Канон собору Липецких святых

Пѣ́снь а҃.

І҆рмо́съ: Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ, ꙗ҆́кѡ просла́висѧ.

Прїиди́те, вѣ́рнїи, согла́снѡ возвели́чимъ собо́ръ ст҃ы́хъ, ѿ дре́внихъ родѡ́въ и҆ доны́нѣ въ землѝ на́шей бг҃ꙋ послꙋжи́вшихъ и҆ при́снѡ со а҆́гг҃лы того̀ воспѣва́ющихъ: ꙗ҆́кѡ просла́висѧ.

Васі́лїа, пе́рваго а҆рхїпа́стырѧ рѧза́нскаго, по вода́мъ ди́внѡ прише́дшаго, і҆ѡ́нꙋ, ѳеодѡрі́та и҆ мїсаи́ла, ѿ ꙗ҆зы̑къ ᲂу҆бїе́ннаго, фїларе́та же, гаврїи́ла и҆ меле́тїа, по́слѣжде въ рѧза́ни є҆пⷭ҇кпствовавшыѧ, ꙗ҆́кѡ ст҃и́тєли землѝ на́шеѧ дне́сь ᲂу҆бл҃жи́мъ.

Ст҃и́телю ѻ҆́тче а҆леѯі́е, моско́вскїй чꙋдотво́рче, рꙋсѝ правосла́вныѧ свѣти́льниче, гра́дъ є҆ле́цъ бл҃гослове́нїемъ твои́мъ ᲂу҆тверди́вый, ны́нѣ и҆ на́съ ѿ бѣ́дъ, скорбе́й и҆ болѣ́зней сохранѝ.

Митрофа́не, а҆рхїпа́стырю гра́да воро́нежа, па́ствѣ твое́й, царю̀ и҆ ѻ҆те́чествꙋ трꙋдолю́бнѡ слꙋжа̀, преще́нїѧ госꙋда́рева не ᲂу҆боѧ́лсѧ є҆сѝ и҆ і҆́дѡлы ᲂу҆праздни́лъ є҆сѝ, є҆ди́номꙋ бг҃ꙋ поѧ̀: ꙗ҆́кѡ просла́висѧ.

Пїтѷрі́ме, а҆́гг҃ле цр҃кве тамбо́вскїѧ и҆ ди́вный ст҃и́телю, ни́вы хрⷭ҇то́вы дѣ́лателю, ꙗ҆зы́ческихъ ѻ҆бы́чаєвъ и҆ раско́ла и҆скорени́телю, ны́нѣ тѧ̀ почита́ющымъ бл҃гослове́нїе и҆ ми́ръ подава́й.

Бг҃оро́диченъ: Прїиди́те, собери́тесѧ, правосла́внїи лю́дїе, въ пречⷭ҇тны́й хра́мъ всенепоро́чныѧ влⷣчцы и҆ возопі́йте, ᲂу҆ми́льнѡ молѧ́щесѧ, къ чⷭ҇тно́мꙋ є҆ѧ̀ ѻ҆́бразꙋ взира́юще: бцⷣе безневѣ́стнаѧ, восхвалѧ́ющыѧ тѧ̀ сп҃са́й.

Пѣ́снь г҃.

І҆рмо́съ: Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ сп҃се́нїи твое́мъ.

Тѵ́хѡне, свѣти́льниче воро́нежскїй, є҆ле́цкїй и҆ задо́нскїй, па́стырємъ наста́вникъ, си̑рымъ и҆ ᲂу҆бѡ́гимъ ѻ҆те́цъ ꙗ҆ви́лсѧ є҆сѝ, кро́тостїю а҆́гг҃льскою и҆ мл҃твою чистотꙋ̀ стѧжа́въ, ᲂу҆тѣ́шитель и҆ мл҃твенникъ бы́лъ є҆сѝ къ тебѣ̀ притека́ющымъ.

Ст҃и́телю а҆нтѡ́нїе, любомꙋ́дрїѧ и҆ смире́нїѧ ѻ҆́бразе, въ пещє́ры кі́євскїѧ, ꙗ҆́кѡ во ᲂу҆чи́лище дꙋхо́вное, ѿ мі́ра прите́къ, та́мѡ нбⷭ҇ныѧ жи́зни навы́клъ є҆сѝ, на ка́ѳедрꙋ же землѝ воро́нежскїѧ возведе́нъ, мо́щи ст҃и́телѧ митрофа́на ѡ҆брѣстѝ сподо́билсѧ є҆сѝ. съ ни́мже вкꙋ́пѣ тѧ̀ прославлѧ́емъ.

Ст҃и́тєли премꙋ́дрыѧ і҆нноке́нтїа херсѡ́нскагѡ, златоꙋ́ста цр҃кве рꙋ́сскїѧ, и҆ ѳеофа́на, затво́рника вы́шинскагѡ, бл҃гоче́стїѧ ᲂу҆чи́тєли и҆ чистоты̀, ꙗ҆́кѡ цвѣ́ты бл҃гоꙋха̑нныѧ землѝ на́шеѧ бг҃ꙋ въ мл҃твꙋ прино́симъ.

Прїиди́те, лю́дїе, прпⷣбныѧ ѻ҆тцы̀ и҆ ма́тєри на́шѧ восхва́лимъ, и҆̀же а҆́гг҃льски во пло́ти пожи́вше и҆ мл҃твами свои́ми нб҃са̀ къ землѝ приклони́вше, ны́нѣ предста́тельствꙋютъ пред̾ бг҃омъ ѡ҆ сп҃се́нїи дꙋ́шъ на́шихъ.

І҆ларїѡ́на прпⷣбнаго воспои́мъ, стра́нника на землѝ и҆ прише́льца, въ де́брехъ и҆ верте́пѣхъ скита́вшагосѧ, послѣди́ же въ затво́рѣ, въ поще́нїи и҆ слеза́хъ по всѧ̑ дни̑ бг҃ꙋ предстоѧ́вшаго и҆ ны́нѣ свѣ́томъ дарова́нїй дх҃о́вныхъ на́съ ѡ҆зарѧ́ющаго.

Бг҃оро́диченъ: Всечтⷭ҇нꙋ́ю и҆ чꙋдотво́рнꙋю і҆кѡ́нꙋ влади́мїрскꙋю, ꙗ҆́кѡ застꙋпле́нїе крѣ́пко и҆ стѣ́нꙋ нерꙋши́мꙋ, рꙋ́сстїи лю́дїе стѧжа́хомъ, тѣ́мже и҆ мо́лимъ ти сѧ, приснодв҃о, побѣ́дꙋ на врагѝ ѻ҆те́чествꙋ на́шемꙋ дарова́ти.

Сѣда́ленъ, гла́съ д҃:

И҆̀же добродѣ́телей подви̑жницы, ѿ ли́пецкїѧ землѝ возсїѧ́вше, ꙗ҆́кѡ и҆́стиннїи во́ини хрⷭ҇та̀ бг҃а, во всѧ́комъ чи́нѣ и҆ всѧ́кимъ по́двигомъ томꙋ̀ ᲂу҆годи́вше, дх҃а ст҃а́гѡ сосꙋ́ди чтⷭ҇ні́и ꙗ҆ви́стѣсѧ, є҆гѡ́же дѣ́йствїемъ свѣ́тлѡ ᲂу҆кра́шени, вѣ̑рныѧ ко сп҃се́нїю наставлѧ́ете, но ꙗ҆́кѡ и҆мꙋ́ще дерзнове́нїе ко ст҃ѣ́й трⷪ҇цѣ, помина́йте земно́е ѻ҆те́чество ва́ше и҆ не забꙋ́дите посѣща́ти ча̑да своѧ̑, вѣ́рою и҆ любо́вїю ва́съ почита̑ющаѧ.

Сла́ва, и҆ ны́нѣ: Ѿ ко́рене і҆ессе́ева, и҆ ѿ чре́слъ дв҃довыхъ, бг҃оѻтрокови́ца мр҃їа́мъ, ражда́етсѧ дне́сь на́мъ: ра́достїю бо ра́дꙋютсѧ всѧ́чєскаѧ и҆ ѡ҆бновлѧ́ютсѧ. сра́дꙋйтесѧ кꙋ́пнѡ, нб҃о и҆ землѧ̀: восхвали́те ю҆̀, ѻ҆те́чєствїѧ ꙗ҆зы̑къ: і҆ѡакі́мъ весели́тсѧ, и҆ а҆́нна торжествꙋ́етъ, зовꙋ́щи: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Пѣ́снь д҃.

І҆рмо́съ: Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ. сла́ва си́лѣ твое́й, сла́ва снизхожде́нїю твоемꙋ̀.

Ли́пецкїѧ землѝ ᲂу҆краше́нїе, ста́рче а҆мвро́сїе, і҆ларїѡ́номъ затво́рникомъ бл҃гослове́нный, и҆ прпⷣбне некта́рїе, ѿ гра́да є҆льца̀ во ѻ҆би́тель ѻ҆́птинꙋ бл҃года́тїю при́званный, ѻ҆те́чества ва́шегѡ не забꙋ́дите.

І҆ѡа́нна сезе́новскаго бл҃же́ннаго, нра́вомъ младе́нствовавша, ᲂу҆мо́мъ же мꙋ́жа соверше́нна вѣ́дꙋще, хрⷭ҇то́ви дѣ́вство своѐ сохра́ньша и҆ томꙋ̀ сораспѧ́вшасѧ во́лею, со і҆ларїѡ́номъ троекꙋ́ровскимъ и҆ подви̑жники задо́нскими и҆ є҆ле́цкими, вѣ́рнїи всѝ похва́лимъ.

Да возра́дꙋетсѧ ны́нѣ шо́вскаѧ ве́сь, мл҃твами і҆ѡа́нна бл҃же́ннагѡ добропло́дна ꙗ҆́вльшисѧ, и҆з̾ тоѧ́ бо и҆зы́де сїлꙋа́нъ, ди́вный подви́жникъ горы̀ а҆ѳѡ́нскїѧ, и҆́же пла́чь а҆да́мовъ въ се́рдце своѐ воспрїе́мъ, ѡ҆ сп҃се́нїи мі́ра при́снѡ молѧ́шесѧ.

Послꙋша́нїѧ та́йнꙋ позна́вши, да́рїе прпⷣбнаѧ, ѿ ᲂу҆́тра житїѧ̀ твоегѡ̀ да́же до ве́чера дѣ́ланїѧ сегѡ̀ не ѡ҆ста́вила є҆сѝ, тѣ́мже съ наста́вникомъ твои́мъ і҆ѡа́нномъ тѧ̀ ᲂу҆бл҃жа́емъ.

Пе́рвꙋю и҆гꙋ́менїю сезе́новскꙋю серафі́мꙋ почти́мъ, и҆́нокинѧмъ мꙋ́дрꙋю наста́вницꙋ, къ лю́демъ бж҃їимъ въ любвѝ не ѡ҆скꙋдѣва́ющꙋю.

Бг҃оро́диченъ: Дв҃дъ пред̾ кївѡ́томъ ликовствꙋ́етъ, леѵі́ти же бл҃гоговѣ́йнѡ слꙋ́жатъ, мы́ же тѧ̀, бг҃ороди́тельнице чⷭ҇таѧ, ᲂу҆се́рднѡ мо́лимъ, гла̑сы моле́бными прилѣ́жнѡ вопїю́ще: ра́дꙋйсѧ, застꙋ́пнице гра́да на́шегѡ.

Пѣ́снь є҃.

І҆рмо́съ: Гдⷭ҇и бж҃е на́шъ, ми́ръ да́ждь на́мъ, гдⷭ҇и бж҃е на́шъ, стѧжи́ ны, гдⷭ҇и, ра́звѣ тебє̀ и҆но́гѡ не вѣ́мы, и҆́мѧ твоѐ и҆менꙋ́емъ.

Е҆гда̀ пре́далъ є҆сѝ на́съ, влⷣко, въ рꙋ́ки врагѡ́въ беззако́нныхъ и҆ ме́рзкихъ ѿстꙋ́пникѡвъ, смире́ни бы́хомъ по все́й землѝ грѣ̑хъ ра́ди на́шихъ, тогда̀ вѣ́рнїи сы́ны и҆ дщє́ри рꙋ́сстїи всѣ́хъ содѣ́телѧ и҆ сп҃са тѧ̀ и҆сповѣ́дахꙋ и҆ кро́вь свою̀ непоро́чнѡ тебѣ̀ принесо́ша во всесожже́нїе и҆ же́ртвꙋ прїѧ́тнꙋ.

І҆ѡа́нна царскосе́льскаго, ꙗ҆́кѡ нача́токъ новомч҃нкѡвъ цр҃кве рꙋ́сскїѧ, землѧ̀ данко́вскаѧ прино́ситъ тѝ, гдⷭ҇и, своѐ порожде́нїе. тогѡ̀ мл҃твами ѕловѣ́рїе и҆ собла́зны ѿ на́съ ѿженѝ.

Воро́нежскїѧ и҆ задо́нскїѧ землѝ первомч҃нкъ ꙗ҆ви́лсѧ є҆сѝ, тѵ́хѡне сщ҃е́нне, по соверше́нїи бо безкро́вныѧ же́ртвы са́мъ, ꙗ҆́кѡ а҆́гнецъ, пожре́нъ бы́лъ є҆сѝ, и҆ ѿ слꙋ́гъ сатани́нскихъ на црⷭ҇кихъ вратѣ́хъ хра́ма ѡ҆бѣ́шенъ, во врата̀ црⷭ҇твїѧ нбⷭ҇нагѡ невозбра́ннѡ вше́лъ є҆сѝ.

Петра̀ сщ҃енномчн҃ка, ка́менѧ вѣ́ры и҆ чистоты̀ сокро́вище, ᲂу҆ста́вѡвъ же цр҃ко́вныхъ блюсти́телѧ до́блѧго дне́сь воспои́мъ, во ᲂу҆́захъ солове́цкихъ па́ствы своеѧ̀ любо́вїю не ѡ҆ста́вивша и҆ ны́нѣ во ст҃ы́хъ моще́хъ па́ки къ на́мъ возврати́вшасѧ.

Заха́рїе сла́вный, по ст҃и́тели петрѣ̀ є҆пⷭ҇кпскїй же́злъ и҆ терно́вый вѣне́цъ прїе́мый, ѿ мо́рѧ бѣ́лагѡ до пꙋсты́нь казахста́нскихъ мч҃нческими стопа́ми проше́лъ є҆сѝ, та́мѡ и҆ сме́рть вкꙋси́лъ є҆сѝ. ны́нѣ па́ки на́съ собира́еши, глаго́лѧ: да бꙋ́демъ всѝ є҆ди́ни ѡ҆ гдⷭ҇ѣ, въ се́мъ бо сп҃се́нїе на́ше.

Бг҃оро́диченъ: Ны́нѣ ᲂу҆̀бо пристꙋпи́те съ весе́лїемъ, бг҃оизбра́нное ста́до, рꙋ́сстїи собо́ри, ко пречⷭ҇тѣй бж҃їей мт҃ри и҆ чтⷭ҇ны́й є҆ѧ̀ ѻ҆́бразъ любе́знѡ прїими́те, се́ бо и҆сто́чникъ неисчерпа́емый, бжⷭ҇твєнныѧ во́ды неѡскꙋ́днѡ точа́щїй, ю҆́же вѣ́рнїи пое́мъ и҆ велича́емъ.

Пѣ́снь ѕ҃.

І҆рмо́съ: Ꙗ҆́кѡ во́ды морскі̑ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.

Пе́рвый ст҃и́телю ли́пецкїй ᲂу҆а́ре, па́ствы своеѧ̀ ᲂу҆твержде́нїе, столпа̀ дꙋшѝ твоеѧ̀ ничто́же поколеба́ти возмо́же, въ любви́ бо сп҃са хрⷭ҇та̀ ᲂу҆твержде́нъ бы́въ, тогѡ̀ да́же до сме́рти не ѿре́клсѧ є҆сѝ.

Ст҃и́телю се́ргїе, гра́дꙋ є҆льцꙋ̀ ᲂу҆краше́нїе, ᲂу҆́зы караганди̑нскїѧ любвѐ твоеѧ̀ не свѧза́ша, та́мѡ бо па́ствꙋ твою̀ и҆ ᲂу҆бїє́нныѧ за хрⷭ҇та̀ мл҃твеннѡ помина́ше, за сїѐ и҆ на сме́рть ѡ҆сꙋжде́нъ бы́лъ є҆сѝ.

Сщ҃енномч҃нче кѷрі́лле, цр҃кве рꙋ́сскїѧ сла́во, патрїа́рха тѵ́хѡна вѣ́рный сподви́жниче, ты̀ въ странѣ̀ тамбо́встѣй хрⷭ҇тꙋ̀ послꙋжи́въ, ст҃и́телѧ є҆ѧ̀ пїтѷрі́ма чꙋ́днаго въ ли́цѣ ст҃ы́хъ просла́вилъ є҆сѝ. съ ни́мже тѧ̀ ны́нѣ бл҃гоговѣ́йнѡ почита́емъ.

Ст҃и́телѧ дими́трїа, па́ствꙋ тамбо́вскꙋю ѿ лжеꙋче́нїй но́выхъ сохра́ньшаго и҆ за хрⷭ҇та̀ сме́рть претерпѣ́вшаго, со а҆мвро́сїемъ прпⷣбномч҃нкомъ и҆ и҆ны́ми страда̑льцы дне́сь ᲂу҆бл҃жи́мъ.

Мака́рїе сщ҃енномч҃нче, ᲂу҆бива́ющихъ тѧ̀ бл҃гослови́вый, серафі́ме, лжепа́стырей ѡ҆бличи́телю, нїко́лае, кро́ткїй и҆сповѣ́дниче и҆ чꙋдотво́рче, є҆ле́цкꙋю зе́млю ѡ҆кормлѧ́вшїи, ѡ҆мофо́ромъ мл҃твъ ва́шихъ на́съ покрыва́йте.

Бг҃оро́диченъ: Сѐ ны́нѣ весе́лїе приближа́етсѧ и҆ ско́рбь потреблѧ́етсѧ, вѣ́рнїи же сп҃са́ютсѧ, и҆ ꙗ҆́кѡ ѿ и҆сто́чника ра́дость почерпа́юще, ᲂу҆ми́льнѡ воспѣва́ютъ: ра́дꙋйсѧ, чⷭ҇таѧ влⷣчце, сп҃се́нїѧ на́шегѡ глави́зно.

Конда́къ, гла́съ г҃:

Ны́нѣ цр҃ковь рꙋ́сскаѧ прославлѧ́етъ собо́ръ ст҃ы́хъ землѝ ли́пецкїѧ, прⷭ҇то́лꙋ прест҃ы́ѧ трⷪ҇цы предстоѧ́щихъ и҆ ѡ҆ сп҃се́нїи на́шемъ при́снѡ хода́тайствꙋющихъ, и҆̀мже и҆ мы̀ бл҃года́рствєннаѧ пѣ̑нїѧ прино́симъ и҆ согла́снѡ вопїе́мъ: ра́дꙋйтесѧ, преди́внїи чꙋдотво́рцы и҆ те́плїи ѡ҆ на́съ пред̾ бг҃омъ мл҃твєнницы.

І҆́косъ:

Є҆гда̀ раздѣлѧ́ше вы́шнїй ѧ҆зы́ки и҆ разсѣ́ѧ сы́ны а҆да́мѡвы, тогда̀ поста́ви предѣ́лы ꙗ҆зы́кѡвъ и҆ всѧ́комꙋ мѣ́стꙋ, гра́дꙋ и҆ странѣ̀ а҆́гг҃лы храни́тєли дарова̀. то́й же, ꙗ҆́кѡ промысли́тель и҆ всебл҃гі́й бг҃ъ, дх҃омъ любвѐ своеѧ̀ созида́ѧй цр҃ковь рꙋ́сскꙋю, мл҃твꙋ ст҃ы́хъ сро́дникѡвъ на́шихъ ѡ҆ земнѣ́мъ ѻ҆те́чествѣ ны́нѣ прїе́млетъ и҆ на́съ со а҆́гг҃льскими си́лами собира́етъ въ торжествѣ̀ и҆̀хъ согла́снѡ пѣ́ти: ра́дꙋйтесѧ, преди́внїи чꙋдотво́рцы и҆ те́плїи ѡ҆ на́съ пред̾ бг҃омъ мл҃твєнницы.

Пѣ́снь з҃.

І҆рмо́съ: Халде́йскаѧ пе́щь ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ, ѻ҆́троцы поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ѽ любе́знаѧ чето̀, є҆ди́нъ дꙋ́хъ во двою̀ тѣлесꙋ̀ и҆мꙋ́щаѧ, сщ҃енномч҃нче тѵ́хѡне и҆ хїоні́е и҆сповѣ́днице, за хрⷭ҇та̀ пострада́вшїи, ѻ҆́бразъ чтⷭ҇на́гѡ сꙋпрꙋ́жества на́мъ ꙗ҆ви́ли є҆стѐ.

Се́ргїе правдолюби́ве, и҆сповѣ́дниче хрⷭ҇то́въ, во ᲂу҆́захъ солове́цкихъ мнѡ́гаѧ страда̑нїѧ претерпѣ́вый, по́слѣжде гра́дъ лебедѧ́нь слꙋже́нїемъ твои́мъ ѡ҆ст҃и́вый, помина́й любо́вїю чтꙋ́щыѧ тѧ̀.

Ѽ мно́гагѡ долготерпѣ́нїѧ твоегѡ̀, сщ҃енномч҃нче мїхаи́ле! є҆гда̀ бо сꙋ́щїй съ тобо́ю въ заточе́нїи разбо́йникъ мꙋ́чаше тѧ̀ и҆ власы̀ главы̀ твоеѧ̀ и҆сто́рже, ты̀ сего̀ кро́тостїю твое́ю къ покаѧ́нїю ѡ҆брати́въ, є҆ѵⷢ҇льски прости́лъ є҆сѝ и҆ ѿ ка́зни и҆зба́вилъ є҆сѝ.

А҆леѯа́ндре, па́стырю вѣ́рный, со дїа́кономъ мїхаи́ломъ, ли́пецкїѧ землѝ прозѧбе́нїе! вы̀ во ᲂу҆́захъ караганди́нскихъ та́йнѡ мл҃твы твори́вше, за сїѐ и҆ ᲂу҆бїе́нїе прїѧ́сте. ны́нѣ же, ꙗ҆́кѡ а҆́гнцы новозакла́ннїи, хрⷭ҇тꙋ̀ принесо́стесѧ.

Оу҆чє́нїи и҆ дѣ́лы хрⷭ҇та̀ проповѣ́давше, па́стырїе сщ҃е́ннїи а҆леѯа́ндре, се́ргїе, мїхаи́ле, а҆леѯа́ндре, васі́лїе, і҆сма́иле, мїхаи́ле, і҆ѡа́нне, нїко́лае и҆ и҆ні́и, и҆́хже и҆мена̀ бг҃ꙋ вѣ́дѡма, да́же до сме́рти сп҃сꙋ послѣ́довасте и҆ зе́млю на́шꙋ кро́вїю свое́ю ѡ҆багри́сте.

Бг҃оро́диченъ: Прїимѝ мольбы̑ ра̑бъ твои́хъ, пречⷭ҇таѧ дв҃о бцⷣе, и҆ бꙋ́рю лю́тыхъ страсте́й мл҃твами твои́ми ᲂу҆тишѝ и҆ совѣ́ты врагѡ́въ проти́вныхъ разженѝ, напа́дающихъ на ста́до твоѐ, всенепоро́чнаѧ влⷣчце.

Пѣ́снь и҃.

І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Прпⷣбне геѡ́ргїе и҆сповѣ́дниче, ѿ землѝ є҆ле́цкїѧ ꙗ҆́кѡ ѻ҆ре́лъ возлетѣ́вый, под̾ кро́вомъ ста́рцєвъ ѻ҆́птинскихъ воспита́нный, и҆ бл҃года́ть ста́рчества ѿ ни́хъ воспрїе́мый, на́съ, ча̑дъ твои́хъ, крила́ми любвѐ и҆ мл҃твъ покры́й.

Прпⷣбномч҃нче васі́лїе, покро́вскагѡ монастырѧ̀, и҆́же въ данко́вѣ, сщ҃енноархїмандри́те, мл҃твами твои́ми ᲂу҆крѣпѝ бл҃гоче́стнѡ подвиза́ющихсѧ во ѻ҆би́телехъ ст҃ы́хъ.

Прпⷣбномч҃нче пантелеи́моне, дре́внемꙋ цѣли́телю и҆ врачꙋ̀ тезоимени́те, со ста̑рцы ѻ҆́птинскими молѝ многомлⷭ҇тиваго бг҃а ѿ страсте́й и҆ недꙋ́гѡвъ на́мъ и҆сцѣли́тисѧ.

Под̾ кро́вомъ ст҃ы́ѧ ѻ҆би́тели задо́нскїѧ ѻ҆бѣ́ты мона́шєскїѧ прине́съ, ѳео́дѡре любоче́стне, сїѧ̑ до конца̀ соблю́лъ є҆сѝ, и҆згна́нїе же, заточе́нїе и҆ сме́рть претерпѣ́въ, ны́нѣ ᲂу҆ прⷭ҇то́ла бж҃їѧ мл҃твы ѡ҆ на́съ непреста́ннѡ возно́сиши.

Мч҃нцы ст҃ы̑ѧ а҆́ннꙋ и҆ є҆ѵфросѵ́нїю, въ землѝ лебедѧ́нстѣй до́мы и҆ ча̑да ма̑лаѧ хрⷭ҇та̀ ра́ди ѡ҆ста́вльшыѧ, вкꙋ́пѣ съ мч҃нцами ната́лїею, а҆леѯа́ндрою и҆ ната́лїею, на страда̑нїѧ и҆ сме́рть себѐ ᲂу҆гото́вльшыѧ, съ ни́миже и҆ ната́лїю прпⷣбномч҃нцꙋ ѿ гра́да є҆льца̀, ꙗ҆́кѡ невѣ́сты хрⷭ҇тѡ́вы сла̑вныѧ дне́сь ᲂу҆бл҃жи́мъ.

Бг҃оро́диченъ: Ка́кѡ тѧ̀, дв҃о, по достоѧ́нїю воспои́мъ, по́мощь тве́рдꙋю, храни́тельницꙋ жи́зни на́шеѧ и҆ хода́таицꙋ непрело́жнꙋ къ сн҃ꙋ твоемꙋ̀ и҆ бг҃ꙋ на́шемꙋ. є҆го́же воспѣва́емъ и҆ превозно́симъ во вѣ́ки.

Пѣ́снь ѳ҃.

І҆рмо́съ: Чꙋ́жде ма́теремъ дѣ́вство, и҆ стра́нно дѣ́вамъ дѣторожде́нїе: на тебѣ̀, бцⷣе, ѻ҆боѧ̀ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ непреста́ннѡ велича́емъ.

Любо́вїю хрⷭ҇то́вою па́ствꙋ свою̀ ѡ҆б̾е́млюще, ст҃и́телїе бг҃омꙋ́дрїи, дх҃а є҆ле́й въ сосꙋ́дѣхъ се́рдца стѧжа́ли є҆стѐ, ѻ҆би́тельми же и҆ хра̑мы зе́млю на́шꙋ ᲂу҆краси́вше, пло́дъ дꙋхо́вный въ не́й возрасти́ли є҆стѐ. тѣ́мже любо́вїю ва́съ велича́емъ.

Пло́ти, мі́рꙋ и҆ дїа́волꙋ не порабо́тавше, прпⷣбнїи, любо́вїю къ бг҃ꙋ распѧ́ли є҆стѐ пло́ть со страстьмѝ и҆ похотьмѝ, и҆ чи́стѣ чⷭ҇томꙋ предстоѧ́ще, при́снѡ мо́лите ѡ҆ сп҃се́нїи на́шемъ.

Мі́рꙋ, горды́нею ѡ҆держи́момꙋ, посмѣѧ́вшесѧ, бл҃же́ннїи хрⷭ҇та̀ ра́ди ю҆ро́дивїи, и҆ мꙋ́дрость вѣ́ка сегѡ̀ презрѣ́вше, та̑йны вѣ́ка грѧдꙋ́щагѡ ѿ бг҃а позна́сте и҆ на неви̑димыѧ врагѝ си́лꙋ прїѧ́сте. ѡ҆гражда́йте на́съ при́снѡ мл҃твами ва́шими.

Ѕло́бы бг҃опроти́вныѧ не ᲂу҆боѧ́вшесѧ, новомч҃нцы и҆ и҆сповѣ̑дницы сла́внїи, страда́нїемъ и҆ сме́ртїю воскрⷭ҇шаго хрⷭ҇та̀ проповѣ́дасте, любо́вїю побѣ́дꙋ прїе́мше, и҆ на́съ люби́ти врагѝ своѧ̑ наꙋчи́те.

Пѣ́снь бл҃года́рнꙋю ѿ на́съ прїими́те, сїѡ́на го́рнѧгѡ гра́ждане, зе́млю на́шꙋ и҆мены̀ и҆ пѡ́двиги ва́шими ꙗ҆́кѡ нб҃о содѣ́лавшїи, любо́вїю къ бг҃ꙋ и҆ бли̑жнимъ согрѣ́йте хла̑днаѧ сердца̀ на̑ша и҆ ко сп҃се́нїю напра́вите мл҃твами ва́шими.

Бг҃оро́диченъ: Ра́дости хода́таице, да́рꙋй на́мъ ра́зꙋмъ, є҆́же вопи́ти тебѣ̀, бцⷣе чⷭ҇таѧ: ра́дꙋйсѧ, храни́тельнице на́ша, держа́во и҆ ѡ҆гражде́нїе, и҆ сп҃си́тельное прибѣ́жище.

Свѣти́ленъ ст҃ы́хъ:

Ꙗ҆́кѡ бл҃гоꙋха̑нныѧ цвѣ́ты ра̑йскїѧ, всѧ̑ ст҃ы̑ѧ, въ землѝ ли́пецкой ди́внѡ прозѧ́бшыѧ и҆ цр҃ковь рꙋ́сскꙋю и҆зрѧ́днѡ ᲂу҆краси́вшыѧ, дне́сь почти́мъ и҆ бг҃а, просла́вльшаго и҆̀хъ, велегла́снѡ просла́вимъ.

Сла́ва: Черто́гъ тво́й ви́дѣвъ, сп҃се, ᲂу҆краше́нный, сщ҃енномч҃нкъ ᲂу҆а́ръ мꙋ́жественнѣ подвиза́сѧ, и҆ ри́зою ст҃и́тельства ѡ҆блече́нъ, кро́вїю мꙋче́нїѧ ᲂу҆краси́сѧ. тогѡ̀ мл҃твами, хрⷭ҇тѐ, просвѣтѝ и҆ сп҃си́ ны.

И҆ ны́нѣ: Ѿ непло́дныѧ дне́сь а҆́нны цвѣ́тъ произы́де бцⷣа.