Пѣ́снь а҃.
І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Прїимѝ хвале́нїе, ѿ ᲂу҆́стъ недосто́йныхъ тебѣ̀ приноси́мое, и҆ возда́ждь те́плыми твои́ми мл҃твами къ бг҃ꙋ, чтꙋ́щымъ ст҃ꙋ́ю па́мѧть твою̀, ѻ҆́тче на́шъ ѳеодо́сїе.
Ѿ ю҆́ности гдⷭ҇а возлюби́лъ є҆сѝ, чистотꙋ̀ непоро́чнꙋ сохранѧ́ѧ: ѿ дѣ́тства томꙋ̀ прилѣпи́лсѧ є҆сѝ чи́стою твое́ю дꙋше́ю, въ простотѣ̀ и҆ неѕло́бїи се́рдце твое́ соблюда́ѧ. тѣ́мже и҆ ча́до бж҃їе вои́стиннꙋ бы́лъ є҆сѝ, ст҃е ѳеодо́сїе.
Бл҃го є҆́сть мꙋ́жꙋ, є҆гда̀ во́зьметъ ꙗ҆ре́мъ въ ю҆́ности свое́й, глаго́летъ писа́нїе: семꙋ̀ глаго́лꙋ послѣ́дꙋѧ, съ ра́достїю и҆́го гдⷭ҇не ѿ ю҆́ности воспрїѧ́лъ є҆сѝ, и҆ бы́лъ є҆сѝ и҆́нокъ преизрѧ́дный, бл҃же́нне ѳеодо́сїе.
Бг҃оро́диченъ:
Прест҃а́ѧ дв҃о, мт҃и бж҃їѧ, застꙋ́пнице на́ша непосты́днаѧ, сп҃сѝ, ᲂу҆слы́ши на́съ, страстьмѝ лю́тѣ ѡ҆держи́мыхъ, и҆ да́ждь рꙋ́кꙋ по́мощи мл҃твами твои́ми.
Пѣ́снь г҃.
І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Бл҃же́ни ни́щїи дꙋ́хомъ, глаго́летъ гдⷭ҇ь: семꙋ̀ сп҃си́тельномꙋ глаго́лꙋ внима́ѧ, па́че всѣ́хъ добродѣ́телей нищетꙋ̀ дꙋхо́внꙋю потща́лсѧ є҆сѝ стѧжа́ти, прпⷣбне, возлюби́въ тꙋ́ю ꙗ҆́кѡ ѡ҆гра́дꙋ крѣ́пкꙋ ѿ всѧ́кагѡ и҆скꙋше́нїѧ и҆ ꙗ҆́кѡ бг҃олюбе́знꙋю ма́терь всѣ́хъ добродѣ́телей.
Позна́въ, ꙗ҆́кѡ ѿ послꙋша́нїѧ ражда́етсѧ смире́нїе, ѿ смире́нїѧ же безстра́стїе, всѣ́мъ се́рдцемъ возлюби́лъ є҆сѝ послꙋша́нїе, во все́мъ во́лю свою̀ и҆ ѕлы̑ѧ по́мыслы ѿсѣка́ѧ: тѣ́мже и҆ безстра́стїѧ дости́глъ є҆сѝ, ᲂу҆гото́вавъ дꙋ́шꙋ твою̀ въ чи́стꙋю ѻ҆би́тель дх҃а прест҃а́гѡ.
Кро́тость ве́лїю стѧжа́лъ є҆сѝ, бг҃омꙋ́дре ѳеодо́сїе, всѧ̑ скѡ́рбнаѧ бл҃годꙋ́шнѣ претерпѣва́ѧ, всѧ́кꙋю ѡ҆би́дꙋ и҆ ᲂу҆ничиже́нїе въ молча́нїи любо́вїю покрыва́ѧ: сегѡ̀ ра́ди и҆ прїѧ́лъ є҆сѝ наслѣ́дїе на землѝ живы́хъ, и҆дѣ́же првⷣнїи во вѣ́ки пребыва́ютъ, сла́вѧще гдⷭ҇а і҆и҃са.
Бг҃оро́диченъ:
Не и҆́мамы дерзнове́нїѧ къ сн҃ꙋ и҆ бг҃ꙋ твоемꙋ̀, прест҃а́ѧ влⷣчце: не и҆́мамы дерзнове́нїѧ и҆ къ тебѣ̀, пренепоро́чнаѧ, грѣхмѝ при́снѡ ѡ҆сквернѧ́еми, а҆́ще не сама̀ ты̀, премилосе́рдаѧ мт҃и, воззове́ши на́съ заблꙋ́ждшихъ къ покаѧ́нїю, наде́ждею сп҃се́нїѧ ѿрѣва́ющи ѿ на́съ всѧ́кое ᲂу҆ны́нїе и҆ разлѣне́нїе.
Сѣда́ленъ, гла́съ д҃:
Ꙗ҆ви́лсѧ є҆сѝ свѣти́льникъ бл҃года́тный, ѻ҆́тче на́шъ ѳеодо́сїе, ти́химъ свѣ́томъ смире́нїѧ и҆ любвѐ сїѧ́ѧй и҆ на́съ любо́вїю твое́ю ѡ҆зарѧ́ѧй. тѣ́мже и҆ мы̀, любо́вїю чтꙋ́ще па́мѧть твою̀, вопїе́мъ тѝ: молѝ ѡ҆ на́съ, ст҃и́телю бж҃їй, новоѧвле́нный чꙋдотво́рче.
Бг҃оро́диченъ:
Мно́гими прегрѣшє́нїи ᲂу҆́мъ помраче́нъ и҆мꙋ́ще, вопїе́мъ ко твоемꙋ̀ крѣ́пкомꙋ застꙋпле́нїю, бцⷣе дв҃о: просвѣтѝ ѻ҆́чи дꙋ́шъ на́шихъ, и҆ возсїѧ́й на́мъ покаѧ́нїѧ зарю̀, мл҃твами ᲂу҆го́дника твоегѡ̀ ст҃и́телѧ ѳеодо́сїа, є҆ди́на чⷭ҇таѧ и҆ бл҃гослове́ннаѧ.
Пѣ́снь д҃.
І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Не́мощїю ѡ҆тѧгче́нъ и҆ ста́ростїю претрꙋжде́нъ бы́въ, а҆рхїпа́стырь ла́зарь пе́рвѣе ᲂу҆́бѡ сослꙋжи́телѧ, послѣди́ же и҆ наслѣ́дника себѣ̀ ᲂу҆строѧ́етъ тѧ̀, ст҃и́телю ѳеодо́сїе, и҆ цр҃кви черни́говстѣй свѣти́льника, ю҆́же мл҃твами твои́ми просвѣща́й во всѧ̑ вѣ́ки.
Вои́стиннꙋ че́сти и҆ вла́сти ст҃и́тельскїѧ досто́инъ ꙗ҆ви́лсѧ є҆сѝ, ѻ҆́тче ѳеодо́сїе, сло́вомъ премꙋ́дръ бы́въ, житїе́мъ же добродѣ́теленъ, въ бж҃е́ственныхъ писа́нїихъ и҆скꙋ́сенъ и҆ словє́сныѧ ѻ҆́вцы наставлѧ́ти ѕѣлѡ̀ дово́ленъ.
Бл҃гоче́стїемъ ᲂу҆краша́ѧсѧ, и҆ въ дх҃о́внѣмъ жи́тельствѣ всѣ̑мъ лю́демъ страны̀ черни́говскїѧ и҆звѣ́стенъ бы́въ, є҆динодꙋ́шнѣ тѣ́ми и҆збра́нъ бы́лъ є҆сѝ въ вели́кое слꙋже́нїе цр҃кви бж҃їей, ѻ҆́тче ѳеодо́сїе, ю҆́же и҆ ны́нѣ назира́й твои́ми мл҃твами.
Бг҃оро́диченъ:
Мно́гѡ мо́жетъ мл҃тва првⷣнагѡ поспѣшествꙋ́ема, глаго́летъ і҆а́кѡвъ бра́тъ гдⷭ҇ень: мно́гѡ мо́жетъ и҆ мл҃тва ст҃и́телѧ ѳеодо́сїа, споспѣшествꙋ́ема твое́ю мт҃рнею мл҃твою, прест҃а́ѧ влⷣчце бцⷣе: є҆си́ бо предста́тельство и҆ покро́въ и҆ застꙋпле́нїе на́ше, бл҃года́тнаѧ.
Пѣ́снь є҃.
І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̀ напра́ви, молю́сѧ.
Ра́довахꙋсѧ лю́дїе гра́да черни́гова, зрѧ́ще тебѐ свѣ́тлостїю са́на ст҃и́тельскагѡ ѡ҆блече́на, и҆ кꙋ́пнѡ со а҆рхїпа́стыремъ ла́заремъ прⷭ҇то́лꙋ бл҃года́ти бж҃їѧ предстоѧ́ща, и҆ преподѡ́бныѧ своѧ̑ рꙋ́цѣ ѡ҆ па́ствѣ воздѣ́юща, и҆ хрⷭ҇та̀ бл҃годарѧ́ще, сердцы̀ свои́ми ᲂу҆милѧ́хꙋсѧ.
Ѻ҆́бразъ бы́лъ є҆сѝ все́й бг҃ода́ннѣй па́ствѣ твое́й, сло́вомъ и҆ житїе́мъ, любо́вїю и҆ дꙋ́хомъ, вѣ́рою и҆ чистото́ю: сегѡ̀ ра́ди не то́чїю ѻ҆́вцы твоѧ̑ любо́вїю къ тебѣ̀ прилѣплѧ́хꙋсѧ, но и҆ и҆носла́внїи тѧ̀ ꙗ҆́кѡ человѣ́ка бж҃їѧ, ѻ҆́тче на́шъ ѳеодо́сїе, почита́хꙋ.
Па́стырь вои́стиннꙋ до́брый слове́сномꙋ ста́дꙋ твоемꙋ̀, ст҃и́телю ѳеодо́сїе, бы́лъ є҆сѝ, дꙋ́шꙋ твою̀ за ѻ҆́вцы твоѧ̑ положи́ти гото́вый: тѣ́мже и҆ ꙗ҆ви́лсѧ є҆сѝ ѡ҆би̑димымъ ᲂу҆́бѡ застꙋ́пникъ непреѡбори́мый, пра́вды же ревни́тель неꙋстраши́мый, си́льныхъ мі́ра сегѡ̀ съ любо́вїю ѡ҆блича́ѧ и҆ пасо́мыхъ свои́хъ ѻ҆те́чески вразꙋмлѧ́ѧ, заблꙋ́ждшыѧ же на пꙋ́ть пра́вый премꙋ́дрѣ наставлѧ́ѧ.
Бг҃оро́диченъ:
Оу҆мерщвле́ннꙋю дꙋ́шꙋ мою̀ ѡ҆живѝ, па́дшꙋю возста́ви, ᲂу҆ѧзвле́ннꙋю и҆сцѣлѝ, ᲂу҆́мъ мо́й просвѣтѝ, и҆скꙋше́нїй во́лны ᲂу҆кротѝ, мт҃и бж҃їѧ, дв҃о прест҃а́ѧ, и҆ сп҃си́ мѧ мл҃твами твои́ми, пречⷭ҇таѧ.
Пѣ́снь ѕ҃.
І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Ѿ ю҆́ности и҆́нокъ преизрѧ́дный бы́въ, и҆́ночєскїѧ ѡ҆би́тєли съ любо́вїю созида́лъ є҆сѝ, и҆ всѧ̑ на по́льзꙋ житїѧ̀ и҆́ноческагѡ въ тѣ́хъ бл҃гоꙋстроѧ́лъ є҆сѝ, всѣ́хъ при́снѡ къ бг҃ꙋ наставлѧ́ѧ ѻ҆те́ческими твои́ми поꙋче́ньми, ѻ҆́тче на́шъ, ѳеодо́сїе бг҃омꙋ́дре.
Бл҃голѣ́пнѣ дꙋ́шꙋ твою̀ во хра́мъ дх҃а бж҃їѧ добродѣ́тельми ᲂу҆строѧ́ѧ, бл҃голѣ́пїе до́мꙋ бж҃їѧ возлюби́лъ є҆сѝ, и҆ всеꙋсе́рдное попече́нїе ѡ҆ то́мъ и҆мѣ́ѧ, є҆щѐ и҆ хра́мы нѡ́вы созида́лъ є҆сѝ во сла́вꙋ творца̀ и҆ бг҃а, мі́ръ ве́сь несказа́нною красото́ю бл҃гоꙋкраси́вшагѡ.
Ра́достїю а҆́гг҃льскою, ст҃и́телю бж҃їй, ра́довалсѧ є҆сѝ, є҆гда̀ ча̑да твоѧ̑ во и҆́стинѣ ходѧ̑ща ви́дѣлъ є҆сѝ, и҆ ꙗ҆́коже ѻ҆те́цъ чадолюби́вый, се́рдцемъ твои́мъ ѡ҆ заблꙋжда́ющихсѧ скорбѣ́лъ є҆сѝ, и҆ ѡ҆ сп҃се́нїи всѣ́хъ мл҃твꙋ твори́лъ є҆сѝ, всѧ̑ любо́вїю ѡ҆б̾е́млѧ и҆ ѡ҆ всѣ́хъ предста́тельствꙋѧ, ѻ҆́тче на́шъ, ст҃и́телю ѳеодо́сїе.
Бг҃оро́диченъ:
Прїиди́те, всѝ вѣ́рнїи, припаде́мъ къ те́плѣй застꙋ́пницѣ ро́да на́шегѡ мт҃ри бж҃їей, и҆ во ᲂу҆миле́нїи се́рдца воззове́мъ: прест҃а́ѧ влⷣчце бцⷣе, покры́й на́съ бл҃года́тнымъ покро́вомъ твои́мъ, и҆ мл҃твами твои́ми и҆зба́ви на́съ ѿ всѧ́кагѡ ѕла̀.
Конда́къ, гла́съ д҃:
Па́стырей нача́льникꙋ хрⷭ҇тꙋ̀ трꙋди́лсѧ є҆сѝ, ст҃и́телю ѳеодо́сїе, на па́жити дх҃о́внѣй словє́сныѧ твоѧ̑ ѻ҆́вцы пита́ѧ, и҆ цѣле́бенъ да́ръ ѿ хрⷭ҇та̀ сп҃са прїѧ́лъ є҆сѝ, во є҆́же не́мѡщи дꙋшє́вныѧ и҆ тѣлє́сныѧ цѣли́ти всѣ́хъ, съ вѣ́рою къ цѣлє́бнымъ твои̑мъ моще́мъ приходѧ́щихъ. тѣ́мже и҆ ны́нѣ, ст҃е, моли́сѧ, всѣ̑мъ и҆́мѧ твоѐ призыва́ющымъ ѿ навѣ́тѡвъ вра́жїихъ сп҃сти́сѧ, и҆ поми́ловатисѧ дꙋша́мъ на́шымъ.
І҆́косъ:
Да́ръ бж҃їй вои́стиннꙋ ꙗ҆ви́лсѧ є҆сѝ землѝ рѡссі́йстѣй, ст҃е ѳеодо́сїе: ѿ ю҆́ности бо себѐ бг҃ꙋ возложи́въ, по́двигомъ до́брымъ до конца̀ подвиза́лсѧ є҆сѝ, и҆ дарова̑нїѧ вє́лїѧ прїѧ́лъ є҆сѝ, бл҃года́ти сосꙋ́дъ бы́въ и҆збра́нный: тѣ́мже ꙗ҆́кѡ въ житїѝ твое́мъ, та́кѡ наипа́че по бл҃же́ннѣмъ ᲂу҆спе́нїи, предстоѧ̀ прⷭ҇то́лꙋ прест҃ы́ѧ трⷪ҇цы, со дерзнове́нїемъ воздѣ́еши преподѡ́бныѧ твоѧ̑ рꙋ́цѣ, ѡ҆ па́ствѣ твое́й и҆ ѡ҆ все́й землѝ рѡссі́йстѣй те́плѣ молѧ́сѧ. сегѡ̀ ра́ди съ вѣ́рою и҆ любо́вїю къ тебѣ̀ притека́юще, всѝ скорбѧ̑щїи неѡскꙋ́днѡ ᲂу҆тѣше́нїе прїе́млютъ, и҆ болѧ́щїи и҆сцѣле́нїй сподоблѧ́ютсѧ. съ ни́миже и҆ мы̀ тебѣ̀, ꙗ҆́кѡ чадолюби́вомꙋ ѻ҆тцꙋ̀, взыва́емъ: молѝ, ст҃е, ѡ҆ призыва́ющихъ и҆́мѧ твоѐ, ѿ навѣ́тѡвъ вра́жїихъ сп҃сти́сѧ дꙋша́мъ на́шымъ.
Пѣ́снь з҃.
І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
При́снѡ поꙋча́ѧсѧ па́мѧти сме́ртнѣй, непреста́ннѡ жела́лъ є҆сѝ крⷭ҇тъ гдⷭ҇ень пред̾ ѻ҆чесы̀ твои́ми держа́ти, є҆гѡ́же воѡбраже́нїе и҆ въ пꙋтѝ неразлꙋ́чнѡ пред̾ тобо́ю пребыва́ше, во є҆́же всегда̀ ѿ се́рдца взыва́ти ко гдⷭ҇ꙋ: бл҃гослове́нъ є҆сѝ, гдⷭ҇и бж҃е, во вѣ́ки.
И҆ по сме́рти, ꙗ҆́кѡ жи́въ сы́й, бл҃года́тїю бж҃їею, съ ча́ды твои́ми пребыва́еши, и҆ по преставле́нїи твое́мъ па́стырь до́брый тѣ́мъ ꙗ҆влѧ́ешисѧ, ѻ҆́тче ѳеодо́сїе, въ со́нныхъ видѣ́нїихъ невѣ́дꙋщыѧ въ вѣ́рѣ наставлѧ́ѧ и҆ всѣ́хъ вопи́ти наꙋча́ѧ: бл҃гослове́нъ є҆сѝ, гдⷭ҇и бж҃е, во вѣ́ки.
Въ цр҃ковь бж҃їю ходи́ти и҆ моли́тисѧ болѧ́щемꙋ и҆́нокꙋ повелѣ́лъ є҆сѝ, ѻ҆́тче ѳеодо́сїе, во снѣ̀ томꙋ̀ предста́въ, и҆ ѻ҆те́чески того̀ вразꙋмлѧ́ѧ, грѣхѝ є҆гѡ̀ воспомѧнꙋ́лъ є҆сѝ, къ покаѧ́нїю призыва́ѧ, и҆ и҆сцѣле́нїе томꙋ̀ по́далъ є҆сѝ, да вы́нꙋ сла́витъ гдⷭ҇а: бл҃гослове́нъ є҆сѝ, гдⷭ҇и бж҃е, во вѣ́ки.
Бг҃оро́диченъ:
Разсѣ́ѧсѧ ᲂу҆́мъ мо́й, ѡ҆дебелѣ̀ се́рдце, немоществꙋ́етъ моѐ произволе́нїе: влⷣчце бцⷣе, ᲂу҆милосе́рдисѧ ѡ҆ мнѣ̀ грѣ́шнѣмъ, и҆сцѣлѝ дꙋ́шꙋ мою̀, и҆ ꙗ҆́кѡ бл҃га́гѡ сп҃са моегѡ̀ бл҃га́ѧ мт҃и, сп҃си́ мѧ, да вы́нꙋ вопїю̀ є҆мꙋ̀: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃.
І҆рмо́съ:
А҆́гг҃ли и҆ нб҃са̀, на прⷭ҇то́лѣ сла́вы сѣдѧ́щаго, и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте и҆ превозноси́те є҆го̀ во вѣ́ки.
Кто̀ по достоѧ́нїю мо́жетъ повѣ́дати всѧ̑ чꙋдеса̀ твоѧ̑, ст҃и́телю ѳеодо́сїе; и҆ неи́щꙋщымъ тебѐ болѧ́щымъ ꙗ҆влѧ́ешисѧ вра́чь преизрѧ́дный, всѣ́хъ призыва́ѧ и҆сповѣ́дати сла́вꙋ бг҃а, прославлѧ́ющагѡ ст҃ы̑ѧ своѧ̑ и҆ превозноси́магѡ во вѣ́ки.
Стꙋжа́ємымъ ѿ дꙋхѡ́въ нечи́стыхъ застꙋ́пникъ и҆ прибѣ́жище ꙗ҆ви́лсѧ є҆сѝ, ст҃и́телю ѳеодо́сїе, прогонѧ́ѧ си́лою бж҃їею всѧ́кое дѣ́йство бѣсо́вское ѿ и҆̀же съ вѣ́рою къ моще́мъ твои̑мъ притека́ющихъ, да сла́витсѧ и҆́мѧ бж҃їе во вѣ́ки.
И҆́мѧ твоѐ, ст҃и́телю ѳеодо́сїе, ꙗ҆́кѡ мѵ́ро и҆злїѧ́нное, ꙗ҆́коже бл҃гоꙋха́нїе раѧ̀ бж҃їѧ по лицꙋ̀ всеѧ̀ землѝ рѡссі́йскїѧ ѡ҆бно́ситсѧ, ᲂу҆слажда́ѧ сердца̀ вѣ́рꙋющихъ и҆ призыва́ѧ въ ра́дости дх҃о́внѣй воспѣва́ти гдⷭ҇а, превозноси́маго во всѧ̑ вѣ́ки.
Бг҃оро́диченъ:
Не пре́зри моле́нїй ра́бъ твои́хъ, мт҃и бж҃їѧ, прїимѝ моли̑твы на́шѧ ра́ди ᲂу҆го́дника твоегѡ̀ ст҃и́телѧ ѳеодо́сїа, и҆ принесѝ ко прⷭ҇то́лꙋ сн҃а и҆ бг҃а твоегѡ̀, да сла́витсѧ и҆́мѧ є҆гѡ̀ ѿ всеѧ̀ тва́ри во вѣ́ки.
Пѣ́снь ѳ҃.
І҆рмо́съ:
Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.
Ꙗ҆́кѡ цѣли́тель премлⷭ҇тивый, ст҃е ѳеодо́сїе, не то́чїю призыва́ющымъ тѧ̀ болѧ́щымъ ми́лостивнѣ вне́млеши, но и҆ при́сныхъ и҆́хъ послꙋ́шаеши, и҆ по вѣ́рѣ тѣ́хъ ско́рый вра́чь болѧ́щымъ ꙗ҆влѧ́ешисѧ, всѣ́хъ ми́лꙋѧ и҆ ᲂу҆тѣша́ѧ, на всѣ́хъ щедрѡ́ты твоѧ̀ преиз̾ѻби́льнѣ и҆злива́ѧ.
Вои́стиннꙋ ди̑вна и҆ па́че сло́ва чꙋдеса̀ твоѧ̑, ѳеодо́сїе ѻ҆́тче на́шъ: ꙗ҆ви́лъ бо сѧ є҆сѝ сла́ва цр҃кве рѡссі́йскїѧ, правосла́вныѧ вѣ́ры нбⷭ҇ный проповѣ́дникъ, и҆́стины же свидѣ́тель непрело́жный.
Свѧ́тче бж҃їй, ᲂу҆го́дниче хрⷭ҇то́въ, млⷭ҇ти неистощи́мое сокро́вище, при́зри на не́мѡщи моѧ̑, и҆сцѣлѝ дꙋ́шꙋ мою̀, страстьмѝ ѕлѣ̀ ѡ҆бꙋрева́емꙋю, и҆сцѣлѝ и҆ тѣ́ло моѐ, не́мощьми ѡ҆бложе́нное, да просла́влю въ тебѣ̀ бл҃года́ть и҆ милосе́рдїе хрⷭ҇та̀ бг҃а, ди́внагѡ во ст҃ы́хъ свои́хъ.
Бг҃оро́диченъ:
Къ тебѣ̀, премилосе́рдаѧ мт҃и, возношꙋ̀ моѐ грѣ́шное се́рдце: пред̾ тобо́ю, бл҃года́тнаѧ, поверга́ю не́мѡщи дꙋшѝ и҆ тѣ́ла моегѡ̀: мл҃твами твои́ми застꙋпѝ и҆ поми́лꙋй мѧ̀.
Свѣти́ленъ.
Не́бо ѕвѣзда́ми ᲂу҆краси́вый, но́вꙋю ѕвѣздꙋ̀ пресвѣ́тлꙋю ꙗ҆ви́ тѧ, ст҃и́телю ѳеодо́сїе, нб҃о цр҃ко́вное ᲂу҆краша́ющꙋю и҆ мра́къ нечести́выхъ мꙋдрова́нїй разгонѧ́ющꙋю. тѣ́мже и҆ на̑ша сердца̀, грѣхо́мъ ѡ҆мрачє́ннаѧ, просвѣтѝ, и҆ къ покаѧ́нїю мл҃твами твои́ми, прпⷣбне, наста́ви.
Бг҃оро́диченъ:
Зарю̀ пресвѣ́тлꙋю, ꙗ҆влѧ́ющꙋю на́мъ сл҃нце незаходи́мое, вѣ́мы тѧ̀, прест҃а́ѧ дв҃о бцⷣе. сегѡ̀ ра́ди мо́лимъ тѧ̀: ꙗ҆́кѡ мт҃и свѣ́та сꙋ́щи, просвѣтѝ на́съ свѣ́томъ сн҃а твоегѡ̀, хрⷭ҇та̀ бг҃а на́шегѡ.