Пѣ́снь а҃.
І҆рмо́съ:
Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.
Крѣ́постїю мѧ̀ бжⷭ҇твенною бл҃гоче́стнѡ препоѧ́ши, пѣсносло́вѧща тво́й свѧще́нный по́ѧсъ, бжⷭ҇твенно сꙋ́щи гра́дꙋ твоемꙋ̀ ѡ҆поѧ́санїе, и҆ держа́ва, ѻ҆трокови́це, и҆ незы́блемо ѡ҆стѣне́нїе, чⷭ҇таѧ дв҃о препѣ́таѧ.
Ты̀ бг҃а си́льнаго родила̀ є҆сѝ, препоѧсꙋ́ющаго благочести̑выѧ всѧ̑ си́лою, всенепоро́чнаѧ. тѣ́мже тѧ̀ блажи́мъ, и҆ бжⷭ҇твенный тво́й по́ѧсъ ра́достнѡ ѡ҆блобыза́юще, благода́ть почерпа́емъ и҆ ми́лость.
Ра́достнѡ положе́нїю дне́сь ѻ҆́крестъ ликꙋ́емъ, свѧще́ннагѡ по́ѧса честны́ѧ бг҃оѻтрокови́цы, ѿ неѧ́же на́мъ препоѧ́санїе нетлѣ́нїѧ и҆стка́сѧ, и҆ нераздира́ема ѻ҆де́жда, и҆ ри́за свѧще́нїѧ.
Подъ твою̀, твоѝ лю́дїе, всенепоро́чнаѧ, притека́ютъ си́лꙋ, подъ тво́й покро́въ прибѣга́ютъ всегда̀: всѣ̑мъ бꙋ́ди по́мощь, и҆ ꙗ҆̀же ко спасе́нїю всѣ̑мъ пода́ждь прошє́нїѧ, спаса́ющи ѿ бѣ́дъ дꙋ́шы на́шѧ.
Пѣ́снь г҃.
І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Ѡ҆бновлѧ́етсѧ се́рдце, вѣ́рою те́плою прикаса́ющесѧ по́ѧсꙋ свѧще́нномꙋ дв҃ы, и҆ препоѧсꙋ́етсѧ си́лою непобѣди́мою, на стра̑сти нечи̑стыѧ и҆ вра̑гъ безпло́тныхъ, невреди́мо пребыва́юще.
Пребыва́етъ нетлѣ́ненъ є҆щѐ свѧще́нный по́ѧсъ тво́й, и҆́же твоѐ нетлѣ́нное тѣ́ло, ѻ҆трокови́це, ѡ҆поѧ́са, ѡ҆свѧща́ющъ благоче́стнѡ пристꙋпа́ющыѧ, и҆ тлѝ и҆з̾има́ющъ недꙋ̑гъ и҆ скорбе́й.
Была̀ є҆сѝ до́мъ преꙋдо́бренъ, чⷭ҇таѧ, сло́ва и҆зъ тебє̀ воплоще́ннагѡ, и҆ во ст҃ѣ́мъ хра́мѣ твое́мъ благоволи́ла є҆сѝ по́ѧсъ тво́й положи́ти: є҆го́же ѡ҆блобыза́юще ѡ҆свѧща́емсѧ.
Честны́й тво́й по́ѧсъ че́стнѡ всѝ ра́достнымъ се́рдцемъ ѡ҆блобыза́емъ, че́сть сꙋ́щꙋю всѣ́хъ вѣ́рныхъ, бцⷣе, ꙗ҆́кѡ пречⷭ҇тно́мꙋ твоемꙋ̀ прикоснꙋ́вшꙋсѧ тѣлесѝ.
Конда́къ, гла́съ в҃.
Бг҃опрїѧ́тное твоѐ чре́во, бцⷣе, ѡ҆б̾е́мшїй по́ѧсъ тво́й чⷭ҇тны́й, держа́ва гра́дꙋ твоемꙋ̀ неѡбори́ма, и҆ сокро́вище є҆́сть, благи́хъ неѡскꙋ́дно, є҆ди́на ро́ждшаѧ приснодв҃о.
Сѣда́ленъ, гла́съ д҃.
Ꙗ҆́кѡ бжⷭ҇твенное возложе́нїе во хра́мѣ бж҃їи, чⷭ҇таѧ, ѡ҆свѧти́сѧ по́ѧсъ всечестны́й, и҆́мже препоѧ́сала є҆сѝ ложесна̀, непоро́чнаѧ, бг҃а заче́ншаѧ. тѣ́мже семꙋ̀ вѣ́рою прикаса́ющесѧ, и҆ стра́хомъ че́стнѡ ѡ҆блобыза́юще, ѡ҆свѧща́емсѧ.
Сла́ва, и҆ ны́нѣ:
Положе́нїе твоегѡ̀ чⷭ҇тна́гѡ по́ѧса, цр҃ковь твоѧ̀ свѣ́тлѡ пра́зднꙋетъ, и҆ прилѣ́жнѡ зове́тъ тѝ, дв҃о чⷭ҇таѧ: всѧ̑ ѡ҆поѧ́ши на си́лꙋ вра́жїю, низложѝ шата́нїе безбо́жныхъ ва̑рваръ: и҆ на́шъ ᲂу҆пра́ви живо́тъ, дѣ́лати гдⷭ҇нѧ бж҃е́ствєннаѧ хотѣ̑нїѧ.
Пѣ́снь д҃.
І҆рмо́съ:
Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.
Взѧ́тсѧ къ свѣ́тꙋ незаходи́момꙋ преста́вльшисѧ, ѡ҆ста́вила є҆сѝ тѧ̀ блажа́щымъ, вмѣ́стѡ тѣлесѐ твоегѡ̀, чⷭ҇таѧ, честны́й по́ѧсъ, и҆сто́чникъ чꙋде́съ сꙋ́щи, и҆ мѣ́сто спасе́нїѧ, и҆ ѡ҆гражде́нїе семꙋ̀ чтꙋ́щемꙋ тѧ̀ гра́дꙋ, пречⷭ҇таѧ.
Ꙗ҆́кѡ въ но́во не́бо, мы̀ вхо́димъ въ тво́й хра́мъ, и҆дѣ́же сокро́вище положи́сѧ, ꙗ҆́коже со́лнце свѣтоза́рно, тво́й бжⷭ҇твенный по́ѧсъ, лꙋчы̀ чꙋде́съ и҆спꙋща́ющъ, и҆ всѣ́хъ сердца̀ ѡ҆зарѧ́ющъ, ѻ҆трокови́це, и҆ страсте́й мглꙋ̀ ѿгонѧ́ющъ.
Ты̀ кївѡ́тъ мы́сленнагѡ свѧще́нїѧ є҆сѝ, чⷭ҇таѧ всепѣ́таѧ: и҆ честнꙋ́ю сїю̀ ра́кꙋ и҆мꙋ́щꙋю по́ѧсъ, є҆го́же на себѣ̀ носи́ла є҆сѝ, подае́ши лю́демъ твои̑мъ прибѣ́жище ве́лїе, и҆ и҆сто́чникъ и҆сцѣле́нїй неистоща́емый.
Принесе́сѧ твоемꙋ̀ гра́дꙋ многобога́тный да́ръ, честны́й по́ѧсъ тво́й, всенепоро́чнаѧ, и҆ положи́сѧ свѣ́тлѡ въ се́й де́нь въ се́мъ бж҃е́ственнѣмъ хра́мѣ твое́мъ: и҆ бы́сть ве́лїѧ пра́здника, бцⷣе, те́плѣ лю́бѧщымъ тѧ̀ вина̀. Зако́на сѣ̑ни и҆ прⷪ҇рѡ́къ гада̑нїѧ предсказа́хꙋ, бы́ти тебѐ, пречⷭ҇таѧ, бг҃ꙋ мт҃рь всеи́стиннꙋю, є҆́юже клѧ́тва и҆счезѐ, и҆ процвѣтѐ соверше́нное благослове́нїе, и҆ спаси́тельнаѧ бл҃года́ть, вѣ́рою и҆ любо́вїю пою́щымъ тѧ̀.
Пѣ́снь є҃.
І҆рмо́съ:
Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ̀, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
По́ѧсꙋ бжⷭ҇твенномꙋ положе́нꙋ дне́сь во хра́мѣ твое́мъ, бг҃ора́дованнаѧ, съ ни́мъ положи́сѧ благи́хъ всѧ́ко даѧ́нїе тре́бꙋющымъ, и҆ наполнѧ́етсѧ всѧ́къ кто̀ свѧще́нїѧ приходѧ́й, прошє́нїѧ вѣ́рнѡ прїе́млѧ.
Оу҆краси́сѧ, дв҃о, сло́ва прекра́снаго поро́ждши, и҆ во твое́мъ кра́снѣмъ благоволи́ла є҆сѝ домꙋ̀ положи́тисѧ кра́сномꙋ по́ѧсꙋ, и҆́же твоѐ кра́сное тѣ́ло, бцⷣе, краснѡ̀ ѡ҆поѧ́са.
Тво́й ст҃ы́й хра́мъ, ꙗ҆́коже дрꙋгі́й ра́й всѣ̑мъ познава́етсѧ: посредѣ̀ стѧжа̀ ꙗ҆́коже благово́ненъ шипо́къ по́ѧсъ тво́й, благово́нїѧ бжⷭ҇твеннагѡ и҆сполнѧ́ющь сердца̀, вѣ́рнѡ пристꙋпа́ющымъ, всенепоро́чнаѧ.
Тꙋ́чи бжⷭ҇твенныѧ ѻ҆́блакъ была̀ є҆сѝ, пренепоро́чнаѧ, и҆ска́пающїй спасе́нїѧ во́дꙋ, и҆ зе́млю ѡ҆лѧденѣ́вшꙋю грѣхмѝ, къ плодоно́сїю преводѧ́щи благоче́стїѧ, сегѡ̀ ра́ди вѣ́рнѡ тѧ̀ сла́вимъ.
Пѣ́снь ѕ҃.
І҆рмо́съ:
Бе́здна грѣхѡ́въ и҆ прегрѣше́нїй бꙋ́рѧ мѧ̀ смꙋща́етъ, и҆ во глꙋбинꙋ̀ нꙋ́жднагѡ рѣ́етъ мѧ̀ ѿча́ѧнїѧ: но твою̀ крѣ́пкꙋю рꙋ́кꙋ мнѣ̀ прострѝ ꙗ҆́кѡ петро́ви, ѽ ᲂу҆пра́вителю! и҆ спасѝ.
Но́во родила̀ є҆сѝ на́мъ ꙗ҆́кѡ ѻ҆троча̀, пре́жде вѣ̑къ сꙋ́щаго, и҆ ѡ҆бновлѧ́еши сердца̀ грѣхмѝ ѡ҆бетша̑вшаѧ, прїе́мшаѧ ѡ҆бновле́нїе, положе́нїемъ честна́гѡ по́ѧса твоегѡ̀, ѻ҆трокови́це приснодв҃о.
Ст҃а́ѧ твоѧ̀ це́рковь, ди́вна въ пра́вдꙋ є҆́сть, и҆́же чꙋ́дный тво́й по́ѧсъ точа́щїй чꙋдеса̀ стѧжа́вши, бѣ̑днымъ пꙋчи́на ꙗ҆влѧ́етсѧ и҆сцѣле́нїй, бг҃ороди́тельнице мт҃и дв҃о.
Возвесели́сѧ всѧ́ка дꙋша̀, совокꙋ́пльшисѧ во ст҃ѣ́мъ хра́мѣ твое́мъ, и҆ въ не́мъ зрѧ́щи, бцⷣе, по́ѧсъ тво́й, ꙗ҆́коже со́лнце свѣ́тло свѣ́тъ ѡ҆блиста́ющъ дарова́нїй вседѣ́телѧ и҆ бжⷭ҇твеннагѡ дх҃а.
Оу҆крѣпѝ на̑ша, чⷭ҇таѧ, сердца̀, презрѣ́вши всѧ̑ согрѣшє́нїѧ: и҆ препоѧ́ши си́лою, по́ѧсъ тво́й вѣ́рнѡ ꙗ҆́коже многоцѣ́нно стѧжа́вшихъ, и҆ неѿе́млемо сокро́вище.
Конда́къ.
Честна́гѡ по́ѧса твоегѡ̀ положе́нїе пра́зднꙋетъ дне́сь, тво́й, препѣ́таѧ, хра́мъ, и҆ прилѣ́жнѡ взыва́етъ тѝ: ра́дꙋйсѧ, дв҃о, хрⷭ҇тїа́нъ похвало̀.
І҆́косъ:
Твои́мъ мѧ̀ просвѣтѝ свѣ́томъ, дв҃о бцⷣе, и҆ разрꙋшѝ мою̀ тмꙋ̀ во ᲂу҆мѣ̀ лежа́щꙋю лю́тѣ, ꙗ҆́кѡ да чи́стѡ тебѣ̀ пристꙋплю̀ чⷭ҇тѣй, зємны́ѧ ѡ҆божи́вшей: воспою̀ тво́й, всенескве́рнаѧ и҆ непоро́чнаѧ, бжⷭ҇твенный по́ѧсъ, свѣтлѣ́йшїй со́лнца, є҆го́же мі́ръ се́й и҆́мать ꙗ҆́кѡ тве́рдъ покро́въ и҆ наде́ждꙋ, побѣжда́ющъ совѣ́ты врагѡ́въ беззако́нныхъ, и҆ си́хъ кова̑рства разорѧ́ющъ, и҆ всегда̀ сохранѧ́ющъ твоѧ̑ рабы̑, ра́дꙋйсѧ, дв҃о, хрⷭ҇тїа́нъ похвало̀.
Пѣ́снь з҃.
І҆рмо́съ:
Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.
Всѣ́хъ цр҃и́ца къ нбⷭ҇нымъ се́лѡмъ ѿше́дши, ѡ҆ста́ви бога́тство царю̀ всѣ́хъ градѡ́въ сво́й по́ѧсъ, и҆́мже спаса́ютсѧ ѿ наше́ствїѧ ви́димыхъ и҆ неви́димыхъ вра̑гъ.
Ко и҆сто́чникꙋ ны́нѣ пристꙋ́пимъ, и҆ска́пающемꙋ бл҃года́ть и҆ ми́лость ра́цѣ честнѣ́й, и҆мꙋ́щей по́ѧсъ всечестны́й, поче́тшїѧ человѣ́ческое смѣше́нїе, честны́мъ ржⷭ҇тво́мъ свои́мъ, дв҃ы же и҆ мт҃ре.
Хвали́те гдⷭ҇а си̑лы всѧ̑ нбⷭ҇ныѧ, и҆ сего̀ ро́ждшꙋю человѣ́честїи ꙗ҆зы́цы всѝ просла́вите: ꙗ҆́кѡ по́ѧсъ сво́й дарова̀, прибѣ́жище и҆́стинно и҆ спасе́нїе вѣ̑рнымъ.
Да кропѧ́тъ свы́ше пра́вдꙋ ѻ҆́блацы дне́сь, положе́нїемъ по́ѧса твоегѡ̀, ѻ҆́блаче бг҃ора́дованный, и҆ да сладкопое́тъ дꙋша̀ всѧ́ка ра́дꙋющисѧ: бл҃гослове́нъ бг҃ъ ѻ҆тє́цъ на́шихъ.
Пѣ́снь и҃.
І҆рмо́съ:
Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Ꙗ҆́коже прⷭ҇то́лъ свѧ́тъ, ковче́гъ положи́сѧ, внꙋ́трь невходи́мыхъ свѧще́нныхъ свѣ́тлѡ, є҆ди́ныѧ бг҃оѻтрокови́цы и҆ цр҃и́цы всѣ́хъ чⷭ҇тыѧ, по́ѧсъ и҆мꙋ́щїй поко́йный: ѿ негѡ́же трꙋжда́ющымсѧ во мно́гихъ болѣ́знехъ, поко́й соверше́нъ прихо́дитъ незави́стнѡ.
На землѝ гдⷭ҇а сщ҃е́ннѡ воплоти́ла є҆сѝ, и҆ рꙋка́ми ст҃ы́ми вои́стиннꙋ ѡ҆поѧ́сала є҆сѝ, препоѧсꙋ́ющаго благочести̑выѧ си́лою: ны́нѣ же возше́дши нб҃съ превы́ше, ѡ҆ста́вила є҆сѝ чл҃вѣ́кѡмъ честны́й тво́й по́ѧсъ, дв҃о бцⷣе, держа́вꙋ и҆ покро́въ.
Недꙋ́гꙋющихъ и҆сцѣле́нїе, поползнꙋ́вшихсѧ ᲂу҆твержде́нїе, и҆ ᲂу҆ныва́ющихъ благодꙋ́шїе бжⷭ҇твенно, корми́ло пла́вающихъ, заблꙋ́ждшихъ ѡ҆браще́нїе, послѣ́дꙋющаѧ честно́мꙋ твоемꙋ̀ по́ѧсꙋ, чⷭ҇таѧ дв҃о, бжⷭ҇твеннаѧ бл҃года́ть вои́стиннꙋ є҆́сть: є҆мꙋ́же вѣ́рою покланѧ́емсѧ во всѧ̑ вѣ́ки.
Соверша́юще дне́сь ст҃о́е положе́нїе по́ѧса твоегѡ̀ бж҃е́ственнагѡ, свѧще́нное торжество̀ рабѝ твоѝ чти́мъ, и҆ ра́достїю вопїе́мъ тѝ: ра́дꙋйсѧ, бцⷣе, ра́досте а҆́гг҃лѡвъ и҆ всѣ́хъ человѣ́кѡвъ, вѣ́рою пою́щихъ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.
Пѣ́снь ѳ҃.
І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Сѐ бжⷭ҇твенный ѻ҆́дръ соломѡ́новъ, є҆го́же си́льнїи ѡ҆крꙋжа́ютъ шестьдесѧ́тъ, речє́нїѧ писа́нїй, ꙗ҆́коже на ѻ҆дрѣ̀ ца́рстѣ въ ковче́зѣ че́стнѣ дне́сь, по́ѧсъ полага́етъ сво́й, на воззва́нїе всѣ̑мъ вѣ̑рнымъ, и҆ благочести̑вымъ въ снабдѣ́нїе.
Ѽ гра́де цр҃ѧ̀ нбⷭ҇нагѡ, ѡ҆ не́мже возглаго́лашасѧ пресла̑внаѧ! положѝ твоемꙋ̀ гра́дꙋ да́ръ че́стенъ и҆ свѧ́тъ, всест҃ы́й тво́й по́ѧсъ во ᲂу҆твержде́нїе всѣ̑мъ вѣ̑рнымъ, и҆́мже вѣнцено́сцы побѣжда́ютъ сꙋпоста́ты, правосла́вїемъ сїѧ́юще.
И҆ска́пайте го́ры ны́нѣ сла́дость, и҆ хо́лми весе́лїе вѣ́чное: патрїа̑рхъ собо́ри, и҆ мч҃никъ ли́цы, прⷪ҇ро́кѡвъ же сосло́вїе, бжⷭ҇твенныхъ а҆пⷭ҇лѡвъ со́нмъ честны́й, весели́тесѧ со всѣ́ми на́ми, въ положе́нїи бжⷭ҇твеннагѡ по́ѧса бг҃оѻтрокови́цы.
Ѡ҆свѧти́ла є҆сѝ всѧ̑ твои́мъ, прест҃а́ѧ дв҃о, ржⷭ҇тво́мъ и҆ ны́нѣ на́мъ подала̀ є҆сѝ премно́гое просвѣще́нїе, прест҃ы́й по́ѧсъ тво́й: є҆гѡ́же положе́нїемъ всѧ̀ землѧ̀ ликꙋ́етъ, и҆ почита́етъ тѧ̀, ра́дости неизглаго́ланныѧ и҆спо́лнившꙋю человѣ́чество.
Любвѐ мѧ̀ ле́стныѧ страсте́й, и҆ врага̀ всегда̀ и҆скꙋша́ющагѡ грѣхѡ́въ тѧгото́ю, ᲂу҆ны́нїѧ же лю́тагѡ ѿведе́нїѧ, пречⷭ҇таѧ, и҆ плѣне́нїѧ и҆ грѣха̀, къ твое́й прибѣга́ющаго ми́лости, вско́рѣ ꙗ҆́кѡ ми́лостива, чⷭ҇таѧ, премѣнѝ.
Свѣти́ленъ.
По́ѧсъ честны́й тво́й, и҆́мже свѧще́нное твоѐ препоѧ́сала є҆сѝ тѣ́ло, бг҃оѻтрокови́це, дв҃о, чтꙋ́ще пра́зднꙋемъ сегѡ̀ ны́нѣ положе́нїе, и҆́мже тлѝ и҆збавлѧ́емсѧ, и҆ бѣ́дъ и҆ напа́стей, мт҃и бг҃а вы́шнѧгѡ.