Пѣ́снь а҃.
І҆рмо́съ:
Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Нбⷭ҇ный цр҃ю̀, смире́ннꙋю дꙋ́шꙋ мою̀ ѿ скве́рнъ ѡ҆чи́сти и҆ сло́ва бл҃года́ть низпослѝ, да возмогꙋ̀ досто́йнѡ воспѣ́ти ᲂу҆го́дника твоего̀, пресла́внаго і҆нноке́нтїа.
И҆мꙋ́щихъ тѧ̀ предста́телѧ до́бра къ ще́дромꙋ бг҃ꙋ, на́съ, напа́стьми и҆ ѡ҆бстоѧ̑нїи ско́рбными ѡ҆держи́мыхъ, ᲂу҆крѣпѝ, подаѧ̀ рꙋ́кꙋ сп҃се́нїѧ, ст҃и́телю млⷭ҇тиве і҆нноке́нтїе.
Ще́дръ и҆ неѕло́бивъ па́ствѣ свое́й ꙗ҆ви́лсѧ є҆сѝ, ѻ҆́тче і҆нноке́нтїе, тѣ́мже дх҃а бж҃їѧ и҆спо́лненный, ᲂу҆ма̀ моегѡ̀ ѡ҆мраче́нїе ѿженѝ, страсте́й бꙋ́рю ᲂу҆тишѝ, къ безстра́стїѧ приста́нищꙋ ᲂу҆пра́ви и҆ ѿ ѕлы́хъ ᲂу҆сте́нъ защитѝ твои́хъ мл҃твъ покро́вомъ.
Бг҃оро́диченъ:
Є҆гда̀ бж҃їимъ повелѣ́нїемъ ѿ вре́менныѧ жи́зни ѿитѝ хощꙋ̀, пречⷭ҇таѧ, бѣсо́вскїѧ рꙋкѝ мѧ̀ свободѝ, а҆́гг҃лы въ спꙋ́тники пода́ждь и҆ раѧ̀ вкꙋси́ти сподо́би, и҆дѣ́же і҆нноке́нтїй ст҃и́тель съ безпло́тными ли̑ки сла́дости бжⷭ҇твенныѧ наслажда́етсѧ.
Пѣ́снь г҃.
І҆рмо́съ:
На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвеселѝ бо сѧ̀ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣнъ па́че тебє̀, гдⷭ҇и.
Тѧ̀, смире́ннѣ і҆нноке́нтїе, всесвѣ́тла свѣти́льника, не под̾ спꙋ́домъ, но на высотѣ̀ свѣ́щника цр҃кве хрⷭ҇то́вы поста́влена, ᲂу҆се́рднѡ мо́лимъ: свѣтоно́сными лꙋча́ми глꙋбо́кꙋю тьмꙋ̀ грѣха̀ ѿженѝ, невѣ́рныхъ къ позна́нїю и҆́стины наста́ви, шата̑нїѧ ᲂу҆мѡ́въ низложѝ, на́съ же во правосла́вїи ᲂу҆крѣпѝ.
Оу҆ста́вилъ є҆сѝ, премꙋ́дре і҆нноке́нтїе, стрꙋѧ́ми твоегѡ̀ бг҃оглаго́ливагѡ ѧ҆зы́ка лѡ́жныѧ то́ки сꙋемꙋ́дренныхъ, и҆̀же, ꙗ҆́кѡ безси́льнїи, не возмого́ша мꙋ́тными вода́ми лжеꙋчє́нїѧ потопи́ти ны̀. тѣ́мже вопїе́мъ тѝ: то́ки страсте́й на́шихъ и҆зсꙋшѝ и҆ ко бл҃гоче́стїю наста́ви.
Дх҃а бж҃їѧ и҆спо́лнивсѧ, ѕловѡ́нїѧ вѣ́ка сегѡ̀ низложи́лъ є҆сѝ, кади́льнице бл҃гово́ннаѧ, і҆нноке́нтїе бл҃же́нне, и҆ па́ствꙋ твою̀ ᲂу҆че́нїемъ правосла́вныѧ цр҃кве ѡ҆бл҃гоꙋха́лъ є҆сѝ. тѣ́мже тѧ̀, ꙗ҆́кѡ наста́вника предо́бра, вѣ́рнѡ восхвалѧ́емъ.
Бг҃оро́диченъ:
Оу҆пова́нїе и҆ стѣна̀ и҆ ти́хое приста́нище є҆сѝ лю́демъ твои̑мъ, прест҃а́ѧ дв҃о, всест҃а́го сн҃а твоего̀ ᲂу҆молѝ сп҃се́нїе на́мъ ᲂу҆лꙋчи́ти, да непреста́ннѡ въ невече́рнемъ свѣ́тѣ сла́вꙋ трїеди́номꙋ бг҃ꙋ воспѣва́емъ.
Конда́къ, гла́съ г҃.
Дне́сь ст҃и́тель хрⷭ҇то́въ і҆нноке́нтїй предстои́тъ прⷭ҇то́лꙋ бж҃їю и҆ съ ли̑ки ст҃ы́хъ за ны̀ мо́литсѧ бг҃ꙋ, є҆мꙋ́же ны́нѣ со ᲂу҆миле́нїемъ покланѧ́емсѧ и҆ во ѱалмѣ́хъ и҆ пѣ́нїихъ велича́емъ, ѡ҆брѣто́хомъ бо мл҃твенника ко превѣ́чномꙋ бг҃ꙋ.
Сѣда́ленъ, гла́съ г҃:
Ѽ неизрече́нныѧ бл҃гости бж҃їѧ! ѽ неизглаго́ланнагѡ є҆гѡ̀ смотре́нїѧ! чтⷭ҇ны̑ѧ мо́щи ст҃и́телѧ і҆нноке́нтїа ны́нѣ ѡ҆брѣто́шасѧ, дꙋ́шы вѣ́рныхъ ᲂу҆тѣша́юще и҆ на бра́нь проти́вꙋ ко́зней лꙋка́вагѡ ᲂу҆крѣплѧ́юще. къ ни̑мже припа́дающе, ᲂу҆се́рднѡ вопїе́мъ: ᲂу҆ще́дри на́съ мл҃твами твои́ми, ст҃и́телю бг҃а всеще́драгѡ.
Бг҃оро́диченъ:
И҆́же ѻ҆ц҃ꙋ̀ сопрⷭ҇то́льный сн҃ъ на землѝ вопло́щьсѧ, ꙗ҆́кѡ чл҃вѣ́къ, и҆з̾ ᲂу҆тро́бы твоеѧ̀, чⷭ҇таѧ, про́йде, порфѵ́рою крове́й твои́хъ въ на́ше ѡ҆болкі́йсѧ є҆стество̀, да па́дшыѧ ны̀ человѣ́ки возста́витъ и҆ нбⷭ҇нагѡ сїѡ́на гра́жданы ꙗ҆ви́тъ.
Пѣ́снь д҃.
І҆рмо́съ:
Оу҆слы́шахъ, гдⷭ҇и, сла́вное твоѐ смотре́нїе, и҆ просла́вихъ, чл҃вѣколю́бче, непостижи́мꙋю твою̀ си́лꙋ.
Хра́мъ всест҃а́гѡ дх҃а, добродѣ́тельми сїѧ́ѧй, мі́рови ꙗ҆ви́лсѧ є҆сѝ, ст҃и́телю чтⷭ҇ны́й, наꙋче́нїе кни́жное прилѣ́жнѡ стѧжа́въ, та̑йны неизречє́нныѧ сꙋде́бъ бж҃їихъ пости́глъ є҆сѝ, и҆ списа́нїемъ дѣ́лъ време́нъ минꙋ́вшихъ вѣ̑рныѧ премꙋ́дрѡ во бл҃гоче́стїи да́же до ны́нѣ наставлѧ́еши, да зове́мъ бл҃года́рнѣ: сла́ва си́лѣ твое́й, гдⷭ҇и.
Ѻ҆рꙋ́жїемъ мꙋ́дрости бжⷭ҇твенныѧ препрѣ́лъ є҆сѝ нечести́выхъ, и҆сповѣ́дниче чтⷭ҇ны́й. поношє́нїѧ и҆ гонє́нїѧ за и҆́стинꙋ бл҃годꙋ́шнѣ претерпѣва́ѧ, земнꙋ́ю мꙋ́дрость нивочто́же вмѣнѧ́ѧ, непреста́ннѡ взыва́лъ є҆сѝ: сла́ва си́лѣ твое́й, гдⷭ҇и.
Въ нбⷭ҇ныѧ черто́ги а҆́гг҃ли бж҃їи вознесо́ша чи́стꙋю дꙋ́шꙋ твою̀, бл҃же́нне, и҆дѣ́же со ст҃и́тєли и҆ и҆сповѣ̑дники прⷭ҇то́лꙋ всевы́шнѧгѡ предстои́ши, ᲂу҆крѣ́пльшагѡ тѧ̀ на по́двиги вє́лїѧ, непреста́ннѡ взыва́ѧ: сла́ва си́лѣ твое́й, гдⷭ҇и.
Бг҃оро́диченъ:
Недви́жимое ᲂу҆твержде́нїе вѣ́ры и҆ ꙗ҆́кѡ многоцѣ́нный да́ръ дꙋша́мъ на́шымъ, бцⷣꙋ во ѱалмѣ́хъ и҆ пѣ́нїихъ дꙋхо́вныхъ восхва́лимъ, вѣ́рнїи, да и҆зба́витъ ѿ мꙋ́къ вопїю́щихъ къ ро́ждшемꙋсѧ и҆з̾ неѧ̀: сла́ва си́лѣ твое́й, гдⷭ҇и.
Пѣ́снь є҃.
І҆рмо́съ:
Свѣ́та пода́телю, и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бг҃а не зна́емъ.
Оу҆крѣплѧ́емь си́лою трⷪ҇ческою, пребл҃же́нне, проповѣ́дникъ велегла́сный па́ствѣ сара́товской ꙗ҆ви́лсѧ є҆сѝ, вопїѧ̀: возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ. тѣ́мже и҆ мы̀ влⷣкꙋ нб҃сѐ и҆ землѝ велича́емъ: и҆на́гѡ бо ра́звѣ тебє̀ бг҃а не зна́емъ.
Ю҆́ность свою̀ посто́мъ и҆ мл҃твою бл҃гоꙋкраси́лъ є҆сѝ, мꙋ́дре, и҆ сщ҃е́нства бл҃года́ть непоро́чнѡ стѧжа́ти сподо́билсѧ є҆сѝ. и҆ ны́нѣ, прⷭ҇то́лꙋ вседержи́телѧ предстоѧ̀, моли́сѧ, сла́вне і҆нноке́нтїе, да ѿ ѧ҆зы́ка лꙋка́вагѡ и҆ ѡ҆ѕлобле́нїѧ свободи́мсѧ и҆ ѻ҆гнѧ̀ вѣ́чнагѡ и҆зба́вимсѧ.
Ст҃и́телей ᲂу҆добре́нїе и҆ и҆сповѣ́дникѡвъ похвало̀, чꙋде́съ и҆сто́чниче, ᲂу҆молѝ зижди́телѧ, є҆гѡ́же прише́ствїе при две́рехъ є҆́сть, ѡ҆брѣстѝ на́мъ грѣхѡ́въ ѡ҆ставле́нїе.
Твои́хъ слове́съ наставлє́нїѧ, є҆́же правосла́вїе въ чистотѣ̀ всѣ̑мъ содержа́ти, чꙋжезє́мнымъ же лжеꙋче́нїємъ ника́коже прилѣплѧ́тисѧ, ѡ҆б̾ѧ́ша всю̀ зе́млю рꙋ́сскꙋю, ты́ бо вы́шнемꙋ вы́нꙋ взыва́лъ є҆сѝ: и҆на́гѡ бо ра́звѣ тебє̀ бг҃а не зна́емъ.
Бг҃оро́диченъ:
Ꙗ҆́же мі́рови ми́ръ пода́вшаѧ и҆ нача́льника тишины̀ ро́ждшаѧ, ᲂу҆кротѝ волне́нїе страсте́й мои́хъ, чⷭ҇таѧ, и҆ на ка́мени безстра́стїѧ мѧ̀ ᲂу҆твердѝ, сн҃ꙋ твоемꙋ̀ взыва́юща: и҆на́гѡ бо ра́звѣ тебє̀ бг҃а не зна́емъ.
Пѣ́снь ѕ҃.
І҆рмо́съ:
Ко гдⷭ҇ꙋ ѿ ки́та і҆ѡ́на возопѝ: ты́ мѧ̀ возведѝ и҆з̾ глꙋбины̀ а҆́да, молю́сѧ, да ꙗ҆́кѡ и҆зба́вителю во гла́сѣ хвале́нїѧ, и҆́стины же дх҃омъ пожрꙋ̀ тебѣ̀.
Житїе́мъ твои́мъ, а҆ не то́кмѡ ли́комъ, ст҃и́телю дими́трїю росто́вскомꙋ подо́бѧсѧ, дꙋ́шꙋ твою̀, бл҃же́нне, ꙗ҆́кѡ ра́й бг҃онасажде́нный сотвори́лъ є҆сѝ: безꙋ́мнїи же ꙗ҆́кѡ со́ръ ѿри́нꙋша тѧ̀, не терпѧ́ще си́лы слове́съ твои́хъ. тѣ́мже, ѻ҆́тче, и҆ на́съ те́мныхъ паде́нїй грѣхо́вныхъ и҆зба́ви.
А҆рхїере́й чꙋ́денъ и҆ нра́вѡвъ и҆спра́витель и҆ дꙋ́шъ ᲂу҆строи́тель показа́лсѧ є҆сѝ, ре́вностнѣ ѡ҆ лю́дехъ твои́хъ пекі́йсѧ, мїрски̑мъ же нача́льникѡмъ противꙋста́лъ є҆сѝ, ѕлокова́рство и҆ лихои́мство тѣ́хъ ѡ҆блича́ѧ, ст҃е і҆нноке́нтїе.
Тꙋ́не є҆́сть тща́нїе на́ше досто́йное пѣ́нїе тебѣ̀ сотвори́ти, і҆нноке́нтїе преди́вне, но ꙗ҆́кѡ хрⷭ҇то́съ прїѧ́тъ вдови́цы двѣ̀ лє́птѣ, та́кѡ и҆ ты̀ не возгнꙋша́йсѧ похва́льныхъ слове́съ на́шихъ и҆ ма́лый се́й трꙋ́дъ прїимѝ, въ похвалꙋ̀ тебѣ̀ приноси́мый.
Бг҃оро́диченъ:
И҆зба́вльшесѧ тобо́ю ѿ бѣ́дъ и҆ скорбе́й, мт҃и безневѣ́стнаѧ, и҆ тебє̀ ра́ди ра́дость полꙋчи́вше, тѧ̀, ꙗ҆́кѡ пода́тельницꙋ бл҃гꙋ́ю и҆ застꙋ́пницꙋ вѣ́рнꙋю, всѝ велича́емъ.
Конда́къ, гла́съ и҃:
Сщ҃е́ннаго и҆ бг҃овѣща́ннаго проповѣ́дника и҆ ди́внаго премꙋ́дрости ᲂу҆чи́телѧ вчини́лъ є҆сѝ, гдⷭ҇и, въ наслажде́нїе бл҃ги́хъ твои́хъ и҆ поко́й, трꙋды̀ бо ѻ҆́нагѡ и҆ бл҃же́ннꙋю кончи́нꙋ па́че всѧ́кагѡ всепло́дїѧ прїе́мъ, є҆ди́не прославлѧ́ѧй ст҃ы̑ѧ своѧ̑.
І҆́косъ:
Житїѐ непоро́чное ꙗ҆ви́лъ є҆сѝ, ст҃и́телю і҆нноке́нтїе, неви́нности тезоиме́нный, и҆ вѣ́ры ра́ди ско́рбныхъ нахождє́нїѧ претерпѣ́въ, чи́стою дꙋше́ю къ прⷭ҇то́лꙋ гдⷭ҇ню прите́клъ є҆сѝ, прехва́льне. ны́нѣ же ра́йскїѧ пи́щи наслажда́ѧсѧ, ѡ҆ и҆̀же на землѝ пою́щихъ тѧ̀ влⷣкꙋ хрⷭ҇та̀ ᲂу҆молѝ, зна́меньми и҆ чꙋдесы̀ прославлѧ́ющаго ст҃ы̑ѧ своѧ̑.
Пѣ́снь з҃.
І҆рмо́съ:
Ѻ҆́бразꙋ злато́мꙋ на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ: посрѣдѐ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Скѡ́рбнаѧ и҆скꙋшє́нїѧ и҆ лю̑таѧ ѡ҆бстоѧ̑нїѧ смире́нїемъ попра́лъ є҆сѝ, тѣ́хъ и҆ на́съ мл҃твами твои́ми и҆зба́ви, бл҃же́нне, вопїю́щихъ: бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́нїе ѱало́мское воспѣ́ша лю́дїе, и҆ при словесѣ́хъ: а҆́зъ же, гдⷭ҇и, ᲂу҆пова́ю на тѧ̀, дꙋша̀ твоѧ̀ ст҃а́ѧ ѿ тѣ́ла разлꙋчи́сѧ. на́съ же, на всемѡ́щныѧ мл҃твы твоѧ̑ надѣ́ющихсѧ, ᲂу҆твердѝ непреста́ннѡ взыва́ти: бл҃гослове́нъ є҆сѝ, бж҃е ѻ҆тє́цъ на́шихъ.
Ѡ҆ на́съ млⷭ҇тивныѧ твоѧ̑ дла̑ни ко влⷣцѣ моле́бнѣ простира́й, ст҃е і҆нноке́нтїе, и҆ собла́знѡвъ и҆збавлѧ́ѧ, неѿлꙋ́чнѡ съ на́ми дꙋ́хомъ пребыва́й, ѻ҆́тче прпⷣбне, наставлѧ́ѧ въ мл҃твѣ зва́ти творцꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.
Бг҃оро́диченъ:
Да человѣ́ки па́дшыѧ ѡ҆божи́тъ, ꙗ҆ви́сѧ сн҃ъ тво́й, влⷣчце, соверше́нъ чл҃вѣ́къ. сегѡ̀ ᲂу҆́бѡ молѝ прича́стники бжⷭ҇тва̀ сотвори́ти пою́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.
Пѣ́снь и҃.
І҆рмо́съ:
Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Ѡ҆ всесла́внѣмъ прославле́нїи твое́мъ, ст҃и́телю, лю́дїе рꙋ́сстїи возвесели́шасѧ, ꙗ҆ви́лсѧ бо є҆сѝ чꙋдотво́рецъ и҆зѧ́щный и҆ хода́тай пред̾ бг҃омъ преди́вный, того̀ ᲂу҆молѧ́ѧ ѡ҆ вопїю́щихъ: по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Бж҃їимъ про́мысломъ сохранены̀ бы́ша ѿ порꙋга́нїѧ ст҃ы̑ѧ мо́щи твоѧ̑, ст҃и́телю і҆нноке́нтїе, а҆́ще и҆ хра́мъ, и҆дѣ́же погребе́но бы́сть тѣ́ло твоѐ, ѿ безбо́жныхъ разори́сѧ. ны́нѣ же цѣ̑лы ꙗ҆ви́шасѧ, и҆ ꙗ҆́кѡ ѕвѣзда̀ пресвѣ́тлаѧ, просвѣща́ютъ всѣ́хъ притека́ющихъ къ ни̑мъ и҆ бг҃ꙋ зовꙋ́щихъ: по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
И҆зба́ви на́съ, ст҃и́телю хрⷭ҇то́въ, сѣте́й вра́жїихъ мл҃твами твои́ми и҆ ѡ҆кормѝ живо́тъ на́шъ си́лою всеще́драгѡ бг҃а, є҆мꙋ́же съ тобо́ю покланѧ́емсѧ, велегла́снѡ вопїю́ще: да бл҃гослови́тъ тва́рь всѧ̑ гдⷭ҇а и҆ превозно́ситъ во всѧ̑ вѣ́ки.
Бг҃оро́диченъ:
Ѻ҆ч҃ескїѧ сла́вы не ѿстꙋ́пль, во́лею къ на́шей хꙋ́дости снизше́лъ є҆сѝ, сладча́йшїй і҆и҃се, и҆ ѿ дв҃ы пло́ть прїѧ́лъ є҆сѝ. є҆ѧ́же мл҃твами и҆зба́ви рабы̑ твоѧ̑ ѿ бѣ́дъ и҆ скорбе́й.
Пѣ́снь ѳ҃.
І҆рмо́съ:
Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.
Тѣ́ло твоѐ чтⷭ҇но́е, сщ҃е́нне і҆нноке́нтїе, съ вѣ́рою пристꙋпа́ющымъ и҆сцѣлє́нїѧ и҆сточа́етъ, страсте́й разли́чныхъ тьмꙋ̀ ѿгонѧ́етъ и҆ свѣ́томъ невече́рнимъ просвѣща́етъ всѣ́хъ, хва́лѧщихъ тѧ̀.
Чистотꙋ̀ ᲂу҆ма̀ стѧжа́въ, дх҃а ст҃а́гѡ жили́ще бы́лъ є҆сѝ, бг҃обл҃же́нне, бл҃года́ть же ст҃и́тельства прїе́мъ, проповѣ́дникъ и҆зѧ́щный и҆ ᲂу҆чи́тель и҆скꙋ́сный показа́лсѧ є҆сѝ, наꙋча́ѧ лю́ди правосла́внѡ и҆сповѣ́дати въ трⷪ҇цѣ є҆ди́наго бг҃а.
Є҆ди́нѣ бл҃же, хрⷭ҇тѐ многомлⷭ҇тиве, въ мл҃твꙋ тебѣ̀ ны́нѣ приво́димъ ᲂу҆го́дника твоего̀ і҆нноке́нтїа. не пре́зри хода́тайства є҆гѡ̀ грѣ̑хъ на́шихъ ра́ди, но поми́лꙋй на́съ, вѣ́рою взыва́ющихъ: застꙋ́пничествомъ ст҃и́телѧ на́шегѡ, гдⷭ҇и, поми́лꙋй на́съ.
Трⷪ҇ченъ:
Тебѣ̀ непристꙋ́пномꙋ бг҃ꙋ и҆ сла́вы цр҃ю̀ трисл҃нечномꙋ, строи́телю и҆ промысли́телю всѧ́ческихъ, є҆ди́номꙋ бл҃го́мꙋ и҆ сꙋ́щемꙋ, бжⷭ҇тва̀ держа́вꙋ и҆мꙋ́щемꙋ, пѣ́снь трист҃ꙋ́ю воспѣва́юще, покланѧ́емсѧ при́снѡ и҆ непреста́ннѡ велича́емъ.
Бг҃оро́диченъ:
Ѻ҆трокови́цѣ всенепоро́чнаѧ, мт҃и, дв҃о пречⷭ҇таѧ, сн҃а и҆ бг҃а твоего̀ млⷭ҇тива сотворѝ на́мъ и҆ страсте́й лю́тыхъ и҆зба́ви.
Свѣти́ленъ:
Весели́тсѧ ны́нѣ землѧ̀ сара́товскаѧ, лю́дїе же пе́нзенстїи тебѣ̀ покланѧ́ютсѧ и҆ хрⷭ҇та̀ велича́ютъ, ѡ҆брѣто́ша бо вели́кое сокро́вище.
Сла́ва, и҆ ны́нѣ:
Влⷣчце всемлⷭ҇тиваѧ, просвѣще́нїе помраче́нныхъ дꙋ́шъ на́шихъ, свѣ́тъ и҆́стинный мі́рꙋ ро́ждшаѧ, со ст҃и́телемъ пречꙋ́днымъ і҆нноке́нтїемъ сн҃а твоего̀ и҆ бг҃а ᲂу҆молѝ ѡ҆ всѣ́хъ на́съ.