Канон собору святых Брянской митрополии

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми, дре́внїй пѣшеше́ствовавъ і҆и҃ль, крⷭ҇тоѡбра́зныма мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Землѝ брѧ́нскїѧ прозѧбє́нїѧ, цр҃ковїю правосла́вною воспита̑нныѧ, во бл҃гоче́стїи просїѧ́вшыѧ бжⷭ҇твєнныѧ ѻ҆тцы̀ и҆ ма́тєри на́шѧ въ пѣ́снехъ дꙋхо́вныхъ согла́снѡ воспои́мъ.

Сщ҃енномч҃нка кꙋ́кшꙋ со ᲂу҆ченико́мъ є҆гѡ̀ ні́кѡномъ восхва́лимъ, зе́млю брѧ́нскꙋю про́повѣдїю є҆ѵⷢ҇лїа просвѣти́вшыѧ и҆ ны́нѣ кꙋ́пнѡ ст҃ѣ́й трⷪ҇цѣ предстоѧ́щыѧ.

Сла́вꙋ кнѧже́нїѧ и҆ ѻ҆те́чество хрⷭ҇та̀ ра́ди ѡ҆ста́вивъ, прпⷣбне ѻ҆́тче на́шъ нїко́ло, свѧто́ша и҆менꙋ́емый, вѣ́чное црⷭ҇тво и҆ сла́вꙋ на нб҃сѝ прїѧ́лъ є҆сѝ, и҆дѣ́же ликꙋ́ѧ, помина́й вѣ́рою чтꙋ́щихъ тѧ̀.

Бг҃оро́диченъ: Ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, и҆ ст҃ѣ́й рꙋсѝ застꙋ́пница, къ тебѣ̀ ны́нѣ прибѣга́емъ, тѧ̀ на мл҃твꙋ призыва́емъ, да и҆зба́виши на́съ ѿ врагѡ́въ на́шихъ.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѣ̀, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Оу҆бі́йцъ жестосе́рдыхъ, неѕло́бивѡ мꙋ̑ки претерпѣ́въ, побѣди́тель ꙗ҆ви́лсѧ є҆сѝ, кнѧ́же и҆́горю, тѣ́мже бл҃года́ть стѧжа́лъ є҆сѝ ѿ междоꙋсо́бныѧ бра́ни и҆збавлѧ́ти.

Прїиди́те, воспои́мъ мч҃нка мїхаи́ла, кнѧ́зѧ черни́говскагѡ, съ болѧ́риномъ вѣ́рнымъ ѳео́дѡромъ, и҆сповѣ́данїѧ вѣнцы̑ ᲂу҆краси́вшихсѧ.

Нбⷭ҇ное црⷭ҇тво воспрїи́мъ трꙋда́ми и҆ мл҃твами, ѳео́дѡре, кнѧ́же смоле́нскїй, ѻ҆рꙋ́жїемъ мл҃твъ твои́хъ и҆ ны́нѣ ѻ҆те́чество на́ше ѡ҆хранѧ́й.

Бг҃оро́диченъ: И҆́мамы ѻ҆́бразъ тво́й, бл҃га́ѧ ѻ҆диги́трїе, въ чꙋ́бковичахъ сїѧ́ющїй, зна́менїе млⷭ҇ти твоеѧ̀ и҆ въ ско́рбехъ ᲂу҆тѣше́нїе, и҆ чꙋде́съ и҆сто́чникъ, пречⷭ҇таѧ.

Сѣда́ленъ, гла́съ з҃:

Нощнѣ́й тьмѣ̀ ѡ҆гꙋстѣва́ющей, ᲂу҆множа́етсѧ ѕвѣ́здное блиста́нїе, и҆ къ томꙋ̀ ѻ҆́чи заблꙋ́ждшихъ ра́достнѡ возво́дѧтсѧ. та́кѡ и҆ ᲂу҆мно́жившейсѧ на землѝ тьмѣ̀ грѣхо́внѣй, возведе́мъ горѣ̀ ѻ҆́чи на́ши, бра́тїе, и҆ сїѧ́нїе дꙋхо́вныхъ ѕвѣ́здъ, зе́млю на́шꙋ ѡ҆зарѧ́ющихъ, ᲂу҆зрѣ́вше, къ нбⷭ҇номꙋ ѻ҆те́чествꙋ потщи́мсѧ, є҆гѡ́же да не лиши́тъ гдⷭ҇ь на́съ грѣ́шныхъ, мл҃твами ст҃ы́хъ свои́хъ.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце првⷣное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Кі́ими словесы̀ просла́вимъ кн҃зи бл҃говѣ̑рныѧ, и҆̀же бл҃гоче́стїемъ и҆ вѣ́рою просїѧ́вше, зе́млю брѧ́нскꙋю до́брѣ ᲂу҆пра́виша и҆ ѻ҆би́тельми и҆́ноческими ᲂу҆краси́ша.

И҆зше́лъ є҆сѝ, ꙗ҆́кѡ во́инъ хрⷭ҇то́въ, на врагѝ неви̑димыѧ, прпⷣбне кнѧ́же ѻ҆ле́же, и҆ во ѻ҆би́тели, тобо́ю созда́ннѣй, до́брѣ подвиза́всѧ, на́мъ мо́щи твоѧ̀ ст҃ы́ѧ ѡ҆ста́вилъ є҆сѝ.

Ѕвѣздꙋ̀ сꙋ́ждальскꙋю, ѿ черни́гова возсїѧ́вшꙋю, невѣ́стꙋ хрⷭ҇то́вꙋ, и҆́нокинѧмъ наста́вницꙋ, є҆ѵфросѵ́нїю прпⷣбнꙋю любо́вїю да ᲂу҆бл҃жи́мъ.

Бг҃оро́диченъ: є҆гда̀ ѡ҆быдо́ша гра́дъ брѧ́нск сꙋпоста́ты, тогда̀ бл҃года́тїю Све́нскаго твоегѡ̀ ѻ҆́браза, пречⷭ҇таѧ, тѣ́хъ вспѧ́ть ѡ҆брати́ла є҆сѝ и҆ мнѡ́гаѧ и҆́на чꙋдеса̀ ѿ і҆кѡ́ны своеѧ̀ ꙗ҆ви́ла є҆сѝ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆з̾ мра́чна невѣ́дѣнїѧ вѣ́рою воспѣва́ющыѧ тѧ̀.

Молѝ бг҃а ѡ҆ на́съ, ст҃и́телю ѳеогнѡ́сте, моско́вскїй чꙋдотво́рче, мꙋ́дрость со бл҃гоче́стїемъ въ житїѝ сочета́вый и҆ бл҃гослове́нїе своѐ землѝ брѧ́нской дарова́вый.

Любвѐ и҆ смире́нїѧ сокро́вище, по́двигѡвъ и҆́ноческихъ зерца́ло, пра́вило вѣ́ры и҆ бл҃гоче́стїѧ ꙗ҆ви́лсѧ є҆сѝ, ст҃и́телю ѳеодо́сїе черни́говскїй, тѣ́мже бг҃ъ тѧ̀ ди́внымъ нетлѣ́нїемъ и҆ чꙋдесы̀ моще́й твои́хъ просла́ви.

І҆ѡа́нна, ст҃и́телѧ тобо́льскагѡ, ᲂу҆се́рднѡ воспои́мъ, то́й бо ѿ све́нскїѧ ѻ҆би́тели и҆зше́дъ, сиби́рскїѧ страны̀ свѣти́льникъ ꙗ҆ви́сѧ и҆ а҆пⷭ҇льскою ре́вностїю и҆ млⷭ҇рдїемъ къ стра́ждꙋщымъ просла́висѧ.

Бг҃оро́диченъ: Балы́кинскою и҆ молче́нскою, и҆ чо́лнскою і҆кѡ́нами твои́ми предѣ́лы брѧ́нскїѧ ѡ҆сщ҃а́еши, пречⷭ҇таѧ, и҆ по́мощь неѡскꙋ́днꙋю притека́ющымъ къ ни̑мъ при́снѡ и҆сточа́еши.

Пѣ́снь ѕ҃.

І҆рмо́съ: Пожрꙋ̀ тѝ со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди млⷭ҇ти ѿ ре́бръ твои́хъ и҆сте́кшею кро́вїю.

Ра́тниче дерзнове́нный бра́ни кꙋлико́вскїѧ, и҆гꙋ́мена землѝ рꙋ́сскїѧ послꙋ́шниче смире́нный, а҆леѯа́ндре пересвѣ́те, страда́льче мꙋ́жественный, брѧ́нскꙋю зе́млю, ѻ҆те́чество твоѐ, застꙋпа́й.

Ꙗ҆́кѡ свѣти́льникъ ди́вный въ де́бри брѧ́нской ꙗ҆ви́лсѧ є҆сѝ, прпⷣбне полѷка́рпе, мꙋдрова́нїе бо и҆ сла́вꙋ мїрскꙋ́ю презрѣ́въ, бжⷭ҇твєннымъ за́повѣдемъ нелѣ́ностнѣ послѣ́довалъ є҆сѝ.

Несꙋмнѣ́ннѡ всѧ̀ кра̑снаѧ мі́ра сегѡ̀ ѡ҆ста́вилъ є҆сѝ, прпⷣбне полѷка́рпе, поще́нїемъ и҆ слеза́ми, мл҃твами и҆ пѣ́сньми ᲂу҆стремлѧ́ѧсѧ къ бг҃ꙋ, и҆ ѻ҆би́тель и҆́ноческꙋю во и҆́мѧ сп҃са на́шегѡ во гра́дѣ брѧ́нскѣ созда́лъ є҆сѝ.

Бг҃оро́диченъ: Спорꙋ́чнице грѣ́шныхъ, всепѣ́таѧ влⷣчце, і҆кѡ́нꙋ твою̀ въ ѻ҆́дриной ѻ҆би́тели чꙋдесы̀ просла́вившаѧ, ꙗ҆́кѡ мт҃и бж҃їѧ, ᲂу҆молѝ твои́ми мл҃твами и҆зба́вителѧ всѣ́хъ, да сп҃се́тъ дꙋ́шы на́шѧ.

Конда́къ, гла́съ в҃:

Застꙋ̑пницы те́плїи брѧ́нскїѧ землѝ, ст҃і́и срѡ́дницы на́ши, кꙋ́пнѡ съ прест҃о́ю бцⷣею и҆ всѣ́ми ст҃ы́ми прⷭ҇то́лꙋ бж҃їю ны́нѣ предстоѧ́ще, мл҃твами ва́шими правосла́вїе ᲂу҆тверди́те, є҆́рєси и҆ раско́лы разори́те, ѻ҆те́чествꙋ на́шемꙋ ми́ръ и҆ дꙋша́мъ на́шымъ полє́знаѧ и҆спроси́те.

І҆́косъ:

Є҆де́мскагѡ раѧ̀ древеса̀ доброплѡ́днаѧ и҆ кра̑снаѧ ꙗ҆ви́шасѧ, ст҃і́и, цвѣ́ты бл҃говѡ́нныѧ ᲂу҆че́нїй и҆ плоды̑ дѣ́лъ творѧ́щїи, ѿ ни́хже дꙋ́шы на́шѧ пита́ютсѧ и҆ гла́дъ на́шъ дꙋхо́вный ᲂу҆толѧ́етсѧ, прїиди́те ᲂу҆̀бо, притеце́мъ под̾ сѣ́нь и҆́хъ и҆ ᲂу҆бл҃жи́мъ, ꙗ҆́кѡ землѝ брѧ́нскїѧ ѿра́дꙋ и҆ ᲂу҆краше́нїе, ѻ҆́бразъ житїѧ̀ и҆ начерта́нїе, и҆ къ ни́мъ съ любо́вїю возопїи́мъ: ѽ бл҃же́ннїи срѡ́дницы на́ши, мл҃твами ва́шими правосла́вїе ᲂу҆тверди́те, є҆́рєси и҆ раско́лы разори́те, ѻ҆те́чествꙋ на́шемꙋ ми́ръ и҆ дꙋша́мъ на́шымъ полє́знаѧ и҆спроси́те.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю бл҃гоче́стїѧ па́че, не́жели пла́менемъ ѡ҆палѧ́еми взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Крⷭ҇ти́телю і҆ѡа́ннꙋ ре́вностїю ᲂу҆подо́билсѧ є҆сѝ, ѳео́дѡре прпⷣбне, ѿ ю҆́ности бг҃ꙋ ᲂу҆годи́въ и҆ скѡ́рби є҆гѡ̀ ра́ди претерпѣ́въ, ѻ҆би́тели площа́нскїѧ воспита́нїе и҆ санаѯа́рскагѡ вертогра́да и҆́ноческагѡ похвало̀, молѝ сп҃сти́сѧ на́мъ.

И҆́мамы прпⷣбныхъ васїлі́ска сїби́рскагѡ и҆ ᲂу҆ченика̀ є҆гѡ̀ зѡсі́мꙋ верхо́вскаго, въ брѧ́нскихъ де́брехъ нача́ло по́двигѡвъ положи́вшихъ, ꙗ҆́кѡ ѻ҆́бразъ послꙋша́нїѧ и҆ пꙋстыннолю́бїѧ, и҆ ѡ҆ сп҃се́нїи бли́жнихъ попече́нїѧ.

Ꙗ҆ви́стесѧ наро́да бж҃їѧ печа̑льницы до́блїи, прпⷣбнїи ста́рцы ѻ҆́птинстїи львѐ, мака́рїе и҆ мѡѷсе́е, въ ѻ҆би́телехъ брѧ́нскихъ подвиза́вшїисѧ, и҆ на́съ на пꙋ́ть покаѧ́нїѧ, смире́нїѧ и҆ терпѣ́нїѧ наста́вите.

Бг҃оро́диченъ: Влⷣчце бцⷣе, цѣльбоно́сною твое́ю і҆кѡ́ною, троерꙋ́чицею и҆менꙋ́емою, пꙋ́стынь бѣлобере́жскꙋю ᲂу҆краси́вшаѧ, прострѝ всемо́щнꙋю твою̀ рꙋ́кꙋ на по́мощь правосла́внѡ тѧ̀ велича́ющымъ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, бл҃гоче́стїѧ рачи́тєли ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Є҆гѡ́же носи́лъ є҆сѝ въ се́рдцѣ твое́мъ, сло́ва хрⷭ҇та̀ бг҃а, молѝ за ны̀, ст҃и́телю і҆гна́тїе бг҃омꙋ́дре, правосла́вїѧ побо́рниче, покаѧ́нїѧ и҆ мл҃твы наста́вниче, а҆рхїере́євъ ᲂу҆краше́нїе и҆ мона́шествꙋющихъ похвало̀.

Ра́дꙋйтесѧ, сщ҃енномч҃нцы сла́внїи а҆леѯа́ндре, і҆ѡа́нне, митрофа́не, а҆леѯі́е и҆ корни́лїе, во дни̑ гоне́нїй безбо́жныхъ вѣ́рꙋ соблю́дшїи и҆ да́же до кро́ве хрⷭ҇та̀ ра́ди пострада́вшїи.

А҆рхїпа̑стыри землѝ ѻ҆рло́вскїѧ, мч҃нческою кро́вїю ᲂу҆кра́шенныѧ, согла́снѡ воспои́мъ: серафі́ма митрополі́та, прославле́нїю саро́вскагѡ чꙋдотво́рца послꙋжи́вшаго, и҆ дрꙋга́гѡ серафі́ма добропобѣ́днаго, и҆ до́блѧго мака́рїа.

Бг҃оро́диченъ: Ю҆́же воспѣва́ютъ а҆́гг҃ли, просла́вимъ ны́нѣ застꙋ́пницꙋ ᲂу҆се́рднꙋю, і҆кѡ́нꙋ свою̀ ѻ҆би́тели площа́нской и҆ все́й землѝ брѧ́нской въ покро́въ и҆ ѡ҆гражде́нїе дарова́вшꙋю.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Чтⷭ҇ны̑ѧ і҆ера́рхи, стародꙋ́ба сла́вꙋ, дамаскина̀ ре́вностнаго, за хрⷭ҇та̀ сме́рть прїе́мшаго, и҆ кро́ткаго нїкола́ѧ, въ каза́хской землѝ и҆сповѣ́дническїй пꙋ́ть сконча́вшаго, мл҃твенники ѡ҆ на́съ ко сп҃сꙋ приво́димъ.

Тве́рдѡ правосла́внꙋю вѣ́рꙋ ꙗ҆́кѡ щи́тъ держа́ще, ст҃і́и стрⷭ҇тоте́рпцы землѝ брѧ́нскїѧ, ѕло́бꙋ лю́тыхъ ѿстꙋ́пникѡвъ и҆ безбо́жныхъ на́глое неи́стовство препобѣди́ли є҆стѐ и҆ на́мъ ѻ҆́бразъ терпѣ́нїѧ и҆ ѕлострада́нїѧ ꙗ҆ви́ли є҆стѐ.

И҆менова́ннїи и҆ безыме́ннїи, ꙗ҆вле́ннїи и҆ неѧвле́ннїи, ст҃і́и срѡ́дницы на́ши, сла́вꙋ мно́гꙋ ѿ бг҃а прїи́мшїи, ᲂу҆твержде́нїе въ правосла́вїи и҆ ми́ръ ѻ҆те́чествꙋ на́шемꙋ и҆спроси́те и҆ сп҃се́нїе дꙋша́мъ на́шымъ.

Бг҃оро́диченъ: Мт҃и бж҃їѧ пречⷭ҇таѧ, гра́ды и҆ вє́си землѝ брѧ́нскїѧ чтⷭ҇на́гѡ ли́ка твоегѡ̀ и҆з̾ѡбраже́нїи млⷭ҇тивнѡ ѡ҆богати́вшаѧ, бл҃годаре́нїе на́ше прїимѝ и҆ ѿ всѧ́кагѡ ѕла̀ покры́й ѻ҆те́чество на́ше.

Свѣти́ленъ:

Въ пѣ́снехъ восхва́лимъ свѣти̑ла незаходи̑маѧ брѧ́нскїѧ землѝ, таи́нники бжⷭ҇твеннагѡ сло́ва, хрⷭ҇та̀ сла́вѧще, си́хъ просвѣти́вшаго и҆ возлюби́вшаго, и҆ помо́щники на́мъ въ ско́рбехъ дарова́вшаго.