Канон святому благоверному князю Феодору Ярославичу, Новгородскому

Пе́снь 1.

Ирмо́с: Ди́вному Бо́гу вели́чия принесе́м, и великоле́пно с на́ми да воспое́т земля́ и не́бо я́сно сла́ву Его́.

Я́ко еле́нь жела́ет на исто́чники водны́я, си́це жела́ше душа́ твоя́, кня́же Фео́доре, к Бо́гу, И́же и прия́ тя́ с любо́вию и сотвори́ насле́дника Ца́рствия Своего́.

Кра́ткое жи́зни твоея́ име́л еси́ тече́ние, но по́двигом до́брым в зако́не Бо́жии подвиза́лся еси́ и ве́ру соблю́л еси́, сего́ ра́ди отложи́ся тебе́ вене́ц сла́вы безсме́ртныя.

Ди́вный, Го́споди, во святы́х Твои́х, ди́вен еси́ вои́стинну и во святе́м Твое́м кня́зе Фео́доре, и́бо в не́мощнем естестве́ челове́честем вышеесте́ственную си́лу Твою́ соверша́я, да́л еси́ те́лу его́ нетле́ние.

Богоро́дичен: Чу́дно бы́сть, е́же огне́м опаля́тися купине́ и не сгара́ти; чу́дно же и сие́ вои́стинну, я́ко Де́вою безсе́менно зачала́ и родила́ еси́ Сы́на Бо́жия и по рожде́нии Его́ па́ки Де́ва пребыла́ еси́. Те́мже Тя́, я́ко Ма́терь Бо́жию и Де́ву, благоче́стно велича́ем.

Пе́снь 3.

Ирмо́с: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че Тебе́, Го́споди.

И́стинная лоза́ виногра́да Христо́ва бы́л еси́, кня́же Фео́доре, сего́ ра́ди и в кра́ткое вре́мя мно́г пло́д доброде́телей израсти́л еси́.

Дозре́вшим твои́х доброде́телей гро́здием, еще́ тебе́ мла́ду су́щу, да не ка́ко же́стокия страсте́й бу́ри повредя́т я́, преселе́н еси́ в вертогра́д Небе́сный.

Ко́ль пра́веден и ще́др еси́, Благоутро́бный Влады́ко, в мздовоздая́нии Твои́м пра́ведником! Довле́ет и еди́н о́браз: ка́ко пра́ведника Твоего́ Фео́дора уще́дрил еси́.

Богоро́дичен: От утро́бы ма́тере Себе́ Бо́гу посвяти́ла еси́, Отрокови́це, и усе́рдием Ему́ служи́ла еси́, те́м Тебе́ и Бо́г воздаде́ по правоте́, я́ко Тя́ вси́ ро́ди Богоро́дицею ублажа́ют.

Седа́лен, гла́с 8:

Исхо́д тво́й, кня́же Фео́доре, от сея́ вре́менныя жи́зни, мно́гия источи́ сле́зы от о́чию сыно́в росси́йских, но Оте́ц щедро́т и Бо́г вся́кия уте́хи награди́ и́х изоби́льно весе́лием, возложи́в на свято́е твое́ те́ло оде́жду нетле́ния, во вя́щшее увере́ние, я́ко ты́ по исхо́де твое́м в ра́дости пребыва́еши.

Богоро́дичен: Усумне́ся обру́чник Тво́й Ио́сиф, ви́дев Тя́ непра́здну, но а́бие разреши́ся сумне́ние, егда́ извеще́н бы́сть от А́нгела, я́ко заче́ншееся в Тебе́ от Ду́ха е́сть Свя́та.

Пе́снь 4.

Ирмо́с: Услы́шах слу́х си́лы Твоея́, и возвесели́ся се́рдце мое́ о Го́споде.

Хваля́шеся иногда́ ева́нгельский ю́ноша пред Го́сподем, я́ко вся́ за́поведи соблюде́ от ю́ности своея́, но не послу́ша Го́спода, ма́лое сотвори́ти ему́ повелева́ющаго, и не и́де всле́д Его́, ты́ же, блаже́нне Фео́доре, и, не хваля́ся, повеле́ний Госпо́дних слу́шал еси́ и Ему́ с весе́лием после́довал еси́.

Даны́ бы́ша тебе́ от Го́спода тала́нты душе́вныя и теле́сныя, и́хже во бла́го употребля́я, в кра́ткое вре́мя мно́гое приобре́тение Ему́ сотвори́л еси́, сего́ ра́ди и введе́ тя́, я́ко раба́ блага́го и ве́рнаго, в ра́дость Свою́.

Слу́шаяй моли́твы пра́ведных Твои́х, Го́споди, услы́ши моли́тву и пра́ведника Твоего́ Фео́дора, ю́же прино́сит Тебе́ о ро́де свое́м.

Богоро́дичен: С ра́достию гото́ва су́щи к зва́нию, на не́же избра́ Тя́ Вы́шний, Де́во Мари́е, со смире́нием Гаврии́лу рекла́ еси́: се́ раба́ Госпо́дня. Мы́ же, Тя́ си́це смири́вшуюся, Влады́чицею ны́не почита́ем.

Пе́снь 5.

Ирмо́с: Я́ко Бо́га ино́го, Бла́же, па́че Тебе́, не зна́ем, к Тебе́, Све́ту Незаходи́мому, от но́щи у́тренююще, воспева́ем Тя́, Человеколю́бче.

В ма́лых дне́х жития́ твоего́, блаже́нне Фео́доре, вели́ких свети́ло яви́лся еси́ доброде́телей, и́миже Бо́г благоугожда́ется.

Све́тлу ду́шу твою́ хотя́ предста́вити Бо́гу, чистоту́ в житии́ твое́м соблю́л еси́, сего́ ра́ди по твое́м успе́нии вше́л еси́, а́може ничто́же нечи́сто вхо́дит.

Ра́ди пра́ведных Твои́х, Го́споди, простира́еши лучи́ Твоея́ ми́лости на гре́шныя: озари́ у́бо и на́с, недосто́йных рабо́в Твои́х, луча́ми Твоего́ благоутро́бия ра́ди пра́ведника Твоего́ Фео́дора.

Богоро́дичен: Егда́ Гаврии́л благовести́ Тебе́, Неискусому́жная Де́во, я́ко во чре́ве Твое́м зачне́ши и роди́ши Сы́на Бо́жия, с ве́рою отвеща́ла еси́: бу́ди Мне́ по глаго́лу твоему́. Сего́ ра́ди по ве́ре Твое́й и бы́сть Тебе́ благослове́ние Вы́шняго, Тобо́ю же и вси́ лю́дие, и́же сиде́ша во тьме́ и се́ни сме́ртней, узре́ша све́т ве́лий.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

И мя́гкия нося́й оде́жды, кня́же Фео́доре, си́це житие́м твои́м в кра́ткое вре́мя Бо́гу угоди́л еси́, я́ко мно́гим диви́тися, и́же угоди́ша Ему́, долговре́менно облача́ющеся во вре́тище.

Уве́рен бы́в, я́ко и златотка́нныя ри́зы о́бщему подлежа́т тле́нию, потща́лся еси́ в животе́ твое́м из доброде́телей истка́ти себе́ ри́зу нетле́ния, в не́йже ны́не красу́ешися.

Коле́на се́рдца на́шего преклоня́я, благодаре́ние Тебе́ возсыла́ем, Человеколю́бче, я́ко те́ло кня́зя Фео́дора, тле́нию по естеству́ подлежа́щее, обле́кл еси́ в ри́зу нетле́ния, и́мже умножа́ется сла́ва всея́ Росси́и.

Богоро́дичен: Позлаще́нными доброде́телей ри́зами оде́янна и преиспещре́нна была́ еси́ на земли́, Пренепоро́чная, сего́ ра́ди и Бо́г Сло́во во утро́бе Твое́й благоволи́ облещи́ся в пло́ть челове́ческую.

Конда́к, гла́с 4:

В благоче́стии рожде́нна, в стра́се Бо́жии воспита́на, в житии́ целому́дрие стяжа́вшаго, по успе́нии же нетле́нием телесе́ просия́вшаго, благове́рнаго кня́зя Фео́дора во святы́х почита́я, смире́нно мо́лимся Тебе́, Всеси́льный Влады́ко, да и во ве́ки прославля́еши святы́ми Твои́ми страны́ на́ша росси́йския.

И́кос:

Досто́йно и пра́ведно е́сть ра́доватися тебе́, свя́те Фео́доре, на Небеси́, я́ко неизрече́нную благода́ть от Бо́га получи́л еси́, мы́ же ра́дуемся на земли́, я́ко тя́ и́мамы те́плаго к Бо́гу моли́твенника, и от ра́дости си́це зове́м: ра́дуйся, похвало́ росси́йская.

Пе́снь 7.

Ирмо́с: В нача́ле зе́млю основа́вый и Небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Я́ко чи́стое доброде́телей зерца́ло бы́л еси́ на земли́, кня́же Фео́доре, сего́ ра́ди Вы́шний, восприя́в ду́шу твою́ в черто́г Сво́й Небе́сный, оста́ви на́м о́браз, нетле́нное твое́ те́ло, да после́дуем стопа́м твои́м.

Не стыди́мся хвали́тися, пра́ведниче Бо́жий, я́ко моли́тва твоя́ к Бо́гу мно́го мо́жет поспешествова́ти на́м во благо́е: ве́мы бо, я́ко моли́твы пра́ведных прия́тны Ему́.

Хва́лим, пое́м и благослови́м Тебе́, Го́споди, я́ко призира́еши на Росси́ю с высоты́ свята́го жили́ща Твоего́ и посеща́еши ю́, я́ко виногра́д Тво́й, его́же насади́ десни́ца Твоя́.

Богоро́дичен: Блажи́м Тя́, Богоро́дице Де́во, и блажи́ти никогда́ не престае́м: благослове́нна бо Ты́ еси́ в жена́х и благослове́н Пло́д чре́ва Твоего́.

Пе́снь 8.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Блаже́н еси́, кня́же Фео́доре, я́ко сы́й посреде́ волну́ющагося душетле́нных страсте́й мо́ря, к ти́хому приста́нищу в кра́ткое вре́мя безбе́дно дости́гл еси́.

А́ще и устремля́хуся ми́ра сего́ во́лны, е́же потопи́ти ю́ность твою́, но ничто́же успе́ша: ковче́г бо тебе́ бы́сть чистота́, корми́ло – Правосла́вная ве́ра, ко́тва – тве́рдая на Бо́га наде́жда, ве́трило – любо́вь к Бо́гу и бли́жним.

Прославля́ем Тя́, Го́споди Бо́же, я́ко, удивля́я хоте́ния Твоя́ во святы́х Твои́х, удиви́л еси́ хоте́ние Твое́ и в благове́рнем кня́зе Фео́доре.

Богоро́дичен: Удивля́хуся волсви́ еги́петстии си́ле чудотво́рнаго жезла́ Моисе́ова, мы́ же удивля́емся Тебе́, Мари́е: ка́ко Невмести́маго все́ми во утро́бе Твое́й вмести́ла еси́?

Пе́снь 9.

Ирмо́с: Благослове́н Госпо́дь, Бо́г Изра́илев, воздви́гнувши ро́г спасе́ния на́м в дому́ Дави́дове, о́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Ви́дяще тя́ росси́йстии сопоста́ты, лета́ми доспева́ющаго ко изощре́нию меча́ на вы́и и́х, не можа́ху не смуща́тися: ты́ бо, душе́внаго сопоста́та, еще́ мла́д сы́й, победи́ти в си́лах бы́л еси́; сего́ ра́ди кре́пкий во бране́х Госпо́дь и причте́ тя́, я́ко до́браго во́ина, к Безпло́тному Своему́ во́инству.

Несумне́нная наде́жда бы́л сыново́м росси́йским к защище́нию оте́чества, но Прему́дрый о все́х Промысли́тель благоволи́ тя́ прия́ти безмяте́жна в поко́й Сво́й, Росси́ю же защити́ти руко́ю бра́та твоего́, свята́го Алекса́ндра.

Благослове́н еси́, Го́споди Бо́же на́ш, я́ко ве́си пути́ непоро́чных, и достоя́ние и́х во ве́ки пребыва́ет, его́же прича́стником бы́ти сподо́бил еси́ и непоро́чнаго кня́зя Фео́дора.

Богоро́дичен: Призира́яй на смире́нныя рабы́ Своя́ Вы́шний призре́ и на Твое́ смире́ние, Пречи́стая Де́во, и превознесе́ Тя́ па́че все́х дще́рей сыно́в челове́ческих.

Свети́лен, гла́с 8:

Прекра́сный доброде́телей хра́м на земли́ бы́в, благове́рный кня́зь Фео́дор оста́ви на́м по свое́м успе́нии те́ло свое́, украше́нное нетле́нием, душе́ю же вни́де в хра́м нерукотворе́нный.

Богоро́дичен: Вели́ким благодаре́нием до́лжни мы́ Тебе́, Влады́чице: еди́на бо Ты́ от земноро́дных яви́лася еси́ досто́йна прия́ти во утро́бу Твою́ Сы́на Бо́жия, Его́же Оте́ц посла́ на зе́млю разруши́ти зако́нную кля́тву и пода́ти ве́чное все́м благослове́ние.