А҆ка́ѳїстъ ст҃и́телю спѷрїдѡ́нꙋ трїмѷѳꙋ́нтскомꙋ.
Конда́къ а҃.
Препросла́вленный ѿ гдⷭ҇а ст҃и́телю и҆ чꙋдотво́рче спѷрїдѡ́не! ны́нѣ всечестнꙋ́ю па́мѧть твою̀ пра́зднꙋюще, ꙗ҆́кѡ мно́гѡ могꙋ́щемꙋ споспѣшествова́ти на́мъ ѡ҆ просла́вльшемъ тѧ̀ хрⷭ҇тѐ, ᲂу҆ми́льнѡ вопїе́мъ тѝ: и҆зба́ви на́съ ѿ всѧ́кихъ бѣ́дъ и҆ ѕѡ́лъ, да съ благодаре́нїемъ зове́мъ тѝ: ра́дꙋйсѧ, спѷрїдѡ́не, преди́вный чꙋдотво́рче!
І҆́косъ а҃.
Ѿ ю҆́ности ᲂу҆краше́нный всѣ́ми добродѣ́тельми, житїе́мъ свои̑мъ а҆́гг҃лѡмъ подража́вый, ты̀, ст҃и́телю спѷрїдѡ́не, вои́стиннꙋ показа́лсѧ є҆сѝ дрꙋ́гъ хрⷭ҇то́въ: мы̀ же, зрѧ́ще тѧ̀, нбⷭ҇нагѡ человѣ́ка и҆ земна́гѡ а҆́гг҃ла, со благоговѣ́нїемъ ᲂу҆ми́льнѡ вопїе́мъ тѝ:
Ра́дꙋйсѧ, ᲂу҆́ме, созерца́ѧй та̑йны прест҃ы́ѧ трⷪ҇цы: ра́дꙋйсѧ, ѡ҆богати́выйсѧ дх҃а пресвѣ́тлымъ ѡ҆сїѧ́нїемъ.
Ра́дꙋйсѧ, свѣти́льниче многосвѣ́тлый: ра́дꙋйсѧ, ᲂу҆́мъ тво́й безстра́стїемъ просвѣти́вый.
Ра́дꙋйсѧ, и҆змла́да и҆́стиннꙋю простотꙋ̀ и҆ безмо́лвїе возлюби́вый: ра́дꙋйсѧ, ᲂу҆краше́нїе цѣломꙋ́дрїѧ.
Ра́дꙋйсѧ, любвѐ неистощи́маѧ стрꙋѧ̀: ра́дꙋйсѧ, ꙗ҆́кѡ страннолю́бїю а҆враа́ма подража́лъ є҆сѝ.
Ра́дꙋйсѧ, ꙗ҆́кѡ всѣ́мъ любвеѡби́льнѡ вхѡ́ды до́ма своегѡ̀ ѿверза́лъ є҆сѝ: ра́дꙋйсѧ, ни́щихъ предста́телю.
Ра́дꙋйсѧ, пред̾ ни́мже благоговѣ́ютъ лю́дїе: ра́дꙋйсѧ, ꙗ҆́кѡ ты̀ є҆сѝ ѻ҆бита́лище прест҃а́гѡ дх҃а.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ в҃.
Ви́дѧще ѻ҆́стровъ кѵ́пръ и҆ всѧ̑ хрⷭ҇тїа́нскїѧ стра́ны нетлѣ̑нныѧ мѡ́щи твоѧ̑, ст҃и́телю, ѿ ни́хже и҆стека́ютъ ѡ҆би̑льнаѧ и҆сцѣлє́нїѧ, возра́довашасѧ: и҆ мы̀, почита́юще тѧ̀ ꙗ҆́кѡ преѡби́льнагѡ и҆стѡ́чника бл҃года́ти, низпо́сланнаго свы́ше на́мъ, вопїе́мъ къ верхо́вномꙋ пода́телю нбⷭ҇ныхъ и҆ земны́хъ бла́гъ: А҆ллилꙋ́їа.
І҆́косъ в҃.
Ра́зꙋмъ бж҃е́ственный и҆мы́й, а҆́ще сы́й па́стырь безслове́сныхъ ѻ҆ве́цъ, ты̀ произволе́нїемъ пастыренача́льника хрⷭ҇та̀ и҆збра́нъ бы́лъ є҆сѝ въ па́стырѧ ѻ҆ве́цъ слове́сныхъ. вѣ́рнїи же, разꙋмѣ́вше тѧ̀ до́брагѡ па́стырѧ, неꙋсы́пнѡ ѡ҆ ста́дѣ свое́мъ пекꙋ́щагѡсѧ, воспѣва́хꙋ:
Ра́дꙋйсѧ, а҆рхїере́є бг҃а вы́шнѧгѡ, въ хїрото́нїи воспрїѧ́вый ѻ҆би́льнѡ бж҃е́ственнꙋю бл҃года́ть: ра́дꙋйсѧ, свѣти́льниче многосвѣ́тлый, горѧ́й и҆ свѣтѧ́й.
Ра́дꙋйсѧ, вѣ́рный дѣ́лателю въ вертогра́дѣ хрⷭ҇то́вомъ: ра́дꙋйсѧ, па́стырю, на па́жити вѣ́ры и҆ благоче́стїѧ па́ствꙋ свою̀ воспита́вый.
Ра́дꙋйсѧ, сїѧ́ньми добродѣ́телей твои́хъ мі́ръ просвѣща́вый: ра́дꙋйсѧ, прⷭ҇то́лꙋ хрⷭ҇то́вꙋ бж҃е́ственнꙋю же́ртвꙋ приноси́вый.
Ра́дꙋйсѧ, і҆ера́рше, разꙋмѣ́нїемъ правосла́вїѧ ᲂу҆краше́нный: ра́дꙋйсѧ, а҆по́стольскагѡ ᲂу҆чє́нїѧ и҆спо́лненный, вѣ́рныхъ стрꙋѧ́ми спаси́тельнагѡ ᲂу҆чє́нїѧ напаѧ́ѧй.
Ра́дꙋйсѧ, ꙗ҆́кѡ и҆ мꙋ́дрыхъ ѡ҆зари́лъ є҆сѝ: ра́дꙋйсѧ, ꙗ҆́кѡ и҆ просты́хъ сєрдца̀ ѡ҆бнови́лъ є҆сѝ.
Ра́дꙋйсѧ, сла́во правосла́вныхъ и҆ цр҃кве непоколеби́мое ᲂу҆твержде́нїе: ра́дꙋйсѧ, ᲂу҆краше́нїе ѻ҆тцє́въ, сла́во и҆ похвало̀ і҆ере́євъ бл҃гоговѣ́йныхъ.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ г҃.
Си́лою вы́шнѧгѡ, ѡ҆сѣни́вшею тѧ̀, ст҃и́телю спѷрїдѡ́не, бг҃омꙋ́дръ ты̀ показа́лсѧ є҆сѝ и҆ сжа́вши дла́нїю гли́нꙋ, трⷪ҇чность ли́цъ всѣ́мъ ѻ҆чеви́дно ᲂу҆ѧсни́лъ є҆сѝ: тѣ́мже лжемꙋ́дрїи фїло́софи, собра́вшїисѧ на собо́рѣ, ᲂу҆жасо́шасѧ, вѣ́рнїи же непостижи́маго просла́виша бг҃а, ᲂу҆мꙋдри́вшаго тѧ̀ во спасе́нїе, вопїю́ще є҆мꙋ̀: А҆ллилꙋ́їа.
І҆́косъ г҃.
И҆мѣ́юще тѧ̀ въ помышле́нїихъ свои́хъ всѝ ѻ҆тцы̀ собо́ра прѡ́ста, неискꙋ́сна въ кни́жнѣмъ ᲂу҆че́нїи, моли́ша тѧ̀, ѻ҆́тче спѷрїдѡ́не, не препира́тисѧ словесы̀ съ виті́ею, мнѧ́щимсѧ мꙋ́дрꙋ бы́ти. ты́ же, ст҃и́телю, ре́вностїю по бз҃ѣ распалѧ́емый, вѣ́рꙋѧ, ꙗ҆́кѡ про́повѣдь хрⷭ҇то́ва не въ препрѣ́тельныхъ мꙋ́дрѡсти человѣ́чєскїѧ словесѣ́хъ, но въ ꙗ҆влє́нїи дх҃а и҆ си́лы, премꙋ́дрѣ тогѡ̀ ѡ҆бличи́въ, вразꙋми́лъ и҆ на пꙋ́ть и҆́стинный наста́вилъ є҆сѝ. всѝ, ви́дѣвше чꙋ́до сїѐ, взыва́хꙋ:
Ра́дꙋйсѧ, свѣ́тѣ правосла́вныѧ мꙋ́дрѡсти: ра́дꙋйсѧ, ꙗ҆́кѡ глаго́лемыхъ бы́ти мꙋ́дрыхъ совопро́сникѡвъ посрами́лъ є҆сѝ.
Ра́дꙋйсѧ, и҆сто́чниче, благода́тїю ѻ҆би́льный: ра́дꙋйсѧ, непоколеби́мый сто́лпе, тве́рдѡ содержа́щїй сꙋ́щихъ въ вѣ́рѣ.
Ра́дꙋйсѧ, ѡ҆мрача́ѧй всепа́гꙋбнꙋю є҆́ресь: ра́дꙋйсѧ, чрез̾ него́же попра́но бы́сть безꙋ́мїе.
Ра́дꙋйсѧ, ꙗ҆́кѡ пе́рсть земна́ѧ проповѣ́да твои́ма рꙋка́ма ст҃ꙋ́ю трⷪ҇цꙋ: ра́дꙋйсѧ, ꙗ҆́кѡ и҆з̾ гли́ны и҆зве́лъ є҆сѝ ѻ҆́гнь и҆ во́дꙋ во ᲂу҆твержде́нїе догма́та ст҃ы́ѧ трⷪ҇цы.
Ра́дꙋйсѧ, ꙗ҆́кѡ просвѣти́лъ є҆сѝ лю́ди сла́вити сло́во, вои́стиннꙋ є҆диносꙋ́щное пребезнача́льномꙋ ѻ҆ц҃ꙋ̀: ра́дꙋйсѧ, ꙗ҆́кѡ ѕмі́евꙋ главꙋ̀ па̑гꙋбныѧ а҆́рїевы є҆́реси порази́лъ є҆сѝ.
Ра́дꙋйсѧ, ꙗ҆́кѡ тобо́ю поже́рта бы́сть ѕло́ба: ра́дꙋйсѧ, невѣ́рнагѡ мꙋдреца̀ совопро́сника къ и҆́стиннѣй вѣ́рѣ ѡ҆брати́вый.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ д҃.
Жи́знь проводѧ̀ въ ᲂу҆бо́жествѣ и҆ нищетѣ̀, ни́щимъ и҆ бѣ̑днымъ бы́лъ є҆сѝ пита́тель и҆ помо́щникъ и҆ любвѐ ра́ди къ ни́щимъ ѕмі́ѧ въ зла́то преложи́лъ є҆сѝ и҆ да́лъ є҆сѝ ѻ҆́ное тре́бꙋющемꙋ твоеѧ̀ по́мощи. дивѧ́щесѧ ѡ҆ чꙋдесѝ се́мъ, благода́рственно вопїе́мъ къ бг҃ꙋ: А҆ллилꙋ́їа.
І҆́косъ д҃.
Слы́шано бы́сть всѣ́мъ и҆ всю́дꙋ, ꙗ҆́кѡ ст҃и́тель спѷрїдѡ́нъ вои́стиннꙋ є҆́сть жили́ще ст҃ы́ѧ трⷪ҇цы: всели́сѧ бо въ нѣ́мъ бг҃ъ ѻ҆ц҃ъ, бг҃ъ сло́во и҆ бг҃ъ дх҃ъ ст҃ы́й. сегѡ̀ ра́ди ты̀ словесы̑ и҆ дѣѧ́ньми проповѣ́далъ є҆сѝ всѣ́мъ хрⷭ҇тїа́нѡмъ воплоще́ннагѡ и҆́стиннаго бг҃а, вопїю́щымъ:
Ра́дꙋйсѧ, слове́съ бж҃їихъ таи́нниче: ра́дꙋйсѧ, домострои́тельство бж҃їе ѡ҆ спасе́нїи мі́ра ᲂу҆ѧсни́вый.
Ра́дꙋйсѧ, ꙗ҆́кѡ наꙋчи́лъ є҆сѝ не и҆спы́товати є҆́же є҆́сть превы́шѣ ра́зꙋма и҆ мꙋ́дрости человѣ́чєскїѧ: ра́дꙋйсѧ, непостижи́мꙋю дѣ́йствꙋющꙋю въ тебѣ̀ си́лꙋ бж҃їю ꙗ҆ви́вый.
Ра́дꙋйсѧ, ꙗ҆́кѡ ᲂу҆ста́ми твои́ми провѣща̀ са́мъ бг҃ъ: ра́дꙋйсѧ, ꙗ҆́кѡ всѝ послꙋ́шахꙋ тебѐ въ сла́дость.
Ра́дꙋйсѧ, мглꙋ̀ і҆дѡлослꙋжє́нїѧ разгна́вый: ра́дꙋйсѧ, ꙗ҆́кѡ мно́гихъ къ и҆́стиннѣй вѣ́рѣ приве́лъ є҆сѝ.
Ра́дꙋйсѧ, ꙗ҆́кѡ главы̀ неви́димыхъ ѕмі́євъ порази́лъ є҆сѝ: ра́дꙋйсѧ, ꙗ҆́кѡ тобо́ю прославлѧ́етсѧ вѣ́ра хрⷭ҇тїа́нскаѧ.
Ра́дꙋйсѧ, ꙗ҆́кѡ свѣ́тло ѡ҆зарѧ́еши всѣ́хъ ᲂу҆блажа́ющихъ тѧ̀: ра́дꙋйсѧ, побо́рниче хрⷭ҇тїа́нскїѧ вѣ́ры и҆ правосла́вїѧ.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ є҃.
Бж҃е́ственнагѡ дх҃а преиспо́лненъ бы́лъ є҆сѝ, ст҃и́телю спѷрїдѡ́не, ра́ди добродѣ́тельнагѡ житїѧ̀ твоегѡ̀: занѐ кро́токъ, ми́лостивъ, чи́стъ се́рдцємъ, терпѣли́въ, непамѧтоѕло́бивъ, страннолю́бецъ бы́лъ є҆сѝ: сегѡ̀ ра́ди творе́цъ и҆ въ чꙋдесѣ́хъ пресла́вна показа̀ тѧ̀. мы̀ же, прославлѧ́ѧ бг҃а, просла́вльшагѡ тѧ̀, вопїе́мъ є҆мꙋ̀: А҆ллилꙋ́їа.
І҆́косъ є҃.
Равноа́гг҃льна спѷрїдѡ́на зри́мъ, вели́кагѡ чꙋдотво́рца. нѣ́когда страна̀ ѿ бездо́ждїѧ и҆ за́сꙋхи вельмѝ пострада̀: бы́сть гла́дъ и҆ ꙗ҆́зва, и҆ мно́гое мно́жество люде́й ᲂу҆мро́ша, моли́твами же ст҃и́телѧ сни́де съ небесѐ на зе́млю до́ждь. лю́дїе же, и҆зба́вльшесѧ ѿ бѣ́дствїѧ, благода́рственно взыва́хꙋ:
Ра́дꙋйсѧ, вели́комꙋ прⷪ҇ро́кꙋ и҆лїѝ ᲂу҆подо́бивыйсѧ: ра́дꙋйсѧ, ꙗ҆́кѡ до́ждь, ѿ̾е́млющїй гла́дъ и҆ недꙋ́ги, бл҃говре́меннѣ низве́лъ є҆сѝ.
Ра́дꙋйсѧ, па́ки моли́твами свои́ми не́бо заключи́вый: ра́дꙋйсѧ, ꙗ҆́кѡ немилосе́рдагѡ кꙋпца̀ лише́нїемъ и҆мѣ́нїѧ наказа́лъ є҆сѝ.
Ра́дꙋйсѧ, ꙗ҆́кѡ тре́бꙋющимъ пи́щꙋ ѻ҆би́льнѡ дарова́лъ є҆сѝ: ра́дꙋйсѧ, ꙗ҆́кѡ любоблагоꙋтро́бїе бг҃а къ лю́демъ подвиза́еши.
Ра́дꙋйсѧ, взе́млѧй не́мѡщи немощны́хъ: ра́дꙋйсѧ, бг҃облагода́тный человѣ́кѡмъ помо́щниче.
Ра́дꙋйсѧ, болѧ́щимъ здра́вїе подава́ѧй: ра́дꙋйсѧ, є҆го́же трепе́щꙋтъ де́мони.
Ра́дꙋйсѧ, безчи́сленныхъ чꙋде́съ и҆сто́чниче.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ ѕ҃.
Завѣ́са ветхозавѣ́тной ски́нїи закрыва́ше во ст҃а́ѧ ст҃ы́хъ ковче́гъ, ма́ннꙋ и҆ скрижа́ли. и҆ хра́мъ тво́й, ст҃и́телю спѷрїдѡ́не, и҆мѣ́етъ ра́кꙋ твою̀, ꙗ҆́кѡ ковче́гъ, ст҃ы́ѧ мѡ́щи твоѧ̑, ꙗ҆́кѡ ма́ннꙋ, се́рдцѣ твоѐ, ꙗ҆́кѡ скрижа́ли бж҃е́ственныѧ бл҃года́ти, на ни́хже зри́мъ начерта́ннꙋю пѣ́снь: А҆ллилꙋ́їа.
І҆́косъ ѕ҃.
Наро́дъ кѵ́пра нѣ́когда за ᲂу҆множе́нїе беззако́нїй наказа̀ гдⷭ҇ь безпло́дїемъ землѝ, є҆гда̀ же прїи́де къ ст҃о́мꙋ спѷрїдѡ́нꙋ зна́емый земледѣ́лецъ, просѧ̀ по́мощи, дадѐ є҆мꙋ̀ ст҃ы́й зла́то: минꙋ́вшꙋ же бѣ́дствїю, земледѣ́лецъ ѻ҆́ный возвратѝ па́ки зла́то и҆, ѽ чꙋдесѐ! зла́то ѕмі́й бы́сть. прославлѧ́юще бг҃а, ди́внагѡ во ст҃ы́хъ свои́хъ, вопїе́мъ:
Ра́дꙋйсѧ, ꙗ҆́кѡ мѡѷсе́ю, чꙋде́снѡ преложи́вшемꙋ же́злъ въ ѕмі́ѧ, подража́лъ є҆сѝ: ра́дꙋйсѧ, человѣколюби́вый па́стырю, и҆збавлѧ́ѧй ѿ бѣ́дъ словє́сныѧ ѻ҆́вцы ста́да своегѡ̀.
Ра́дꙋйсѧ, ѻ҆би́льнѡ всѣ́хъ всѣ́ми бл҃гами ѡ҆богаща́ѧй: ра́дꙋйсѧ, ꙗ҆́кѡ и҆лїа̀, бѣ́дныхъ пита́вый.
Ра́дꙋйсѧ, немилосе́рдыхъ къ милосе́рдїю ѡ҆браща́ѧй: ра́дꙋйсѧ, достоподража́емый примѣ́ръ любвѐ длѧ человѣ́кѡвъ, въ мі́рѣ живꙋ́щихъ.
Ра́дꙋйсѧ, вѣ́рныхъ и҆ невѣ́рныхъ въ бѣда́хъ ᲂу҆тѣше́нїе: ра́дꙋйсѧ, дре́во сенноли́ственное, гра́дъ и҆ странꙋ̀ ѡ҆сѣнѧ́ющее.
Ра́дꙋйсѧ, сла́во и҆ похвало̀ керкѵ́рѧнъ: ра́дꙋйсѧ, над̾ вла́гою и҆ сꙋ́шею, зно́емъ и҆ хла́домъ бл҃года́тїю бж҃їею влады́чествꙋѧй.
Ра́дꙋйсѧ, ᲂу҆ста́вы землѝ моли́твою премѣнѧ́ѧй: ра́дꙋйсѧ, бꙋ̑дꙋщаѧ, ꙗ҆́кѡ настоѧ̑щаѧ, прови́дѣвый.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ з҃.
Хода́тай пред̾ гдⷭ҇емъ за всѣ́хъ ꙗ҆ви́лсѧ є҆сѝ, ст҃и́телю спѷрїдѡ́не. сегѡ̀ ра́ди и҆ мы̀ прибѣга́емъ под̾ кро́въ тво́й, и҆́щꙋще спасе́нїѧ, всѝ бо помо́щника тебѐ и҆́мамы во всѣ́хъ нꙋ́ждахъ, во вре́мѧ гла́да, смертонѡ́сныѧ ꙗ҆́звы и҆ во всѧ̑ годи́ны бѣ́дъ и҆ и҆скꙋше́нїй. сегѡ̀ ра́ди благода́рственно вопїе́мъ бг҃ꙋ: А҆ллилꙋ́їа.
І҆́косъ з҃.
Но́вое чꙋ́до ви́димъ и҆ бг҃олѣ́пное: є҆гда̀ ты̀, ѻ҆́тче, ше́ствовалъ и҆зба́вити непови́ннѡ ѡ҆сꙋжде́ннагѡ на сме́рть, бꙋ́рный пото́къ преградѝ пꙋ́ть тебѣ̀: ты̀ же и҆́менемъ всемогꙋ́щаго бг҃а повелѣ́лъ є҆мꙋ̀ ста́ти и҆ преше́лъ є҆сѝ со спꙋ̑тники чрез̾ рѣкꙋ̀, ꙗ҆́кѡ по сꙋ́хꙋ. сла́ва ѡ҆ се́мъ чꙋдесѝ распространи́сѧ всю́дꙋ, и҆ всѝ просла́виша бг҃а, вопїю́ще къ тебѣ̀:
Ра́дꙋйсѧ, ꙗ҆́кѡ и҆ногда̀ і҆исꙋ́съ наѵи́нъ чрез̾ і҆ѻрда́нъ рѣкꙋ̀ по сꙋ́хꙋ преше́дый: ра́дꙋйсѧ, рѣ̑чнаѧ ᲂу҆стремлє́нїѧ гла́сомъ свои̑мъ ᲂу҆кроти́вый.
Ра́дꙋйсѧ, ꙗ҆́кѡ трꙋ́дный пꙋ́ть предпрїѧ́лъ є҆сѝ, дви́жимый милосе́рдїемъ: ра́дꙋйсѧ, ꙗ҆́кѡ клеветꙋ̀ разрꙋши́лъ є҆сѝ и҆ непови́ннаго ѿ ᲂу҆́зъ темни́цы и҆ напра́сныѧ смє́рти и҆зба́вилъ є҆сѝ.
Ра́дꙋйсѧ, жи́зни по бз҃ѣ благі́й поспѣ́шниче: ра́дꙋйсѧ, непови́ннѡ ᲂу҆гнете́нныхъ защи́тителю.
Ра́дꙋйсѧ, ᲂу҆ста́вѡвъ є҆стества̀ во́днагѡ премѣни́телю: ра́дꙋйсѧ, ꙗ҆́кѡ сꙋдїю̀ вразꙋми́лъ є҆сѝ и҆ ѿ ᲂу҆бі́йства спа́слъ є҆сѝ.
Ра́дꙋйсѧ, и҆́стинное и҆справле́нїе дꙋ́шъ: ра́дꙋйсѧ, ди́внаѧ си́ло, потѡ́ки ᲂу҆дѣржава́ющаѧ.
Ра́дꙋйсѧ, ᲂу҆слажда́ющїй сердца̀ человѣ́кѡвъ, къ тебѣ̀ притека́ющихъ: ра́дꙋйсѧ, человѣколю́бїю а҆враа́ма подража́телю.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ и҃.
Стра́нникъ и҆ пришле́цъ бы́лъ є҆сѝ на землѝ, ꙗ҆́коже и҆ про́чїи человѣ́цы. ѡ҆ба́че и҆з̾ чре́ва ма́тере всевѣ́дꙋщїй вели́кагѡ ᲂу҆го́дника и҆ чꙋдотво́рца показа̀ тѧ̀, ст҃и́телю спѷрїдѡ́не: бѣ́сы бо и҆згонѧ́еши, всѧ́кꙋю болѣ́знь и҆ ꙗ҆́звꙋ и҆сцѣлѧ́еши, помышле́нїѧ люде́й зри́ши, тѣ́мже и҆ ди́венъ во ст҃ы́хъ показа́лсѧ є҆сѝ. мы̀ же, возсыла́юще моли́твꙋ ко благода́телю всѣ́хъ бг҃ꙋ, вопїе́мъ є҆мꙋ̀: А҆ллилꙋ́їа.
І҆́косъ и҃.
Ве́сь мі́ръ ᲂу҆́жасомъ мно́гимъ содрогнꙋ́сѧ, є҆гда̀ ᲂу҆слы́ша, ꙗ҆́кѡ сме́рть, по гла́сꙋ твоемꙋ̀, возвраща́етъ и҆з̾ гробѡ́въ мертвецы̀ своѧ̑, и҆ возопѝ:
Ра́дꙋйсѧ, ᲂу҆ме́ршꙋю дще́рь свою̀, да ꙗ҆ви́тъ врꙋче́нное є҆́й сокро́вище, къ жи́зни воззва́вый: ра́дꙋйсѧ, ско́рбнꙋю вдови́цꙋ, на сохране́нїе зла́то вда́вшꙋю, ᲂу҆тѣ́шивый.
Ра́дꙋйсѧ, ᲂу҆ме́ршее ѻ҆троча̀ и҆з̾ ме́ртвыхъ воскреси́вый: ра́дꙋйсѧ, ꙗ҆́кѡ ма́терь є҆гѡ̀, внеза́пнѡ ѿ ра́дѡсти ᲂу҆ме́ршꙋю, ѡ҆живи́вый.
Ра́дꙋйсѧ, ꙗ҆́кѡ ᲂу҆подо́билсѧ є҆сѝ и҆лїѝ, моли́твами сы́нꙋ саре́птскїѧ жены̀ жи́знь возврати́вшемꙋ: ра́дꙋйсѧ, ꙗ҆́кѡ и҆ є҆лїссе́ю, возбꙋди́вшемꙋ ѿ смє́рти ѻ҆троча̀ подража́лъ є҆сѝ.
Ра́дꙋйсѧ, па́стырю, преи́скреннѣ лю́бѧщїй человѣ̑ки: ра́дꙋйсѧ, женѣ̀ блꙋдни́цѣ, слеза́ми нѡ́зѣ твоѝ ѡ҆мы́вшей, грѣхѝ и҆́менемъ бг҃а ѿпꙋсти́вый.
Ра́дꙋйсѧ, ст҃ꙋ́ю ре́вность верхо́внаго а҆пⷭ҇ла стѧжа́вый: ра́дꙋйсѧ, ꙗ҆́кѡ нераска́ѧннаѧ грѣ́шница, по глаго́лꙋ твоемꙋ̀, въ тѧ́жкихъ болѣ́знехъ ᲂу҆́мре.
Ра́дꙋйсѧ, землѝ плодоно́сїе моли́твами твои́ми и҆спроси́вый: ра́дꙋйсѧ, непрело́жное воскресе́нїѧ человѣ́кѡвъ ᲂу҆вѣре́нїе.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ ѳ҃.
Дх҃а бж҃е́ственнагѡ ѡ҆сїѧ́ньми ѡ҆заре́нъ бы́лъ є҆сѝ, ст҃и́телю спѷрїдѡ́не, и҆мѣ́лъ бо є҆сѝ дх҃а премꙋ́дрѡсти, ꙗ҆́кѡ мꙋ́дрыми словесы̑ безꙋ́мныхъ ѡ҆бꙋи́лъ є҆сѝ и҆ посрѣдѐ ѻ҆тцє́въ вѣ́рꙋ ᲂу҆тверди́лъ є҆сѝ, дх҃а ра́зꙋма, ꙗ҆́кѡ ᲂу҆мы̑ ѡ҆мрачє́нныѧ ѡ҆зари́лъ є҆сѝ: дх҃а стра́ха бж҃їѧ, ꙗ҆́кѡ вы́нꙋ дѣ́ланїи бг҃оꙋго́дными дꙋ́шꙋ ѡ҆чи́стилъ є҆сѝ. тѣ́мже, предста́въ престо́лꙋ вы́шнѧгѡ, съ со́нмомъ а҆́гг҃ловъ воспѣва́еши є҆мꙋ̀: А҆ллилꙋ́їа.
І҆́косъ ѳ҃.
Же́злъ па́стырѧ слове́сныхъ ѻ҆ве́цъ ѿ пастыренача́льника гдⷭ҇а і҆исꙋ́са прїе́мый, ст҃ы́й спѷрїдѡ́нъ не премѣнѝ житїѧ̀ своегѡ̀: нестѧжа́теленъ, кро́токъ, любвѐ ра́ди всѧ̑ терпѧ́й, не постыдѣ́сѧ пещи́сѧ и҆ ѡ҆ ста́дѣ безслове́сныхъ ѻ҆ве́цъ. всѧ̑ сїѧ̑ возбꙋжда́ютъ на́съ сла́вити бг҃а и҆ взыва́ти тебѣ̀:
Ра́дꙋйсѧ, сла́вꙋ мі́ра сегѡ̀ ꙗ҆́кѡ сꙋ́етнꙋю презрѣ́вый: ра́дꙋйсѧ, мздꙋ̀ мно́гꙋ на нбⷭ҇ѣ́хъ стѧжа́вый.
Ра́дꙋйсѧ, кра̑снаѧ мі́ра сегѡ̀ въ ᲂу҆мѣ́ты вмѣни́вый: ра́дꙋйсѧ, сосꙋ́дѣ небѣ́сныхъ бла́гъ.
Ра́дꙋйсѧ, ст҃ѣ́йшаѧ па́жите кѷпрїо́тѡвъ: ра́дꙋйсѧ, ꙗ҆́кѡ тебѐ ра́ди бг҃ъ хи́щниковъ ѻ҆ве́цъ твои́хъ неви́димыми ᲂу҆́зами свѧза̀.
Ра́дꙋйсѧ, та́тємъ ѻ҆те́ческое вразꙋмле́нїе препода́вый: ра́дꙋйсѧ, по милосе́рдїю твоемꙋ̀ за проведе́ннꙋю без̾ сна̀ но́щь ѻ҆вна̀ и҆̀мъ дарова́вый.
Ра́дꙋйсѧ, непослꙋша́нїемъ ко́злища, ꙗ҆́кѡ бы ра́зꙋмъ и҆мꙋ́щагѡ, кꙋпца̀, ᲂу҆таи́вшагѡ цѣ́нꙋ є҆гѡ̀, ѡ҆бличи́вый: ра́дꙋйсѧ, ᲂу҆таи́вшагѡ сре́бреники твоѧ̑ къ покаѧ́нїю приведы́й.
Ра́дꙋйсѧ, ꙗ҆́кѡ стра́сти корыстолю́бїѧ ᲂу҆вѣща́нїемъ свои̑мъ и҆сцѣли́лъ є҆сѝ є҆гѡ̀.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ і҃.
Спаса́ѧй дꙋ́ши па́ствы, бг҃омъ тебѣ̀ ввѣ́рєнныѧ, ты̀, ст҃и́телю спѷрїдѡ́не, произволе́нїемъ бж҃їимъ, зва́нъ бы́лъ є҆сѝ ꙗ҆ви́ти сла́вꙋ твою̀, па́че же сла́вꙋ и҆́стиннаго бг҃а, и҆ въ и҆ны́ѧ страны̑, да всю́дꙋ сла́вѧтъ и҆́мѧ бж҃їе, вопїю́ще: А҆ллилꙋ́їа.
І҆́косъ і҃.
Ско́рый помо́щникъ и҆ застꙋ́пникъ во всѧ́кихъ нꙋ́ждахъ и҆ ско́рбѣхъ, ст҃ы́й спѷрїдѡ́нъ, по повелѣ́нїю царе́вꙋ, ꙗ҆́коже и҆ про́чїи па́стыри, прїи́де во гра́дъ а҆нтїохі́ю, и҆дѣ́же бѣ̀ ѡ҆держи́мый болѣ́знїю ца́рь кѡнста́нтїй: ст҃и́тель главы̀ є҆гѡ̀ коснꙋ́сѧ и҆ сотворѝ здра́ва. семꙋ̀ чꙋдесѝ дивѧ́щесѧ, вопїе́мъ тѝ:
Ра́дꙋйсѧ, є҆го́же въ со́нномъ видѣ́нїи а҆́гг҃лъ, ꙗ҆́кѡ цѣли́телѧ, ꙗ҆вѝ царю̀: ра́дꙋйсѧ, бж҃е́ствєнныѧ ра́ди любвѐ трꙋ́дный пꙋ́ть въ ста́рости воспрїѧ́вый.
Ра́дꙋйсѧ, царе́вꙋ рабꙋ̀, ᲂу҆да́рившемꙋ тѧ̀ въ лани́тꙋ, по за́пѡвѣди сп҃си́телѧ, дрꙋгꙋ́ю подста́вивый: ра́дꙋйсѧ, сто́лпе смирє́нїѧ.
Ра́дꙋйсѧ, моли́твами свои́ми сле́знѡ просѧ́щемꙋ царю̀ здра́вїе дарова́вый: ра́дꙋйсѧ, ꙗ҆́кѡ ᲂу҆ничиже́нїемъ свои̑мъ раба̀ вразꙋми́лъ є҆сѝ и҆ неми́лостивый нра́въ є҆гѡ̀ премѣни́лъ є҆сѝ.
Ра́дꙋйсѧ, ꙗ҆́кѡ благоче́стїю и҆ милосе́рдїю царѧ̀ наꙋчи́лъ є҆сѝ: ра́дꙋйсѧ, ꙗ҆́кѡ, ненави́дѧй земна̑ѧ сокро́вища, зла́то царѧ̀ ѿве́рглъ є҆сѝ.
Ра́дꙋйсѧ, ꙗ҆́кѡ ᲂу҆ченика̀ своегѡ̀ трїфѵ́ллїа ѿ пристра́стїѧ къ земны́мъ бла́гамъ ѿврати́лъ є҆сѝ и҆ сосꙋ́дѡмъ бл҃года́ти бж҃їѧ содѣ́лалъ є҆сѝ: ра́дꙋйсѧ, ꙗ҆́кѡ прише́дшꙋ тебѐ въ а҆леѯандрі́ю і҆́дѡли падо́ша.
Ра́дꙋйсѧ, є҆мꙋ́же и҆ бѣ́си повинꙋ́ютсѧ: ра́дꙋйсѧ, ꙗ҆́кѡ ѿ і҆дѡлослꙋжє́нїѧ мно́гихъ ѿврати́лъ є҆сѝ.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ а҃і.
Пѣ́нїе а҆́гг҃льское бы́сть, є҆гда̀ во хра́мѣ приноси́лъ є҆сѝ, ст҃и́телю спѷрїдѡ́не, вечє́рнїѧ моли́твы твоѧ̑, и҆ не бѣ́ша сослꙋжа́щїи тебѐ. жи́телїе же гра́да, ди́вное пѣ́нїе слы́шавше, внидо́ша въ хра́мъ и҆, никогѡ́же ви́дѣвше, съ го́рними си́лами воспѣва́хꙋ: А҆ллилꙋ́їа.
І҆́косъ а҃і.
Свѣтоза́рное со́лнцѣ мі́рови, собесѣ́дникъ а҆́гг҃лѡвъ бы́лъ є҆сѝ на землѝ, ст҃и́телю спѷрїдѡ́не: преда́въ же дꙋ́хъ тво́й въ рꙋ́цѣ бж҃їи, пресели́лсѧ є҆сѝ въ гѡ́рнѧѧ селє́нїѧ, молѧ́сѧ за мі́ръ пред̾ прⷭ҇то́ломъ влады́ки. мы́ же, живꙋ́щїи на землѝ, вопїе́мъ тѝ:
Ра́дꙋйсѧ, ꙗ҆́кѡ тебѐ, є҆щѐ жи́вꙋ сꙋ́щꙋ, сослꙋжа́хꙋ а҆́гг҃ли: ра́дꙋйсѧ, ѱалмопѣ́нїе а҆рха́гг҃ловъ слы́шавый.
Ра́дꙋйсѧ, ви́димый ѻ҆́бразѣ на́шегѡ преѡбражє́нїѧ: ра́дꙋйсѧ, ꙗ҆́кѡ недоста́вшꙋ є҆ле́ю въ хра́мѣ бг҃ъ тебѐ ра́ди съ и҆збы́ткомъ лампа́ды напо́лни тѣ́мъ.
Ра́дꙋйсѧ, лампа́до бж҃е́ственнагѡ сїѧ́нїѧ: ра́дꙋйсѧ, сосꙋ́де благода́ти бж҃їей, ѻ҆би́льнѡ, подо́бнѣ є҆ле́ю, наполнѧ́ющей дꙋ́шꙋ твою̀.
Ра́дꙋйсѧ, неизсѧка́емый и҆сто́чниче, при́снѡ и҆сточа́ющїй всѣ́мъ тѡ́ки бл҃года́ти: ра́дꙋйсѧ, ѡ҆ не́мже и҆зꙋмлѧ́ютсѧ а҆́гг҃ли.
Ра́дꙋйсѧ, преслꙋша́нїе дїа́кона въ хра́мѣ наказа́вый: ра́дꙋйсѧ, тщесла́вившагосѧ свои́мъ гла́сомъ и҆ гла́са, и҆ ѧ҆зы́ка лиши́вый.
Ра́дꙋйсѧ, ꙗ҆́кѡ во вре́мѧ зно́ѧ, внеза́пꙋ роса̀, снизше́дшаѧ свы́ше, сщ҃е́ннꙋю твою̀ главꙋ̀ прохладѝ: ра́дꙋйсѧ, въ зна́менїи се́мъ бли́зость преставлє́нїѧ своегѡ̀ прови́дѣвый.
Ра́дꙋйсѧ, спѷрїдѡ́не, преди́вный чꙋдотво́рче.
Конда́къ в҃і.
Покро́въ и҆ прибѣ́жище бы́вый всѣ́мъ къ тебѣ̀ притека́ющымъ вѣ̑рнымъ є҆щѐ въ житїѝ твое́мъ, ты̀, ст҃и́телю, не ѡ҆ста́вилъ є҆сѝ на́съ си́рыхъ и҆ по твое́мъ ᲂу҆спе́нїи: бг҃ъ, побѣжда́ющїй є҆стества̀ чи́нъ, сохранѝ ст҃ы́ѧ мѡ́щи твоѧ̑ нетлѣ́нными во ᲂу҆крѣпле́нїе правосла́вныѧ вѣ́ры и҆ благоче́стїѧ, въ зна́менїе безсме́ртїѧ, є҆го́же прославлѧ́юще, вопїе́мъ: А҆ллилꙋ́їа.
І҆́косъ в҃і.
Воспѣва́емъ тѧ̀, ст҃и́телю бж҃їй, ꙗ҆́кѡ ᲂу҆диви́лъ є҆сѝ мі́ръ чꙋдесы̀, и҆стека́ющими ѿ ст҃ы́хъ моще́й твои́хъ. всѝ бо съ вѣ́рою приходѧ́щїи и҆ лобыза́ющїи и҆́хъ полꙋча́ютъ всѧ̑ бл҃гопотрє́бнаѧ проси́маѧ. и҆ мы̀, да́вшагѡ тебѣ̀ крѣ́пость, вѣнча́вшагѡ тѧ̀ вѣнцє́мъ нетлѣ́нїѧ и҆ дѣ́йствꙋющагѡ тобо́ю бг҃а прославлѧ́юще, вопїе́мъ тѝ:
Ра́дꙋйсѧ, во вре́мѧ гла́да корабе́льникѡмъ ꙗ҆ви́выйсѧ, и҆ пи́щꙋ доста́вити повелѣ́вый: ра́дꙋйсѧ, слѣпы́мъ, съ вѣ́рою прите́кшимъ къ ст҃ы́мъ мощє́мъ твои́мъ, зрѣ́нїе дарова́вый.
Ра́дꙋйсѧ, ѿ неисцѣ́льныѧ болѣ́зни ѻ҆́трока и҆сцѣли́вый: ра́дꙋйсѧ, бѣ́са и҆з̾ жєны̀ и҆згна́вый и҆ здра́вꙋ ю҆̀ сотвори́вый.
Ра́дꙋйсѧ, возбра́нный воево́до керкѵ́ры: ра́дꙋйсѧ, ꙗ҆́кѡ пѡ́лчища ѕлочести́выхъ а҆га̑рѧнъ и҆згна́лъ є҆сѝ и҆ кораблѝ и҆́хъ въ пꙋчи́нѣ потопи́лъ є҆сѝ.
Ра́дꙋйсѧ, є҆го́же ви́дѣша ѡ҆крꙋже́ннаго со́нмомъ а҆́гг҃ловъ, въ десни́це ме́чь держа́вша и҆ въ тре́петъ врагѡ́въ приве́дша: ра́дꙋйсѧ, созда́ти себѣ̀ хра́мъ, во є҆́же соверша́ти въ нѣ́мъ лїтꙋргі́ю на пре́сномъ хлѣ́бѣ, воево́дѣ возбрани́вый.
Ра́дꙋйсѧ, воево́дꙋ латі́нскагѡ лю́тою сме́ртїю порази́вый: ра́дꙋйсѧ, мо́лнїею и҆зѡбраже́нїе є҆гѡ̀ въ до́мѣ въ вене́цїи соже́гшїй.
Ра́дꙋйсѧ, ѿстꙋ́пльства и҆ лжемꙋдрова́нїѧ за́пада посрами́вый: ра́дꙋйсѧ, є҆ди́нꙋю правосла́внꙋю вѣ́рꙋ бы́ти и҆́стиннꙋю и҆ спаси́тельнꙋю длѧ человѣ́кѡвъ ᲂу҆тверди́вый.
Ра́дꙋйсѧ, спѷрїдѡ́не, преди́вный чꙋдотво́рче!
Конда́къ г҃і.
Ѽ пречꙋ́дный ст҃и́телю хрⷭ҇то́въ, ѻ҆́тче спѷрїдѡ́не! ны́нешнее на́ше моле́нїе прїе́мъ, и҆зба́ви на́съ ѿ всѣ́хъ бѣ́дъ и҆ напа́стей, ᲂу҆крѣпѝ на врагѝ странꙋ̀ на́шꙋ, да́рꙋй на́мъ ѡ҆ставле́нїе прегрѣше́нїй и҆ и҆змѝ ѿ вѣ̑чныѧ сме́рти всѣ́хъ вопїю́щихъ ѡ҆ тебѐ къ бг҃ꙋ: А҆ллилꙋ́їа!
Се́й конда́къ глаго́ли г҃-жды, та́же і҆́косъ а҃-й и҆ конда́къ а҃-й.
Моли́тва а҃.
Ѽ вели́кїй и҆ пречꙋ́дный ст҃и́телю хрⷭ҇то́въ и҆ чꙋдотво́рче спѷрїдѡ́не, керкѵ́рскаѧ похвало̀, всеѧ̀ вселє́нныѧ свѣти́льниче пресвѣ́тлый, те́плый къ бг҃ꙋ моли́твенниче и҆ всѣ́мъ къ тебѣ̀ прибѣга́ющымъ и҆ съ вѣ́рою молѧ́щымсѧ скоропредста́тельный застꙋ́пниче! ты̀ вѣ́рꙋ правосла́внꙋю на нїке́йстѣмъ собо́рѣ посрѣдѐ ѻ҆тцє́въ пресла́внѡ и҆з̾ѧсни́лъ є҆сѝ, трїеди́нство ст҃ы́ѧ трⷪ҇цы чꙋде́сною си́лою показа́лъ є҆сѝ и҆ є҆ретїкѡ́въ до конца̀ посрами́лъ є҆сѝ. ᲂу҆слы́ши на́съ, грѣ́шныхъ, ст҃и́телю хрⷭ҇то́въ, молѧ́щихсѧ тебѐ, и҆ си̑льнымъ твои́мъ предста́тельствомъ ᲂу҆ гдⷭ҇а и҆зба́ви на́съ ѿ всѧ́кагѡ ѕла́го ѡ҆бстоѧ́нїѧ: ѿ гла́да, пото́па, ѻ҆гнѧ̀ и҆ смертонѡ́сныѧ ꙗ҆́звы. ты̀ бо во вре́меннѣй жи́зни свое́й ѿ всѣ́хъ си́хъ бѣ́дствїй и҆збавлѧ́лъ є҆сѝ люде́й твои́хъ: ѿ нашє́ствїѧ а҆га̑рѧнъ и҆ ѿ гла́да странꙋ̀ твою̀ сохрани́лъ є҆сѝ, царѧ̀ ѿ неисцѣ́льнагѡ недꙋ́га и҆зба́вилъ и҆ мнѡ́гїѧ грѣ́шники къ покаѧ́нїю приве́лъ є҆сѝ, ме́ртвыхъ пресла́внѡ воскреша́лъ є҆сѝ, за ст҃ость же житїѧ̀ твоего̀ а҆́гг҃лы неви́димѡ въ це́ркви пою́щїѧ и҆ сослꙋжа́щїѧ тебѐ и҆мѣ́лъ є҆сѝ. си́це ᲂу҆́бѡ просла́ви тебѐ, вѣ́рнаго своегѡ̀ раба̀, влады́ка хрⷭ҇то́съ, ꙗ҆́кѡ всѧ̑ та́йнаѧ человѣ̑ческаѧ дѣѧ́нїѧ дарова̀ тебѣ̀ разꙋмѣ́ти и҆ ѡ҆блича́ти непра́вѣднѡ живꙋ́щїѧ. мнѡ́гимъ въ скꙋ́дости и҆ недоста́точествѣ живꙋ́щимъ ты̀ ᲂу҆се́рднѡ помога́лъ є҆сѝ, лю́ди ᲂу҆бѡ́гїѧ и҆зѡби́льнѡ во вре́мѧ гла́да напита́лъ є҆сѝ и҆ и҆́на мнѡ́га зна́менїѧ си́лою въ тебѐ живꙋ́щаго дх҃а бж҃їѧ сотвори́лъ є҆сѝ. си́це и҆ на́съ не ѡ҆ста́ви, ст҃и́телю хрⷭ҇то́въ, помина́й на́съ, ча́дъ свои́хъ, ᲂу҆ престо́ла вседержи́телѧ и҆ ᲂу҆молѝ гдⷭ҇а, да пода́стъ мно́гихъ на́шихъ грѣхѡ́въ проще́нїе, безбѣ́дное и҆ ми́рное житїѐ да да́рꙋетъ на́мъ, кончи́ны же живота̀ непосты́дныѧ и҆ ми́рныѧ и҆ блажє́нства вѣ́чнагѡ въ бꙋ́дꙋщемъ вѣ́цѣ сподо́битъ на́съ, да вы́нꙋ возсыла́емъ сла́вꙋ и҆ благодаре́нїе ѻ҆ц҃ꙋ̀, и҆ сн҃ꙋ, и҆ дх҃ꙋ ст҃о́мꙋ, ны́нѣ, и҆ при́снѡ, и҆ во вѣ́ки вѣкѡ́въ. А҆ми́нь.
Моли́тва в҃.
Ѽ всеблаже́нне ст҃и́телю спѷрїдѡ́не, вели́кїй ᲂу҆го́дниче хрⷭ҇то́въ и҆ пресла́вный чꙋдотво́рче! предстоѧ́й на нб҃сѝ прⷭ҇то́лꙋ бж҃їю съ ли́ки а҆́гг҃лъ, при́зри ми́лостивымъ ѻ҆́комъ на предстоѧ́щыѧ здѣ̀ лю́ди и҆ просѧ́щыѧ си́льныѧ твоеѧ̀ по́мощи. ᲂу҆молѝ благоꙋтро́бїе человѣколю́бца бг҃а, да не ѡ҆сꙋ́дитъ на́съ по беззако́нїимъ на́шимъ, но да сотвори́тъ съ на́ми по ми́лости свое́й! и҆спросѝ на́мъ ᲂу҆ хрⷭ҇та̀ и҆ бг҃а на́шегѡ ми́рное и҆ безмѧте́жное житїѐ, здра́вїе дꙋше́вное и҆ тѣле́сное, землѝ благопло́дїе и҆ во всѣ́мъ всѧ́кое и҆зоби́лїе и҆ благоде́нствїе, и҆ да не во ѕло̀ ѡ҆брати́мъ блага̑ѧ, да́рꙋємаѧ на́мъ ѿ ще́драго бг҃а, но во сла́вꙋ є҆гѡ̀ и҆ въ прославле́нїе твоегѡ̀ застꙋпле́нїѧ! и҆зба́ви всѣ́хъ вѣ́рою несꙋмне́нною къ бг҃ꙋ приходѧ́щихъ ѿ всѧ́кихъ бѣ́дъ дꙋше́вныхъ и҆ тѣле́сныхъ. ѿ всѣ́хъ томле́нїй и҆ дїа́вольскихъ навѣ́тѡвъ! бꙋ́ди печа́льнымъ ᲂу҆тѣ́шитель, недꙋ́гꙋющымъ вра́чъ, въ напа́стѣхъ помо́щникъ, наги́мъ покрови́тель, вдови́цамъ застꙋ́пникъ, си̑рымъ защи́тникъ, младе́нцємъ пита́тель, ста̑рымъ ᲂу҆крѣпи́тель, стра́нствꙋющимъ пꙋтево́ждь, пла́вающимъ ко́рмчїй и҆ и҆схода́тайствꙋй всѣ́мъ крѣ́пкїѧ по́мощи твоеѧ̀ тре́бꙋющимъ всѧ̑, ꙗ҆́же ко спасе́нїю, полѣ̑знаѧ! ꙗ҆́кѡ да твои́ми моли́твами наставлѧ́еми и҆ соблюда́еми, дости́гнемъ въ вѣ́чный поко́й и҆ кꙋ́пнѡ съ тобо́ю просла́вимъ бг҃а, въ трⷪ҇це ст҃ѣ́й сла́вимаго, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ, и҆ при́снѡ и҆ во вѣ́ки вѣкѡ́въ. А҆ми́нь.
Моли́тва г҃.
Ѽ преблаже́нне ст҃и́телю спѷрїдѡ́не! ᲂу҆молѝ благосе́рдїе человѣколю́бца бг҃а, да не ѡ҆сꙋ́дитъ на́съ по беззако́нїємъ на́шимъ, но да сотвори́тъ съ на́ми по ми́лости свое́й. и҆спросѝ на́мъ, рабѡ́мъ бж҃їимъ (и҆мена̀), ᲂу҆ хрⷭ҇та̀ и҆ бг҃а на́шегѡ ми́рное и҆ безмѧте́жное житїѐ, здра́вїе дꙋше́вное и҆ тѣле́сное. и҆зба́ви на́съ ѿ всѧ́кихъ бѣ́дъ дꙋше́вныхъ и҆ тѣле́сныхъ, ѿ всѣ́хъ томле́нїй и҆ дїа́вольскихъ навѣ́тѡвъ. помина́й на́съ ᲂу҆ прⷭ҇то́ла вседержи́телѧ и҆ ᲂу҆молѝ гдⷭ҇а, да пода́стъ мно́гихъ на́шихъ грѣхѡ́въ проще́нїе, безбѣ́дное и҆ ми́рное житїѐ, да да́рꙋетъ на́мъ, кончи́ны же живота̀ непосты́дныѧ и҆ ми́рныѧ и҆ блажє́нства вѣ́чнагѡ въ бꙋ́дꙋщемъ вѣ́цѣ сподо́битъ на́съ, да непреста́ннѡ возсыла́емъ сла́вꙋ и҆ благодаре́нїе ѻ҆ц҃ꙋ̀ и҆ сн҃ꙋ и҆ дх҃ꙋ ст҃о́мꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.