Канон Покрову Пресвятой Богородицы

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Съ чи́нми ст҃ы́хъ а҆́гг҃лъ, и҆ съ собѡ́ры прⷪ҇рѡ́къ и҆ а҆пⷭ҇лъ, въ сла́вѣ вели́цѣй, ꙗ҆́кѡ мт҃и бж҃їѧ дне́сь въ це́рковь вше́дши за хрⷭ҇тїа́ны мо́лишисѧ, ѿ напа́сти и҆ печа́ли и҆збавлѧ́еши всѧ̑, покрыва́ющи твое́ю ми́лостїю.

Ски́нїю тѧ̀ мѡѷсе́й, и҆ же́злъ а҆арѡ́новъ и҆менова̀: ты́ бо живо́тное дре́во хрⷭ҇та̀ процвѣла̀ є҆сѝ, къ немꙋ́же дерзнове́нїе и҆мꙋ́щи, за ны̀ чествꙋ́ющыѧ тѧ̀ цр҃и́це, помоли́сѧ, и҆зба́вити на́съ ѿ всѧ́кагѡ ѕла̀: да твоегѡ̀ покро́ва пра́здникъ сла́вимъ.

Не ꙗ҆́кѡ предъ кївѡ́томъ дре́вле собра́въ дв҃дъ ли́ки, и҆гра́етъ, но па́че ны́нѣ съ чи́нми ст҃ы́хъ предъ тобо́ю текꙋ́ще въ цр҃ковь, тебѣ̀ кла́нѧющесѧ глаго́лютъ: молѝ за чествꙋ́ющыѧ тѧ̀ лю́ди, да тво́й сла́вѧще покро́въ, че́стнѡ пра́зднꙋемъ.

Пою́тъ тѧ̀ бцⷣе, а҆́гг҃льстїи чи́ни, и҆ сла́вѧтъ патрїа́рси со ст҃и́тєли, предъ лице́мъ тѝ текꙋ́ще въ це́рковь. съ ни́миже тѧ̀ тогда̀ ст҃ы́й а҆ндре́й ви́дѣ за ны̀ грѣ̑шныѧ къ бг҃ꙋ молѧ́щꙋюсѧ поми́ловати лю́ди, сла́вѧщыѧ твоегѡ̀ покро́ва пра́здникъ.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ, вѣнцє́въ сла́вы сподо́би.

Кла́съ прозѧ́бшаѧ бжⷭ҇твенный, ꙗ҆́кѡ ни́ва неѡра́ннаѧ ꙗ҆́вѣ. ра́дꙋйсѧ ѡ҆дꙋшевле́ннаѧ трапе́зо, хлѣ́бъ живо́тный вмѣ́щшаѧ. ра́дꙋйсѧ, живо́тныѧ воды̀ и҆сто́чниче неистощи́мый, влⷣчце.

Твоѝ рабѝ влⷣчце, въ це́ркви твое́й вѣ́рою предстоѧ́ще, твоеѧ̀ ѡ҆жида́емъ ми́лости: посѣтѝ на́ше смире́нїе, и҆ твои́мъ ст҃ы́мъ покро́вомъ защитѝ лю́ди ѿ всѧ́кагѡ ѕла̀.

Многоимени́таѧ дв҃о, прⷪ҇рѡ́ки проѡбражена̀ че́стнѡ, и҆̀же тебѣ̀ ны́нѣ со а҆́гг҃лы слꙋ́жатъ. съ ни́миже ѡ҆ на́съ къ бг҃ꙋ моли́сѧ, да твоегѡ̀ покро́ва ст҃ы́й де́нь ра́дꙋющесѧ всѝ свѣ́тлѡ пра́зднꙋемъ.

Гедеѡ́нъ тѧ̀ рꙋно̀ проѡбразѝ, на тѧ́ бо ꙗ҆́кѡ роса̀ хрⷭ҇то́съ бг҃ъ сни́де, къ немꙋ́же бцⷣе, моли́сѧ, побѣ́дꙋ да́ти во́инствꙋ на́шемꙋ на врагѝ, да ꙗ҆́кѡ мадїа́мы низложи́въ, просла́витъ ст҃ы́й тво́й пра́здникъ.

Па́че со́лнечныхъ лꙋ̑чь, твои́мъ блиста́ющимъ ѡ҆мофо́ромъ, ѡ҆свѣща́еши це́рковь и҆ лю́ди, и҆ тмꙋ̀ грѣхѡ́въ на́шихъ ѿго́ниши посѣще́нїемъ твои́мъ бцⷣе, къ сн҃ꙋ твоемꙋ̀ и҆ бг҃ꙋ за ны̀ молѧ́щисѧ.

Сѣда́ленъ, гла́съ є҃:

Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рꙋ, и҆ спасе́нїе, и҆ ве́лїю ми́лость.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Во гла́сѣхъ пѣ́нїй, дв҃о, тебѣ̀ вопїе́мъ всепѣ́таѧ: ра́дꙋйсѧ, тꙋ́чнаѧ горо̀, и҆ ᲂу҆сыре́ннаѧ дх҃омъ. ра́дꙋйсѧ, свѣ́щниче, и҆ ста́мно ма́ннꙋ носѧ́щаѧ, ᲂу҆слажда́ющаѧ всѣ́хъ благочести́выхъ чꙋ̑вства.

Па́че а҆арѡ́нѧ кївѡ́та, всю́ тѧ бг҃ъ ѡ҆свѧти́лъ є҆́сть дх҃омъ бцⷣе, ст҃ы̑мъ, и҆ а҆́гг҃лѡмъ слꙋжи́ти тебѣ̀ повелѣ̀, съ ни́миже за гра́дъ и҆ лю́ди моли́сѧ, тво́й сла́вѧщихъ честны́й пра́здникъ.

Прїидѝ ны́нѣ въ сла́вѣ въ твою̀ бцⷣе, це́рковь съ собѡ́ры всѣ́хъ ст҃ы́хъ, ꙗ҆́коже и҆ногда́ тѧ ст҃ы́й а҆ндре́й ви́дѣ на воздꙋ́сѣ свѣ́тлѣ за хрⷭ҇тїа́ны молѧ́щꙋюсѧ, и҆ пода́ждь на́мъ твою̀ ми́лость.

Оу҆крѣпѝ влⷣчце сла́вѧщее тѧ̀ во́инство на́ше на проти̑вныѧ врагѝ, ꙗ҆́кѡ дв҃да на голїа́ѳа: да тебѣ̀ веселѧ́щесѧ вопїе́мъ: ра́дꙋйсѧ покро́ве ст҃ы́й, и҆ застꙋ́пнице гра́дꙋ на́шемꙋ.

Тебѣ̀ припа́даемъ гпⷭ҇жѐ, вѣ́рою, и҆ покланѧ́ющесѧ благода́рнѡ вопїе́мъ тѝ: ра́дꙋйсѧ бг҃облагода́тнаѧ дв҃о, покро́ве и҆ ѡ҆гражде́нїе на́ше, и҆ помо́щнице въ бѣдѣ̀ сꙋ́щымъ, спасѝ на́съ къ тебѣ̀ прибѣга́ющихъ, на тѧ́ бо надѣ́емсѧ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀, ми́ръ подава́ющаѧ.

Ѻ҆́дръ тѧ̀ дре́вле соломѡ́нъ написа̀, и҆ ло́жницꙋ нбⷭ҇нагѡ цр҃ѧ̀, ѡ҆бстꙋпа́емꙋ серафі́мы, є҆́же ѡ҆ тебѣ̀ рече́сѧ бцⷣе. тѣ́мъ тѧ̀ ны́нѣ мо́лимъ, мт҃и бж҃їѧ всест҃а́ѧ: покры́й: на́съ ѿ всѣ́хъ бѣ́дъ.

Тебѣ̀ а҆́гг҃лѡвъ старѣ̑йшины, и҆ честні́и прⷪ҇ро́цы со а҆пⷭ҇лы ꙗ҆́кѡ мт҃ри бж҃їи че́стнѡ слꙋ́жатъ, ви́дѧще тѧ̀ за мі́ръ моли́твꙋ творѧ́щꙋ: твоѧ̑ же прошє́нїѧ послꙋ́шавъ гдⷭ҇ь, спаса́етъ гра́дъ и҆ лю́ди на тѧ̀ надѣ́ющыѧсѧ.

Вели́кїй тѧ̀ во прⷪ҇ро́цѣхъ и҆са́їа проречѐ, глаго́лѧ, бг҃а роди́ти неискꙋсобра́чнѡ: ты́ бо чⷭ҇таѧ марі́е, ст҃ѣ́йши всѣ́хъ была̀ є҆сѝ, бг҃а бо во ᲂу҆тро́бѣ и҆ на рꙋкꙋ̀ носи́ла є҆сѝ. є҆мꙋ́же за ны̀ моли́сѧ, твои́мъ ѡ҆сѣнѧ́ющи покро́вомъ вѣ́рою тѧ̀ сла́вѧщихъ.

Дꙋхо́вными парѧ́ще кри́лы ст҃ы́хъ собо́ри та́йнѡ прїидо́ша тебѣ̀ послꙋжи́ти бцⷣе, ви́дѧще тѧ̀ на ле́гцѣ ѻ҆́блацѣ сла́вы, ко сп҃сꙋ хрⷭ҇тꙋ̀ молѧ́щꙋюсѧ, пода́ти побѣ́дꙋ во́инствꙋ на́шемꙋ, погꙋби́ти вою́ющихъ на́съ.

Пѣ́снь ѕ҃.

І҆рмо́съ: Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

І҆ере́є бг҃омꙋ́дрїи, въ це́ркви твое́й съ людьмѝ благочести́выми предстоѧ́ще, твоеѧ̀ ѡ҆жида́ютъ, бцⷣе, ми́лости: премѣнѝ на ра́дость на́шꙋ печа́ль, ра́дость бо родила̀ є҆сѝ, всѣ́хъ человѣ́кѡвъ грѣхѝ ѿпꙋсти́вшаго.

Тебѣ̀ всѧ̀ землѧ̀ да́ры прино́ситъ, ꙗ҆́кѡ цр҃и́цѣ бж҃їи мт҃ри: а҆рхїерє́и кла́нѧютсѧ, и҆ лю́дїе всѝ веселѧ́тсѧ, покрыва́еми ѿ всѧ́кагѡ ѕла̀ твои́ми, бцⷣе, моли́твами.

Го́рꙋ тѧ̀ вели́кꙋ данїи́лъ пронаписа̀: и҆зъ тебє́ бо без̾ сѣ́мене роди́сѧ хрⷭ҇то́съ, и҆ сокрꙋшѝ всю̀ де́мѡнскꙋю ле́сть, и҆ всю̀ своеѧ̀ вѣ́ры и҆спо́лни зе́млю. къ немꙋ́же за ны̀ бцⷣе моли́сѧ, сла́вѧщыѧ твоегѡ̀ покро́ва пра́здникъ.

А҆́гг҃льскїй гла́съ взыва́емъ тѝ, пречⷭ҇таѧ: ра́дꙋйсѧ прⷭ҇то́ле бж҃їй, на не́мже і҆езекі́иль ви́дѣ гдⷭ҇а, въ подо́бїи чл҃вѣ́ка, носи́ма херꙋві́мы. съ ни́миже за ны̀ бцⷣе моли́сѧ, да спасе́тъ дꙋ́шы на́шѧ.

Конда́къ, гла́съ г҃.

Дв҃а дне́сь предстои́тъ въ це́ркви, и҆ съ ли̑ки ст҃ы́хъ неви́димѡ за ны̀ мо́литсѧ бг҃ꙋ: а҆́гг҃ли со а҆рхїерє́и покланѧ́ютсѧ, а҆пⷭ҇ли же со прⷪ҇рѡ́ки ликовствꙋ́ютъ: на́съ бо ра́ди мо́литъ бцⷣа превѣ́чнаго бг҃а.

І҆́косъ.

Тоѧ̀ пресла́вныхъ чꙋде́съ прїиди́те лю́дїе наслади́мсѧ: се́ю бо а҆да́мъ ѿ тлѝ и҆зба́висѧ. та́ бо и҆ ковче́гъ, не нѡ́емъ, но бг҃омъ сотворе́нъ бы́сть. дре́вле ᲂу҆́бѡ мѡѷсе́й въ кꙋпинѣ̀ ѻ҆́гненнѣй бг҃а ви́дѣти не возмо́же: ны́нѣ же ѿ тоѧ̀ ро́ждшагосѧ, всѧ̀ землѧ̀ зна́етъ сн҃а бж҃їѧ, къ немꙋ́же за ны̀ мо́литсѧ. сегѡ̀ ра́ди прославлѧ́емъ ю҆̀, ꙗ҆́кѡ бж҃їю мт҃рь: на́съ бо ра́ди бцⷣа мо́литъ превѣ́чнаго бг҃а.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи, па́че созда́вшагѡ: но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Неиспи́санаѧ мно́гими прⷪ҇рѡ́ки, несвѣ́дома же бы́сть, дв҃о, нбⷭ҇ными слꙋжа́щими бг҃ꙋ а҆́гг҃лы: ны́нѣ же всѝ вѣ́мы тѧ̀ бцⷣꙋ, и҆ твоеѧ̀ тре́бꙋемъ по́мощи и҆ застꙋпле́нїѧ, благослове́ннаѧ.

Гора̀ ᲂу҆сыре́ннаѧ дх҃омъ, ю҆́же а҆ввакꙋ́мъ ви́дѣ точа́щꙋ вѣ̑рнымъ цѣле́бнꙋю сла́дость, бцⷣе дв҃о, и҆сцѣли́ ны, сн҃ꙋ твоемꙋ̀ вопїю́щыѧ: бл҃гослове́нъ бг҃ъ ѻ҆тє́цъ на́шихъ.

Преклони́вый нб҃са̀ въ тѧ̀ дв҃о всели́сѧ, и҆ ны́нѣ на моли́твꙋ твою̀ зри́тъ, бцⷣе чⷭ҇таѧ, твоѐ, цр҃и́це, и҆сполнѧ́ѧ проше́нїе: є҆мꙋ́же за ны̀ ᲂу҆се́рднѡ помоли́сѧ, на тѧ́ бо надѣ́емсѧ, бл҃гослове́ннаѧ.

Тво́рче сп҃се на́шъ хрⷭ҇тѐ бж҃е, прїимѝ моли́твꙋ твоеѧ̀ мт҃ре, ю҆́же тебѣ̀ за ны̀ грѣ̑шныѧ прино́ситъ, да тебѣ̀ ра́дꙋющесѧ пое́мъ: препѣ́тый ѻ҆тє́цъ на́шихъ бж҃е бл҃гослове́нъ є҆сѝ.

Пѣ́снь и҃.

І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Съ чи́нми а҆́гг҃лъ, влⷣчце, съ честны́ми и҆ сла́вными прⷪ҇рѡ́ки, съ верхо́вными а҆пⷭ҇лы, и҆ со сщ҃енномꙋ́чєники, и҆ со а҆рхїерє́и, за ны̀ грѣ̑шныѧ бг҃ꙋ помоли́сѧ, твоегѡ̀ покро́ва пра́здникъ въ рѡссі́йстѣй землѝ просла́вльшыѧ.

Горды́ню и҆ шата̑нїѧ низложѝ, и҆ совѣ́ты непра́ведныхъ разорѝ, зачина́ющихъ ра̑ти погꙋбѝ, ѽ бж҃їѧ мт҃и цари́це всечⷭ҇тна́ѧ! правосла́вныхъ ро́гъ возвы́си, да тво́й пра́здникъ сла́вимъ, пречⷭ҇таѧ бцⷣе дв҃о, зовꙋ́ще: гдⷭ҇а воспѣва́йте дѣла̀, и҆ превозноси́те є҆го̀ во всѧ̑ вѣ́ки.

Оу҆сты̀ приносѧ́ще тебѣ̀ пѣ́нїе, и҆ дꙋше́ю вѣ́рнѡ покланѧ́емсѧ: и҆́бо внꙋ́трь сердца̀ на́шѧ горѧ́тъ: мт҃и бж҃їѧ пречⷭ҇таѧ, поми́лꙋй на́съ молѧ́щихсѧ тебѣ̀, и҆ гдⷭ҇а воспѣва́ющихъ, и҆ превозносѧ́щихъ є҆го̀ во всѧ̑ вѣ́ки.

Мно́гими ѡ҆тѧгчи́хсѧ грѣхи̑, недоꙋмѣ́ю по достоѧ́нїю написа́ти твоегѡ̀ покро́ва, бцⷣе, похвалы̀: но ꙗ҆́кѡ мт҃и бж҃їѧ, ᲂу҆красѝ тво́й пра́здникъ чꙋдесы̀, да всѝ ра́дꙋющесѧ пое́мъ гдⷭ҇а, и҆ превозно́симъ є҆го̀ во всѧ̑ вѣ́ки.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Высо́кїй цр҃ю̀, со ѻ҆ц҃е́мъ сѣдѧ́й, и҆ ѿ серафі̑мъ воспѣва́емый, при́зри на моли́твꙋ мт҃рню, ю҆́же тебѣ̀ за ны̀ грѣ̑шныѧ прино́ситъ, и҆ ѡ҆чи́сти грѣхѝ на́шѧ. спасѝ гра́дъ, и҆ лю́ди ᲂу҆мно́жи: да́ждь на́мъ здра́вїе тѣлесѐ, и҆ на пога̑ныѧ побѣ̑ды, моли́твами ро́ждшїѧ тѧ̀.

А҆́гг҃льскїй гла́съ вопїе́мъ тебѣ̀, дв҃о бг҃оизбра́ннаѧ: ра́дꙋйсѧ, ꙗ҆́же а҆да́ма па́ки въ ра́й вве́дшаѧ, ра́дꙋйсѧ, де́мѡны прогонѧ́щи твои́мъ и҆́менемъ. ра́дꙋйсѧ, наде́жде хрⷭ҇тїа́нъ. ра́дꙋйсѧ, ѡ҆свѧще́нїе дꙋ́шъ. ра́дꙋйсѧ, храни́тельнице гра́да на́шегѡ.

Помѧнѝ на́съ во твои́хъ мл҃твахъ, гпⷭ҇жѐ дв҃о бцⷣе, да не поги́бнемъ за ᲂу҆множе́нїе грѣхѡ́въ на́шихъ. покры́й на́съ ѿ всѧ́кагѡ ѕла̀ и҆ лю́тыхъ напа́стей: на тѧ́ бо ᲂу҆пова́емъ и҆ твоегѡ̀ покро́ва пра́здникъ чествꙋ́юще, тѧ̀ велича́емъ.

Да́ръ ѿ бг҃а прїѧ́ла є҆сѝ, ꙗ҆́кѡ мт҃и бж҃їѧ, всѣ́хъ хрⷭ҇тїа́нъ недꙋ́ги и҆сцѣлѧ́ти, и҆ ѿ бѣ́дъ и҆збавлѧ́ти, и҆ грѣхѝ ѿпꙋща́ти, и҆ ѿ плѣне́нїѧ спаса́ти, и҆ всѧ́кїѧ нꙋ́жды. но и҆ на́съ не пре́зри, гпⷭ҇жѐ: вѣ́си бо, и҆́хже тре́бꙋемъ, здра́вїѧ тѣлесє́мъ, и҆ дꙋша́мъ спасе́нїѧ.

Свѣти́ленъ.

Ѽ прест҃а́ѧ гпⷭ҇жѐ дв҃о бцⷣе! покры́й на́съ чꙋде́снымъ твои́мъ ѡ҆мофо́ромъ, сохранѧ́ѧ гра́дъ и҆ лю́ди ѿ всѧ́кагѡ ѕла̀, ꙗ҆́коже тѧ̀ пречꙋ́дный а҆ндре́й ви́дѣ во влахе́рнстѣй це́ркви молѧ́щꙋюсѧ: и҆ ны́нѣ на́мъ, гпⷭ҇жѐ, послѝ вели́кꙋю твою̀ ми́лость.