Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Боже́ственными заря́ми и свяще́нными светосия́нии при́сно мою́ ду́шу озари́, тво́й, иера́рше, пра́здник, о́тче, сла́вяща.
Всесве́тлую тя́ звезду́ мы́сленное показа́ Со́лнце, све́тлость твои́х доброде́телей просвети́ зе́млю, святи́телю Христо́в, му́дре Иа́кове.
Житие́ при́сно очище́но и чи́сто и скве́рне несме́шено яви́в, Христо́в свяще́н сосу́д, прему́дре, показа́лся еси́ на земли́, Иа́кове блаже́нне.
Богоро́дичен: Со Отце́м Сы́й Единоро́дный, земны́я обожи́в, Чи́стая, за мно́гия щедро́ты я́ко Бо́г преблаги́й.
Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Сы́н дне́ све́та, ты́, святи́телю, труды́ твои́ми яви́лся еси́ и я́сно во све́тлостех ны́не святы́х сия́еши благода́тию.
Пропове́дая ны́не благочести́вно Тро́ицы Еди́но Божество́, и́дольскую ле́сть искорени́л еси́ от земли́, я́ко честны́й святи́тель и я́ко Сло́ва и́стинный служи́тель.
Пу́ть обличи́л еси́, му́дре, все́м прельще́ным нечести́ваго искуше́ния и приве́л еси́ к Сло́ву Пастыренача́льнику, я́ко па́стырь слове́сный и спаси́тельный.
Богоро́дичен: Приста́нище бу́ди ми́ и окормле́ние, бе́дствующу страстьми́ неосла́бно и погиба́ющу, приста́нище су́щи в мо́ри жите́йстем, еди́на Чи́стая Присноде́во.
Украша́яся прему́дростию ра́зума, горды́ню низложи́л еси́ плотски́я тя́гости и бы́л еси́ оби́тель Ду́ха Пресвята́го, непреме́нно простира́яся ра́зумом к Лю́бящему тя́. Те́м ре́вностию Боже́ственною разгара́яся, сла́вне, сирота́м и убо́гим утвержде́ние яви́лся еси́, А́нгелов собесе́дник Иа́кове, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.
Правове́рно, преподо́бне, Це́рковь Христо́ву упа́сл еси́, ерети́ческия отгна́л еси́ пле́велы и в Вы́шних се́лех водворя́ешися, преблаже́нне.
Богоро́дичен: Я́ко Всенепоро́чная Неве́сто Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и де́моном игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и Вы́шняго прича́стия сподо́би и све́та невече́рняго моли́твами Твои́ми.
Ирмо́с: Христо́с моя́ си́ла, Бо́г и Госпо́дь, честна́я Це́рковь Боголе́пно пое́т, взыва́ющи, от смы́сла чи́ста, о Го́споде пра́зднующи.
Предве́дый Бо́г, блаже́нне, твоея́ души́ красоту́ и ра́зума чистоту́, священнопропове́дника му́дра и учи́теля показа́ тя́.
Ду́хом просвеще́н сы́й, су́щия во тьме́ пре́лести просвеща́еши и Креще́нием сы́ны дне́ соверша́еши, святи́телю преслову́щий.
От тьмы́ звере́й изба́вил еси́ ста́до твое́, растерза́ти и́щущих и отступи́ти ве́ры непоро́чныя, святи́телем добро́то и па́стырем старе́йшинство.
Богоро́дичен: Разу́мно в купине́ Тя́ огнепа́льней Моисе́й ви́дев, я́вственно образу́ющей Бо́га, хотя́ща из Тебе́ роди́тися неизрече́нно, Богоро́дице Присноде́во.
Ирмо́с: Бо́жиим Све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Святи́тельскую твою́ оде́жду свяще́нную носи́в свяще́нно, нечести́выя просвети́л еси́, честны́й святи́телю, Еди́нство Несозда́нно в Тре́х Ли́цех, Иа́кове прему́дре, пропове́дал еси́.
От у́ст во́лка мы́сленнаго восхи́тил еси́ лю́ди уче́нием, Богогла́се, уста́ ерети́ческая велере́чивая, твои́ми Богосло́вии загради́л еси́, о́тче.
Я́ко святи́теля вели́каго и апо́столом о́бщника Це́рковь сла́вит тя́ вся́ ве́рных, Иа́кове сла́вне, и гра́д Росто́в, его́же свои́ми моли́твами сохрани́ непрекло́нный и недви́жимый, Иа́кове свя́те, ра́вне апо́столом.
Богоро́дичен: Зако́ны естества́ Пресу́щный Бо́г обновля́ет, Непоро́чная, из Твоея́ утро́бы ражда́ется, еди́н усво́ив вся́ческая во́лею.
Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Возвы́шено смире́ние чистото́ю ума́ и любо́вь нелицеме́рну, ве́ру и наде́жду име́я и́стинну, Иа́кове всесла́вный, Тро́ицы яви́лся еси́ жили́ще.
Ны́не от созва́ния твоего́ Ду́хом, прему́дре, и́же по тебе́ благода́тию слове́сных ове́ц наста́вника приво́диши к же́ртвеннику, доброде́тели писа́нием облиста́ема.
Вельми́ украси́вшася Росто́вскаго свяще́ния, седа́лищу тя́ учи́т, прехва́льне, Ду́х Святы́й, и тебе́ па́стыря руко́ю святи́тельскою, Иа́кове, соверша́ет.
Богоро́дичен: Две́рь Богоблагода́тная, отве́рзши две́ри Небе́сныя, две́ри све́та отве́рзи ми́, Влады́чице, и от вра́т сме́ртных свободи́ мя́, Чи́стая.
Я́ко архиере́ев сопресто́льник и святи́телем изря́дный побо́рник бы́л еси́, святи́телю Иа́кове, непреста́нно сохраня́й оте́чество твое́, гра́д же и лю́ди, тебе́ ве́рою почита́ющия и честны́м моще́м твои́м покланя́ющияся, да велегла́сно тебе́ вопие́м: ра́дуйся, Иа́кове Богому́дре.
Из чре́ва ма́терня освяще́ннаго святи́теля Госпо́дня хва́лит ны́не вся́ страна́ Росси́йская, преподо́бнаго Иа́кова, Росто́ву гра́ду утвержде́ние, благода́тныя да́ры прие́мшаго Боже́ственныя сла́вы, к нему́же притека́юще, вси́ ве́рою те́плою мо́щи его́ любе́зно целу́ем. Те́м и а́з, недосто́йный и гре́шный, наде́яся на моли́твы твоя́, святи́телю, я́же ко Влады́це и Пречи́стей Его́ Ма́тери, жела́ю, а́ки пси́ от крупи́ц, па́дающих от трапе́зы госпо́дий свои́х, насыще́ние прия́ти, е́же в Де́нь Су́дный соде́янных мно́ю зо́л, моли́твами твои́ми, свя́те, проще́ние улучи́ти, да велегла́сно тебе́ вопию́: ра́дуйся, Иа́кове Богому́дре.
Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Вразумля́л еси́ неразу́мныя, обраща́л еси́ прельще́нныя, совраща́ющияся же, о́тче, спа́сл еси́ и Бо́гу приве́л еси́ чи́сты, Тому́ пою́щия благоче́стно: благослове́н еси́, Го́споди Бо́же оте́ц на́ших.
Украси́шася Боже́ственнии твои́ по́двиги, воплоще́ние пропове́дающе неизрече́нным милосе́рдием возсия́вшаго на́м, Ему́же вопие́м приле́жно: благослове́н Бо́г оте́ц на́ших.
Облада́в страстьми́ теле́сными, поще́нием, сла́вне, необлада́емь жите́йскими напа́стьми яви́лся еси́. Ны́не пое́ши при́сно: благослове́н Бо́г оте́ц на́ших.
Богоро́дичен: Избавля́еши дре́вняго преступле́ния Рождество́м Твои́м, Пречи́стая, хва́лим Тя́, спасе́ннии Тобо́ю, Де́во, и, пою́ще, вопие́м Ти́: благослове́н Бо́г оте́ц на́ших.
Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Процве́л еси́, я́ко фи́никс, во дво́рех Бо́жиих и до́лжным сно́м преподо́бным усну́л еси́, при́сно же наслажде́ние пребоже́ственный гро́б тво́й и чу́до ви́дящим, Иа́кове пропове́дниче, показу́еши.
Бо́жие бо Сло́во су́щественное, свяще́нно тя́ и святи́теля возставля́ет, пома́зающа лю́ди, священносвяти́телю и престо́льниче Росто́вский и свети́льниче вселе́нныя.
Вопло́щшагося Сло́ва Богосло́вил еси́, многобезслове́сия бо лю́ди изба́вив, Боже́ствен бы́л еси́ учени́к возсия́вшаго, Иа́кове Богогла́се.
Богоро́дичен: Священнонаучи́вся Твои́м та́йнам, проро́чески Боже́ственный ли́к, Богоро́дице, издале́ча уви́дев и я́ко положи́в Богопропове́дно Боже́ственнаго пропове́дания Рождества́ Твоего́.
Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и, Тя́ ублажа́ем.
Я́ко све́т, я́ко све́щник, я́ко вели́кое со́лнце, я́ко мо́лния Христо́ве Це́ркви возсия́л еси́, и ве́рных ра́зумы просвети́л еси́, и в невече́рняя места́ всели́лся еси́, поя́ трисвяты́ми гла́сы Тро́ицу Несозда́нную.
Пло́тию ми́ра кроме́ бы́в, святи́телю, в прекра́сных чи́не обита́я, ро́да на́шего обогаща́еши творе́нием све́тлым. Те́мже па́мять твою́ ве́рою соверша́ем на земли́, Иа́кове прему́дре.
Земля́ те́ло твое́ блаже́нное скрыва́ет, я́ко исцеле́ния точа́щи ве́рным, Не́бо же ду́х со избра́нными от ве́ка но́сит, Боже́ственными сия́нии озаре́н еси́ вои́стинну, я́ко всесла́вный.
Богоро́дичен: Гла́с Арха́нгела Гаврии́ла прие́мши, Вели́каго Сове́та, Чи́стая, Христа́ Емману́ила родила́ еси́, со А́нгелы земны́я вся́ сочета́вшаго, еди́на вино́вна на́шего, Де́во, блаже́нства.
Чу́днаго и сла́внаго святи́теля Иа́кова вели́каго, прииди́те, пе́сньми Боже́ственными и свяще́нными похва́лим, я́ко Росто́ву председа́льника и А́нгельским чино́м сослуже́бника бы́вша.
Сла́вно кра́сится дне́сь светоза́рное торжество́, и́же во све́те сла́вы Бо́жия предстоя́, святи́телю, помяни́ на́с, хва́лящих твою́ па́мять.
Богоро́дичен: С Бо́гом упова́ние на Тя́ возложи́хом, Пречи́стая, И́же из Тебе́ проше́дшему сраспина́емся Христу́, Твои́ми же к Нему́ моли́твами невреди́ми да́же до конца́ сохрани́.