Пѣ́снь а҃.
І҆рмо́съ:
Волно́ю морско́ю скры́вшаго дре́вле, гони́телѧ, мꙋчи́телѧ, въ ꙗ҆́слехъ сокрыва́емаго ᲂу҆би́ти и҆́щетъ и҆́рѡдъ: но мы̀ съ волхвы̑ пои́мъ: гдⷭ҇еви воспои́мъ, сла́внѡ бо просла́висѧ.
Кнѧ́зь и҆зъ і҆ꙋ́ды ѡ҆скꙋдѣ̀ ᲂу҆жѐ: є҆мꙋ́же бо завѣща́сѧ, ꙗ҆́коже предписа́сѧ, ꙗ҆зы́кѡвъ ча́ѧнїе і҆и҃съ хрⷭ҇то́съ прїи́де, и҆ въ верте́пѣ ражда́етсѧ кра́йнїи ра́ди бл҃гости.
Виѳлее́ме, весели́сѧ ра́достїю: въ тебѣ́ бо ражда́етсѧ хрⷭ҇то́съ гдⷭ҇ь. вселе́ннаѧ да и҆гра́етъ, прїе́млющи и҆збавле́нїе: да ликꙋ́етъ всѧ̀ тва́рь пра́зднꙋющи.
Ро́дъ человѣ́ческїй хотѧ̀ спастѝ, пребл҃гі́й, во ᲂу҆тро́бꙋ всели́сѧ неискꙋсобра́чныѧ дв҃ы: и҆ сѐ роди́тисѧ грѧде́тъ. томꙋ̀ поклони́мсѧ: сла́внѡ бо просла́висѧ.
Пѣ́снь г҃.
І҆рмо́съ:
Тебѐ на вода́хъ повѣ́сившаго всю̀ зе́млю неѡдержи́мѡ, тва́рь ви́дѣвши въ верте́пѣ ражда́ющасѧ, ᲂу҆́жасомъ содрога́шесѧ, нѣ́сть свѧ́тъ, па́че тебє̀, гдⷭ҇и, зовꙋ́щи.
Въ ра́бїй ѡ҆блещи́сѧ ѻ҆́бразъ восхотѣ́лъ є҆сѝ, ꙗ҆́кѡ да рабо́ты мѧ̀ лꙋка́ваго и҆зба́виши, пѣсносло́влю твоѐ бл҃гоꙋтро́бїе, сло́ве, ѻ҆ц҃ꙋ̀ собезнача́льне и҆ соприсносꙋ́щне: сла́ва смотре́нїю твоемꙋ̀.
Грѧде́тъ дв҃а гдⷭ҇а роди́ти въ верте́пѣ, предвари́те, волсвѝ: па́стырїе ны́нѣ прїиди́те, пѣ́снь съ высоты̀ а҆́гг҃ли возопі́йте, ꙗ҆ви́сѧ человѣ́кѡмъ и҆збавле́нїе.
И҆ща́й мѧ̀ заблꙋ́ждшаго, чл҃вѣколю́бче, и҆ верте́пъ ꙗ҆́вльшасѧ разбо́йническїй дѣ́лы непло́дными, въ верте́пъ ны́нѣ прише́лъ є҆сѝ ѿ дв҃ы дне́сь роди́тисѧ, влⷣко: сла́ва, сло́ве, прише́ствїю твоемꙋ̀.
Конда́къ, гла́съ г҃.
Дв҃а дне́сь превѣ́чное сло́во въ верте́пѣ грѧде́тъ роди́ти неизрече́ннѡ: ликꙋ́й, вселе́ннаѧ, ᲂу҆слы́шавши, просла́ви со а҆́гг҃лы и҆ па́стырьми хотѧ́щаго ꙗ҆ви́тисѧ ѻ҆троча̀ мла́до, превѣ́чнаго бг҃а.
І҆́косъ:
Ѽ ᲂу҆жа́снагѡ вои́стиннꙋ и҆ па́че сло́ва чꙋдесѐ! є҆́же бы́ти даѧ́й всѣ̑мъ, ра́ди бл҃гости, во чре́во ст҃ы́ѧ дв҃ы вни́де, и҆ въ верте́пѣ роди́тисѧ грѧде́тъ, и҆ въ ꙗ҆́слехъ положи́тисѧ. ѕвѣзда́ же сего̀ проповѣ́дꙋетъ свы́ше волхвѡ́мъ, и҆дꙋ́щымъ на поклоне́нїе є҆гѡ̀ съ да̑ры, и҆здале́ча привлача́щи со тща́нїемъ послѣ́дꙋющыѧ валаа́ма прорече́нїю, ре́кшагѡ: ѕвѣзда̀ хо́щетъ провозвѣсти́ти ѻ҆троча̀ мла́до, превѣ́чнаго бг҃а.
Сла́ва, и҆ ны́нѣ:
Ра́дꙋйсѧ, сїѡ́не, виѳлее́ме, ᲂу҆краси́сѧ, всѣ́хъ содержи́тель ѕвѣздꙋ̀ предпосла́въ, возвѣстѝ своѐ безмѣ́рное схожде́нїе: є҆го́же бо трепе́щꙋтъ небє́сныѧ си̑лы, се́й ражда́етсѧ ѿ дв҃ы непревра́щнѡ, є҆ди́ный бг҃ъ на́шъ.
Пѣ́снь д҃.
І҆рмо́съ:
Ѿ дв҃ы прише́ствїе твоѐ прови́дѧ а҆ввакꙋ́мъ, ᲂу҆жа́ссѧ вопїѧ́ше: ты̀ ѿ ю҆́га, воплоща́ѧсѧ, прише́лъ є҆сѝ, и҆зба́вителю, а҆да́ма ѿринове́ннаго воззва́ти.
Свѣтоза́рный ѻ҆́блакъ грѧде́тъ, возсїѧ́ти хрⷭ҇та̀ и҆зъ мт҃рнихъ ложе́снъ, пра́вды сл҃нце, всю̀ зе́млю лꙋча́ми бжⷭ҇твенными просвѣща́ющаго.
Бг҃ъ человѣ́кѡмъ ꙗ҆ви́сѧ подо́бенъ, и҆ ѡ҆бнищава́етъ пло́тїю, да на́съ ѡ҆богати́тъ, и҆ въ верте́пѣ ражда́етсѧ: сего̀ вѣ́рнїи чи́стымъ се́рдцемъ под̾и́мемъ.
Сѐ хрⷭ҇то́съ во гра́дѣ ражда́етсѧ виѳлее́мѣ, ꙗ҆́кѡ да є҆де́мъ на́мъ ѿве́рзетъ, преслꙋша́нїемъ пе́рвѣе ѕмі́ѧ ѡ҆краде́нїѧ заключе́нный, бжⷭ҇твеннѡ торжествꙋ́имъ.
Пѣ́снь є҃.
І҆рмо́съ:
Къ тебѣ̀ ᲂу҆́тренюю, бл҃гоꙋтро́бїѧ ра́ди, себѐ и҆стощи́вшемꙋ непрело́жнѡ, и҆ зра́къ раба̀ ѿ дв҃ы носи́вшемꙋ, сло́ве бж҃їй. ми́ръ пода́ждь мѝ па́дшемꙋ, чл҃вѣколю́бче.
Се́рдце всѧ́кое земноро́дныхъ да и҆гра́етъ, да весели́тсѧ тва́рь: гдⷭ҇ь ражда́етсѧ и҆зъ ѻ҆трокови́цы чⷭ҇тыѧ въ верте́пѣ виѳлее́мстѣмъ, и҆ волсвѝ томꙋ̀ прино́сѧтъ да́ры достѡ́йныѧ.
Лю́дїе дре́вле въ сѣ́ни сме́ртнѣй сѣдѧ́щїи, ᲂу҆́зрите свѣ́тъ ва́мъ возсїѧ́вшїй ѿ дв҃ы, и҆ мно́гагѡ дꙋшесла́достїѧ и҆спо́лнитесѧ, ѡ҆бнища́вшаго сло́ва велича́юще при́снѡ.
Въ ма́лѣмъ верте́пѣ грѧде́ши вмѣсти́тисѧ, невмѣ́стный є҆стество́мъ: ꙗ҆́кѡ да мѧ̀ ᲂу҆ма́лившагосѧ престꙋпле́нїемъ, возвели́чиши за ми́лость безмѣ́рнꙋю. покланѧ́юсѧ твоемꙋ̀ бл҃гоꙋтро́бїю, долготерпѣли́ве.
Пѣ́снь ѕ҃.
І҆рмо́съ:
Бе́здна послѣ́днѧѧ грѣхѡ́въ ѡ҆бы́де мѧ̀, и҆ волне́нїѧ не ктомꙋ̀ терпѧ̀, ꙗ҆́кѡ і҆ѡ́на, влⷣцѣ вопїю́ ти: ѿ тли́ мѧ возведѝ.
Зако́нѡвъ тѧ̀ дв҃а плотски́хъ кромѣ̀, гдⷭ҇и, прихо́дитъ роди́ти въ верте́пѣ, и҆ во ꙗ҆́слехъ пло́тїю восклони́ти, ꙗ҆́кѡ млⷣнца.
Стра́нна мѧ̀ бы́вша ѿ бг҃а престꙋпле́ньми, пребжⷭ҇твенный, рожде́йсѧ ѿ ѻ҆трокови́цы неискꙋсобра́чныѧ, ми́лости ра́ди, граждани́на нбⷭ҇наго ꙗ҆влѧ́етъ.
Го́ры же и҆ хо́лмы и҆ ᲂу҆дѡ́лїѧ возвесели́тесѧ: гдⷭ҇ь бо пло́тїю ражда́етсѧ, ѡ҆бновлѧ́ѧй тва́рь, и҆стлѣ́вшꙋю лꙋка́выми престꙋпле́ньми.
І҆́косъ:
Ѿ дв҃ы на́съ ра́ди рожде́ннаго въ верте́пѣ хрⷭ҇та̀ жизнода́вца, лю́бѧще ѻ҆рꙋ́жницы, по́лкъ воздвиго́ша свѣ́телъ на велїа́ра: и҆ побѣди́вше ꙗ҆́вственнѡ на зе́млю того̀ низверго́ша, безмѣ́рнѡ сего̀ дре́вле хва́лѧщасѧ. тѣ́мже свѣ́тѧтъ сꙋ́щымъ во тмѣ̀, ꙗ҆́кѡ свѣти̑ла сꙋ́ще мы́сленнагѡ сл҃нца: ѕвѣзда́ бо ᲂу҆́бѡ пре́жде волхвѡ́мъ предста̀, пꙋтеводѧ́щи въ виѳлее́мъ, гра́дъ і҆ꙋ́довъ, сі́и же на́мъ проповѣ́даютъ чрезъ мꙋ̑ки, є҆го́же дв҃а безсѣ́меннѡ родѝ.
Пѣ́снь з҃.
І҆рмо́съ:
Ѻ҆́троцы въ вавѷлѡ́нѣ пе́щнагѡ пла́мене не ᲂу҆боѧ́шасѧ, но посредѣ̀ пла́мене вве́ржени, ѡ҆роша́еми поѧ́хꙋ: бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ.
Ка́кѡ тѧ̀ малѣ́йшїй, сло́ве под̾и́метъ верте́пъ; нището́ю мно́гою нищетꙋ̀ а҆да́мовꙋ ѿе́мшаго, и҆ бога́тствомъ бжⷭ҇твенныѧ бл҃года́ти человѣ́ки ѡ҆богати́вшаго;
Глаго́лы стра̑нныѧ па́стырїе слы́шавше, потща́шасѧ виѳлее́мъ ви́дѣти, и҆ въ ꙗ҆́слехъ безслове́сныхъ, разрѣша́ющаго безслове́сїѧ всѧ̑ человѣ́ки, возлежа́щаго.
Оу҆сты́ же и҆ се́рдцемъ, пло́тїю приходѧ́щаго роди́тисѧ хрⷭ҇та̀, въ верте́пѣ ѿ дв҃ы ѻ҆трокови́цы, пѣсносло́вити потщи́мсѧ, и҆ вѣ́рнѡ поклони́мсѧ.
Пѣ́снь и҃.
І҆рмо́съ:
За зако́ны ѻ҆ч҃єскїѧ блаже́ннїи въ вавѷлѡ́нѣ ю҆́ношы предбѣ́дствꙋюще, царю́ющагѡ ѡ҆плева́ша повелѣ́нїе безꙋ́мное, и҆ совокꙋ́плени, и҆́мже не свари́шасѧ, ѻ҆гне́мъ, держа́вствꙋющемꙋ досто́йнꙋю воспѣва́хꙋ пѣ́снь: гдⷭ҇а по́йте дѣла̀, и҆ превозноси́те во всѧ̑ вѣ́ки.
Па́че сло́ва є҆ди́наго гдⷭ҇а воплоще́ннаго, ѻ҆трокови́це, и҆ ѡ҆бложе́ннаго человѣ́ческимъ подо́бїемъ, держа́щи рꙋка́ми, и҆ покланѧ́ющисѧ, и҆ лобыза́ющи мт҃рски, ча́до, глаго́лала є҆сѝ, сладча́йшее, ка́кѡ тѧ̀ си́це держꙋ̀, держа́щаго рꙋко́ю всю̀ тва́рь, и҆ ѿ рꙋкѝ рабо́ты сїю̀ свобожда́ющаго;
Пѣсносло́вити, бжⷭ҇твеннїи а҆́гг҃ли, на землѝ ро́ждшагосѧ ᲂу҆гото́витесѧ: волсвѝ да́ры, пꙋтеводи́ми ѕвѣздо́ю, принеси́те: па́стырїе, сего̀ потщи́тесѧ ви́дѣти, на мт҃рнихъ, ꙗ҆́коже млⷣнца, сѣдѧ́ща ѡ҆б̾ѧ́тїихъ, вопїю́ще: гдⷭ҇а по́йте дѣла̀, и҆ превозноси́те во всѧ̑ вѣ́ки.
Свѣ́та ѻ҆́блаче, неискꙋсобра́чнаѧ, ка́кѡ пелена́ми повива́еши, ѻ҆́блаки ѡ҆дѣва́ющаго нб҃са̀ неизглаго́ланнымъ ма́нїемъ; ка́кѡ въ безслове́сныхъ ꙗ҆́слехъ воскланѧ́еши, безслове́сїѧ человѣ́ки за безмѣ́рнꙋю ми́лость и҆збавлѧ́ющаго влⷣкꙋ; є҆мꙋ́же всѧ̀ покланѧ́етсѧ стра́хомъ тва́рь, пѣсносло́вѧщи во всѧ̑ вѣ́ки.
Пѣ́снь ѳ҃.
І҆рмо́съ:
Не диви́сѧ ны́нѣ, ѽ мт҃и, ви́дѧщи ꙗ҆́кѡ млⷣнца, є҆го́же и҆зъ чре́ва пре́жде денни́цы родѝ ѻ҆ц҃ъ: возста́вити бо и҆ сопросла́вити человѣ́ческое па́дшее є҆стество̀ прїидо́хъ ꙗ҆́вственнѡ, вѣ́рою и҆ любо́вїю тѧ̀ велича́ющее.
Ра́дꙋйсѧ, прїѧ́телище, пречⷭ҇таѧ, ра́дости неизглаго́ланныѧ: се́ бо грѧде́ши роди́ти въ верте́пѣ неизрече́ннѡ влⷣкꙋ, хотѧ́щаго тва́рь всю̀, и҆стлѣ́вшꙋю престꙋпле́нїемъ пе́рвѣе, ѡ҆бнови́ти вои́стиннꙋ: сего̀ пѣсносло́вѧще вѣ́рою, тѧ̀ велича́емъ.
Дꙋ́шы пра́ведныхъ всѝ, и҆ подземна̑ѧ кꙋ́пнѡ ра́дꙋйтесѧ: се́ бо и҆збавле́нїе всѣ́хъ ꙗ҆ви́сѧ, во гра́дѣ виѳлее́мѣ ражда́ющеесѧ: ѕвѣзда́ же сего̀ возвѣща́етъ волхвѡ́мъ, и҆́щꙋщымъ благоче́стнѡ: є҆го́же и҆ ви́дѣвше въ верте́пѣ, ᲂу҆́жаса и҆спо́лнишасѧ.
Ꙗ҆́кѡ не́бо тѧ̀ и҆но́е воспѣва́емъ, дв҃о, пра́вды сл҃нце на́мъ и҆зъ ложе́снъ пречⷭ҇тыхъ хотѧ́щꙋю возсїѧ́ти ᲂу҆́треннее, просвѣща́ющее во тмѣ̀ сꙋ́щыѧ сме́рти и҆ тлѝ. тѣ́мже до́лжнѡ хвала́ми тѧ̀ велича́емъ.
Свѣти́ленъ.
Та́инство сокрове́нное, а҆́гг҃лѡмъ несказа́нное, ѻ҆ц҃а̀ бл҃говоле́нїемъ, и҆ дх҃а содѣ́йствомъ, хо́щетъ соверши́тисѧ, потщи́мсѧ: сло́во бо безнача́льное нача́ло прїе́мь, ꙗ҆́кѡ чл҃вѣ́къ, ѿ дв҃ы ражда́етсѧ на спасе́нїе мі́ра.