Канон святителю Гурию Казанскому

Пѣ́снь а҃.

І҆рмо́съ: І҆и҃лѧ ѿ рабо́ты и҆зба́вилъ є҆сѝ, гдⷭ҇и, десни́цею твое́ю держа́вною: ꙗ҆́кѡ ѻ҆́наго спа́слъ є҆сѝ, ны́нѣ на́съ спасѝ.

Трⷪ҇це прест҃а́ѧ, пѣ́снь тебѣ̀ принестѝ, и҆ досто́йными похвала́ми ᲂу҆го́дника твоего̀ ст҃и́телѧ, гꙋ́рїа, воспѣ́ти пода́ждь мѝ: да ра́дꙋѧсѧ, сла́влю тѧ̀ во вѣ́ки.

Повелѣ́нїемъ самоде́ржца первопресто́льникъ цр҃ко́вный гра́дꙋ новопросвѣще́нномꙋ ꙗ҆влѧ́ешисѧ, и҆ а҆пⷭ҇льски наꙋчи́лъ є҆сѝ вѣ́ровати трⷪ҇цѣ, во є҆ди́номъ сꙋществѣ̀.

Моли́твенный хра́мъ въ домꙋ̀ твое́мъ и҆мѣ́ѧ, и҆ въ то́мъ многотрꙋ́днѣ подвиза́сѧ, всенѡ́щнаѧ стоѧ̑нїѧ, и҆ моли̑твы приносѧ̀ вы́нꙋ бг҃ꙋ.

Бг҃оро́диченъ: Бж҃їѧ мт҃и ро́ждшаѧ є҆ди́наго ѿ ст҃ы́ѧ трⷪ҇цы, слове́сное мѝ недоꙋмѣ́нїе разрѣшѝ, и҆ сло́во мѝ пода́ждь, и҆́мже тѧ̀ просла́влю.

Пѣ́снь г҃.

І҆рмо́съ: Оу҆твержде́й сло́вомъ нб҃са̀, и҆ зе́млю ѡ҆снова́вый на вода́хъ мно́гихъ, ᲂу҆тверди́ мѧ къ пѣ́нїю славосло́вїѧ твоегѡ̀, гдⷭ҇и.

А҆да́ма дре́внѣйша а҆́гнца непоро́чнаго, бж҃їѧго сло́ва соприсносꙋ́щнаго, ст҃и́телю гꙋ́рїе, молѝ, да пода́стъ благочести́вомꙋ наро́дꙋ на́шемꙋ здра́вїе во благоде́нствѣ, и҆ на сопроти́вныхъ побѣ́дꙋ.

Є҆го́же и҆змла́да возлюби́лъ є҆сѝ, и҆ всѧ̑ тлѣ̑ннаѧ мі́ра сегѡ̀ въ ничто́же вмѣни́лъ є҆сѝ, преходѧ̑щаѧ презрѣ́въ, да въ бꙋ́дꙋщемъ ᲂу҆тверди́шисѧ сла́вити гдⷭ҇а.

Благовѣ́рныхъ зако́нꙋ наказꙋ́ѧ благоче́стїѧ, невѣ̑рныѧ же наꙋча́ѧ позна́ти вѣ́рꙋ благочести́вꙋ и҆ и҆́стиннꙋ, и҆ пѣ́ти съ на́ми при́снѡ пѣ́снь, а҆́гг҃лы пѣва́емꙋ въ трⷪ҇цѣ бг҃ꙋ: ст҃ъ є҆сѝ, гдⷭ҇и.

Бг҃оро́диченъ: Подъ кро́въ тво́й держа́вный съ вѣ́рою прибѣга́емъ, бцⷣе: покры́й и҆ соблюдѝ, гпⷭ҇жѐ, моли́твами твои́ми, и҆ спасѝ ѿ бѣ́дъ и҆ ѿ клеветы̀ ѕлы́хъ человѣ̑къ ра̑бъ твои́хъ, при́снѡ пою́щихъ тѧ̀.

Сѣда́ленъ, гла́съ д҃.

Ѿ землѝ воззва́вый ва́съ къ вѣ̑чнымъ ѻ҆би́телемъ, соблюда́етъ и҆ по сме́рти тѣлеса̀ ва̑ша, ѻ҆тцы̀ прпⷣбнїи: вы́ бо въ цѣломꙋ́дрїи и҆ чистотѣ̀ житїѐ по́жили є҆стѐ, гꙋ́рїе бг҃омꙋ́дре, и҆ варсоно́фїе преди́вне. тогѡ̀ ра́ди любо́вїю почита́емъ свѧтꙋ́ю па́мѧть ва́шꙋ, и҆ мо́лимъ: моли́те хрⷭ҇та̀ бг҃а спасти́сѧ на́мъ.

Бг҃оро́диченъ: Є҆гда̀ хощꙋ̀ предста́ти предъ лице́мъ созда́телѧ моегѡ̀ въ де́нь пра́веднагѡ сꙋда̀ є҆гѡ̀, тогда̀, влⷣчце, предста́ни мѝ, и҆ мꙋ́ки и҆зба́ви мѧ̀ вѣ́чныѧ, моли́твꙋ сотвори́вши ѡ҆ ᲂу҆пова́ющемъ на тѧ̀, ст҃а́ѧ бцⷣе, да не сни́дꙋ во а҆́дъ, но да спасꙋ́сѧ твои́мъ застꙋпле́нїемъ.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧще си́лꙋ твою̀.

Бла́гъ нра́въ и҆ послꙋша́нїе къ твоемꙋ̀ наста́вникꙋ и҆мѣ́лъ є҆сѝ, и҆ во свѣ́тѣ ст҃ы́ѧ трⷪ҇цы свеселѧ́сѧ, съ ни́мъ пое́ши: сла́ва си́лѣ твое́й, гдⷭ҇и.

Благослове́нїемъ кра́йнѧгѡ ст҃и́телѧ, поставлѧ́ешисѧ па́стырь и҆ ᲂу҆чи́тель новопросвѣще́нномꙋ гра́дꙋ каза́ни, и҆́же пре́лестїю врага̀ ѡ҆мрачє́нныѧ лю́ди свѣ́томъ бг҃оразꙋ́мїѧ просвѣти́лъ є҆сѝ.

І҆́ѡва првⷣнагѡ терпѣ́нїю подража́лъ є҆сѝ, въ болѣ́зни слежа̀, и҆ на ѻ҆дрѣ̀, тѣ́ломъ дрꙋчи́мь, и҆знемога́лъ є҆сѝ, поѧ̀ творцꙋ̀ твоемꙋ̀ пѣ́нїе непреста́ннѡ.

Бг҃оро́диченъ: Бг҃оневѣ́сто и҆ бг҃ома́ти, плотоно́сца безъ болѣ́зни ро́ждши, и҆ по ржⷭ҇твѣ̀ дв҃а ꙗ҆́вльшисѧ, того̀ молѝ, влⷣчце, да и҆зба́вимсѧ бѣ́дъ и҆ скорбе́й.

Пѣ́снь є҃.

І҆рмо́съ: Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.

А҆рхїере́й сы́й, а҆рхїере́ємъ на́шымъ въ моли́твахъ спосо́бствꙋй, да возмо́гꙋтъ гра́дꙋ каза́ни, благоче́стїѧ содержи́телю, и҆ всемꙋ̀ хрⷭ҇тїа́нскомꙋ наро́дꙋ и҆спроси́ти ᲂу҆ хрⷭ҇та̀ ми́ра и҆ ве́лїѧ ми́лости.

Ны́нѣ, преблаже́нне гꙋ́рїе, дꙋша̀ твоѧ̀ почива́етъ на нб҃сѣ́хъ, предстоѧ̀ прⷭ҇то́лꙋ хрⷭ҇то́вꙋ: честны̑ѧ же твоѧ̑ мо́щи нетлѣ́нїемъ почте́ны, даю́тъ и҆сцѣлє́нїѧ приходѧ́щымъ съ вѣ́рою.

Дре́вле помраче́нный ѕмі́евою пре́лестїю, ны́нѣ же просвѣще́нный хрⷭ҇то́вою бл҃года́тїю, гра́дъ каза́нь, ви́дѧ въ себѣ̀ нетлѣ̑нны мо́щи твоѧ̑, ра́дꙋетсѧ. мы́ же, ча̑да твоѧ̑ чꙋдесы̀ ѡ҆богаща́еми весели́мсѧ, хрⷭ҇та̀ сла́вѧще зове́мъ: спасѝ на́съ, гдⷭ҇и.

Бг҃оро́диченъ: Бцⷣе всѣ́хъ цр҃и́це, благочести́вомꙋ наро́дꙋ на́шемꙋ на врагѝ побѣ́дꙋ да́рꙋй, и҆ сопроти́вныхъ совѣ́ты разорѝ, и҆ ѿ междоꙋсо́бныѧ бра́ни и҆зба́ви, и҆ клеветникѡ́въ чє́люсти сокрꙋшѝ, влⷣчце, и҆ ѿ всѣ́хъ бѣ́дъ моли́твами твои́ми спасѝ на́съ.

Пѣ́снь ѕ҃.

І҆рмо́съ: Ꙗ҆́кѡ во́ды морскі̑ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.

Оу҆тѣша́ѧ скорбѧ́щыѧ, застꙋпа́ѧ ѡ҆би̑димыѧ, накормлѧ́ѧ а҆́лчꙋщыѧ, и҆ всѧ̑ всѣ̑мъ подава́ѧ неѡскꙋ́днѡ, гꙋ́рїе ст҃и́телю, хрⷭ҇та̀ бг҃а молѝ спасти́сѧ на́мъ.

Бж҃їимъ смотре́нїемъ, и҆ ст҃и́тельскимъ благослове́нїемъ, и҆ ца́рскимъ повелѣ́нїемъ, рꙋко́ю мое́ю недосто́йною приноси́мое ва́шымъ трꙋдѡ́мъ похвале́нїе, прпⷣбнїи чꙋдотво́рцы не ѿри́ните, но прїими́те, и҆ моли́те хрⷭ҇та̀, да и҆зба́витъ мѧ̀ шꙋ́їѧгѡ стоѧ́нїѧ.

Тече́нїе воспрїѧ̀, и҆ пꙋ́ть совершѝ, и҆ зе́млю непло́днꙋ моли́твами твои́ми добропло́днꙋ показа̀: и҆ ѡ҆ мнѣ̀ приносѧ́щемъ тебѣ̀ пѣ́нїе сїѐ, ст҃и́телю, молѝ хрⷭ҇та̀, да принесꙋ̀ и҆ а҆́зъ покаѧ́нїѧ пло́дъ, да и҆зба́витъ мѧ̀ вѣ́чнагѡ мꙋче́нїѧ.

Бг҃оро́диченъ: Бг҃облаже́ннаѧ, и҆ ѿ а҆́гг҃лъ покланѧ́емаѧ, и҆ ѿ земны́хъ всегда̀ славосло́вимаѧ, творца̀ твоего̀ и҆ бг҃а, є҆го́же родила̀ є҆сѝ, прест҃а́ѧ дв҃о, молѝ спасти́сѧ на́мъ.

Конда́къ, гла́съ д҃:

Чꙋ́вствєнныѧ стра̑сти побѣди́въ, чистото́ю ꙗ҆́кѡ со́лнце возсїѧ́лъ є҆сѝ, чи́сто житїѐ до конца̀ сохрани́въ, и҆ ѿ невѣ́рїѧ въ вѣ́рꙋ мно́гихъ ко хрⷭ҇тꙋ̀ приве́лъ є҆сѝ: и҆ тогѡ̀ ра́ди ѿ бг҃а нетлѣ́нїемъ почте́нъ бы́лъ є҆сѝ, и҆ чꙋдесы̀ ᲂу҆дивлѧ́емь. мо́лимъ тѧ̀, ст҃и́телю гꙋ́рїе, моли́твами твои́ми ѿ бѣ́дъ и҆зба́ви на́съ, да зове́мъ тѝ: ра́дꙋйсѧ, ѻ҆́ч҃е преди́вный, гра́дꙋ каза́ни похвала̀ и҆ ᲂу҆твержде́нїе.

І҆́косъ:

Пе́рвый сѣ́ѧтель бы́лъ є҆сѝ дꙋхо́вныхъ добродѣ́телей, и҆ пе́рвый па́стырь и҆ цр҃кви нача́льникъ: пе́рвый а҆рхїере́й и҆ ᲂу҆чи́тель хрⷭ҇тїа́нскомꙋ зако́нꙋ, въ новопросвѣще́нномъ гра́дѣ каза́ни, вѣ̑рныѧ лю́ди кормѧ̀ хлѣ́бомъ ᲂу҆че́нїѧ бл҃года́тнагѡ зако́на, напаѧ́ѧ пи́вомъ дꙋхо́вныѧ бл҃года́ти: невѣ̑рныѧ же ᲂу҆чѧ̀ позна́ти и҆́стинꙋ, и҆ крⷭ҇ти́тисѧ ст҃ы́мъ креще́нїемъ, и҆ мно́жество наро́да ѿ невѣ́рїѧ въ вѣ́рꙋ ко хрⷭ҇тꙋ̀ приве́лъ є҆сѝ, и҆ чи́стымъ житїе́мъ бг҃ꙋ ᲂу҆годи́ти наста́вивъ и҆̀хъ. сегѡ̀ ра́ди хрⷭ҇то́съ ст҃о́мꙋ и҆ трꙋдолюбе́зномꙋ твоемꙋ̀ тѣ́лꙋ дарова̀ нетлѣ́нїе, и҆ да́ръ чꙋдотворе́нїѧ, приходѧ́щїи бо съ вѣ́рою къ цѣльбонѡ́снымъ твои̑мъ мощє́мъ, прїе́млютъ неѡскꙋ̑днаѧ страсте́й премѣнє́нїѧ, и҆ болѣ́зней и҆сцѣле́нїе, и҆ грѣхѡ́въ проще́нїе, твои́ми, свѧ́те, ко хрⷭ҇тꙋ̀ моли́твами, да зове́мъ тѝ: ра́дꙋйсѧ, ѻ҆́ч҃е преди́вный, гра́дꙋ каза́ни похвала̀ и҆ ᲂу҆твержде́нїе.

Пѣ́снь з҃.

І҆рмо́съ: Ѻ҆́троцы бг҃очести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.

Не то́кмѡ ᲂу҆́бѡ тѣ́ло твоѐ нетлѣ́нїемъ просла́вилъ є҆́сть бг҃ъ, ст҃и́телю гꙋ́рїе, но и҆ погреба̑льнаѧ всѧ̑ и҆ до ны́нѣ пребыва́ютъ но́выхъ крѣпча́йше. мы́ же си̑мъ дивѧ́щесѧ зове́мъ: бл҃гослове́нъ бг҃ъ ѻ҆тцє́въ на́шихъ.

По́двигѡвъ твои́хъ ра́ди и҆ трꙋдѡ́въ, прпⷣбне, тѣ́ло твоѐ нетлѣ́нно показа̀ бг҃ъ: гро́бꙋ бо и҆ ри́замъ вмѣ́стѡ тлѣ́нїѧ крѣ́пость дарова̀. бл҃гослове́нъ бг҃ъ ѻ҆тцє́въ на́шихъ.

Не є҆ди́но ᲂу҆́бѡ тѣ́ло твоѐ ст҃и́телю, тлѣ́нїю бы́сть неприча́стно, но и҆ погре́бшихсѧ съ вѣ́рою во є҆ди́ной гробни́цѣ съ тобо́ю, моли́твами твои́ми двꙋ̀ мона́хѡвъ нетлѣ́нїемъ ѡ҆дарѝ бг҃ъ, є҆мꙋ́же зове́мъ: бл҃гослове́нъ є҆сѝ, гдⷭ҇и бж҃е ѻ҆тцє́въ на́шихъ.

Бг҃оро́диченъ: Ѽ всепѣ́таѧ и҆ всенепоро́чнаѧ влⷣчце, молѝ сн҃а твоего̀ хрⷭ҇та̀ бг҃а на́шего, да и҆зба́витъ на́съ вѣ́чнагѡ мꙋче́нїѧ, да пое́мъ: бл҃гослове́нъ бг҃ъ ѻ҆тцє́въ на́шихъ.

Пѣ́снь и҃.

І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Пречестна́ѧ ра́ка, и҆дѣ́же положено̀ честно́е тѣ́ло твоѐ, ст҃и́телю гꙋ́рїе, мѵ́ра благоꙋха́нна преиспо́лнена бы́сть, и҆̀же съ вѣ́рою ма́жꙋщїисѧ неѡскꙋ̑дна и҆сцѣлє́нїѧ прїе́млютъ, зовꙋ́ще: да благослови́тъ всѧ̀ тва́рь гдⷭ҇а, и҆ превозно́ситъ є҆го̀ во вѣ́ки.

Новопросвѣще́нномꙋ гра́дꙋ каза́ни первопресто́льникъ посыла́ешисѧ, и҆ мно́жество невѣ́рныхъ къ твоемꙋ̀ влⷣцѣ хрⷭ҇тꙋ̀ приве́лъ є҆сѝ, пою́щихъ є҆мꙋ̀: благослови́те, по́йте, и҆ превозноси́те гдⷭ҇а во вѣ́ки.

Па́стырскїй же́злъ прїе́мъ, ст҃и́телю, нѡ́вымъ лю́демъ ᲂу҆чи́тель бы́лъ є҆сѝ, пресла́вне гꙋ́рїе, и҆ мнѡ́ги лю́ди а҆га́рѧнска ꙗ҆зы́ка ст҃ы́мъ креще́нїемъ ѡ҆бнови́лъ є҆сѝ, да всѝ съ тобо́ю зове́мъ: благослови́те, по́йте, и҆ превозноси́те гдⷭ҇а во вѣ́ки.

Бг҃оро́диченъ: Бг҃оизбра́ннаѧ, є҆ди́на всенепоро́чнаѧ, пречⷭ҇таѧ бг҃оневѣ́сто и҆ бг҃ома́ти, прїимѝ мольбы̑ вѣ́рою ᲂу҆пова́ющихъ на тѧ̀, и҆ сотворѝ моле́нїе ко ст҃ѣ́й трⷪ҇цѣ, и҆зба́витисѧ на́мъ ѿ всѣ́хъ бѣ́дъ, тѧ̀ сла́вѧщымъ и҆ превозносѧ́щымъ гдⷭ҇а во вѣ́ки.

Пѣ́снь ѳ҃.

І҆рмо́съ: Снѣ́дїю дре́ва, ро́дꙋ прибы́вшаѧ сме́рть, крⷭ҇то́мъ ᲂу҆праздни́сѧ дне́сь: и҆́бо прама́тернѧѧ всеро́днаѧ клѧ́тва разрꙋши́сѧ, прозѧбе́нїемъ чⷭ҇тыѧ бг҃ома́тере: ю҆́же всѧ̑ си̑лы небє́сныѧ велича́ютъ.

Прїѧ́лъ є҆сѝ ѿ хрⷭ҇та̀ бжⷭ҇твенное є҆гѡ̀ дарова́нїе: ѿ мно́гихъ бо лѣ́тъ сокровє́ны честны̑ѧ твоѧ̑ мо́щи, въ три́десѧть же второ́е лѣ́то ѡ҆брѣто́шасѧ невреди̑мы ничи́мже, и҆сцѣлє́нїѧ разли̑чна подава́ющѧ.

Па́мѧть ѡ҆брѣ́тенїѧ честны́хъ моще́й твои́хъ наста̀ на́мъ свѣ́тло пра́зднество, пречꙋ́дный ст҃и́телю хрⷭ҇то́въ прехва́льне гꙋ́рїе, въ ню́же чꙋде́съ благода́ть прїѧ́лъ є҆сѝ ѿ всѣ́хъ цр҃ѧ̀ хрⷭ҇та̀ бг҃а. тѣ́мже зове́мъ: и҆зба́ви на́съ ѿ врагѡ́въ на́шихъ.

Благода́рствєнныѧ пѣ̑сни принесе́мъ хрⷭ҇тꙋ̀ бг҃ꙋ на́шемꙋ, такова́го на́мъ ст҃и́телѧ дарова́вшемꙋ, цр҃кви свое́й пречестно́е ᲂу҆добре́нїе, и҆ гра́дꙋ каза́ни вели́кое ᲂу҆твержде́нїе.

Бг҃оро́диченъ: Оу҆мирѝ мі́ръ, хрⷭ҇тѐ, мольба́ми чⷭ҇тыѧ бг҃оѻтрокови́цы, и҆ низложѝ вра̑жїѧ си̑лы, и҆ тишинꙋ̀ неизглаго́ланнꙋ ᲂу҆стро́й, и҆ во вѣ́ки сохранѝ.

Свѣти́ленъ.

Є҆гда̀ ᲂу҆́бѡ честны̑ѧ ва́шѧ и҆ ст҃ы̑ѧ мо́щи нетлѣ̑нны ѡ҆брѣто́шасѧ, тогда̀ благоꙋха́нїе ѿ гробѡ́въ ва́шихъ и҆зноша́шесѧ, и҆сцѣлѧ́ющее недꙋ́ги, и҆ ѿгонѧ́ющее дꙋ́хи лꙋка̑выѧ.

Бг҃оро́диченъ: Вознесѝ, бцⷣе, ро́гъ цр҃кви, и҆ наро́дꙋ на́шемꙋ пода́ждь на врагѝ ѡ҆долѣ́нїе и҆ крѣ́пость, и҆ цр҃ковь, чⷭ҇таѧ, ᲂу҆твердѝ, и҆ лю́ди твоѧ̑ поми́лꙋй, да тѧ̀ всѧ́къ ꙗ҆зы́къ хрⷭ҇тїа́нскїй велича́етъ.