Пѣ́снь а҃.
І҆рмо́съ:
Грѧди́те лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.
Ѻ҆смери́ца дне́й, носѧ́щаѧ ѻ҆́бразъ бꙋ́дꙋщагѡ, твое́ю, хрⷭ҇тѐ, просвѣща́етсѧ и҆ ѡ҆сщ҃а́етсѧ во́льною нището́ю: въ се́й бо зако́ннѡ ѡ҆брѣ́залсѧ є҆сѝ пло́тїю.
Ѡ҆брѣ́занїе прїе́млетъ ѻ҆смодне́вное хрⷭ҇то́съ своегѡ̀ ржⷭ҇тва̀, и҆ сегѡ̀ дне́сь сѣ́нь спрѧ́таетъ, свѣ́тъ возсїѧва́ѧ но́выѧ бл҃года́ти.
Бг҃оро́диченъ:
Кто̀ и҆зрещѝ твоѐ по досто́инствꙋ возмо́жетъ, є҆́же па́че сло́ва, зача́тїе; бг҃а бо родила̀ є҆сѝ пло́тїю, всечи́стаѧ, на́мъ ꙗ҆́вльшасѧ сп҃са и҆ гдⷭ҇а.
Пѣ́снь г҃.
І҆рмо́съ:
Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ, пою́щихъ тѧ̀.
Сло́во вопло́щшеесѧ пресꙋ́щественное, въ преста́тїе зако́на ѡ҆брѣ́засѧ: нача́токъ же бжⷭ҇твенныѧ бл҃года́ти, и҆ жи́зни нетлѣ́нныѧ на́мъ подадѐ.
Зако́на и҆сполни́тель, не ꙗ҆́кѡ сопроти́венъ бг҃ꙋ сы́й хрⷭ҇то́съ воплоти́выйсѧ показа́сѧ, и҆ сподо́бисѧ во́лею ѡ҆брѣ́затисѧ ѻ҆смодне́венъ.
Бг҃оро́диченъ:
Безсѣ́меннѡ во чре́вѣ бг҃а зачала̀ є҆сѝ, и҆ ражда́еши несказа́ннѡ воплоще́нна: на него́же зрѣ́ти не смѣ́ютъ, чⷭ҇таѧ, нбⷭ҇ныхъ си̑лы, приснодв҃о.
Сѣда́ленъ, гла́съ д҃.
Ꙗ҆́кѡ сы́й бе́здна чл҃вѣколю́бїѧ, ѡ҆дѣ́ѧлсѧ є҆сѝ, влⷣко, въ зра́къ ра́бїй, и҆ пло́тїю ѡ҆брѣ́залсѧ є҆сѝ, да́рꙋѧ всѣ̑мъ человѣ́кѡмъ вели́кꙋю твою̀ ми́лость.
Пѣ́снь д҃.
І҆рмо́съ:
Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не человѣколю́бче.
Ѡ҆брѣ́занїе преста̀, ѿне́лѣже хрⷭ҇то́съ во́лею ѡ҆брѣ́засѧ, ꙗ҆зы̑къ мно́жество спаса́ѧ бл҃года́тїю.
Бꙋ́дꙋщагѡ непреста́ннꙋю ѻ҆сма́гѡ вѣ́ка жи́знь и҆з̾ѡбража́етъ, въ ню́же влⷣка ѡ҆брѣ́засѧ пло́тїю.
Бг҃оро́диченъ:
Мо́лимъ тѧ̀, чи́стаѧ, ꙗ҆́же бг҃а безсѣ́меннѡ заче́нши, при́снѡ моли́ти за рабы̑ твоѧ̑.
Пѣ́снь є҃.
І҆рмо́съ:
Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.
Ты̀ ѿ дв҃ы мт҃ре несказа́ннѡ проше́дъ, гдⷭ҇и, и҆ въ человѣ́ческїй ны́не сподо́билсѧ є҆сѝ ѡ҆дѣ́ѧтисѧ ѻ҆́бразъ, ꙗ҆́кѡ младе́нецъ, зако́ннѡ зако́нъ и҆спо́лнилъ є҆сѝ.
Но́щи ᲂу҆подо́бисѧ, ꙗ҆́кѡ сѣ́нь зако́ннꙋю лю́бѧщи і҆и҃лѧ, ро́ждшаѧ, и҆зъ неѧ́же ѡ҆блиста́вшїй свѣ́тъ мі́ра хрⷭ҇то́съ ꙗ҆ви́сѧ.
Бг҃оро́диченъ:
Тебѣ̀, ро́ждшей хрⷭ҇та̀, всѣ́хъ содѣ́телѧ, зове́мъ: ра́дꙋйсѧ, чⷭ҇таѧ, ра́дꙋйсѧ, свѣ́тъ возсїѧ́вшаѧ на́мъ: ра́дꙋйсѧ, вмѣсти́вшаѧ бг҃а невмѣсти́маго.
Пѣ́снь ѕ҃.
І҆рмо́съ:
Бе́здна мѧ̀ мно́га грѣхо́внаѧ ѡ҆крꙋжа́етъ, и҆ вопїю́ ти, прⷪ҇ро́ка подража́ѧй: ѿ тли́ мѧ, гдⷭ҇и, возведѝ.
Прїѧ́тъ коне́цъ зако́нъ, ѿне́лѣже хрⷭ҇то́съ младе́нствовавъ, и҆сполни́тель зако́на сы́й, ѡ҆брѣ́занїе воспрїѧ́тъ, и҆ разрѣшѝ зако́ннꙋю клѧ́твꙋ.
Сꙋббѡ́тство, ѡ҆брѣ́занїе же шата́нїѧ є҆вре́йскагѡ ꙗ҆́вльшагѡсѧ хрⷭ҇та̀ манове́нїемъ преста̀, и҆ возсїѧ̀ бл҃года́ти весна̀.
Бг҃оро́диченъ:
Спасѝ ѿ бѣ́дъ рабы̑ твоѧ̑, бцⷣе, ꙗ҆́кѡ всѝ по бз҃ѣ къ тебѣ̀ прибѣга́емъ, ꙗ҆́кѡ къ нерꙋши́мѣй стѣнѣ̀ и҆ предста́тельствꙋ.
Конда́къ, гла́съ г҃.
Всѣ́хъ гдⷭ҇ь ѡ҆брѣ́занїе терпи́тъ, и҆ человѣ́чєскаѧ прегрѣшє́нїѧ, ꙗ҆́кѡ бл҃гъ ѡ҆брѣ́зꙋетъ, дае́тъ спасе́нїе дне́сь мі́рꙋ: ра́дꙋетсѧ же въ вы́шнихъ и҆ созда́телевъ і҆ера́рхъ и҆ свѣтоно́сный бжⷭ҇твенный таи́нникъ хрⷭ҇то́въ васі́лїй.
Пѣ́снь з҃.
І҆рмо́съ:
Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: благослове́нъ є҆сѝ, бж҃е ѻ҆ц҃ъ на́шихъ.
Свѣ́тло и҆ пресвѣ́тло ржⷭ҇тво̀ хрⷭ҇то́во, и҆ бꙋ́дꙋщагѡ ѡ҆бновле́нїѧ подписа́вшее та́инство дне́сь: ꙗ҆́кѡ зако́ннымъ чи́номъ сп҃съ ѡ҆брѣ́зꙋетсѧ, не ꙗ҆́кѡ бг҃ъ, но ꙗ҆́кѡ человѣ́къ, и҆ зако́на и҆сполне́нїе.
Зако́нъ и҆сполнѧ́ѧ, зако́на творе́цъ пло́тїю дне́сь во́лею ѡ҆брѣ́зꙋетсѧ, ѡ҆брѣ́занїе содѣва́ѧ грѣхо́вныѧ зимы̀, и҆ зва́ти да́рꙋѧ: бл҃гослове́нъ є҆сѝ, бж҃е ѻ҆ц҃ъ на́шихъ.
Бг҃оро́диченъ:
Тѧ̀ кꙋпинꙋ̀ мѡѷсе́й въ горѣ̀ сїна́йстѣй ѻ҆гнепали́мꙋ, чⷭ҇таѧ, прови́дѧше, прїе́мшꙋю неѡпа́льнѡ нестерпи́мꙋю зарю̀ неизглаго́ланнагѡ сꙋщества̀, соедини́вшагѡсѧ дебельствꙋ̀ пло́ти, є҆ди́ныѧ въ не́мъ ст҃ы́хъ ѵ҆поста́сей.
Пѣ́снь и҃.
І҆рмо́съ:
Неизрече́нною мꙋ́дростїю соста́вльшаго всѧ́чєскаѧ бг҃а сло́ва, и҆ ѿ не сꙋ́щихъ во є҆́же бы́ти приве́дшаго, бл҃гослови́те дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.
Во ѻ҆смы́й де́нь ѡ҆брѣ́зꙋетсѧ, ꙗ҆́кѡ младе́нецъ, влⷣка: і҆и҃са же прїе́млетъ и҆менова́нїе, ꙗ҆́кѡ мі́ра є҆́сть сп҃съ и҆ гдⷭ҇ь.
Ко хрⷭ҇то́вꙋ ржⷭ҇твꙋ̀ досто́йнѡ ѻ҆смы́й спрѧже́сѧ, ст҃и́телѧ всесла́внаѧ па́мѧть, ю҆́же почита́юще вѣ́рою, пое́мъ гдⷭ҇а и҆ превозно́симъ во вѣ́ки.
Бг҃оро́диченъ:
И҆з̾ ѻ҆ц҃а̀ проше́дшаго пре́жде вѣ̑къ, и҆ безлѣ́тнаго бг҃а сло́ва, и҆ въ послѣ̑днѧѧ возсїѧ́вша и҆з̾ дв҃ы, бл҃гослови́те, дѣла̀ гдⷭ҇нѧ, гдⷭ҇а.
Пѣ́снь ѳ҃.
І҆рмо́съ:
Ꙗ҆́же пре́жде со́лнца свѣти́льника бг҃а возсїѧ́вшаго, пло́тски къ на́мъ прише́дшаго, и҆з̾ бокꙋ̀ дв҃и́чꙋ, неизрече́ннѡ воплоти́вшаѧ, бл҃гослове́ннаѧ всечⷭ҇таѧ, тѧ̀, бцⷣе, велича́емъ.
Припѣ́въ:
Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.
Дне́сь влⷣка ѡ҆брѣ́зꙋетсѧ пло́тїю, ꙗ҆́кѡ младе́нецъ, и҆сполнѧ́ѧ зако́нъ.
Припѣ́въ:
Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.
Дне́сь влⷣка пло́тїю ѡ҆брѣ́засѧ, і҆и҃съ нарече́сѧ.
Припѣ́въ:
Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.
Преше́дъ предѣ́лы хрⷭ҇то́съ человѣ́ческагѡ всегѡ̀ є҆стества̀, преесте́ственнѡ и҆з̾ дв҃ы ражда́етсѧ: и҆ писа́нїе зако́нное ꙗ҆́коже повелѣва́етъ, пло́тїю ѡ҆брѣ́заетсѧ, и҆ и҆спо́лнитель зако́на ꙗ҆влѧ́етсѧ.
Припѣ́въ:
Велича́й, дꙋшѐ моѧ̀, во ѻ҆смы́й де́нь ѡ҆брѣ́занїе прїе́млюща.
Прїиди́те, влⷣки сла̑внаѧ хрⷭ҇тѡ́ва и҆менова̑нїѧ во свѧты́ни торжествꙋ́имъ: і҆и҃съ бо бг҃олѣ́пнѡ нарече́сѧ дне́сь. съ си́ми же и҆ па́мѧть ст҃и́телѧ велича́емъ.
Вмѣ́стѡ Сла́вы:
Велича́й, дꙋшѐ моѧ̀, ᲂу҆краси́вшаго хрⷭ҇то́вꙋ цр҃ковь.
Превы́спрєннѧѧ вода́ми покрыва́ѧй є҆ди́нъ гдⷭ҇ь, возстѧзꙋ́ѧй мо́ре, бє́здны же и҆зсꙋша́ѧй и҆зъ тебє̀, чⷭ҇таѧ, пло́ть воспрїе́мый, ѿ виѳлее́ма тщи́тсѧ ко і҆ѻрда́нꙋ крⷭ҇ти́тисѧ пло́тїю.
Вмѣ́стѡ И҆ ны́нѣ:
Велича́й, дꙋшѐ моѧ̀, чⷭ҇тнѣ́йшꙋю нбⷭ҇ныхъ во́инствъ, дв҃ꙋ пречⷭ҇тꙋю бцⷣꙋ.
Недоꙋмѣ́етъ всѧ́къ ѧ҆зы́къ благохвали́ти по достоѧ́нїю, и҆з̾ꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе. ѻ҆ба́че, бл҃га́ѧ сꙋ́щи, вѣ́рꙋ прїимѝ: и҆́бо любо́вь вѣ́си бжⷭ҇твеннꙋю на́шꙋ: ты́ бо хрⷭ҇тїа́нъ є҆сѝ предста́тельница, тѧ̀ велича́емъ.
І҆рмо́съ:
Ѽ па́че ᲂу҆ма̀ ржⷭ҇тва̀ твоегѡ̀ чꙋде́съ! невѣ́сто всечⷭ҇таѧ, мт҃и бл҃гослове́ннаѧ, є҆́юже полꙋчи́вше всесоверше́нное спасе́нїе, досто́йнѡ хва́лимъ, ꙗ҆́кѡ благодѣ́телѧ, да́ръ носѧ́ще пѣ́снь благодаре́нїѧ.
Свѣти́ленъ.
Любомꙋ́дрїѧ жела́нїемъ ѡ҆брѣ́залъ є҆сѝ, ѻ҆́ч҃е, дꙋшѝ твоеѧ̀ покрыва́ло, и҆ мі́рꙋ показа́лсѧ є҆сѝ, ꙗ҆́кѡ со́лнце, чꙋдесы̀, и҆ вѣ́рныхъ ѡ҆зари́лъ є҆сѝ мы̑сли, бг҃омꙋ́дре, трⷪ҇цы таи́нниче, ѽ васі́лїе мꙋ́дре, и҆ слꙋжи́телю бцⷣы!
Сла́ва, и҆ ны́нѣ:
Пло́тїю ѡ҆брѣ́зꙋетсѧ зако́нъ и҆спо́лнивый, ꙗ҆́кѡ младе́нецъ ѻ҆смодне́венъ, вѣкѡ́въ зижди́тель: и҆ пелена́ми повива́етсѧ, ꙗ҆́кѡ человѣ́къ: и҆ млеко́мъ пита́етсѧ, и҆́же всѧ̑ безмѣ́рною крѣ́постїю, ꙗ҆́кѡ бг҃ъ, содержа́й, и҆ манове́нїемъ возводѧ́й.