Акафист святому мученику Трифону

И҆збра́нный ѿ бг҃а и҆ къ ли̑кꙋ ст҃ы́хъ сопричте́нный, ст҃ы́й мч҃ниче трѵ́фѡне! Моли́сѧ ѡ҆ на́съ, грѣ́шныхъ, влⷣцѣ хрⷭ҇тꙋ̀ и҆ помога́й на́мъ побѣжда́ти мі́ръ, пло́ть и҆ дїа́вола, многоѻбра́знѡ вою́ющїѧ на ны̀, ꙗ҆́коже побѣди́лъ є҆сѝ и҆̀хъ бл҃года́тїю и҆ си́лою возлю́бленнагѡ тобо́ю хрⷭ҇та̀, да, и҆зба́вльшесѧ ѿ врагѡ́въ на́шихъ ви́димыхъ и҆ неви́димыхъ, бл҃года́рственнѡ воззове́мъ тѝ:

Ѡ҆́бразꙋ бл҃гоче́стїѧ роди́телей твои́хъ подража́ѧ, хрⷭ҇тїа̑нскїѧ нра́вы ѿ лѣ́тъ ма́лыхъ прїѧ́лъ є҆сѝ, ст҃ы́й мч҃ниче, и҆ ма́лъ сы́й лѣ̑ты, ста́ръ же ра́зꙋмомъ, вои́стиннꙋ хрⷭ҇тїа́нинъ соверше́нъ ꙗ҆ви́лсѧ є҆сѝ. Мы́ же, воспомина́юще добродѣ́тельное житїѐ твоѐ, восхвалѧ́емъ тѧ̀ си́це:

Ви́дѧ гдⷭ҇ь, ꙗ҆́кѡ во́лею по стезѝ бл҃гоче́стїѧ, въ не́мже ѿ роди́телей твои́хъ наста́вленъ бы́лъ є҆сѝ, тече́ши, и҆ ꙗ҆́кѡ вои́стиннꙋ лю́биши бг҃а, сотвори́ тѧ въ жили́ще ст҃а́гѡ дх҃а ѿ лѣ́тъ ма́лыхъ и҆ ѿве́рзе ᲂу҆ста̀ твоѧ̑ пѣ́ти є҆мꙋ̀: А҆ллилꙋ́їа.

Си́лꙋ вѣ́ры твоеѧ̀ показꙋ́ѧ, влⷣка хрⷭ҇то́съ дарова̀ тебѣ̀, ст҃ы́й мꙋ́чениче, є҆щѐ ѻ҆́трокꙋ бы́вшꙋ, да́ръ чꙋдотворе́нїй. Сегѡ̀ ра́ди вопїе́мъ тѝ:

Вѣ́рою и҆ любо́вїю стѧжа́лъ є҆сѝ ѿ бг҃а вла́сть и҆згонѧ́ти дꙋ̑хи нечи̑стыѧ, мꙋ́чащїѧ человѣ́ки и҆ претѧ́щыѧ и҆̀мъ воспѣва́ти бг҃ꙋ: А҆ллилꙋ́їа.

Ви́дѧ дарова́ннꙋю тѝ, ст҃ы́й мꙋ́чениче, си́лꙋ бж҃їю, вспѧ́ть бѣжа́ша де́мони, и҆́миже ѡ҆держи́ми бѧ́хꙋ бѣснова́тїи лю́дїе. Ви́дѧщїи же сїѧ̑, воспѣва́хꙋ тѝ си́це:

Восхотѣ́въ тобо́ю ѡ҆брати́ти ꙗ҆зы̑ки ѿ пꙋтѝ нече́стїѧ и҆ ѿкры́ти и҆̀мъ пꙋ́ть и҆́стинный, ведꙋ́щїй въ живо́тъ вѣ́чный, си́ є҆сть вѣ́рꙋ и҆́стиннꙋю, вѣ́рꙋ правосла́внꙋю, да́же до ри́ма и҆з̾ комѱа́ды приведе́ тѧ гдⷭ҇ь, да и҆ въ черто́гахъ ца́рскихъ проповѣ́си бг҃а и҆ та́мѡ мно́гїѧ наꙋчи́ши пѣ́ти є҆мꙋ̀: А҆ллилꙋ́їа.

Хотѧ́й ѡ҆брати́ти мно́гихъ на пꙋ́ть сп҃се́нїѧ, попꙋстѝ гдⷭ҇ь де́монꙋ всели́тисѧ въ дще́рь царе́вꙋ, и҆ же́стокѡ мꙋ́чити и҆ в̾верга́ти ю҆̀ многоча́стнѣ во ѻ҆́гнь и҆ во́дꙋ. Вра́чеве ничто́же ᲂу҆спѣва́хꙋ и҆ ничи́мже страда̑нїѧ дще́ри царе́вой ᲂу҆толи́ти возмого́ша. Є҆гда́ же и҆ си́льнїи мі́ра сегѡ̀ и҆ всѧ́кꙋю враче́бнꙋю хи́трость вѣ́дꙋщїи ничто́же возмого́ша и҆ и҆сповѣ́дахꙋ не́мощь свою̀, тогда̀ велѣ́нїемъ бж҃їимъ проглаго́ла дїа́волъ, ꙗ҆́кѡ є҆ди́нъ є҆́сть, и҆́же и҆згна́ти є҆го̀ и҆́мать, и҆ сѐ є҆́сть трѵ́фѡнъ. Тогда̀ приле́жнѡ и҆ска́хꙋ и҆ ѡ҆брѣто́ша є҆го̀ въ комѱа́дѣ. Грѧдꙋ́щꙋ же є҆мꙋ̀ и҆ є҆щѐ дале́че ѿ ри́ма сꙋ́щꙋ, возопѝ гла́сомъ ве́лїимъ дїа́волъ и҆ и҆зы́де, и҆ и҆сцѣлѣ̀ дѣви́ца. Ви́дѧщїи сїѧ̑ дивлѧ́хꙋсѧ и҆ глаго́лахꙋ:

Ви́дѣша вѣ́рнїи, и҆́же въ ри́мѣ, чꙋ́до, прише́ствїемъ твои́мъ бы́вшее, ᲂу҆крѣпи́шасѧ въ вѣ́рѣ свое́й и҆ воспѣ́ша бг҃ꙋ, побѣди́вшемꙋ а҆́дскагѡ ѕмі́ѧ и҆ да́рꙋющемꙋ вѣ́рꙋющымъ въ него̀ таковꙋ́ю си́лꙋ: А҆ллилꙋ́їа.

Оу҆вѣре́нїѧ и҆ща̀, тебє̀ прише́дшꙋ въ ри́мъ, ст҃ы́й трѵ́фѡне, ꙗ҆́кѡ ты̀ є҆сѝ то́й, є҆го́же ᲂу҆боѧ́сѧ де́монъ, молѝ тѧ̀ і҆мпера́торъ гордїа́нъ, да ꙗ҆ви́ши и҆ є҆мꙋ̀, и҆ сѷгклі́тꙋ є҆гѡ̀, и҆ лю́демъ въ чꙋ́вственномъ ви́дѣ дїа́вола, и҆ не ѿре́клсѧ є҆сѝ, но, возложи́въ на сѧ̀ по́стъ, помоли́сѧ гдⷭ҇ꙋ дні́й ше́сть. Въ де́нь же седмы́й, прише́дшымъ царю̀, сѷгклі́тꙋ и҆ лю́демъ, возопи́лъ є҆сѝ: тебѣ̀ глаго́лю, дꙋ́ше нечи́стый, во и҆́мѧ гдⷭ҇а моегѡ̀ і҆и҃са хрⷭ҇та̀ ꙗ҆ви́сѧ сѣ́мѡ и҆ покажѝ сво́й де́мѡнскїй ѻ҆́бразъ здѣ̀ сꙋ́щымъ, и҆ безси́лїе своѐ и҆сповѣ́ждь. И҆ бы́сть та́кѡ. И҆ зрѧ́хꙋ всѝ безѡбра́зїе де́монское и҆ дивлѧ́хꙋсѧ вѣ́рѣ ст҃а́гѡ, вопїю́ще:

Ви́дѣвше, ка́кѡ мла́до ѻ҆троча̀ повелѣва́етъ вла́стнѡ дꙋховѡ́мъ ѕло́бы поднебє́снымъ, ᲂу҆боѧ́хꙋсѧ мно́зи, и҆ слы́шаще ѿ де́мѡна и҆ ви́дѧще воѻ́чїю, ꙗ҆ковꙋ̀ си́лꙋ и҆́мать вѣ́ра хрⷭ҇то́ва, ѡ҆брати́шасѧ къ бг҃ꙋ: нече́стїе же и҆ прѡ́чаѧ заблꙋждє́нїѧ своѧ̑ ѿло́жше, крⷭ҇ти́шасѧ, и҆ ᲂу҆сты̀ свои́ми ѿ се́рдца чи́ста бл҃года́рственнѡ воспѣ́ша бг҃ꙋ пѣ́снь: А҆ллилꙋ́їа.

Бл҃годарѧ́ще тѧ̀, ца́рь вложѝ въ рꙋ́цѣ твоѝ, мꙋ́чениче, да̑ры и҆ зла́то, ты́ же, хрⷭ҇та̀ бг҃а прїѡбрѣты́й, ни во что́же вмѣни́лъ є҆сѝ всѧ̑, ꙗ҆̀же въ мі́рѣ се́мъ ꙗ҆́кѡ бла̑га почита́ютсѧ, и҆ прїѧ́лъ є҆сѝ да̑ры царе́вы, да послꙋ́жиши си́ми бли̑жнимъ твои̑мъ, и҆ ше́дъ во ѻ҆те́чество твоѐ комѱа́дꙋ, да́лъ є҆сѝ всѧ̑ ни́щымъ, си̑рымъ и҆ всѣ̑мъ въ нꙋ́ждѣ сꙋ́щымъ, непреста́ннѡ па́мѧтꙋѧ, ꙗ҆́кѡ расточи́въ бога́тство земно́е тлѣ́нное, собере́ши себѣ̀ на нб҃сѝ бога́тство нетлѣ́нное вѣ́чное. Мы́ же, наꙋча́емїи тобо́ю та́кожде твори́ти, вопїе́мъ тѝ си́це:

Взы́де на престо́лъ ри́мскїй нечести́вый ца́рь де́кїй, и҆ пролїѧ́сѧ по вселе́ннѣй кро́вь хрⷭ҇тїа́нскаѧ. Прибли́жисѧ вре́мѧ, є҆гда̀ и҆ тебє̀, ст҃ы́й мꙋ́чениче, сꙋдѝ гдⷭ҇ь под̾ѧ́ти страда̑нїѧ, да кро́вїю и҆ мꙋ́ченичествомъ твои́мъ запечатлѣ́еши вѣ́рꙋ и҆ вели́кꙋю свою̀ любо́вь къ бг҃ꙋ, и҆ тѣ́мъ до конца̀ низложи́ши сопроти̑вныѧ си̑лы и҆ наста́виши мно́гихъ, да грѧдꙋ́тъ на мꙋчє́нїѧ, ра́дꙋющесѧ, ꙗ҆́коже и҆ ты̀, страстоте́рпче, и҆ пою́ще бг҃ꙋ: А҆ллилꙋ́їа.

Ꙗ҆́кѡ ᲂу҆кры́тисѧ не мо́жетъ гра́дъ верхꙋ̀ горы̀ стоѧ́й, та́кѡ и҆ тебѣ̀, ст҃ы́й мꙋ́чениче, гоне́нїю ѿ де́кїа царѧ̀ на хрⷭ҇тїа́нъ бы́вшꙋ, невозмо́жнѡ бы́сть ᲂу҆кры́тисѧ ѿ мꙋчи́телей, и҆́бо ты̀, ꙗ҆́вѣ без̾ стра́ха хрⷭ҇та̀ всѣ̑мъ и҆сповѣ́давъ, си́лою сло́ва ѡ҆браще́нїе мно́гихъ ко хрⷭ҇тꙋ̀ ᲂу҆стро́илъ, и҆ мнѡ́гїѧ ѿ недꙋ̑гъ и҆́менемъ є҆гѡ̀ и҆сцѣли́лъ є҆сѝ. ᲂу҆вѣ́дѣвше же ѡ҆ тебѣ̀, ст҃ы́й трѵ́фѡне, и҆ге́мѡнъ а҆кѵїлі́нъ, взѧ̀ тѧ̀ и҆ пред̾ сꙋди́щемъ поста́ви, ты́ же всѧ̑ грѧдꙋ̑щаѧ на тѧ̀ въ рꙋ́цѣ бг҃а твоегѡ̀ преда́лъ є҆сѝ, ра́дꙋѧсѧ, ꙗ҆́кѡ и҆ тѧ̀ сподо́би гдⷭ҇ь бы́ти ѻ҆́бщника страда́нїй є҆гѡ̀, и҆ вѣ́рнїи, ви́дѧще ре́вность твою̀ по бз҃ѣ, вопїѧ́хꙋ тѝ:

Оу҆слы́шавъ, ꙗ҆́кѡ и҆́щꙋтъ тѧ̀ во́ини, не ᲂу҆таи́лсѧ є҆сѝ ѿ ни́хъ, мꙋ́чениче, ни въ гора́хъ, ни въ пꙋсты́нехъ, но, ѡ҆гради́всѧ моли́твою и҆ кресто́мъ, дерзнове́ннѡ себє̀ преда́лъ є҆сѝ въ рꙋ́цѣ мꙋчи́телей и҆ съ ра́достїю вели́кою стѡпы̀ твоѧ̑ напра́вилъ є҆сѝ въ нїке́ю, да возвѣсти́ши всѣ̑мъ вѣ́рꙋ и҆́стиннꙋю и҆ наста́виши пѣ́ти бг҃ꙋ: А҆ллилꙋ́їа.

Є҆гда̀ вопросѝ тѧ̀ и҆ге́мѡнъ на сꙋди́лище: кто̀ є҆сѝ, ка́ѧ сꙋдьба̀ твоѧ̀, и҆ ка́кѡ вѣ́рꙋеши; ты̀, не ѡ҆бинꙋ́ѧсѧ, ѿвѣща́лъ є҆сѝ є҆мꙋ̀ си́це: трѵ́фѡнъ и҆́мѧ моѐ: ѻ҆те́чество комѱа́да: сꙋдьбы́ же нѣ́сть ᲂу҆ на́съ, занѐ вѣ́рꙋемъ, ꙗ҆́кѡ всѧ̑ про́мысломъ бж҃їимъ быва́ютъ. По вѣ́рѣ же хрⷭ҇тїа́нинъ є҆́смь, хрⷭ҇то́съ же є҆́сть и҆ моѧ̀ си́ла, и҆ моѧ̀ крѣ́пость, и҆ сла́ва, и҆ ра́дость моѧ̀. Сїѐ и҆сповѣ́данїе твоѐ слы́шаще, ᲂу҆бл҃жа́емъ тѧ̀, ст҃ы́й трѵ́фѡне, си́це:

Слы́шавше твоѐ и҆сповѣ́данїе, ꙗ҆́рости и҆спо́лнишасѧ нечести́вїи и҆ преща́хꙋ тѝ ра́нами и҆ мꙋче́нїемъ. Ты́ же, мꙋ́чениче трѵ́фѡне, под̾ѧ́тїе страда́нїй за хрⷭ҇та̀ весе́лїемъ почита́ѧ, взыва́лъ є҆сѝ немо́лчнѡ бг҃ꙋ пѣ́снь: А҆ллилꙋ́їа.

Вѣті́ѧ многовѣща́нный а҆кѵїлі́нъ ви́дѧ, ꙗ҆́кѡ ты̀ не ᲂу҆боѧ́лсѧ є҆сѝ преще́нїй лю́тыхъ, ꙗ҆́кѡ ѻ҆вча̀ кро́ткое ꙗ҆ви́сѧ, и҆ща̀ прельсти́ти тѧ̀ словесы̀ ласка́тельными, но ничто́же ᲂу҆спѣва́ѧ, па́ки въ во́лка лю́тагѡ ѡ҆бра́щьсѧ, ᲂу҆сꙋгꙋблѧ́ше прещє́нїѧ своѧ̑. Ты́ же тве́рдъ и҆ непоколеби́мъ пребы́лъ є҆сѝ бл҃года́тїю бж҃їею, воздвиза́ѧ вѣ́рныхъ возглаша́ти тебѣ̀ сицєва́ѧ:

Оу҆слы́шавъ тѧ̀ глаго́лавша, ꙗ҆́кѡ не и҆сповѣ́дꙋющихъ и҆́стинныѧ, правосла́вныѧ вѣ́ры жре́бїй є҆́сть ѻ҆́гнь неꙋгаси́мый, ѕѣлѡ̀ разгнѣ́васѧ а҆кѵїлі́нъ и҆ повелѣ̀ тѧ̀, ст҃ы́й трѵ́фѡне, повѣ́сивъ, би́ти: ты́ же, въ повелѣ́нїи се́мъ ᲂу҆слы́шавъ гдⷭ҇ень гла́съ, призыва́вшїй тѧ̀ на страда́льческїй по́двигъ, возопи́лъ є҆сѝ бг҃ꙋ: А҆ллилꙋ́їа.

Ꙗ҆́кѡ свѣща̀ ѻ҆гне́мъ возгара́етсѧ, та́кѡ дꙋша̀ твоѧ̀, ст҃ы́й трѵ́фѡне, возгорѣ́сѧ любо́вїю къ возлюби́вшемꙋ тѧ̀ бг҃ꙋ, и҆, ᲂу҆слы́шавъ повелѣ́нїе и҆ге́мѡна, є҆́же на тѧ̀, са́мъ совле́клъ є҆сѝ ри̑зы твоѧ̑ и҆ тѣ́ло твоѐ преда́лъ є҆сѝ въ рꙋ́цѣ мꙋчи́телей, да сотворѧ́тъ всѧ̑, ꙗ҆̀же повелѣ̀ и҆ге́мѡнъ. Зрѧ́ще таковꙋ́ю ре́вность твою̀ по бз҃ѣ, всѝ вѣ́рнїи глаго́лахꙋ:

Ви́дѣша терпѣ́нїе и҆ по́двигъ тво́й, ст҃ы́й трѵ́фѡне, є҆ще́ же и҆ а҆дама́нтовꙋ крѣ́пость твою̀, просла́виша предстоѧ́щїи лю́дїе подвигополо́жника хрⷭ҇та̀ бг҃а пѣ́снїю: А҆ллилꙋ́їа.

Ꙗ҆́кѡ стѣ́нꙋ тве́рдꙋ и҆ непоколеби́мꙋ ви́дѣ тѧ̀ нечести́вый сꙋдїѧ̀, ѻ҆ба́че не просла́ви бг҃а, дарова́вшагѡ тебѣ̀ крѣ́пость сїю̀, но па́че тща́шесѧ склони́ти тѧ̀ и҆ ле́стїю, и҆ стра́хомъ сме́рти, да принесе́ши же́ртвꙋ бѣсовѡ́мъ. Ты́ же, ст҃ы́й мꙋ́чениче, и҆сповѣ́давъ во ᲂу҆́шїю всѣ́хъ вѣ́рꙋ хрⷭ҇то́вꙋ, ѡ҆бличи́лъ є҆сѝ безꙋ́мїе гони́телей и҆ показа́лъ є҆сѝ мꙋ́дрость тѣ́хъ, и҆́же во хрⷭ҇та̀ вѣ́рꙋютъ: и҆ге́мѡнъ же, и҆змышлѧ́ѧ на тѧ̀ и҆на̑ѧ мꙋчє́нїѧ, повелѣ̀ тѧ̀ со столпа̀ снѧ́ти и҆, привѧза́въ къ коню̀ своемꙋ̀, влечѐ за собо́ю. Мы́ же потщи́мсѧ просла́вити страда̑нїѧ твоѧ̑ си́це:

Не то́кмѡ на землѝ, ст҃ы́й мꙋ́чениче, бы́лъ є҆сѝ помо́щникъ и҆ застꙋ́пникъ всѣ̑мъ, твоеѧ̀ по́мощи тре́бꙋющымъ, но и҆ по сме́рти не престае́ши и҆збавлѧ́ти ѿ бѣ́дъ къ тебѣ̀ съ вѣ́рою и҆ любо́вїю притека́ющихъ, ꙗ҆́коже и҆зба́вилъ є҆сѝ ца́рскагѡ гнѣ́ва болѧ́рина трѵ́фѡна, є҆гда̀ внеза́пꙋ ꙗ҆ви́лсѧ є҆мꙋ̀ на конѣ̀, и҆ да́лъ є҆сѝ є҆мꙋ̀ ѿлетѣ́вшагѡ ца́рскагѡ со́кола. Ѻ҆́ный же трѵ́фѡнъ соко́льникъ на мѣ́стѣ се́мъ, и҆дѣ́же є҆мꙋ̀ ѿ тебє̀ по́мощь ꙗ҆ви́сѧ, во бл҃годаре́нїе тебѣ̀ за и҆збавле́нїе своѐ воздви́же ст҃ы́й хра́мъ во и҆́мѧ твоѐ, мꙋ́чениче трѵ́фѡне. Мы́ же бл҃годѣѧ̑нїѧ ѿ тебє̀ бы̑вшаѧ воспомина́юще, возно́симъ бл҃года́рственнꙋю бг҃ꙋ пѣ́снь: А҆ллилꙋ́їа.

Пою́ще твоѧ̑ многоразли̑чнаѧ чꙋдеса̀, твою̀ ди́внꙋю и҆ ско́рꙋю по́мощь, ꙗ҆́кѡ никого́же ᲂу҆се́рднѡ прибѣга́ющаго къ тебѣ̀ съ вѣ́рою, любо́вїю и҆ ᲂу҆пова́нїемъ никогда́же ѿри́нꙋлъ є҆сѝ, но всѣ́хъ къ тебѣ̀ притека́ющихъ и҆ пред̾ ст҃о́ю і҆кѡ́ною твое́ю смире́ннѡ молѧ́щихсѧ ѿ внеза́пныхъ бѣ́дъ и҆ скорбе́й и҆збавлѧ́еши, про́чее вре́мѧ живота̀ и҆̀хъ во бла́го ᲂу҆строѧ́еши, недꙋ́зи врачꙋ́еши, печа̑ли ᲂу҆толѧ́еши, и҆ комꙋ́ждо въ бѣда́хъ и҆ ско́рбехъ къ тебѣ̀ припа́дающемꙋ по́мощь и҆ ѡ҆сла́бꙋ да́рꙋеши, бл҃года́рнѣ восхвалѧ́емъ тѧ̀ си́це:

Ѽ, ст҃ы́й мꙋ́чениче трѵ́фѡне! Прїимѝ сїѐ ма́лое, ѻ҆ба́че ѿ лю́бѧщихъ и҆ бл҃года́рныхъ сердє́цъ приноси́мое тебѣ̀ на́ше моле́нїе, вознесѝ ко гдⷭ҇ꙋ бг҃ꙋ тє́плыѧ моли̑твы твоѧ̑ за ны̀, недостѡ́йныѧ: болѧ́щыѧ и҆сцѣлѝ, печа̑льныѧ ᲂу҆тѣ́ши, заблꙋ́ждшыѧ вразꙋмѝ, бѣ́дствꙋющымъ помозѝ, и҆ всѧ̑ на́мъ потрє́бнаѧ длѧ здра́вїѧ тѣле́снагѡ и҆ сп҃се́нїѧ дꙋше́внагѡ ᲂу҆ бг҃а щедрода́вца и҆спросѝ, наипа́че же и҆зба́ви на́съ ѿ лꙋка́выхъ бѣсѡ́въ, да па́мѧтꙋѧ вы́нꙋ твоѧ̑ ди̑внаѧ ѡ҆ на́съ застꙋплє́нїѧ, просла́вимъ бг҃а, дарова́вшаго на́мъ такова́гѡ моли́твенника, цѣли́телѧ и҆ чꙋдотво́рца, воспѣва́юще пѣ́снь: А҆ллилꙋ́їа.

Ѡ҆́бразꙋ бл҃гоче́стїѧ роди́телей твои́хъ подража́ѧ, хрⷭ҇тїа̑нскїѧ нра́вы ѿ лѣ́тъ ма́лыхъ прїѧ́лъ є҆сѝ, ст҃ы́й мч҃ниче, и҆ ма́лъ сы́й лѣ̑ты, ста́ръ же ра́зꙋмомъ, вои́стиннꙋ хрⷭ҇тїа́нинъ соверше́нъ ꙗ҆ви́лсѧ є҆сѝ. Мы́ же, воспомина́юще добродѣ́тельное житїѐ твоѐ, восхвалѧ́емъ тѧ̀ си́це:

И҆збра́нный ѿ бг҃а и҆ къ ли̑кꙋ ст҃ы́хъ сопричте́нный, ст҃ы́й мч҃ниче трѵ́фѡне! Моли́сѧ ѡ҆ на́съ, грѣ́шныхъ, влⷣцѣ хрⷭ҇тꙋ̀ и҆ помога́й на́мъ побѣжда́ти мі́ръ, пло́ть и҆ дїа́вола, многоѻбра́знѡ вою́ющїѧ на ны̀, ꙗ҆́коже побѣди́лъ є҆сѝ и҆̀хъ бл҃года́тїю и҆ си́лою возлю́бленнагѡ тобо́ю хрⷭ҇та̀, да, и҆зба́вльшесѧ ѿ врагѡ́въ на́шихъ ви́димыхъ и҆ неви́димыхъ, бл҃года́рственнѡ воззове́мъ тѝ:

Ѽ ст҃ы́й мч҃ниче хрⷭ҇то́въ трѵ́фѡне, ско́рый помо́щниче всѣ̑мъ къ тебѣ̀ прибѣга́ющымъ, и҆ молѧ́щымсѧ предъ ст҃ы́мъ твои́мъ ѻ҆́бразомъ, скоропослꙋ́шный предста́телю! ᲂу҆слы́ши ᲂу҆̀бо ны́нѣ и҆ на всѧ́кїй ча́съ моле́нїе на́съ, недосто́йныхъ рабѡ́въ твои́хъ, почита́ющихъ ст҃ꙋ́ю па́мѧть твою̀, и҆ предста́тельствꙋй ѡ҆ на́съ предъ гдⷭ҇емъ на всѧ́комъ мѣ́стѣ. ты́ бо, ᲂу҆го́дниче хрⷭ҇то́въ, въ вели́кихъ чꙋдесѣ́хъ возсїѧ́вый, пре́жде и҆схо́да твоегѡ̀ ѿ житїѧ̀ сегѡ̀ тлѣ́ннагѡ моли́лсѧ є҆сѝ ко гдⷭ҇ꙋ и҆ и҆спроси́лъ є҆сѝ ᲂу҆ негѡ̀ да́ръ се́й: а҆́ще кто̀ въ ко́ей ли́бо нꙋ́ждѣ, бѣдѣ̀, печа́ли и҆ болѣ́зни дꙋше́внѣй и҆лѝ тѣле́снѣй призыва́ти начне́тъ ст҃о́е и҆́мѧ твоѐ, то́й да и҆зба́вленъ бꙋ́детъ ѿ всѧ́кагѡ прило́га ѕла́гѡ, и҆ ꙗ҆́коже ты̀ и҆ногда̀ дще́рь царе́вꙋ, во гра́дѣ ри́мѣ ѿ дїа́вола мꙋ́чимꙋ, и҆сцѣли́лъ є҆сѝ, си́це и҆ на́съ ѿ лю́тыхъ є҆гѡ̀ ко́зней сохранѝ во всѧ̑ дни̑ живота̀ на́шегѡ, наипа́че же въ де́нь стра́шный послѣ́днѧгѡ на́шегѡ и҆здыха́нїѧ предста́тельствꙋй ѡ҆ на́съ, бꙋ́ди на́мъ тогда̀ помо́щникъ, и҆ ско́рый прогони́тель лꙋка́выхъ дꙋхѡ́въ, и҆ къ црⷭ҇твїю нбⷭ҇номꙋ предводи́тель, и҆дѣ́же ты̀ ны́нѣ предстои́ши съ ли̑ки ст҃ы́хъ ᲂу҆ прⷭ҇то́ла бж҃їѧ, молѝ гдⷭ҇а, да сподо́битъ и҆ на́съ прича́стники бы́ти присносꙋ́щнагѡ весе́лїѧ и҆ ра́дости, да съ тобо́ю кꙋ́пнѡ ᲂу҆досто́имсѧ сла́вити: ѻ҆ц҃а̀ и҆ сн҃а и҆ ст҃а́го ᲂу҆тѣ́шителѧ дх҃а, во вѣ́ки. А҆ми́нь.