Пѣ́снь а҃.
І҆рмо́съ:
Ꙗ҆́кѡ по сꙋ́хꙋ, пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.
Ꙗ҆́кѡже плѡ́дъ кра́сный спаси́тельнагѡ сѣ́ѧнїѧ бж҃їѧ ꙗ҆ви́лсѧ є҆сѝ въ цр҃кви, ст҃и́телю хрⷭ҇то́въ, роди́телей благочести́выхъ, і҆ере́а і҆ѡа́нна и҆ а҆́нны, бы́въ ѿрасль преди́внаѧ.
Предрече́нїе ди́вное во снѣ̀ ѻ҆тцꙋ̀ твоемꙋ̀ ѡ҆ грѧдꙋ́щемъ вели́чїи твое́мъ, є҆щѐ тѝ ѻ҆́трокꙋ сꙋ́щꙋ, по мно́зѣхъ лѣ́тѣхъ сбы́стсѧ, занѐ вои́стиннꙋ вели́кїй господи́нъ рѡссі́йскїѧ це́ркве ꙗ҆ви́лсѧ є҆сѝ, бл҃же́ннѣ.
Ѡ҆́бразъ кро́тости, смире́нїѧ и҆ любвѐ ѡ҆ гдⷭ҇ѣ ꙗ҆влѧ́ѧ, до́брый помо́щникъ ю҆́нымъ дрꙋгѡ́мъ твои́мъ бы́лъ є҆сѝ, бл҃же́ннѣ: сегѡ̀ ра́ди и҆ ті́и, є҆щѐ тѝ ѻ҆́трокꙋ сꙋ́щꙋ, а҆рхїере́а бж҃їѧ прореко́ша тѧ̀.
Бг҃оро́диченъ:
Спасѝ на́съ ѿ всѧ́кихъ бѣ́дъ, всеми́лостиваѧ влⷣчцѣ бцⷣе, и҆ твои́ми моли́твами къ сн҃ꙋ твоемꙋ̀ и҆ бг҃ꙋ на́шемꙋ, и҆сцѣлѝ ѿ грѣхѡ́вныѧ болѣ̑зни стра́ждꙋщыѧ дꙋ́ши на́ша.
Пѣ́снь г҃.
І҆рмо́съ:
Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й рѡ́гъ вѣ́рныхъ твои́хъ бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.
Въ вертогра́дѣхъ дꙋхо́вныхъ правосла́внѡ бг҃осло́вити, и҆ сло́во бж҃їе и҆ны́ми ѧ҆зы̑ки глаго́лати поꙋча́лсѧ є҆сѝ прилѣ́жно, бл҃же́нне, и҆ сїѐ въ цр҃ко́внѣмъ слꙋже́нїи твое́мъ до́брый плѡ́дъ принесѐ.
Є҆гда̀ влⷣка гдⷭ҇ь ѡ҆б̾ѧ̑тїѧ ѻ҆́ч҃а ѿве́рзе тѝ, и҆ ꙗ҆́кѡ возлю́бленна сы́на, во и҆́ночествѣ тѵ́хѡна, прїѧ́тъ тѧ̀, тогда̀ нача́льника въ вертогра́дѣхъ дꙋхо́вныхъ пско́ва и҆ каза́ни поста́вити тѧ̀ благоволѝ, да правосла̑вныѧ ѻ҆́троки бг҃омꙋ́дрїю и҆ хрⷭ҇тїа́нскомꙋ благоче́стїю наꙋчи́ши, бл҃же́ннѣ.
Хо́лмскꙋю па́ствꙋ до́брѣ ᲂу҆пра́вити призва̀ тѧ̀ влⷣка хрⷭ҇то́съ, тѣ́мже и҆ нача́ло положѝ ст҃и́тєльскимъ подвигѡ́мъ твои̑мъ, да въ ни́хъ ᲂу҆крѣплѧ́ѧсѧ, и҆зрѧ́денъ а҆рхїере́й всерѡссі́йскїѧ цр҃кве ꙗ҆ви́шисѧ, бл҃же́ннѣ.
Бг҃оро́диченъ:
Мнѡ́жества грѣхѡ́въ лю́тѣ ѡ҆бдержа́тъ дꙋ́шы на́шѧ, ты́ же, пречⷭ҇таѧ бг҃ома́ти, моли́твами твои́ми ко и҆́же ѿ тебє̀ ро́ждшемꙋсѧ плѣне́нїѧ сегѡ̀ грѣхо́внагѡ и҆зба́ви, и҆ на стезю̀ спасе́нїѧ наста́ви на́съ.
Сѣда́ленъ, гла́съ а҃:
До́бромꙋ є҆ѵⷢ҇льскомꙋ па́стырю подража́ѧ, дерзнове́ннѡ во дво́ръ ѻ҆́вчїй вше́лъ є҆сѝ, ст҃и́телю, и҆ своѧ̑ ѻ҆́вцы глаша́ѧ по и҆́мени, во ѡ҆гра́дѣ цр҃ко́внѣй ты̑ѧ невреди́мѡ соблю́лъ є҆сѝ.
Сла́ва, и҆ ны́нѣ, бг҃оро́диченъ:
Къ тебѣ̀, ѽ бг҃ома́ти, моли́твеннѡ мы̀ ны́нѣ прибѣга́емъ, и҆ предста́тельства твоегѡ̀ пред̾ сн҃омъ твои́мъ ᲂу҆се́рдно про́симъ: ѿ грѣхо́внагѡ лови́тельства сохранѝ на́съ и҆ на пꙋ́ть спасе́нїѧ наста́ви.
Пѣ́снь д҃.
І҆рмо́съ:
Хрⷭ҇то́съ моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.
Смотрѣ́нїю бж҃їю слѣ́дꙋѧ, велѣ́нїю ма́тере цр҃кве повинꙋ́ѧсѧ, землѝ да́льнїѧ а҆мерика́нскїѧ дости́глъ є҆сѝ, и҆ та́мѡ но́вꙋю па́ствꙋ: люде́й а҆леꙋ́тскихъ, крео́льскихъ, кена́йскихъ, во ѡ҆гра́дѣ хрⷭ҇то́вы цр҃кве ꙗ҆́кѡ до́брый па́стырь соблю́лъ є҆сѝ, тѵ́хѡне бл҃же́ннѣ.
Ра́дꙋйтесѧ и҆ веселите́сѧ, вѣ̑рнаѧ ча̑да цр҃кве рѡссі́йскїѧ, и҆̀же въ пенсильва́нїи, калифо́рнїи, флори́дѣ и҆ и҆ны́хъ землѧ́хъ а҆мерика́нскихъ сꙋ́щаѧ, ст҃и́тель бо тѵ́хѡнъ ны́нѣ престо́лꙋ бж҃їю предстои́тъ и҆ мо́литсѧ ѡ҆ спасе́нїи дꙋ́шъ на́шихъ.
Кроншта́дтскагѡ па́стырѧ собесѣ́дникъ бы́ти сподо́билсѧ є҆сѝ, бл҃же́нне, є҆щѐ сы́й є҆пⷭ҇кпъ гра́да ꙗ҆росла́влѧ, и҆ то́й тѝ всерѡссі́йское па́стырство пред̾ꙋказа̀: тѣ́мже и҆ ны́нѣ съ ни́мъ, престо́лꙋ бж҃їю предстоѧ̀, молѝ спасти́сѧ дꙋша́мъ на́шымъ.
Бг҃оро́диченъ:
Досто́йно є҆́сть прославлѧ́ти тѧ̀, влⷣчце, при́снѡ спаса́ющꙋю зе́млю рѡссі́йскꙋю. се́ бо и҆ ст҃и́тель тѵ́хѡнъ въ ꙗ҆росла́встѣмъ хра́мѣ ᲂу҆спе́нїѧ твоегѡ̀ гдⷭ҇рѧ нїкола́ѧ ꙗ҆́кѡ и҆́стиннагѡ пома́занника бж҃їѧ срѣ́те, и҆ бл҃года́рствєнныѧ моли̑твы вкꙋ́пѣ съ ни́мъ ѡ҆ застꙋпле́нїи ѻ҆те́чества на́шегѡ тебѣ̀ и҆ сн҃ꙋ твоемꙋ̀ принесѐ.
Пѣ́снь є҃.
І҆рмо́съ:
Бж҃їимъ свѣ́тѡмъ твои́мъ бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ молю́сѧ, тѧ̀ вѣ́дѣти сло́ве бж҃їй и҆́стиннагѡ бг҃а, ѿ мра́ка грѣхо́внагѡ взыва́юща.
Є҆гда̀ по грѣхѡ́мъ на́шимъ наше́ствїе и҆ноплеме́нныхъ гдⷭ҇ь попꙋстѝ, и҆ землѧ̀ рѡссі́йскаѧ кро́вїю ѡ҆багри́сѧ, ты̀, ст҃и́телю, покаѧ́нїе проповѣ́дꙋѧ, и҆ врачевствꙋ̀ дꙋше́вномꙋ и҆ тѣле́сномꙋ стра́ждꙋщихъ до́брѣ содѣ́йствꙋѧ, крѣ́пцѣ стоѧ́ти за вѣ́рꙋ правосла́внꙋю, царѧ̀ бл҃говѣ́рнагѡ и҆ ѻ҆те́чество ст҃о́е призыва́лъ є҆сѝ.
Ѡ҆полче́нїю вра́жескꙋ ᲂу҆ стѣ́нъ гра́да ви́льно стоѧ́щꙋ, цѣльбонѡ́сныѧ мѡ́щи ст҃ы́хъ мч҃нкъ а҆нтѡ́нїа, і҆ѡа́нна и҆ є҆ѵста́ѳїа и҆з̾ ѻ҆би́тєли ст҃а́гѡ дх҃а бл҃гоговѣ́йнѡ и҆зне́слъ є҆сѝ, ст҃и́телю, и҆ во гра́дѣ москвѣ̀ ѿ порꙋга́нїѧ и҆нозе́мныхъ невреди̑мы сохрани́лъ є҆сѝ.
Благоволе́нїемъ бж҃їимъ, и҆ наро́да бж҃їѧ и҆збра́нїемъ, моско́вскїй а҆рхїпа́стырь поста́вленъ бы́лъ є҆сѝ, ст҃е, тѣ́мже и҆ досто́йный прее́мникъ моско́вскихъ ст҃и́телей ꙗ҆ви́лсѧ є҆сѝ.
Бг҃оро́диченъ:
А҆́гг҃льскїй собо́ръ и҆ чл҃вѣ́ческїй ро́дъ ѡ҆ тебѣ̀ ра́дꙋетсѧ, бл҃года́тнаѧ марі́е, мт҃и неискꙋсомꙋ́жнаѧ, невмѣсти́магѡ бо во чре́вѣ вмѣсти́ла є҆сѝ, и҆ родила̀ є҆сѝ сп҃са мі́рꙋ.
Пѣ́снь ѕ҃.
І҆рмо́съ:
Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живѡ́тъ мо́й, многомлⷭ҇тиве.
Пꙋстынножи́тель ста́рецъ, пред̾ ѡ҆́бразомъ влⷣчцы ᲂу҆се́рдно молѧ́сѧ, жре́бїй со тре́петомъ и҆з̾ ковче́жца и҆звлечѐ, на не́мже и҆́мѧ твоѐ, ꙗ҆́кѡ бг҃омъ и҆збра́ннагѡ первост҃и́телѧ, начерта́но бѣ̀: сегѡ̀ ра́ди и҆ мы̀ ны́нѣ, ꙗ҆́кѡже тогда̀ і҆ера́рси собо́ра, немо́лчнѡ а҆́ѯїосъ тебѣ̀, а҆рхїпа́стырю на́шъ, вопїе́мъ: сотворѝ и҆ на́съ ꙗ҆́кѡ словє́сныѧ ѻ҆́вцы достѡ́йны бы́ти па́жити твоеѧ̀.
Ѽ глꙋбины̀ бога́тства и҆ премꙋ́дрѡсти бж҃їѧ! и҆зво́лисѧ дх҃ꙋ ст҃о́мꙋ со і҆ера̑рхи поста́вити тѧ̀, бл҃же́ннѣ, патрїа́рха цр҃кве рѡссі́йскїѧ, да во дни̑ и҆спыта́нїѧ вѣ́ры свидѣ́тельствꙋеши крѣ́пкое въ не́й стоѧ́нїе, и҆ па́ствꙋ твою̀ неврежде́ннꙋ ѿ навѣ́тѡвъ вра́жїихъ до́брѣ соблюде́ши.
Ѽ неизрѣче́нныѧ любвѐ и҆ милосе́рдїѧ бж҃їѧ! ст҃и́тель тѵ́хѡнъ во главꙋ̀ рѡссі́йскїѧ цр҃кве поставлѧ́етсѧ, и҆ мно́зи лю́дїе до́брагѡ па́стырѧ ѡ҆брѣта́ютъ, и҆ во ѡ҆гра́дѣ цр҃ко́внѣй соблюда́ютсѧ.
Бг҃оро́диченъ:
Ра́дꙋютсѧ и҆ ликꙋ́ютъ лю́дїе рѡссі́йстїи, приснодв҃о, введе́нїе твоѐ во хра́мъ пра́зднꙋюще, и҆ возведе́нїе ст҃и́телѧ тѵ́хѡна въ патрїа́рха рѡссі́йскаго въ се́й же де́нь благода́рнѣ воспомина́юще, ᲂу҆се́рднѡ взыва́ютъ тѝ: ѽ влⷣчцѣ держа́внаѧ! моли́твами ст҃и́телѧ тѵ́хѡна цр҃ковь и҆ зе́млю рѡссі́йскꙋю ѿ всѣ́хъ навѣ́тѡвъ вра́жїихъ спасѝ и҆ всѧ̑ вѣ́рныѧ въ черто́ги нбⷭ҇ныѧ введѝ.
Конда́къ, гла́съ в҃:
Ти́хостїю нра́ва ᲂу҆кра́шенъ, кро́тость и҆ милосе́рдїе ка́ющымсѧ ꙗ҆влѧ́ѧй, во и҆сповѣ́данїи правосла́вныѧ вѣ́ры и҆ любвѐ ко гдⷭ҇ꙋ тве́рдъ и҆ непрекло́ненъ пребы́лъ є҆сѝ, ст҃и́телю хрⷭ҇то́въ тѵ́хѡне. моли́сѧ ѡ҆ на́съ, да не разлꙋчи́мсѧ ѿ любвѐ бж҃їѧ, ꙗ҆́же ѡ҆ хрⷭ҇тѐ і҆и҃сѣ, гдⷭ҇ѣ на́шемъ.
Пѣ́снь з҃.
І҆рмо́съ:
Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆ц҃ъ на́шихъ.
Пла́чь, стена́нїе и҆ го́ре вели́кое, грѧдꙋ́щїѧ на цр҃ковь рѡссі́йскꙋю, предзрѣ́лъ є҆сѝ, первост҃и́телю, ѻ҆ба́че хрⷭ҇то́вою любо́вїю ᲂу҆крѣплѧ́емь, мꙋ́жественно взыва́лъ є҆сѝ: бл҃гослове́нъ є҆сѝ, бж҃е ѻ҆ц҃ъ на́шихъ.
Въ лю́тꙋю годи́нꙋ первост҃и́тельскїй же́злъ со стра́хомъ и҆ тре́петомъ прїи́мъ, бл҃же́ннѣ, цр҃ковь рѡссі́йскꙋю ꙗ҆́кѡ кора́бль нерꙋкотво́рный до́брѣ ᲂу҆пра́вилъ є҆сѝ, вѣ̑рныѧ же наꙋчи́лъ є҆сѝ взыва́ти: бл҃гослове́нъ є҆сѝ, бж҃е ѻ҆ц҃ъ на́шихъ.
Проро́кꙋ дре́внемꙋ и҆лїѝ, взыскꙋ́ющꙋ не прекло́ньшихъ колѣ̑на пред̾ ваа́ломъ, подража́лъ є҆сѝ, первост҃и́телю, да взы́щеши лю́ди, и҆̀же не преклони́ша вы́ю лови́тельствꙋ безбо́жныхъ, та́же и҆ па́дшихъ и҆з̾ глꙋбины̀ грѣхѡ́вныѧ воздви́гнеши, и҆ вѣ̑рныѧ наꙋчи́ши въ ско́рбныхъ ѡ҆бстоѧ́нїихъ взыва́ти гдⷭ҇ꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
Бг҃оро́диченъ:
Помо́щницꙋ наде́жнꙋю и҆́мамы тѧ̀, бцⷣе, мно́гажды бо въ ско́рбныхъ ѡ҆бстоѧ́нїихъ предста́тельство ѡ҆ лю́дѣхъ рѡссі́йскихъ пред̾ сы́номъ твои́мъ ꙗ҆влѧ́ла є҆сѝ.
Пѣ́снь и҃.
І҆рмо́съ:
И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.
Во ѡ҆́бразъ твоегѡ̀ ᲂу҆се́рднагѡ подража́нїѧ слꙋже́нїю первост҃и́телей моско́вскихъ, въ сщ҃є́нныѧ ѻ҆дє́жды тѣ́хъ досто́йнѡ ѡ҆блаче́нъ бы́лъ є҆сѝ, бл҃же́нне, тѣ́мже съ ни́ми ѡ҆ на́съ моли́сѧ, да и҆ мы̀ досто́йни бꙋ́демъ превозноси́ти гдⷭ҇а во всѧ̑ вѣ́ки.
Же́злъ первост҃и́телѧ петра̀ со дерзнове́нїемъ прїѧ́лъ є҆сѝ, бл҃же́нне, да ѡ҆́бразъ вла́сти предстоѧ́телѧ въ цр҃кви рѡссі́йстѣй возста́виши. мы́ же, вѣ́дѧще сицевꙋ́ю ми́лость бж҃їю къ на́мъ, господа̀ превозно́симъ во всѧ̑ вѣ́ки.
Грѣхѡ́мъ на́шымъ ᲂу҆мно́жившымсѧ, попꙋстѝ гдⷭ҇ь братоꙋбі́йствꙋ и҆ междоꙋсѡ́бнымъ бра́немъ въ зе́мли рѡссі́йстѣй бы́ти. ты́ же, ст҃и́телю, люде́й враждꙋ́ющихъ къ покаѧ́нїю и҆ примире́нїю призыва́лъ є҆сѝ, наꙋча́ѧ превозноси́ти хрⷭ҇та̀ во вѣ́ки.
Бг҃оро́диченъ:
Въ до́мꙋ твое́мъ, пречⷭ҇таѧ дв҃о, хра́мѣ ᲂу҆спе́нїѧ твоегѡ̀, поставле́нїе блаже́ннагѡ тѵ́хѡна въ первост҃и́телѧ рѡссі́йскаго соверши́сѧ, тѣ́мже моли̑твы тогѡ̀, ꙗ҆́кѡ вѣ́рнагѡ слꙋжи́телѧ твоегѡ̀, къ бг҃ꙋ вознесѝ и҆ спасѝ дꙋ́шы на́шѧ.
Пѣ́снь ѳ҃.
І҆рмо́съ:
Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо всечⷭ҇таѧ ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.
Пла́чемъ и҆ рыда́нїємъ землѧ̀ рѡссі́йскаѧ ѡ҆гласи́сѧ, кро́вь ст҃ы́хъ мч҃нкъ и҆ и҆сповѣ̑дникъ хрⷭ҇то́выхъ пото́ки по не́й и҆злїѧ́сѧ, хра́мы бж҃їи ѡ҆скверни́шасѧ и҆ попра́нїю преда́шасѧ. ᲂу҆вы̀ мнѣ̀, землѐ моѧ̀! взыва́лъ є҆сѝ, ст҃и́телю, ко́е врачева́нїе прилѣжи́тъ тѝ, да всѣ́хъ си́хъ и҆зба́вишисѧ;
Оу҆вы̀ мнѣ̀, лю́дїе рѡссі́йстїи! взыва́лъ є҆сѝ, бл҃же́нне. гдⷭ҇а забы́хомъ, въ дѣ́лѣхъ на́шихъ ѡ҆сꙋети́хомсѧ, попече́нїѧ же ѡ҆ дꙋшѝ николи́же и҆мѣ́хомъ. є҆́й, глаго́лю ва́мъ, благоволе́нїѧ бж҃їѧ не ѡ҆брѧ́щемъ, а҆́ще дꙋ́шы на́ша слеза́ми покаѧ́нїѧ пред̾ гдⷭ҇емъ не потщи́мсѧ ѡ҆чи́стити.
Въ темни́цѣ томѧ́щꙋсѧ тѝ, ст҃и́телю, ѡ҆ цр҃кви премно́гѡ болѣ́зновалъ є҆сѝ, і҆ера́рси бо и҆ сщ҃е́нницы нѣ́цыи на стезю̀ і҆ꙋ́ды преда́телѧ стꙋпи́вше, и҆ непра́веднѡ вла́сть въ цр҃кви восхи́тивше, ѕлохꙋдѡ́жнаѧ дѣѧ̑нїѧ своѧ̑ ꙗ҆́кѡ ѡ҆бновлє́нїѧ блага̑ѧ нареко́ша: и҆ си́мъ па́ствꙋ рѡссі́йскꙋю въ смѧте́нїе приведо́ша, и҆ въ нестрое́нїихъ цр҃ко́вныхъ тѧ́жцѣ пови́нни бы́ша.
Ни ско́рбь, ни тѣснота̀, ни гоне́нїе, ни гла́дъ, ни нагота̀, нижѐ бѣда̀, ни ме́чь не возмо́гꙋтъ разлꙋчи́ти вѣ́рныхъ ча̑дъ хрⷭ҇то́выхъ ѿ любвѐ є҆гѡ̀, а҆пⷭ҇льски ре́клъ є҆сѝ, ст҃и́телю.
Бг҃оро́диченъ:
Кі̑ѧ похвалы̑ возгласи́мъ тѝ, пречⷭ҇таѧ; кі́ими словесы̀ вели́чїе твоѐ возсла́вимъ, ꙗ҆́кѡ сп҃са родила̀ є҆сѝ дꙋ́шъ на́шихъ;
Свѣти́ленъ, гла́съ а҃:
Первост҃и́телѧ рѡссі́йскаго тѵ́хѡна дне́сь просла́вимъ, па́мѧть є҆гѡ̀ благоче́стнѡ почита́юще, то́й бо, ꙗ҆́кѡ свѣти́льникъ пресвѣ́тлый, просїѧ́лъ є҆́сть, и҆ ѡ҆́бразомъ пресвѣ́тлагѡ житїѧ̀ своегѡ̀ ре́вностномꙋ слꙋже́нїю бг҃ꙋ лю́ди наꙋча́етъ.
Ра́дꙋйсѧ, бцⷣе дв҃о, влⷣчцѣ держа́внаѧ, свѣтода́вца хрⷭ҇та̀ мі́рꙋ ро́ждшаѧ: ра́дꙋйсѧ, похвало̀ всеѧ̀ вселє́нныѧ: ра́дꙋйсѧ, пречⷭ҇таѧ мт҃и бж҃їѧ благослове́ннаѧ.