Пѣ́снь а҃.
І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Свѣщꙋ̀ свѣтоѧвле́ннꙋю и҆ незаходи́мꙋю, дв҃ы хра́мъ ꙗ҆́кѡ нб҃о ѡ҆брѣ́тъ свѣ́тлѡ, тоѧ̀ пресвѣ́тлый по́ѧсъ вселе́ннꙋю дне́сь чꙋде́съ ѡ҆блиста́етъ зарѧ́ми.
Крѣ́пость же и҆ ᲂу҆твержде́нїѧ сою́зъ, твои́мъ, пречⷭ҇таѧ, бжⷭ҇твеннымъ ꙗ҆́кѡ вои́стиннꙋ по́ѧсомъ, мы́сленнѣ ѡ҆поѧ́санъ гра́дъ тво́й, держа́вꙋ нераздра́ннꙋ и҆́мать: тѣ́мже и҆ ѡ҆ тебѣ̀ хва́литсѧ.
Дре́вле ꙗ҆́кѡ вои́стиннꙋ пречестна́гѡ кївѡ́та, твоѧ̀ ра́ка, бг҃ороди́тельнице, ꙗ҆ви́сѧ сꙋ́щымъ на землѝ, не скрижа̑ли носѧ́щаѧ, но вѣ́рнѡ соблюда́юща и҆́стины позна́нїѧ.
А҆рѡма́ты та̑йныѧ пролива́ютсѧ, во хра́мѣ чⷭ҇тыѧ, ѿ честны́ѧ дне́сь ра́ки: и҆ и҆сполнѧ́ютъ дꙋхо́внагѡ благово́нїѧ всѣ́хъ, любо́вїю къ то́й притека́ющихъ.
Пѣ́снь г҃.
І҆рмо́съ:
Весели́тсѧ ѡ҆ тебѣ̀ це́рковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Да почти́мъ, вѣ́рнїи, ꙗ҆́кѡ совокꙋпле́нїѧ къ бг҃ꙋ сою́зъ, чⷭ҇тыѧ дне́сь по́ѧсъ, и҆ вѣ́рнѡ да поклони́мсѧ.
Всегда́шнїи то́ки бл҃года́тей, чⷭ҇таѧ, ѿ пречⷭ҇тыѧ твоеѧ̀ ра́ки текꙋ́щїи, всѣ́хъ вѣ́рныхъ напаѧ́ютъ.
И҆сцѣлє́нїѧ вѣ̑рнымъ многопѣ́тый на́мъ дне́сь пречестны́ѧ честны́й по́ѧсъ, и҆сточа́етъ благода́тїю.
Ꙗ҆́кѡ роса̀ ᲂу҆́треннѧѧ, весе́лїе твоѐ, чⷭ҇таѧ, точа́щи, страсте́й пе́щь, тѧ̀ при́снѡ воспѣва́ющымъ ᲂу҆гаша́етъ.
Конда́къ, гла́съ в҃.
Бг҃опрїѧ́тное твоѐ чре́во, бцⷣе, ѡ҆б̾е́мшїй по́ѧсъ тво́й чⷭ҇тны́й, держа́ва гра́дꙋ твоемꙋ̀ неѡбори́ма, и҆ сокро́вище є҆́сть, благи́хъ неѡскꙋ́дно, є҆ди́на ро́ждшаѧ приснодв҃о.
Сѣда́ленъ, гла́съ д҃.
Ꙗ҆́кѡ бжⷭ҇твенное возложе́нїе во хра́мѣ бж҃їи, чⷭ҇таѧ, ѡ҆свѧти́сѧ по́ѧсъ всечестны́й, и҆́мже препоѧ́сала є҆сѝ ложесна̀, непоро́чнаѧ, бг҃а заче́ншаѧ. тѣ́мже семꙋ̀ вѣ́рою прикаса́ющесѧ, и҆ стра́хомъ че́стнѡ ѡ҆блобыза́юще, ѡ҆свѧща́емсѧ.
Сла́ва, и҆ ны́нѣ:
Положе́нїе твоегѡ̀ чⷭ҇тна́гѡ по́ѧса, цр҃ковь твоѧ̀ свѣ́тлѡ пра́зднꙋетъ, и҆ прилѣ́жнѡ зове́тъ тѝ, дв҃о чⷭ҇таѧ: всѧ̑ ѡ҆поѧ́ши на си́лꙋ вра́жїю, низложѝ шата́нїе безбо́жныхъ ва̑рваръ: и҆ на́шъ ᲂу҆пра́ви живо́тъ, дѣ́лати гдⷭ҇нѧ бж҃е́ствєннаѧ хотѣ̑нїѧ.
Пѣ́снь д҃.
І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Ꙗ҆́кѡ пречестно́е ᲂу҆твержде́нїе, бцⷣе, творе́цъ и҆ созда́тель тѧ̀ водрꙋзи́въ, ꙗ҆́коже ѕвѣзда́ми ᲂу҆краси́лъ тѧ̀ є҆́сть, бжⷭ҇твенными сїѧ̑нїи, и҆́миже просвѣща́еши концы̀.
Тѧ̀ держа́вꙋ гра́дъ тво́й, бцⷣе, и҆ тве́рдое ѡ҆снова́нїе и҆мѣ́ѧ, бжⷭ҇твеннымъ по́ѧсомъ твои́мъ содержи́тсѧ: сою́зъ неразори́мь се́й въ бра́нехъ притѧза́ющъ.
Ѿ землѝ на́съ возвлачи́тъ, бг҃ороди́тельнице, къ нб҃сѝ бжⷭ҇твенный по́ѧсъ тво́й, любо́вїю твое́ю и҆ тогѡ̀ возводи́мыхъ. тѣ́мъ тѧ̀ сла́вимъ, ꙗ҆́кѡ винꙋ̀ сла́вы лꙋ́чшїѧ.
Сѐ бл҃года́ть неисчерпа́емаѧ, прїиди́те всѝ ᲂу҆се́рднымъ се́рдцемъ, почерпи́те рѣ́ки точа́щыѧ незави́стнѡ празднолю́бцы, ѿ честны́ѧ ра́ки пречⷭ҇тыѧ мт҃ре.
Пѣ́снь є҃.
І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Ты̀, гдⷭ҇и, твою̀ мт҃рь возвели́чилъ є҆сѝ, ты̀ возвы́силъ є҆сѝ надъ всѧ̑ мы́слєнныѧ вла̑сти, безъ сравне́нїѧ сла́вы тоѧ̀.
Бл҃года́ть бж҃їѧ ны́нѣ незави́стнѡ подае́тсѧ, пречⷭ҇таѧ бцⷣе, ѿ чⷭ҇тны́ѧ ра́ки твоеѧ̀, вѣ́рою покланѧ́ющымсѧ тебѣ̀.
Твое́ю си́лою вѣ́рнїи ца́рїе ѡ҆поѧсꙋ́ютсѧ, тѧ̀ сою́зъ, бцⷣе, тво́й гра́дъ хва́лѧщи, по́ѧсомъ твои́мъ чествꙋ́етсѧ.
Вѣ́дома твоѧ̀ вои́стиннꙋ бл҃года́ть показа́сѧ, пречⷭ҇таѧ, пресла́внѡ дѣ́йствꙋющаѧ си̑лы, и҆ зна́мєнїѧ по все́й землѝ.
Пѣ́снь ѕ҃.
І҆рмо́съ:
Пожрꙋ̀ тѝ со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Всю̀ тѧ̀ преесте́ственнѣ просла́ви гдⷭ҇ь, всю̀ возвы́сивъ тѧ̀ є҆ди́нꙋ, всю̀ тѧ̀ почтѐ па́че сло́ва, бцⷣе, хра́мъ съ по́ѧсомъ и҆ бжⷭ҇твенною ра́кою.
И҆стека́ютъ и҆зъ пꙋчи́ны стрꙋи̑ бл҃года́ти ѿ ра́ки пречⷭ҇тыѧ, и҆ тва́рь всю̀ ѡ҆крꙋжа́ютъ напаѧ́юще, вѣ́рнѡ покланѧ́ющыѧсѧ ржⷭ҇твꙋ̀ твоемꙋ̀.
Крѣ́пость тѧ̀ вѣ́рнїи стѧжа́вше, и҆ похвалꙋ̀, ѡ҆поѧсꙋ́ютсѧ сла́вою, честны́й тво́й по́ѧсъ, бг҃ороди́тельнице, и҆мꙋ́ще ꙗ҆́кѡ пресвѣ́тлꙋю ᲂу҆́тварь и҆ честнꙋ́ю.
Конда́къ.
Честна́гѡ по́ѧса твоегѡ̀ положе́нїемъ пра́зднꙋетъ дне́сь, тво́й, препѣ́таѧ, хра́мъ, и҆ прилѣ́жнѡ взыва́етъ тѝ: ра́дꙋйсѧ, дв҃о, хрⷭ҇тїа́нъ похвало̀.
І҆́косъ:
Твои́мъ мѧ̀ просвѣтѝ свѣ́томъ, дв҃о бцⷣе, и҆ разрꙋшѝ мою̀ тмꙋ̀ во ᲂу҆мѣ̀ лежа́щꙋю лю́тѣ, ꙗ҆́кѡ да чи́стѡ тебѣ̀ пристꙋплю̀ чⷭ҇тѣй, зємны́ѧ ѡ҆божи́вшей: воспою̀ тво́й, всенескве́рнаѧ и҆ непоро́чнаѧ, бжⷭ҇твенный по́ѧсъ, свѣтлѣ́йшїй со́лнца, є҆го́же мі́ръ се́й и҆́мать ꙗ҆́кѡ тве́рдъ покро́въ и҆ наде́ждꙋ, побѣжда́ющъ совѣ́ты врагѡ́въ беззако́нныхъ, и҆ си́хъ кова̑рства разорѧ́ющъ, и҆ всегда̀ сохранѧ́ющъ твоѧ̑ рабы̑, ра́дꙋйсѧ, дв҃о, хрⷭ҇тїа́нъ похвало̀.
Пѣ́снь з҃.
І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Ты̀ ꙗ҆́кѡ сл҃нце пра́вды, є҆ди́не сы́й свѣтода́вче, бжⷭ҇твеннѣ хра́мъ чⷭ҇тыѧ просвѣти́лъ є҆сѝ разли́чными твои́ми дарова̑нїи: и҆́мже сїѧ́ющи лꙋчы̀ и҆з̾ѧснѧ́етъ по́ѧсъ тоѧ̀.
Ꙗ҆́кѡ златꙋ́ю ста́мнꙋ тво́й по́ѧсъ ѡ҆крꙋжа́юще, є҆ди́на чⷭ҇таѧ, бжⷭ҇твеннѣй вои́стиннꙋ причаща́емсѧ ны́нѣ сла́дости бл҃года́тей, всебл҃гослове́ннаѧ, и҆ скрижа́лей вы́шшꙋю тѝ ꙗ҆́кѡ сꙋ́щꙋю, почита́емъ сїю̀.
И҆сточа́ютъ вои́стиннꙋ чꙋде́съ, ѻ҆трокови́це чⷭ҇таѧ, ча̑ши твоѧ̑ бл҃года́ть вѣ̑рнымъ: и҆ незави́стнѡ ѿ твоеѧ̀ ра́ки происхо́дѧтъ, ꙗ҆́кѡ ѿ и҆на́гѡ є҆де́ма рѣ́ки.
Ны́нѣ пристꙋпи́те съ весе́лїемъ всѝ, и҆́же на землѝ, прїиди́те, ра́ка прорица́етъ та́йнѡ гпⷭ҇жѝ: ѡ҆б̾е́млите пресла́внꙋю, во мнѣ̀ сокро́виществовавшꙋю по́ѧсъ сво́й.
Пѣ́снь и҃.
І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Скрижа̑ли бжⷭ҇твєнныѧ дре́вле кївѡ́тъ, рꙋко́ю напи̑санныѧ бж҃їею, содержа́ше пречⷭ҇таѧ: твоѧ́ же чⷭ҇таѧ влⷣчце, чествова́ннаѧ и҆ честна́ѧ ра́ка по́ѧсъ содержи́тъ. тѣ́хъ законополо́жника содержа́щїѧ въ себѣ̀ стра́шное та́инство.
А҆́гг҃ли, пречⷭ҇таѧ чⷭ҇таѧ, ны́нѣ въ честнѣ́мъ твое́мъ хра́мѣ сликꙋ́ютъ, и҆ ѡ҆б̾е́млютъ, влⷣчце, честны́й и҆ ст҃ы́й тво́й по́ѧсъ: є҆мꙋ́же любо́вїю и҆ ра́достїю и҆ весе́лїемъ мно́гимъ покланѧ́емсѧ, тѧ̀ воспѣва́юще, сла́вꙋ ро́да на́шегѡ.
Же́злъ, ꙗ҆́же цвѣ́тъ жи́зни прозѧ́бшїй, ты̀ є҆сѝ всѣ́хъ ра́дость, многоцѣ̑ннаѧ чⷭ҇таѧ мѷрополо́жница дх҃а, сокро́вище благи́хъ, а҆рѡма̑тъ и҆сто́чникъ, и҆зъ неѧ́же мѵ́ро и҆сцѣле́нїй и҆злива́етъ бжⷭ҇твеннаѧ ра́ка.
Воспѣва́ютъ, пречⷭ҇таѧ чⷭ҇таѧ, вели̑чїѧ твоѧ̑, мы́слєннаѧ вѡ́инства, проповѣ́дꙋютъ всѝ патрїа́рси и҆ прⷪ҇ро́цы ꙗ҆́вственнѡ, а҆пⷭ҇ли со свѧще́нными, и҆ мч҃никѡвъ ли́кове: съ ни́миже покланѧ́емсѧ тебѣ̀.
Пѣ́снь ѳ҃.
І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Черто́гъ пречестны́й вои́стиннꙋ, бг҃ороди́тельнице, ра́ка твоѧ̀ ꙗ҆ви́сѧ, ст҃ы́й тво́й по́ѧсъ, дѣ́вственнꙋю и҆ невѣ́стническꙋю ꙗ҆́кѡ ѻ҆де́ждꙋ, досто́йнѣ содержа́щи и҆ соблюда́ющи, ꙗ҆́кѡ живота̀ сокро́вище.
Бжⷭ҇твенною дїади́мою красоты̀, цр҃ковь, бцⷣе, ѡ҆дѣ́ѧвшисѧ, бжⷭ҇твеннымъ и҆ всест҃ы́мъ твои́мъ по́ѧсомъ дне́сь ца́рски весели́тсѧ, и҆ красꙋ́етсѧ сла́вою твое́ю.
Хра́мъ по всемꙋ̀ подо́бѧщїйсѧ небесє́мъ благокра́сный дне́сь дв҃ы, вѣ́рнїи прїе́мше дарова́нїй зари̑, ꙗ҆́коже ѕвѣ́здными красота́ми ѡ҆сїѧ́еми, свѣтли́тесѧ.
И҆́мать свѧты́й тво́й по́ѧсъ, бг҃ороди́тельнице, гра́дъ тво́й, сою́зъ ми́ра и҆ стѣ́нꙋ, и҆ догма̑тъ бжⷭ҇твенное є҆ди́нство, и҆ правосла́вныхъ похвалꙋ̀, и҆ во́ємъ ѡ҆долѣ́тєльнаѧ.
Воспѣва́емъ неизглаго́ланнꙋю сла́вꙋ, и҆ неизче́тнꙋю твою̀ благода́ть: ты̀ бо є҆сѝ и҆сто́чникъ премꙋ́дрости, и҆зъ неѧ́же сло́во всѣ̑мъ происхо́дитъ чтꙋ́щымъ тѧ̀, пречⷭ҇таѧ, и҆ велича́ющымъ ржⷭ҇тво̀ твоѐ.
Свѣти́ленъ.
По́ѧсъ честны́й тво́й, и҆́мже свѧще́нное твоѐ препоѧ́сала є҆сѝ тѣ́ло, бг҃оѻтрокови́це, дв҃о, чтꙋ́ще пра́зднꙋемъ сегѡ̀ ны́нѣ положе́нїе, и҆́мже тлѝ и҆збавлѧ́емсѧ, и҆ бѣ́дъ и҆ напа́стей, мт҃и бг҃а вы́шнѧгѡ.