Канон собору новомучеников и исповедников Церкви Русской

Пѣ́снь а҃.

І҆рмо́съ: Сѣ́ченое сѣче́тсѧ мо́ре чермно́е, волнопита́емаѧ же и҆зсꙋша́етсѧ глꙋбина̀: та́ѧжде кꙋ́пнѡ без̾ѻрꙋ̑жнымъ бы́вши проходи́ма и҆ всеѻрꙋ̑жнымъ гро́бъ. пѣ́снь же бг҃окра́снаѧ воспѣва́шесѧ: сла́внѡ просла́висѧ хрⷭ҇то́съ бг҃ъ на́шъ.

Гдⷭ҇и, бж҃е на́шъ, при́снѡ прославлѧ́ѧй всѧ̑ ст҃ы̑ѧ, ны́нѣ и҆ на́съ, недосто́йныхъ, сподо́би сыно́внѣ просла́вити ст҃ы́хъ сро́дникѡвъ на́шихъ, новомч҃нкѡвъ и҆ и҆сповѣ́дникѡвъ рѡссі́йскихъ.

Кровьмѝ ва́шими, сщ҃енномч҃нцы, ꙗ҆́кѡ въ чермнѣ́мъ мо́ри, потопи́ли є҆стѐ безбѡ́жныѧ мꙋчи́тєли, цр҃ковь же рꙋ́сскаѧ, ва́ми красѧ́щисѧ, похвалы̑ побѣ̑дныѧ, ꙗ҆́кѡ землѧ̀ ѡ҆бѣтова́ннаѧ ме́дъ и҆ млеко̀, ва́мъ и҆сточа́етъ.

Є҆гда̀ даде́сѧ ва́мъ бл҃года́ть не то́чїю во хрⷭ҇та̀ вѣ́ровати, но и҆ по не́мъ страда́ти, немо́креннѡ пꙋчи́нꙋ кро́вныхъ мꙋ́къ проидо́сте, ст҃і́и мч҃нцы, вѣ̑рнымъ сыновѡ́мъ рѡссі̑йскимъ ѻ҆́бразъ ꙗ҆́вльше, и҆ со дерзнове́ннымъ и҆сповѣ́данїемъ во врата̀ нбⷭ҇наѧ внидо́сте.

Бг҃оро́диченъ: Прїимѝ пѣ́снь хвале́бнꙋю, ѿ недосто́йныхъ ᲂу҆́стъ возноси́мꙋю, препросла́вленнаѧ мт҃и бж҃їѧ.

Пѣ́снь г҃.

І҆рмо́съ: Гдⷭ҇ь сы́й всѣ́хъ и҆ зижди́тель, бг҃ъ созда́нное безстра́стный ѡ҆бнища́въ себѣ̀ соединѝ, и҆ па́сха за ꙗ҆̀же хотѧ́ше ᲂу҆мре́ти са́мъ сы́й, себѐ предпожрѐ: ꙗ҆ди́те, вопїѧ̀, тѣ́ло моѐ и҆ вѣ́рою ᲂу҆тверди́тесѧ.

Є҆гда̀ бꙋ́рѧ нече́стїѧ на цр҃ковь рꙋ́сскꙋю воздви́жесѧ, вы̀, ст҃і́и новомч҃нцы, страда́ньми ва́шими со тща́нїемъ ᲂу҆кроти́сте ю҆̀ и҆ пѡ́двиги ва́шими правосла́вїе ᲂу҆тверди́сте.

Мꙋ̑ки вє́лїѧ за цр҃ковь хрⷭ҇то́вꙋ претерпѣ́сте, ст҃і́и новомч҃нцы, моли́те ᲂу҆тверди́тисѧ є҆́й незы́блемѣй и҆ непоколеби́мѣй до сконча́нїѧ вѣ́ка.

Страда́ньми и҆ и҆сповѣ́данїемъ хрⷭ҇та̀, ст҃і́и срѡ́дницы на́ши, вше́дше въ нбⷭ҇наѧ селє́нїѧ, ꙗ҆́кѡ дре́вле і҆и҃ль въ зе́млю ѡ҆бѣтова́ннꙋю, ѻ҆те́чество ва́ше земно́е, рꙋ́сь ст҃ꙋ́ю, въ любвѝ сохранѧ́йте мл҃твами ва́шими.

Бг҃оро́диченъ: Нбⷭ҇ныхъ крꙋгѡ́въ вы́шшаѧ и҆ сла́вою бжⷭ҇твенною преꙋкраше́ннаѧ, дв҃о мт҃и бж҃їѧ, сп҃сѝ дꙋ́шы на́шѧ.

Сѣда́ленъ, гла́съ в҃:

Но́вїи стрⷭ҇тоте́рпцы рѡссі́йстїи, мч҃нчески по́прище земно́е сконча́вшїи и҆ страда́ньми дерзнове́нїе ко гдⷭ҇ꙋ прїѡбрѣ́тшїи, моли́тесѧ є҆мꙋ̀, ва́съ ᲂу҆крѣ́пльшемꙋ, да и҆ мы̀, є҆гда̀ на́йдетъ на ны̀ и҆спыта́нїѧ ча́съ, мꙋ́жества да́ръ бж҃їй воспрїи́мемъ.

Сла́ва, и҆ ны́нѣ: Не премолчи́мъ при́снѡ, бцⷣе дв҃о, бл҃года́рственнѡ воспѣва́ти ѿ се́рдца твоѧ̑ млⷭ҇ти, влⷣчце, рабѝ твоѝ вопїю́ще и҆ глаго́люще: прест҃а́ѧ дв҃о, предварѝ, и҆ и҆зба́ви на́съ ѿ вра̑гъ ви́димыхъ и҆ неви́димыхъ, и҆ ѿ нꙋ́жды и҆ всѧ́кагѡ преще́нїѧ, ты́ бо є҆сѝ на́ше застꙋпле́нїе.

Пѣ́снь д҃.

І҆рмо́съ: Прови́дѣвъ прⷪ҇ро́къ та́йнꙋ твою̀ неизрече́ннꙋю, хрⷭ҇тѐ, провозгласѝ: положи́лъ є҆сѝ тве́рдꙋю любо́вь крѣ́пости, ѻ҆́ч҃е ще́дрый, є҆диноро́днаго бо сн҃а, бл҃гі́й, ѡ҆чище́нїе въ мі́ръ посла́лъ є҆сѝ.

Всѣ̑мъ концє́мъ землѝ ꙗ҆ви́сѧ чꙋ́до смотре́нїѧ твоегѡ̀, влⷣко, кро́вїю бо новомч҃нкъ, ꙗ҆́кѡ водо́ю, ᲂу҆гаси́лъ є҆сѝ въ рѡссі́йстѣй землѝ пла́мень нече́стїѧ и҆ развраще́нїѧ и҆ сп҃слъ є҆сѝ лю́ди твоѧ̑.

Сла́вꙋ бж҃їю ᲂу҆наслѣ́довасте, новомч҃нцы, просїѧ́вшїи въ землѝ на́шей, ѿве́ргшесѧ бо себє̀ и҆ стра́хъ сме́ртный препобѣди́вше, любо́вь къ бг҃ꙋ да́же до сме́рти мꙋ́жественнѣ сохрани́ли є҆стѐ.

По́двигомъ до́брымъ подвиза́вшїисѧ, ст҃і́и новомч҃нцы рѡссі́йстїи, къ покаѧ́нїю и҆ добродѣ́тельномꙋ житїю̀ подви́гните на́съ, да и҆ мы̀ ва́шими мл҃твами сподо́бимсѧ прославлѧ́ти гдⷭ҇а во црⷭ҇твїи є҆гѡ̀.

Бг҃оро́диченъ: На тво́й надѣ́ющесѧ покро́въ, мт҃и бж҃їѧ, со ст҃ы́ми новомч҃нки и҆ и҆сповѣ̑дники рѡссі́йскими прославлѧ́емъ млⷭ҇рдїе твоѐ.

Пѣ́снь є҃.

І҆рмо́съ: Сою́зомъ любвѐ свѧзꙋ́еми а҆пⷭ҇ли, влⷣчествꙋющемꙋ всѣ́ми себѐ хрⷭ҇тꙋ̀ возло́жше, кра̑сны но́ги ѡ҆чища́хꙋ, бл҃говѣствꙋ́юще всѣ̑мъ ми́ръ.

Дерзнове́ннѡ, ст҃і́и, и҆сповѣ́дали є҆стѐ гдⷭ҇а пред̾ ѿстꙋ̑пники и҆ гони́тєли: съ на́ми бг҃ъ, взыва́юще, разꙋмѣ́йте и҆ покарѧ́йтесѧ, стра́ха ва́шегѡ не ᲂу҆бои́мсѧ, нижѐ смꙋти́мсѧ, ꙗ҆́кѡ съ на́ми бг҃ъ.

Оу҆врачꙋ́йте мл҃твами ва́шими, ст҃і́и новомч҃нцы рѡссі́йстїи, лю́ди бг҃обѡ́рныѧ, враждо́ю и҆ ᲂу҆бі́йствы ды́шꙋщыѧ, и҆ ми́ръ странѣ̀ на́шей и҆ вѣ̑рнымъ лю́демъ да́рꙋйте.

Предстоѧ́ще хрⷭ҇тꙋ̀, вла́сть и҆мꙋ́щꙋ сꙋди́ти всемꙋ̀ мі́рꙋ, ст҃і́и новомч҃нцы и҆ и҆сповѣ̑дницы рѡссі́йстїи, ѡ҆чи́стите на́съ ѿ грѣхѡ́въ на́шихъ мл҃твами ва́шими, да не съ мі́ромъ ѡ҆сꙋжде́ни бꙋ́демъ.

Бг҃оро́диченъ: Водворѧ́етъ ны̀ ѕмі́й во ю҆до́ль пла́ча и҆ ча́ѧнїѧ ѕлы́хъ, не мо́жемъ терпѣ́ти ско́рби своеѧ̀, взыва́хꙋ новомч҃нцы, ты́ же, бг҃ороди́тельнице, просте́рла є҆сѝ и҆̀мъ покро́въ сво́й и҆ сп҃сла̀ є҆сѝ ѿ сѣте́й вра́жїихъ.

Пѣ́снь ѕ҃.

І҆рмо́съ: Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на, влⷣцѣ вопїю́ ти: ѿ тлѝ мѧ̀ возведѝ.

Во́лны безбо́жнагѡ нече́стїѧ тща́хꙋсѧ потопи́ти кора́бль цр҃кве рꙋ́сскїѧ, ты́ же, и҆́стинный ко́рмчїй, сп҃слъ є҆сѝ ше́ствꙋющыѧ на не́мъ мл҃твами стрⷭ҇тоте́рпцєвъ рѡссі́йскихъ, вопїю́щихъ: гдⷭ҇и си́лъ, и҆з̾ смертоно́сныѧ глꙋбины̀ возведѝ ны̀.

Безбо́жнїи ка́їнѡвы внꙋ́цы ст҃ы̑ни цр҃кѡ́вныѧ порꙋга́нїю и҆ ѻ҆гню̀ преда́ша, ѻ҆би́тєли разори́ша, хра́мы ꙗ҆́кѡ ѻ҆вѡ́щнаѧ храни̑лища содѣ́ѧша, хрⷭ҇толюби̑выѧ лю́ди въ темни̑цы заключи́ша и҆ ᲂу҆мꙋ́чиша. вы́ же, стрⷭ҇тоте́рпцы, съ любо́вїю ᲂу҆чи́ли є҆стѐ: сїѐ бы́сть по грѣхѡ́мъ на́шымъ, лю́дїе, пока́йтесѧ.

Оу҆вы̀ на́мъ, ᲂу҆вы̀, вопїѧ́хꙋ и҆сповѣ̑дницы рѡссі́йстїи, ви́дѧще, ꙗ҆́кѡ безꙋ́мнїи бг҃обо́рцы ст҃ы̑ни землѝ на́шеѧ разори́ша, ѻ҆би́тєли ꙗ҆́кѡ ᲂу҆зи̑лища темни̑чнаѧ содѣ́ѧша, хра́мы бж҃їѧ въ сквє́рнаѧ и҆ позѡ́рищнаѧ мѣста̀ ѡ҆брати́ша и҆ кро́вь хрⷭ҇тїа́нскꙋю въ ни́хъ пролїѧ́ша. сегѡ̀ ра́ди ѡ҆пꙋстоши́шасѧ сердца̀ нечести́выхъ и҆ живо́тъ и҆́хъ а҆́дꙋ прибли́жисѧ.

Бг҃оро́диченъ: И҆зведѝ на́съ и҆з̾ ро́ва поги́бели и҆ ᲂу҆врачꙋ́й на́шѧ грѣхѡ́вныѧ ꙗ҆́звы, прест҃а́ѧ мт҃и дв҃о, да неѡсꙋжде́ннѡ сподо́бимсѧ при́снѡ прославлѧ́ти новомч҃нки сн҃а твоегѡ̀ и҆ бг҃а на́шегѡ.

Конда́къ, гла́съ г҃.

Дне́сь новомч҃нцы рѡссі́йстїи въ ри́захъ бѣ́лыхъ предстоѧ́тъ а҆́гнцꙋ бж҃їю и҆ со а҆́гг҃лы пѣ́снь побѣ́днꙋю воспѣва́ютъ бг҃ꙋ: бл҃гослове́нїе, и҆ сла́ва, и҆ премꙋ́дрость, и҆ хвала̀, и҆ че́сть, и҆ си́ла, и҆ крѣ́пость на́шемꙋ бг҃ꙋ во вѣ́ки вѣкѡ́въ. а҆ми́нь.

І҆́косъ:

Кра́сный ли́че, свѣтоза́рнїи и҆ бжⷭ҇твеннїи свѣти́льницы, свѣ́тꙋ вели́комꙋ предстоѧ́ще при́снѡ, бг҃обл҃же́ннїи мч҃нцы, и҆ ѿтꙋ́дꙋ и҆спꙋща́емыми невече́рнѧгѡ бжⷭ҇тва̀ сїѧ̑нїи, всегда̀ просвѣща́еми и҆ ѡ҆божа́еми, вѣ́рою па́мѧть ва́шꙋ соверша́ющыѧ бжⷭ҇твеннꙋю просвѣти́те, и҆ ѡ҆мраче́нїѧ и҆ страсте́й и҆ бѣ́дъ и҆ ѕло́бы и҆зба́вите, молѧ́щесѧ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Ѻ҆́троцы въ вавѷлѡ́нѣ дре́вле, ꙗ҆́кѡ ѡ҆снова́нїе, новомч҃нцы же рѡссі́йстїи ны́нѣ, ꙗ҆́кѡ ᲂу҆вѣнча́нїе, съ ли̑ки стрⷭ҇тоте́рпєцъ при́снѡ взыва́ютъ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, новомч҃нцы же рѡссі́йстїи, тѣ̑мъ подража́юще, гонє́нїѧ безбо́жныхъ въ ничто́же вмѣни́ша, тѣ́мже ны́нѣ согла́снѡ съ ни́ми воспѣва́ютъ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Дне́сь торжествꙋ́етъ цр҃ковь рꙋ́сскаѧ, ст҃і́и бо новомч҃нцы, срѡ́дницы на́ши, къ ликостоѧ́нїємъ ст҃ы́хъ, ѿ вѣ́ка бг҃ꙋ бл҃гоꙋгоди́вшихъ, присовокꙋпи́вшесѧ, согла́снѡ съ ни́ми воспѣва́ютъ хвале́бнꙋю пѣ́снь: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Предстоѧ́щи тѝ крⷭ҇тꙋ̀ сн҃а твоегѡ̀, бг҃омт҃и, ѻ҆рꙋ́жїе про́йде дꙋ́шꙋ твою̀, тѣ́мже и҆ попече́нїе сꙋгꙋ́бое ѡ҆ возлюби́вшихъ є҆го̀ прїѧ́ла є҆сѝ, и҆̀же тѧ̀ сыно́внѣ велича́ютъ: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃.

І҆рмо́съ: За зако́ны ѻ҆те́чєскїѧ бл҃же́ннїи въ вавѷлѡ́нѣ ю҆́нѡши предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени и҆́мже не свари́шасѧ ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте, дѣла̀, и҆ превозноси́те во всѧ̑ вѣ́ки.

Зако́ны хрⷭ҇тѡ́вы возлюби́ша новомч҃нцы и҆ и҆сповѣ̑дницы рѡссі́йстїи, безбѡ́жнаѧ же повелѣ̑нїѧ ѿри́нꙋша, и҆ ре́вностїю ѡ҆ бз҃ѣ свѧзꙋ́емїи, бг҃ꙋ побѣ́днꙋю пѣ́снь воспѣва́хꙋ: да бл҃гослови́тъ гдⷭ҇а рꙋ́сь ст҃а́ѧ и҆ превозно́ситъ є҆го̀ во вѣ́ки.

Є҆гда̀ землѧ̀ рѡссі́йскаѧ тьмо́ю безбо́жїѧ и҆ ка́їновымъ ѡ҆ѕлобле́нїемъ ѡ҆б̾ѧ́та бы́сть, тогда̀ мно́зи хрⷭ҇толюби́вїи лю́дїе на гѡ́рькїѧ рабѡ́ты и҆згна́ни бы́ша и҆ гла́дъ, мра́зъ, зно́й и҆ сме́рть лю́тꙋю мꙋ́жественнѣ претерпѣ́ша, вѣ́рою же, наде́ждею и҆ любо́вїю совокꙋ́плени, досто́йнꙋю воспѣва́хꙋ пѣ́снь: да бл҃гослови́тъ гдⷭ҇а рꙋ́сь ст҃а́ѧ и҆ превозно́ситъ є҆го̀ во вѣ́ки.

А҆́гг҃лѡвъ хвалꙋ̀ и҆ новомч҃нкѡвъ славосло́вїе млⷭ҇тивнѡ прїе́млѧй, не ѿри́ни, трїѷпоста́сный бж҃е, ѿ со́нма и҆́хъ и҆ на́съ, недосто́йныхъ, но сподо́би вкꙋ́пѣ съ ни́ми воспѣва́ти: да бл҃гослови́тъ гдⷭ҇а рꙋ́сь ст҃а́ѧ и҆ превозно́ситъ є҆го̀ во вѣ́ки.

Бг҃оро́диченъ: Зрѧ́щи порꙋга́нїе ст҃а́гѡ ᲂу҆дѣ́ла своегѡ̀, скорбѧ́ше пречⷭ҇таѧ мт҃и и҆ держа́внꙋю по́мощь вѣ̑рнымъ лю́демъ простира́ше, сн҃а же своего̀ ᲂу҆се́рднѡ молѧ́ше, взыва́ющи: да бл҃гослови́тъ гдⷭ҇а рꙋ́сь ст҃а́ѧ и҆ превозно́ситъ є҆го̀ во вѣ́ки.

Пѣ́снь ѳ҃.

І҆рмо́съ: Стра́нствїѧ влⷣчнѧ и҆ безсме́ртныѧ трапе́зы на го́рнѣмъ мѣ́стѣ высо́кими ᲂу҆мы̑, вѣ́рнїи, прїиди́те, наслади́мсѧ, возше́дша сло́ва, ѿ сло́ва наꙋчи́вшесѧ, є҆го́же велича́емъ.

Безсме́ртныѧ трапе́зы и҆ жи́зни вѣ́чныѧ во црⷭ҇твїи бж҃їемъ наслажда́ютсѧ ны́нѣ новомч҃нцы и҆ и҆сповѣ̑дницы рѡссі́йстїи, и҆спо́лнисѧ бо на ни́хъ ѡ҆бѣтова́нїе гдⷭ҇не: побѣжда́ющымъ да́мъ сѣ́сти со мно́ю на прⷭ҇то́лѣ мое́мъ.

Да просла́вѧтсѧ съ ли̑ки новомч҃нкѡвъ и҆ и҆сповѣ́дникѡвъ рѡссі́йскихъ жєны̀ бг҃омꙋ̑дрыѧ землѝ на́шеѧ, ꙗ҆̀же мѷроно́сицъ воспрїе́мшѧ чи́нъ и҆ мꙋ́жески хрⷭ҇тꙋ̀ послѣ́довавшѧ, страда̑нїѧ за и҆́мѧ є҆гѡ̀ претерпѣ́ша и҆ вѣ́рнѡ ѻ҆тцє́мъ, мꙋжє́мъ и҆ бра́тїѧмъ на́шымъ, хрⷭ҇та̀ ра́ди мꙋ̑чимымъ, послꙋжи́ша. сегѡ̀ ра́ди ны́нѣ въ жи́зни вѣ́чнѣй вкꙋ́пѣ съ ни́ми трапе́зы безсме́ртныѧ наслажда́ютсѧ.

Жизнода́вче гдⷭ҇и, мл҃твами новомч҃нкѡвъ и҆ и҆сповѣ́дникѡвъ рѡссі́йскихъ ᲂу҆поко́й со всѣ́ми првⷣными вѣ̑рныѧ рабы̑ твоѧ̑, за и҆́мѧ твоѐ пострада́вшыѧ: ст҃и́тєли и҆ і҆ерє́и, мона́хи и҆ мїрскі̑ѧ, ста̑рыѧ, ю҆́ныѧ и҆ всѧ́къ во́зрастъ, и҆менꙋ́ємыѧ и҆ неименꙋ́ємыѧ, ꙗ҆́кѡ и҆́стинныѧ сы́ны и҆ дрꙋ́ги бж҃їѧ.

Бг҃оро́диченъ: Ꙗ҆́кѡ взбра́ннаѧ воево́да во́инства новомч҃нкѡвъ и҆ и҆сповѣ́дникѡвъ рѡссі́йскихъ, держа́вный покро́въ и҆ млⷭ҇тивное застꙋпле́нїе ꙗ҆ви́ла є҆сѝ, прест҃а́ѧ дв҃о, землѝ на́шей, ѡ҆пꙋстоша́емѣй ско́рбными и҆ безбо́жными наведє́нїи. сегѡ̀ ра́ди ны́нѣ мо́лимъ тѧ̀: простѝ лю́ди согрѣ́шшыѧ и҆ сохранѝ ст҃ꙋ́ю рꙋ́сь.

Свѣти́ленъ:

Ꙗ҆́кѡ ѡ҆тре́бїе мі́рꙋ бы́ша ст҃і́и новомч҃нцы и҆ и҆сповѣ̑дницы рѡссі́йстїи, ка́менїемъ побїе́ни бы́ша, претре́ни бы́ша, и҆скꙋше́ни бы́ша, ᲂу҆бі́йствомъ меча̀ ᲂу҆мро́ша, свидѣ́тельствꙋюще ѡ҆ свѣ́тѣ и҆́стиннѣмъ, і҆и҃сѣ хрⷭ҇тѣ̀, гдⷭ҇ѣ на́шемъ.