А҆ка́ѳїстъ бж҃їей мт҃ри въ че́сть є҆ѧ̀ всечⷭ҇тна́гѡ ᲂу҆спе́нїѧ.
Конда́къ а҃.
И҆збра́нной ѿ всѣ́хъ родѡ́въ бж҃їей мт҃ри и҆ цр҃и́цѣ, восходѧ́щей ѿ землѝ къ нб҃сѝ, бл҃гоговѣ̑йнаѧ пѣ̑нїѧ ѡ҆ пречⷭ҇тнѣ́мъ твое́мъ ᲂу҆спе́нїи прино́симъ рабѝ твоѝ, бцⷣе. ты́ же ꙗ҆́кѡ и҆мꙋ́щаѧ побѣ́дꙋ над̾ сме́ртїю, ѿ всѧ́кихъ на́съ смертоно́сныхъ бѣ́дъ свободѝ, да зове́мъ тѝ:
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
І҆́косъ а҃.
А҆́гг҃лъ предста́тель по́сланъ бы́сть, рещѝ бцⷣѣ ко премі̑рнымъ є҆ѧ̀ возше́ствїе: и҆ прїитѝ пред̾ѧвлѧ́ше къ не́й сн҃ꙋ є҆ѧ̀ и҆ бг҃ꙋ, свѣ́тлѡ ѡ҆ не́й блиста́ѧсѧ, и҆ стоѧ̀, зовы́й такова̑ѧ:
Ра́дꙋйсѧ, прера́дованнаѧ мт҃и цр҃е́ва: ра́дꙋйсѧ, нбⷭ҇наѧ цр҃и́це, мт҃и бг҃а и҆ гдⷭ҇а нб҃сѐ и҆ землѝ.
Ра́дꙋйсѧ, предпочте́ннаѧ превели́чествомъ прише́ствїѧ къ тебѣ̀ сн҃а твоегѡ̀ и҆ бг҃а: ра́дꙋйсѧ, возвели́ченнаѧ и҆звѣще́нїемъ твоегѡ̀ къ сн҃ꙋ ѿше́ствїѧ.
Ра́дꙋйсѧ, ѿ всѣ́хъ родѡ́въ бг҃омъ и҆збра́ннаѧ: ра́дꙋйсѧ, ст҃о́е вмѣсти́лище сло́ва бж҃їѧ.
Ра́дꙋйсѧ, прⷪ҇ро́ческагѡ прорече́нїѧ и҆сполне́нїе: ра́дꙋйсѧ, а҆пⷭ҇лѡмъ пречестны́й вѣ́нче.
Ра́дꙋйсѧ, ст҃и́телємъ ᲂу҆краше́нїе, и҆ сщ҃е́нникѡмъ добро́то: ра́дꙋйсѧ, прави́телємъ ᲂу҆добре́нїе и҆ держа́во.
Ра́дꙋйсѧ, бг҃омꙋ́дрыхъ и҆́нокѡвъ возведе́нїе къ го́рнемꙋ црⷭ҇твїю: ра́дꙋйсѧ, ѿверза́ющаѧ ра̑йскїѧ двє́ри хрⷭ҇тїа́нскомꙋ ро́дꙋ, при́снѡ тѧ̀ блажа́щемꙋ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ в҃.
Ви́дѧще а҆пⷭ҇лѡвъ ли́къ, всеси́льнымъ манове́нїемъ ѿ конє́цъ землѝ на ѻ҆́блацѣхъ предста́вшихъ ко пречестно́мꙋ твоемꙋ̀, пренепоро́чнаѧ, ᲂу҆спе́нїю, сщ҃еннонача̑льницы, дїонѵ́сїй нбⷭ҇ный таи́нникъ, і҆ероѳе́й ди́вный и҆ тїмоѳе́й, съ бг҃олѣ́пною че́стїю сщ҃е́нства, поѧ́хꙋ бг҃ꙋ: А҆ллилꙋ́їа.
І҆́косъ в҃.
Разꙋ́мнаѧ всѧ̀ тва́рь, старѣ̑йшаѧ чинонача̑лїѧ а҆́гг҃льскаѧ, прїидо́ша со свои́мъ цр҃е́мъ, и҆́же во своѧ̑ живонача́льнѣйшыѧ рꙋ́цѣ дꙋ́шꙋ мт҃ре своеѧ̀ прїѧ́тъ: те́плый же вѣ́рою пе́тръ со слеза́ми мнѡ́гаѧ къ не́й и҆зречѐ, зовы́й:
Ра́дꙋйсѧ, ко премі̑рнымъ, мт҃и творца̀ мі́рꙋ, восходѧ́щаѧ: ра́дꙋйсѧ, къ пренебє́снымъ, простра́ннѣйшаѧ нб҃съ, взе́млющаѧсѧ.
Ра́дꙋйсѧ, четвероча́стное стїхі́й ѡ҆свѧти́вшаѧ твои́мъ восхожде́нїемъ: ра́дꙋйсѧ, нбⷭ҇ныхъ возвесели́вшаѧ твои́мъ прехожде́нїемъ.
Ра́дꙋйсѧ, во і҆ерꙋсали́мъ го́рнїй прекра́сный прїѧ́таѧ: ра́дꙋйсѧ, въ нерꙋкотворє́нныѧ хра́мы прера́достнѡ вше́дшаѧ.
Ра́дꙋйсѧ, херꙋві́мѡвъ и҆ серафі́мѡвъ цр҃и́це: ра́дꙋйсѧ, а҆рха́гг҃лѡвъ и҆ а҆́гг҃лѡвъ влⷣчце.
Ра́дꙋйсѧ, прибѣ́жище вѣ̑рнымъ, и҆ и҆збавле́нїе: ра́дꙋйсѧ, достоѧ́нїю твоемꙋ̀ по́мощь и҆ защище́нїе.
Ра́дꙋйсѧ, ѡ҆ все́мъ мі́рѣ хрⷭ҇тїа́нстѣмъ къ бг҃ꙋ хода́таице: ра́дꙋйсѧ, бла̑гъ всѧ́ческихъ всеблага́ѧ пода́тельнице.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ г҃.
Си́ла вы́шнѧгѡ восхи́ти ѿ і҆нді́и ѳѡмꙋ̀, за нѣ́кое и҆зволе́нїе бж҃їе не прилꙋ́чшꙋсѧ є҆мꙋ̀ въ пречⷭ҇тно́е ᲂу҆спе́нїе бг҃ома́тере, и҆ предпоста́ви живопрїе́мномꙋ є҆ѧ̀ гро́бꙋ, и҆́же преста́вльшꙋюсѧ прини́къ ви́дѣти, ᲂу҆разꙋмѣ̀ вознесе́ннꙋю на нб҃са̀ съ тѣ́ломъ, и҆ вѣ́ровавъ ѡ҆ се́мъ, возопѝ: А҆ллилꙋ́їа.
І҆́косъ г҃.
И҆мѣ́ѧ въ себѣ̀ помышле́нїе ᲂу҆чени́къ, ꙗ҆́кѡ бж҃їимъ смотре́нїемъ бѣ̀ є҆мꙋ̀, не ѡ҆брѣсти́сѧ ко провожде́нїю бг҃ома́тере съ про́чими вкꙋ́пѣ, ѡ҆бра́дованъ бы́въ ѡ҆ безсме́ртнѣмъ є҆ѧ̀ ᲂу҆спе́нїи, сїѧ̑ вопїѧ́ше къ не́й:
Ра́дꙋйсѧ, воспрїе́млемаѧ ѿ землѝ дла́ньма сн҃а твоегѡ̀: ра́дꙋйсѧ, ко превы̑шнимъ возше́дшаѧ наслажда́тисѧ сла́вы є҆гѡ̀.
Ра́дꙋйсѧ, провожда́емаѧ ѿ всѣ́хъ чинонача́лїй а҆́гг҃льскихъ въ гѡ́рнѧѧ: ра́дꙋйсѧ, под̾е́млемаѧ херꙋві́мы въ нбⷭ҇наѧ и҆ наднбⷭ҇наѧ.
Ра́дꙋйсѧ, въ нбⷭ҇ныхъ вратѣ́хъ ѿ старѣ́йшихъ си́лъ велелѣ́пнѡ пѣ́сньми возноси́маѧ: ра́дꙋйсѧ, ѿ всѣ́хъ нбⷭ҇ныхъ гра́жданъ ѡ҆крꙋжа́емаѧ и҆ блажи́маѧ.
Ра́дꙋйсѧ, не́бо земно́е, къ го́рнемꙋ селе́нїю возвы́шенное: ра́дꙋйсѧ, прⷭ҇то́ле гдⷭ҇нь, ѿ землѝ вознесе́нный въ црⷭ҇твїе нбⷭ҇ное.
Ра́дꙋйсѧ, предста́тельство на́ше и҆ крѣ́пкое застꙋпле́нїе: ра́дꙋйсѧ, грѣ́шникѡмъ спорꙋ́чнице во сп҃се́нїе.
Ра́дꙋйсѧ, хрⷭ҇тїа́нѡмъ цр҃и́це, и҆ по бз҃ѣ наде́ждо нбⷭ҇нагѡ црⷭ҇твїѧ: ра́дꙋйсѧ, мт҃и живота̀, и҆ по гдⷭ҇ѣ на́мъ ᲂу҆пова́нїе жи́зни вѣ́чныѧ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ д҃.
Бꙋ́рю внꙋ́трь и҆мѣ́ѧ помышле́нїй невѣ́рныхъ є҆вре́инъ а҆фѳо́нїй, и҆ зрѧ̀ бг҃оно́сными а҆пⷭ҇лы бг҃ома́тере пречтⷭ҇но́е тѣ́ло всечⷭ҇тнѣ ко гро́бꙋ несе́нное, ко ѡ҆проверже́нїю ᲂу҆стреми́сѧ: внеза́пꙋ же, є҆гда̀ со ѡ҆слѣпле́нїемъ ѻ҆́чїю, рꙋ́цѣ є҆гѡ̀ ѿѧ́тѣ ко ѻ҆дрꙋ̀ прилѣпле́нѣ ви́сѧстѣ, вѣ́рою мт҃рь бж҃їю и҆сповѣ́даше, вопїѧ̀ бг҃ꙋ: А҆ллилꙋ́їа.
І҆́косъ д҃.
Слы́шавше таи̑нницы и҆ самови́дцы сло́ва а҆́гг҃лѡвъ пою́щихъ превы́шними пѣ́сньми, при погребе́нїи бг҃опрїѧ́тнагѡ тѣ́ла бж҃їѧ мт҃ре, и҆ че́сть пода́ти хотѧ́ще бг҃оꙋго́днꙋю, потща́шасѧ согла́снѡ пѣ́ти, глаго́люще:
Ра́дꙋйсѧ, благовѣ́стїе прїе́мшаѧ ѡ҆ преше́ствїи твое́мъ въ го́рнее црⷭ҇твїе: ра́дꙋйсѧ, ѿ бл҃говѣсти́вшагѡ гаврїи́ла прїе́мшаѧ ра́достнагѡ раѧ̀ вра́вїе.
Ра́дꙋйсѧ, пречⷭ҇тно́е херꙋві́мское мно́жество просвѣти́вшаѧ: ра́дꙋйсѧ, пресла́вное серафі́мское є҆стество̀ возра́довавшаѧ.
Ра́дꙋйсѧ, ѿ патрїа́рхѡвъ проѡбразова́ннаѧ: ра́дꙋйсѧ, ѿ прⷪ҇ро́кѡвъ предвозвѣще́ннаѧ.
Ра́дꙋйсѧ, ѕлꙋ́ю де́рзость і҆ꙋде́євꙋ ско́рѡ ѿмсти́вшаѧ: ра́дꙋйсѧ, и҆сцѣле́нїе томꙋ́жде пода́вшаѧ.
Ра́дꙋйсѧ, ѡ҆брати́вшаѧ въ вѣ́рꙋ а҆фѳо́нїево невѣ́рїе: ра́дꙋйсѧ, вѣ́рное тогѡ̀ прїе́мшаѧ и҆сповѣ́данїе.
Ра́дꙋйсѧ, возводѧ́щаѧ къ нб҃сѝ, любо́вь и҆ вѣ́рꙋ къ тебѣ̀ и҆мꙋ́щихъ: ра́дꙋйсѧ, сп҃са́ющаѧ вѣ́рою и҆́мѧ твоѐ призыва́ющихъ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ є҃.
Бг҃отє́чныѧ ѕвѣ́зды, а҆пⷭ҇ли ст҃і́и, въ поднебе́снѣй разсѣ́ѧннїи ра́ди є҆ѵⷢ҇лїа, восхище́ни бы́ша на ѻ҆́блацѣхъ, по широтѣ̀ воздꙋ́шнѣй, ко погребе́нїю мт҃ре гдⷭ҇ни: ю҆́же пѣ́ньми и҆ пѣ́сньми провожда́юще, съ невеще́ственными взыва́хꙋ: А҆ллилꙋ́їа.
І҆́косъ є҃.
Ви́дѣвше бг҃ови́дцы своего̀ влⷣкꙋ, въ рꙋ́цѣ мт҃ре своеѧ̀ дꙋ́шꙋ прїе́мша, и҆ гдⷭ҇а того̀ разꙋмѣ́вше, потща́шасѧ свѧщенносло́вїѧ пѣ́сньми бл҃госло́внѣ воспѣ́ти ю҆̀:
Ра́дꙋйсѧ, цр҃и́це, над̾ всѣ́ми црⷭ҇твꙋющаго носи́вшаѧ: ра́дꙋйсѧ, и҆ сама̀ рꙋка́ма є҆гѡ̀ сн҃о́внима носи́маѧ.
Ра́дꙋйсѧ, ски́птре црⷭ҇кїй въ хрⷭ҇то́вой десни́цѣ: ра́дꙋйсѧ, въ рꙋцѣ̀ нѡ́а, вѣ́тве голꙋби́цы.
Ра́дꙋйсѧ, же́зле а҆арѡ́новъ, прозѧ́бшїй нетлѣ́нїе: ра́дꙋйсѧ, крі́не неꙋвѧда́емый, процвѣ́тшїй безсме́ртїе.
Ра́дꙋйсѧ, бг҃оѻтца̀ дв҃да цѣвни́це бг҃одохнове́ннаѧ: ра́дꙋйсѧ, прⷪ҇ро́чествїѧ є҆гѡ̀ воста́вшаѧ сла́во, ѱалти́рю и҆ гꙋ́сли прекра́сныѧ.
Ра́дꙋйсѧ, ѡ҆дꙋшевле́нный ст҃ы́ни гдⷭ҇ни кївѡ́те: ра́дꙋйсѧ, въ поко́й гдⷭ҇ень воскре́сшїй на́шъ животѐ.
Ра́дꙋйсѧ, ски́нїе, ѿ херꙋві́мѡвъ ѡ҆сѣнѧ́емаѧ: ра́дꙋйсѧ, ст҃а́ѧ ст҃ы́хъ, ѿ серафі́мѡвъ глаго́лємаѧ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ ѕ҃.
Проповѣ̑дницы бг҃оно́снїи а҆пⷭ҇ли, по ѿше́ствїи ко премі̑рнымъ бж҃їѧ мт҃ре, во ѻ҆́бщемъ сѣдѣ́нїи ѻ҆бы́чныѧ трапе́зы бы́вше, и҆ предложе́нїе ча́сти хлѣ́ба, во и҆́мѧ гдⷭ҇не возносѧ́ще, внеза́пꙋ свы́ше бцⷣꙋ цр҃и́цꙋ прише́дшꙋю со свѣтоно́сными а҆́гг҃лы зрѧ́хꙋ, и҆ ми́ръ тѣ̑мъ ѿ сн҃а и҆ бг҃а пода́вшꙋю слы́шавше, возгласи́ша ѡ҆ се́мъ: А҆ллилꙋ́їа.
І҆́косъ ѕ҃.
Возсїѧ̀ на́мъ сл҃нце пра́вды хрⷭ҇то́съ бг҃ъ, ѿ твои́хъ пречⷭ҇тыхъ ложе́снъ во́лею, и҆ бл҃горазꙋ́мїемъ проповѣ́данїѧ чрез̾ а҆пⷭ҇лы мі́ръ просвѣтѝ, и҆ тѧ̀ бг҃ома́терь ѿ ро́да и҆ въ ро́дъ просла́ви. тѣ́мже и҆ мы̀ всѝ ᲂу҆блажа́емъ тѧ̀, вопїю́ще тѝ:
Ра́дꙋйсѧ, приснобл҃же́ннаѧ ѿ всѣ́хъ родѡ́въ во вѣ́ки: ра́дꙋйсѧ, бл҃гоꙋтро́бнаѧ и҆ млⷭ҇тиваѧ на человѣ́ки.
Ра́дꙋйсѧ, ᲂу҆чени́ческомꙋ ли́кꙋ ѡ҆бѣща́нїе и҆спо́лнившаѧ: ра́дꙋйсѧ, присѣще́нїемъ твои́мъ ѿ сн҃а твоегѡ̀ и҆ бг҃а, ми́ръ томꙋ̀ пода́вшаѧ.
Ра́дꙋйсѧ, всежела́тельное ст҃ы́хъ сла́дкое зрѣ́нїе: ра́дꙋйсѧ, прпⷣбныхъ ма́терей и҆ дѣ́въ ст҃ы́хъ всевеселѧ́щее ра́дованїе.
Ра́дꙋйсѧ, преходѧ́щаѧ ра́йское селе́нїе првⷣныхъ: ра́дꙋйсѧ, посѣща́ющаѧ всѣ́хъ во сла́вѣ нбⷭ҇нѣй сꙋ́щихъ.
Ра́дꙋйсѧ, нача́ло человѣ́ческагѡ сп҃се́нїѧ: ра́дꙋйсѧ, и҆сполне́нїе всѣ́хъ бл҃ги́хъ жела́нїѧ.
Ра́дꙋйсѧ, по бз҃ѣ цр҃ѣ̀ ца́рствꙋющихъ бцⷣе цр҃и́це: ра́дꙋйсѧ, по гдⷭ҇ѣ госпо́дствꙋющихъ, влⷣцѣ на́шемъ, гпⷭ҇жѐ и҆ влⷣчце.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ з҃.
Хотѧ́щихъ всѣ́хъ съ вѣ́рою входи́ти въ хра́мъ тво́й ст҃ы́й, бцⷣе, при́снѡ сп҃са́еши, и҆ сла́вѧщихъ тѧ̀, ѿ всѧ́кихъ напа́стей и҆ бѣ́дъ свобожда́еши: тѣ́мже и҆ правосла̑внымъ хрⷭ҇тїа́нѡмъ, приснобл҃жа́щымъ тѧ̀, побѣ́ды на сопроти̑вныѧ да́рꙋй и҆ всѧ̑ ко спасе́нїю прошє́нїѧ на́мъ подава́й, ѡ҆ се́мъ молѧ́щымсѧ тебѣ̀, и҆ пою́щымъ бг҃ꙋ: А҆ллилꙋ́їа.
І҆́косъ з҃.
Но́вꙋю показа̀ тва́рь, ꙗ҆́вльсѧ на́мъ всѣ́хъ творе́цъ гдⷭ҇ь тобо́ю, бцⷣе. ты́ же сро́дное промышле́нїе ѡ҆ на́съ къ немꙋ̀ и҆мꙋ́щи, чⷭ҇тнѣ почита́ющихъ пречⷭ҇тно́е твоѐ ᲂу҆спе́нїе, прїимѝ сицєва́ѧ тебѣ̀ вопїю́щихъ:
Ра́дꙋйсѧ, мт҃и бг҃ꙋ и҆збра́ннаѧ ѿ земны́хъ: ра́дꙋйсѧ, превы́шшаѧ земны́хъ и҆ нбⷭ҇ныхъ.
Ра́дꙋйсѧ, херꙋві́мѡвъ и҆ серафі́мѡвъ горѣ̀ превозше́дшаѧ: ра́дꙋйсѧ, ли́къ ᲂу҆чени́ческїй ѻ҆́блакомъ ко погребе́нїю тѝ до́лѣ совокꙋ́пльшаѧ.
Ра́дꙋйсѧ, ѳѡмꙋ̀ по погребе́нїи твое́мъ си́лою бж҃їею предпоста́вившаѧ и҆зрѧ́днѣе: ра́дꙋйсѧ, чрез̾ него̀ ᲂу҆вѣ́рившаѧ твоѐ на нб҃о съ пло́тїю преселе́нїе.
Ра́дꙋйсѧ, красото́ю всѣ́хъ добродѣ́телей ᲂу҆кра́шеннаѧ: ра́дꙋйсѧ, краснѣ́йшемꙋ па́че сынѡ́въ человѣ́ческихъ сн҃ови своемꙋ̀ сопричте́ннаѧ.
Ра́дꙋйсѧ, ꙗ҆́кѡ фі́нїѯъ пло́тїю воскре́сшею процвѣ́тшаѧ: ра́дꙋйсѧ, ꙗ҆́кѡ ке́дръ въ лїва́нѣ нбⷭ҇номъ ᲂу҆мно́жившаѧсѧ.
Ра́дꙋйсѧ, дре́во живота̀ насажде́нное посредѣ̀ раѧ̀ превы́шнѧгѡ: ра́дꙋйсѧ, ковче́же мы́сленный, возвы́шенный въ гѡ́рнѧѧ ѿ пото́па сме́ртнагѡ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ и҃.
Стра́ннѡ въ превы́шнихъ вѣ́дꙋще тѧ̀ и҆збра́ннаѧ, ꙗ҆́кѡ со́лнце, влⷣчце, внꙋ́трь пренбⷭ҇ныхъ недомы́слимыхъ красо́тъ и҆ неизрече́нныхъ добро́тъ, ᲂу҆ми́льнѡ къ сн҃ꙋ и҆ бг҃ꙋ дла́ньма є҆гѡ̀ держи́мꙋ возше́дшꙋю, и҆ прера́достнѡ прекло́ншꙋюсѧ живонача́льнѣй є҆гѡ̀ десни́цѣ, ѡ҆ се́мъ вы́нꙋ вопїе́мъ: А҆ллилꙋ́їа.
І҆́косъ и҃.
Всѧ̀ бы́вши горѣ̀ къ нбⷭ҇нымъ взѧта̀, и҆ земны́хъ не ѡ҆ставлѧ́ѧ, бг҃ома́ти, рꙋка́ма сн҃о́внима носи́ма, въ незаходи̑маѧ вни́де, во ѻ҆́ный гра́дъ всесвѣтѧ́щїй и҆ прекра́сный і҆ерꙋсали́мъ вы́шнїй, херꙋві̑мы ѡ҆бстои́ма, со всѣ́ми нбⷭ҇ными си́лами, и҆дѣ́же слы́шитъ пою́щихъ сїѧ̑:
Ра́дꙋйсѧ, є҆ѧ́же прест҃а́ѧ дꙋша̀ въ вы́шнемъ всесвѣ́тломъ сїѡ́нѣ вселѧ́етсѧ: ра́дꙋйсѧ, є҆ѧ́же и҆ нетлѣ́нное тѣ́ло та́можде съ дꙋше́ю кꙋ́пнѡ прославлѧ́етсѧ.
Ра́дꙋйсѧ, вше́дшаѧ въ престо́льный гра́дъ самагѡ̀ вседержи́телѧ: ра́дꙋйсѧ, возне́сшаѧсѧ въ прекра́сный ра́й вы́шнѧгѡ насади́телѧ.
Ра́дꙋйсѧ, пренесе́ннаѧ во гра́дъ ѡ҆снова́нный ѿ ка́меней всесвѣтѧ́щихъ: ра́дꙋйсѧ, введе́ннаѧ во ѡ҆гра́дꙋ ѡ҆бстои́мꙋю вѡ́и си́лъ превы́шнихъ.
Ра́дꙋйсѧ, превы́шше нб҃съ во благолѣ́пїе бж҃їе взѧ́таѧ: ра́дꙋйсѧ, па́че всѣ́хъ невеще́ственныхъ ᲂу҆мѡ́въ почте́наѧ.
Ра́дꙋйсѧ, приносѧ́щаѧ къ сн҃ꙋ своемꙋ̀ и҆ бг҃ꙋ моле́нїе вѣ́рныхъ: ра́дꙋйсѧ, и҆ сама̀ непреста́ннѡ ᲂу҆ прⷭ҇то́ла сн҃а твоегѡ̀ и҆ бг҃а молѧ́щаѧсѧ ѡ҆ всѣ́хъ.
Ра́дꙋйсѧ, предста́тельнице къ бг҃ꙋ мі́ръ спаса́ющаѧ: ра́дꙋйсѧ, застꙋ́пнице ро́дꙋ хрⷭ҇тїа́нскомꙋ ѿ бг҃а дарова́ннаѧ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ ѳ҃.
Всѧ́кое є҆стество̀ а҆́гг҃льское превозно́ситъ тѧ̀, бцⷣе, человѣ́честїи же ро́ди всѝ мт҃рь тѧ̀ бж҃їю сла́вимъ, и҆ почита́емъ пречⷭ҇тно́е твоѐ ᲂу҆спе́нїе, цр҃и́це: тебе́ бо ра́ди земні́и небє́снымъ совокꙋплѧ́ютсѧ, согла́снѡ пою́ще бг҃ꙋ: А҆ллилꙋ́їа.
І҆́косъ ѳ҃.
Вѣті̑йства бг҃овѣща́нныхъ проро́ческихъ рече́нїй, ны́нѣ зри́мъ ѡ҆ тебѣ̀ сбы́вшаѧсѧ бцⷣе, ꙗ҆́кѡ вои́стиннꙋ бг҃а пло́тїю родила̀ є҆сѝ на́мъ. тѣ́мже та́инствꙋ словесѐ бж҃їѧ вѣ́рꙋюще, вопїе́мъ:
Ра́дꙋйсѧ, зако́на и҆ прⷪ҇ро́кѡвъ глави́зно соверше́ннаѧ: ра́дꙋйсѧ, ѕвѣздо̀ і҆а́кѡвлѧ, валаа́момъ прⷪ҇рокова́ннаѧ.
Ра́дꙋйсѧ, ѻ҆́дре цр҃ѧ̀ вели́кагѡ, вѣща́нный соломѡ́номъ: ра́дꙋйсѧ, рꙋно̀ ѡ҆роше́нное і҆и҃сомъ, ѡ҆бразова́нное гедеѡ́номъ.
Ра́дꙋйсѧ, неѡпали́маѧ кꙋпино̀, законополо́жникомъ предзри́маѧ: ра́дꙋйсѧ, горо̀ ст҃а́ѧ, мꙋ́жемъ жела́нїѧ ᲂу҆смотре́ннаѧ.
Ра́дꙋйсѧ, лѣ́ствице нбⷭ҇наѧ, і҆а́кѡвомъ предви́димаѧ: ра́дꙋйсѧ, две́ре непроходи́маѧ, і҆езекі́илемъ предзри́маѧ.
Ра́дꙋйсѧ, со́лнце селе́нїѧ хрⷭ҇то́ва, ѱалмопѣ́вцемъ пред̾ѧвле́нное: ра́дꙋйсѧ, та́инство, многоѡбра́знѣ прⷪ҇ро́ки пронарече́нное.
Ра́дꙋйсѧ, проро́ческихъ глагѡ́лъ всѣ́хъ предрече́нныхъ ѡ҆ тебѣ̀, коне́цъ прине́сшаѧ: ра́дꙋйсѧ, вы́шнѧгѡ смотрє́нїѧ всѧ̑ за сп҃се́нїе мі́ра соверши́вшаѧ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ і҃.
Спастѝ хотѧ̀ мі́ръ, и҆́же всѣ́хъ гдⷭ҇ь, ѿ земна́гѡ тѧ̀ ро́да и҆збра̀ въ мт҃рь себѣ̀, и҆ на́съ дѣ́лѧ бы́въ человѣ́къ, взы́де, ѿню́дꙋже сни́де, къ нб҃сѝ ѿ землѝ, и҆ тебѐ съ собо́ю возведѐ ко пребыва́нїю во сла́вѣ вѣ́чнѣй, и҆ соца́рствованїю съ собо́ю конца̀ не и҆мꙋ́щемꙋ. тѣ́мже ꙗ҆́кѡ бг҃ъ слы́шитъ ѿ всѣ́хъ: А҆ллилꙋ́їа.
І҆́косъ і҃.
Стѣна̀ є҆сѝ вѣ̑рнымъ, бцⷣе дв҃о, и҆ застꙋпле́нїе всѣ̑мъ къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ ѿ тебѐ пло́тїю проше́дъ, пречи́стаѧ, дх҃омъ и҆ тѣ́ломъ въ небє́снаѧ тѧ̀ преселѝ ко ближа́йшемꙋ предста́тельствꙋ ѡ҆ всѣ́хъ, и҆̀хже приглаша́ти наꙋчѝ:
Ра́дꙋйсѧ, гра́де цр҃ѧ̀ вели́кагѡ верхꙋ̀ горы̀ нбⷭ҇ныѧ: ра́дꙋйсѧ, стѣно̀ и҆ покро́ве, не кры́ющїйсѧ ѿ на́шегѡ притека́нїѧ.
Ра́дꙋйсѧ, вѣ̑рнымъ царє́мъ на врагѝ посо́бствꙋющаѧ: ра́дꙋйсѧ, нашє́ствїѧ а҆га̑рѧнскаѧ побѣжда́ющаѧ.
Ра́дꙋйсѧ, вѣ́ры бл҃гочести́выѧ недви́жимое сохране́нїе: ра́дꙋйсѧ, є҆реті́чествꙋющихъ полкѡ́въ разоре́нїе.
Ра́дꙋйсѧ, ра́дость и҆ ᲂу҆мире́нїе мі́рꙋ сꙋ́щаѧ: ра́дꙋйсѧ, всегꙋби́тельнаго а҆́да попра́вшаѧ.
Ра́дꙋйсѧ, во́инствꙋющихъ на пло́ть цѣломꙋ́дрїемъ, и҆зрѧ́дное вѣнча́нїе: ра́дꙋйсѧ, мч҃ническихъ по́двигѡвъ всечⷭ҇тно́е прославле́нїе.
Ра́дꙋйсѧ, прпⷣбныхъ трꙋдѡ́мъ хода́таице бл҃же́ннагѡ ᲂу҆покое́нїѧ: ра́дꙋйсѧ, и҆́нокѡмъ бл҃госкорбѧ́щымъ пода́тельнице вѣ́чнагѡ ра́дованїѧ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ а҃і.
Пѣ́нїе всѧ́кое бг҃одꙋхнове́нныхъ пѣ́сней, не довлѣ́етъ ѿ на́съ къ похвалѣ̀ всечⷭ҇тна́гѡ ᲂу҆спе́нїѧ твоегѡ̀, всехва́льнаѧ влⷣчце, цр҃и́це, бцⷣе: но ᲂу҆се́рднѡ тебѣ̀ прино́симъ, ꙗ҆́кѡ мт҃ри цр҃ѧ̀ всѣ́хъ, смире́нное моле́нїе на́ше, съ нбⷭ҇ными чи́нми пою́ще є҆ди́номꙋ досто́йнѡ прославлѧ́ющемꙋ тѧ̀ бг҃ꙋ: А҆ллилꙋ́їа.
І҆́косъ а҃і.
Свѣтопрїе́мнаѧ свѣща̀ и҆́стиннагѡ свѣ́та, сꙋ́щымъ на́мъ на землѝ ꙗ҆́вльшисѧ, дꙋ́шы просвѣща́еши, и҆ чтꙋ́щихъ твоѐ всечестно́е преставле́нїе къ ра́зꙋмꙋ бж҃е́ственномꙋ наставлѧ́еши, да пое́мъ тѝ сицєва́ѧ:
Ра́дꙋйсѧ, свѣщѐ неꙋгаси́маѧ ѻ҆гнѧ̀ невеще́ственнагѡ: ра́дꙋйсѧ, зарѐ незаходи́маѧ свѣ́та невече́рнѧгѡ.
Ра́дꙋйсѧ, лꙋно̀ ѿ сл҃нца пра́вды ѡ҆блистава́емаѧ: ра́дꙋйсѧ, свѣ́тлосте во тмѣ̀ свѣтѧ́щаѧ.
Ра́дꙋйсѧ, свѣти́льниче на свѣ́щницѣ превы́шнемъ поста́вленный: ра́дꙋйсѧ, и҆сто́чниче жи́зни, и҆з̾ гро́ба во свѣ́тъ и҆зведе́нный.
Ра́дꙋйсѧ, мт҃и свѣ́та ᲂу҆́мнагѡ, бл҃гочести́выхъ дꙋ́шы просвѣща́ющагѡ: ра́дꙋйсѧ, мт҃и всѣ́хъ бг҃а, ѡ҆ѕло́бленныхъ дꙋ́шы ᲂу҆тѣша́ющагѡ.
Ра́дꙋйсѧ, ᲂу҆пова́ющымъ на тѧ̀ живота̀ коне́цъ непосты́дный да́рꙋющаѧ: ра́дꙋйсѧ, достоѧ́нїе бж҃їимъ и҆ свои̑мъ рабѡ́мъ, на сꙋдѣ̀ сн҃а твоегѡ̀, ѡ҆деснꙋ́ю є҆гѡ̀ ᲂу҆строѧ́ющаѧ.
Ра́дꙋйсѧ, пребл҃же́ннаѧ, ꙗ҆́кѡ тобо́ю бл҃же́ни є҆смы̀ и҆ мы̀, и҆́же помо́щницꙋ тѧ̀ и҆́мамы: ра́дꙋйсѧ, преблгⷭ҇ве́ннаѧ въ ро́дъ и҆ ро́дъ, ꙗ҆́кѡ гдⷭ҇ь съ тобо́ю, и҆ тобо́ю съ на́ми.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ в҃і.
Бл҃года́ть высокопресто́льныѧ сла́вы, на нбⷭ҇ѣ́хъ дарова́ннꙋю бг҃омт҃ри, почте́ной сѣдѣ́нїемъ ѡ҆деснꙋ́ю сн҃а є҆ѧ̀ и҆ бг҃а, ви́дѧще го́рнїи ᲂу҆мы̀, под̾ѧ́ша ю҆̀ престо́ли и҆ си̑лы, ѡ҆крꙋжи́ша нача̑ла и҆ вла̑сти, припадо́ша стра́шнїи херꙋві́ми, серафі́ми и҆ гдⷭ҇ьства, со а҆рха́гг҃лы и҆ а҆́гг҃лы вопїю́ще: А҆ллилꙋ́їа.
І҆́косъ в҃і.
Пою́ще всечⷭ҇тно́е твоѐ ᲂу҆спе́нїе, восхвалѧ́емъ всѝ ко пренебє́снымъ возше́ствїе твоѐ, цр҃и́це бг҃омт҃и: ты́ же ѡ҆ст҃ѝ, просла́ви и҆ сп҃сѝ всѣ́хъ любо́вїю пою́щихъ тебѣ̀:
Ра́дꙋйсѧ, ѡ҆чи́стившаѧ зе́млю пречⷭ҇тыми но́гъ твои́хъ стопа́ми: ра́дꙋйсѧ, ѡ҆ст҃и́вшаѧ воздꙋ́хъ восхожде́нїемъ твои́мъ къ нб҃сѝ.
Ра́дꙋйсѧ, на нбⷭ҇ный крꙋ́гъ возстꙋпи́вшаѧ: ра́дꙋйсѧ, всѧ̑ добрѡ́ты неизречє́нныѧ зрѧ́щаѧ.
Ра́дꙋйсѧ, во сла́вѣ присѣдѧ́щаѧ прⷭ҇то́лꙋ сн҃а твоегѡ̀ и҆ бг҃а: ра́дꙋйсѧ, съ сн҃омъ и҆ бг҃омъ вѣ́чнѡ црⷭ҇твꙋющаѧ.
Ра́дꙋйсѧ, красото̀ въ десни́цѣ гдⷭ҇ней, ᲂу҆краша́ющаѧ бл҃жа́щихъ тѧ̀ всѣ́хъ нбⷭ҇ныхъ: ра́дꙋйсѧ, ѡ҆бра́довавшаѧ надѣ́ѧнїемъ на тѧ̀ всѣ́хъ земны́хъ.
Ра́дꙋйсѧ, ѡ҆блече́ннаѧ въ со́лнце, сїѧ́ющаѧ блгⷣтїю и҆ сла́вою все́й вселе́ннѣй: ра́дꙋйсѧ, ѡ҆бѣща́вшаѧ сохранѧ́ти и҆ сп҃са́ти призыва́ющихъ тѧ̀ всѣ́хъ въ поднбⷭ҇нѣй.
Ра́дꙋйсѧ, ѿ хрⷭ҇тїа́нскихъ родѡ́въ мт҃и бж҃їѧ почита́емаѧ, и҆ бцⷣа и҆менꙋ́емаѧ: ра́дꙋйсѧ, ѿ востѡ́къ со́лнца до за̑падъ, пресла́внѡ и҆ правосла́внѡ ѿ всѣ́хъ бл҃гочести́выхъ сла́вимаѧ.
Ра́дꙋйсѧ ѡ҆бра́дованнаѧ, во ᲂу҆спе́нїи твое́мъ на́съ не ѡ҆ставлѧ́ющаѧ.
Конда́къ г҃і.
Ѽ всепѣ́таѧ мт҃и безсме́ртнагѡ цр҃ѧ̀ нб҃сѐ и҆ землѝ, хрⷭ҇та̀ бг҃а на́шегѡ, живꙋ́щаѧ и҆ по сме́рти, ны̑нѣшнѧѧ приношє́нїѧ ѡ҆ всечⷭ҇тнѣ́мъ твое́мъ ᲂу҆спе́нїи ѿ на́съ прїе́мши, въ жи́зни се́й и҆ въ сме́ртнѣмъ ᲂу҆спе́нїи на́шемъ, ѿ всѧ́кїѧ напа́сти, бѣ́дъ и҆ мꙋ́ки и҆зба́ви, и҆ нбⷭ҇нагѡ црⷭ҇твїѧ на́съ, цр҃и́це, сподо́би, ѡ҆ тебѣ̀ вопїю́щихъ: А҆ллилꙋ́їа.
Се́й конда́къ глаго́ли три́жды, посе́мъ і҆́косъ а҃-й и҆ конда́къ а҃-й.
Моли́тва.
Ѽ прест҃а́ѧ бцⷣе дв҃о, влⷣчце, вы́шшаѧ а҆́гг҃лъ и҆ а҆рха́гг҃лъ и҆ всеѧ̀ тва́ри честнѣ́йшаѧ, а҆́гг҃льское вели́кое ᲂу҆дивле́нїе, прⷪ҇ро́ческаѧ высо́каѧ про́повѣдь, а҆пⷭ҇льскаѧ пресла́внаѧ похвало̀, ст҃и́телей и҆зрѧ́дное ᲂу҆краше́нїе, мч҃никѡвъ крѣ́пкое ᲂу҆твержде́нїе, и҆́нокѡвъ сп҃си́тельное наставле́нїе, по́стникѡвъ неизнемога́ющее воздержа́нїе, дѣ́вствꙋющихъ чистото̀ и҆ сла́во, ма́терей ти́хое весе́лїе, младе́нцєвъ мꙋ́дросте и҆ наказа́нїе, вдови́цъ и҆ си́рыхъ корми́тельнице, наги́хъ ѡ҆дѣѧ́нїе, болѧ́щихъ здра́вїе, плѣ́нникѡвъ и҆збавле́нїе, по мо́рю пла́вающихъ тишино̀, ѡ҆бꙋрева́емыхъ небꙋ́рное приста́нище, блꙋжда́ющихъ нетрꙋ́днаѧ наста́внице, пꙋтеше́ствꙋющихъ ле́гкое прохожде́нїе, трꙋжда́ющихсѧ бл҃го́е поко́ище, въ бѣда́хъ сꙋ́щихъ ско́раѧ застꙋ́пнице, ѡ҆би́димыхъ покро́ве и҆ прибѣ́жище, ненадѣ́ющихсѧ надѣ́ѧнїе, тре́бꙋющихъ помо́щнице, печа́льныхъ прⷭ҇ное ᲂу҆тѣше́нїе, ненави́димыхъ любо́вное смире́нїе, грѣ́шникѡвъ сп҃се́нїе и҆ къ бг҃ꙋ присвое́нїе, правовѣ́рныхъ всѣ́хъ тве́рдое ѡ҆гражде́нїе, непобѣди́мое поможе́нїе и҆ застꙋпле́нїе! Тобо́ю на́мъ, влⷣчце, неви́димый ви́димъ бы́сть, и҆ тебѣ̀ мольбꙋ̀ прино́симъ, гпⷭ҇жѐ, грѣ́шнїи рабѝ твоѝ: ѽ премлⷭ҇тиваѧ и҆ пречꙋ́днаѧ свѣ́та ᲂу҆́мнагѡ цр҃и́це, ро́ждшаѧ цр҃ѧ̀ хрⷭ҇та̀, бг҃а на́шего, живода́вца всѣ́хъ, ѿ нбⷭ҇ныхъ сла́вимаѧ и҆ ѿ земны́хъ хвали́маѧ, а҆́гг҃льскїй ᲂу҆́ме, свѣтоза́рнаѧ ѕвѣздо̀, ст҃ы́хъ прест҃ѣ́йшаѧ, влⷣчце всѣ́хъ тва́рей, бг҃олѣ́пнаѧ дв҃и́це, нескве́рнаѧ невѣ́сто, пала́то дх҃а прест҃а́гѡ, ѻ҆́гненный прⷭ҇то́ле неви́димагѡ цр҃ѧ̀, нбⷭ҇ный кївѡ́те, носи́ло сло́ва бж҃їѧ, ѻ҆гнеѡбра́знаѧ колесни́це, поко́ище жива́гѡ бг҃а, неизрече́нное составле́нїе пло́ти хрⷭ҇то́вы, гнѣздо̀ ѻ҆рла̀ нбⷭ҇нагѡ, го́рлице бг҃огла́снаѧ, голꙋби́це кро́ткаѧ, ти́хаѧ и҆ неѕло́биваѧ, мт҃и чадолюби́ваѧ, млⷭ҇тей бе́здно, разверга́ющаѧ тꙋ́чꙋ гнѣ́ва бж҃їѧ, неизмѣ́римаѧ глꙋбино̀, неизрече́ннаѧ та́йно, несвѣ́домое чꙋ́до, нерꙋкотворе́ннаѧ цр҃кве є҆ди́нагѡ цр҃ѧ̀ всѣ́хъ вѣ̑къ, бл҃гоꙋха́нное кади́ло, чⷭ҇тна́ѧ багрѧни́це, бг҃отка́ннаѧ порфѵ́ро, дꙋше́вный раю̀, живоно́снагѡ са́да ѿрасле, цвѣ́те прекра́сный, процвѣ́тшїй на́мъ нбⷭ҇ное весе́лїе, гро́зде сп҃се́нїѧ на́шегѡ, ча́ше цр҃ѧ̀ нбⷭ҇нагѡ, въ не́йже раствори́сѧ ѿ дх҃а ст҃а́гѡ вїно̀ неисчерпа́емыѧ бл҃года́ти, хода́таице зако́на, зача́ло и҆́стинныѧ вѣ́ры хрⷭ҇то́вы непоколеби́мый сто́лпе, мечꙋ̀ ꙗ҆́рости бж҃їѧ на бг҃опроти́вныхъ, бѣсѡ́въ ᲂу҆страше́нїе, во бра́нехъ побѣжде́нїе, хрⷭ҇тїа́нъ всѣ́хъ нело́жнаѧ храни́тельнице и҆ мі́ра всегѡ̀ и҆звѣ́стное сп҃се́нїе! Ѽ всемлⷭ҇тиваѧ гпⷭ҇жѐ, дв҃о влⷣчце, бцⷣе, ᲂу҆слы́ши на́съ, молѧ́щихсѧ тебѣ̀, и҆ ꙗ҆вѝ млⷭ҇ть твою̀ на лю́дехъ твои́хъ, молѝ сн҃а своего̀ и҆зба́витисѧ на́мъ ѿ всѧ́кагѡ ѕла̀ и҆ сохранѝ ѡ҆би́тель на́шꙋ и҆ всѧ́кꙋ ѡ҆би́тель, и҆ гра́дъ, и҆ странꙋ̀ вѣ́рныхъ, и҆ лю́ди, бл҃гоче́стнѡ прибѣга́ющыѧ и҆ призыва́ющыѧ и҆́мѧ твоѐ ст҃о́е, ѿ всѧ́кїѧ напа́сти, гꙋби́тельства, гла́да, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ и҆ междоꙋсо́бныѧ бра́ни, ѿ всѧ́кїѧ болѣ̑зни и҆ всѧ́кагѡ ѡ҆бстоѧ̑нїѧ, да ни ра́нами, ни преще́нїемъ, ни мо́ромъ, ни всѧ́кимъ првⷣнымъ гнѣ́вомъ бж҃їимъ ᲂу҆ма́лѧтсѧ рабѝ твоѝ. Но соблюда́й и҆ сп҃са́й млⷭ҇тїю свое́ю, гпⷭ҇жѐ, за ны̀ молѧ́щисѧ, и҆ поле́зное бл҃горастворе́нїе воздꙋ́ха во вре́мени пло́днагѡ приноше́нїѧ на́мъ да́рꙋй. Ѡ҆блегчѝ, возста́ви и҆ поми́лꙋй, премлⷭ҇тиваѧ влⷣчце, бцⷣе препѣ́таѧ, во всѧ́кой бѣдѣ̀ и҆ нꙋ́ждѣ сꙋ́щыѧ. Помѧнѝ рабы̑ твоѧ̑ и҆ не пре́зри сле́зъ и҆ воздыха́нїѧ на́шегѡ, и҆ ѡ҆бновѝ на́съ бл҃гостїю своеѧ̀ млⷭ҇ти, да со бл҃годаре́нїемъ ᲂу҆тѣша́емсѧ, ѡ҆брѣ́тше тѧ̀ помо́щницꙋ. Оу҆млⷭ҇рдисѧ, гпⷭ҇жѐ пречⷭ҇таѧ, на немощны̑ѧ лю́ди твоѧ̑, наде́ждо на́ша. Разсѣ̑ѧнныѧ соберѝ, заблꙋ́ждшыѧ на пꙋ́ть пра́вый наста́ви, ѿпа́дшыѧ ѿ бл҃гочести́выѧ ѻ҆те́ческїѧ вѣ́ры па́ки возвратѝ, ста́рость поддержѝ, ю҆́ныѧ вразꙋмѝ, младе́нцы воспита́й и҆ просла́ви сла́вѧщыѧ тѧ̀, и҆зрѧ́днѣе же, цр҃ковь сн҃а твоегѡ̀ соблюдѝ и҆ сохранѝ въ долготꙋ̀ дні́й.
Ѽ ми́лостиваѧ и҆ преми́лостиваѧ цр҃и́це нб҃сѐ и҆ землѝ, бцⷣе приснодв҃о! Хода́тайствомъ твои́мъ поми́лꙋй странꙋ̀ на́шꙋ и҆ во́инство є҆ѧ̀ и҆ всѧ̑ правосла̑вныѧ хрⷭ҇тїа́ны, сохранѧ́ющи и҆́хъ под̾ кро́вомъ ми́лости твоеѧ̀, ри́зою твое́ю честно́ю защитѝ и҆ молѝ и҆зъ тебѣ̀ вопло́щшагосѧ без̾ сѣ́мене хрⷭ҇та̀, бг҃а на́шего, да препоѧ́шетъ ны̀ свы́ше си́лою на всѧ̑ ви̑димыѧ и҆ неви̑димыѧ врагѝ на́шѧ. Сп҃си́ же и҆ поми́лꙋй, госпожѐ, вели́каго господи́на и҆ ѻ҆тца̀ на́шего (имⷬ҇къ), ст҃ѣ́йшаго патрїа́рха моско́вскаго и҆ всеѧ̀ рꙋсѝ, преѡсвѧщє́нныѧ митрополі́ты, а҆рхїепⷭ҇кпы и҆ є҆пⷭ҇кпы правосла̑вныѧ, і҆ерє́и же и҆ дїа́коны и҆ ве́сь при́четъ цр҃ко́вный, и҆ ве́сь мона́шескїй чи́нъ, и҆ всѧ̑ правовѣ̑рныѧ лю́ди, покланѧ́ющыѧсѧ и҆ молѧ́щыѧсѧ пред̾ честно́ю твое́ю і҆кѡ́ною. При́зри на всѣ́хъ на́съ призрѣ́нїемъ ми́лостивнагѡ твоегѡ̀ застꙋпле́нїѧ, воздви́гни на́съ и҆з̾ глꙋбины̀ грѣхо́вныѧ и҆ просвѣтѝ ѻ҆́чи серде́чныѧ ко зрѣ́нїю сп҃се́нїѧ, ми́лостива на́мъ бꙋ́ди здѣ̀ и҆ на стра́шнѣмъ сꙋдѣ̀ сн҃а твоегѡ̀ ѡ҆ на́съ ᲂу҆молѝ, преста́вльшыѧсѧ во благоче́стїи ѿ житїѧ̀ сегѡ̀ рабы̀ твоѧ̑ въ вѣ́чнѣй жи́зни со а҆́гг҃лы и҆ а҆рха́гг҃лы и҆ со всѣ́ми ст҃ы́ми причтѝ, да ѡ҆деснꙋ́ю сн҃а твоегѡ̀ бг҃а предста́нꙋтъ, и҆ мл҃твою твое́ю сподо́би всѧ̑ правосла̑вныѧ хрⷭ҇тїа́ны со хрⷭ҇то́мъ жи́ти и҆ ра́дости а҆́гг҃льскїѧ въ нбⷭ҇ныхъ селе́нїихъ наслажда́тисѧ. Ты́ бо є҆сѝ, госпожѐ, сла́ва нбⷭ҇ныхъ и҆ ᲂу҆пова́нїе земны́хъ, ты̀ на́ша наде́жда и҆ застꙋ́пница всѣ́хъ притека́ющихъ къ тебѣ̀ и҆ твоеѧ̀ ст҃ы́ѧ по́мощи просѧ́щихъ. Ты̀ моле́бница на́ша те́плаѧ къ сн҃ꙋ твоемꙋ̀ и҆ бг҃ꙋ на́шемꙋ: твоѧ̀ ма́тернѧѧ мл҃тва мно́гѡ мо́жетъ на ᲂу҆моле́нїе влⷣки, и҆ твои́мъ предста́тельствомъ ко прⷭ҇то́лꙋ блгⷣти прест҃ы́хъ и҆ животворѧ́щихъ є҆гѡ̀ та́инъ пристꙋпа́ти дерза́емъ, а҆́ще и҆ недосто́йнїи. Тѣ́мже всечестны́й ѡ҆́бразъ тво́й и҆ рꙋко́ю твое́ю держи́маго вседержи́телѧ ви́дѧще на і҆кѡ́нѣ, ра́дꙋемсѧ, грѣ́шнїи, со ᲂу҆миле́нїемъ припа́дающе, и҆ любо́вїю се́й цѣлꙋ́емъ, ча́юще, госпожѐ, твои́ми ст҃ы́ми бг҃опрїѧ́тными мл҃твами доитѝ нбⷭ҇ныѧ безконе́чныѧ жи́зни и҆ непосты́днѡ ста́ти въ де́нь сꙋ́дный ѡ҆деснꙋ́ю сн҃а твоегѡ̀ и҆ бг҃а на́шегѡ, сла́вѧще є҆го̀ кꙋ́пнѡ со безнача́льнымъ ѻ҆ц҃е́мъ и҆ прест҃ы́мъ, благи́мъ, животворѧ́щимъ и҆ є҆диносꙋ́щнымъ дх҃омъ, во вѣ́ки вѣкѡ́въ. А҆ми́нь.