А҆ка́ѳїстъ покро́вꙋ прест҃ы́ѧ бцⷣы.
Конда́къ а҃.
И҆збра́ннѣй предвѣ́чнымъ цр҃е́мъ, превы́шшей всѧ́кагѡ созда́нїѧ, небесѐ и҆ землѝ цр҃и́цѣ, прише́дшей и҆ногда̀ во влахе́рнскꙋю це́рковь на мл҃твꙋ, досто́йное поклоне́нїе съ бл҃годаре́нїемъ приносѧ́ще, ꙗ҆́кѡ во тмѣ̀ сꙋ́щїи, под̾ тво́й свѣтѧ́щїйсѧ ѡ҆мофо́ръ съ вѣ́рою и҆ ᲂу҆миле́нїемъ прибѣга́емъ: ты́ же, ꙗ҆́кѡ и҆мꙋ́щи держа́вꙋ непобѣди́мꙋю, ѿ всѧ́кихъ на́съ бѣ́дъ свобожда́й, да зове́мъ тѝ:
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
І҆́косъ а҃.
А҆рха̑гг҃лъ и҆ а҆́гг҃лъ мно́жество, съ прⷣте́чею, бг҃осло́вомъ и҆ всѣ́хъ ст҃ы́хъ ли́комъ, сопредста́ша тебѣ̀, цр҃и́це свое́й, въ це́ркви влахе́рнстѣй, и҆ ᲂу҆милє́ннаѧ молє́нїѧ твоѧ̑ ѡ҆ все́мъ мі́рѣ слы́шавше, со ᲂу҆дивле́нїемъ возопи́ша такѡва́ѧ:
Ра́дꙋйсѧ, бг҃а ѻ҆ц҃а̀ безнача́льнагѡ предвѣ́чное бл҃говоле́нїе: ра́дꙋйсѧ, бг҃а сн҃а безлѣ́тнагѡ пречⷭ҇тое вмѣсти́лище.
Ра́дꙋйсѧ, бг҃а дх҃а всест҃а́гѡ и҆збра́нное жили́ще: ра́дꙋйсѧ, го́рнихъ чинѡ́въ а҆́гг҃льскихъ непрестаю́щее ᲂу҆дивле́нїе.
Ра́дꙋйсѧ, те́мныхъ си́лъ а҆́дскихъ всегро́зное ᲂу҆страше́нїе: ра́дꙋйсѧ, ю҆́же на воздꙋ́сѣ срѣта́ютъ многоѻчи́тїи херꙋві́ми.
Ра́дꙋйсѧ, є҆́йже похва̑льнаѧ восписꙋ́ютъ шестокрила́тїи серафі́ми: ра́дꙋйсѧ, є҆ѧ́же пребл҃го́мꙋ покро́вꙋ и҆ мы̀ земноро́днїи благода́рнѣ покланѧ́емсѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ в҃.
Ви́дѣвше тѧ̀ ст҃ы́й а҆ндре́й со є҆пїфа́нїемъ въ це́ркви на воздꙋ́сѣ за хрⷭ҇тїа́ны бг҃ꙋ молѧ́щꙋюсѧ, позна́ша, ꙗ҆́кѡ мт҃рь є҆сѝ возне́сшагѡсѧ на нб҃о хрⷭ҇та̀ бг҃а на́шегѡ, и҆ припа́дше на зе́млю, ра́достнѡ покланѧ́хꙋсѧ всебл҃го́мꙋ покро́вꙋ твоемꙋ̀, зовꙋ́ще: А҆ллилꙋ́їа.
І҆́косъ в҃.
Ра́зꙋмъ недоразꙋмѣва́емый є҆сѝ, бцⷣе дв҃о, въ защище́нїи люде́й правосла́вныхъ, сегѡ̀ ра́ди вразѝ на́ши и҆ не познаю́тъ, ко́ль сильна̀ є҆́сть мл҃тва бж҃їѧ мт҃ре: мы́ же ѡ҆ твое́мъ всемо́щнѣмъ застꙋпле́нїи до́брѣ вѣ́дꙋще, си́це къ тебѣ̀ со ᲂу҆миле́нїемъ зове́мъ:
Ра́дꙋйсѧ, премлⷭ҇рдаѧ ᲂу҆тѣ́шительнице всѣ́хъ скорбѧ́щихъ и҆ ѡ҆бремене́нныхъ: ра́дꙋйсѧ, неꙋсыпа́ющаѧ наста́внице всѣ́хъ заблꙋ́ждшихъ и҆ ѡ҆слѣпле́нныхъ.
Ра́дꙋйсѧ, првⷣно дви́жимый гнѣ́въ бж҃їй на на́съ твои́мъ моле́нїемъ ско́рѡ ᲂу҆толѧ́ющаѧ: ра́дꙋйсѧ, ѕлы̑ѧ стра̑сти на́шѧ всемо́щнымъ манове́нїемъ ᲂу҆кроща́ющаѧ.
Ра́дꙋйсѧ, крѣ́пкое возбꙋжде́нїе спѧ́щихъ со́вѣстей: ра́дꙋйсѧ, нетрꙋ́дное преѡдолѣ́нїе беззако́нныхъ на́выкѡвъ.
Ра́дꙋйсѧ, є҆ѧ́же ра́ди а҆́дъ стене́тъ и҆ дꙋ́си ѕло́бы трепе́щꙋтъ: ра́дꙋйсѧ, є҆ѧ́же ра́ди врата̀ раѧ̀ всѣ̑мъ на́мъ ѿверза́ютсѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ г҃.
Си́ла вы́шнѧгѡ ѡ҆сѣнѧ́етъ съ вѣ́рою и҆ бл҃гоговѣ́нїемъ прибѣга́ющихъ къ твоемꙋ̀ всечестно́мꙋ покро́вꙋ: є҆ди́нѣй бо то́чїю тебѣ̀, прест҃ѣ́й и҆ пречⷭ҇тѣй мт҃ри бж҃їей, даде́сѧ, да всѧ́кое проше́нїе твоѐ и҆спо́лнитсѧ: тѣ́мъ ᲂу҆́бѡ всѧ́къ во́зрастъ вѣ́рныхъ славосло́витъ тѧ̀ и҆ сн҃а твоего̀, зовꙋ́щь: А҆ллилꙋ́їа.
І҆́косъ г҃.
И҆мꙋ́щи бога́тство млⷭ҇рдїѧ неѡскꙋ́дное, всѣ̑мъ концє́мъ землѝ простира́еши рꙋ́кꙋ по́мощи, влⷣчце: болѧ́щымъ и҆сцѣле́нїе, стра́ждꙋщымъ ѡ҆сла́бꙋ, слѣпы̑мъ прозрѣ́нїе и҆ всѣ̑мъ всѧ̑ по коегѡ́ждо потре́бѣ подае́ши, бл҃года́рнѣ вопїю́щымъ:
Ра́дꙋйсѧ, правосла́вїѧ несокрꙋши́маѧ крѣ́посте и҆ ѡ҆гра́до: ра́дꙋйсѧ, ст҃ы́хъ хра́мѡвъ и҆ ѻ҆лтаре́й пе́рвѣйшее ᲂу҆краше́нїе.
Ра́дꙋйсѧ, благоче́стїѧ вѣрнѣ́йшее ѡ҆гражде́нїе: ра́дꙋйсѧ, благосе́рдыхъ градоправи́телей неꙋсыпа́ющаѧ споспѣ́шнице.
Ра́дꙋйсѧ, непобѣди́маѧ воево́до вожде́й и҆ во́инствъ хрⷭ҇тїа́нскихъ: ра́дꙋйсѧ, ст҃о́е зерца́ло пра́вды сꙋдїѧ́мъ немздопрїи̑мнымъ.
Ра́дꙋйсѧ, соверше́нный ра́зꙋме наста́вникѡвъ и҆ дѣтоводи́телей: ра́дꙋйсѧ, бл҃гослове́нїе домѡ́въ и҆ семе́йствъ бл҃гочести́выхъ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ д҃.
Бꙋ́рею мно́гихъ бѣ́дъ ѡ҆держи̑мымъ на́мъ помога́еши, влⷣчце: стои́ши бо пред̾ лице́мъ ѻ҆лтарѧ̀ гдⷭ҇нѧ, воздви́гши рꙋ́цѣ твоѝ, и҆ мо́лишисѧ, ꙗ҆́кѡ да на́шꙋ недосто́йнꙋю моли́твꙋ при́зритъ гдⷭ҇ь цр҃ь сла́вы, и҆ послꙋ́шаетъ прошє́нїѧ призыва́ющихъ и҆́мѧ твоѐ ст҃о́е, къ сн҃ꙋ же твоемꙋ̀ зовꙋ́щихъ: А҆ллилꙋ́їа.
І҆́косъ д҃.
Оу҆слы́ша гдⷭ҇ь бг҃ъ і҆исꙋ́са наѵи́на молѧ́щасѧ и҆ повелѣва́юща со́лнцꙋ ста́ти, до́ндеже ѿмсти́тъ врагѡ́мъ: слы́шитъ и҆ твоѧ̑ ны́нѣ молє́нїѧ гдⷭ҇ь і҆и҃съ, и҆збра́ннаѧ пала́то дх҃а ст҃а́гѡ: тѣ́мже и҆ мы̀ грѣ́шнїи, на тво́й надѣ́ющесѧ покро́въ, тебѣ̀, ꙗ҆́кѡ бж҃їей мт҃ри, глаго́лати дерза́емъ:
Ра́дꙋйсѧ, ѿ сл҃нца мы́сленнагѡ ѡ҆заре́ннаѧ и҆ на́съ свѣ́томъ незаходи́мымъ просвѣща́ющаѧ: ра́дꙋйсѧ, сїѧ́нїемъ пречⷭ҇тыѧ дш҃ѝ твоеѧ̀ всю̀ зе́млю просвѣти́вшаѧ.
Ра́дꙋйсѧ, чⷭ҇тото́ю тѣлесѐ твоегѡ̀ всѧ̑ нб҃са̀ возвесели́вшаѧ: ра́дꙋйсѧ, ст҃ы́хъ ѡ҆би́телей хрⷭ҇то́выхъ покро́въ и҆ снабдѣ́нїе.
Ра́дꙋйсѧ, вѣ́рныхъ па́стырей цр҃кве бо́дрость и҆ вразꙋмле́нїе: ра́дꙋйсѧ, бг҃обоѧ́зненныхъ и҆́нокѡвъ и҆ и҆́нокинь наста́внице.
Ра́дꙋйсѧ, невозмꙋща́емое ᲂу҆спокое́нїе бл҃гоговѣ́йныхъ ста́рцєвъ: ра́дꙋйсѧ, та́йное весе́лїе чи́стыхъ дѣ́въ и҆ вдови́цъ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ є҃.
Бг҃ови́децъ мѡѷсе́й во ѡ҆полче́нїи и҆ногда̀ на а҆мали́ка, є҆гда̀ рꙋ́цѣ воздвиза́ше, і҆и҃ль ѡ҆долѣва́ше, є҆гда́ же рꙋ́цѣ низпꙋща́ше, тогда̀ а҆мали́къ побѣжда́ше, поддержа́щими же є҆го̀ ᲂу҆крѣпле́нъ, побѣдѝ врага̀: ты́ же, ѽ, бг҃омт҃и, воздѣ́вши рꙋ́цѣ твоѝ на ᲂу҆моле́нїе, а҆́ще и҆ ники́мже поддержи́ма, всегда̀ побѣжда́еши враги̑ хрⷭ҇тїа̑нскїѧ, и҆ на́мъ щи́тъ є҆сѝ непобѣди́мь, вопїю́щымъ: А҆ллилꙋ́їа.
І҆́косъ є҃.
Ви́дѣвше тѧ̀ ст҃ы́хъ собо́ри на воздꙋ́сѣ въ це́ркви влахе́рнстѣй моле́бнїи рꙋ́цѣ къ сн҃ꙋ и҆ бг҃ꙋ простира́ющꙋю, ра́достнѡ со а҆рха̑гг҃лы и҆ а҆́гг҃лы благода́рнꙋю тѝ пѣ́снь воспѣ́ша: мы́ же крѣпча́йшима, па́че мѡѷсе́овыхъ рꙋ́къ, дла́ньма твои́ма ᲂу҆крѣплѧ́еми, ᲂу҆ми́льнѡ вопїе́мъ:
Ра́дꙋйсѧ, є҆ѧ́же рꙋ́цѣ поддержи́тъ за всѣ́хъ на́съ є҆ди́наѧ є҆ѧ̀ къ на́мъ любо́вь и҆ млⷭ҇рдїе: ра́дꙋйсѧ, пред̾ не́юже вразѝ на̑ша, ви́димїи и҆ неви́димїи, стоѧ́ти не мо́гꙋтъ.
Ра́дꙋйсѧ, те́мное по́лчище страсте́й и҆ похоте́й на́шихъ прогонѧ́ющаѧ: ра́дꙋйсѧ, ѻ҆́гнь бжⷭ҇твенный хрⷭ҇та̀ неѡпа́льнѡ на рꙋкꙋ̀ своє́ю держа́щаѧ, и҆ на́съ хла́дныхъ тѣ́мъ воспламенѧ́ющаѧ.
Ра́дꙋйсѧ, во́инствꙋющихъ на пло́ть цѣломⷣрїемъ и҆зрѧ́дное вѣнча́нїе: ра́дꙋйсѧ, подвиза́ющихсѧ въ постѣ̀ и҆ безмо́лвїи прⷭ҇ное собесѣ́дованїе.
Ра́дꙋйсѧ, и҆знемога́ющихъ ѿ ᲂу҆ны́нїѧ и҆ печа́ли ско́раѧ ᲂу҆тѣ́шительнице: ра́дꙋйсѧ, блгⷣтїю смире́нїѧ и҆ терпѣ́нїѧ снабдѣва́ющаѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ ѕ҃.
Проповѣ́дникъ неѡскꙋдѣва́емыѧ блгⷣти и҆ млⷭ҇тей твои́хъ ꙗ҆ви́сѧ ст҃ы́й рѡма́нъ сладкопѣ́вецъ, є҆гда̀ ѿ тебє̀ во снѣ̀ прїѧ́тъ сви́токъ кни́жный на снѣде́нїе: тѣ́мъ ᲂу҆́бѡ ᲂу҆мꙋдре́нъ, нача́тъ разꙋ́мнѡ пѣ́ти во сла́вꙋ твою̀, ст҃ы̑мъ же писа́ти похва̑льнаѧ, взыва́ѧ съ вѣ́рою: А҆ллилꙋ́їа.
І҆́косъ ѕ҃.
Возсїѧ́ла є҆сѝ ѿ и҆́стиннагѡ сл҃нца пра́вды зарѧ̀, дв҃о бг҃оѻтрокови́це, просвѣща́ющаѧ всѣ́хъ премⷣростїю бг҃а сн҃а твоегѡ̀, и҆ въ позна́нїе и҆́стины приводѧ́щаѧ зовꙋ́щихъ тѝ такѡва́ѧ:
Ра́дꙋйсѧ, бж҃їю си́лꙋ и҆ бж҃їю премⷣрость хрⷭ҇та̀ пл҃тїю породи́вшаѧ: ра́дꙋйсѧ, ю҆ро́дивꙋю мꙋ́дрость вѣ́ка сегѡ̀ посрами́вшаѧ, и҆ ѡ҆слѣпле́нныхъ є҆́ю на пꙋ́ть пра́вый наставлѧ́ющаѧ.
Ра́дꙋйсѧ, ст҃ы́ѧ вѣ́ры ѡ҆хране́нїе, и҆ правосла́вныхъ догма́тѡвъ наста́внице: ра́дꙋйсѧ, нечести́выхъ є҆ресе́й и҆ тлетво́рныхъ раско́лѡвъ и҆скорени́тельнице.
Ра́дꙋйсѧ, та̑йнаѧ и҆ неꙋдо́бь предви̑дѣннаѧ всѧ̑ до́брѣ вѣ́дꙋщаѧ, и҆ и҆̀мже подоба́етъ, сказꙋ́ющаѧ: ра́дꙋйсѧ, лжи́выхъ прови́дцєвъ и҆ сꙋ́єтнаѧ гада̑нїѧ посрамлѧ́ющаѧ.
Ра́дꙋйсѧ, въ ча́съ недоꙋмѣ́нїй мы́сль бл҃гꙋ на се́рдце полага́ющаѧ: ра́дꙋйсѧ, ѿ па́гꙋбныхъ начина́нїй и҆ несмы́сленныхъ пожела́нїй воспѧща́ющаѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ з҃.
Хотѧ́й долготерпѣли́вый всеви́децъ гдⷭ҇ь ꙗ҆ви́ти своегѡ̀ чл҃вѣколю́бїѧ неизслѣ́димꙋю щедро́тъ бе́зднꙋ, и҆збра̀ тебѐ є҆ди́нꙋ въ мт҃рь себѣ̀, и҆ сотвори́ тѧ лю́демъ непреѡдолѣ́нное защище́нїе: да а҆́ще кто̀ ѿ ни́хъ и҆ првⷣнымъ сꙋдо́мъ бж҃їимъ ѡ҆сꙋжде́нїѧ досто́инъ ꙗ҆ви́тсѧ, твои́мъ ѻ҆ба́че держа́внымъ покро́вомъ сохранѧ́етсѧ на покаѧ́нїе, зовы́й: А҆ллилꙋ́їа.
І҆́косъ з҃.
Ди̑внаѧ показа́лъ є҆сѝ дѣла̀ твоѧ̑ въ пречⷭ҇тѣй мт҃ри твое́й, гдⷭ҇и, є҆гда̀ пречꙋ́дный ѡ҆мофо́ръ въ рꙋцѣ̀ є҆ѧ̀ свѣтѧ́щїйсѧ па́че лꙋ̑чь со́лнечныхъ ꙗ҆ви́сѧ, и҆́мже покрыва́ше лю́ди, сꙋ́щыѧ въ це́ркви влахе́рнстѣй: ѡ҆ таковѣ́мъ ᲂу҆́бѡ зна́менїи млⷭ҇рдагѡ є҆ѧ̀ застꙋпле́нїѧ ᲂу҆слы́шавше, ᲂу҆́жасомъ и҆ ра́достїю ѡ҆держи́ми, всѝ глаго́лахꙋ:
Ра́дꙋйсѧ, нерꙋкотворе́нный ѡ҆мофо́ръ а҆́ки ѡ҆́блакъ над̾ всѣ́мъ мі́ромъ распросте́ршаѧ: ра́дꙋйсѧ, превѣ́чнагѡ а҆рхїере́а, сн҃а своегѡ̀, зна́менїе на рꙋцѣ̀ свое́й держа́щаѧ.
Ра́дꙋйсѧ, но́вꙋю млⷭ҇ть и҆ но́вꙋю блгⷣть си́мъ въ цр҃кви правосла́внѣй ꙗ҆влѧ́ющаѧ: ра́дꙋйсѧ, сто́лпе ѡ҆́блачный, ѿ и҆скꙋше́нїй и҆ собла́знѡвъ мі́ра всѣ́хъ на́съ покрыва́ющїй.
Ра́дꙋйсѧ, сто́лпе ѻ҆́гненный, средѝ мглы̀ грѣха̀ всѣ̑мъ на́мъ пꙋ́ть спⷭ҇нїѧ показꙋ́ющїй: ра́дꙋйсѧ, ꙗ҆́вныхъ бл҃гоче́стїѧ подви́жникѡвъ ꙗ҆́вное ᲂу҆крѣпле́нїе.
Ра́дꙋйсѧ, та́йныхъ средѝ мі́ра рабѡ́въ бж҃їихъ та́йное вразꙋмле́нїе: ра́дꙋйсѧ, и҆ менє̀ ѡ҆бнаже́ннагѡ до́брыхъ дѣ́лъ не ѡ҆ставлѧ́ющаѧ свои́мъ покро́вомъ и҆ блгⷣтїю.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ и҃.
Ди́внѡ тѧ̀ ѿ нб҃съ во влахе́рнстѣй це́ркви ꙗ҆́вльшꙋюсѧ а҆́гг҃ли воспѣ́ша, а҆пⷭ҇ли просла́виша, ли́къ ст҃и́телей и҆ прпⷣбныхъ и҆ же́нъ ст҃ы́хъ сосло́вїе восхвали́ша, прⷣте́ча съ бг҃осло́вомъ поклони́шасѧ, лю́дїе же сꙋ́щїи въ це́ркви съ весе́лїемъ вопїѧ́хꙋ: А҆ллилꙋ́їа.
І҆́косъ и҃.
Всѣ́ми вы́шними и҆ ни́жними влⷣчествꙋѧ гдⷭ҇ь, ᲂу҆зрѣ́въ тѧ̀ въ це́ркви мт҃рь свою̀ стоѧ́щꙋ и҆ со ᲂу҆миле́нїемъ къ немꙋ̀ молѧ́щꙋюсѧ, речѐ: просѝ, мт҃и моѧ̀, занѐ не ѿвращꙋ́сѧ тебє̀, но и҆спо́лню всѧ̑ прошє́нїѧ твоѧ̑, и҆ бл҃года́рствєннаѧ си́це тебѣ̀ всѣ́хъ пѣ́ти наꙋчꙋ̀:
Ра́дꙋйсѧ, ковче́же завѣ́та, въ не́мже храни́тсѧ ѡ҆сщ҃е́нїе всегѡ̀ ро́да человѣ́ческагѡ: ра́дꙋйсѧ, ста́мно прест҃а́ѧ, въ не́йже а҆́лчꙋщымъ пра́вды блюде́тсѧ хлѣ́бъ жи́зни вѣ́чныѧ.
Ра́дꙋйсѧ, сосꙋ́де всезлаты́й, въ не́мже ᲂу҆гото́васѧ на́съ ра́ди пл҃ть и҆ кро́вь бжⷭ҇твеннагѡ а҆́гнца: ра́дꙋйсѧ, ѡ҆ста́вленныхъ врача́ми на своѝ всемѡ́щныѧ рꙋ́цѣ прїе́млющаѧ.
Ра́дꙋйсѧ, разсла́бленныхъ тѣ́ломъ, но не дꙋ́хомъ и҆ вѣ́рою, со ѻ҆дра̀ болѣ́зни воздвиза́ющаѧ: ра́дꙋйсѧ, погꙋблѧ́ющымъ ѿ недꙋ́га ᲂу҆́мъ но́вый и҆ лꙋ́чшїй смы́слъ подаю́щаѧ.
Ра́дꙋйсѧ, на стро́потнѣмъ пꙋтѝ грѣха̀ и҆ страсте́й на́съ премⷣрѣ запина́ющаѧ: ра́дꙋйсѧ, жесто́кость нераска́ѧннагѡ се́рдца на́шегѡ ᲂу҆милѧ́ющаѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ ѳ҃.
Всѐ є҆стество̀ а҆́гг҃льское похва̑льнаѧ прино́ситъ тебѣ̀ и҆́стиннѣй бж҃їей мт҃ри и҆ застꙋ́пницѣ всѣ́хъ притека́ющихъ къ тебѣ̀, вѣ́дꙋще, ꙗ҆́кѡ несокрꙋши́мымъ покро́вомъ твои́мъ првⷣныхъ возвеселѧ́еши, грѣ́шныхъ застꙋпа́еши, бѣ́дствꙋющихъ и҆збавлѧ́еши, и҆ мо́лишисѧ ѡ҆ всѣ́хъ вѣ́рныхъ, зовꙋ́щихъ: А҆ллилꙋ́їа.
І҆́косъ ѳ҃.
Вѣті̑и многовѣща́ннїи ꙗ҆́кѡ ры̑бы безгла̑сныѧ, недоꙋмѣ́ютъ, ка́кѡ восхвали́ти по достоѧ́нїю вели́кїй всечестна́гѡ покро́ва твоегѡ̀ пра́здникъ: всѧ́ бо ѡ҆ тебѣ̀ ѿ ни́хъ глагѡ́лемаѧ не сꙋ́ть довѡ́льна къ є҆ди́номꙋ и҆зчисле́нїю щедро́тъ твои́хъ: мы́ же твоѧ̑ неизчє́тныѧ бл҃годѣѧ̑нїѧ ви́дѧще, съ весе́лїемъ взыва́емъ:
Ра́дꙋйсѧ, ѿ ꙗ҆́звы и҆ всегꙋби́тельства сме́ртнагѡ на́съ соблюда́ющаѧ: ра́дꙋйсѧ, ѿ внеза́пнагѡ колеба́нїѧ землѝ гра́ды и҆ вє́си сохранѧ́ющаѧ.
Ра́дꙋйсѧ, ѿ разлїѧ̑нїѧ во́дъ и҆ потопле́нїѧ рꙋко́ю крѣ́пкою возводѧ́щаѧ: ра́дꙋйсѧ, ѿ запале́нїѧ ѻ҆́гненнагѡ росо́ю мл҃твъ твои́хъ и҆збавлѧ́ющаѧ.
Ра́дꙋйсѧ, ѿ гла́да дꙋше́внагѡ и҆ тѣле́снагѡ хлѣ́бомъ жи́зни снабдѣва́ющаѧ: ра́дꙋйсѧ, ᲂу҆да́ры мо́лнїи и҆ гро́ма ѿ главы̀ на́шеѧ ѿводѧ́щаѧ.
Ра́дꙋйсѧ, ѿ наше́ствїѧ и҆ноплемє́нникъ и҆ та́йныхъ ᲂу҆бі́йцъ сп҃са́ющаѧ: ра́дꙋйсѧ, ѿ дома́шнїѧ бра́ни и҆ вражды̀ є҆динокро́вныхъ ми́ромъ и҆ любо́вїю ѡ҆гражда́ющаѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ і҃.
Спⷭ҇тѝ хотѧ́й ро́дъ человѣ́ческїй ѿ пре́лести вра́жїѧ чл҃вѣколю́бецъ гдⷭ҇ь, тебѐ мт҃рь свою̀ дарова̀ земны̑мъ на́мъ въ по́мощь, покро́въ и҆ защи́тꙋ, да бꙋ́деши печа̑льнымъ ᲂу҆тѣше́нїе, скорбѧ́щымъ ра́дованїе, ѡ҆би̑димымъ застꙋ́пница, и҆ да всѣ́хъ и҆з̾ глꙋбины̀ грѣхо́вныѧ воздви́гнеши, пою́щихъ: А҆ллилꙋ́їа.
І҆́косъ і҃.
Цр҃ю̀ нбⷭ҇ный, гл҃го́лаше въ мл҃твѣ на воздꙋ́сѣ со а҆́гг҃лы стоѧ́щаѧ всенепоро́чнаѧ цр҃и́ца, прїимѝ всѧ́каго человѣ́ка молѧ́щасѧ къ тебѣ̀ и҆ призыва́юща и҆́мѧ моѐ на по́мощь, да не ѿи́детъ ѿ ли́ка моегѡ̀ то́щь и҆ неꙋслы́шанъ. Сїю̀ всебл҃гꙋ́ю мл҃твꙋ слы́шавше собо́ри ст҃ы́хъ, бл҃года́рнѣ возопи́ша:
Ра́дꙋйсѧ, чи́стыхъ рꙋка́ми и҆ се́рдцемъ земледѣ́льцєвъ блгⷭ҇ве́нными плода́ми вѣнча́ющаѧ: ра́дꙋйсѧ, по́моще и҆ првⷣное мздовоздаѧ́нїе всѣ̑мъ пра́вѡ кꙋ́плю дѣ́ющымъ.
Ра́дꙋйсѧ, клѧтвопрестꙋпле́нїй и҆ непра́ведныхъ стѧжа́нїй всенаро́дное ѡ҆бличе́нїе: ра́дꙋйсѧ, бѣ́дствꙋющымъ въ пꙋтѝ, на сꙋ́шѣ и҆ вода́хъ внеза́пное вспоможе́нїе.
Ра́дꙋйсѧ, безча́дныхъ роди́телей плода́ми вѣ́ры и҆ дх҃а веселѧ́щаѧ: ра́дꙋйсѧ, безма́тернихъ сиро́тъ незри́маѧ воспита́тельнице.
Ра́дꙋйсѧ, крѣ́пкаѧ застꙋ́пнице сꙋ́щихъ въ плѣнꙋ̀ и҆ и҆згна́нїи: ра́дꙋйсѧ, неꙋсыпа́ющаѧ попечи́тельнице во ᲂу҆́захъ и҆ темни́цѣ сѣдѧ́щихъ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ а҃і.
Пѣ́нїе всеꙋмиле́нное слы́шаще и҆ те́плѣй твое́й мл҃твѣ ѡ҆ на́съ вне́млюще, про́симъ тебѐ, дв҃о бцⷣе, не пре́зри гла́са рабѡ́въ твои́хъ: къ тебѣ́ бо въ напа́стехъ и҆ ско́рбехъ прибѣга́емъ, и҆ пред̾ тобо́ю въ бѣда́хъ на́шихъ сле́зы пролива́емъ, зовꙋ́ще: А҆ллилꙋ́їа.
І҆́косъ а҃і.
Ꙗ҆́кѡ свѣтопрїе́мнꙋю свѣщꙋ̀ въ мл҃твѣ горѧ́щꙋю, ви́дѧще тѧ̀ на воздꙋ́сѣ влахе́рнскаѧ це́рковь, согла́снѡ со мно́жествомъ люде́й, въ не́й бы́вшихъ, возглаша́ше: ѿкꙋ́дꙋ мнѣ̀ сїѐ, да прїи́де мт҃и гдⷭ҇а моегѡ̀ ко мнѣ̀; Ст҃ы́й же а҆ндре́й со є҆пїфа́нїемъ те́плѣ молѧ́хꙋсѧ къ тебѣ̀, зовꙋ́ще:
Ра́дꙋйсѧ, всѣ́хъ дарѡ́въ дх҃о́вныхъ и҆ тѣле́сныхъ незави́стнаѧ пода́тельнице: ра́дꙋйсѧ, полага́ющихъ нача́ло покаѧ́нїѧ грѣ́шникѡвъ вѣ́рнаѧ предста́тельнице.
Ра́дꙋйсѧ, борю́щихсѧ со страстьмѝ и҆ прило́гами вра́жїими всегда́шнѧѧ спобо́рнице: ра́дꙋйсѧ, незри́мое ᲂу҆кроще́нїе влады́къ жесто́кихъ и҆ ѕвѣронра́вныхъ.
Ра́дꙋйсѧ, та́йный поко́е и҆ ѿра́до рабѡ́въ кро́ткихъ и҆ стра́ждꙋщихъ: ра́дꙋйсѧ, всежела́нное соверше́нїе благи́хъ сꙋпрꙋ́жествъ.
Ра́дꙋйсѧ, ма́терей дѣтородѧ́щихъ ско́рое и҆ безболѣ́зненное разрѣше́нїе: ра́дꙋйсѧ, въ ча́съ кончи́ны є҆ди́наѧ всѣ̑мъ на́мъ помо́щнице.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ в҃і.
Блгⷣть бжⷭ҇твеннꙋю и҆спросѝ на́мъ ᲂу҆ сн҃а твоегѡ̀ и҆ бг҃а, прострѝ на́мъ рꙋ́кꙋ по́мощи, ѿженѝ ѿ на́съ всѧ́каго врага̀ и҆ сꙋпоста́та, и҆ ᲂу҆мирѝ на́шꙋ жи́знь, да не поги́бнемъ лю́тѣ без̾ покаѧ́нїѧ, но прїимѝ на́съ въ вѣ̑чныѧ кро́вы, покрови́тельнице на́ша, да ра́дꙋющесѧ тебѣ̀ зове́мъ: А҆ллилꙋ́їа.
І҆́косъ в҃і.
Пою́ще тво́й держа́вный покро́въ, хва́лимъ тѧ̀ всѝ, ꙗ҆́кѡ тве́рдꙋю предста́тельницꙋ на́шꙋ, и҆ покланѧ́емсѧ тебѣ̀, ѡ҆ на́съ молѧ́щейсѧ: вѣ́рꙋемъ бо и҆ надѣ́емсѧ, ꙗ҆́кѡ и҆спро́сиши ᲂу҆ сн҃а твоегѡ̀ и҆ бг҃а бл҃га̑ѧ вѣ̑чнаѧ и҆ вре́мєннаѧ всѣ̑мъ съ любо́вїю вопїю́щымъ тебѣ̀ си́це:
Ра́дꙋйсѧ, все́й вселе́ннѣй крѣ́пкое застꙋпле́нїе: ра́дꙋйсѧ, всѣ́хъ стїхі́й земны́хъ и҆ небе́сныхъ ѡ҆сщ҃е́нїе.
Ра́дꙋйсѧ, всѣ́хъ време́нъ го́да бл҃гослове́нїе: ра́дꙋйсѧ, всѣ́хъ навѣ́тѡвъ и҆ и҆скꙋше́нїй, ѿ мі́ра, пло́ти и҆ дїа́вола находѧ́щихъ, попра́нїе.
Ра́дꙋйсѧ, неча́емое примире́нїе ѡ҆жесточе́ннѡ враждꙋ́ющихъ: ра́дꙋйсѧ, недовѣ́домое и҆справле́нїе нераска́ѧнныхъ грѣ́шникѡвъ.
Ра́дꙋйсѧ, не ѿверга́ющаѧ всѣ́ми презрѣ́нныхъ и҆ ѿве́рженныхъ: ра́дꙋйсѧ, сами́хъ ѿча́ѧнныхъ ѿ ро́ва поги́бели и҆схища́ющаѧ.
Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ честны́мъ твои́мъ ѡ҆мофо́ромъ.
Конда́къ г҃і.
Ѽ, всепѣ́таѧ мт҃и, пречⷭ҇таѧ гпⷭ҇жѐ, дв҃о бцⷣе! къ тебѣ̀ возвождꙋ̀ дꙋшє́вныѧ и҆ тѣлє́сныѧ ѻ҆́чи, къ тебѣ̀ простира́ю разсла́блєнныѧ рꙋ́цѣ, и҆ и҆з̾ глꙋбины̀ се́рдца вопїю̀: при́зри на вѣ́рꙋ и҆ смире́нїе дꙋшѝ моеѧ̀, покры́й мѧ̀ всемо́щнымъ ѡ҆мофо́ромъ твои́мъ, да и҆зба́влюсѧ ѿ всѣ́хъ бѣ́дъ и҆ напа́стей, и҆ въ ча́съ кончи́ны моеѧ̀, ѽ, всебл҃га́ѧ, предста́ни мнѣ̀, и҆ ᲂу҆гото́ваннагѡ ра́ди грѣхѡ́въ мои́хъ и҆зба́ви мꙋче́нїѧ, да вы́нꙋ покланѧ́ѧсѧ зовꙋ̀: А҆ллилꙋ́їа.
Се́й конда́къ гл҃го́ли три́жды, та́же і҆́косъ а҃-й и҆ конда́къ а҃-й.
Моли́тва ко прест҃ѣ́й бцⷣе.
Ѽ, прест҃а́ѧ дв҃о, мт҃и гдⷭ҇а вы́шнихъ си́лъ, нб҃сѐ и҆ землѝ цр҃и́це, гра́да и҆ страны̀ на́шеѧ всемо́щнаѧ застꙋ́пнице! прїимѝ хвалебнобл҃года́рственное пѣ́нїе сїѐ ѿ на́съ недосто́йныхъ ра̑бъ твои́хъ, и҆ вознесѝ моли̑твы на́шѧ ко прⷭ҇то́лꙋ бг҃а сн҃а твоегѡ̀, да млⷭ҇тивъ бꙋ́детъ непра́вдамъ на́шымъ, и҆ проба́витъ блгⷣть свою̀ чтꙋ́щымъ всечⷭ҇тно́е и҆́мѧ твоѐ и҆ съ вѣ́рою и҆ любо́вїю покланѧ́ющымсѧ чꙋдотво́рномꙋ ѡ҆́бразꙋ твоемꙋ̀. Нѣ́смы бо досто́йни ѿ негѡ̀ поми́ловани бы́ти, а҆́ще не ты̀ ᲂу҆млⷭ҇тивиши є҆го̀ ѡ҆ на́съ, влⷣчце, ꙗ҆́кѡ всѧ̑ тебѣ̀ ѿ негѡ̀ возмѡ́жна сꙋ́ть. Сегѡ̀ ра́ди къ тебѣ̀ прибѣга́емъ, ꙗ҆́кѡ къ несомнѣ́ннѣй и҆ ско́рѣй застꙋ́пницѣ на́шей: ᲂу҆слы́ши на́съ молѧ́щихсѧ тебѣ̀, ѡ҆сѣнѝ на́съ вседержа́внымъ покро́вомъ твои́мъ, и҆ и҆спросѝ ᲂу҆ бг҃а сн҃а твоегѡ̀ па́стырємъ на́шымъ ре́вность и҆ бдѣ́нїе ѡ҆ дꙋша́хъ, градоправи́телємъ мⷣрость и҆ си́лꙋ, сꙋдїѧ́мъ пра́вдꙋ и҆ нелицепрїѧ́тїе, наста́вникѡмъ ра́зꙋмъ и҆ смиренномⷣрїе, сꙋпрꙋ́гѡмъ любо́вь и҆ согла́сїе, ча́дѡмъ послꙋша́нїе, ѡ҆би̑димымъ терпѣ́нїе, ѡ҆би́дѧщымъ стра́хъ бж҃їй, скорбѧ́щымъ бл҃годꙋ́шїе, ра́дꙋющымсѧ воздержа́нїе: всѣ̑мъ же на́мъ дх҃ъ ра́зꙋма и҆ бл҃гоче́стїѧ, дх҃ъ млⷭ҇рдїѧ и҆ кро́тости, дх҃ъ чⷭ҇тоты̀ и҆ пра́вды. Є҆́й, гпⷭ҇жѐ прест҃а́ѧ, ᲂу҆млⷭ҇рдисѧ на немѡщны́ѧ лю́ди твоѧ̑: разсѣ̑ѧнныѧ соберѝ, заблꙋ́ждшыѧ на пꙋ́ть пра́вый наста́ви, ста́рость поддержѝ, ю҆́ныѧ ᲂу҆цѣломⷣри, младе́нцы воспита́й, и҆ при́зри на всѣ́хъ на́съ призрѣ́нїемъ млⷭ҇тивагѡ твоегѡ̀ застꙋпле́нїѧ, воздви́гни на́съ и҆з̾ глꙋбины̀ грѣхо́вныѧ, и҆ просвѣтѝ сердє́чныѧ ѻ҆́чи на́шѧ къ зрѣ́нїю спⷭ҇нїѧ, млⷭ҇тива на́мъ бꙋ́ди здѣ̀ и҆ та́мѡ, въ странѣ̀ земна́гѡ прише́льствїѧ и҆ на стра́шнѣмъ сꙋдѣ̀ сн҃а твоегѡ̀: преста́вльшыѧсѧ же въ вѣ́рѣ и҆ покаѧ́нїи ѿ житїѧ̀ сегѡ̀ ѻ҆тцы̀ и҆ бра́тїю на́шꙋ въ вѣ́чнѣй жи́зни со а҆́гг҃лы и҆ со всѣ́ми ст҃ы́ми жи́ти сотворѝ. Ты́ бо є҆сѝ, гпⷭ҇жѐ, сла́ва нбⷭ҇ныхъ и҆ ᲂу҆пова́нїе земны́хъ, ты̀ по бз҃ѣ на́ша наде́жда и҆ застꙋ́пница всѣ́хъ, притека́ющихъ къ тебѣ̀ съ вѣ́рою. Къ тебѣ̀ ᲂу҆́бѡ мо́лимсѧ, и҆ тебѣ̀, ꙗ҆́кѡ всемогꙋ́щей помо́щницѣ, са́ми себѐ и҆ дрꙋ́гъ дрꙋ́га и҆ ве́сь живо́тъ на́шъ предае́мъ, ны́нѣ и҆ прⷭ҇нѡ и҆ во вѣ́ки вѣкѡ́въ. А҆ми́нь.