Пѣ́снь а҃.
І҆рмо́съ:
Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀, дꙋшѝ трича́стное потопѝ, молю́сѧ, да тебѣ̀ ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Весели́сѧ нб҃о, и҆ землѐ ра́дꙋйсѧ: прест҃ы́й бо крⷭ҇тъ происхо́дитъ, ѡ҆свѧща́ѧ ны̀ бл҃года́тїю. сего̀ цѣлꙋ́ющыѧ, ꙗ҆́кѡ и҆сто́чника ст҃ы́ни, и҆ всѣ́хъ ѡ҆боже́нїѧ винꙋ̀.
Ше́ствовати благоче́стнѡ нбⷭ҇нꙋю стезю̀, ᲂу҆крѣпѝ на́съ прест҃ы́й крⷭ҇те, вѣ́рнѡ покланѧ́ющыѧсѧ тебѣ̀: ꙗ҆́кѡ да проти́вныхъ ᲂу҆кло́ньшесѧ про́пастей, ѻ҆́бщницы бжⷭ҇твенныѧ сла́вы бꙋ́демъ.
Зна́нны творцꙋ̀ тобо́ю бы́вше, всечⷭ҇тны́й крⷭ҇те, се́рдцемъ и҆ дꙋше́ю ѡ҆б̾е́млемъ всегда́ тѧ предлежа́ща зрѧ́ще, и҆ ᲂу҆мо́мъ просвѣща́емсѧ, всевино́вное сло́во сла́вѧще.
Бг҃оро́диченъ:
Гра́дъ бг҃а всецр҃ѧ̀, бл҃гопрїѧ́тное сокро́вище честно́е, бцⷣе всенепоро́чнаѧ, сохранѝ тво́й жре́бїй всегда̀ благохва́лѧщїй тѧ̀, и҆ почита́ющїй вѣ́рою ржⷭ҇тво̀ твоѐ.
Пѣ́снь г҃.
І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Сла́вꙋ хрⷭ҇то́вꙋ тѧ̀ быва́ющꙋ вѣ́рою сла́вимъ, прославлѧ́еми твои́мъ пресла́вне гдⷭ҇ень крⷭ҇те, честны́мъ ѡ҆б̾ѧ́тїемъ, и҆ просвѣща́еми.
Въ весе́лїи прише́дше, вѣ́рнїи, почерпе́мъ ꙗ҆́кѡ ѿ и҆сто́чника чи́ста, крⷭ҇та̀, присноживꙋ́щыѧ во́ды, и҆ спаса́еми бг҃а восхва́лимъ.
Жи́знь сы́й і҆и҃съ, повѣ́шенъ ᲂу҆мертви́сѧ на дре́вѣ крⷭ҇тнѣмъ, є҆го́же ны́нѣ вѣ́рнѡ ѡ҆б̾е́млюще, стра̑сти ѿгонѧ́емъ, сме́рти хода́таи.
Бг҃оро́диченъ:
Ꙗ҆ви́вшисѧ дꙋшѝ моеѧ̀ тмꙋ̀ ѿженѝ, грѣхѡ́вныѧ ᲂу҆́зы, чⷭ҇таѧ дв҃о, расто́ргни, и҆ спаси́ мѧ, ро́ждшаѧ всеще́драго.
Сѣда́ленъ, гла́съ д҃.
Просте́ръ мѡѷсе́й рꙋ́ки къ высотѣ̀ нбⷭ҇нѣй, проѡбразова́ше крⷭ҇тъ, бжⷭ҇твенное ѻ҆рꙋ́жїе вѣ́рныхъ, на не́мже хрⷭ҇то́съ грѣхѝ пригвоздѝ. тѣ́мъ вра́гъ пла́каше стражда̀ болѣ́зненнѡ чꙋ́вствы, глаго́лаше, древѧно́е мѧ̀ копїѐ прободѐ посредѣ̀ се́рдца моегѡ̀. хрⷭ҇то́съ всѧ̑ ѿ а҆́дскихъ ᲂу҆́зъ рѣши́тъ.
Пѣ́снь д҃.
І҆рмо́съ:
Любвѐ ра́ди, ще́дре, твоегѡ̀ ѻ҆́браза, на крестѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.
Солнцезра́ченъ ви́дитсѧ, покланѧ́емый ѿ вѣ́рныхъ человѣ́кѡвъ крⷭ҇тъ гдⷭ҇ень, є҆го́же цѣлꙋ́юще, дꙋша́ми просвѣща́емсѧ.
Бг҃ъ гдⷭ҇ь воплоща́емь ꙗ҆ви́сѧ, и҆ возвы́сивсѧ на дре́вѣ: томꙋ̀ покланѧ́ющыѧсѧ просвѣща́етъ, при́снѡ ѿ лю́тыхъ и҆збавлѧ́ѧй.
Ѡ҆чище́нїе на́мъ и҆ ѡ҆ставле́нїе согрѣше́нїй, сло́ве бж҃їй пода́ждь, вѣ́рнѡ покланѧ́ющымсѧ дне́сь, предлежа́щемꙋ крⷭ҇тꙋ̀ твоемꙋ̀ честно́мꙋ.
Бг҃оро́диченъ:
Не и҆стощи́въ ѻ҆ч҃ескихъ нѣ́дръ сло́во, въ твои́хъ нѣ́дрѣхъ, ѻ҆трокови́це, восклони́сѧ ꙗ҆́кѡ млⷣнецъ, хотѧ̀ ѡ҆бнови́ти мѧ̀ тлѝ подлежа́щаго.
Пѣ́снь є҃.
І҆рмо́съ:
Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣшѝ ны̀, бл҃же, тво́й ми́ръ да́рꙋѧй.
На стра̑сти ᲂу҆крѣпѝ на́съ тлетвѡ́рныѧ, тѧ̀ почита́ющихъ, и҆ цѣлꙋ́ющихъ, честны́й крⷭ҇те, ст҃ы́ѧ стрⷭ҇ти, ст҃ѣ́йшее зна́менїе.
Просвѣще́ннїи дне́сь сердцы̀ и҆ дꙋша́ми, до́брыми ви́ды пристꙋ́пимъ, вѣ́рнїи, и҆ свѧще́нномꙋ, и҆ бжⷭ҇твенномꙋ дре́вꙋ крⷭ҇та̀ поклони́мсѧ.
Мє́ррскїѧ ѡ҆слажда́ѧ пре́жде во́ды мѡѷсе́й, зна́менꙋѧ дре́вомъ тебѐ, честны́й крⷭ҇те, и҆́мже сла́дость спаси́тельнꙋю человѣ́кѡмъ и҆ска́палъ є҆сѝ.
Бг҃оро́диченъ:
За ны̀ помоли́сѧ хрⷭ҇тꙋ̀, ѿ твои́хъ чⷭ҇тыхъ крове́й, пречⷭ҇таѧ ѻ҆трокови́це, пло́тїю веще́ственною ѡ҆дѣ́ѧннꙋ, и҆ земны̑ѧ ѡ҆бно́вльшꙋ.
Пѣ́снь ѕ҃.
І҆рмо́съ:
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.
Прободе́нъ на тебѣ̀ въ рє́бра зижди́тель, крⷭ҇те, во́льнѡ повѣ́шенъ, кро́вь и҆ во́дꙋ и҆сточа́етъ, и҆́миже назда́хомсѧ вѣ́рнѡ тѧ̀ цѣлꙋ́ющїи.
Дре́во гдⷭ҇не жизнода́рное, и҆сто́чникъ безсме́ртїѧ, и҆збавле́нїе всегѡ̀ мі́ра: спаси́ ны цѣлꙋ́ющыѧ тѧ̀, ꙗ҆́кѡ храни́телѧ на́шего спаси́тельнаго.
Ѻ҆рꙋ́жїе на́мъ крѣ́пкое показа́лсѧ є҆сѝ, и҆́мже побѣжда́емъ всѧ̑ навѣ́ты проти́вныхъ, бжⷭ҇твенный крⷭ҇те, пра́востїю дꙋше́вною свѧще́ннѡ тѧ̀ цѣлꙋ́ющїи.
Бг҃оро́диченъ:
Ст҃ы́й хра́мъ во ст҃ы́хъ почива́ющагѡ, была̀ є҆сѝ бг҃ороди́тельнице: тѣ́мже ны̀ вѣ́рнѡ пою́щыѧ тѧ̀, ѡ҆свѧща́еши дв҃о мт҃и.
Пѣ́снь з҃.
І҆рмо́съ:
Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Дре́вле въ благослове́нїихъ дѣте́й і҆а́кѡвъ тѧ̀ проначерта̀, честны́й крⷭ҇те: но мы́ тѧ ны́нѣ покланѧ́ющесѧ чти́мъ, просвѣще́нїе почерпа́юще.
Глаго́лы прїѧ́ша коне́цъ ны́нѣ бжⷭ҇твенныхъ прⷪ҇ро́кѡвъ крⷭ҇те свѧще́ннѣйше: всѣ́хъ бо гдⷭ҇ь на тебѣ̀ возвы́сисѧ всѧ̑ ѿ тлѝ и҆збавлѧ́ѧ.
Оу҆сты́ тѧ и҆ се́рдцемъ всечестны́й крⷭ҇те, ны́нѣ ѡ҆б̾е́млюще, ѡ҆свѧще́нїе, здра́вїе и҆ спасе́нїе всегда̀ почерпа́емъ дꙋши́ же и҆ тѣлесѐ.
Бг҃оро́диченъ:
Дв҃о бл҃гослове́ннаѧ, моли́сѧ ѡ҆ на́съ молѧ́щихсѧ тебѣ̀ на тѧ́ бо надѣ́емсѧ всѝ, и҆ тебѣ̀ вопїе́мъ: влⷣчце, не пре́зри па́ствы твоеѧ̀.
Пѣ́снь и҃.
І҆рмо́съ:
И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.
Спаси́тельномꙋ ѻ҆рꙋ́жїю, и҆ нерасте́рзномꙋ, вѣ́рныхъ гото́вой по́мощи, крѣ́пкомꙋ защище́нїю, крⷭ҇тꙋ̀ гдⷭ҇ню ны́нѣ поклони́мсѧ, предъ всѣ́ми предлежа́щꙋ.
Высо́цѣ на дре́вѣ возвѣ́си впрекѝ ѕмі́ѧ, ꙗ҆́кѡ писа́сѧ, мѡѷсе́й прописꙋ́ѧ тѧ̀ всечестно́е дре́во, и҆́мже пре́лести мы́сленныхъ ѕмїє́въ и҆збавлѧ́емсѧ.
Свѣще́нїе дꙋ́шъ на́шихъ є҆сѝ, свѣтода́вче крⷭ҇те всече́стне: тѧ́ бо ѡ҆б̾е́млюще, нача̑ла тмы̑ же и҆ вла̑сти ѿража́емъ бжⷭ҇твенною твое́ю си́лою.
Бг҃оро́диченъ:
Чтⷭ҇ꙋю и҆ дв҃ꙋ почти́мъ, безнача́льное сло́во, и҆ несозда́нное, преесте́ственнѡ ро́ждшꙋю въ на́ше спасе́нїе, пѣ́сненнѡ вопїю́ще: бл҃гослови́мъ дв҃о ржⷭ҇тво̀ твоѐ.
Пѣ́снь ѳ҃.
І҆рмо́съ:
Ржⷭ҇тво̀ твоѐ нетлѣ́нно ꙗ҆ви́сѧ: бг҃ъ и҆зъ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ: тѧ̀, бцⷣе, тѣ́мъ всѝ велича́емъ.
Хрⷭ҇то́съ на тебѣ̀ повѣ́шенъ, мі́ръ возвы́си па́дшїй поги́бели во глꙋбинꙋ̀, и҆́стиннѡ крⷭ҇те гдⷭ҇ень: тѣ́мже тебѣ̀ любо́вїю ны́нѣ покланѧ́емсѧ, и҆ чти́мъ и҆ сла́вимъ.
Дꙋ́шы да ѡ҆чи́стимъ и҆ сердца̀, до́брыми є҆ди́нѣми дѣѧ̑нїи, и҆ предлежа́щее посредѣ̀, спаси́тельное зрѧ́ще дре́во крⷭ҇та̀, вѣ́рою и҆ любо́вїю бг҃омꙋ́дреннѡ поклони́мсѧ.
Ꙗ҆́кѡ со́лнце вели́кое, блиста́ньми твои́ми ѡ҆зарѧ́еши сꙋ́щыѧ во тмѣ̀, и҆ де́мѡны попалѧ́еши, краснѣ́йшїй крⷭ҇те. тѣ́мже вопїе́мъ: просвѣтѝ всѧ̑ вѣ́рою покланѧ́ющыѧсѧ тебѣ̀.
Бг҃оро́диченъ:
Свѣ́томъ мѧ̀ ѡ҆зарѝ бжⷭ҇твеннымъ, свѣ́та прїѧ́телище, дв҃о, страсте́й мои́хъ тмꙋ̀, и҆ сласте́й глꙋбоча́йшꙋю и҆́стиннѡ но́щь, бг҃ороди́тельнице всест҃а́ѧ, ѿгонѧ́щи.
Свѣти́ленъ.
Свѣтода́тельными сїѧ́ньми крⷭ҇тъ гдⷭ҇ень въ тогѡ̀ вознесе́нїе, всѧ̑ любо́вїю бжⷭ҇твенною предлежа̀ призыва́етъ: прїиди́те сего̀ всѝ ра́достїю, и҆ любо́вїю, и҆ стра́хомъ цѣлꙋ́емъ вѣ́рнѡ, и҆ просла́вимъ є҆ди́наго творца̀, и҆ влⷣкꙋ.