃ковь хрⷭ҇то́съ, ю҆́же ѿ ѧ҆зы́къ и҆скꙋпѝ.
А҆пⷭ҇льски трꙋди́лсѧ є҆сѝ ѿ ᲂу҆́тра па́стырскагѡ житїѧ̀ твоегѡ̀ да́же до ве́чера, ѻ҆́тче і҆ѡа́нне, николи́же въ любвѝ къ бг҃ꙋ и҆ бли́жнемꙋ ѡ҆скꙋдѣва́ѧ.
Нбⷭ҇нагѡ црⷭ҇твїѧ взыскꙋ́ѧ, ᲂу҆се́рдный дѣ́латель бл҃ги́хъ на землѝ ꙗ҆ви́лсѧ є҆сѝ, мл҃твою вѣ́ры недꙋ́ги и҆сцѣлѧ́ѧ и҆ заблꙋ́ждшыѧ къ покаѧ́нїю призыва́ѧ, ст҃ѣ.
Никогѡ́же ѿвраща́лсѧ є҆сѝ, то́кмо ѿверга́ющихсѧ гдⷭ҇а і҆и҃са хрⷭ҇та̀ и҆ цр҃кве є҆гѡ̀ ст҃ы́ѧ, є҆́йже сыны̀ вѣ́ка сегѡ̀ противлѧ́ютсѧ. но и҆ ѡ҆ си́хъ заблꙋ́ждшихъ въ ско́рби мно́зей моле́нїе твоѐ къ бг҃ꙋ возноси́ти не престава́лъ є҆сѝ.
Бг҃оро́диченъ:
Є҆дине́нїе вѣ́рныхъ въ цр҃кви сн҃а твоегѡ̀ и҆ бг҃а на́шегѡ сохранѝ, пречⷭ҇таѧ дв҃о мт҃и, да при́снѡ въ любвѝ хрⷭ҇то́вѣ дрꙋ́гъ ко дрꙋ́гꙋ ᲂу҆тверди́мсѧ.
Сѣда́ленъ, гла́съ в҃:
Мы̀, немощні́и, къ тебѣ̀, првⷣнѣ і҆ѡа́нне, ꙗ҆́кѡ си́льномꙋ мл҃твенникꙋ пред̾ бг҃омъ, притека́емъ, просѧ́ще недꙋ́гѡмъ дꙋше́внымъ и҆ тѣлє́снымъ и҆сцѣлє́нїѧ, въ ско́рбехъ ѡ҆ грѣсѣ́хъ на́шихъ покаѧ́нїемъ и҆збавле́нїѧ, странѣ̀ на́шей и҆ лю́демъ є҆ѧ̀ ми́рное жи́тельство и҆ всѧ̑ потрє́бнаѧ ко сп҃се́нїю.
Бг҃оро́диченъ:
Ѻ҆трокови́це бл҃года́тнаѧ, мт҃и безневѣ́стнаѧ, наде́ждо на́шегѡ спⷭ҇нїѧ, да́ждь на́мъ въ вѣ́рѣ ᲂу҆твержде́нїе и҆ во бл҃гочести́вѣмъ житїѝ преꙋспѣ́ѧнїе, въ ско́рбехъ и҆ печа́лехъ ᲂу҆тѣше́нїе. тѧ́ бо, ꙗ҆́кѡ ро́ждшꙋю сп҃са хрⷭ҇та̀, при́снѡ велича́емъ.
Пѣ́снь д҃.
І҆рмо́съ:
Дꙋ́хомъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ позна́ешисѧ, внегда̀ прїитѝ вре́мени пока́жешисѧ, сла́ва си́лѣ твое́й, гдⷭ҇и.
Ло́жнаѧ мꙋдрова̑нїѧ сынѡ́въ вѣ́ка сегѡ̀, возстаю́щихъ проти́вꙋ и҆́стины ст҃ы́ѧ цр҃кве хрⷭ҇то́вы, ѿве́рглъ є҆сѝ, ст҃ѣ і҆ѡа́нне, сло́вомъ и҆ житїе́мъ правосла́вїе ᲂу҆твержда́лъ є҆сѝ, поѧ̀: сла́ва си́лѣ твое́й, гдⷭ҇и.
И҆́мѧ хрⷭ҇то́во при́снѡ въ се́рдце носѧ̀, ст҃о́мꙋ бг҃оно́сцꙋ і҆гна́тїю подража́ѧ, въ себѣ̀ само́мъ всѧ́кое прираже́нїе грѣха̀ и҆стреби́лъ є҆сѝ, поѧ̀: сла́ва си́лѣ твое́й, гдⷭ҇и.
Си́ла бж҃їѧ, въ не́мощи соверша́ющаѧсѧ, ꙗ҆вѝ тѧ̀ ди́внаго чꙋдотво́рца, цѣли́телѧ недꙋ́жныхъ и҆ немощны́хъ, ᲂу҆чи́телѧ покаѧ́нїѧ, мл҃твы дѣ́лателѧ, пою́ща: сла́ва си́лѣ твое́й, гдⷭ҇и.
Бг҃оро́диченъ:
Ꙗ҆ви́ласѧ є҆сѝ, влⷣчце бцⷣе, бл҃года́тнаѧ помо́щница пра́ведномꙋ пресвѵ́терꙋ і҆ѡа́ннꙋ, при́снѡ молѧ́щемꙋсѧ тѝ и҆ сн҃ꙋ твоемꙋ̀ и҆ бл҃года́рнѡ пою́щемꙋ: сла́ва си́лѣ твое́й, гдⷭ҇и.
Пѣ́снь є҃.
І҆рмо́съ:
Тво́й ми́ръ да́ждь на́мъ, сн҃ѣ бж҃їй: и҆но́гѡ бо, ра́звѣ тебѣ̀ бг҃а не зна́емъ, и҆́мѧ твоѐ и҆менꙋ́емъ, ꙗ҆́кѡ бг҃ъ живы́хъ и҆ ме́ртвыхъ є҆сѝ.
Бл҃го мнѣ̀, ꙗ҆́кѡ смири́лъ мѧ̀ є҆сѝ, гдⷭ҇и, си́це моли́лсѧ є҆сѝ, терпѧ̀ поноше́нїѧ хꙋли́телей твои́хъ, ст҃ѣ і҆ѡа́нне, хранѧ̀ ми́ръ се́рдца твоегѡ̀ непреста́нною мл҃твою и҆ неѕло́бїемъ.
Ѡ҆бле́ксѧ во хрⷭ҇та̀ вѣ́рою и҆ прича́стїемъ ст҃ы́хъ та́инъ, бы́лъ є҆сѝ тве́рдъ, ꙗ҆́кѡ скала̀, глаго́лѧ: мнѣ̀ хрⷭ҇то́съ полнота̀ всѣ́хъ бл҃гъ, живо́тъ и҆ ми́ръ, превосходѧ́й всѧ́къ ᲂу҆́мъ.
Гдⷭ҇ни трапе́зы при́снѡ причаща́ѧсѧ, стѧжа́лъ є҆сѝ свѣ́тъ хрⷭ҇то́въ, просвѣща́ющїй всѧ́каго человѣ́ка, грѧдꙋ́щаго въ ми́ръ. си́мъ же и҆ на́съ просвѣтѝ, і҆ѡа́нне свѣтоно́сче, тѧ̀ почита́ющихъ.
Бг҃оро́диченъ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й, пречⷭ҇таѧ дв҃о, ѻ҆́бщники сла́вы твоеѧ̀ содѣ́лай и҆ на́съ, тѧ̀ при́снѡ ᲂу҆бл҃жа́ющихъ.
Пѣ́снь ѕ҃.
І҆рмо́съ:
Проро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆з̾ тлѝ и҆ сп҃сѝ мѧ̀, сп҃се мі́ра, зовꙋ́ща: сла́ва тебѣ̀.
Ѡ҆живлѧ́ѧ дꙋ́шꙋ непреста́нною ко гдⷭ҇ꙋ мл҃твою, си́це взыва́лъ є҆сѝ, і҆ѡа́нне бг҃омꙋ́дрѣ: гдⷭ҇и, да́ждь мѝ люби́ти всѧ́каго человѣ́ка, ꙗ҆́кѡ самаго̀ себѣ̀. сїю̀ добродѣ́тель помозѝ и҆ на́мъ стѧжа́ти.
Призыва́ѧ и҆́мѧ бж҃їе во сп҃се́нїе твоѐ, сп҃се́нїю мно́гихъ послꙋжи́лъ є҆сѝ. да пребꙋ́демъ и҆ мы̀ въ є҆дине́нїи съ бг҃омъ и҆ въ любвѝ междꙋ̀ собо́ю, мо́лимтисѧ, ѻ҆́тче і҆ѡа́нне.
Ра́зꙋмъ бг҃опросвѣще́нный стѧжа́лъ є҆сѝ, і҆ѡа́нне премꙋ́дре, ѡ҆ ст҃ѣ́й трⷪ҇цѣ бг҃осло́вствꙋѧ, ре́клъ є҆сѝ: высота̀ и҆́стины сеѧ̀ животво́рна дꙋшѣ̀, въ простотѣ̀ се́рдца вѣ́рꙋющей.
Бг҃оро́диченъ:
И҆зба́вителѧ на́шего неизрече́нно ро́ждшаѧ, прест҃а́ѧ дв҃о, бꙋ́ди на́мъ грѣ̑шнымъ прибѣ́жище сп҃се́нїѧ и҆ вѣ́чныѧ жи́зни хода́таица.
Конда́къ, гла́съ г҃:
Дне́сь па́стырь кроншта́дтскїй предстои́тъ прⷭ҇то́лꙋ бж҃їю и҆ ᲂу҆се́рднѡ мо́литъ ѡ҆ вѣ́рныхъ хрⷭ҇та̀ пастыренача́льника, ѡ҆бѣтова́нїе да́вшаго: сози́ждꙋ цр҃ковь мою̀, и҆ врата̀ а҆́дѡва не ѡ҆долѣ́ютъ є҆́й.
І҆́косъ:
Восхва́лимъ, вѣ́рнїи, ди́внаго па́стырѧ кроншта́дтскаго, бл҃года́ти тезоимени́таго, свѣти́льника, присногорѧ́щаго ᲂу҆ прⷭ҇то́ла ст҃ы́ѧ трⷪ҇цы, съ бцⷣею и҆ со всѣ́ми ст҃ы́ми землѝ рѡссі́йскїѧ молѧ́щагосѧ ѡ҆ сп҃се́нїи всѣ́хъ, и҆́мѧ гдⷭ҇не призыва́ющихъ, да ᲂу҆крѣпи́тсѧ въ странѣ̀ на́шей правосла́вїе си́лою хрⷭ҇та̀ пастыренача́льника, ѡ҆бѣтова́нїе да́вшагѡ: сози́ждꙋ цр҃ковь мою̀, и҆ врата̀ а҆́дѡва не ѡ҆долѣ́ютъ є҆́й.
Пѣ́снь з҃.
І҆рмо́съ:
Сꙋ́щымъ въ пещѝ ѻ҆трокѡ́мъ твои́мъ, сп҃се, не прикоснꙋ́сѧ, нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.
Наста́ви на́съ, па́стырю до́брый, жи́зни во хрⷭ҇тѐ, по сло́вꙋ бо твоемꙋ̀, вели́ко дѣ́ланїе є҆́сть, є҆́же побѣжда́ти грѣ́хъ, въ на́съ живꙋ́щїй. да не ѡ҆пали́тсѧ дꙋша̀ на́ша пла́менемъ є҆гѡ̀, помоли́сѧ.
Ѡ҆чище́нїе на́ше и҆ и҆збавле́нїе є҆́сть хрⷭ҇то́съ сп҃си́тель, є҆мꙋ́же ты̀, па́стырю пречꙋ́дный, ѡ҆ на́шемъ дꙋхо́внѣмъ возрожде́нїи, чрез̾ покаѧ́нїе и҆ и҆справле́нїе, помоли́сѧ.
Си́лою дх҃а ст҃а́гѡ въ непреста́ннѣй мл҃твѣ безстра́стїе стѧжа́вый, до́брый па́стырю і҆ѡа́нне, страсте́й любогрѣхо́вныхъ на́мъ и҆зба́витисѧ помоли́сѧ.
Бг҃оро́диченъ:
Ꙗ҆вѝ на́мъ млⷭ҇ть твою̀, бцⷣе дв҃о, мт҃и живота̀, къ тебѣ̀ съ вѣ́рою притека́ющымъ и҆ сн҃ꙋ твоемꙋ̀ и҆ бг҃ꙋ покаѧ́нїе приносѧ́щымъ.
Пѣ́снь и҃.
І҆рмо́съ:
Є҆го́же ᲂу҆жаса́ютсѧ а҆́гг҃ли и҆ всѧ̑ во́инства, ꙗ҆́кѡ творца̀ и҆ гдⷭ҇а, по́йте, сщ҃е́нницы, просла́вите, ѻ҆́троцы, бл҃гослови́те, лю́дїе, и҆ превозноси́те во всѧ̑ вѣ́ки.
Ще́дрою рꙋко́ю твое́ю ми́лостыню просѧ́щымъ подава́лъ є҆сѝ, і҆ѡа́нне млⷭ҇тиве. не вѣ́дѣ бо шꙋ́йца, є҆́же творѝ десни́ца твоѧ̀, тщетꙋ́ бо земна́го стѧжа́нїѧ на нбⷭ҇наѧ премѣни́лъ є҆сѝ.
И҆мꙋ́щемꙋ дано̀ бꙋ́детъ и҆ преизбꙋ́детъ, речѐ гдⷭ҇ь, та́кѡ и҆ ты̀, ѻ҆́тче і҆ѡа́нне, тща́нїемъ ве́лїимъ бл҃года́ть дх҃а ст҃а́гѡ стѧжа́лъ є҆сѝ, є҆́юже и҆ на́съ мл҃твами твои́ми ны́нѣ ᲂу҆ще́дри.
Хране́нїе ᲂу҆стѡ́мъ полага́ѧ, николи́же сꙋ́єтнаѧ возглаго́лалъ є҆сѝ, і҆ѡа́нне, зако́на гдⷭ҇нѧ взыскꙋ́ѧ, и҆ на́съ въ не́мъ ходи́ти при́снѡ наꙋча́еши.
Бг҃оро́диченъ:
Тѧ̀, бцⷣꙋ, вы́шшꙋю нб҃съ и҆ чи́стшꙋю свѣ́тлостей со́лнечныхъ, въ пѣ́снехъ немо́лчныхъ воспѣва́ютъ херꙋві́ми и҆ серафі́ми. съ ни́миже и҆ мы̀, недосто́йнїи, тѧ̀ ᲂу҆блажа́емъ.
Пѣ́снь ѳ҃.
І҆рмо́съ:
Живопрїе́мный и҆сто́чникъ приснотекꙋ́щїй, свѣтоно́сный свѣти́льникъ бл҃года́ти, хра́мъ ѡ҆дꙋшевле́нный, сѣ́нь пречⷭ҇тꙋю, нб҃сѐ и҆ землѝ простра́ннѣйшꙋю, бцⷣꙋ, вѣ́рнїи, велича́емъ.
І҆и҃са хрⷭ҇та̀ пастыренача́льника ѻ҆́бразъ въ себѣ̀ носѧ̀, і҆ѡа́нне, ᲂу҆гото́валъ є҆сѝ по всѧ̑ дни̑ дꙋ́шꙋ твою̀ за па́ствꙋ полага́ти и҆ во грѣсѣ́хъ погиба́ющихъ къ бг҃ꙋ ѡ҆браща́ти.
Приносѧ́щихъ тѝ похвалꙋ̀ сїю̀, ѻ҆́тче і҆ѡа́нне, не ѿри́ни, но млⷭ҇ть хрⷭ҇та̀ бг҃а и҆спросѝ къ проще́нїю мно́гихъ прегрѣше́нїй.
Ѻ҆чи́ма твои́ми при́снѡ взира́ѧ ко гдⷭ҇ꙋ, ѻ҆́тче і҆ѡа́нне, врата̀ се́рдца твоегѡ̀ ѿвє́рста є҆мꙋ̀ и҆мѣ́лъ є҆сѝ, да ѿве́рзетсѧ и҆ на́мъ две́рь покаѧ́нїѧ мл҃твами твои́ми.
Бг҃оро́диченъ:
Хрⷭ҇та̀ бг҃а на́шего, пре́жде вѣ̑къ ѿ ѻ҆ц҃а̀ рожде́ннаго без̾ ма́тере, ро́ждшагосѧ же ѿ тебѣ̀ без̾ ѻ҆тца̀ на́съ ра́ди, молѝ, чⷭ҇таѧ бг҃оневѣ́сто, да сп҃се́нїе ᲂу҆лꙋчи́мъ, тѧ̀ велича́юще.
Свѣти́ленъ:
Ве́сь и҆спо́лнилсѧ є҆сѝ свѣ́та хрⷭ҇то́ва, ѡ҆ст҃и́въ себѐ бг҃ови, просвѣтѝ и҆ на́съ свѣ́томъ бл҃года́ти дх҃а ст҃а́гѡ мл҃твами твои́ми, і҆ѡа́нне свѣтоно́сне.