Акафист Божественным Страстям Христовым (Пассия)

Взбра́нный воево́до, и҆ гдⷭ҇и нб҃сѐ и҆ землѝ, тебѐ, цр҃ѧ̀ безсме́ртнагѡ, зрѧ̀ на крⷭ҇тѣ̀ ви́сѧща, всѧ̀ тва́рь и҆змѣни́сѧ, нб҃о ᲂу҆жасе́сѧ, ѡ҆снова̑нїѧ землѝ восколеба́шасѧ. Мы́ же, недосто́йнїи, бл҃года́рственное поклоне́нїе твоемꙋ̀ на́съ ра́ди страда́нїю приносѧ́ще, съ разбо́йникомъ вопїе́мъ тѝ:

А҆́гг҃лѡвъ ликостоѧ̑нїѧ восполнѧ́ѧ, не ѿ а҆́гг҃лъ воспрїѧ́лъ є҆сѝ, но менє̀ ра́ди, бг҃ъ сы́й, чл҃вѣ́къ бы́въ, человѣ́ка грѣ̑хъ ра́ди ᲂу҆ме́рша, животворѧ́щимъ тѣ́ломъ и҆ кро́вїю твое́ю ѡ҆живи́лъ є҆сѝ. Тѣ́мже, толи́цѣй любвѝ твое́й бл҃года́рни сꙋ́ще, вопїе́мъ тѝ:

Ви́дѣвъ тѧ̀ а҆́гг҃лъ въ вертогра́дѣ геѳсїмані́йстѣмъ, до по́та крова́ва въ мл҃твѣ подвиза́ющасѧ, предста́въ ᲂу҆крѣплѧ́ше тѧ̀, є҆гда̀ ꙗ҆́кѡ бре́мѧ тѧ́жкое грѣсѝ на́шѧ ѡ҆тѧготѣ́ша на тебѣ̀: ты́ бо а҆да́ма поги́бшаго, на ра́мо воспрїи́мъ, ѻ҆ц҃ꙋ̀ предста́вилъ є҆сѝ, прекло́нь колѣ́на молѧ́сѧ. Ѡ҆ се́мъ ᲂу҆́бѡ съ вѣ́рою и҆ любо́вїю пою̀ тебѣ̀: А҆ллилꙋ́їа.

Ра́зꙋма неꙋразꙋмѣ́нна во́льнагѡ твоегѡ̀ страда́нїѧ не ᲂу҆разꙋмѣ́ша і҆ꙋде́є: сегѡ̀ ра́ди є҆гда̀ въ нощѝ со свѣти́льники и҆́щꙋщымъ тѧ̀ ре́клъ є҆сѝ: а҆́зъ є҆́смь, а҆́ще и҆ падо́ша на землѝ, но по се́мъ, свѧза́вше тѧ̀, ведо́ша на сꙋди́ще. Мы́ же на се́мъ пꙋтѝ, припа́дающе къ тебѣ̀, съ любо́вїю зове́мъ:

Си́лою бжⷭ҇тва̀ твоегѡ̀ проре́клъ є҆сѝ трикра́тное ѿверже́нїе ᲂу҆ченикꙋ̀: ѻ҆́нъ же посе́мъ а҆́ще и҆ ѿрече́сѧ тебє̀ съ клѧ́твою, ѻ҆ба́че є҆гда̀ ᲂу҆зрѣ̀ тѧ̀ во дворѣ̀ а҆рхїере́йстѣмъ, гдⷭ҇а своего̀ и҆ ᲂу҆чи́телѧ, ᲂу҆мили́всѧ се́рдцемъ, и҆зше́дъ во́нъ, пла́касѧ го́рькѡ. При́зри ᲂу҆́бѡ и҆ на мѧ̀, гдⷭ҇и, и҆ поразѝ жесто́кое се́рдце моѐ, да слеза́ми мои́ми ѡ҆мы́ю грѣхѝ моѧ̑, поѧ̀ тебѣ̀: А҆ллилꙋ́їа.

И҆мѣ́ѧй вои́стиннꙋ вла́сть по чи́нꙋ мелхїседе́ковꙋ, ꙗ҆́кѡ а҆рхїере́й во вѣ́ки, ста́лъ є҆сѝ пред̾ беззако́ннымъ первосщ҃е́нникѡмъ каїа́фою, влⷣка и҆ гдⷭ҇ь всѣ́хъ: ѿ твои́хъ ᲂу҆́бѡ рабѡ́въ прїѧ́вый мꙋче́нїе, прїимѝ ѿ на́съ сицева̑ѧ:

Бꙋ́рею хрⷭ҇тоꙋбі́йства ды́шꙋще і҆ꙋде́є, послꙋ́шавше гла́са ѻ҆тца̀ лжѝ и҆ чл҃вѣкоꙋбі́йцы и҆сконѝ, дїа́вола, ѿверго́ша тебѐ, пра́вый пꙋ́ть, и҆́стинꙋ и҆ живо́тъ. Мы́ же тѧ̀, хрⷭ҇та̀, бж҃їю си́лꙋ, въ не́мже всѧ̑ сокрѡ́вища премꙋ́дрости и҆ ра́зꙋма сокрове́на сꙋ́ть, и҆сповѣ́дꙋюще вопїе́мъ: А҆ллилꙋ́їа.

Слы́ша пїла́тъ крѡ́ткїѧ твоѧ̑ гл҃го́лы, а҆́ки досто́йнаго сме́рти предаде́ тѧ на пропѧ́тїе, а҆́ще и҆ са́мъ свидѣ́тельствоваше, ꙗ҆́кѡ ни є҆ди́ныѧ вины̀ ѡ҆брѣ́те въ тебѣ̀: рꙋ́цѣ ᲂу҆́бѡ своѝ ᲂу҆мы̀, но се́рдце ѡ҆сквернѝ. Мы́ же, чꙋдѧ́щесѧ та́йнѣ во́льнагѡ страда́нїѧ твоегѡ̀, со ᲂу҆миле́нїемъ зове́мъ:

Бг҃ото́чною кро́вїю твое́ю ве́сь ѡ҆бле́клсѧ є҆сѝ, ѡ҆дѣѧ́йсѧ свѣ́томъ ꙗ҆́кѡ ри́зою: вѣ́мъ, вои́стиннꙋ вѣ́мъ со прⷪ҇ро́комъ почто̀ червле́ны ри̑зы твоѧ̑: а҆́зъ, гдⷭ҇и, а҆́зъ грѣхи̑ мои́ми ᲂу҆ѧзви́хъ тѧ̀. Тебѣ̀ ᲂу҆́бѡ, менє̀ ра́ди ᲂу҆ѧ́звленномꙋ, бл҃года́рственнѡ зовꙋ̀: А҆ллилꙋ́їа.

Прови́дѣвъ тѧ̀ въ дꙋ́сѣ бг҃оглаго́ливый и҆са́їа безче́стїемъ и҆ ра́нами и҆спо́лненна, ᲂу҆жа́ссѧ вопїѧ́ше: ви́дѣхомъ є҆го̀, и҆ не и҆мѣ́ѧше ви́да, ни добро́ты. Мы́ же, зрѧ́ще тѧ̀ на крⷭ҇тѣ̀ съ вѣ́рою и҆ ᲂу҆дивле́нїемъ зове́мъ:

Проповѣ́дникъ твоегѡ̀ неѕло́бїѧ ꙗ҆́вльсѧ пїла́тъ, показа̀ наро́дꙋ ничто́же бы́ти въ тебѣ̀ досто́йно сме́рти: но і҆ꙋде́є, ꙗ҆́кѡ ѕвѣ́рїе ди́вїи, кро́вь ᲂу҆зрѣ́вше, скрежета́хꙋ на тѧ̀ зꙋбы̀ свои́ми: распнѝ, распнѝ є҆го̀, вопїю́ще. Мы́ же, лобыза́юще пречⷭ҇тыѧ ꙗ҆́звы твоѧ̑, зове́мъ: А҆ллилꙋ́їа.

Возсїѧ́лъ є҆сѝ въ позо́ръ и҆ ᲂу҆дивле́нїе а҆́гг҃лѡмъ и҆ чл҃вѣ́кѡмъ, глаго́лющꙋ ѡ҆ тебѣ̀ пїла́тꙋ: сѐ чл҃вѣ́къ. Прїиди́те ᲂу҆́бѡ, порꙋ́ганномꙋ на́съ ра́ди і҆и҃сꙋ поклони́мсѧ, вопїю́ще:

Хотѧ́й человѣ́ка ѿ рабо́ты вра́жїѧ и҆зба́вити, смири́лъ є҆сѝ себѐ пред̾ враги̑ твои́ми, і҆и҃се, и҆ ꙗ҆́кѡ а҆́гнецъ безгла́сенъ на заколе́нїе веде́нъ бы́лъ є҆сѝ, вездѣ̀ ꙗ҆́звы терпѧ́й, да всего̀ и҆сцѣли́ши чл҃вѣ́ка, зовꙋ́ща: А҆ллилꙋ́їа.

Ди́вное показа́лъ є҆сѝ долготерпѣ́нїе, є҆гда̀ во́ини, рꙋга́ющесѧ тебѐ, по глаго́лꙋ непра́веднагѡ сꙋдїѝ лютѣ́йшими ра́нами ᲂу҆ѧзвлѧ́хꙋ пречтⷭ҇ое тѣ́ло твоѐ, ꙗ҆́кѡ ѡ҆багри́тисѧ є҆мꙋ̀ ѿ но́гъ до главы̀ кро́вїю. Сегѡ̀ ра́ди со слеза́ми вопїе́мъ тѝ:

Ди́внѡ и҆ стра́ннѡ ꙗ҆ви́стасѧ тебѣ̀ мѡѷсе́й и҆ и҆лїа̀ на ѳавѡ́рѣ, глагѡ́люща ѡ҆ и҆схо́дѣ твое́мъ, є҆го́же ны́нѣ скончава́еши во і҆ерⷭ҇ли́мѣ: та́мѡ ᲂу҆́бѡ ви́дѣвша сла́вꙋ твою̀, здѣ̀ же сп҃се́нїе на́ше ᲂу҆зрѣ́вше, зовꙋ́тъ: А҆ллилꙋ́їа.

Вездѣ̀ ѿ і҆ꙋдє́й гони́мый, мнѡ́гїѧ, ра́ди мно́жества грѣхѡ́въ мои́хъ, претерпѣ́лъ є҆сѝ поношє́нїѧ и҆ мꙋ̑ки: є҆ди́ни бо тѧ̀ проти́вна бы́ти ке́сарю гл҃го́лютъ, дрꙋзі́и ꙗ҆́кѡ ѕлодѣ́ѧ ѡ҆сꙋжда́ютъ, и҆ні́и же: воз̾мѝ, воз̾мѝ и҆ распнѝ, вопїю́тъ. Ѿ всѣ́хъ ᲂу҆́бѡ ѡ҆сꙋжде́нномꙋ и҆ на пропѧ́тїе ведо́момꙋ, тебѣ̀, гдⷭ҇ꙋ, и҆з̾ глꙋбины̀ дꙋшѝ гл҃го́лемъ:

Всѐ є҆стество̀ смѧте́сѧ, зрѧ̀ тебѐ на крⷭ҇тѣ̀ повѣ́шена: на небесѝ со́лнце лꙋчѝ своѧ̑ скры̀, землѧ̀ потрѧсе́сѧ, завѣ́са хра́ма раздра́сѧ, ка́менїе распаде́сѧ, а҆́дъ ᲂу҆ме́ршыѧ и҆зве́рже: мы́ же покланѧ́емсѧ на мѣ́стѣ, и҆дѣ́же стоѧ́стѣ пречⷭ҇тѣи но́зѣ твоѝ, пою́ще: А҆ллилꙋ́їа.

Вѣті̑ѧ многовѣща́ннїи, а҆́ще и҆ мно́гѡ глаго́лютъ, но не мо́гꙋтъ досто́йнагѡ благодаре́нїѧ возда́ти бж҃е́ствєннымъ стрⷭ҇те́мъ твои̑мъ, чл҃вѣколю́бче. На́ша же дꙋша̀ и҆ тѣ́ло, се́рдце и҆ всѧ̑ соста́вы, со ᲂу҆миле́нїемъ къ тебѣ̀ взыва́ютъ:

Спастѝ хотѧ́й мі́ръ, слѣпы́хъ, хромы́хъ, прокаже́нныхъ, нѣмы́хъ и҆ глꙋхи́хъ и҆сцѣли́лъ є҆сѝ, дꙋхѡ́въ лꙋка́выхъ ѿгна́лъ є҆сѝ: неразꙋ́мнїи же і҆ꙋде́є, ѕло́бою ды́шꙋще и҆ за́вистїю мꙋ́чими, пригвозди́ша тѧ̀ ко крⷭ҇тꙋ̀, не вѣ́дꙋще пѣ́ти: А҆ллилꙋ́їа.

Цр҃ю̀ превѣ́чный, і҆и҃се, ве́сь стра́ждеши за моѐ невоздержа́нїе, да всего́ мѧ чи́ста сотвори́ши, во все́мъ ѻ҆́бразъ на́мъ подаѧ́й, да послѣ́дꙋемъ стопа́мъ твои́мъ, зовꙋ́ще:

Пѣ́нїе всеꙋмиле́нное приноша́ше тебѣ̀ всенепоро́чнаѧ мт҃рь твоѧ̀, гл҃го́люще: а҆́ще и҆ стра́ждеши на крⷭ҇тѣ̀, но вѣ́мъ тѧ̀ и҆з̾ чре́ва пре́жде денни́цы ѿ ѻ҆ц҃а̀ рожде́нна, ви́ждꙋ бо, ꙗ҆́кѡ тва́рь всѧ̑ состра́ждетъ тебѣ̀: предае́ши дх҃ъ тво́й ѻ҆ц҃ꙋ̀ и҆ мо́й дꙋ́хъ прїимѝ и҆ не ѡ҆ста́ви менѐ, зовꙋ́щꙋю: А҆ллилꙋ́їа.

Ꙗ҆́кѡ свѣтопрїе́мнаѧ свѣща̀, ᲂу҆ крⷭ҇та̀ твоегѡ̀ горѧ́ще любо́вїю къ тебѣ̀ и҆ мт҃рнею, дв҃а пренепоро́чнаѧ ѡ҆бдержа́шесѧ болѣ́знїю, заходѧ́щꙋ тебѣ̀ во гро́бъ, и҆́стинномꙋ сл҃нцꙋ пра́вды. Съ не́юже и҆ се́рдца на́шегѡ моли́твы прїимѝ сицевы̑ѧ:

Бл҃года́ть твою̀ пода́ждь мнѣ̀, і҆и҃се, бж҃е мо́й, прїими́ мѧ, ꙗ҆́коже прїѧ́лъ є҆сѝ і҆ѡ́сифа съ нїкоди́момъ, да ꙗ҆́кѡ чи́стꙋю плащани́цꙋ дꙋ́шꙋ мою̀ принесꙋ̀ тебѣ̀, и҆ вонѧ́ми добродѣ́телей пома́жꙋ пречⷭ҇тое тѣ́ло твоѐ, и҆ ꙗ҆́кѡ во гро́бѣ, въ се́рдцѣ мое́мъ и҆мѣ́ю тѧ̀, зовы́й: А҆ллилꙋ́їа.

Пою́ще твоѐ во́льное распѧ́тїе, покланѧ́емсѧ стрⷭ҇тє́мъ твои̑мъ, хрⷭ҇тѣ̀, вѣ́рꙋемъ съ со́тникомъ, ꙗ҆́кѡ вои́стиннꙋ бж҃їй сн҃ъ є҆сѝ, прїитѝ и҆мѣ́ѧй на ѻ҆́блацѣхъ съ си́лою и҆ сла́вою мно́гою: тогда̀ ᲂу҆́бѡ не посрамѝ на́съ, кро́вїю твое́ю и҆скꙋпле́нныхъ и҆ та́кѡ вопїю́щихъ:

Ѽ і҆и҃се хрⷭ҇тѐ, а҆́гнче бж҃їй, взе́млѧй грѣхѝ мі́ра, прїимѝ ма́лое сїѐ ѿ всеѧ̀ дꙋшѝ на́шеѧ приноси́мое тебѣ̀ бл҃годаре́нїе, и҆ и҆сцѣли́ ны сп҃си́тельными твои́ми страда́ньми ѿ всѧ́кїѧ болѣ́зни дꙋше́вныѧ и҆ тѣле́сныѧ, ѡ҆гради́ ны крⷭ҇то́мъ твои́мъ ѿ вра̑гъ ви́димыхъ и҆ неви́димыхъ, и҆ при кончи́нѣ живота̀ на́шегѡ не ѡ҆ста́ви на́съ, да сме́ртїю твое́ю и҆зба́вльшесѧ вѣ́чныѧ сме́рти, вы́нꙋ зове́мъ тебѣ̀: А҆ллилꙋ́їа.

А҆́гг҃лѡвъ ликостоѧ̑нїѧ восполнѧ́ѧ, не ѿ а҆́гг҃лъ воспрїѧ́лъ є҆сѝ, но менє̀ ра́ди, бг҃ъ сы́й, чл҃вѣ́къ бы́въ, человѣ́ка грѣ̑хъ ра́ди ᲂу҆ме́рша, животворѧ́щимъ тѣ́ломъ и҆ кро́вїю твое́ю ѡ҆живи́лъ є҆сѝ. Тѣ́мже, толи́цѣй любвѝ твое́й бл҃года́рни сꙋ́ще, вопїе́мъ тѝ:

Взбра́нный воево́до, и҆ гдⷭ҇и нб҃сѐ и҆ землѝ, тебѐ, цр҃ѧ̀ безсме́ртнагѡ, зрѧ̀ на крⷭ҇тѣ̀ ви́сѧща, всѧ̀ тва́рь и҆змѣни́сѧ, нб҃о ᲂу҆жасе́сѧ, ѡ҆снова̑нїѧ землѝ восколеба́шасѧ. Мы́ же, недосто́йнїи, бл҃года́рственное поклоне́нїе твоемꙋ̀ на́съ ра́ди страда́нїю приносѧ́ще, съ разбо́йникомъ вопїе́мъ тѝ:

На крⷭ҇тѣ̀ пригвожде́нный за ны̀, і҆и҃се хрⷭ҇тѐ, є҆диноро́дный бг҃а ѻ҆ц҃а̀ сн҃е, млⷭ҇ти, любвѐ и҆ щедро́тъ неизчерпа́емаѧ бе́здно! Вѣ́мъ, ꙗ҆́кѡ грѣхѡ́въ ра́ди мои́хъ, ѿ неизрече́ннагѡ чл҃вѣколю́бїѧ, кро́вь твою̀ пролїѧ́ти на крⷭ҇тѣ̀ и҆зво́лилъ є҆сѝ, ю҆́же а҆́зъ, ѻ҆каѧ́нный и҆ неблагода́рный, досе́лѣ скве́рными мои́ми дѣ́лы попира́хъ и҆ нивочто́же вмѣнѧ́хъ. Тѣ́мъ ᲂу҆́бѡ и҆з̾ глꙋбины̀ беззако́нїѧ и҆ нечистоты̀ моеѧ̀ ᲂу҆́мныма ѻ҆чи́ма на распѧ́таго тѧ̀ на крⷭ҇тѣ̀ и҆скꙋпи́телѧ моегѡ̀ воззрѣ́въ, со смире́нїемъ и҆ вѣ́рою во глꙋбинꙋ̀ ꙗ҆́звъ, твоегѡ̀ млⷭ҇рдїѧ и҆спо́лненныхъ, себє̀ поверга́ю, грѣхѡ́въ проще́нїѧ и҆ скве́рнагѡ житїѧ̀ моегѡ̀ и҆справле́нїѧ просѧ̀. Ми́лостивъ бꙋ́ди мнѣ̀, влⷣко и҆ сꙋдїѐ мо́й, не ѿри́ни мѧ̀ ѿ лица̀ твоегѡ̀, но всеси́льною твое́ю рꙋко́ю са́мъ мѧ̀ къ тебѣ̀ ѡ҆братѝ и҆ на пꙋ́ть и҆́стиннагѡ покаѧ́нїѧ наста́ви, да ѿны́нѣ положꙋ̀ сп҃се́нїѧ моегѡ̀ нача́ло. Бж҃е́ственными страда́ньми твои́ми ᲂу҆кротѝ моѧ̑ плотскі̑ѧ стра̑сти: и҆злїѧ́нною твое́ю кро́вїю ѡ҆чи́сти моѧ̑ дꙋшє́вныѧ сквє́рны: распѧ́тїемъ твои́мъ распни́ мѧ мі́рꙋ съ собла́знами є҆гѡ̀ и҆ похотьмѝ: крⷭ҇то́мъ твои́мъ ѡ҆гради́ мѧ ѿ неви́димыхъ вра̑гъ, ловѧ́щихъ дꙋ́шꙋ мою̀. Прободе́нныма нога́ма твои́ма ѿ всѧ́кагѡ пꙋтѝ лꙋка́вагѡ возбранѝ нога́мъ мои̑мъ: прободе́нныма рꙋка́ма твои́ма рꙋ́цѣ моѝ ѿ всѧ́кагѡ неꙋго́днагѡ тебѣ̀ дѣ́ла воздержѝ. Пригвожде́нный пло́тїю, пригвоздѝ стра́хꙋ твоемꙋ̀ пло́ть мою̀, да ᲂу҆клони́всѧ ѿ ѕла̀, творю̀ бл҃го пред̾ тобо́ю. Преклони́вый главꙋ̀ твою̀ на крⷭ҇тѣ̀, къ землѝ смире́нїѧ приклонѝ вознесе́ннꙋю мою̀ горды́ню: вѣнце́мъ твои́мъ терно́вымъ ѡ҆градѝ моѧ̑ ᲂу҆шеса̀, во є҆́же не слы́шати кромѣ̀ поле́знагѡ: же́лчь ᲂу҆ста́ми вкꙋси́вый, положѝ хране́нїе нечи̑стымъ ᲂу҆стѡ́мъ мои̑мъ: ѿве́рстое копїе́мъ и҆мѣ́ѧй се́рдце, се́рдце чи́сто во мнѣ̀ сози́жди: всѣ́ми твои́ми ꙗ҆́звами всего́ мѧ сла́дцѣ въ любо́вь твою̀ ᲂу҆ѧзвѝ, да тебѐ, гдⷭ҇а моегѡ̀ возлюблю̀ все́ю дꙋше́ю, всѣ́мъ се́рдцемъ, все́ю крѣ́постїю и҆ всѣ́мъ помышле́нїемъ. Да́ждь мѝ себє̀ стра́нна и҆ неимꙋ́ща гдѣ̀ главы̀ подклони́ти: да́ждь мѝ себє̀ всебл҃га́го, и҆збавлѧ́ющаго дꙋ́шꙋ мою̀ ѿ сме́рти: да́ждь мнѣ̀ себє̀ всесла́дкаго, ᲂу҆слажда́ющаго мѧ̀ въ ско́рбѣхъ и҆ напа́стѣхъ свое́ю любо́вїю, да є҆го́же пе́рвѣе ненави́дѣхъ, прогнѣвлѧ́хъ, ѿ себє̀ и҆згонѧ́хъ и҆ ко крⷭ҇тꙋ̀ пригвожда́хъ, сего̀ ны́нѣ возлюблю̀, ра́дꙋѧсѧ прїимꙋ̀ и҆ сла́дцѣ крⷭ҇тъ є҆гѡ̀ до конца̀ жи́зни мое́й понесꙋ̀. Не да́ждь ѿсе́лѣ, ѽ всебл҃гі́й и҆скꙋпи́телю мо́й, ни є҆ди́ной мое́й во́лѣ соверша́тисѧ, поне́же ѕла̀ є҆́сть и҆ непотре́бна, да не па́ки впадꙋ̀ въ тѧ́жкꙋю рабо́тꙋ ца́рствовавшагѡ во мнѣ̀ грѣха̀: но твоѧ̀ во́лѧ бл҃га́ѧ, сп҃сти́ мѧ хотѧ́щаѧ, да соверша́етсѧ во мнѣ̀ всегда̀, є҆́йже мѧ̀ врꙋча́ѧ, тебє̀, распѧ́таго гдⷭ҇а моегѡ̀, ᲂу҆́мнымъ ѻ҆чесе́мъ моегѡ̀ се́рдца представлѧ́ю и҆ молю̀ и҆з̾ глꙋбины̀ дꙋшѝ, да и҆ въ разлꙋче́нїи мое́мъ ѿ бре́ннагѡ моегѡ̀ тѣ́ла, тебѐ є҆ди́наго на крⷭ҇тѣ̀ твое́мъ ᲂу҆зрю̀, въ рꙋ́цѣ мѧ̀ защище́нїѧ своегѡ̀ прїе́млюща и҆ ѿ воздꙋ́шныхъ дꙋхѡ́въ ѕло́бы хранѧ́ща, вселѧ́юща же со грѣ́шники, покаѧ́нїемъ тебѣ̀ бл҃гоꙋгоди́вшими. А҆ми́нь.