Пѣ́снь а҃.
І҆рмо́съ:
Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца сп҃сѐ, пѣ́снь бг҃ови воспѣва́юща.
Стра́стными бꙋ́рѧми всю́дꙋ погрꙋжа́емꙋ, и҆ помышлє́нїи грѣхо́вными коле́блемꙋ, ко приста́нищꙋ ти́хомꙋ хрⷭ҇то́выхъ за́повѣдей мл҃твами твои́ми, првⷣнаѧ софі́е, мѧ̀ напра́ви, да досто́йнѡ тѧ̀ воспою̀
Бжⷭ҇твенными добро́тами просвѣще́на, бг҃обл҃же́ннаѧ софі́е, сло́вꙋ превѣ́чномꙋ ᲂу҆невѣ́стиласѧ є҆сѝ, пожи́вши бг҃оꙋго́днѣ, и҆ тогѡ̀ живонѡ́снымъ стопа́мъ послѣ́довала є҆сѝ, вѣ́рꙋ правосла́внꙋю житїе́мъ твои́мъ ᲂу҆твержда́ющи.
Бжⷭ҇твенныхъ ѻ҆тє́цъ наказа́нїю послѣ́довала є҆сѝ, сла́внаѧ софі́е, и҆ си́хъ нра́вꙋ чи́стѣ поревнова́ла є҆сѝ, по зако́нꙋ бж҃їю пра́веднѡ пожи́вши, до́брыми дѣ́лы бг҃ꙋ ᲂу҆годи́вши, бг҃омꙋ́драѧ, и҆ и҆́стиннымъ смире́нїемъ.
Бг҃оро́диченъ:
Бжⷭ҇твеннꙋю ста́мнꙋ и҆ трапе́зꙋ, хлѣ́бъ живо́тный поне́сшꙋю, недѣ́ланнꙋю ни́вꙋ, го́рꙋ ст҃ꙋ́ю, бцⷣꙋ дв҃ꙋ пѣ́сньми просла́вимъ.
Пѣ́снь г҃.
І҆рмо́съ:
Нбⷭ҇нагѡ крꙋ́га верхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Въ нбⷭ҇ныѧ черто́ги свѣтоза̑рныѧ всели́вшисѧ, и҆сцѣле́нїѧ на́мъ рѣ́ки и҆сточа́еши, премꙋ́драѧ софі́е, стра̑стнаѧ течє́нїѧ и҆зсꙋша́ющи.
Оу҆краси́ласѧ є҆сѝ жела́нїемъ кра́йнимъ, жела́ющи хрⷭ҇та̀, премно́жествомъ бл҃госе́рдїѧ пло́тїю ѡ҆бнища́вшагѡ, и҆ послѣ́довала є҆сѝ живѡ́тнымъ є҆гѡ̀ словесє́мъ, житє́йскаѧ всѧ̑ кра̑снаѧ возненави́дѣвши.
Позлащє́ннѣ крилѣ̑ добродѣ́тели стѧжа́вши, на высотꙋ̀ нбⷭ҇нꙋю возлетѣ́ла є҆сѝ, бл҃же́ннаѧ софі́е, ꙗ҆́кѡ голꙋби́ца непоро́чнаѧ.
Бг҃оро́диченъ:
Ро́дъ человѣ́ческїй сп҃се́сѧ, всенепоро́чнаѧ, всесла́внымъ ржⷭ҇тво́мъ твои́мъ: тѣ́мже чти́мъ тѧ̀ и҆ бл҃гоче́стнѡ ᲂу҆бл҃жа́емъ, пречⷭ҇таѧ дв҃о бг҃ора́дованнаѧ.
Сѣда́ленъ, гла́съ д҃:
Добро́тами бжⷭ҇твенными преꙋкра́шена и҆ нетлѣ́нїемъ ст҃ы́хъ моще́й твои́хъ ѿ бг҃а просла́влена, првⷣнаѧ софі́е, къ немꙋ̀ въ нетлѣ́нный черто́гъ вошла̀ є҆сѝ, и҆дѣ́же мо́лишисѧ непреста́ннѡ сп҃сти́сѧ ѿ всѧ́кїѧ бѣды̀ любо́вїю тѧ̀ почита́ющымъ.
Бг҃оро́диченъ:
Чⷭ҇таѧ, всенепоро́чнаѧ и҆ неискꙋсобра́чнаѧ дв҃о, є҆ди́на безлѣ́тное сло́во бж҃їе въ лѣ́то ро́ждшаѧ: того̀ со ст҃ы́ми и҆ чтⷭ҇ны́ми а҆пⷭ҇лы, мч҃нки и҆ прⷪ҇рѡ́ки, и҆ прпⷣбными молѝ, дарова́ти на́мъ ѡ҆чище́нїе и҆ ве́лїю млⷭ҇ть.
Пѣ́снь д҃.
І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Свѣ́тлое твоѐ торжество̀, свѣ́томъ дх҃а бж҃їѧ сїѧ́ющее, ѡ҆зарѧ́етъ дꙋ́шы на́шѧ, вѣ́рою пою́щихъ тѧ̀, софі́е првⷣнаѧ.
Чꙋдесы̀ бжⷭ҇твенными ᲂу҆вѣ́рила є҆сѝ невѣ́дꙋщихъ влⷣкꙋ хрⷭ҇та̀, и҆ къ позна́нїю тогѡ̀ ѡ҆брати́ла є҆сѝ пре́лести тьмꙋ̀ ѡ҆ста́вльшихъ.
Да́ры хрⷭ҇тꙋ̀ принесла̀ є҆сѝ, мл҃твы и҆ трꙋды̀ воздержа́нїѧ: сегѡ̀ ра́ди прїѧ́ла є҆сѝ нбⷭ҇ное црⷭ҇тво, софі́е, и҆ вѣ́чнꙋющее наслажде́нїе.
Бг҃оро́диченъ:
Смири́вши сп҃сѝ мѧ̀, высокомꙋ́дрїемъ живꙋ́щаго, ро́ждшаѧ возне́сшаго смири́вшеесѧ є҆стество̀ на́ше, пречⷭ҇таѧ.
Пѣ́снь є҃.
І҆рмо́съ:
Оу҆́тренююще вопїе́мъ тѝ, гдⷭ҇и, сп҃сѝ ны̀: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Рꙋка́ма твои́ма прпⷣбнѡ воздвиза́емыма къ зижди́телю, ма́ти софі́е, вра̑жїѧ шата̑нїѧ низложи́ла є҆сѝ.
Оу҆держа́въ рꙋ́кꙋ твою̀ деснꙋ́ю, вы́шнїй наста́вилъ тѧ̀ є҆́сть, ма́ти, къ нбⷭ҇номꙋ наслажде́нїю.
Стезю̀ тѣ́снꙋю проше́дши въ житїѝ твое́мъ, къ широтѣ̀ приспѣ́ла є҆сѝ ра́йстѣй, софі́е всечтⷭ҇на́ѧ.
Бг҃оро́диченъ:
И҆̀же бцⷣꙋ тѧ̀ невѣ́дꙋщїи, бг҃омт҃и, свѣ́та не и҆́мꙋтъ ви́дѣти ро́ждшагѡсѧ и҆з̾ тебє̀, пречⷭ҇таѧ.
Пѣ́снь ѕ҃.
І҆рмо́съ:
Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.
Оу҆мертви́вши двиза̑нїѧ плотска̑ѧ, над̾ страстьмѝ вельмѝ воцари́ласѧ є҆сѝ, и҆ ны́нѣ, всечи́стаѧ софі́е, въ безстра́стныхъ живе́ши свѣ́тлостехъ.
Ѻ҆́бразꙋ сп҃совꙋ навы́кла є҆сѝ покланѧ́тисѧ, сла́внаѧ, дѣ́лы и҆ словесы̀ твои́ми сп҃си́тєльнаѧ є҆гѡ̀ соблюда́ющи ᲂу҆чє́нїѧ.
Ѻ҆́блакъ тѧ̀ хрⷭ҇то́съ показа̀, ма́ти софі́е, до́ждь и҆сточа́ющїй живо́тный вѣ́рою притека́ющымъ къ тебѣ̀, пресла́внаѧ.
Бг҃оро́диченъ:
Красе́нъ па́че всѣ́хъ человѣ̑къ сн҃ъ тво́й, пречⷭ҇таѧ, добро́тою бжⷭ҇тва̀, а҆́ще и҆ пло́ть бы́сть на́съ ра́ди.
Конда́къ, гла́съ д҃:
Прїиди́те, всѧ̑ рꙋ̑сскїѧ жєны̀, ст҃ꙋ́ю софі́ю восхва́лимъ, ᲂу҆подо́бившꙋюсѧ мꙋ̑дрымъ дѣ́вамъ, є҆ле́й бл҃года́ти дх҃а ст҃а́гѡ стѧжа́вшымъ: тѣ́мже ᲂу҆мꙋдрѝ ю҆̀ гдⷭ҇ь подвиза́тисѧ во ᲂу҆твержде́нїе ст҃ы́ѧ правосла́вныѧ вѣ́ры и҆ соблюда́ти цр҃ковь є҆гѡ̀ незы́блемꙋ ѿ є҆ресе́й и҆ раско́лѡвъ, сегѡ̀ ра́ди бл҃года́рнѣ воспои́мъ є҆́й: ра́дꙋйсѧ, гра́да слꙋ́цка и҆ всеѧ̀ землѝ на́шеѧ ра́досте и҆ ᲂу҆твержде́нїе.
І҆́косъ:
Стрꙋи̑ мнѣ̀ сло́ва да́ждь, бж҃е мо́й, и҆ и҆сто́чникъ бл҃гочи́нїѧ сотворѝ мо́й ᲂу҆́мъ, и҆ бл҃гословѝ ѧ҆зы́къ мо́й, да воспою̀ ᲂу҆го́дницꙋ твою̀ софі́ю бг҃омꙋ́дрꙋю, ю҆́же вѣнча́лъ є҆сѝ бл҃гостїю твое́ю: а҆́ще бо са́мъ не да́си мѝ сло́ва досто́йнагѡ, ка́кѡ принесꙋ̀ да́ръ, ни́щїй сы́й, тѣ́мже пода́ждь мѝ си́лꙋ, и҆сповѣ́дати є҆ѧ̀ по́двиги, крѣ́пкѡ бо ѕвѣ̑ри мы́слєнныѧ побѣди́ла є҆́сть. мл҃твами є҆ѧ̀, сп҃се, ᲂу҆твердѝ и҆ моѧ̑ помышлє́нїѧ.
Пѣ́снь з҃.
І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Ѡ҆ добро́тѣ тлѣ́ющей, софі́е бл҃же́ннаѧ, здѣ̀ небрегла̀ є҆сѝ, сматрѧ́ющи та́мѡ сꙋ̑щаѧ воздаѧ̑нїѧ и҆ свѣ́тъ, и҆ сла́вꙋ бж҃їю нестарѣ́ющꙋюсѧ и҆ красотꙋ̀, и҆ бжⷭ҇твенное селе́нїе.
Ра́зꙋмъ бг҃олюби́въ стѧжа́ла є҆сѝ, софі́е, и҆ во пло́ти сꙋ́щи а҆́гг҃лѡмъ ᲂу҆подо́биласѧ є҆сѝ, бдѧ́щи бо́дреннѣ и҆ любо́вїю пою́щи: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Ви́ждь ско́рбь мою̀, дв҃о, ю҆́же мѝ наведѐ мно́жество ѕѡ́лъ мои́хъ, и҆ родства̀ ѻ҆́гненнагѡ и҆схитѝ мѧ̀, вопїю́щаго: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃.
І҆рмо́съ:
Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те, дѣла̀ гдⷭ҇нѧ, гдⷭ҇а.
Оу҆кра́шена сїѧ́нїемъ чистоты̀, и҆ чи́стымъ житїе́мъ просвѣще́на, софі́е бг҃омꙋ́драѧ, предстои́ши хрⷭ҇тꙋ̀ бг҃ꙋ на́шемꙋ.
Болѣ̑зни разли̑чныѧ врачꙋ́етъ человѣ́кѡвъ, и҆ ѿгонѧ́етъ бѣсѡ́вскїѧ напа̑сти тѣ́ло твоѐ ст҃о́е, въ ра́цѣ пресла́внѡ храни́мое.
Сщ҃е́ннаѧ же́ртва принесла́сѧ є҆сѝ, и҆ приноше́нїе свѣ́тлое, првⷣнаѧ кнѧги́не софі́е, ꙗ҆́кѡ кади́ло бл҃гоꙋха́нное, всѣ́хъ влⷣцѣ хрⷭ҇тꙋ̀ бг҃ꙋ на́шемꙋ.
Бг҃оро́диченъ:
Без̾ и҆стлѣ́нїѧ сло́во па́че словесѐ родила̀ є҆сѝ, тлѣ́нїѧ всѧ́кагѡ на́съ и҆збавлѧ́ющее: сегѡ̀ ра́ди тѧ̀, дв҃о, вѣ́рою велича́емъ.
Пѣ́снь ѳ҃.
І҆рмо́съ:
Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ: тѣ́мже пречⷭ҇тꙋю бцⷣꙋ вѣ́рнїи велича́емъ.
Возжелѣ́ла є҆сѝ добро́тꙋ мы́сленнꙋю хрⷭ҇то́вꙋ, и҆ чи́стѡ возлюби́ла є҆сѝ є҆го̀. гдѣ̀ почива́еши; гдѣ̀ ли пасе́ши; те́плѣ вопїѧ́ла є҆сѝ: да почі́ю ᲂу҆ тебѣ̀, и҆ въ твои́хъ свѣ́тлостехъ наслаждꙋ́сѧ, велича́ющи твою̀ бл҃гость.
Ра́зꙋмъ и҆мѣ́ла є҆сѝ въ твое́й дꙋшѝ, и҆ смире́нїе, и҆ бжⷭ҇твеннꙋю кро́тость, вѣ́рꙋ несꙋмнѣ́ннꙋ, и҆ наде́ждꙋ, и҆ любо́вь, ю҆́же къ бг҃ꙋ, всено́щными мл҃твами предстоѧ́вши є҆мꙋ̀, и҆ нбⷭ҇ными свѣ́тлостьми, бл҃же́ннаѧ софі́е, ѡ҆зарѧ́ема и҆ просвѣща́ема.
Дне́сь собра́шасѧ лю́ди хвала́ми возвели́чити гдⷭ҇а, возвели́чившаго твоѐ ст҃о́е торжество̀: въ не́мже помина́й на́съ, помина́ющихъ тѧ̀, предстоѧ́щи хрⷭ҇тꙋ̀, првⷣнаѧ софі́е и҆ всечтⷭ҇на́ѧ.
Бг҃оро́диченъ:
Пощадѝ мѧ̀, бж҃е, рожде́йсѧ ѿ дв҃ы, є҆гда̀ сѧ́деши сꙋди́ти дѣла̀ моѧ̑, и҆ тоѧ̀ мл҃твами пре́зри беззакѡ́нїѧ и҆ грѣхѝ моѧ̑, ꙗ҆́кѡ бл҃гъ и҆ многомлⷭ҇тивъ.
Свѣти́ленъ:
Кнѧ́зѧ ᲂу҆таи́вшисѧ стꙋда̀, и҆ сегѡ̀ въ премꙋ́дростнѣмъ ѻ҆́бразѣ показа̀ безꙋ́мна, жена̀ сꙋ́щи дꙋше́ю и҆ тѣ́ломъ, возсїѧ́ла є҆сѝ ꙗ҆́кѡ мꙋ́жъ ра́зꙋмомъ и҆ вѣ́рою, ма́ти софі́е, же́нъ првⷣныхъ ᲂу҆краше́нїе.
Сла́ва, и҆ ны́нѣ:
Де́нь мнѣ̀ возсїѧ́й разꙋ́мнагѡ весе́лїѧ, ты́ бо є҆сѝ, чⷭ҇таѧ, свѣ́тъ и҆ живо́тъ сꙋ́щихъ во тьмѣ̀: всѧ̑ бо, а҆́ще хо́щеши, твори́ти мо́жеши, ꙗ҆́кѡ сꙋ́щи всѣ́хъ влⷣчца.