Пѣ́снь а҃.
І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ сп҃сшемꙋ і҆и҃лѧ, ꙗ҆́кѡ просла́висѧ.
Стеце́мсѧ дне́сь бцⷣꙋ почита́юще пѣ́сньми: и҆ торжествꙋ́имъ дх҃о́вный пра́здникъ: въ хра́мъ бо бг҃ꙋ да́ръ прино́ситсѧ.
Пѣ́сньми да воспои́мъ бцⷣы сла́вное предше́ствїе: ко хра́мꙋ бо дне́сь, ꙗ҆́кѡ хра́мъ бж҃їй, прино́ситсѧ прⷪ҇ро́чески, да́ръ многоцѣ́нный.
А҆́нна непоро́чнаѧ ра́довашесѧ, ꙗ҆́кѡ да́ръ многоцѣ́ненъ бг҃ꙋ приносѧ́щи въ хра́мъ мт҃рски, і҆ѡакі́мъ же съ не́ю торжествꙋ́етъ свѣ́тлѡ.
Дв҃дъ пра́ѻтецъ тво́й воспѣ́ тѧ дре́вле, дв҃о бг҃оневѣ́сто, дще́рь глаго́лѧ тѧ̀ цр҃ѧ̀ хрⷭ҇та̀, є҆го́же и҆ роди́вши мт҃рски млⷣнца дои́ла є҆сѝ.
Пло́тїю трилѣ́тствꙋющи бцⷣа гдⷭ҇ꙋ прино́ситсѧ: заха́рїа же сїю̀ сщ҃е́нникъ бж҃їй прїе́мъ, ра́дꙋѧсѧ въ хра́мъ возложѝ.
Дѣ̑вы ликовствꙋ́йте, свѣщенѡ́сицы начни́те дне́сь и҆ ма́тєри, воспо́йте цр҃и́цѣ мт҃ри, приходѧ́щей въ хра́мъ цр҃ѧ̀ хрⷭ҇та̀.
Трⷪ҇ченъ:
Трⷪ҇це є҆диносꙋ́щнаѧ, ѻ҆́ч҃е, и҆ сло́ве, и҆ дш҃е ст҃ы́й, тѧ̀ вѣ́рнѡ сла́вимъ, ꙗ҆́кѡ творца̀ всѣ́хъ, и҆ тебѣ̀ вопїе́мъ бл҃гоче́стнѡ: сп҃си́ ны, бж҃е.
Бг҃оро́диченъ:
Ѿ ба́гра крове́й твои́хъ, червлени́цею пречⷭ҇таѧ ѡ҆дѣ́ѧвсѧ, проше́дъ ѡ҆бновѝ цр҃ь и҆ бг҃ъ, ро́дъ ве́сь человѣ́ческїй бл҃гоꙋтро́бїемъ свои́мъ.
Пѣ́снь г҃.
І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же над̾ вода́ми нб҃о ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Торжествꙋ́имъ празднолю́бцы, и҆ сра́дꙋемсѧ дꙋ́хомъ, во ст҃ѣ́мъ пра́здницѣ ᲂу҆чрежда́ющесѧ дне́сь, дще́ре цр҃е́вы, и҆ мт҃ре бг҃а на́шегѡ.
І҆ѡакі́ме, ра́дꙋйсѧ дне́сь, и҆ весели́сѧ а҆́нно дх҃омъ, рожде́ннꙋю и҆з̾ ва́съ гдⷭ҇ꙋ приводѧ́ще трилѣ́тствꙋющꙋ, ꙗ҆́кѡ ю҆́ницꙋ чтⷭ҇ꙋ всенепоро́чнꙋю.
Бж҃їе селе́нїе во хра́мъ ст҃ы́й приво́дитсѧ бцⷣа марїа́мъ, пло́тїю, трилѣ́тствꙋющаѧ, и҆ то́й свѣщесвѣ́тѧтъ дѣ̑вы предтекꙋ́ще.
Бж҃їѧ а҆́гница небла́зненнаѧ, и҆ голꙋби́ца нескве́рнаѧ, бг҃овмѣсти́маѧ ски́нїѧ, сла́вы ѡ҆сщ҃е́нїе, въ ски́нїи ст҃ѣ́й ѡ҆бита́ти и҆збра̀.
Трилѣ́тствꙋющаѧ тѣ́ломъ, и҆ многолѣ́тствꙋющаѧ дх҃омъ, ши́ршаѧ нб҃съ, и҆ го́рнихъ си́лъ превы́шшаѧ, да восхва́литсѧ пѣ́сньми бг҃оневѣ́стнаѧ.
Бцⷣы пра́зднꙋюще, въ невходи́мыхъ предше́ствїе, свѣщеимꙋ́ще, ᲂу҆́мнѡ съ весе́лїемъ дне́сь, и҆ мы̀ съ дѣ́вами ко хра́мꙋ прибли́жимсѧ.
Сщ҃е́нницы бж҃їи ѡ҆блецы́тесѧ въ пра́вдꙋ бл҃года́тїю, и҆ срѧ́щите свѣ́тлѡ, вхо́ды подаю́ще дще́ри цр҃ѧ̀ и҆ бг҃а во ст҃а̑ѧ.
Трⷪ҇ченъ:
Свѣ́тъ ѻ҆ц҃ъ, свѣ́тъ сн҃ъ є҆гѡ̀, свѣ́тъ дх҃ъ ᲂу҆тѣ́шительный, ꙗ҆́кѡ ѿ сл҃нца бо є҆ди́нагѡ трⷪ҇цы сїѧ́юще, бж҃е́ственнѡ ѡ҆зарѧ́етъ, и҆ соблюда́етъ дꙋ́шы на́шѧ.
Бг҃оро́диченъ:
Тѧ̀ прⷪ҇ро́цы проповѣ́даша кївѡ́тъ, чтⷭ҇аѧ, ст҃ы́ни, кади́льницꙋ златꙋ́ю, и҆ свѣ́щникъ, и҆ трапе́зꙋ: и҆ мы̀ ꙗ҆́кѡ бг҃овмѣсти́мꙋю ски́нїю воспѣва́емъ тѧ̀.
Сѣда́ленъ, гла́съ д҃:
Возопі́й дв҃де, что̀ се́й настоѧ́щїй пра́здникъ, ю҆́же воспѣ́лъ є҆сѝ и҆ногда̀ въ кни́зѣ ѱало́мстѣй, ꙗ҆́кѡ дще́рь бг҃оѻтрокови́цꙋ и҆ дв҃ꙋ: приведꙋ́тсѧ, речѐ, цр҃ю̀ та́инственнѡ дѣ̑вы во слѣ́дъ є҆ѧ̀, и҆ бли̑жнїѧ є҆ѧ̀. и҆ ди́венъ содѣ́лай и҆ всемі́ренъ пра́здникъ зовꙋ́щымъ: бцⷣа на́мъ предста̀, сп҃се́нїѧ хода́таица.
Сла́ва, и҆ ны́нѣ:
Непоро́чнаѧ а҆́гница и҆ нескве́рный черто́гъ, въ до́мъ бж҃їй бцⷣа марїа́мъ съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи бл҃жа́тъ при́снѡ, и҆ бл҃года́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ сп҃се́нїе ты̀ є҆сѝ, всенепоро́чнаѧ.
Пѣ́снь д҃.
І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ вопїѧ̀: внегда̀ прибли́житисѧ лѣ́тѡмъ, позна́ешисѧ: внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Прⷪ҇ро́че и҆са́їе, прорцы̀ на́мъ, дв҃а кто̀ є҆́сть и҆мꙋ́щаѧ во чре́вѣ, ꙗ҆́же и҆з̾ і҆ꙋ́дина ко́рене прозѧ́бши, и҆ ро́ждшисѧ и҆з̾ дв҃да царѧ̀, сѣ́мене ст҃а́гѡ, пло́дъ бл҃госла́вный;
Начина́йте дѣ̑вы и҆ воспо́йте пѣ̑сни, рꙋка́ми держа́ще свѣщы̀, чтⷭ҇ыѧ бцⷣы предше́ствїе хва́лѧще, ны́нѣ грѧдꙋ́щїѧ во хра́мъ бж҃їй кꙋ́пнѡ съ на́ми пра́зднꙋющи.
І҆ѡакі́ме и҆ а҆́нно весели́тесѧ ны́нѣ, во хра́мъ приводѧ́ще гдⷭ҇нь чтⷭ҇ꙋю бг҃а мт҃рь хрⷭ҇та̀ всецр҃ѧ̀ бꙋ́дꙋщꙋю, ѿ ва́съ же ро́ждшꙋюсѧ, ꙗ҆́кѡ трилѣ́тствꙋющꙋю ю҆́ницꙋ.
Ст҃а́ѧ ст҃ы́хъ сꙋ́щи чтⷭ҇аѧ, во хра́мъ ст҃ы́й возлюби́ла є҆сѝ всели́тисѧ, и҆ со а҆́гг҃лы, дв҃о, бесѣ́дꙋющи пребыва́еши, пресла́внѣ съ нб҃съ хлѣ́бъ прїе́млющи, пита́тельнице жи́зни.
Ро́ждше па́че наде́жды пречтⷭ҇ꙋю дв҃ꙋ, бл҃гочести́вѡ ѡ҆бѣща́хꙋсѧ бг҃ꙋ принестѝ: и҆ и҆сполнѧ́ютъ, даю́ще ꙗ҆́кѡ же́ртвꙋ рожде́ннꙋю ѿ ни́хъ, і҆ѡакі́мъ дне́сь и҆ а҆́нна, въ до́мъ бж҃їй.
Прозѧбѐ же́злъ и҆ногда̀ а҆арѡ́новъ, проѡбразꙋ́ющїй, чтⷭ҇аѧ, бж҃е́ственное ржⷭ҇тво̀, ꙗ҆́кѡ безсѣ́меннѡ зачне́ши, и҆ нетлѣ́нна пребꙋ́деши, и҆ по ржⷭ҇твѣ̀ дѣ́вствꙋющи ꙗ҆ви́шисѧ, млⷣнца пита́ющи всѣ́хъ бг҃а.
Дѣ̑вы дв҃ꙋ, и҆ ма́тєри мт҃рь бл҃гоче́стнѡ стецы́тесѧ почти́ти съ на́ми ро́ждшꙋюсѧ, ꙗ҆́кѡ непоро́чнꙋю же́ртвꙋ и҆ рожде́ннꙋю бг҃ꙋ плодоноси́мꙋю, всѝ ᲂу҆́бѡ свѣ́тлѡ пра́зднꙋемъ.
Трⷪ҇ченъ:
Трⷪ҇цꙋ ли́цы, є҆ди́ницꙋ ѡ҆́бразомъ бл҃гоче́стнѡ сла́вимъ, бг҃а и҆́стинна, є҆го́же пою́тъ а҆́гг҃льскаѧ и҆ а҆рха̑гг҃льскаѧ чинонача̑лїѧ, ꙗ҆́кѡ тва́ри влⷣкꙋ, и҆ человѣ́цы вѣ́рнѡ покланѧ́ющесѧ при́снѡ.
Бг҃оро́диченъ:
Молѝ непреста́ннѡ, прест҃а́ѧ, чтⷭ҇аѧ, є҆го́же пло́тїю родила̀ є҆сѝ сн҃а твоего̀ и҆ бг҃а, ѿ многоѡбра́зныхъ сѣ́тей дїа́волихъ, и҆ ѿ всѧ́кихъ и҆скꙋше́нїй находѧ́щихъ всѧ̑ и҆зба́вити рабы̑ твоѧ̑.
Пѣ́снь є҃.
І҆рмо́съ:
Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче хрⷭ҇тѐ бж҃е на́шъ.
Да свѣтлоно́симъ, правосла́внїи, всѝ стека́ющесѧ и҆ сла́вѧще бг҃омт҃рь, ꙗ҆́кѡ гдⷭ҇ꙋ дне́сь приво́дитсѧ, ꙗ҆́кѡ же́ртва бл҃гопрїѧ́тна.
Да веселѧ́тсѧ пра́ѻтцы дне́сь, влⷣчце, и҆ да ра́дꙋетсѧ ро́ждшаѧ тѧ̀ со ѻ҆тце́мъ твои́мъ, ꙗ҆́кѡ пло́дъ и҆́хъ гдⷭ҇ꙋ прино́ситсѧ.
Многоимени́тꙋю и҆ сла́внѣйшꙋю непоро́чнꙋю ю҆́ницꙋ, ꙗ҆́кѡ пло́тїю ро́ждшꙋю бж҃е́ственнаго тельца̀, всѝ воспои́мъ вѣ́рнѡ пра́зднꙋюще.
Оу҆невѣ́щенїѧ написꙋ́ютсѧ бж҃е́ствєннаѧ зна́мєнїѧ, па́че ᲂу҆ма̀ ржⷭ҇тва̀ твоегѡ̀, чтⷭ҇аѧ дв҃о, дне́сь дх҃омъ ст҃ы́мъ въ домꙋ̀ бж҃їи.
Да ѿве́рзꙋтсѧ преддвє́рїѧ сла́вы бг҃а на́шегѡ, и҆ да прїе́млютъ неискꙋсобра́чнꙋю бж҃їю мт҃рь, ꙗ҆́коже трилѣ́тствꙋющꙋю нескве́рнꙋю ю҆́ницꙋ.
Многочⷭ҇тнꙋ́ю и҆ присѣ́ннꙋю го́рꙋ воспои́мъ приснодв҃ꙋ, бж҃їю мт҃рь бы́вшꙋ: та́ бо ѡ҆блиста̀ свѣ́тъ въ концѣ́хъ.
Трⷪ҇ченъ:
Пренача́льное и҆ присносꙋ́щное є҆ди́но бж҃ество̀ славосло́вѧще поклони́мсѧ, тре́ми ли́цы є҆стество́мъ нераздѣ́льное, и҆ сла́вою равноче́стное.
Бг҃оро́диченъ:
Приста́нище бл҃гоꙋти́шное, и҆ неѡбори́мꙋю стѣ́нꙋ стѧжа́хомъ мл҃твꙋ твою̀ во ѡ҆бстоѧ́нїихъ, бг҃ороди́тельнице, всегда̀ и҆збавлѧ́еми бѣ́дъ и҆ скорбе́й.
Пѣ́снь ѕ҃.
І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆з̾ тлѝ, и҆ сп҃си́ мѧ, сп҃се мі́ра, зовꙋ́ща: сла́ва тебѣ̀.
Пра́зднꙋимъ вѣ́рнїи пра́здникъ дх҃о́вный мт҃ре бж҃їѧ, воспѣва́юще бл҃гоче́стнѡ: є҆́сть бо ст҃ѣ́йша нбⷭ҇ныхъ ᲂу҆мѡ́въ.
Пѣ́сньми дх҃о́вными восхва́лимъ вѣ́рнїи мт҃рь свѣ́та: ꙗ҆́кѡ дне́сь на́мъ ꙗ҆ви́сѧ предходѧ́щи въ хра́мъ бж҃їй.
Нескве́рнаѧ а҆́гница, и҆ чтⷭ҇аѧ голꙋби́ца преведе́сѧ ѡ҆бита́ти въ до́мъ бж҃їй, ꙗ҆́кѡ непоро́чнаѧ, пронарече́ннаѧ бы́ти мт҃и бж҃їѧ.
Въ хра́мъ зако́нный вхо́ды соверша́етъ хра́мъ бж҃їй, нбⷭ҇наѧ ски́нїѧ, и҆з̾ неѧ́же на́мъ сꙋ́щымъ во тмѣ̀ свѣ́тъ возсїѧ̀.
Млⷣнствꙋющи пло́тїю, и҆ соверше́на дꙋше́ю, ст҃ы́й кївѡ́тъ въ до́мъ бж҃їй вхо́дитъ, воспита́тисѧ бж҃е́ственною бл҃года́тїю.
Ѿ всѧ́кихъ и҆скꙋше́нїй и҆ бѣ́дъ дꙋше́вныхъ, свободѝ ны̀ притека́ющыѧ къ тебѣ̀, всепѣ́таѧ, твои́ми мольба́ми, мт҃и хрⷭ҇та̀ бг҃а.
Трⷪ҇ченъ:
Ѻ҆ц҃ъ, и҆ сн҃ъ, и҆ дх҃ъ пра́вый, трїѷпоста́снаѧ є҆ди́нице, и҆ нераздѣли́маѧ трⷪ҇це, поми́лꙋй покланѧ́ющыѧсѧ бж҃е́ственнѣй держа́вѣ твое́й.
Бг҃оро́диченъ:
Во чре́вѣ твое́мъ вмѣще́нъ невмѣсти́мый всѣ́ми, бг҃омт҃и, бы́въ, и҆з̾ тебѐ произы́де пречⷭ҇таѧ, сꙋгꙋ́бъ є҆стество́мъ бг҃ъ и҆ чл҃вѣ́къ.
Конда́къ, гла́съ д҃:
Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, сщ҃е́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇нь, бл҃года́ть совводѧ́щи, ꙗ҆́же въ дс҃ѣ бж҃е́ственномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.
І҆́косъ:
Неизрече́нныхъ бж҃їихъ, и҆ бж҃е́ственныхъ та̑инъ, зрѧ̀ въ дв҃ѣ бл҃года́ть ꙗ҆влѧ́емꙋю, и҆ и҆сполнѧ́емꙋю ꙗ҆́вственнѡ, ра́дꙋюсѧ, и҆ ѡ҆́бразъ разꙋмѣ́ти недоꙋмѣ́юсѧ стра́нный и҆ неизрече́нный, ка́кѡ и҆збра́ннаѧ, чтⷭ҇аѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆жаса́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное.
Пѣ́снь з҃.
І҆рмо́съ:
Пе́щь, сп҃се, ѡ҆роша́шесѧ, ѻ҆́троцы же ликꙋ́юще поѧ́хꙋ: ѻ҆тцє́въ бж҃е бл҃гослове́нъ є҆сѝ.
Ликовствꙋ́имъ празднолю́бцы дне́сь, воспои́мъ чтⷭ҇ꙋю влⷣчцꙋ, і҆ѡакі́ма и҆ а҆́ннꙋ досто́йнѡ чтꙋ́ще.
Прⷪ҇ро́чествꙋй, дв҃де, глаго́лѧ дх҃омъ: приведꙋ́тсѧ дѣ̑вы въ слѣ́дъ тебѐ, приведꙋ́тсѧ тебѣ̀ во хра́мъ цр҃и́цы мт҃ри.
Ра́довахꙋсѧ а҆́гг҃лѡвъ чи́ни, веселѧ́хꙋсѧ првⷣныхъ дꙋ́си, ꙗ҆́кѡ бж҃їѧ мт҃рь во ст҃а̑ѧ приво́дитсѧ.
Прїе́млющи пи́щꙋ нбⷭ҇нꙋю, преспѣва́ше мꙋ́дростїю и҆ бл҃года́тїю, бы́вши мт҃и по пло́ти хрⷭ҇та̀ бг҃а.
И҆ тѣ́ломъ и҆ дꙋ́хомъ ра́довашесѧ, пребыва́ющи мр҃і́а непоро́чнаѧ во хра́мѣ бж҃їи, ꙗ҆́коже сосꙋ́дъ сщ҃е́ннѣйшїй.
Введо́ша тѧ̀ во внꙋ́треннѣйшее хра́ма, цѣломꙋ́дреннїи роди́телїе твоѝ, пречⷭ҇таѧ, воспита́тисѧ стра́ннѡ, въ жили́ще хрⷭ҇та̀ бг҃а.
Трⷪ҇ченъ:
Просла́вимъ трⷪ҇цꙋ нераздѣ́льнꙋю, воспои́мъ є҆ди́но бж҃ество̀ со ѻ҆ц҃е́мъ сло́во, и҆ дх҃а всест҃а́го.
Бг҃оро́диченъ:
Молѝ є҆го́же родила̀ є҆сѝ гдⷭ҇а, ꙗ҆́кѡ бл҃гоꙋтро́бна є҆стество́мъ сꙋ́ща, бг҃ороди́тельнице, сп҃стѝ дꙋ́шы воспѣва́ющихъ тѧ̀.
Пѣ́снь и҃.
І҆рмо́съ:
Є҆гѡ́же ᲂу҆жаса́ютсѧ а҆́гг҃ли, и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте сщ҃е́нницы, просла́вите ѻ҆́троцы, бл҃гослови́те лю́дїе и҆ превозноси́те во всѧ̑ вѣ́ки.
Весели́тсѧ дне́сь свѣ́тлѡ і҆ѡакі́мъ, и҆ а҆́нна непоро́чнаѧ гдⷭ҇ꙋ бг҃ꙋ прино́ситъ же́ртвꙋ, да́ннꙋю є҆́й ѿ ѡ҆бѣща́нїѧ свѧтꙋ́ю дще́рь.
Хва́лѧтсѧ свѧті́и, дв҃дъ и҆ і҆ессе́й, и҆ і҆ꙋ́да чти́тсѧ: и҆з̾ ко́рене бо и҆́хъ и҆зрастѐ пло́дъ, дв҃а чтⷭ҇аѧ, и҆з̾ неѧ́же роди́сѧ бг҃ъ превѣ́чный.
Мр҃і́а пречⷭ҇таѧ и҆ ѡ҆дꙋшевле́ннаѧ ски́нїѧ, приво́дитсѧ дне́сь въ до́мъ бж҃їй, и҆ прїе́млетъ сїю̀ заха́рїа рꙋка́ми, ꙗ҆́кѡ ѡ҆свѧще́нное сокро́вище гдⷭ҇не.
Ꙗ҆́кѡ две́рь сп҃си́тельнꙋю, и҆ го́рꙋ мы́сленнꙋю, ꙗ҆́кѡ лѣ́ствицꙋ ѡ҆дꙋшевле́ннꙋю, почти́мъ, вѣ́рнїи, вои́стиннꙋ дв҃ꙋ и҆ мт҃рь бж҃їю, бл҃гослове́ннꙋю рꙋка́ми і҆ере́євъ.
Прⷪ҇ро́цы, а҆пⷭ҇ли и҆ мч҃нцы хрⷭ҇тѡ́вы, а҆́гг҃лѡвъ чи́ни, и҆ всѝ земноро́днїи, почти́мъ пѣ́сньми дв҃ꙋ чтⷭ҇ꙋю, ꙗ҆́кѡ бл҃гослове́ннꙋю мт҃рь высоча́йшагѡ.
Въ хра́мъ тѧ̀ принесо́ша, всенепоро́чнаѧ чтⷭ҇аѧ, бж҃е́ственнѣ ро́ждшїи тѧ̀ ꙗ҆́кѡ же́ртвꙋ чи́стꙋ: и҆ стра́ннѡ водворѧ́ешисѧ въ неходи́мыхъ бг҃ꙋ, пред̾ꙋгото́ватисѧ въ жили́ще сло́вꙋ.
Трⷪ҇ченъ:
Да пое́тсѧ трист҃ы́й, ѻ҆ц҃ъ, и҆ сн҃ъ, и҆ дх҃ъ ст҃ы́й, нераздѣ́льнаѧ є҆ди́ница, є҆ди́но бж҃ество̀, держа́щее дла́нїю всю̀ тва́рь, во всѧ̑ вѣ́ки.
Бг҃оро́диченъ:
Безнача́льное начина́етсѧ сло́во пло́тїю, роди́всѧ ꙗ҆́кѡ бл҃говолѝ, бг҃ъ же и҆ чл҃вѣ́къ, и҆з̾ ѻ҆трокови́цы дв҃ы, возсозида́ѧ ны̀ пре́жде па́дшыѧ, ра́ди кра́йнѧгѡ бл҃гоꙋтро́бїѧ.
Пѣ́снь ѳ҃.
І҆рмо́съ:
свѣтоно́сный ѻ҆́блакъ, во́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ безнача́льный, велича́емъ всѝ ꙗ҆́кѡ мт҃рь бг҃а на́шегѡ чтⷭ҇ꙋю.
Припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́овыми.
И҆з̾ пра́ведныхъ произы́де і҆ѡакі́ма и҆ а҆́нны, ѡ҆бѣща́нїѧ пло́дъ бг҃оѻтрокови́ца мр҃і́а: и҆ ꙗ҆́кѡ кади́ло прїѧ́тное, пло́тїю младе́нствꙋющи, приво́дитсѧ во свѧти́лище ст҃о́е, ꙗ҆́кѡ ст҃а́ѧ во ст҃ы́хъ ѡ҆бита́ти.
Припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́овыми.
Младе́нствꙋющꙋю є҆стество́мъ, и҆ па́че є҆стества̀ ꙗ҆́вльшꙋюсѧ мт҃рь бж҃їю, восхва́лимъ пѣ́сньми: въ хра́мъ бо зако́нный гдⷭ҇ꙋ дне́сь приво́дитсѧ, въ воню̀ бл҃гово́нїѧ првⷣныхъ, ꙗ҆́кѡ пло́дъ дх҃о́вный.
Припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́овыми.
Со а҆́гг҃ломъ, є҆́же ра́дꙋйсѧ, бцⷣѣ прили́чнѣ возопїи́мъ вѣ́рнїи: ра́дꙋйсѧ, вседо́браѧ невѣ́сто. ра́дꙋйсѧ ѻ҆́блаче свѣ́тлый, и҆з̾ негѡ́же на́мъ возсїѧ̀ гдⷭ҇ь, во тмѣ̀ невѣ́дѣнїѧ сѣдѧ́щымъ. ра́дꙋйсѧ всѣ́хъ наде́ждо.
Припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́овыми.
Ст҃ы́хъ ст҃а́ѧ, и҆ бг҃омт҃и мр҃і́е, мл҃твами твои́ми, чтⷭ҇аѧ, свободи́ ны ѿ сѣ́тей вра́жїихъ, и҆ всѧ́кїѧ є҆́реси и҆ ско́рби, вѣ́рнѡ покланѧ́ющыѧсѧ ѡ҆́бразꙋ ст҃а́гѡ твоегѡ̀ зра́ка.
Припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́овыми.
Пѣ́снь досто́йнꙋю бцⷣѣ всѧ̀ тва́рь со а҆́гг҃ломъ гаврїи́ломъ взыва́етъ, вопїю́ще: ра́дꙋйсѧ, мт҃и бж҃їѧ всенепоро́чнаѧ, є҆́юже и҆зба́вихомсѧ пе́рвыѧ клѧ́твы, бы́вше нетлѣ́нїѧ ѻ҆́бщницы.
Припѣ́въ:
Велича́й, дꙋшѐ моѧ̀, приведе́ннꙋю во хра́мъ гдⷭ҇нь, и҆ бл҃гослове́ннꙋю рꙋка́ми і҆ере́овыми.
Херꙋві̑мъ пребо́льши, и҆ серафі̑мъ вы́шши, и҆ ши́рши нб҃съ ꙗ҆ви́ласѧ є҆сѝ, дв҃о: ꙗ҆́кѡ невмѣ́стнаго всѣ́ми, во ᲂу҆тро́бѣ вмѣсти́вши бг҃а на́шего, и҆ ро́ждши несказа́ннѡ, є҆го́же молѝ прилѣ́жнѡ ѡ҆ на́съ.
Припѣ́въ:
Велича́й, дꙋшѐ моѧ̀, трїѷпоста́снагѡ и҆ нераздѣ́льнагѡ бж҃ества̀ держа́вꙋ.
Трⷪ҇ченъ:
Трїѷпоста́сное є҆стество̀, и҆ нераздѣ́льнꙋю сла́вꙋ, и҆ въ бж҃ествѣ̀ є҆ди́номъ пое́мꙋю непреста́ннѡ, на нб҃сѝ и҆ на землѝ, трⷪ҇цꙋ неразлꙋ́чнꙋю просла́вимъ, съ сн҃омъ ѻ҆ц҃ꙋ̀, и҆ дх҃ꙋ покланѧ́ющесѧ бл҃гоче́стнѡ.
Припѣ́въ:
Велича́й, дꙋшѐ моѧ̀, чтⷭ҇нѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.
Бг҃оро́диченъ:
Под̾ твоѐ бл҃гоꙋтро́бїе прибѣга́ющыѧ вѣ́рнѡ, и҆ покланѧ́ющыѧсѧ бл҃гоче́стнѡ сн҃ꙋ твоемꙋ̀, дв҃о бг҃ороди́тельнице, ꙗ҆́кѡ бг҃ꙋ и҆ гдⷭ҇ꙋ мі́ра, моли́сѧ ѿ тлѝ и҆ бѣ́дъ и҆зба́вити, и҆ всѧ́ческихъ и҆скꙋше́нїй.
Свѣти́ленъ:
Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ и҆ же́злъ и҆ скрижа́ль, и҆ несѣко́мꙋю го́рꙋ, мр҃і́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ, воспита́тисѧ гдⷭ҇ꙋ.