Пѣ́снь а҃.
І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Да пое́тъ тебѣ̀, влⷣчце, движѧ̀ свирѣ́ль дх҃о́внꙋю, дв҃дъ, пра́ѻтецъ тво́й, послꙋ́шай, дщѝ, ра́дованнагѡ гла́са ѿ а҆́гг҃ла, ра́дость бо возвѣща́етъ тебѣ̀ неизглаго́ланнꙋю.
А҆́гг҃лъ:
Вопїю̀ тебѣ̀ веселѧ́сѧ, приклонѝ ᲂу҆́хо твоѐ, и҆ вонмѝ мѝ, бж҃їе возвѣща́ющꙋ безсѣ́менное зача́тїе: ѡ҆брѣла́ бо є҆сѝ благода́ть предъ бг҃омъ, є҆ѧ́же никогда́же ѡ҆брѣ́те дрꙋга́ѧ, всечⷭ҇таѧ.
Бцⷣа:
Да разꙋмѣ́ю, а҆́гг҃ле, твои́хъ глагѡ́лъ си́лꙋ, ка́кѡ бꙋ́детъ, є҆́же ре́клъ є҆сѝ, глаго́ли ꙗ҆́вственнѣйше; ка́кѡ зачнꙋ̀, дв҃а сꙋ́щи ѻ҆трокови́ца; ка́кѡ же и҆ мт҃и бꙋ́дꙋ зижди́телѧ моегѡ̀;
А҆́гг҃лъ:
Ле́стнѡ мѧ̀ вѣща́ти помышлѧ́еши, ꙗ҆́кѡ мню̀: и҆ ра́дꙋюсѧ, зрѧ̀ твоѐ ᲂу҆твержде́нїе. дерза́й, влⷣчце, бг҃ꙋ бо хотѧ́щꙋ, ᲂу҆до́бь сконча́ютсѧ и҆ пресла̑внаѧ.
Пѣ́снь г҃.
І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.
Бцⷣа:
Ѡ҆скꙋдѣ̀ кнѧ́зь ѿ і҆ꙋ́ды, вре́мѧ наста̀ про́чее, въ не́же ꙗ҆ви́тсѧ ꙗ҆зы́кѡвъ наде́жда, хрⷭ҇то́съ: ты́ же, ка́кѡ сего̀ рождꙋ̀, дв҃а сꙋ́щи, скажѝ;
А҆́гг҃лъ:
И҆́щеши ѿ менє̀ ᲂу҆вѣ́дѣти, дв҃о, ѻ҆́бразъ зача́тїѧ твоегѡ̀, но то́й несказа́ненъ є҆́сть: дх҃ъ же ст҃ы́й зижди́тельною си́лою, ѡ҆сѣни́въ тѧ̀, соверши́тъ.
Бцⷣа:
Моѧ̀ прама́ти, прїе́мши ра́зꙋмъ ѕмїи́нъ, пи́щи бж҃е́ственныѧ и҆згна́на бы́сть: тѣ́мже и҆ а҆́зъ бою́сѧ цѣлова́нїѧ стра́ннагѡ твоегѡ̀, стыдѧ́щисѧ поползнове́нїѧ.
А҆́гг҃лъ:
Бж҃їй предста́тель по́сланъ є҆́смь, бжⷭ҇твенный повѣ́дати тебѣ̀ совѣ́тъ: что̀ менє̀ бои́шисѧ, всенепоро́чнаѧ, па́че тебє̀ боѧ́щагѡсѧ; что̀ благоговѣ́еши мнѣ̀, влⷣчце, тебѣ̀ че́стнѡ благоговѣ́ющемꙋ;
Сѣда́ленъ, гла́съ и҃.
Сло́во бж҃їе на зе́млю ны́нѣ сни́де, а҆́гг҃лъ предста̀, вопїѧ̀ дв҃ѣ, ра́дꙋйсѧ, благослове́ннаѧ, ꙗ҆́же печа́тїю є҆ди́на сохра́ншисѧ, во ᲂу҆тро́бѣ прїе́мши предвѣ́чнаго сло́ва и҆ гдⷭ҇а: да ѿ пре́лести спасе́тъ, ꙗ҆́кѡ бг҃ъ, ро́дъ человѣ́ческїй.
Сла́ва, и҆ ны́нѣ:
По́сланъ бы́сть съ нб҃сѐ а҆рхїстрати́гъ гаврїи́лъ ѿ бг҃а, ско́рѡ предста̀ ко ѡ҆дꙋшевле́нномꙋ гра́дꙋ, глаго́лѧ къ не́й ꙗ҆́вственнѡ: зижди́телѧ прїи́меши, дв҃о, во ᲂу҆тро́бѣ, и҆ роди́ши сего̀ непрело́жнѣ съ пло́тїю. тѣ́мже по́сланъ є҆́смь возвѣсти́ти тебѣ̀ стра́нное ржⷭ҇тво̀, чⷭ҇таѧ, и҆ стою̀ зовѧ̀ тебѣ̀: ра́дꙋйсѧ, невѣ́сто неневѣ́стнаѧ.
Пѣ́снь д҃.
І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Бцⷣа:
Сщ҃е́ннꙋю нѣ́кꙋю дв҃ꙋ ражда́ющꙋю, слы́шахъ прⷪ҇ро́ка дре́вле є҆мманꙋ́ила проре́кша: хощꙋ́ же разꙋмѣ́ти, ка́кѡ бжⷭ҇тва̀ растворе́нїе є҆стество̀ человѣ́ческое претерпи́тъ;
А҆́гг҃лъ:
Ꙗ҆ви́ла є҆́сть кꙋпина̀, неѡпа́льна пребы́вши, прїе́мши пла́мень, ѡ҆бра́дованнаѧ всепѣ́таѧ, на тебѣ̀ та́инства пресла́вное: по рождествѣ́ бо пребꙋ́деши чⷭ҇таѧ приснодв҃а.
Бцⷣа:
Ѡ҆свѣща́емь сїѧ́нїемъ бг҃а вседержи́телѧ, и҆́стины проповѣ́дниче, глаго́ли, гаврїи́ле, и҆́стиннѣйшаѧ: ка́кѡ нетлѣ́ннѣ бы́вши чистотѣ̀ мое́й, сло́ва рождꙋ̀ съ пло́тїю безпло́тнаго;
А҆́гг҃лъ:
Со стра́хомъ тебѣ̀, ꙗ҆́кѡ ра́бъ гпⷭ҇жѣ̀ предстою̀, съ боѧ́знїю, ѻ҆трокови́це, ны́нѣ смотри́ти стыждꙋ́сѧ тебѐ: ꙗ҆́кѡ бо до́ждь на рꙋно̀ сни́детъ на тѧ̀ сло́во ѻ҆́ч҃ее, ꙗ҆́кѡ благоволѝ.
Пѣ́снь є҃.
І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Бцⷣа:
Разꙋмѣ́ти не могꙋ̀ твои́хъ слове́съ и҆звѣ́стїѧ: чꙋдеса́ бо бы́ша мно́жицею, бжⷭ҇твенною си́лою чꙋдодѣ́йствꙋєма, зна́мєнїѧ и҆ ѻ҆́бразы зако́ннїи: роди́ же дв҃а неискꙋсомꙋ́жнѣ никогда́же.
А҆́гг҃лъ:
Диви́тъ, всенепоро́чнаѧ, и҆ стра́нно бо чꙋ́до твоѐ, є҆ди́на бо ты̀ всѣ́хъ цр҃ѧ̀ прїи́меши, во ᲂу҆тро́бѣ воплоща́ема: и҆ тѧ̀ проѡбразꙋ́ютъ прⷪ҇ро́чєскаѧ речє́нїѧ и҆ гада̑нїѧ, и҆ зако́ннїи ѻ҆́бразы.
Бцⷣа:
Всѣ́ми невмѣсти́мый и҆ всѣ́ми неви́димый, ка́кѡ се́й мо́жетъ во чре́во дв҃и́че всели́тисѧ, є҆́же са́мъ созда̀, ка́кѡ же и҆ зачнꙋ̀ бг҃а сло́ва, собезнача́льна ѻ҆ц҃ꙋ̀ и҆ дх҃ꙋ;
А҆́гг҃лъ:
Къ твоемꙋ̀ пра́ѻц҃ꙋ дв҃дꙋ, ѡ҆бѣща́сѧ посади́ти ѿ плода̀ твоегѡ̀ чре́ва, на прⷭ҇то́лѣ црⷭ҇тва є҆гѡ̀, і҆а́кѡвлю тѧ̀ добро́тꙋ, є҆ди́нꙋ и҆збра̀ въ слове́сное селе́нїе.
Пѣ́снь ѕ҃.
І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.
Бцⷣа:
Глагѡ́лъ твои́хъ, гаврїи́ле, гла́съ ра́дованенъ прїе́мши, весе́лїѧ бжⷭ҇твеннагѡ и҆спо́лнихсѧ: ра́дость бо повѣ́даеши, и҆ весе́лїе возвѣща́еши безконе́чное.
А҆́гг҃лъ:
Тебѣ̀ даде́сѧ ра́дость, бг҃омт҃и, бжⷭ҇твеннаѧ: тебѣ̀, є҆́же ра́дꙋйсѧ, всѧ̀ тва́рь вопїе́тъ, бг҃оневѣ́сто: ты́ бо є҆ди́на мт҃и сн҃а бж҃їѧ пронарече́сѧ, чⷭ҇таѧ.
Бцⷣа:
Є҆́ѵы мно́ю ны́нѣ да ᲂу҆праздни́тсѧ ѡ҆сꙋжде́нїе, да возда́стсѧ мно́ю до́лгъ дне́сь: мно́ю заи́мствованїе дре́внее да да́стсѧ преиспо́лнено.
А҆́гг҃лъ:
Ѡ҆бѣща́сѧ бг҃ъ а҆враа́мꙋ пра́ѻц҃ꙋ, благослови́тисѧ въ сѣ́мени є҆гѡ̀ ꙗ҆зы́кѡмъ, чⷭ҇таѧ: тобо́ю же коне́цъ ѡ҆бѣща́нїе прїе́млетъ дне́сь.
Конда́къ, гла́съ и҃:
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, благода́рствєннаѧ восписꙋ́емъ тѝ рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.
І҆́косъ:
А҆́гг҃лъ предста́тель съ нб҃сѐ по́сланъ бы́сть рещѝ бцⷣѣ, ра́дꙋйсѧ, и҆ со безпло́тнымъ гла́сомъ воплоща́ема тѧ̀ зрѧ̀, гдⷭ҇и, ᲂу҆жаса́шесѧ, и҆ стоѧ́ше, зовы́й къ не́й такова̑ѧ: ра́дꙋйсѧ, є҆́юже ра́дость возсїѧ́етъ: ра́дꙋйсѧ, є҆́юже клѧ́тва и҆сче́знетъ: ра́дꙋйсѧ, па́дшагѡ а҆да́ма воззва́нїе: ра́дꙋйсѧ, сле́зъ є҆́ѵиныхъ и҆збавле́нїе: ра́дꙋйсѧ, высото̀, неꙋдобовосходи́маѧ человѣ́ческими по́мыслы: ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма: ра́дꙋйсѧ, ꙗ҆́кѡ є҆сѝ цр҃е́во сѣда́лище: ра́дꙋйсѧ, ꙗ҆́кѡ но́сиши носѧ́щаго всѧ̑: ра́дꙋйсѧ, ѕвѣздо̀, ꙗ҆влѧ́ющаѧ сл҃нце: ра́дꙋйсѧ, ᲂу҆тро́бо бжⷭ҇твеннагѡ воплоще́нїѧ: ра́дꙋйсѧ, є҆́юже ѡ҆бновлѧ́етсѧ тва́рь: ра́дꙋйсѧ, є҆́юже покланѧ́емсѧ творцꙋ̀. ра́дꙋйсѧ, невѣ́сто неневѣ́стнаѧ.
Пѣ́снь з҃.
І҆рмо́съ:
Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆ц҃є́въ гдⷭ҇ь и҆ бг҃ъ, благослове́нъ є҆сѝ.
Бцⷣа:
Свѣ́тъ невеще́ственный повѣ́даѧ, въ веще́ственнѣ тѣлесѝ совокꙋплѧ́емь за милосе́рдїе мно́гое, свѣ́тлое благовѣ́щенїе, бжⷭ҇твєннаѧ проповѣ̑данїѧ, ны́нѣ взыва́еши мѝ: благослове́нъ, всечⷭ҇таѧ, пло́дъ твоегѡ̀ чре́ва.
А҆́гг҃лъ:
Ра́дꙋйсѧ, влⷣчце дв҃о, ра́дꙋйсѧ, пречⷭ҇таѧ, ра́дꙋйсѧ, прїѧ́телище бж҃їе: ра́дꙋйсѧ, свѣ́щниче свѣ́та, а҆да́мово воззва́нїе, є҆́ѵы и҆збавле́нїе, горо̀ ст҃а́ѧ, преѧ́вственное свѧще́нїе и҆ черто́гъ безсме́ртїѧ.
Бцⷣа:
Дꙋ́шꙋ ѡ҆чи́сти, тѣ́ло ѡ҆свѧтѝ, це́рковь сотвори́ мѧ вмѣсти́тельнꙋ бг҃а, ски́нїю бг҃оꙋкра́шенꙋ, ѡ҆дꙋшевле́нъ хра́мъ наи́тїемъ прест҃а́гѡ дх҃а, и҆ жи́зни чⷭ҇тꙋю мт҃рь.
А҆́гг҃лъ:
Ꙗ҆́кѡ многосвѣ́тлꙋю свѣщꙋ̀, и҆ бг҃одѣ́ланенъ черто́гъ ви́жꙋ тѧ̀ ны́нѣ ꙗ҆́кѡ зла́тъ кївѡ́тъ, зако́на пода́телѧ прїимѝ, бг҃оневѣ́сто, благоизво́лившаго человѣ́ческое и҆зба́вити тобо́ю тлѣ́нное сꙋщество̀.
Пѣ́снь и҃.
І҆рмо́съ:
Слы́ши, ѻ҆трокови́це дв҃о чⷭ҇таѧ, да рече́тъ ᲂу҆́бѡ гаврїи́лъ совѣ́тъ вы́шнѧгѡ дре́внїй, и҆́стинный, бꙋ́ди къ прїѧ́тїю гото́ва бж҃їю: тобо́ю бо невмѣсти́мый съ человѣ́ки поживѐ. Тѣ́мъ и҆ ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а.
Бцⷣа:
Оу҆́мъ всѧ́къ побѣжда́етсѧ земны́хъ, ѿвѣща̀ дв҃и́ца, и҆́щꙋщи ꙗ҆̀же мнѣ̀ вѣща́еши пресла̑внаѧ: слы́шахъ твоѧ̑ словеса̀, но бою́сѧ ᲂу҆жаса́ющисѧ, да не ле́стїю мѧ̀, ꙗ҆́кѡ є҆́ѵꙋ дале́че по́слеши ѿ бг҃а. но ѻ҆ба́че сѐ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.
А҆́гг҃лъ:
Сѐ тебѣ̀ недоꙋмѣ́нное разрѣши́сѧ, глаго́летъ къ си̑мъ гаврїи́лъ: до́брѣ бо рекла̀ є҆сѝ, ве́щь неꙋдобопости́жна, словесє́мъ твои́хъ ᲂу҆сте́нъ повинꙋ́ющисѧ про́чее. не сꙋмни́сѧ ꙗ҆́кѡ ле́сти, ꙗ҆́коже ве́щи вѣ́рꙋй: а҆́зъ бо ра́дꙋѧсѧ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.
Бцⷣа:
Зако́нъ се́й ѿ бг҃а є҆́сть человѣ́кѡмъ, непоро́чнаѧ а҆́бїе глаго́летъ, ѿ ѻ҆́бщїѧ любвѐ ржⷭ҇тво̀ происхо́дитъ, не вѣ́мъ сꙋпрꙋ́жника сла́сти всеконе́чнѡ: ка́кѡ ᲂу҆́бѡ глаго́леши, ꙗ҆́кѡ рождꙋ̀; бою́сѧ, є҆да̀ ле́сть глаго́леши; но ѻ҆ба́че сѐ вопїю̀: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.
А҆́гг҃лъ:
Глаго́лы, ꙗ҆̀же мнѣ̀ вѣща́еши, чⷭ҇таѧ, а҆́гг҃лъ па́ки глаго́летъ, ѻ҆бы́чаѧ є҆́сть рождества̀ человѣ́кѡвъ сме́ртныхъ: и҆́стиннѡ бг҃а тебѣ̀ ѡ҆бѣщава́ю, па́че сло́ва же и҆ смы́сла воплоща́ема, ꙗ҆́кѡ вѣ́сть, и҆зъ тебє̀. тѣ́мже и҆ ра́дꙋѧсѧ, вопїю̀: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.
Бцⷣа:
Ꙗ҆влѧ́ешисѧ мнѣ̀ и҆́стины вѣща́тель, речѐ дв҃а, ра́дости бо ѻ҆́бщїѧ прише́лъ є҆сѝ благовѣ́стникъ: дꙋ́шꙋ ᲂу҆́бѡ ѡ҆чи́стихъ съ тѣ́ломъ, и҆ по глаго́лꙋ твоемꙋ̀ бꙋ́ди мнѣ̀, да всели́тсѧ бг҃ъ въ мѧ̀, къ немꙋ́же вопїю̀ съ тобо́ю: благослови́те, всѧ̑ дѣла̀ гдⷭ҇нѧ, гдⷭ҇а, и҆ превозноси́те є҆го̀ во вѣ́ки.
Пѣ́снь ѳ҃.
І҆рмо́съ:
Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ. Оу҆стнѣ́ же вѣ́рныхъ бцⷣѣ немо́лчнѡ, гла́съ а҆́гг҃ла воспѣва́юще, съ ра́достїю да вопїю́тъ: ра́дꙋйсѧ, благода́тнаѧ, гдⷭ҇ь съ тобо́ю.
Па́че смы́сла заче́нши бг҃а, є҆стества̀ ѻ҆бы́чаѧ ᲂу҆таи́сѧ, ѻ҆трокови́це: ты́ бо въ ржⷭ҇твѣ̀ мт҃рскагѡ и҆збѣжа́ла є҆сѝ тлѣ́ннагѡ є҆стества̀, и҆ превы́шши сꙋ́щи. тѣ́мже досто́йнѡ слы́шиши: ра́дꙋйсѧ, благода́тнаѧ, гдⷭ҇ь съ тобо́ю.
Ка́кѡ то́чиши млеко̀, дв҃о чⷭ҇таѧ, не мо́жетъ и҆зрещѝ ѧ҆зы́къ зе́мленъ: стра́ннꙋ бо є҆стества̀ показꙋ́еши ве́щь, зако́ннагѡ ржⷭ҇тва̀ ᲂу҆ста́въ прехо́диши. тѣ́мже досто́йнѡ слы́шиши: ра́дꙋйсѧ, благода́тнаѧ, гдⷭ҇ь съ тобо́ю.
Та́йнѡ во сщ҃е́нныхъ писа́нїихъ глаго́ласѧ ѡ҆ тебѣ̀, мт҃и вы́шнѧгѡ: лѣ́ствицꙋ бо дре́вле і҆а́кѡвъ тѧ̀ ѡ҆бразꙋ́ющꙋю ви́дѣвъ, речѐ: степе́нь бж҃їѧ сїѧ̀. тѣ́мже досто́йнѡ слы́шиши: ра́дꙋйсѧ, благода́тнаѧ, гдⷭ҇ь съ тобо́ю.
Чꙋ́дное свѧщенноѧвле́нномꙋ мѡѷсе́ю кꙋпина̀ и҆ ѻ҆́гнь, показа̀ чꙋ́до: и҆ща́й же конца̀ въ прехожде́нїи време́нъ, во ѻ҆трокови́цѣ чⷭ҇тѣй, речѐ, ᲂу҆зрю̀. є҆́йже, ꙗ҆́кѡ бцⷣѣ, да рече́тсѧ: ра́дꙋйсѧ, благода́тнаѧ, гдⷭ҇ь съ тобо́ю.
Данїи́лъ тѧ̀ го́рꙋ наречѐ мы́сленнꙋю: роди́тельницꙋ же бж҃їю и҆са́їа: ви́дитъ же ꙗ҆́кѡ рꙋно̀ гедеѡ́нъ: дв҃дъ же свѧще́нїе глаго́летъ, две́рь же тѧ̀ и҆́нъ. гаврїи́лъ же тебѣ̀ взыва́етъ: ра́дꙋйсѧ, благода́тнаѧ, гдⷭ҇ь съ тобо́ю.
Свѣти́ленъ.
А҆́гг҃льскихъ си́лъ а҆рхїстрати́гъ по́сланъ бы́сть ѿ бг҃а вседержи́телѧ къ чⷭ҇тѣй и҆ дв҃ѣ, благовѣсти́ти стра́нное и҆ неизрече́нное чꙋ́до: занѐ бг҃ъ, ꙗ҆́кѡ чл҃вѣ́къ, и҆зъ неѧ̀ младодѣ́йствꙋетсѧ безъ сѣ́мене, назида́ѧй ве́сь человѣ́ческїй ро́дъ: лю́дїе, благовѣсти́те ѡ҆бновле́нїе мі́ра.
Сла́ва, и҆ ны́нѣ:
Є҆́же ѿ вѣ́ка дне́сь познава́етсѧ та́инство бж҃їе, бг҃ъ сло́во, сн҃ъ дв҃ы мр҃і́и за милосе́рдїе быва́етъ, и҆ ра́дость благовѣ́щенїѧ гаврїи́лъ провѣщава́етъ. Съ ни́мже возопїе́мъ є҆́й: ра́дꙋйсѧ, мт҃и гдⷭ҇нѧ.