Канон Пресвятой Богородице пред иконой «Умиление» Серафимо-Дивеевская

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̀, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ, тоѧ̑ чꙋдеса̀.

Оу҆мили́сѧ, ᲂу҆млⷭ҇тивисѧ, ᲂу҆млⷭ҇рдисѧ, влⷣчце, на мѧ̀, грѣ́шнаго и҆ недосто́йнаго раба̀ твоегѡ̀, дерза́ющаго воспѣ́ти твоѧ̑ чꙋдеса̀.

Мт҃и бж҃їѧ пречⷭ҇таѧ, не ѿри́ни менѐ, ѻ҆каѧ́ннаго и҆ нечи́стаго, дерза́ющаго пѣ́ти твоѧ̑ чꙋдеса̀, ᲂу҆миле́нїе.

И҆на́гѡ прибѣ́жища и҆ те́плагѡ предста́тельства къ сн҃ꙋ твоемꙋ̀ и҆ бг҃ꙋ на́шемꙋ не и҆́мамъ, всепѣ́таѧ, тѣ́мже сподо́би мѧ̀, многогрѣ́шнагѡ, восхвали́ти твоѧ̑ чꙋдеса̀.

Лѣ́ностїю ѡ҆держи́мь и҆ страстьмѝ ѡ҆бꙋрева́емь є҆́смь а҆́зъ, неключи́мый ра́бъ тво́й, влⷣчце, недоꙋмѣ́ю по достоѧ́нїю восхвали́ти и҆ просла́вити твоѧ̑ чꙋдеса̀.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшїѧ, дх҃о́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Є҆ди́нъ а҆́зъ, ѻ҆каѧ́нный, житїе́мъ согрѣши́хъ па́че всѣ́хъ человѣ̑къ, пречⷭ҇таѧ, но, на щедрѡ́ты твоѧ̑ ᲂу҆пова́ѧ, зовꙋ̀: дꙋше́внагѡ мѧ̀ ᲂу҆миле́нїѧ сподо́би.

Никто́же, прибѣга́ѧй съ вѣ́рою под̾ бжⷭ҇твенный покро́въ тво́й, влⷣчце, то́щь ѿ тебѣ̀ и҆схо́дитъ, тѣ́мже и҆ а҆́зъ, многогрѣ́шный, дерза́ѧ, зовꙋ̀: бжⷭ҇твеннагѡ мѧ̀ ᲂу҆миле́нїѧ сподо́би.

І҆а́кѡвъ, лѣ́ствицꙋ бжⷭ҇твеннꙋю ви́дѣвъ, речѐ: степе́нь бж҃їѧ сїѧ̀, ꙗ҆́же є҆сѝ ты̀, препѣ́таѧ: тѣ́мже молю́ тѧ: бл҃га́гѡ восхожде́нїѧ къ добродѣ́тели и҆ менѐ, лю́тѣ недосто́йнаго, сподо́би.

Ю҆́же всѣ̑мъ бл҃гопослꙋ́шнꙋю въ ско́рбехъ и҆ ѡ҆бстоѧ́нїихъ дꙋше́вныхъ и҆ тѣле́сныхъ ꙗ҆ви́ тѧ гдⷭ҇ь, бцⷣе бл҃га́ѧ, та́кѡ и҆ мнѣ̀, лю́тѣ ѡ҆бꙋрева́емомꙋ страстьмѝ безмѣ́стными, сле́зы ᲂу҆миле́нїѧ пода́ждь и҆ твоегѡ̀, дв҃о, мт҃рнѧгѡ застꙋпле́нїѧ сподо́би.

Сѣда́ленъ, гла́съ є҃:

Превзыдо́ша главꙋ̀ мою̀ грѣсѝ моѝ, влⷣчце, ѡ҆скверне́нъ и҆́ми є҆́смь, и҆ нѣ́сть и҆сцѣле́нїѧ въ пло́ти мое́й, но ты̀, многобл҃гоꙋтро́бнаѧ, да́рꙋй дꙋшѝ мое́й сле́зы покаѧ́нїѧ на ѡ҆чище́нїе скве́рнъ грѣхо́вныхъ и҆ тѣлє́сныѧ недꙋ́ги ᲂу҆врачꙋ́й, врача̀ всѧ́ческихъ и҆ гдⷭ҇а ро́ждшаѧ.

Сла́ва, и҆ ны́нѣ: Ра́ны дꙋшє́вныѧ привлеко́ша на мѧ̀ и҆ бѡлѣ́зни тѣлє́сныѧ, влⷣчце, но ты̀, ꙗ҆́кѡ премлⷭ҇тиваѧ, ѻ҆боѧ̑ и҆сцѣлѝ, подава́ющи мнѣ̀ неѡскꙋ́дный да́ръ дх҃о́внагѡ ᲂу҆миле́нїѧ, и҆ да непреста́ннѡ сла́влю твоѐ всемо́щное застꙋпле́нїе.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀ во ѻ҆́блацѣ ле́гцѣ, прїи́де і҆и҃съ пребжⷭ҇твенный нетлѣ́нною дла́нїю и҆ сп҃сѐ зовꙋ́щїѧ: сла́ва, хрⷭ҇тѐ, си́ле твое́й.

И҆дѣ́же ѡ҆сѣни́тъ блгⷣть твоѧ̑, влⷣчце, та́мѡ всѧ́каѧ ско́рбь потреблѧ́етсѧ, весе́лїе же водворѧ́етсѧ, є҆ѧ́же и҆ менє̀, недосто́йнаго, сподо́би, вопїю́ща: ра́дꙋйсѧ, бцⷣе, всѣ́хъ ра́достей ра́досте.

Сле́зъ не и҆́мамъ, ѻ҆каѧ́нный а҆́зъ, нижѐ дꙋше́внагѡ ᲂу҆миле́нїѧ, но сама̀, ꙗ҆́кѡ млⷭ҇рдаѧ, сїѧ̑ мѝ пода́ти бл҃говолѝ, да взыва́ю: ра́дꙋйсѧ, дв҃о пречⷭ҇таѧ, всѣ́хъ ра́достей ра́досте.

Не́мощна мѧ̀ сꙋ́ща и҆ ѻ҆каѧ́нна стрꙋ́пы грѣхо́вными, ᲂу҆врачꙋ́й, пречⷭ҇таѧ, млⷭ҇рдїѧ твоегѡ̀ є҆ле́й и҆злива́ющи, и҆ воздви́гни пѣ́ти тебѣ̀: ра́дꙋйсѧ, влⷣчце, всѣ́хъ ра́достей ра́досте.

Ѡ҆мрачи́хсѧ ᲂу҆мо́мъ въ жите́йскихъ сласте́хъ, но ты̀, влⷣчце, свѣ́те помраче́нныѧ дꙋшѝ моеѧ̀, разгонѝ тьмꙋ̀ страсте́й мои́хъ, да просвѣ́щсѧ тобо́ю, вопїю̀: ра́дꙋйсѧ, невѣ́сто неневѣ́стнаѧ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й, ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Доко́лѣ поно́ситъ вра́гъ и҆ низлага́етъ до́лꙋ мѧ̀, немощна́го и҆ разсла́бленнаго лю́тѣ дꙋше́ю и҆ тѣ́ломъ: ᲂу҆мили́сѧ, влⷣчце, и҆ низложѝ борю́щихъ мѧ̀ врагѡ́въ, всепѣ́таѧ, дꙋшѝ мое́й ми́ръ подава́ющи.

Вы́шши всѣ́хъ а҆́гг҃лъ и҆ а҆рха́гг҃лъ ꙗ҆ви́ласѧ є҆сѝ, чⷭ҇таѧ бг҃оѻтрокови́це, тѣ́мже молю́ тѧ, стрѣ́лы вра́жїѧ, на мѧ̀ и҆з̾ѻщрє́нныѧ, сокрꙋши́ти, дꙋшѝ ми́ръ подава́ющи.

Доко́лѣ, дꙋшѐ моѧ̀, пребыва́еши въ прегрѣше́нїихъ, конца̀ не и҆мꙋ́щи грѣхо́вномꙋ ѻ҆бы́чаю, возни́кни и҆з̾ глꙋбины̀ ѕѡ́лъ, взира́ющи держа́вномꙋ застꙋпле́нїю пречⷭ҇тыѧ, всегда̀ на по́мощь тебѣ̀ ско́рыѧ и҆ бл҃года́тїю свое́ю ми́ръ дꙋшѝ и҆ тѣ́лꙋ подава́ющыѧ.

Ра́дость, и҆ весе́лїе, и҆ ра́дованїе бжⷭ҇твенное, дѣ́во неискꙋсомꙋ́жнаѧ, на́мъ ᲂу҆мно́жисѧ бж҃їе: се́ бо, пла́чꙋщїисѧ лю́тѣ, ра́дꙋемсѧ моли́твами твои́ми.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Ра́дости бжⷭ҇твеннагѡ вели́чїѧ, ꙗ҆́кѡ ѿ нача́ла на́мъ весе́лїѧ, бл҃годарє́нїѧ гла̑сы прино́симъ, прилѣ́жнѡ почита́юще ю҆̀, ꙗ҆́кѡ предста́тельницꙋ на́шꙋ.

Досто́йно тѝ пѣ́снь ра́дованїѧ, чⷭ҇таѧ дв҃о, веселѧ́щесѧ, прино́симъ, и҆зба́вльшесѧ ѿ бѣ́дъ твои́ми мл҃твами.

А҆́гг҃льстїи ꙗ҆зы́цы досто́йнѡ твоѧ̑ хвалы̑ воспѣ́ти не мо́гꙋтъ, чⷭ҇таѧ, мы́ же ны́нѣ, ра́бски взе́мшесѧ, ра́дованїе гаврїи́лово прино́симъ тѝ.

Ꙗ҆́кѡ бжⷭ҇твенное прибѣ́жище, мы̀ покро́въ тво́й всѝ стѧжа́вше къ бг҃ꙋ, въ напа́стехъ, и҆ въ гоне́нїихъ, и҆ грѣсѣ́хъ къ тебѣ̀ прибѣга́емъ и҆ тобо́ю и҆змѣне́нїе прїе́млемъ, пречⷭ҇таѧ.

Конда́къ, гла́съ г҃:

Ю҆́же подража́ѧ непло́днꙋю смоко́вницꙋ, а҆́зъ, ѻ҆каѧ́нный, ᲂу҆миле́нїѧ плода̀ ѿню́дъ не приношꙋ̀ и҆ посѣче́нїѧ страшꙋ́сѧ, но, взира́ѧ къ чꙋдотво́рнѣй і҆кѡ́нѣ твое́й ᲂу҆миле́нїѧ, влⷣчце, стеню̀ ѿ се́рдца и҆ вопїю̀: ᲂу҆мили́сѧ, бл҃госе́рдаѧ, и҆ мнѣ̀, ѡ҆камене́нномꙋ се́рдцемъ, бл҃говолѝ пода́ти дꙋше́вное и҆ серде́чное ᲂу҆миле́нїе.

І҆́косъ:

Превзыдо́хъ грѣхи̑ мои́ми блꙋдни́цꙋ, и҆ блꙋ́днаго, и҆ мытарѧ̀, и҆ разбо́йника, и҆ нїнеѵі́тѧны, а҆́зъ є҆ди́нъ, ѻ҆каѧ́нный па́че всѣ́хъ человѣ̑къ, и҆, лиши́всѧ блгⷣти и҆ дерзнове́нїѧ ко гдⷭ҇ꙋ, стеню̀ ѿ се́рдца и҆ вопїю̀: тѧ̀ хода́таицꙋ и҆ спорꙋ́чницꙋ спасе́нїѧ многогрѣ́шнѣй дꙋшѝ мое́й бл҃госотворѝ, подаю́щи мѝ дꙋше́вное и҆ серде́чное ᲂу҆миле́нїе.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшаго, но, ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Рекꙋ̀ неисчерпа́емꙋю млⷭ҇ти твоеѧ̀ къ грѣ̑шнымъ всѣ̑мъ, влⷣчце, и҆злива́еши, тѣ́мже молю̀: напоѝ мою̀ жа́ждꙋщꙋю дꙋ́шꙋ и҆ и҆зсо́хшее грѣхи̑ се́рдце моѐ ѡ҆росѝ, да, бл҃гословѧ̀, воспою̀: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

И҆́же всѣ̑мъ бл҃гопослꙋ́шная въ ско́рбехъ и҆ ѡ҆бстоѧ́нїихъ дꙋше́вныхъ и҆ тѣле́сныхъ, влⷣчце, не ѿве́ржи и҆ менє̀, недосто́йнаго, но сподо́би пѣ́ти: ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Не ѿри́ни, бцⷣе, менє̀, ᲂу҆ѧ́звленнаго совѣ́томъ ѕмїи́нымъ, не возгнꙋша́йсѧ менє̀, смра́днагѡ грѣхи̑ мнѡ́гими, но сподо́би всегда̀ пѣ́ти: ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Є҆гда̀ престо́ли на сꙋ́дъ поста́вѧтсѧ и҆ сꙋди́щꙋ хрⷭ҇то́вꙋ предста́нꙋтъ всѝ земноро́днїи, тогда̀ ꙗ҆вѝ мнѣ̀, влⷣчце, мт҃рнее твоѐ застꙋпле́нїе, неѡскꙋ́днꙋю по́мощь, вопїю́щꙋ: ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Пѣ́снь и҃.

І҆рмо́съ: Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо сп҃сло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Стра́ха мѧ̀ и҆зба́ви, ѡ҆ влⷣчце, ѕло́бы и҆ воздꙋ́шныхъ мыта́рствъ. покажѝ на мнѣ̀, недосто́йнѣмъ, ве́лїю млⷭ҇ть твою̀, воспѣва́ющемъ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

И҆зба́ви мѧ̀, пренепоро́чнаѧ, ѡ҆ѕлобле́нїѧ ѕлы́хъ человѣ́кѡвъ и҆ лꙋка́выхъ бѣсѡ́въ, трепе́щꙋтъ бо и҆́мене твоегѡ̀ вели́каго, ꙗ҆́кѡ ды́мъ и҆счеза́ютъ; мене́ же во ᲂу҆миле́нїи се́рдца сподо́би пѣ́ти: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Тє́мныѧ вла̑сти кнѧ́зѧ, всегда̀ борю́щаго мѧ̀, немощна́го и҆ ᲂу҆ны́лаго, разжжє́нныѧ стрѣ̑лы ᲂу҆гасѝ, всепѣ́таѧ, и҆ сподо́би мѧ̀ бл҃года́рственнѡ воспѣва́ти: гдⷭ҇а по́йте, дѣла̀, и҆ превозноси́те є҆го̀ во вѣ́ки.

Пѣ́нїе моѐ прїимѝ ᲂу҆бо́гое, всемлⷭ҇тиваѧ гпⷭ҇жѐ дв҃о, влⷣчце бцⷣе, мт҃рнимъ твои́мъ млⷭ҇рдїемъ покрыва́ющи пою́щїѧ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ прⷭ҇нодв҃о.

Є҆гда̀ и҆знемога́ти крѣ́пости мое́й во и҆схо́дѣ дꙋшѝ мое́й грѣ́шнѣй ѿ ѡ҆каѧ́ннагѡ и҆ скве́рнагѡ сегѡ̀ тѣлесѐ, тогда̀ наипа́че ꙗ҆вѝ на мнѣ̀, недосто́йнѣмъ, крѣ́пкꙋю мы́шцꙋ твою̀, всебл҃га́ѧ, да́ждь въ ча́съ сме́рти моеѧ̀ ра́достнѡ взыва́ти тебѣ̀: ра́дꙋйсѧ, всебл҃же́ннаѧ бцⷣе, чⷭ҇таѧ прⷭ҇нодв҃о.

Ни́щъ и҆ ᲂу҆бо́гъ є҆́смь ѿ дѣ́лъ бл҃ги́хъ, не и҆мы́й ᲂу҆миле́нїѧ дꙋше́внагѡ, премлⷭ҇тиваѧ, ты̀ сама̀ да́рствꙋй мѝ, да бл҃года́рственнѡ вопїю̀: ра́дꙋйсѧ, всебл҃же́ннаѧ бцⷣе, чⷭ҇таѧ прⷭ҇нодв҃о.

Ѵ҆ссѡ́помъ млⷭ҇рдїѧ твоегѡ̀ ѡ҆кропѝ мѧ̀, пречⷭ҇таѧ, да ѡ҆чи́щꙋсѧ ѿ тѧ́жкихъ и҆ лю́тыхъ беззако́нїй мои́хъ и҆ во ᲂу҆миле́нїи дꙋшѝ да взыва́ю ѿ се́рдца: ра́дꙋйсѧ, всебл҃же́ннаѧ, чⷭ҇таѧ прⷭ҇нодв҃о.

Є҆́же помы́слихъ въ дꙋшѝ мое́й, по си́ле принесо́хъ пѣ́нїе тебѣ̀, влⷣчце, не ѿри́ни ᲂу҆́бѡ ѻ҆бы́чнымъ твои́мъ млⷭ҇рдїемъ и҆ не ѡ҆мерзѝ мно́ю, многогрѣ́шнымъ и҆ нечи́стымъ, но сподо́би всегда̀ во ᲂу҆миле́нїи пѣ́ти тебѣ̀: ра́дꙋйсѧ, всебл҃же́ннаѧ бцⷣе, чⷭ҇таѧ прⷭ҇нодв҃о.

Свѣти́ленъ.

Те́плое застꙋпле́нїе въ бѣда́хъ, и҆ помо́щницꙋ, и҆ къ бг҃ꙋ примире́нїе, є҆́юже тлѝ и҆зба́вихомсѧ, бцⷣꙋ, вѣ́рнїи, ᲂу҆блажи́мъ.

Сла́ва, и҆ ны́нѣ: Тѧ̀ предста́тельницꙋ и҆́мамы, грѣ́шнїи, ѡ҆ пречⷭ҇таѧ дв҃о, ты̀ бл҃гопремѣне́нна сотворѝ сн҃а твоегѡ̀ и҆ бг҃а на́шегѡ мт҃рними твои́ми моли́твами.